ჩვენი საქმე არ არის სხვისი ცხოვრების წესის განსჯა, მაგრამ პროპაგანდას აქვს ძალიან მძიმე შედეგი და საზოგადოების დასაცავად გვჭირდება შესაბამისი კანონის მიღება - კობახიძე

„პროპაგანდის წინააღმდეგ“ კანონს რაც შეეხება, აქ მარტივი ლოგიკაა, ვინც ეწინააღმდეგება პროპაგანდის შეზღუდვას, ის მხარს უჭერს პროპაგანდას, – ამის შესახებ პრემიერ-მინისტრმა, ირაკლი კობახიძემ ჟურნალისტის კითხვის პასუხად განაცხადა.

კობახიძის თქმით, ნებისმიერი ადამიანის უფლება უნდა იყოს დაცული, განურჩევლად ცხოვრების წესისა.

მისივე განცხადებით, პროპაგანდას აქვს ძალიან მძიმე შედეგი საზოგადოების სხვადასხვა წრეზე დასავლეთის სივრცეში, რაც სტატისტიკითაც დასტურდება და იმისთვის, რომ ქართული საზოგადოება იყოს დაცული, საჭიროა კანონის მიღება.

„მე, კიდევ ერთხელ, ძალიან მკაფიოდ უნდა დავაფიქსირო, რომ, რა თქმა უნდა, ნებისმიერი ადამიანის უფლება უნდა იყოს დაცული, განურჩევლად ცხოვრების წესისა, ეს არის ჩვენი ძალიან მკაფიო დამოკიდებულება და ეს დამოკიდებულება ვერ გადაიხედება, ჩვენ პატივს ვცემთ ჩვენი ქვეყნის თითოეულ მოქალაქეს, განურჩევლად ცხოვრების წესისა. ჩვენი საქმე არ არის სხვისი ცხოვრების წესის განხილვა, განსჯა და ა.შ. მაგრამ რაც შეეხება პროპაგანდას, ასეთ პროპაგანდას აქვს ძალიან მძიმე შედეგი სხვადასხვა საზოგადოებაზე დასავლეთის სივრცეში, ეს სტატისტიკითაც დასტურდება. აქედან გამომდინარე, იმისთვის, რომ ჩვენი საზოგადოება იყოს დაცული ასეთი პროპაგანდისგან, ჩვენ გვჭირდება შესაბამისი კანონის მიღება. როცა ამას უპირისპირდება ოპოზიცია, ჩანს, რა არის მათი რეალური განზრახვა და მიზანი“, – განაცხადა ირაკლი კობახიძემ.