დედაქალაქი

დღეის მდგომარეობით, უკვე გაყიდულია 40 000 სამგზავრო აბონემენტი, რომელთა დიდი ნაწილი ერთთვიანი და ერთწლიანია. ამის შესახებ თბილისის მერმა, კახა კალაძემ დედაქალაქის მთავრობის დღევანდელ სხდომაზე განაცხადა.

„დღეის მდგომარეობით უკვე გაყიდულია 40 000 აბონემენტი. მათი დიდი ნაწილი მოდის ერთთვიან და ერთწლიან აბონემენტებზე, რაც ძალიან კარგია. რაც შეეხება ტარიფს, საზოგადოებრივ ტრანსპორტში გადახდილი მთლიანი საფასურისა და მგზავრობის რაოდენობის შეფარდებით, ერთი მგზავრობის ღირებულება, დღეის მდგომარეობით, 32 თეთრი გამოდის.

ჩვენ ვისმენთ ოპონენტების მხრიდან ძალიან ბევრ არასწორ განცხადებას ამასთან დაკავშირებით. მაქსიმალურად ცდილობენ, რომ საზოგადოება შეცდომაში შეიყვანონ. საჭიროებიდან გამომდინარე, შეგიძლიათ, შეიძინოთ სხვადასხვა ტიპის პაკეტები. დავტოვეთ ერთჯერადი გადახდაც. მოქალაქეს შეუძლია, გადაიხადოს „მეტრომანის“ საშუალებით. ინტეგრირებულ ტარიფში შემოვიყვანეთ მიკროავტობუსიც, რაც ძალიან მნიშვნელოვანია. ყველაფერი ერთიან სისტემაში მოვაქციეთ“, – განაცხადა კახა კალაძემ.

მისივე თქმით, თბილისის მერია მომავალშიც არაერთ სასარგებლო პროექტს განახორციელებს სხვადასხვა მიმართულებით.

„ვერანაირი თქვენი კრიტიკა ვერ შეაჩერებს ამ ყველაფერს. თქვენ ხართ ის ადამიანები, რომლებმაც ყველაზე დიდი ბოროტება ჩაიდინეთ ამ ქალაქისთვის – ქალაქს წაართვით ყველაზე მნიშვნელოვანი ტრანსპორტი – ტრამვაი, აყარეთ ლიანდაგები, გაყიდეთ, ჯართში ჩააბარეთ. თქვენ არანაირი უფლება არ გაქვთ, ისაუბროთ საზოგადოებრივ ტრანსპორტსა და სატრანსპორტო პოლიტიკაზე. თქვენ ისტორიას დარჩებით, როგორც ადამიანები, რომლებმაც დედაქალაქს მოჰპარეს ყველაზე ღირებული, ყველაზე მნიშვნელოვანი საზოგადოებრივი ტრანსპორტი – ტრამვაი. ეს არის ძალიან დიდი უბედურება, რაც თქვენ გააკეთეთ ამ ქალაქისთვის“, – განაცხადა კახა კალაძემ.

დედაქალაქის მერია, „ტრანსპლანტაციის პროგრამის“ ფარგლებში, ღვიძლის გადანერგვის ოპერაციას კვლავ 70 000 ლარით დააფინანსებს. ამის შესახებ თბილისის მერმა, კახა კალაძემ დღეს დედაქალაქის მთავრობის სხდომაზე განაცხადა. ასევე, მერიის საზოგადოებასთან ურთიერთობის სამსახურის ხელმძღვანელის, მანანა თოქმაჯიშვილის განცხადებით, ბოლო 4 წლის მანძილზე ღვიძლის გადანერგვა 34 მოქალაქეს დაუფინანსდა.

"თბილისის მერიის „ტრანსპლანტაციის პროგრამას“, 2018 წლიდან ღვიძლის გადანერგვის კომპონენტი დაემატა. ბოლო 4 წლის მანძილზე ღვიძლის გადანერგვა უკვე დაუფინანსდა 34 მოქალაქეს, რაც 34 გადარჩენილ სიცოცხლეს ნიშნავს. თბილისის მერია, ერთ მოქალაქეს, ღვიძლის გადანერგვას თავდაპირველად 60 ათასი ლარით უფინანსებდა, შემდეგ კი თანხა გაიზარდა და 2019 წლიდან ერთი ბენეფიციარისთვის 70 ათასი ლარი გამოიყოფა." - წერს მანანა თოქმაჯიშვილი სოციალურ ქსელში.

რიყე-ნარიყალას საბაგირო გზა ტექნიკური რეგლამენტით გათვალისწინებული სამუშაოების გამო, 7 თებერვლიდან პირველ მარტამდე, მგზავრებს ვერ მოემსახურება. 

აღნიშნულ პერიოდში, „საბაგირო მოწყობილობების (საბაგირო გზის, ფუნიკულიორის) უსაფრთხო ექსპლუატაციის შესახებ ტექნიკური რეგლამენტის“ თანახმად, მზიდსაწევი ბაგირი გამოიცვლება და სერვისული სამუშაოები ჩატარდება.

სამუშაოებს ხელშეკრულების პირობების თანახმად, იტალიური მწარმოებელი კომპანია „ლაიტნერის“ სპეციალისტები შეასრულებენ.

თბილისის სატრანსპორტო კომპანია ბოდიშს გიხდით დისკომფორტის გამო!

ტაქსების რეფორმის მესამე ეტაპი სავარაუდოდ ზაფხულის ბოლოს დაიწყება, - ამის შესახებ ინფორმაციას, თბილისის მერიის საზოგადოებასთან ურთიერთობის სამსახურის წარმომადგენელი, მანანა თოქმაჯიშვილი, სოციალურ ქსელში პოსტს აქვეყნებს.

"ტაქსების რეფორმის მესამე ეტაპი სავარაუდოდ ზაფხულის ბოლოს დაიწყება. მიმდინარეობს აქტიური კონსულტაციები ტაქსის მომსახურების გამწევ პირებთან.

რეფორმის მესამე ეტაპისთვის, გათვალისწინებული იქნება ტაქსის მძღოლების მიერ მგზავრის აყვანის ან გადმოსმის მიზნით ავტობუსის ზოლში გაჩერების საკითხი," - წერს მანანა თოქმაჯიშვილი.

თბილისის მერიის საზოგადოებასთან ურთიერთობის სამსახურის ხელმძღვანელი, მანანა თოქმაჯიშვილი, უკანონო მშენებლობებთან დაკავშირებით სოციალურ ქსელში ინფორმაციას აქვეყნებს და აღნიშნავს, რომ ბოლო ოთხი წლის განმავლობაში, თბილისის მერიამ 4 200 სამართალდარღვევა გამოავლინა.

"უკანონო მშენებლობებთან მიმართებით, ბოლო ოთხი წლის განმავლობაში, თბილისის მერიამ გამოავლინა 4 200 სამართალდარღვევა, გამოიწერა 82 მლნ ლარის ოდენობის ჯარიმა, მაშინ, როდესაც 2014-2017 წლებში გამოვლინდა 3 500 დარღვევა და მხოლოდ 19 მლნ ლარის ოდენობის ჯარიმაა დაწერილი.

2021 წელს, საქართველოს პარლამენტის დახმარებით, თბილისის მერიამ უკანონო მშენებლობებზე სისხლის სამართლებრივი პასუხისმგებლობა შემოიღო.

უკანონო მშენებლობების პრობლემის მოსაგვარებლად, თბილისის მერია აღსრულების ეფექტიანობის გაუმჯობესებას კვლავ პარლამენტის დახმარებით გეგმავს. საუბარია იურიდიული სამსახურის მიერ გამოცემული სამართლებრივი აქტების ჩაბარების მექანიზმის სრულყოფაზე, რათა არაკეთილსინდისიერმა მშენებელმა გადაწყვეტილების ჩაუბარებლობით არ შეაფერხოს აღსრულების პროცესი." - წერს მანანა თოქმაჯიშვილი.

გარე ვაჭრობა კანონმდებლობით აკრძალულია. მესმის ყველა იქ მომუშავე ადამიანის მდგომარეობა, მაგრამ კონკრეტული ქუჩების, ტროტუარების მოწესრიგება ეს არის პრინციპულად მნიშვნელოვანი, - ამის შესახებ დედაქალაქის მერმა, კახა კალაძემ „შაბათის ქრონიკაში“ მეტროსადგურ „ვარკეთილის“ მიმდებარე ტერიტორიიდან გარემოვაჭრეების გაყვანის გადაწყვეტილებაზე საუბრისას განაცხადა.

„უამრავი შეტყობინება შემოდის, რომ ტროტუარებზე ფეხით გავლა შეუძლებელია. პირდაპირ ტროტუარებზე მიმდინარეობს საკვები პროდუქტების, ტანსაცმლის, ყველაფრის ერთად გაყიდვა. მესმის, შევდივარ ამ ადამიანების მდგომარეობაში და ზუსტად ამიტომ მივეცი დავალება სამგორის რაიონის გამგებელს, რომ „ვარკეთილის“ რაიონის ბაზრობის მესაკუთრეებთან რომ ამ ადამიანებს, ვინც დღეს ტროტუარზე დგას და ეკონომიკურ საქმიანობას ეწევა, მივცეთ საშუალება, გარკვეული შეღავათი რომ ბაზრობის ტერიტორიაზე შევიყვანოთ. ყველაფერი უნდა გავაკეთოთ კანონის შესაბამისობაში, ამ ოჯახებს მაქსიმალურად გვერდით დავუდგებით“, - განაცხადა კახა კალაძემ.

„აუტიზმის სპექტრის დარღვევის მქონე ბავშვთა აბილიტაციის პროგრამა“, რომლის ბიუჯეტი 2015 წლის შემდეგ 12-ჯერ გაიზარდა, დღეისთვის 1 375 ბავშვსა და მოზარდს ემსახურება, – ამის შესახებ დედაქალაქის მერმა, კახა კალაძემ მუნიციპალიტეტის მთავრობის დღევანდელ სხდომაზე განაცხადა და აღნიშნულ პროგრამაზე დეტალურად ისაუბრა.

„მინდა, მოსახლეობას მივაწოდო ინფორმაცია „აუტიზმის სპექტრის დარღვევის მქონე ბავშვთა აბილიტაციის პროგრამაზე“. ჩემთვის ეს არის ერთ-ერთი გამორჩეული პროგრამა ბევრი მიზეზის გამო, რადგან ეხება პატარებს, ბავშვებს. მახსოვს, როცა დაიწყო ამ პროგრამის განხორციელება, 2015 წელს მისი ბიუჯეტი 500 000 ლარი იყო და მომსახურებას 325 ბავშვი იღებდა. ამ ხნის განმავლობაში მისი ბიუჯეტი თითქმის 12-ჯერ გაიზარდა და დღეისთვის, ის ხუთი მლნ 868 ათას ლარს შეადგენს. პროგრამაში კი ჩართულია 1 375 ბავშვი და მოზარდი. პირველ ეტაპზე, 325 ბავშვი იღებდა ამ მომსახურებას. 2015 წელს ამ პროგრამას ორი მიმწოდებელი დაწესებულება ჰყავდა, დღეისთვის კი მათი რიცხვი შვიდამდეა გაზრდილი“, – განაცხადა კახა კალაძემ.

მისივე თქმით, გარდა ამისა, გაიზარდა პროგრამაში ჩართული ბავშვების ასაკი. კერძოდ, თავიდან თუ თერაპიული სეანსები ორიდან 14 წლის ჩათვლით ასაკის ბავშვებს უფინანსდებოდათ, დარგის სპეციალისტებთან და ამ სფეროში მომუშავე ორგანიზაციების წარმომადგენლებთან კონსულტაციის შედეგად, პროგრამაში ჩართული ბავშვების რიცხვი 18 წლამდე გაიზარდა.

„მნიშვნელოვანია ისიც, რომ ეს პროგრამა პრეცედენტულია. თბილისის მაგალითი ბევრმა სხვა მუნიციპალიტეტმა გაიზიარა და დღეისთვის ის უკვე არაერთ ქალაქში ხორციელდება“, – განაცხადა თბილისის მერმა.

კახა კალაძემ პროგრამის ბენეფიციარების მშობლებს მაქსიმალური მხარდაჭერა აღუთქვა.

„მესმის და ვხედავ, ბევრი მშობლისთვის რამხელა გამოწვევაა ეს საკითხი და მოხარული ვარ, რომ დღეს ჩვენ იმაზე მეტი შევძელით, ვიდრე ვახერხებდით. ასევე, ძალიან დიდი გამოწვევა აღმოჩნდა ამ პროგრამაში ჩართული ბავშვებისთვის პანდემიის პერიოდი, მაგრამ იმედი მაქვს, მსოფლიო ამ ორ მძიმე წელიწადს მალე უკან მოიტოვებს. მინდა, მივმართო ამ პროგრამის ბენეფიციარების მშობლებს, მუნიციპალიტეტის მხრიდან თქვენ ყოველთვის გექნებათ მხარდაჭერა, ყოველთვის გვერდით დაგიდგებით და ყველაფერს გავაკეთებთ ამ პროგრამის გასაძლიერებლად“, – განაცხადა დედაქალაქის მერმა.

თბილისის მერიას ტაქსის რეფორმის მესამე ეტაპისთვის განსაზღვრული რეგულაციები ზაფხულის ბოლოსთვის ექნება მზად, – ამის შესახებ დედაქალაქის მერმა, კახა კალაძემ მუნიციპალიტეტის მთავრობის სხდომაზე განაცხადა.

„ტაქსის რეფორმის მესამე ეტაპთან დაკავშირებით შიდა სამუშაოები სრულდება. ასევე, ტაქსის მომსახურების გამწევი პირებისგან ვიღებთ ინფორმაციას მათი საჭიროებების შესახებ და ვაწვდით დეტალურ ინფორმაციას დაგეგმილ პროცესებთან დაკავშირებით. მესამე ეტაპის ამოქმედებისთვის მზად ვიქნებით ზაფხულის ბოლოსთვის“, – განაცხადა კახა კალაძემ.

დედაქალაქის მერმა ვიცე-მერს, ირაკლი ხმალაძეს დაავალა, მესამე ეტაპისთვის ტაქსის სერვისის გაწევისას, ავტობუსის ზოლში ავტომანქანის გაჩერებისა და მგზავრის აყვანის საკითხი იყოს გათვალისწინებული.

„აქვე მინდა, ირაკლი ხმალაძეს დავავალო, რომ მესამე ეტაპისთვის, შეძლებისდაგვარად, გავითვალისწინოთ A კატეგორიის ტაქსის მძღოლების მიერ მგზავრის აყვანის ან გადმოსმის მიზნით, ავტობუსის ზოლში გაჩერების საკითხი. უზრუნველვყოთ მისი ლეგალიზება, რათა არ მოხდეს ტაქსის მომსახურების გამწევი პირების დაჯარიმება. ამისთვის დაგვჭირდება საკანონმდებლო ცვლილება. დაამუშავეთ ეს თემა ისე, რომ პრობლემა არ შეექმნას საზოგადოებრივი ტრანსპორტის გადაადგილებას“, – აღნიშნა კახა კალაძემ.

დღეს თბილისში 400-მდე უსახლკარო ოჯახია, მე ვიცოდი ეს პრობლემა და არჩევნებზე გავეცი დაპირება, რომ არცერთი თბილისელი უსახლკარო არ დარჩება საცხოვრებლის გარეშე და მე , კიდევ ერთხელ ვაძლევ პირობას თბილისელებს, რომ ჩემს გუნდთან ერთად ამ პირობას აუცილებლად შევასრულებ,- ამის შესახებ დედაქალაქის მერმა,კახა კალაძემ „შაბათის ქრონიკაში“ განაცხადა.

შპს „თბილსერვის ჯგუფს“ დავით ფაჩულია უხელმძღვანელებს, – ამის შესახებ თბილისის მერმა, კახა კალაძემ დედაქალაქის მთავრობის სხდომაზე განაცხადა.

მისი თქმით, დავით ფაჩულია 2020 წლიდან „თბილსერვის ჯგუფის“ დირექტორის მოადგილე იყო, ხოლო შემდეგ, დირექტორის მოვალეობას ასრულებდა.

„დღეს მინდა, წარმოგიდგინოთ ადამიანი, რომელიც უხელმძღვანელებს „თბილსერვის ჯგუფს“. დავით ფაჩულია არის მრავალფეროვანი სამუშაო გამოცდილების მქონე კადრი, რომელიც წლების განმავლობაში კერძო სექტორში სხვადასხვა ხელმძღვანელ და მენეჯერულ პოზიციაზე მუშაობდა. ის გახლავთ ბიზნესის მართვის მაგისტრი. განათლება აქვს მიღებული ტურიზმის მენეჯმენტისა და ეკონომიკის მიმართულებით და თვითონაც, მისი გამოცდილებიდან გამომდინარე, სხვადასხვა სასწავლებელში წლების განმავლობაში ტურიზმის სფეროში ლექციებს კითხულობდა“, – განაცხადა კახა კალაძემ.

დედაქალაქის მერმა „თბილსერვის ჯგუფის“ ახალ დირექტორს საქმიანობაში წარმატებები უსურვა.

„ძალიან საპასუხისმგებლო და მნიშვნელოვანი თანამდებობაა, რადგან თქვენ ხელმძღვანელობთ სამსახურს, სადაც ბევრი ადამიანია დასაქმებული. სამსახური, რომელიც ზრუნავს ქალაქის სისუფთავეზე, გარე განათებებზე. ბევრი მნიშვნელოვანი მიმართულება გაქვთ. ჩვენ ერთად გავართმევთ თავს იმ ამოცანებს, რომლებიც სამსახურის წინაშე დგას. წარმატებებს გისურვებთ“, – განაცხადა კალაძემ.

თბილისის მერის კახა კალაძის განცხადებით, დედაქალაქის მერიას უკანონო მშენებლობების საკითხზე ყოველთვის მკაცრი რეაგირება ექნება.

როგორც მან თბილისის მთავრობის სხდომაზე აღნიშნა, დედაქალაქში ეს პრობლემა ერთხელ და სამუდამოდ უნდა აღმოიფხვრას.

„ჩვენი მხრიდან არც ერთი უკანონო მშენებლობა რეაგირების გარეშე არ დაგვიტოვებია, ყველაზე რეაგირება მოხდა და შესაბამისი კანონმდებლობით რაც არის დასაშვები, ყველაფერი გაკეთდა. ახლა გვაქვს ერთი პრობლემა, რასაც ბოლო თვეების განმავლობაში ვაწყდებით. მშენებლები, რომლებიც უკანონო მშენებლობას ეწევიან, ერთგვარ ხრიკს იყენებენ და გვინდა, ეს ყველაფერი მოვაგვაროთ. კერძოდ, სამშენებლო კომპანიები, რომლებიც მშენებლობას უკანონოდ ახორციელებენ, მერიის იურიდიული სამსახურის გადაწყვეტილებას არ იბარებენ, ხოლო გადაწყვეტილების ჩაუბარებლობის გამო, ვეღარ იქმნება საფუძველი გადაწყვეტილების აღსრულებისთვის, ან არ ხდება ვადების ათვლა. თუ არ იბარებს კომპანია ჩვენ მიერ გამოწერილ ჯარიმას, ვადების ათვლაც ვერ ხდება და ეს სერიოზულ პრობლემას წარმოადგენს. შესაბამისად, საკანონმდებლო ცვლილებითა და ინიციატივით გვინდა მივმართოთ საქართველოს პარლამენტს. დარწმუნებული ვარ, ძალიან დიდი მხარდაჭერა იქნება. გვინდა, იურიდიული სამსახურის გადაწყვეტილების შემთხვევაში, გამოვიყენოთ ის მოდელი, რომელიც მუნიციპალური ინსპექციის მიერ გამოიყენება გამოცემულ სამართლებრივ აქტებთან დაკავშირებით. კერძოდ, იურიდიული სამსახურის მიერ გამოცემული აქტის განთავსება მოხდეს ობიექტზე და ის ჩაიბაროს, გამოქვეყნებულად და ჩაბარებულად. ეს კი იმას ნიშნავს, რომ მშენებლის მიერ სამართლებრივი აქტის ჩაუბარებლობა აღსრულების პროცესს ვეღარ შეაფერხებს. ამ ყველაფრის გაკეთება ძალიან მნიშვნელოვანია, რომ ერთხელ და სამუდამოდ ჩვენ ამაზე საუბარი დავასრულოთ. უკანონო მშენებლობები სისხლის სამართლის დანაშაულია. ძალიან მკაცრი რეაგირება ექნება ამას ყოველთვის, ძალიან პრინციპულები ვიქნებით იმისთვის, რომ ამ ქალაქში ერთხელ და სამუდამოდ ეს პრობლემა აღმოიფხვრას“,-განაცხადა კალაძემ.

რაც შეეხება უკანონო მშენებლობებთან დაკავშირებით, პოლიტიკური ოპონენტების კრიტიკას, კახა კალაძის თქმით, ამ საკითხზე მათი მხრიდან არასწორი ინფორმაციები ვრცელდება.

„ვერ დაასახელებენ ვერც ერთ ფაქტს, რომ მუნიციპალურ ინსპექციას უკანონო მშენებლობებზე რეაგირება არ ჰქონდა და კანონით გათვალისწინებულ ფარგლებში არ ემოქმედა“,-განაცხადა კალაძემ.

თბილისის მერია განცხადებას ავრცელებს, მაღალი საზოგადოებრივი ინტერესებიდნ გამომდინარე განმარტავს იწყებს თუ არა მერია ადმინისტრაციული შენობის მშენებლობას.

დედაქალაქის მერია მედიასაშუალებას ცრუ ინფორმაციის გავრცელებაში ადანაშაულებს.მათივე თქმით, თბილისის მერიის ადმინისტრაცია არსად გადასვლას არ გეგმავს.

"საზოგადოების ინტერესებიდან გამომდინარე, გვინდა გამოვეხმაუროთ ერთ-ერთ მედიასაშუალებაში გავრცელებულ ცრუ ინფორმაციას, თითქოს თბილისის მერია ადმინისტრაციული შენობის მშენებლობას იწყებს.

სრული პასუხისმგებლობით ვაცხადებთ, რომ თბილისის მერიის ადმინისტრაცია არსად გადასვლას არ გეგმავს.

გავრცელებული ინფორმაცია არის ტყუილი და მიზნად ისახავს საზოგადოების შეცდომაში შეყვანას.

აქვე განვმარტავთ, თბილისის მერიის დაკვეთით, მიმდინარეობს 63 მუნიციპალიტეტის მონაცემთა ცენტრის განსათავსებელი შენობის, საგენერატოროების და ერთი ოფისის პროექტირება.

აღნიშნული შენობა უნდა აშენდეს თბილისში, გაბრიელ სალოსის გამზირზე.

ნაგებობაში მუნიციპალური სერვისების განვითარების სააგენტო, მუნიციპალური ინსპექცია, თბილისის განვითარების ფონდი და თბილისის მერიის უსაფრთხოების სამსახური უნდა განთავსდეს. ზემოთჩამოთვლილი მუნიციპალური უწყებები დღესდღეობით განთავსებულია სხვადასხვა მისამართზე,"-ნათქვამია თბილისის მერიის მიერ გავრცელებულ ინფორმაციაში