ზუსტად 10 წლის წინ საქართველომ ევროკავშირთან ასოცირების შეთანხმება გააფორმა

დღეს, 27 ივნისს, საქართველოსა და ევროკავშირს შორის ასოცირების შესახებ შეთანხმების ხელმოწერიდან 10 წელი გავიდა. ევროკავშირის წარმომადგენლობის ფეისბუკგვერდზე გამოქვეყნებულ ინფორმაციაში წერია, რომ საქართველოს მთავრობა ევროკავშირის გზას უნდა დაუბრუნდეს.

„ეს პარტნიორობის მნიშვნელოვანი ეტაპია და ასევე შეხსენება, რომ ევროკავშირი საქართველოს მოსახლეობის ევროკავშირში მომავლისკენ სწრაფვას მტკიცედ უჭერს მხარს.

საქართველოს მთავრობა ევროკავშირის გზას უნდა დაუბრუნდეს. საქართველოს ადგილი ევროკავშირშია, მაგრამ საქართველო ევროკავშირისკენ მიმავალ გზაზე წინ ვერ წაიწევს, თუ მოქმედების კურსი არ შეიცვლება“, - წერია განცხადებაში.

საქართველო დიდი ხანია ცდილობს დაუახლოვდეს ევროკავშირს. 2014 წელს მხარეებს შორის ასოცირების ხელშეკრულება გაფორმდა, 2016 წელს ამოქმედდა ღრმა და ყოვლისმომცველი თავისუფალი ვაჭრობა.

2017 წლიდან საქართველოს მოქალაქეები შენგენის სივრცეში უვიზოდ მიემგზავრებიან და სამ თვემდე დარჩენის უფლება აქვთ.

2023 წლის დეკემბერში კი საქართველომ ევროკავშირის კანდიდატის სტატუსი მიიღო, თუმცა მმართველმა პარტიამ - „ქართულმა ოცნებამ“ - რამდენიმე ოპოზიციონერის დახმარებით მოლაპარაკებების გახსნამდე მიიღო „აგენტების კანონი“, რომელსაც ევროკავშირი და ქვეყნის სხვა პარტნიორები ევროინტეგრაციის ხელშემშლელ გარემოებად მიიჩნევენ.