ორსული ქალი, რომელსაც 4 ოქტომბერს მარტვილის სოფელ სალხინოში ავტომობილი დაეჯახა, გარდაიცვალა.

ქალი რამდენიმე დღის განმავლობაში მძიმე მდგომარეობაში ქუთაისის რეფერალურ საავადმყოფოში იმყოფებოდა, თუმცა ექიმებმა მისი გადარჩენა ვერ შეძლეს.

ძალიან დიდი ბედნიერებაა იოანე ზოსიმეს უნიკალური ხელნაწერის საქართველოში ჩამობრძანება - ბიძინა ივანიშვილის ქველმოქმედება არსებითად იყო მიმართული ჩვენი ქვეყნის ეროვნული იდენტობის დაცვისა და შენარჩუნებისკენ და მისი ეს მორიგი ქველმოქმედებაც არის ამის კიდევ ერთი გამოხატულებაა, - ამის შესახებ საქართველოს პრემიერ-მინისტრმა ირაკლი კობახიძემ საპატრიარქოში განაცხადა, სადაც იოანე ზოსიმეს ხელნაწერის საქართველოში ჩამობრძანებასთან დაკავშირებით, საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ, მღვდელმთავრებთან ერთად, პარაკლისი აღავლინა.

მთავრობის მეთაური პარაკლისს მინისტრთა კაბინეტის წევრებთან ერთად დაესწრო. ირაკლი კობახიძემ ხაზი გაუსვა უნიკალური ხელნაწერის საქართველოში ჩამობრძანების მნიშვნელობას და ბიძინა ივანიშვილს მადლობა გადაუხადა.

„ძალიან დიდი ბედნიერებაა ამ უნიკალური ხელნაწერის, პალიმფსესტის საქართველოში ჩამობრძანება. ბიძინა ივანიშვილის ქველმოქმედება არსებითად იყო მიმართული ჩვენი ქვეყნის ეროვნული იდენტობის დაცვისა და შენარჩუნებისკენ და მისი ეს მორიგი ქველმოქმედებაც არის ამის კიდევ ერთი გამოხატულება და მადლობა მას ამისათვის. ძალიან ბედნიერები ვართ, რომ ეს საგანძური თავის ადგილს დაიმკვიდრებს ჩვენს ქვეყანაში და მინდა მივულოცო ჩვენი ქვეყნის მოსახლეობას და სრულიად საქართველოს“, - განაცხადა პრემიერ-მინისტრმა.

როგორც მეუფე შიომ აღნიშნა, ბიძინა ივანიშვილმა ამ შენაძენით გაამდიდრა ქართული კულტურული მემკვიდრეობა.

„დღეს აღვნიშნავთ შესანიშნავ მოვლენას, ამ დიდებული ხელნაწერის, პალიმფსესტის საქართველოში ჩამოტანას და ვფიქრობთ ჩვენს კულტურულ მემკვიდრეობაზე, ისტორიულ სიძველეებსა და მათ მნიშვნელობაზე. უდიდესი მნიშვნელობა აქვს ჩვენი ისტორიული სიწმინდეების მოვლა-პატრონობას და დაცვას. მინდა, განსაკუთრებული მადლობა გადავუხადო ბატონ ბიძინა ივანიშვილს, რომელმაც ამ დიდებული შენაძენით გაამდიდრა ჩვენი კულტურული მემკვიდრეობა“, - აღნიშნა მეუფე შიომ.

ქართველი მოღვაწის, იოანე ზოსიმეს მიერ შექმნილი და მის მიერვე აკინძული ხელნაწერი, რომელიც ბიძინა ივანიშვილის ინიციატივით და ძალისხმევით იქნა შეძენილი, საქართველოში დღეს ჩამობრძანდა. წმინდა ხელნაწერი საქართველოს ეროვნულ მუზეუმს საკუთრებაში ასევე ბიძინა ივანიშვილის ინიციატივით გადაეცემა და ის ეროვნული მუზეუმის ოქროს ფონდში განთავსდება.

საქართველოს პროკურატურამ, წინასწარი შეთანხმებით, ჯგუფის მიერ სამსახურებრივი მდგომარეობის გამოყენებით, მოქალაქეთა კუთვნილი დიდი ოდენობით თანხის თაღლითურად დაუფლების ფაქტზე დაკავებულ ერთ პირს ბრალდება წარუდგინა, ხოლო ამავე საქმეზე მსჯავრდებულ ორ პირს ბრალი დაუმძიმა.

ჩატარებული გამოძიებით დადგინდა, რომ ბრალდებულებმა კორპუსის მშენებლობის მიზნით 2018 წლის 16 ოქტომბერს შპს ,"ჯიექს კვადრატი" დააფუძნეს. თუმცა მათ აღებული თანხების მიუხედავად, კორპუსის მშენებლობის დასრულება და დაზარალებულებისთვის შეძენილი ფართების საკუთრებაში გადაცემა არ უზრუნველყვეს.

ბრალდებულები 74 მოქალაქის კუთვნილ 3 295 519.124 ლარს დაეუფლნენ. მათ ბრალდება საქართველოს სისხლის სამართლის კოდექსის 180-ე მუხლის მე-2 ნაწილის "ა" და მე-3 ნაწილის "ა" და "ბ" ქვეპუნქტებით წარედგინათ, რაც სასჯელის სახედ და ზომად 6-დან 9 წლამდე ვადით თავისუფლების აღკვეთას ითვალისწინებს.

"შინაგან საქმეთა სამინისტროს მიერ ჩატარებული გამოძიებით დადგენილია, რომ ბრალდებულებმა თითქოსდა მრავალბინიანი საცხოვრებელი სახლის მშენებლობის მიზნით, 2018 წლის 16 ოქტომბერს შპს ,,ჯიექს კვადრატი“ დააფუძნეს. კომპანიის წარმომადგენლებმა მოქალაქეებთან გაფორმებული ხელშეკრულებებით კორპუსის მშენებლობის დასრულების და შეძენილი ფართების მესაკუთრეთათვის გადაცემის ვალდებულება აიღეს. აღნიშნულის საფუძველზე, დაზარალებულებმა კომპანიის საბანკო ანგარიშზე დიდი ოდენობით თანხა ჩარიცხეს. მიღებული თანხების მიუხედავად, ბრალდებულებმა არ უზრუნველყვეს კორპუსის მშენებლობის დასრულება და დაზარალებულებისთვის შეძენილი ფართების საკუთრებაში გადაცემა.

აღნიშნული გზით, ბრალდებულები 74 მოქალაქის კუთვნილ 3 295 519.124 ლარს დაეუფლნენ.

8 ოქტომბერს, მოსამართლის განჩინების საფუძველზე, დაკავებულ ერთ-ერთ ბრალდებულს, პროკურატურამ ბრალდება წარუდგინა, ხოლო ორ პირს, რომლებსაც ამავე სისხლის სამართლის საქმეზე სასჯელის სახით განსაზღვრული აქვთ თავისუფლების აღკვეთა, ბრალი დაუმძიმდა.

მათ ბრალდება საქართველოს სისხლის სამართლის კოდექსის 180-ე მუხლის მე-2 ნაწილის ,,ა“ და მე-3 ნაწილის ,,ა“ და ,,ბ“ ქვეპუნქტებით (თაღლითობა ჩადენილი წინასწარი შეთანხმებით ჯგუფის მიერ, სამსახურებრივი მდგომარეობის გამოყენებით, დიდი ოდენობით ) წარედგინათ, რაც სასჯელის სახედ და ზომად 6-დან 9 წლამდე ვადით თავისუფლების აღკვეთას ითვალისწინებს.

პროკურატურა ბრალდებულების მიმართ აღკვეთის ღონისძიების გამოყენების თაობაზე სასამართლოს კანონით დადგენილ ვადაში მიმართავს," - წერია პროკურატურის განცხადებაში.

ევროპარლამენტმა საქართველოს შესახებ მომზადებული რეზოლუციის პროექტი დაამტკიცა.

რეზოლუციას მხარი დაუჭირა 495-მა ევროდეპუტატმა, 73 წინააღმდეგი იყო, 86-მა კი თავი შეიკავა.

ევროდეპუტატებმა საქართველოს შესახებ მომზადებული რეზოლუციის პროექტი შესწორებებით დაამტკიცეს, კერძოდ, რეზოლუციის პროექტის მეექვსე პარაგრაფს, სადაც ეწერა: „კიდევ ერთხელ ადასტურებს თავის მტკიცე მხარდაჭერას ქართველი ხალხის ლეგიტიმური ევროპული მისწრაფებებისა და მათი სურვილისადმი, იცხოვრონ აყვავებულ ქვეყანაში, თავისუფალი კორუფციისგან, რომელიც სრულად პატივს სცემს ფუნდამენტურ თავისუფლებებს, იცავს ადამიანის უფლებებს და უზრუნველყოფს ღია საზოგადოებასა და დამოუკიდებელ მედიას; ხაზს უსვამს, რომ საქართველოსთვის ევროკავშირის კანდიდატი ქვეყნის სტატუსის მინიჭების გადაწყვეტილება მოტივირებული იყო სურვილით, აღიარებულიყო საქართველოს სამოქალაქო საზოგადოების მიღწევები და დემოკრატიული ძალისხმევა, ასევე მოქალაქეთა შორის ევროკავშირში გაწევრიანების მიმართ არსებული მოთხოვნა, რომელსაც მხარს უჭერს ქართველი ხალხის 80%-ზე მეტი; აფასებს საქართველოს პრეზიდენტის სალომე ზურაბიშვილის ძალისხმევას, დააბრუნოს საქართველო დემოკრატიული და პროევროპული განვითარების გზაზე“, – დაემატა შემდეგი წინადადება: „მკაცრად გმობს „ქართული ოცნების“ პარტიის ძალისხმევას, დაადუმოს საქართველოს პრეზიდენტი იმპიჩმენტის პრეცედურის საშუალებით დაუსაბუთებელი საფუძვლით“.

ასევე, რეზოლუციის პროექტის მეშვიდე პარაგრაფს, სადაც ეწერა: „გმობს ოლიგარქ ბიძინა ივანიშვილის პირად როლს, რომელიც აქტიურ პოლიტიკაში 2023 წლის 30 დეკემბერს დაბრუნდა, როდესაც „ქართული ოცნების“ პარტიის „საპატიო თავმჯდომარე“ გახდა, მიმდინარე პოლიტიკურ კრიზისსა და ქვეყნის ევროატლანტიკური ორიენტაციის კიდევ ერთხელ ხელყოფის მცდელობაში რუსეთისკენ შებრუნების სასარგებლოდ; კიდევ ერთხელ მოუწოდებს საბჭოსა და ევროკავშირის დემოკრატიულ პარტნიორებს, დააწესონ დაუყოვნებლივი და მიზნობრივი პირადი სანქციები ივანიშვილის წინააღმდეგ საქართველოში პოლიტიკური პროცესის გაუარესებაში მისი როლის გამო“, – დაემატა შემდეგი წინადადება: „ისევე როგორც სხვა ქმედებებს, რომელსაც სარგებელი მოაქვს რუსეთისთვის“.

ევროპარლამენტარებმა საქართველოს შესახებ რეზოლუციის პროექტი 8 ოქტომბერს წარადგინეს, რომლითაც ევროპარლამენტარებმა მოუწოდეს საქართველოს, როგორც ევროკავშირის კანდიდატ ქვეყანას, „დააწესოს სანქციები რუსეთის წინააღმდეგ უკრაინაში რუსეთის სრულმასშტაბიანი შეჭრის საპასუხოდ და ეფექტურად აღასრულოს ზომები ევროკავშირის სანქციების გვერდის ავლის თავიდან ასაცილებლად, როგორც მან ამის ვალდებულება აიღო“. ასევე, ევროპარლამენტარებმა მოუწოდეს ევროპის საბჭოს „განიხილოს პირადი სანქციების დაწესება ბიძინა ივანიშვილზე მისი როლისთვის საქართველოში პოლიტიკური პროცესისა და ადამიანის უფლებების მდგომარეობის გაუარესებაში“. ევროპარლამენტარებმა ასევე მოუწოდეს ევროკავშირს და მის წევრ სახელმწიფოებს, „დააწესონ სანქციები იმ ქართველ ოფიციალურ პირებზე, რომლებიც ჩართულნი არიან საქართველოს მოქალაქეების წინააღმდეგ ადამიანის უფლებების დარღვევაში ან ქვეყნის დემოკრატიული უკუსვლის პროცესში“.

ამასთან, ევროპარლამენტის დეპუტატებმა რეზოლუციით მოუწოდეს საქართველოს ხელისუფლებას, „დაუყოვნებლივ გაათავისუფლოს ყოფილი პრეზიდენტი მიხეილ სააკაშვილი და მისცეს მას საზღვარგარეთ სათანადო სამედიცინო მკურნალობის მიღების საშუალება“. ასევე, ევროდეპუტატებმა მოუწოდეს „ქართული ოცნების“ უმრავლესობას, „დაუყოვნებლივ გაიწვიოს კანონმდებლობა „უცხოური გავლენის გამჭვირვალობის“ და „ოჯახური ღირებულებებისა და არასრულწლოვანთა დაცვის“ შესახებ“.

არაბთა გაერთიანებული საამიროების დედაქალაქი აბუ დაბი 11-13 ოქტომბერს ძიუდოს გრანდ სლემს უმასპინძლებს. შეჯიბრებაზე საქართველოს ნაკრების ცხრა წევრი იასპარეზებს:

60 კგ – ნიკა ხუზაურაშვილი, ლუკა მოდებაძე;

66 კგ – ლაშა ნადირაძე;

73 კგ – გიორგი ჩიხელიძე, გიორგი ტერაშვილი;

81 კგ – დიმიტრი გოჩილაიძე, ზაურ დვალაშვილი;

90 კგ – ლუკა ბაბუციძე, მიხეილ ჯაფარიძე.

შეგახსენებთ, რომ 2023 წელს აბუ დაბის გრანდ სლემზე საქართველოს ნაკრებმა ორი მედლის მოპოვება შეძლო – ოქროს მედალს ვაჟა მარგველაშვილი დაეუფლა, მესამე ადგილი კი გიორგი ჯაბნიაშვილმა დაიკავა.

ჩვენი რადიკალური, გაკოტრებული ოპოზიციის მფარველი ლობისტები, მათი დახმარებით ამზადებენ ანტიქართულ, ანტისახელმწიფოებრივ რეზოლუციას, რომელიც არის მორიგი დემონსტრირება ქვეყნის შიდა საქმეეებში თავხედური ჩარევისა, – ამის შესახებ პარტია „ქართული ოცნების“ თავმჯდომარე ირაკლი ღარიბაშვილმა ჟურნალისტებს განუცხადა.

როგორც ღარიბაშვილმა აღნიშნა, ევროპარლამენტმა ორი წლის წინაც მიიღო ანალოგიური შინაარსის, სამარცხვინო რეზოლუცია.

„სამწუხაროდ თუ საბედნიეროდ, ეს არ არის პირველი რეზოლუცია და ალბათ არ იქნება ბოლო, ჩვენ ბევრი ასეთი უსამართლო რეზოლუციის პროექტი თუ თავად რეზოლუცია გვინახავს. გახსოვთ, ორი წლის წინ, როცა ჩვენს ქვეყანას არ მისცეს კანდიდატის სტატუსი, სწორედ ამ მნიშვნელოვანი გადაწყვეტილების მიღებამდე ერთი-ორი კვირით ადრე მიიღეს ანალოგიური შინაარსიის უსამართლო, მე ვიტყოდი, სამარცხვინო რეზოლუცია, სადაც იყო დაახლოებით ანალოგიური შინაარსის მესიჯები, რომ დაასანქცირეთ ბატონი ივანიშვილი, გამოუშვით სააკაშვილი, კეზერაშვილი მოხსენიებული იყო, როგორც მედიის მენეჯერად და არ მისცეთ ქვეყანას კანდიდატის სტატუსი. ეს რეზოლუცია იყო ორი წლის წინ, ხალხს რომ გავახსენო. ახლა, სწორედ ორი კვირით ადრე, ვხედავთ, რომ ჩვენი რადიკალური, გაკოტრებული ოპოზიციის მფარველი ლობისტები, მათი დახმარებით ამზადებენ ანალოგიური შინაარსის, ანტიქართულ, ანტისახელმწიფოებრივ რეზოლუციას, რომელიც, რა თქმა უნდა, არის მორიგი დემონსტრირება ჩვენი ქვეყნის შიდა საქმეეებში თავხედური ჩარევისა. ამას დავარქმევდი თავხედურ ჩარევას ჩვენი ქვეყნის შიდა საქმეებში“, – განაცხადა ირაკლი ღარიბაშვილმა.

შინაგან საქმეთა სამინისტროს აჭარის პოლიციის დეპარტამენტის თანამშრომლებმა,ცხელ კვალზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, 1990 წელს დაბადებული გ.ფ. განზრახ მკვლელობის ბრალდებით დააკავეს.
დანაშაული 15 წლამდე ვადით თავისუფლების აღკვეთას ითვალისწინებს.
გამოძიებით დადგინდა რომ ბრალდებულმა,მიმდინარე წლის რვა ოქტომბერს, ქობულეთის მუნიციპალიტეტის სოფელ ლეღვაში, ყოფით თემაზე არსებული კონფლიქტის ნიადაგზე, მეზობელი - 1960 წელს დაბადებული თ.ქ. სანადირო თოფიდან გასროლით მოკლა და შემთხვევის ადგილიდან მიიმალა.

პოლიციამ გ.ფ. ცხელ კვალზე დააკავა.
სამართალდამცველებმა დანაშაულის ჩადენის იარაღი - სანადირო თოფი ნივთმტკიცებად ამოიღეს.
განზრახ მკვლელობის ფაქტზე გამოძიება, სისხლის სამართლის კოდექსის 108-ე მუხლით მიმდინარეობს.

საკონსტიტუციო სასამართლომ არ დააკმაყოფილა რუსული კანონის შეჩერების თაობაზე მოსარჩელეების მოთხოვნა:

"არ დაკმაყოფილდეს მოსარჩელე მხარის შუამდგომლობა, საქმეზე საბოლოო გადაწყვეტილების მიღებამდე, სადავო ნორმების მოქმედების შეჩერების თაობაზე.

5. საოქმო ჩანაწერს დაერთოს მოსამართლეების – გიორგი კვერენჩხილაძისა და თეიმურაზ ტუღუშის განსხვავებული აზრი სადავო ნორმების შეჩერების შესახებ მოსარჩელე მხარის შუამდგომლობის არდაკმაყოფილების თაობაზე.

6. საოქმო ჩანაწერს დაერთოს მოსამართლე ევა გოცირიძის განსხვავებული აზრი №1828 და №1834 კონსტიტუციური სარჩელების „უცხოური გავლენის გამჭვირვალობის შესახებ“ საქართველოს კანონის საქართველოს კონსტიტუციის 78-ე მუხლთან მიმართებით, არაკონსტიტუციურად ცნობის მოთხოვნის ნაწილში არსებითად განსახილველად მიღებასთან დაკავშირებით.

7. საქმეს არსებითად განიხილავს საქართველოს საკონსტიტუციო სასამართლოს პლენუმი.

აშშ-ის ელჩმა საქართველოში, რობინ დანიგანმა, რადიო თავისუფლებასთან ინტერვიუში ისაუბრა საქართველოს მთავრობასთან ღია და კონსტრუქციული კომუნიკაციის მნიშვნელობაზე და აღნიშნა, რომ შეერთებულ შტატებს სურს, ნებისმიერ დემოკრატიულად არჩეულ მთავრობასთან მუშაობა.

ელჩის განცხადებით, ამ შემთხვევაში, „ქართული ოცნება“ დემოკრატიულად არჩეული მთავრობაა და შესაძლოა ეს განმეორდეს 26 ოქტომბრის არჩევნებშიც, ვინაიდან, ვინ გაიმარჯვებს, წყვეტს ქართველი ხალხი.

„ღია კომუნიკაციების შენარჩუნება უკიდურესად მნიშვნელოვანია. ჩვენ გვინდა მუშაობა ნებისმიერ მთავრობასთან, რომელიც დემოკრატიულად არის არჩეული ამ ქვეყანაში, ამ შემთხვევაში, „ქართული ოცნება“ დემოკრატიულად არჩეული მთავრობაა და შეიძლება მომდევნო არჩევნებზეც ასე იყოს. ჩვენ არ ვირჩევთ, ვინ მოიგებს ან ვინ წააგებს, ამას ქართველი ხალხი წყვეტს. იმისათვის, რომ კონსტრუქციული ურთიერთობა გვქონდეს საქართველოსთან, გვინდა კონსტრუქციული ურთიერთობა საქართველოს მთავრობასთან. სამწუხაროდ, მთავრობამ ისეთი ნაბიჯები გადადგა, რომელიც გაჯერებული იყო აშშ-ის და დასავლეთის წინააღმდეგ დეზინფორმაციით.“ - აღნიშნა რობინ დანიგანმა.

9 თვეში საქართველოს 5 794 661 საერთაშორისო მოგზაური ეწვია. ზრდა 2023 წლის ანალოგიურ პერიოდთან შედარებით 4.1%-ია.

ტურიზმის ეროვნული ადმინისტრაციის მიერ გავრცელებული ინფორმაციით, იანვარი-სექტემბრის პერიოდში 3,992,842 საერთაშორისო ტურისტული ვიზიტი შედგა. გასული წლის ანალოგიურ პერიოდთან შედარებით ზრდა 9.2%-ია. აღსანიშნავია, რომ ტურისტული ვიზიტებზე მთლიან მაჩვენებელში 81.4% მოდის.

ამ პერიოდში ერთდღიანი ვიზიტების რაოდენობამ 1 050 821 ვიზიტი შეადგინა, რაც წლიურად 10.4%-ით შემცირებული რიცხვია.

ამ პერიოდში ყველაზე მეტი ვიზიტი რუსეთიდან, თურქეთიდან და სომხეთიდან შესრულდა, თუმცა სამივე მიმართულებიდან ვიზიტების რაოდენობა წლიურად შემცირებულია.

აღმაშფოთებელია რეზოლუციის ის ჩანაწერი, რომელშიც მოთხოვნილია ბიძინა ივანიშვილისთვის სანქციის დაწესება, - განაცხადა პარლამენტის თავმჯდომარემ შალვა პაპუაშვილმა „ქართული ოცნების“ ოფისში გამართულ ბრიფინგზე განაცხადა.

როგორც მან აღნიშნა, ცალკეული ძალები ევროკავშირის ოფიციალურ ინსტიტუტებს ბიძინა ივანიშვილზე თავდასხმისთვის და პირადი
პოლიტიკური ანგარიშსწორებისთვის იყენებენ.

„ეს ევროპარლამენტის უკვე მესამე რეზოლუციაა, რომლითაც ცალკეული ძალები ევროკავშირის ოფიციალურ ინსტიტუტებს ბიძინა ივანიშვილზე თავდასხმისთვის და პირადი პოლიტიკური ანგარიშსწორებისთვის იყენებენ. ადამიანზე, რომლის წვლილიც განმსაზღვრელია იმაში, რომ მუდმივად ომის ქარცეცხლში გახვეული საქართველო, უკვე წლებია ინარჩუნებს მშვიდობას და არ გახდა გეოპოლიტიკური დაპირისპირების ადგილი. ამასთან, როგორც ჩანს, რეზოლუციის ავტორებიც ხვდებიან, რომ ბიძინა ივანიშვილისადმი მათ აკვიატებულ ინტერესს უკვე სერიოზულობა აქვს დაკარგული და ამჯერად პრემიერ-მინისტრი ირაკლი კობახიძეც პირადად ახსენეს“, - განაცხადა შალვა პაპუაშვილმა.

ბათუმის მოსწავლე ახალგაზრდობის სასახლეში ცეკვის მასწავლებელმა, მერაბ დოლიძემ 12 წლის მოზარდს სცემა, - ამის შესახებ გამოცემა "ბათუმელები" წერს.

გამოცემის ცნობით, ერთი გაკვეთილის განმავლობაში მასწავლებელმა ბავშვზე არაერთხელ იძალადა, როგორც ფიზიკურად, ისე ფსიქოლოგიურად. ფაქტს სხვა ბავშვებიც ესწრებოდნენ. ეს ყველაფერი კი სავარჯიშო დარბაზში დამონტაჟებულმა კამერებმა დააფიქსირა. ფაქტზე დაწყებულია გამოძიება.

"ცეკვის დარბაზში დამონტაჟებული კამერის მიერ გადაღებულ კადრებში ჩანს, რომ მასწავლებელი ბავშვზე ხანგრძლივად ძალადობს, ხოლო მთელი ამ პერიოდის განმავლობაში მასწავლებლის შეკავებას იქ მყოფი ქალი ცდილობს. ის პერიოდულად მასწავლებელსა და ბავშვს შორის დგას და ცდილობს ბავშვი მასწავლებლის აგრესიისგან დაიცვას. არის კადრი, სადაც ჩანს, როგორ იშორებს ქალს ცეკვის მასწავლებელი ხელის კვრით და ერთ მომენტში ფეხსაც ურტყამს. ინფორმირებული პირის თქმით, ეს ქალი მასწავლებლის მეუღლეა, რომელიც მოსწავლე-ახალგაზრდობის სასახლეში არ მუშაობს და „ის მეუღლეს [ცეკვის მასწავლებელს] ეხმარებოდა“.

მასწავლებელს მოსამართლემ აღკვეთი ღონისძიების სახით 2000-ლარიანი გირაო შეუფარდა.

მერაბ დოლიძეს ცეკვის მასწავლებლად მუშაობის 25-წლიანი გამოცდილება აქვს. ის სამსახურიდან დაითხოვეს.

იოანე ზოსიმეს უნიკალური ხელნაწერი საქართველოშია. ის თბილისის საერთაშორისო აეროპორტში სულ რამდენიმე წუთის წინ ჩამოიტანეს.

იოანე ზოსიმეს უნიკალური ხელნაწერი ივნისში, ლონდონში, "კრისტის" აუქციონზე, მილიონ ფუნტად ბიძინა ივანიშვილმა შეიძინა და საჩუქრად ეროვნული მუზეუმის ოქროს ფონდს გადასცა.

ორენოვან, ქართულ-არამეულ ენებზე შესრულებულ ხელნაწერებს, სახარებისეული ტექსტების შესწავლისა და სამეცნიერო-ლიტერატურული თვალსაზრისით უნიკალური მნიშვნელობა აქვს.

როვნული მუზეუმის დირექტორის პირველი მოადგილე იოანე ზოსიმეს უნიკალური ხელნაწერის საქართველოში ჩამოტანას ეხმაურება. მან ბიძინა ივანიშვილსა და მის ოჯახს, გაწეული მამულიშვილური საქმისთვის, მადლობა გადაუხადა.

მისი თქმით, საზოგადოების მაღალი ინტერესიდან გამომდინარე, ხელნაწერი დამთვალიერებლებისთვის გამოიფინება.

"მინდა, რომ, ეროვნული მუზეუმისა და მუზეუმის თანამშრომლების სახელით, დიდი მადლობა გადავუხადო ბატონ ბიძინა ივანიშვილსა და მის ოჯახს, მორიგი მამულიშვილური საქმისთვის. ჩვენ ძალიან მოხარულები ვართ, რომ იოანე ზოსიმეს წმინდა წიგნი ჩამობრძანდა საქართველოში და ის თავის ღირსეულ ადგილს დაიკავებს ეროვნული მუზეუმის ოქროს ფონდის საგანძურის გამოფენაზე, ისეთი ექსპონატების გვერდით, როგორიც არის ხახულის ხატი, თამარ მეფის ჯვარი, წილკნის ღვთისმშობელი და სხვა სიწმინდეები. პირველ რიგში, ვინაიდან ასეთი მაღალია საზოგადოებიდან ინტერესი, გადავწყვიტეთ, რომ ხელნაწერი გამოიფინოს დამთვალიერებლებისთვის. მაქსიმალურად ყველამ ნახოს და ამის შედეგ, უკვე ჩაერთვებიან დარგის სპეციალისტები, ხელნაწერების მცოდნეები, ექსპერტები, სხვადასხვა სამეცნიერო ინსტიტუტის თანამშრომლები და უკვე ასეთი კოლექტიური სპეციალისტების მიერ შედგენილი კომისია შეისწავლის მეცნიერულ დონეზე," - აცხადეს ნიკა ახალბედაშვილი.

ევროპარლამენტში საქართველოს შესახებ რეზოლუციას დღეს, 9 ოქტომბერს უყრიან კენჭს. 25-პუნქტიან დოკუმენტში ნათქვამია, რომ თუ საქართველოს მოქმედი ხელისუფლება ამჟამინდელ კურსს არ შეცვლის, სავარაუდოდ, ევროკავშირის საქართველოსთან თანამშრომლობა ვიზალიბერალიზაციისა და კანდიდატის სტატუსთან მიმართებით, შეიცვლება. 

რეზოლუციაში შესულია ოლიგარქი ბიძინა ივანიშვილის პერსონალური სანქცირების საკითხი და წერია, რომ ევროპარლამენტარები გმობენ ბიძინა ივანიშვილის პირად როლს "მიმდინარე პოლიტიკურ კრიზისსა და ევროატლანტიკური ორიენტაციისთვის ძირის გამოთხრისა და ქვეყნის რუსეთისკენ მიბრუნების მორიგ მცდელობაში". 

ასევე, ევროპარლამენტარები მოუწოდებენ ევროპულ საბჭოსა და EU-ის დემოკრატიულ პარტნიორებს, დაუწესოს დაუყოვნებლივი და მიზანმიმართული პერსონალურ სანქციები ბიძინა ივანიშვილს "საქართველოში პოლიტიკური პროცესის გაუარესებაში მისი როლის გამო".

რეზოლუციის ტექსტში საუბარია საქართველოს მესამე პრეზიდენტის, მიხეილ სააკაშვილის შესახებაც და ნათქვამია, რომ ის ჰუმანიტარული მიზნით, საზღვარგარეთ სამკურნალოდ გადასაყვანად უნდა გათავისუფლდეს.

შეგახსენებთ, ევროპარლამენტში გუშინ, 8 ოქტომბერს საქართველოს შესახებ მოსმენა და დებატები  გაიმართა.