18 მარტიდან რეფერენტული ფასი დამატებით 300-ზე მეტ ქრონიკულ და ონკოლოგიურ მედიკამენტზე ამოქმედდა. საერთო ჯამში, ფასის ზედა ზღვარი, უკვე 1100-ზე მეტ წამალზე მოქმედებს. აღნიშნული მედიკამენტების სია უახლოეს მომავალში კიდევ უფრო გაიზრდება.
რეფორმის მიზანი ქვეყანაში წამლის ღირებულების შემცირებაა. ცვლილების მიხედვით ფარმაცევტულმა კომპანიებმა დადგენილი ფასებით უნდა იხელმძღვანელონ. იმ შემთხვევაში, თუ აფთიაქები მედიკამენტებს აღნიშნულ ფასზე ძვირად გაყიდიან, ისინი დაჯარიმდებიან.
შეგახსენებთ, რომ მოსახლეობისთვის წამლებზე ხელმისაწვდომობის გაზრდის მიზნით სახელმწიფომ ქრონიკული და ონკოლოგიური მედიკამენტების ღირებულების ის მაქსიმალური ზღვარი დაადგინა, რომელზე მაღალ ფასადაც მათი რეალიზაცია აიკრძალა. ცვლილების შედეგად, ფარმაცევტული პროდუქტის ფასი საშუალოდ 40%-ით შემცირდება. რეფერენტული ფასწარმოქმნის მექანიზმი ეტაპობრივად სხვა ჯგუფის მედიკამენტებზეც ამოქმედდება.
მედიკამენტებზე განსაზღვრული რეფერენტული ფასი ორიგინალისა და მისი ანალოგი გენერიკებისთვის განსხვავებულია, რაც ბაზარზე საერთაშორისო ბრენდების ინტერესს დააზღვევს.
მედიკამენტების ჩამონათვალისა და მაქსიმალური ზღვრული ფასის შესახებ ინფორმაცია შესაბამის გვერდზეა განთავსებული.
აშშ-ის სურსათისა და მედიკამენტების ადმინისტრაციამ (FDA) შაკიკის სამკურნალოდ Pfizer-ის მიერ წარმოებული სწრაფი მოქმედების ცხვირის სპრეი დაამტკიცა. ამის შესახებ ფარმაცევტული გიგანტი იუწყება.
Pfizer-ის განცხადებით, პრეპარატი ბაზარზე Zavzpret-ის სახელით გავა და აფთიაქებში 2023 წლის ივლისში გამოჩნდება.
„FDA-ს მიერ Zavzpret-ის დამტკიცება მნიშვნელოვანი მიღწევაა შაკიკის მქონე ადამიანებისთვის, რომლებსაც ტკივილისგან გათავისუფლება სურთ და ორალურ პრეპარატებს ალტერნატიულ ვარიანტებს არჩევენ“, — წერს განცხადებაში Pfizer-ი.
პრეპარატზე ჩატარებულმა კლინიკური ცდების მესამე ფაზამ აჩვენა, რომ შაკიკის მქონე ადამიანებში ტკივილს ის სულ რაღაც 15 წუთში ამსუბუქებდა.
„Zavzpret-ი სწრაფად შთანთქმადი ცხვირის სპრეია და მკურნალობის ალტერნატიულ საშუალებას წარმოადგენს იმ ადამიანებისთვის, ვისაც ტკივილის გაყუჩება ესაჭიროებათ, მაგრამ ორალურ პრეპარატებს პირღებინების გამო ვერ იღებენ“, — ამბობს ახალი ინგლისის ნევროლოგიისა და თავის ტკივილის ინსტიტუტის სამედიცინო დირექტორი ქეთლინ მულინი.
პრეპარატის ორმაგად ბრმა ცდები 1405 ადამიანზე ჩატარდა. ნახევარს სპრეის ერთი დოზა მისცეს, ნახევარს კი პლაცებო.
აღმოჩნდა, რომ ორი საათით ადრე დაწყებული შაკიკის ტკივილს სპრეი მნიშვნელოვნად ამცირებდა.
Zavzpret-ი, ასევე ცნობილი, როგორც Zavegepant-ი, შაკიკის სამკურნალო სხვა საშუალებებთან ერთად Pfizer-მა კომპანია Biohaven-ისგან შარშან შეიძინა 10 მილიარდ დოლარად.
ამერიკის შაკიკის ფონდის მონაცემებით, შაკიკის თავის ტკივილი დაახლოებით 39 მილიონ ამერიკელს აწუხებს.
მომზადებულია Agence France-Presse-ის მიხედვით.
საქართველოს პრემიერ-მინისტრის ირაკლი ღარიბაშვილის გადაწყვეტილებით, ფარმაცევტული პროდუქტის ფასების რეგულირების უწყებათაშორისი კომისია უფლებამოსილი იქნება კონკრეტულ ფარმაცევტულ პროდუქტებზე შესაბამისი ზღვრული საბითუმო სარეალიზაციო ფასი დაადგინოს.
დადგენილების მიხედვით, რომელსაც ხელს პრემიერ-მინისტრი ირაკლი ღარიბაშვილი აწერს, ფარმაცევტული პროდუქტის ფასის სახელმწიფო რეგულირების, წესისა და პირობების დამტკიცების შესახებ დადგენილებაში ცვლილებები შევიდა. მაღალი საზოგადოებრივი ან სახელმწიფოებრივი ინტერესიდან გამომდინარე, ფარმაცევტული პროდუქტის ფასების რეგულირების უწყებათაშორისი კომისია უფლებამოსილი იქნება კონკრეტულ ფარმაცევტულ პროდუქტებზე შესაბამისი ზღვრული საბითუმო სარეალიზაციო ფასი დაადგინოს ექსპერტული შეფასების საფუძველზე. ასევე, უწყებათაშორისი კომისია უფლებამოსილი იქნება კონკრეტულ ფარმაცევტულ პროდუქტებზე შესაბამისი საბითუმო სარეალიზაციო ფასი შემოიღოს ან განსაზღვროს და მასთან დაკავშირებული სხვა საკითხები მოაწესრიგოს.
უწყებათაშორისი კომისიის შემადგენლობაში შედიან ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს, ეკონომიკისა და მდგრადი განვითარების სამინისტროს, ფინანსთა სამინისტროს, შემოსავლების სამსახურის, ინტელექტუალური საკუთრების ეროვნული ცენტრის, სტატისტიკის ეროვნული სამსახურისა და კონკურენციის ეროვნული სააგენტოს წარმომადგენლები, ასევე, ორი პროფესიული პროფილის დამოუკიდებელი წევრი-ფარმაკოლოგი და ფარმაცევტი და სამედიცინო და ფარმაცევტული საქმიანობის რეგულირების სააგენტოს დირექტორი. კომისია უფლებამოსილი იქნება განსაზღვროს ფარმაცევტულ პროდუქტზე დადგენილი ფასის ძალაში შესვლის განსხვავებული ვადები და პირობები. კომისიის მიერ მიღებული გადაწყვეტილების შესაბამისად, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო ფასებს შესაბამის კატალოგში გამოაქვეყნებს. განახლებული ფასი კი ფასების კატალოგში გამოქვეყნებიდან 1 თვის ვადაში შევა ძალაში.
ქ. თბილისის მუნიციპალიტეტის სამგორის რაიონის გამგეობის განათლების, კულტურის, სპორტისა და ახალგაზრდობის განყოფილება ხუთდღიან ახალგაზრდულ ბანაკში მიღებას აცხადებს. პროექტის ფარგლებში, ახალგაზრდებს შეეძლებათ, არაფორმალური განათლების მიმართულებით აიმაღლონ ცოდნა, აღმოაჩინონ და განავითარონ სხვადასხვა თეორიული და პრაქტიკული უნარები აქტიურ სამოქალაქო ცხოვრებაში ჩასართველად, ასევე, განავითარონ ლიდერული თვისებები.
ღონისძიება თბილისსა და სამცხე-ჯავახეთში ინტერაქციულ ფორმატში გაიმართება, რაც ტრენინგ პროგრამაში მონაწილეობას მოიცავს.
ბანაკის თემატური მიმართულებებია:
-პროექტის ორგანიზება;
-ლიდერული და გუნდური მუშაობისთვის უნარების განვითარება;
-მოტივაციის ამაღლება;
-ეფექტური კომუნიკაციისთვის საჭირო უნარ-ჩვევების დახვეწა;
მონაწილეობის მსურველები აპლიკაციის შევსებას 24 მარტის ჩათვლით შეძლებენ.
ასევე, ბანაკის ფარგლებში იგეგმება სხვადასხვა ტიპის ინტერაქციული/გასართობი აქტივობა, რაც მონაწილეებს საშუალებას მისცემს, გუნდური მუშაობის პრინციპით უკეთ გაიცნონ ერთმანეთი.
-ახალგაზრდული ბანაკი გაიმართება 6-დან 10 აპრილის ჩათვლით;
მინიმალური მოთხოვნები მონაწილეებისათვის:
-მონაწილეთა ასაკი : 16-დან 20 წლის ჩათვლით
-მონაწილეობის მსურველი რეგისტრირებული უნდა იყოს სამგორის რაიონში
- მონაწილეობის მსურველმა აუცილებლად უნდა შეავსოს აპლიკაცია სრულყოფილად,
უნდა იყოს აქტიური, ენერგიული და კრეატიული
-აპლიკაციის შევსების შემდეგ, მონაწილეობის მსურველ ახალგაზრდებთან გაიმართება გასაუბრება, რომლის საფუძველზეც შეირჩევიან მონაწილეები.
-ახალგაზრდულ ბანაკში მონაწილეობა უფასოა
მონაწილეთა მგზავრობას, სასტუმროში განთავსებასა და კვებას სამგორის გამგეობა უზრუნველყოფს.
აუცილებლად აქტიურად მხარს დავუჭერთ უმაღლეს განათლებაში და პროფესიულ განათლებაში ერთობლივი, ორმაგი პროგრამების განხორციელებას და დანერგვას, ჩვენს ევროპელ და დასავლელ უცხოელ უნივერსიტეტებთან ერთად, ვინაიდან, მიგვაჩნია, რომ დღეს განათლებას არ აქვს საზღვრები და მნიშვნელოვანია უფრო აქტიურად და ფართოდ გავაღოთ კარი ევროპული და დასავლური განათლების შემოსაშვებად საქართველოში, - ამის შესახებ განათლებისა და მეცნიერების ახალმა მინისტრმა გიორგი ამილახვარმა განაცხადა.
მან ასევე აღნიშნა, რომ პროფესიული განათლება გამოცხადდება პრიორიტეტულ მიმართულებად.
„პროფესიული განათლება ჩემი მინისტრობის პერიოდში გამოცხადდება პრიორიტეტულ მიმართულებად და უახლოეს პერიოდში ჩვენ შემოგთავაზებთ იმ კონკრეტულ ხედვას, თუ როგორ ვაპირებთ ამ დარგის გარდაქმნას და რა კონკრეტულ და იოლი ფორმების მექანიზმებს შევთავაზებთ დამსაქმებლებს პროფესიულ განათლებაში ჩართულობისთვის.
მიღწეულმა შედეგებმა გასული წლების განმავლობაში უკვე მოგვცა შესაძლებლობა, რომ ჩვენ აქტიურად ვიმუშაოთ, რომ საქართველო ჩამოვაყალიბოთ რეგიონში განათლების მიზიდულობის კერად, მოვიზიდოთ მეტი უცხოელი სტუდენტი და პროფესორი საქართველოში, რაც პირდაპირ უდრის ჩვენი განათლების ხარისხის ზრდას და პირდაპირ ინვესტიციას განათლებაში.
და ბოლოს, ამ და ყველა სხვა დანარჩენ საკითხებზე, რომელიც უამრავია, უახლოეს მომავალში პრემიერ-მინისტრს ჩვენ წარვუდგენთ ჩვენს ხედვას და გეგმას და ერთობლივად, უკვე უახლოეს მომავალში საზოგადოებას საჯაროდ გავაცნობთ იმ კონკრეტულ დროში გაწერილ გეგმას, რომელიც ამ და სხვა საკითხებს შეეხება.
კიდევ ერთხელ დიდი მადლობა თქვენ და ბატონ პრემიერს“, - განაცხადა გიორგი ამილახვარმა.
ჩვენ გვინდა და შევქმნით აუცილებლად ღირსეულ პირობებს ჩვენი დამსახურებული მასწავლებლებისთვის და ეს იქნება ის ნაბიჯი, რაც მნიშვნელოვანია მასწავლებლების პროფესიის ღირსების და პოპულარიზაციის ამაღლებისთვის, - ამის შესახებ განათლებისა და მეცნიერების ახალმა მინისტრმა გიორგი ამილახვარმა განაცხადა.
როგორც მინისტრმა აღნიშნა, დამატებით სოციალურ და ფინანსურ მხარდამჭერ მექანიზმებს შეთავაზებენ მაღალი აკადემიური მოსწრების მქონე სტუდენტებს.
„აუცილებლად დამატებით სოციალურ და ფინანსურ მხარდამჭერ მექანიზმებს შევთავაზებთ ყველა იმ მოტივირებულ, წარჩინებულ და წარმატებულ სტუდენტს, ვისაც აქვს მაღალი აკადემიური მოსწრება და ხელს შევუწყობთ მათ ამ პროცესში განათლების პროცესის კარგად დასრულებისთვის,“- აღნიშნა გიორგი ამილახვარმა.
დღეს, 20 მარტს, უდიდესი მწერლის დაბადების დღეა, ოთარ ჭილაძეს 90 წელი შეუსრულდებოდა. პროზაიკოსი, პოეტი და დრამატურგი 1933 წლის 20 მარტს სიღნაღში დაიბადა. 1998 წელს ნომინირებული იყო ნობელის პრემიაზე ლიტერატურის დარგში, მსოფლიოს მხოლოდ ხუთ სხვა მწერალთან ერთად. ოთარ ჭილაძე სიცოცხლეშივე აღიარეს კლასიკოს მწერლად და მას მკითხველის სიყვარული არასდროს მოკლებია.
"თავიდანვე იმიტომ ეძლევა ადამიანს სიცოცხლე - სიკვდილისთვის რომ მოემზადოს... არც სულ სიცოცხლე ვარგა და არც სულ სიკვდილი, როდისმე ერთიც მოგწყინდება და მეორეც"
ოთარ ჭილაძის ძმა, თამაზ ჭილაძე, რომელიც ასევე მწერალი და პოეტი იყო, ერთ-ერთ ინერვიუში ძალიან კარგად აღწერს საკუთარი ძმის თავდადებას და სიყვარულს საკუთარი საქმის მიმართ:
"პირველს ყოველთვის, ოთარს ვაკითხებდი და ისიც ასევე იყო. ერთმანეთის დაუნდობელი კრიტიკოსები ვიყავით. კიდევ კარგი, რომ ასე ვიყავით. ვიცოდი, ამის უკან არაფერი იმალებოდა - მხოლოდ კეთილი სურვილი, რომ უკეთ დაგვეწერა. თუ ვინმე მოისმენდა ჩვენს კამათს, ეგონებოდათ, რომ მტრები ლაპარაკობდნენ, არადა, საუბრობდა ორი ძმა, რომელთაც მართლა აინტერესებდათ, რომ ნაწერი კარგი ყოფილიყო. თვითონაც არაჩვეულებრივი თვისება ჰქონდა, როგორც ნამდვილ მწერალს შეეფერება: მოსმენის, კრიტიკის მიღების. მე რომ რომანებს ვწერ, იმხელა ნაკვეთები ამოუღია თავისი რომანიდან. უზარმაზარ ნაკვეთებს თავისუფლად ამოიღებდა, იმიტომ რომ სჯეროდა, მართალი ვიყავი. ჩვენ, შეიძლება, ასე თუ ისე კარგი მწერლები ვართ, მაგრამ ოთარი მოვლენაა. დანიელებმა ტყუილად კი არ დაწერეს, "საქართველო დააბრუნა ევროპის რუკაზეო". ნობელის პრემიის ნომინანტი იყო, ორ წელიწადს რომ დასცლოდა მიიღებდა, რაც მთელი საქართველოსთვის დიდი ამბავი იქნებოდა."
უცხოეთის ქვეყნებში არც ერთ ქართველ მწერალს არ ჰქონია იმდენი და ისეთი გამოხმაურება, რამდენიც ოთარ ჭილაძის რომანებს ჰქონდა. 1 ოქტომბერს, გამთენიისას, ქართველი მწერალი ოთარ ჭილაძე 76 წლის ასაკში გარდაიცვალა.
გთავაზობთ ოთარ ჭილაძის ერთ-ერთ განსაკუთებულ ლექსს, რომელსაც თავად მწერალი კითხულობს , ეს ლექსი ოთარ ჭილაძეს ძალიან უყვარდა.
1959 წლის 17 მარტს გალაკტიონმა სიცოცხლე თვითმკვლელობით დაასრულა. გალაკტიონის ძმისშვილი, პროფესორი ნოდარ ტაბიძე, ბიძის გარდაცვალებამდე (1959 წლამდე) ბოლო 12 წელი, მასთან ერთად ცხოვრობდა. იგი ყველაზე რეალურად იხსენებს თავის წიგნებსა და ინტერვიუებში გალაკტიონს - მას კოსმიურ არსებას უწოდებს.
ევროვიზიის ოფიციალურ იუთუბარხზე საქართველოს წარმომადგენლის, ირუ ხეჩანოვის ვიდეორგოლის პრემიერა შედგა
ევროვიზია 2023-ზე საქართველოს წარმომადგენლის, ირუ ხეჩანოვის საკონკურსო სიმღერისა და ვიდეორგოლის პრემიერა ევროვიზიის ოფიციალურ იუთუბარხზე გუშინ, 18:00 საათზე გაიმართა.
საკონკურსო სიმღერის – Echo-ს ავტორი გიგა კუხიანიძეა, ტექსტი კი თავად ირუს და ბენი ქადაგიძეს ეკუთვნით. სიმღერის ვიდეორგოლი ზაზა ორაშვილმა გადაიღო. ქორეოგრაფიაზე – გიორგი ტორიაშვილმა, მხატვრობაზე – შაკო პოპიაშვილმა, ხოლო კოსტიუმებზე მარიკა ქურდუბაძემ იმუშავეს.
რიგით 67-ე ევროვიზიის სიმღერის კონკურსს 9, 11 და 13 მაისს დიდი ბრიტანეთის ქალაქი ლივერპული უმასპინძლებს.
2023 წლის ევროვიზიაზე 37 ქვეყანა იღებს მონაწილეობას. საქართველო მაყურებლის წინაშე 11 მაისს, მეორე ნახევარფინალურ საღამოზე წარდგება.