საერთაშორისო პარტნიორებს მოვუყვები გიგი წერეთლის პოლიტიკურ სუტინიორობაზე - თამარ ჩერგოლეიშვილი

იმ კვირაში შევხვდები ყველა საერთაშორისო პარტნიორს და გიგი წერეთლის ქცევაზე მოვუყვები, პოლიტიკურ სუტინიორობაზე, – ამის შესახებ თამარ ჩერგოლეიშვილი სოციალურ ქსელში წერს.

როგორც ჩერგოლეიშვილი აღნიშნავს, ახსნის, რომ წერეთელი სხვის მიერ გაზრდილი რეიტინგის პარაზიტია და, მისივე თქმით, „დასავლეთში რეპუტაციულად დაანგრევს“.

„იმ კვირაში შევხვდები ყველა საერთაშორისო პარტნიორს და გიგი წერეთლის ქცევაზე მოვუყვები, პოლიტიკურ სუტინიორობაზე.

საგულისხმოა, რომ გაყალბებაში როდესაც გამოვიჭირეთ და გაცხადდა, რომ „ნაცების“ და „ქოცების“ ამომრჩევლით უნდა დახურულ პრაიმერიზში ჩემი ქმედითი გუნდის დამარცხება, NDI-ს სადამკვირვებლო მისიას და USAID-ს ვხდებოდი – რომლებიც მეკითხებოდნენ, როცა ამხელა სამუშაოს ვწევ, თანამდებობა რატომ არ მაქვს. ავუხსენი, რომ მე არ მინდა გიგი წერეთლის, კაკო ბობოხიძის და თუნდაც გიგა ბოკერიას კეთილი ნებით მოპოვებული სტატუსი – პრაიმერიზს ვატარებთ და ამომრჩეველი განმისაზღვრავს ძალას და ადგილს. განმისაზღვრა.

გიგი წერეთელმა მაგიდა ააყირავა, რადგან მეორეზე ვერ გავიდა. კაკო ბობოხიძემ ვაჭრობა და შეთანხმების მორიგი დარღვევა მოითხოვა, პრაიმერიზის შედეგების უარყოფით, პოლიტსაბჭოში სტატუსკვოს შენარჩუნებით შანტაჟი დაგვიწყო. ბობიხიძე კი ფეხზე ჰკიდიათ, მაგრამ წერეთელი რომ პოლიტიკური სუტინიორია და სხვის მიერ გაზრდილი რეიტინგის პარაზიტი, ამას ლამაზად ავხსნი.

კვოტების მავნებლობაც მთელი სიკაშკაშით ჩანს. კვოტით რომ მიეჩინათ ადგილი, კი არ ინერვიულებდნენ – ჩემით და უთანასწორო ბრძოლით რომ მოვიპოვე, მაგაზე ჩამოიშალნენ სუტინიორები.

P.S. გიგას მაგ პრეტენზიას უყენებს, რატომ დაუჭირე მხარი იმ გუნდს ბოლო დღეებში, სადაც პირველი თამარააო.

იმიტომ დაუჭირა, რომ ბოლო დღეებში ნახა, რომ სუტინიორები ხართ, რომ, ჩემი უანგარო შრომით მოტანილი სიკეთის დაფასების და პატიოსანი ბრძოლის ნაცვლად, არაავთენტური პროცესით და სხვა პარტიების ამომრჩევლით ცდილობთ ჩემთვის თავზე გადავლას. დაინახა, რომ თქვენ განასახიერებთ ყველა იმ მანკიერებას, რაც წარსულში უნდა დარჩეს, თუ ნათელი მომავალი გვსურს.

და, აი, ამიტომ დამიჭირა მხარი, პარტიის და ქვეყნის საუკეთესო ინტერესებში იმოქმედა, როდესაც მხარი დაუჭირა პატიოსნებას, პროფესიონალიზმს, შედეგიანობას – მაგ თქვენი მყრალი, ყალბი და რეტროგრადული ჭაობის წინააღმდეგ.

ცხადია, გიგას წინააღმდეგ რომ იყენებდით იმ სიის მხარდაჭერას, სადაც პირველი ის ქალია, ვინც ყველაზე დიდი შრომა გასწია, მაშინ როდესაც გიგი წერეთელს არც იდეური, არც ფინანსური, არც სხვა სახის კონტრიბუცია არ ჰქონია – ამას გიგი წერეთლის წინააღმდეგ უფრო ეფექტურად გამოვიყენებ და რეპუტაციულად დავანგრევ დასავლეთში“, – წერს ჩერგოლეიშვილი.

ცნობისთვის, გიგა ბოკერიამ და თამარ ჩერგოლეიშვილმა „ევროპული საქართველო“ დატოვეს. როგორც გიგა ბოკერიამ გუშინ ბრიფინგზე განაცხადა, პარტიაში პრაიმერიზის ჩატარების წესმა უთანხმოება და სერიოზული დაპირისპირება გამოიწვია.

 

როცა ვიცი ადამიანის ბუნება, ვიცი, რომ ყველაფრის მკადრებელია, ასეთ ადამიანს მე თავს არ გავუყადრებ და მის დონეზე არ დავეშვები, - ამგვარი კომენტარი გააკეთა „ევროპული საქართველოს“ პოლიტსაბჭოს თავმჯდომარემ გიგი წერეთელმა პარტიის უკვე ყოფილი წევრის თამარ ჩერგოლეიშვილის განცხადების შესახებ.

წერეთლის თქმით, მან პარტიიდან გასულ ადამიანებს მოუწოდა, არ დაიწყონ ტალახის სროლა.

„მოვუწოდე იმ ადამიანებს, ვინც გავიდნენ პარტიიდან, ტალახის სროლა არ დაიწყონ, ეს იქნება და გაგრძელდება. ამიტომ ამას ჩვეულებრივ ამბად მივიჩნევ, როგორც ბოროტებას და სამწუხაროდ, ყველა ეთიკური ჩარჩოდან ამოსვლას, მაგრამ ამ სიტუაციაში ფსიქოლოგიური მდგომარეობიდან გამომდინარე, შეიძლება, ეს რაღაცნაირად, გავიგო კიდეც.

პარტიაში იყო იმგვარი მდგომარეობა, რომელიც ნამდვილად არ იძლეოდა არანაირ გარანტიას წარმატებული საარჩევნო კამპანიის. შესაბამისად, ეს არის პასუხისმგებლობა და განაცხადეს, რომ ამ პასუხისმგებლობას არ იღებენ. სისულელეებზეა საერთოდ საუბარი. როგორ შეიძლება, სისულელეს გავცე პასუხი?!

კონკრეტულ ვითარებაში როცა ვიცი ადამიანის მდგომარეობა და მისი ბუნება, ვიცი, რომ ყველაფრის მკადრებელია, სამწუხაროდ, ასეთ ადამიანს მე თავს არ გავუყადრებ და მის დონეზე არ დავეშვები“, - განაცხადა გიგი წერეთელმა.

 

რა გახდა სკანდალის მიზეზი “ევროპულ საქართველოში” იხილეთ აქ.