წელს თბილისის მერიამ შავ სიაში ოთხი კომპანიის შეყვანა მოითხოვა

თბილისის მერიამ მიმდინარე წელს შესყიდვების სახელმწიფო სააგენტოს ოთხი კომპანიის ე.წ. შავ სიაში შეყვანის მოთხოვნით მიმართა. ამის შესახებ "ბიზნეს ფორმულას" თბილისის მერიიდან აცნობეს.

ასეთ კომპანიებს შორისაა შპს "გრინსერვისი +", რომელიც თბილისში, ვაკის პარკში შადრევნებისა და კასკადის სარეაბილიტაციო სამუშაოებს ასრულებდა.

აღსანიშნავია, რომ კომპანია მერიის ტენდერებში მას შემდეგაც მონაწილეობდა, რაც ვაკის პარკის რეაბილიტირებულ შადრევანში ბურთის ამოსაღებად ჩასულ 3 ბავშვს დენმა დაარტყა. ერთ-ერთი მოზარდი კლინიკაში გადაყვანის შემდეგ გარდაიცვალა.

"გრინსერვისი +"-თან ერთად, დედაქალაქის მერია ე.წ. შავ სიაში შემდეგი კომპანიების შეყვანას ითხოვს:

-შპს "გაბ. ჯორჯია" - ქ. თბილისში, სოფელ დიდ ლილოში (არჩილ მეფის ქ. N2) სპორტული კომპლექსის სამშენებლო სამუშაოები;
-შპს "ირლანი" - ქ. თბილისში, კრწანისის რაიონში, გ. ნიკოლაძის ქუჩაზე გამავალი სანიაღვრე კოლექტორის სარეაბილიტაციო სამუშაოები;
-შპს "ფარაონი" - ქ. თბილისში, ვაკის რაიონში, უჩანეიშვილის ქუჩა N2-ის მიმდებარედ საყრდენი კედლის მოწყობის სამუშაოები.