პრემიერის თქმით, გერმანიის ბუნდესტაგში მიღებულ იქნა აბსოლუტურად უსამართლო რეზოლუცია.

„მე უხერხულობას მიქმნის ის, რომ გერმანიის ბუნდესტაგში მიღებულ იქნა აბსოლუტურად უსამართლო რეზოლუცია. ეს არის ისეთი რეზოლუცია, რომელსაც არავითარი კავშირი არ აქვს სამართლიანობასთან, პრინციპებთან, რაც ძალიან სამწუხაროა. როდესაც ბუნდესტაგი იღებს ისეთ რეზოლუციას, სადაც ითხოვს კიდევ ერთხელ იმ ადამიანების დასჯას, რომლებსაც ამ ქვეყანაში დემოკრატიული გარდატეხა აქვთ განხორციელებული, როცა ბუნდესტაგის რეზოლუცია ეფარება კრიმინალებს, როცა ითხოვენ ლგბტ პროპაგანდის წინააღმდეგ კანონის არმიღებას და ა.შ. ეს არის შემაშფოთებელი და სწორედ ეს არის, რაც ქმნის უხერხულობას. ჩემთვისაც უხერხულობის შემცველია ეს ყველაფერი, გამომდინარე ჩემი განსაკუთრებული დამოკიდებულებიდან გერმანიის ბუნდესტაგის, პარლამენტის ინსტიტუტის მიმართ, თუმცა ყველაზე მეტი უხერხულობა ამ რეზოლუციამ თავად შესაბამის ბუნდესტაგის წევრებს უნდა შეუქმნას. ვინც მიიღო რეზოლუცია, სწორედ ეს ადამიანები უნდა გრძნობდნენ უხერხულობას. ჩვენი საქმე არ არის, ვინ რა პოზიციით გამოვიდა გერმანიის ბუნდესტაგში, ჩვენთვის სამწუხარო მოვლენაა, რომ გერმანიის ბუნდესტაგმა მიიღო უკიდურესად უსამართლო რეზოლუცია, რაც არ შეშვენის გერმანიის პარლამეტს“, - განაცხადა პრემიერმა.

იუსტიციის მინისტრი რატი ბრეგაძე სამინისტროს თანამშრომლებს პროფესიულ დღეს ულოცავს.

„დღეს საქართველოს სამართლებრივი უსაფრთხოებისა და ადამიანის უფლებების დაცვის სადარაჯოზე მუხლჩაუხრელად მდგომი, უწყვეტ და ინოვაციურ განვითარებაზე დაუღალავად მზრუნველი მაგარი ხალხის პროფესიული დღეა!

გილოცავთ მეგობრებო, მეამაყება, რომ ერთ-ერთი თქვენგანი ვარ.

წინ ბევრი გამარჯვებაა“, - წერს რატი ბრეგაძე სოციალურ ქსელში.

მე აბსოლუტურად ვიზიარებ იმ განცხადებას, რომელიც გააკეთა საპარლამენტო უმრავლესობის ლიდერმა და პარტიის აღმასრულებელმა მდივანმა - „ლელო“ და გახარიას პარტია არის გამორჩეულად საშიში პოლიტიკური სუბიექტი ამ ქვეყანაში, - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა.

პრემიერის თქმით, ხაზარაძე პირდაპირ იყო ჩართული მაშინდელი რეჟიმის დანაშაულებრივ ქმედებებში, რაც განსაკუთრებით უკავშირდებოდა ბიზნესის რეკეტს. რაც შეეხება გახარიას, პრემიერის თქმით, როცა იყო შინაგან საქმეთა მინისტრი, ის მიზანმიმართულად აკეთებდა ყველაფერს იმისათვის, რომ ერთმანეთთან დაეპირისპირებინა სახელმწიფო და მოქალაქეები.

„მე აბსოლუტურად ვიზიარებ იმ განცხადებას, რომელიც გააკეთა საპარლამენტო უმრავლესობის ლიდერმა და პარტიის აღმასრულებელმა მდივანმა. „ლელო“ და გახარიას პარტია არის გამორჩეულად საშიში პოლიტიკური სუბიექტი ამ ქვეყანაში. რაც შეეხება „ნაცმოძრაობას და „ახალს“, რომელიც შედგება „ნაცმოძრაობის“ სახეებისგან, მათთან დაკავშირებით ყველამ ყველაფერი იცის. მათ აქვთ პირდაპირი კავშირი წინა რეჟიმთან, წარმოადგენდნენ წინა რეჟიმს, მაშინდელ ხელისუფლებას. რაც შეეხება ხაზარაძეს, ის პირდაპირ არ წარმოადგენდა მაშინდელ ხელისუფლებას, ამიტომ, შეიძლება საზოგადოების გარკვეული ნაწილი შევიდეს შეცდომაში, თუმცა ყველას მინდა შევახსენო, რომ ის პირდაპირ იყო ჩართული მაშინდელი რეჟიმის დანაშაულებრივ ქმედებებში, რაც განსაკუთრებით უკავშირდებოდა ბიზნესის რეკეტს. კიდევ ერთხელ უნდა გავიხსენო ის საქმეები, რომელიც უკავშირდებოდა კომპანია „მაგნატს“, „ელიტ ელექტრონისს“, „კონსტანტას“, ღამე კომპანიების, წილების გადაფორმება, ამ ყველაფერში იყო სამწუხაროდ ჩართული ეს კონკრეტული ადამიანი და ეს ყველაფერი უნდა შევახსენოთ საზოგადოებას. რაც შეეხება გახარიას, მე მისი ქმედებები მინდა შეგახსენოთ, რაც გაიხსენა მამუკა მდინარაძემ. როცა იყო შინაგან საქმეთა მინისტრი, ის მიზანმიმართულად აკეთებდა ყველაფერს იმისათვის, რომ ერთმანეთთან დაეპირისპირებინა სახელმწიფო და მოქალაქეები, პოლიცია და ახალგაზრდები. ყველა შესაბამისი მოქმედება, რასაც ის ახორციელებდა, ამ მიზანს ემსახურებოდა. ეს იყო მისი დავალება, ის, როგორც უცხოელი აგენტი, ისე მოქმედებდა. იღებდა დავალებებს, და ეს დავალებები ემსახურებოდა სახელმწიფო ინსტიტუტების, განსაკუთრებით სამართალდამცავი ორგანოების და მოქალაქეების ერთმანეთთან დაპირისპირებას. ამას უკავშირდებოდა პანკისში რაც მოხდა, რაც მოხდა მესტიაში, „ბასიანში“ და ამას უკავშირდებოდა, რაც მოხდა 20 ივნისს. კიდევ ერთხელ შეგახსენებთ ჩორჩანას ამბავს და ასევე იმას შეგახსენებთ, რომ ამ ქმედებაზე არავითარი რეაქცია არ ჰქონდა მაშინ „ნაცმოძრაობასთან“ დაკავშირებულ“ არც ერთ ტელევიზიას, იმიტომ, რომ მარტივად გადაეფარნენ გახარიას, რომელიც იმართება ზუსტად იგივე ხალხისგან, რომლებისგანაც იმართება „ნაცმოძრაობასთან“ დაკავშირებული ტელევიზიები, ესენი არიან უცხოელი პატრონები“, - განაცხადა პრემიერმა.

ირაკლი კობახიძის თქმით, ყველა ეს პარტია ერთობლიობაში შეადგენს კოლექტიურ „ნაცმოძრაობას“, რასაც საზოგადოებამ უნდა უთხრას უარი 26 ოქტომბერს.

„ამ კავშირს არავითარი დამატებითი მტკიცებულება, პრინციპში, არ სჭირდებოდა - გახარიას პარტიას აქვს კოალიცია პირდაპირ შექმნილი „ნაცმოძრაობასთან“, 4 მუნიციპალიტეტში. ამაზე მჭიდრო კავშირი არ შეიძლება პოლიტიკაში არსებობდეს ორ პარტიას შორის. თუმცა ის ფაქტი, რომ სიის მეორე ნომერი არის ადეიშვილის პროკურორი, ფაქტი, რომ სიის ათეულში ჰყავს თავის დროზე ადეიშვილის ყოფილი მოადგილე, მერაბიშვილის კადრი ჰყავს ათეულში და ა.შ. ეს ყველაფერი მეტყველებს იმაზე, რომ არავითარი ზღვარი არ არსებობს სინამდვილეში გახარიას პარტიასა და „ნაცმოძრაობას“ შორის. ყველა ეს პარტია ერთობლიობაში შეადგენს კოლექტიურ „ნაცმოძრაობას“, ამიტომ საზოგადოებამ ყველას ერთად უნდა უთხრას უარი 26 ოქტომბერს,“- განაცხადა პრემიერმა.

ცენტრალური საარჩევნო კომისია ისრაელში საარჩევნო უბნის გაუქმების საკითხს ამ ეტაპზე არ განიხილავს.

შესაბამისი განცხადება ცესკო-ს სხდომაზე ცენტრალური საარჩევნო კომისიის თავმჯდომარე გიორგი კალანდარიშვილმა გააკეთა. მან კოლეგებს ცესკოსადმი საგარეო საქმეთა სამინისტროს ის მიმართვა გააცნო, სადაც უწყება ინსტიტუციას, საქართველოს მოქალაქეების უსაფრთხოებიდან გამომდინარე, ისრაელში საარჩევნო უბნის დახურვას სთხოვს.

„ცესკო-ს მომართა საგარეო საქმეთა სამინისტრომ, რომლითაც ინფორმაცია მოგვეწოდა ისრაელში არსებულ მდგომარეობასთან დაკავშირებით, რომელიც დაკავშირებულია თელავივში საარჩევნო უბნის არსებობასთან. აღნიშნული წერილით მოგვეწოდა ინფორმაცია იმ გარემოებებისა და რისკების შესახებ, რომელიც დღეს ქვეყანაში არსებობს და რომელიც, მათ შორის, შესაძლოა, კენჭისყრის დღესთან მიმართებით არსებობდეს. აქ საუბარია იმაზე, რომ განგაშის სიგნალის შემთხვევაში სავალდებულოა პირების განთავსება ე.წ. საფარში. ასევე, აღნიშნულია გარემოებაზე, რა დროსაც, 1-ელ ოქტომბერს, დაბომბვის დროს, საელჩოს თანამშრომლებს მოუწიათ დაცულ ოთახში ყოფნა. საყურადღებოა ის გარემოებაც, რომ განგაშის სიგნალი, შესაძლოა, რამდენჯერმე განმეორდეს. ვინაიდან რისკები და გარემოებები არის იდენტიფიცირებული. ცხადია, ეს თავის მხრივ ნიშნავს იმას, რომ საარჩევნო უბნის არსებული მოცემულობით შენარჩუნების შემთხვევაში, შესაძლოა, კენჭისყრის დღეს, თეორიულად რამდენჯერმე გამოცხადდეს განგაში, რამაც, შესაძლოა, შეუძლებელი გახადოს კენჭის ყრის დღის სრულყოფილად განხორციელება და ჩატარება. არჩევნებამდე 15 დღეა დარჩენილი. უბნის გაუქმება ყოველთვის არის შესაძლებელი, საარჩევნო უბნის აღდგენა, დაბრუნება შეუძლებელი იქნება. ამიტომ, მიზანშეწონილად მიმაჩნია, რომ ამ ეტაპზე კომისიამ გააგრძელოს თავისი საქმიანობა“, - განაცხადა კალანდარიშვილმა.

26 ოქტომბრის არჩევნებისთვის საზღვარგარეთ 42 ქვეყნის 53 ქალაქში 67 საარჩევნო უბანი გაიხსნება - ასეთია ამ ეტაპზე ცესკოს მიერ მიღებული გადაწყვეტილებების შედეგი. ამ დროისთვის საზღვარგარეთ ხმის მიცემის უფლების მქონე ამომრჩეველთა რაოდენობა შეადგენს 95 834-ს.

სტრასბურგში საარჩევნო უბნის გახსნის საკითხს დღეს ცენტრალურ საარჩევნო კომისიის სხდომაზე ხმაური და დაპირისპირება მოჰყვა.

ოპოზიციის წარმომადგენლის გიორგი სიორიძის განცხადებით, სტრასბურგში არის ამომრჩევლების ის რაოდენობა, რაც საარჩევნო უბნის გახსნას ითვალისწინებს. პოლიტიკური ნების არსებობის შემთხვევაში კი უბნის გახსნა დიპლომატიურ წარმომადგენლობაშიც მოხდებოდა. მისი თქმით, ამ საკითხის მოგვარებაში შესაძლებელი იქნებოდა პრეზიდენტის კავშირების გამოყენება.

სიორიძეს ცესკოს თავმჯდომარემ უპასუხა და განაცხადა, რომ სტრასბურგის საკითხი დღევანდელი სხდომის დღის წესრიგში საერთოდ არ შედიოდა. გიორგი კალანდარიშვილმა ოპოზიციის განცხადებები საზღვარგარეთ 7 დამატებითი უბნის გახსნის პოზიტიური ნაბიჯის გადაფარვად შეაფასა

რაც შეეხება ისრაელს, საქართველოს საგარეო უწყების მოთხოვნით მოსალოდნელია თუ არა იქ არსებული საომარი ვითარების გამო საარჩევნო უბნის გაუქმება, ამ საკითხთან დაკავშირებით ცესკოს გადაწყვეტილება არ მიუღია და ეტაპზე უბანი გახსნილი რჩება.

აბსოლუტურად რეალურია მშვიდობიანი გზით საქართველოს ტერიტორიული მთლიანობის აღდგენა, - ამის შესახებ საქართველოს პრემიერ-მინისტრმა ირაკლი კობახიძემ აჭარის საზოგადოებრივი მაუწყებლის გადაცემა “თავისუფალ სივრცეში” განაცხადა.

მთავრობის მეთაურის თქმით, არის ყველანაირი რესურსი იმისათვის, რომ გამოიკვეთოს დადებითი ტენდენციები.

„რაც შეეხება ტერიტორიული მთლიანობის აღდგენას, ეს არის ისეთი თემა, რაზეც საჯაროდ საუბარი არის რთული. არის უამრავი ნიუანსი, ბევრი რამ იქნება დამოკიდებული რეგიონული, გლობალური ვითარების ცვლილებაზე, თუმცა არის ყველანაირი რესურსი იმისათვის, რომ აქ გამოიკვეთოს დადებითი ტენდენციები. 1988 წელს დაიწყო მასშტაბური დისიდენტური მოძრაობა და მაშინაც კი, არავის სჯეროდა, რომ საბჭოთა კავშირი შეიძლებოდა დაშლილიყო, თუმცა 1991 წლის ბოლოს საბჭოთა კავშირი დაიშალა. ბევრი რამ იქნება დამოკიდებული ასეთი ტიპის პროცესებზე. მე ვფიქრობ, რომ აბსოლუტურად რეალურია მშვიდობიანი გზით საქართველოს ტერიტორიული მთლიანობის აღდგენა. მთელი ჩვენი ძალისხმევა ამ ორი ეროვნული ამოცანის მიღწევისკენ უნდა იყოს მიმართული - სიღარიბის დაძლევა და ტერიტორიული მთლიანობის აღდგენა. მთავარია პრაგმატული პოლიტიკა, თანმიმდევრულობა, სიმშვიდის შენარჩუნება და მოთმინების გამოვლენა. ასეთ შემთხვევაში ყველაფერი არის აბსოლუტურად რეალური“,- განაცხადა პრემიერმა.

გამჭვირვალობის შესახებ კანონი ითვალისწინებს მექანიზმებს, თუ NGO, ორგანიზაცია თვითონ არ ავსებს საკუთარ დეკლარაციას, ამ შემთხვევაში იუსტიციის სამინისტროს შეუძლია მოიძიოს ინფორმაცია და თავად შეუძლია შეავსოს მათ ნაცვლად ეს დეკლარაცია, გამჭვირვალე გახდება, - ამის შესახებ საქართველოს პრემიერ-მინისტრმა ირაკლი კობახიძემ აჭარის საზოგადოებრივი მაუწყებლის გადაცემა “თავისუფალ სივრცეში” განაცხადა.

პრემიერის თქმით, იდენტური კანონის მიღების პროცესი იყო დაწყებული ევროკავშირში, თუმცა გააჩერეს, კანონი ჩათვალეს რომ არის კარგი, მაგრამ ვერ იღებენ იმის გამო, რომ ვეღარ მოგვთხოვენ მერე იგივე შინაარსის კანონის უკან გახმობას.

რადგან ვსაუბრობთ ამ კანონზე, ერთი საინტერესო დეტალია. როგორც მოგეხსენებათ, ევროკავშირში დაწყებული იყო იდენტური კანონის მიღების პროცესი, პრინციპები იყო ზუსტად იგივე და გააჩერეს და საინტერესო რა არის - განმარტებითი ბარათი არის გამოქვეყნებული ოფიციალურად, სადაც წერია გაჩერების მიზეზი და იქ წერია ასეთი რაღაც, რომ ჩვენ თუ ამ კანონს მივიღებთ, ამ შემთხვევაში საქართველოსთან აღარ გვექნება მორალური უფლება, რომ მოვთხოვოთ არსებული კანონის გამოხმობაო. წარმოიდგინეთ რა ხდება საერთოდ ევროკავშირის სტრუქტურებში, როგორია ის გავლენები, რომლებიც საერთოდ რევს ვითარებას ევროკავშირის ოფიციალურ სტრუქტურებში. კანონი ჩათვალეს რომ არის კარგი, მაგრამ ვერ იღებენ იმის გამო, რომ ჩვენ ვეღარ მოგვთხოვენ მერე იგივე შინაარსის კანონის უკან გახმობას. წარმოუდგენელი რაღაცები ხდება, რაც ქართულმა საზოგადოებამ უნდა გაითვალისწინოს. ზოგადად, რაც ხდებოდა ამ კანონის გარშემო, ეს იყო საუკუნის აფიორა და ყველაზე სამწუხარო ის არის, რომ ამ საუკუნის აფიორაში ჩართული იყვნენ და დღემდე არიან ჩართული, მათ შორის, უცხოელები, მაღალი დონის დიპლომატები, პოლიტიკოსები. ასეთი აფიორები უნდა დასრულდეს ჩვენს ქვეყანაში. ქართულ საზოგადოებას აქვს უფლება იცოდეს, ვინ ცდილობს რევოლუციების მოწყობას ამ ქვეყანაში და სწორედ ამას ეძღვნება გამჭვირვალობის შესახებ კანონი“, - განაცხადა პრემიერ-მინისტრმა.

მთავრობის მეთაურის თქმით, აქამდე სანქციებთან დაკავშირებით მოთხოვნას დახურულ კარს მიღმა აყენებდნენ, ახლა კი ეს ევროპარლამენტმა საჯაროდ გააჟღერა.

„მე ვერ ვისაუბრებ იმ შეხვედრების შინაარსზე, რომელიც შედგა დახურულ კარს მიღმა ერთი მარტივი მიზეზის გამო. აქაც ვუფრთხილდებით ურთიერთობებს, ველით ურთიერთობების გადატვირთვას, როცა ომი დასრულდება. თუმცა მინდა შეგახსენოთ ის, რაც ხდებოდა საჯარო სივრცეში და ამის გაგრძელებაა, სხვათაშორის, ერთ-ერთი მნიშველოვანი ჩანაწერი ევროპარლამენტის რეზოლუციაში. როდესაც უკრაინაში დაიწყო ომი, 2022 წლის 24 თებერვალს, მეორე დღიდან ოპოზიცია გამოვიდა ქუჩაში. ერთადერთი ქვეყანა ვიყავით, სადაც ომის დაწყებასთან ერთად გვქონდა ოპოზიციის აქციები ქუჩაში. მათ ჰქონდათ ორი კონკრეტული მოთხოვნა - ერთი, ეს იყო სანქციებთან მიერთება და მეორე იყო უკრაინაში, მთავრობის ოფიციალური თანხმობით, მებრძოლი მოხალისეების გაგზავნა. პირდაპირი რიტორიკა იყო ომთან დაკავშირებით, შეგახსენებთ ლომჯარიას, უსუფაშვილის, ჭიაბერაშვილის, მარგველაშვილის და სხვათა განცხადებებს. პირდაპირი რიტორიკა. ამას მოგვიანებით, რამდენიმე დღეში დაემატა უკრაინის ხელისსუფლების მაღალჩინოსნების პირდაპირი მოწოდებები მეორე ფრონტთან დაკავშირებით, იყო ძალიან ფართო კოორდინაცია - ოპოზიცია, „ენჯეოები“, უკრაინის ხელისუფლების მაღალჩინოსნები, კონკრეტული უცხოელები, რომლებიც აქეთკენ გვექაჩებოდნენ. საბოლოო ჯამში, ორივე მოთხოვნა, ნიშნავდა ომისკენ სვლას. ირიბი და პირდაპირი ფორმით. რაც შეეხება სანქციებს და საინტერესო რა არის, რომ დღეს, როგორც იქნა, საჯაროდ გამოფინა ეს მოთხოვნა ევროპარლამენტმა, ამდენი ხნის განმავლობაში, ამ დახურულ მოთხოვნას არ გვიყენებდნენ საჯაროდ, გაურბოდნენ. იქ იყო კონკრეტული ქვეყნის პრეზიდენტის განცხადება, კონკრეტული პოლიტიკოსის განცხადება, „ლელოს“ აქვს თავის პროგრამაში შეტანილი ეს ყველაფერი და ა.შ. მაგრამ როგორც ასეთი, მაღალი დონის მოთხოვნა გაჟღერებული არ ყოფილა ამასთან დაკავშირებით, ყველა ერიდებოდა, ელჩები ერიდებოდნენ, ქვეყნები ერიდებოდნენ, ევროპარლამენტი ერიდებოდა. პირველად გაბედა ევროპარლამენტმა და საჯაროდ გაახომოვანა ის, რასაც ითხოვდნენ ჩვენგან ვიღაც-ვიღაცეები და რასაც უნდა გამოეწვია ამ ქვეყანაში ეკონომიკური კოლაფსი. ეკონომიკური კოლაფსი იყო საუკეთესო გზა, რომელიც მიდიოდა, საბოლოო ჯამში, ომამდე,“- განაცხადა პრემიერმა.

რუსთავის საქალაქო სასამართლომ სრულად გაიზიარა პროკურატურის მიერ წარდგენილი მტკიცებულებები და სოფელ ვახტანგისში, დამამძიმებელ გარემოებებში ჩადენილი განზრახ მკვლელობის მცდელობის ფაქტზე ბრალდებულები დამნაშავედ ცნო.

"სასამართლო პროცესზე გამოკვლეული მტკიცებულებებით დადასტურდა, რომ 21 იანვარს, გარდაბნის მუნიციპალიტეტის სოფელ ვახტანგისში, ბრალდებული და მისი დისშვილი, ბრალდებულის ყოფილი მეუღლის სახლში მივიდნენ, სადაც ბრალდებულმა გენდერის ნიშნით შეუწყნარებლობის მოტივით, ყოფილ მეუღლეს დანით ზურგის არეში, სიცოცხლისთვის სახიფათო, მძიმე დაზიანებები მიაყენა. ბრალდებულის თანმხლები პირი დაზარალებულს აკავებდა და გაქცევის შესაძლებლობას არ აძლევდა. გადაუდებელი სამედიცინო დახმარების შედეგად, დაზარალებულის სიცოცხლის გადარჩენა მოხერხდა.

დაკავებულებს ბრალდება დამამძიმებელ გარემოებებში ჩადენილი განზრახ მკვლელობის მცდელობის ფაქტებზე წარედგინათ.

რუსთავის საქალაქო სასამართლომ ოჯახის წევრის მიმართ დამამძიმებელ გარემოებებში, განზრახ მკვლელობის მცდელობისთვის ბრალდებული სრულად ცნო დამნაშავედ წარდგენილ ბრალდებაში და სასჯელის სახედ და ზომად 17 წლით თავისუფლების აღკვეთა განუსაზღვრა, ხოლო ბრალდებულის ნათესავს ასევე, დამამძიმებელ გარემოებებში ჩადენილი განზრახ მკვლელობის მცდელობისათვის 16 წლით თავისუფლების აღკვეთა მიესაჯა." ნათქვამია პროკურატურის მიერ გავრცელებულ ინფორმაციაში.

მსოფლიოში ერთ-ერთმა ყველაზე გავლენიანმა ბრიტანულმა კომპანია SAVANTA-მ ტელეკომპანია "მთავარი არხისთვის" "მედიის თავისუფლების ფონდის" დაკვეთით საზოგადოებრივი გამოკითხვა ჩაატარა.

"სავანტა" არის გლობალური კომპანია, რომელსაც მსოფლიოს მასშტაბით კვლევებს უკვეთავენ ისეთი ავტორიტეტული მედიები როგორიცაა CNN და BBC, ასევე ბრიტანეთის მთავრობა.

კითხვაზე, ხვალ რომ არჩევნები ტარდებოდეს, ვის მისცემდით ხმას? პასუხები ასე გადანაწილდა:

• „ქართული ოცნება“ - „ხალხის ძალა“ - 36%
• "კოალიცია ცვლილებისთვის" - 18%
• „ერთიანობა - ნაციონალური მოძრაობა“ - 14%
• "გახარია - საქართველოსთვის" - 10%
• "ძლიერი საქართველო" – 8%
• „გირჩი“ - 3%
• "საქართველოს პატრიოტთა ალიანსი" - 3%
• „საქართველოს ლეიბორისტული პარტია“ - 2%
• სხვა - 6%

გამოკითხვა ჩატარდა პირისპირ ინტერვიუს მეთოდით საქართველოს მთელ ტერიტორიაზე გარდა ოკუპირებული ტერიტორიებისა. სტრატიფიცირებული შემთხვევითი შერჩევის პრინციპით გამოიკითხა ხმის უფლების მქონე (18 წლის და მეტი ასაკის) 1561 ადამიანი.

კვლევა ეფუძნება ყველა გამოკითხულის აზრს. კვლევის ცდომილების ფარგლები შეადგენს + -2,48%-ს, 95%-იანი სანდოობით.

იმ რესპონდენტთა რაოდენობა, ვინც უარი განაცხადა კვლევაში მონაწილეობაზე, არ გასცეს კითხვებზე პასუხი, ან ვერ მოხერხდა გამოკითხვა, შეადგენს 22%-ს, შესაბამისად გამოპასუხების სიხშირე არის 78% (1561 ადამიანი).

საველე სამუშაოები ჩატარდა 2024 წლის 29 სექტემბრიდან 8 ოქტომბრამდე შუალედში.
ცდომილების ფარგლები - 2,48%.
ფაქტორები, რომელთაც შესაძლოა მნიშვნელოვანი გავლენა მოეხდინა კვლევის შედეგებზე, არ დაფიქსირებულა.

წყარო:მთავარი არხი

ჩვენ მაქსიმალურად გვინდა გავუფრთხილდეთ ამერიკის რეპუტაციას ამ ქვეყანაში გამომდინარე იქიდან, რომ გათვლა გვაქვს ურთიერთობების გადატვირთვაზე მომავალი წლიდან, - ამის შესახებ საქართველოს პრემიერ-მინისტრმა ირაკლი კობახიძემ აჭარის საზოგადოებრივი მაუწყებლის გადაცემა “თავისუფალ სივრცეში” განაცხადა.

მთავრობის მეთაურის თქმით, როგორც კი უკრაინაში დასრულდება ომი, ანუ დასრულდება პირველი ფრონტი, მაშინვე მოიხსნება მეორე ფრონტის ინტერესი და მაშინვე გადაიტვირთება ურთიერთობები საქართველოსა და ამერიკის შეერთებულ შტატებს შორის.

პრემიერმა ასევე უპასუხა შეკითხვას, რომელიც ამერიკის საელჩოს მიერ გამოქვეყნებულ ქარდებს ეხებოდა.

„ეს ქარდები საერთოდ ვის მოაფიქრდა არ ვიცი. არასერიოზული იყო, რა თქმა უნდა, ეს ყველაფერი და კარგია, რომ ამ ქარდების გამოქვეყნება აღარ გრძელდება. ასეთი ქარდები არჩევნების შედეგებზე გავლენას ვერ მოახდენს, თუმცა სერიოზულად აზიანებს ასეთი ქმედებები ამერიკის რეპუტაციას და იმიჯს ზოგადად, ჩვენს ქვეყანაში ქართული საზოგადოების თვალში. ჩვენ მაქსიმალურად გვინდა გავუფრთხილდეთ ამერიკის რეპუტაციას ამ ქვეყანაში გამომდინარე იქიდან, რომ გათვლა გვაქვს ურთიერთობების გადატვირთვაზე მომავალი წლიდან, ჩვენი ერთ-ერთი უმთავრესი ამოცანა იქნება მას შემდეგ, რაც დასრულდება უკრაინაში ომი. უნდა დასრულდეს ომი, ეს არის მთავარი. ვიდრე გრძელდება უკრაინაში ომი, კონკრეტულ ძალებს კვლავაც აქვთ იმის იმედი, რომ საქართველოში გაიხსნება მეორე ფრონტი და ამას უკავშირდება მთელი ეს მოძრაობები. როგორც კი უკრაინაში დასრულდება ომი, ანუ დასრულდება პირველი ფრონტი, მაშინვე მოიხსნება მეორე ფრონტის ინტერესი და მაშინვე გადაიტვირთება ურთიერთობები საქართველოსა და ამერიკის შეერთებულ შტატებს შორის. ომის დასრულებამდე გვექნება კვლავაც სერიოზული რისკები, იქნება სერიოზული ინტერესი, რომ საქართველოში გაიხსნას მეორე ფრონტი იმისათვის, რომ ჩვენი ქვეყანა რამენაირად შეეშველოს პირველ ფრონტს, თუმცა, როგორც კი პირველი ფრონტი ამოწურავს თავის თავს, როგორც კი ომი დასრულდება უკრაინაში, მაშინვე ზეწოლა ჩვენს ქვეყანაზე და კონკრეტულად ჩვენს ხელისუფლებაზე მოიხსნება“, - განაცხადა პრემიერ-მინისტრმა.

ბათუმის შემოვლითი გზა სტრატეგიული ევროპული საგზაო მარშრუტის ნაწილია და მას ასევე განსაკუთრებული მნიშვნელობა აქვს ბათუმის, როგორც საკურორტო ქალაქის განვითარებისთვის, - ამის შესახებ საქართველოს პრემიერ-მინისტრმა ირაკლი კობახიძემ ბათუმის შემოვლითი 14 კმ-იანი გზის გახსნის ღონისძიებაზე სიტყვით გამოსვლისას განაცხადა.

პრემიერის თქმით, ეს გზა გვერდს უვლის ბათუმს და ტრანზიტული მოძრაობისგან ქალაქს სრულად განტვირთავს.

“მინდა, ყველას მოგილოცოთ ბათუმის შემოვლითი მაგისტრალური გზის გახსნა. ეს გზა სტრატეგიული ევროპული საგზაო მარშრუტის ნაწილი და მას ასევე განსაკუთრებული მნიშვნელობა აქვს ბათუმის, როგორც საკურორტო ქალაქის განვითარებისთვის.

ბათუმი არაერთი ავტორიტეტული ორგანიზაციის მიერ აღიარებულია ევროპის მზარდ ტურისტულ მიმართულებად და ინვესტიციების საუკეთესო ადგილად ევროპაში; ეს არის ოთხი სეზონის ქალაქი და მიღებული აქვს ტურიზმის „ოსკარიც“. ეს ყველაფერი მეტყველებს იმაზე, რომ ქალაქი მუდმივად ვითარდება და ამას ხელს უწყობს სახელმწიფო სწორი გეგმით და ეს ხელშეწყობა მომავალშიც გაგრძელდება. ამ ყველაფრის მორიგი მაგალითია ბათუმის შემოვლითი 14 კმ-იანი მაგისტრალური გზა, რომელიც დღეს გაიუხსნება.

ეს გზა გვერდს უვლის ბათუმს და ტრანზიტული მოძრაობისგან ქალაქს სრულად განტვირთავს. ახალი გზა იწყება მახინჯაურთან და სრულდება ხელვაჩაურში, თუმცა სატრანსპორტო კვანძებით უკავშირდება როგორც მიმდებარე დასახლებებს, ისე ბათუმის სხვადასხვა უბანს. ძველ გზაზე მოძრავი ტრანსპორტის 43% ბათუმის შემოვლითი გზით იმოძრავებს, რითაც ქალაქი მნიშვნელოვნად განიტვირთება, გაუმჯობესდება ბათუმში ცხოვრებისა და დასვენების პირობები, გაიზრდება გზის გამტარობა და სატრანზიტო ტვირთბრუნვა. ყველა თვალსაზრისით ამ შემოვლით მაგისტრალს აქვს ძალიან დიდი მნიშვნელობა ქვეყნის, რეგიონის და ქალაქ ბათუმის განვითარებისთვის”, - განაცხადა პრემიერმა.

მთელი ჩვენი საგარეო ვაჭრობის წილი რუსეთის ვაჭრობაში არის 0.3%,, შესაბამისად, რუსეთზე ვერავითარი გავლენა ვერ ექნებოდა ჩვენი მხრიდან სანქციების დაწესებას, - ამის შესახებ საქართველოს პრემიერ-მინისტრმა ირაკლი კობახიძემ აჭარის საზოგადოებრივი მაუწყებლის გადაცემა “თავისუფალ სივრცეში” განაცხადა.

მთავრობის მეთაურის თქმით, რუსეთისთვის სანქციების დაწესების შემთხვევაში, ეკონომისტების დათვლით, ქვეყანაში იქნებოდა ეკონომიკის 10%-იანი ვარდნა პირველივე წელს, პესიმისტური სცენარის პირობებში კი მინუს 18%, რაც ეკონომიკურ კოლაფსს გამოიწვევდა, ეს კი, საბოლოო ჯამში, იქნებოდა გზა ხელისუფლების შეცვლისკენ.

„რაც შეეხება ეკონომიკურ სანქციებს, რუსეთისთვის დაწესებულ სანქციებს, რა თქმა უნდა, ამას მოყვებოდა საპასუხო ნაბიჯი და ჩვენ ეკონომისტებს ვთხოვეთ იმ დღეებში და მათ მარტივად დაიანგარიშეს ის, თუ რას გამოიწვევდა სანქციების დაწესება რუსეთთან მიმართებით. რა თქმა უნდა, ჩვენ რუსეთს ვერაფერს ვავნებდით. მთელი ჩვენი საგარეო ვაჭრობის წილი რუსეთის ვაჭრობაში არის 0.3%, ამით რა უნდა დაუშავო რუსეთს ხომ?! გასაგებია, ვერავითარი გავლენა ვერ ექნებოდა ჩვენი მხრიდან სანქციების დაწესებას რუსეთზე. რაც შეეხება პირიქით ეფექტს, ჩვენ ვთხოვეთ ეკონომისტებს დაეთვალათ და მათი დაანგარიშებით, მინიმუმ 10%-იანი ვარდნა გვექნებოდა პირველივე წელს და პესიმისტური სცენარის პირობებში, მინუს 18%-მდე შეიძლებოდა ასულიყო ვარდნა. შეგახსენებთ, კოვიდის დროს ვარდნა იყო მხოლოდ მინუს 6.5% და თითქმის გაჩერდა მთელი ქვეყანა. წარმოიდგინეთ, რას ნიშნავს მინუს 10 % და მითუმეტეს, მინუს 18% ვარდნა. ამას ითხოვდა ოპოზიცია ხმამაღლა, როცა დახურულ კარს მიღმა ვიღაცეები ითხოვდნენ იგივეს, ვინ არ ვაკონკრეტებ, თუმცა საჯაროდ ეს მოთხოვნები ნაკლებად მოგვისმენია მაღალ დონეზე და როგორც იქნა ევროპარლამენტმა გაბედა და ეს თქვა საჯაროდ. ეს საკითხი, რა თქმა უნდა, საზოგადოების სამსჯავროზე უნდა გამოვიდეს - რატომ უნდა ამ ქვეყნის ეკონომიკის დაქცევა ვიღაცას, ვინც გავლენას ახდენს ევროპარლამენტის რეზოლუციებზე. ყველაფერი თეთრი ძაფით არის ნაკერი,“- განაცხადა ირაკლი კობახიძემ.

მისივე თქმით, მინუს 10 %-ანი ვარდნა ნიშნავს ეკონომიკურ კოლაფსს და ეს საბოლოო ჯამში, რა თქმა უნდა, იქნებოდა გზა ხელისუფლების შეცვლისკენ.

„იმდენად მასშტაბური იქნებოდა ეკონომიკური პრობლემები, რომ რა თქმა უნდა, გამარტივდებოდა იმ ამოცანის შესრულება, რომელიც დასახული ჰქონდათ ამ ძალებს 2022 წლის თებერვლიდან მოყოლებული, ეს იყო ხელისუფლების შეცვლა, რაც 2-ჯერ სცადეს, ერთხელ 2020-2021 წლებში, მეორედ 2022 წლის ივნისში, როცა უარი გვეთქვა კანდიდატის სტატუსზე. აქედან გამომდინარე, ყველაფერი ცხადია. მეორე, რაც შეეხება მებრძოლი მოხალისეების გაგზავნას უკრაინაში, ეს უკვე პირდაპირ ნიშნავდა ქვეყნის ომში ჩართვას და ჩვენ მაშინ ძალიან დაგვეხმარა, სხვათაშორის, ბაიდენის და ჯონსონის განცხადებები - მათ თქვეს, რომ არა თუ თვითონ, საკუთარი ნებართვით არ აგზავნიდნენ უკრაინაში მოხალისეებს, განაცხადეს, რომ რეკომენდაციას არ უწევდნენ თავიანთ მოქალაქეებს, რომ წასულიყვნენ უკრაინაში მოხალისეებად, რადგან არ უნდოდათ ნატო გამხდარიყო რუსეთთან სამხედრო კონფლიქტის მხარე. ანუ რასაც თვითონ გაურბოდნენ და ერიდებოდნენ, იმას ითხოვდნენ ჩვენგან. ეს ხომ არქივში არსებობს. რეალურად იყო პირდაპირი ინტერესი, საჯარო ინფორმაციის გაანალიზებაც იძლევა უკვე ამ დასკვნის გამოტანის საშუალებას. რაც მერე მოხდა კანდიდატის სტატუსთან დაკავშირებით, ესეც შეგვიძლია კიდევ ერთხელ ამ ჭრილში გავიხსენოთ, ვის სჭირდებოდა 2022 წლის ივნისში, საქართველოსთვის, ქართველი ხალხისთვის და საქართველოს ხელისუფლებისთვის უარის თქმა კანდიდატის სტატუსზე, როცა მოთხოვნებიც კი არ იყო დაყენებული. მე შეგახსენებთ, რომ ეს 12 პუნქტი, შემდეგ 9 პუნქტი, იყო მომდევნო პერიოდის თემები, მანამდე მოთხოვნაც არ იყო დაყენებული. ჩვენ მარტის დასაწყისში შევიტანეთ განაცხადი ევროკავშირში, ყოველგვარი მოთხოვნების გარეშე, უბრალოდ ავსახეთ, დაახლოებით 5 000 გვერდიან დოკუმენტში არსებული მდგომარეობა და ეს არსებული მდგომარეობა არის ბევრად უკეთესი უკრაინასთან, მოლდოვასთან და ბოსნიასთან შედარებით, მაგრამ ყოველგვარი დასაბუთების გარეშე, მაშინ როცა საქართველო იყო აშკარა ლიდერი ამ 4 ქვეყანას შორის, ჩვენ გვეთქვა უარი და ეს გამოიყენა მსხვილი NGO-ების კონკრეტულმა ჯგუფმა რევოლუციის მოწყობის მცდელობისათვის. ესეც ხომ მარტივი გასაანალიზებელია. ამას მოჰყვა ჩვენი მხრიდან ნაბიჯები, მათ შორის „გამჭვირვალობის შესახებ კანონის“ მიღება. ასე ვიტყოდი, ეს კანონი ისიც კი არ არის, რასაც ჰქვია კანონი რევოლუციის წინააღმდეგ, ეს არის კანონი რევოლუციის გამჭვირვალობის შესახებ. ჩვენ ვამბობთ მარტივად ერთ რამეს, კი ბატონო, თუ ვინმეს უნდა, საქართველოში სცადოს რევოლუციის მოწყობა, სცადოს, მაგრამ ეს მცდელობა უნდა იყოს გამჭვირვალე. ეს წერია, რეალურად, პრაქტიკული თვალსაზრისით, ამ კანონში,“- განაცხადა პრემიერმა.

მთავრობის მეთაურის თქმით, სიღარიბის მაჩვენებელი, 2023 წლის მონაცემებით, შემცირებულია 440 000-მდე, ანუ 11.8 %-მდე, 5 წელიწადში კი შესაძლებელი და რეალისტურია, რომ ეს ციფრი 4 %-მდე დავიდეს.

„ჩვენ პასუხისმგებლობას ვიღებთ, რომ რაც იყო წარმოდგენილი ციფრები, დაპირებების სახით, ყველა არის როგორც ამბიციური, ასევე რეალისტური. 4% არის აბსოლუტურად რეალური ამოცანა, 5 წელიწადში ჩვენ შეგვიძლია 4 %-მდე შევამციროთ სიღარიბე, რაც ნიშნავს იმას, რომ მაქსიმალური რაოდენობა სიღარიბის ზღვარს მიღმა მცხოვრები ადამიანების იქნება 150 000. თუმცა ამის მიღმაც შეიძლება კიდევ უფრო მაღალი შედეგის მიღწევა. რა თქმა უნდა, პოლიტიკური სტაბილურობა ამ კუთხით იქნება ძალიან მნიშვნელოვანი. 4 % არის ის მინიმალური შედეგი, ვფიქრობთ, რაც არის მიღწევადი 2028 წლისთვის. ამ ტენდენციით თუ გავაგრძელებთ ჩვენ ვფიქრობთ, რომ 3030 წლისთვის უკვე შეგვიძლია ვიფიქროთ სიღარიბის მთლიანად აღმოფხვრაზე ჩვენს ქვეყანაში. არსებული ტენდენციიდან გამომდინარე, თამამად შეიძლება ითქვას, რომ 2030 წლისთვის სიღარიბე უნდა აღმოიფხვრას ჩვენს ქვეყანაში. თუ ყველაფერი გაგრძლდა ისე, როგორც დღეს მიდის, 2030 წელს ჩვენ მივიღებთ სწორედ ამ შედეგს,“- განაცხადა პრემიერმა.

„ნაცმოძრაობის“ დანაშაულების შეხსენება საჭიროა, რათა საზოგადოებამ სწორი არჩევანი გააკეთოს, მათ შორის 26 ოქტომბერს, - ამის შესახებ საქართველოს პრემიერ-მინისტრმა ირაკლი კობახიძემ აჭარის საზოგადოებრივი მაუწყებლის გადაცემა “თავისუფალ სივრცეში” განაცხადა.

როგორც მთავრობის მეთაურმა აღნიშნა, „ნაცმოძრაობის“ დანაშაულები იყო ბიზნესის რეკეტი, ტელევიზიების მიტაცება, ადამიანების წამება, მკვლელობა.

„საზოგადოებისთვის მაინც საჭირო არის ხოლმე ყველაფრის შეხსენება. „ნაცმოძრაობის“ დანაშაულები ჩადენილი იქნა 2012 წლამდე, როცა ისინი იყვნენ ხელისუფლებაში და მაინც პერიოდულად არის შესახსენებელი ეს ყველაფერი საზოგადოებისთვის, მათ შორის განსაკუთრებით ახალგაზრდობისთვის, რომელთაც არ უნახავთ საკუთარი თვალით ყველა ის უმძიმესი დანაშაული, რაც ჩაიდინა მაშინდელმა რეჟიმმა. ეს იყო ბიზნესის რეკეტი, ტელევიზიების მიტაცება, ადამიანების წამება, მკვლელობა. პირდაპირ წამების სისტემა ჰქონდათ შექმნილი ციხეებში, რაც სტრასბურგის სასამართლოს აქვს ოფიციალურად დადასტურებული. ამასაც სჭირდება შეხსენება. არჩევნების ტოტალური გაყალბება. 2008 წლის არჩევნები როგორ გაყალბდა ყველას უნდა ახსოვდეს და ომი, რაც იყო ერთ-ერთი მთავარი დანაშაული. დაკარგული ტერიტორიები და ამის შეხსენება საჭიროა იმისათვის, რომ საზოგადოებამ სწორი არჩევანი გააკეთოს, მათ შორის 26 ოქტომბერს.

რაც შეეხება გვარამიას პარტიას, ეს არის „ნაცმოძრაობის“ გაგრძელება. გარდა ამისა, ოპოზიციაში ყოფნის დროს რასაც აკეთებდნენ ეს ადამიანები, ესეც უნდა შევახსენოთ საზოგადოებას. ხაზარაძეს რაც შეეხება, თქვენ გახსოვთ მისი ბიზნესკავშირები წინა ხელისუფლებასთან, ავტორიტარულ რეჟიმთან. ბიზნესი მხოლოდ მაშინ შეიძლებოდა, ყოფილიყო წარმატებული, თუ შავ საქმეებში თანამშრომლობდა მაშინდელ ხელისუფლებასთან. გავიხსენოთ კიდევ ერთხელ „მაგნატის“ უმძიმესი საქმე, „კონსტანტას“ საქმე, „ელიტ ელექტრონიქსის“ საქმე, სადაც პირდაპირ ფიგურირებს ხაზარაძე და თითოეულ ამ შემთხვევაში საქმე ეხებოდა ბიზნესის რეკეტს. ღამე ბიზნესების გადაფორმებას კონკრეტული ბანკების მეშვეობით და ა.შ. ამის შეხსენებაც საჭიროა საზოგადოებისთვის. არ შეიძლება, ასეთი სუბიექტები ერთ ხმასაც კი იღებდნენ, ამასაც რომ თავი დავანებოთ, როდესაც ასეთ პარტიებს აქვთ იმის ამბიცია, რომ გადალახონ ბარიერი, მოვიდნენ პარლამენტში, ეს რა თქმა უნდა, ძალიან ტრაგიკულია“, - განაცხადა პრემიერ-მინისტრმა.

როგორც მთავრობის მეთაურმა აღნიშნა, ოპოზიციამ თავადაც იცის, როგორია კვლევის შედეგები, მათ აქვთ რეალური მონაცემები და მათი პარტიების ოფისებში მუდმივად მიდის საუბარი პროვოკაციებზე, მათ შორის მძიმე პროვოკაციებზე.

„ისინი უფრო მეტად კონცენტრირებული არიან არჩევნების მომდევნო დღეზე და არა არჩევნების დღეზე. ისინი სოფლებში არ გადიან, არ ატარებენ კამპანიას, ქალაქების უბნებში არ გადიან. რეალურად კამპანია არ ჩანს. ერთადერთი, ვინც ახლა ატარებს საარჩევნო კამპანიას, ეს არის მმართველი პარტია „ქართული ოცნება“. ესეც აჩვენებს იმას, რომ მათი მთავარი ყურადღების საგანი არის არჩევნების შემდეგი დღე და არა არჩევნების დღე, თუმცა აქაც მათ არავითარი რესურსი არ აქვთ, მათ შორის მარტი-აპრილი-მაისის მოვლენებმა დაადასტურა ის, რომ სახელმწიფო არის ძლიერი, სამართალდამცველი სტრუქტურები არის ძლიერი და ნებისმიერ მცდელობას, რომ პარლამენტში შეიჭრან, სხვა ინსტიტუტებში შეიჭრან, რევოლუცია მოაწყონ, დაუპირისპირდება სახელმწიფოს სიმტკიცე. ეს ყველამ ძალიან კარგად დაინახა მარტი-აპრილი-მაისში და ამ კუთხითაც იყო მნიშვნელოვანი ეს მოვლენები. გარდა იმისა, რომ ჩვენ ბოლომდე გავიტანეთ რევოლუციის გამჭვირვალობის შესახებ კანონი, აქედან გამომდინარე, ვერავითარი რევოლუციის მოწყობის თუ ქვეყნის არევის რესურსი ოპოზიციას ვერ ექნება“, - განაცხადა პრემიერ-მინისტრმა.

ფიზიკური, ფინანსური,ფსიქოლოგიური ძალადობა -  ეს ის მცირე ჩამონათვალია, რომლის გავლაც უამრავ ქალს უწევს ყოველდღიურად.  ზუსტი სტატისტიკა არ არსებობს,თუმცა, საქართელოში უამრავ ქალს კლავენ, მხოლოდ იმიტომ რომ ის ქალია.

 „ფემიციდის სისხლისსამართლებრივი და კრიმინოლოგიური ასპექტები, რომლებიც 2022 წელს პროკურატურამ გააანალიზა, აჩვენებს, რომ ქალების უმეტესობა, მხოლოდ იმიტომ მოკლეს და იმიტომ  მიიყვანეს თვითმკვლელობამდე, რომ მისგან ითხოვდნენ მორჩილებას, მასზე კონტროლს და მკვლელობამდეც მას სისტემატურად ამცირებდნენ.“

ბოლოს ჩატარებული სტატისტიკით, ფემიციდის ყველაზე მეტი შემთხვევა ქმრებმა ჩაიდინეს.  როგორც წესი, უმეტესწილად, ქალების მკვლელობის ან მკვლელობის მცდელობის ადგილი სახლია. თუმცა, ფემიციდის მონაცემების ანალიზის თანახმად, კაცები ქალებს კლავენ სახლს გარეთაც.

ბოლო წლების განმავლობაში, არაერთი საკანონმდებლო ცვლილება მოხდა:„ქალთა მიმართ ძალადობისა და ოჯახში ძალადობის წინააღმდეგ ბრძოლისა და პრევენციის შესახებ“ გამკაცრდა სისხლის კანონმდებლობა - ფემიციდი 16 წლიდან 20 წლამდე, ან უვადო პატიმრობის ისჯება. 2014 წლიდან მოყოლებული, 25-ზე მეტ საკანონმდებლო აქტში შევიდა ცვლილება. მათ შორის, სისხლის სამართლის კოდექსში, საპროცესო კოდექსში, ფემიციდის შემთხვევაში დამნაშავესთან არ ხდება საპროცესო შეთანხმების გაფორმება და მაინც ფემიციდისა და ფემიციდის მცდელობების უცვლელი სტატისტიკა აჩვენებს, რომ პრობლემა ვერ გადაიჭრა.

სამწუხაროდ, ქალების უმეტესობას არ ჰყოფნის გამბედაობა მოძალადეს თავი დააღწიოს, ზოგიერთმა ქალმა არც კი იცის, რომ მისი პარტნიორი პოტენციური მოძალადეა სწორედ ამიტომ გადავწყვიტეთ შემოგთავაზოთ ინტერვიუ ფსიქოლოგ მარიამ მგალობლიშვილთან:

_მარიამ, როგორ და რა მახასიათებლით ამოვიცნოთ მოძალადე ?

_მოძალადის გარეგნობით განსაზღვრა საკმაოდ ძნელია, თუმცა ის ურთიერთობის დაწყებისთანავე ავლენენს თავს პარტნიორულ ეჭვებში.  შესაძლოა, პარტნიორზე ხელით შეხებაც სცადოს. ეს ნიშნავს, რომ ურთოერთობას იწყებთ ადამიანთან, რომელსაც არ შეუძლია: მოსმენა, პატიება, გაგება, კომუნიკაცია, რაც განგაშის მიზეზია. თუმცა ურთიერთობის დასაწყისში შესაძლოა იყოს პირიქითაც, მოძალადე პოტენციურ მსხვერპლს ზედმეტად თბილად ეპყრობოდეს ნდობის, პატივისცემის და სიყვარულის მოპოვების მიზნით. ხშირად მოძალადე ადამიანი თავად იყო მსხვერპლი. ვინც ძალადობს ის უკვე რაღაცის მსხვერპლია, ძალადობა მისთვის გადასარჩენად საჭირო ქცევა გახდა. მსგავსი ტიპის მოძალადეების გამოსწორება შესაძლებელია თერაპიების საშუალებით. გამოსწორების ალბათობა იკლებს, როცა საქმე ფსიქოპათიასთან გვაქვს.

_როგორ უნდა დააღწიოს თავი მსხვერპლმა ?

_პირველ რიგში, მსხვერპლმა უნდა გაიაზროს, რომ ის მსხვერპლია. შემდეგ კი იზრუნოს პრობლემის მოგვარებაზე. მოძალადესთან ურთიერთობის მიზეზები კომპლექსურია და მეტწილად ეფუძნება განცდებს და შიშებს, რომელიც მას ურთიერთობის შენარჩუნებას აიძულებს. თითქმის ყველა მსხვერპლს აქვს იმედი, რომ მოძალადე შეიცვლება, მაგრამ ეს ილუზიაა. ადამიანს შესაძლოა ჰქონდეს შიში, რომ არ მოკლან, ზიანი არ მიაყენონ მას ან მის ახლობლებს. მნიშვნელოვან როლს თამაშობს ეკონომიკური დამოუკიდებლობის არქონა და მოძალადეს მხრიდან შანტაჟი. მსხერპლმა უნდა გაიაზროს, რომ გამოუვალი მდგომარეობა არ არსებობს, მოძალადე სინამდვილეში დაბალი თვითშეფასების მქონე მშიშარა ადამიანია.  უსაფრთხოების მიზნით ასეთ შემთხვევებში აუცილებელია სახელმწიფო ინსტიტუტების ჩართულობაც. ძალადობის მსხვერპლი ხშირად აწყდება სოციალურ სტიგმატიზაციას, როდესაც მათვე აკისრებენ პასუხისმგებლობას და ადანაშაულებენ იმ ძალადობაში, რომელიც მათ მიმართ ხორციელდება.

_რომელი ქცევებია საყურადღებო ურთიერთობაში და რა სახის ძალადობა არსებობს?

_ჩაგვრა, ძალაუფლების სექსუალური სიამოვნების გამრუდებული, დეფექტური სახეა და ძალაუფლების წყურვილიდან მოდის. არსებობს ფიზიკური, ფსიქოლოგიური და ფინანსური ძალადობა. ფიზიკური ძალადობა თავალსაჩინოა, თუმცა ხშირად ადამიანს უჭირს გაგება არის თუ არა ფსიქოლოგიური ძალადობის მსხვერპლი. როცა ერთი პიროვნება ცდილობს, რომ მეორეს თვითშეფასება დაუგდოს და აიძულოს ის რისი გაკეთებაც მას არ სურს, ფსიქოლოგიური ძალადობაა. ასეთი ნიშნებით უნდა მიხვდეს ადამიანი, რომ მასზე ფსიქოლოგიურად ძალადობენ.

_რას ურჩევდით ძალადობა გამოვლილ ქალებს ან იმ ქალებს, რომლებიც ჯერ-ჯერობით ვერ აღწევენ თავს მოძალადეს?

_ძალადობის მსხვერპლ ქალებს, რომლებმაც ჯერ ვერ დააღწიეს თავი ვურჩევ, რომ გაბედონ და ილაპარაკონ. ძალადობის დროს ითრგუნება ადამიანის ნება, შელახულია მისი ხელშეუხებლობა, ღირსება და თავისუფლება. ესენი კი ადამიანის განუყოფელი უფლებებია. ყველა ძალადობა გამოვლილ ქალს ვთხოვ, რომ ასევე ილაპარაკონ, როგორ შეძლეს თავის დაღწევა, რომ მათი თავისუფლება იყოს მაგალითი იმ გოგოებისთვის ვინც დღეს იტანჯება. ცხადია ფსიქოლოგის მხარდაჭერა ორივე შემთხვევაში აუცილებელია და მნიშვნელოვან როლს თამაშობს.

ავტორი-სალომე ნოზაძე

* ოჯახში და ქალთა მიმართ ძალადობის შემთხვევაში შეგიძლიათ დარეკოთ ნომერზე 116 006.