მან ჩემსკენ გამოიწია დასარტყამად, მე კი ლამის წყლის ბოთლი დავალეწე თავზე ამ მონას - ნანა ლეჟავა ტვ24-ის სკანდალზე

ტელეწამყვანი ნანა ლეჟავა ფეისბუქზე გამოქვეყნებული ვრცელი განცხადებით განმარტავს TV24-დან წასვლის მიზეზს.

"ამბავი იმაზედ, როგორ გავხდი თაღლითების მსხვერპლი. სათაურში შემეძლო გამეტანა - როგორ გავხდი თაღლითი პილიტიკოსების მსხვერპლი, მაგრამ პოლიტიკოსებად ამ ადამიანების მოხსენიება ცოტა ხმამაღლი განაცხადი მგონია", - წერს ლეჟავა „ქართული ოცნების“ ყოფილ დეპუტატზე და მილიონერ ბიზნესმენ შოთა შალელაშვილზე. მისივე თქმით, ტელევიზიაში მუშაობის დროს, მას პირადი კომუნიკაცია ჰქონდა ასევე შალელაშვილის ნდობით აღჭურვილ პირთან, სანდრო თოფურიასთან.

როგორც ლეჟავა ჰყვება, დამფუძნებელი შეჰპირდა, რომ ყველაფერი ექნებოდა ტელევიზიის ნორმალური ფუნქციონირებისთვის. მისი სიტყვებით, "მფლობელს ეთერში გასვლა ისტერიულად ეჩქარებოდა", ამიტომ შეზღუდული ტექნიკური რესურსით, საცდელი მაუწყებლობა 10 ივნისს დაიწყეს.

ნანა ლეჟავა ამბობს, რომ დაახლოებით 20 ივნისიდან მფლობელმა დამოკიდებულება რადიკალურად შეცვალა.

"ბატონმა შოთამ [შალელაშვილმა], როგორც ჩანს, მიიჩნია, რომ ძალიან ბევრს ხარჯავდა (როიტერზე ჯერ თანხმობა მომცეს, მერე გამაუქმებინეს - ძვირიაო) და სანდრო თოფურიას მხრიდან დაიწყო ყველა იმ შეთანხმების და დაპირების უტიფრად უარყოფა და დარღვევა, რაც მანამდე არსებობდა", - წერს ის და ამბობს, რომ მას შემდეგ, რაც ურთიერთობა ჩიხში შევიდა, მიიღო გადაწყვეტილება, ტელეკომპანიის მფლობელი შოთა შალელაშვილი საქმის კურსში ჩაეყენებინა.

ლეჟავას თქმით, შალელაშვილს 4 ივლისს შეხვდა, თუმცა მისგან მოისმინა, რომ თანამშრომლებისთვის საშემოსავლოს გადახდას არ აპირებს და "ეს თანამშრომლებმა უნდა გადაიხადონ". ამასთან, როგორც ამბობს, არხის მფლობელთან შეხვედრისას ისიც დააფიქსირა, რომ სამსახურიდან წასვლას აპირებდა.

"ნუ იჩქარებო, იყო პასუხი და შემდეგი შეხვედრა შაბათს 6 ივლისს დაინიშნა, უკვე სანდროსთან [თოფურიასთან] ერთად. ვინაიდან საბოლოოდ დავრწმუნდი, რომ თაღლითებთან მქონდა საქმე, მომზადებული წავედი და საუბარი ჩავიწერე ტელეფონით. ნუ ისინი ორი ტელეფონით მწერდნენ!..

პირველი ჩემი შეკითვა შეეხებოდა რას ნიშნავს, რომ თანამშრომლებმა უნდა გადაიხადონ საშემოსავლო?? როცა წინა თვეში მათ დაგვიანებით, მაგრამ მაინც აიღეს ხელფასი დაუბეგრავად - ის, რაც ეწერათ კონტრაქტებში!! პასუხი???? წინა თვეში საერთოდ არ ეკუთვნოდათ მათ ხელფასები - ეთერში არ გადიოდით და მე რა ვალდებულება მქონდა, ხელფასები მეხადა??? შენი პატივისცემით დავარიგე მაშინ!!! ანუ, ხალხო, კონტრაქტების თავზეც გავიარეთო, მე ვარ ის დირექტორი, ვისი ხათრითაც ხელფასები რიგდება! მოკლედ საუბარი არ შედგა ბატონი სანდრო თოფურიას უტიფარი ტყუილების გამო.

ბოლოს ყველაფერი იმით დასრულდა, რომ მან ჩემსკენ გამოიწია დასარტყამად, მე კი, ამ თაღლითების შემხედვარე, ლამის მოძალადედ ვიქეცი და ლამის წყლის ბოთლი (პლასტმასის :დდ ) დავალეწე თავზე ამ მონას. მადლობა ღმერთს, არსებობს ჩანაწერი, სადაც ყველაფერი გარკვევით ისმის. მე ეს ჩანაწერი მოვასმენინე ყველა თანამშრომელს, რომლებიც ამ დრომდე ელოდებიან კუთვნილ ხელფასს. [...]", - წერს ნანა ლეჟავა.

რადიო თავისუფლება კომენტარისთვის შოთა შალელაშვილს დაუკავშირდა, რომელმაც თქვა, რომ ნანა ლეჟავას განცხადებას პირადად არ გასცნობია და რომ იგი ტელევიზიის საქმიანობაში საერთოდ არ ერეოდა.

შალელაშვილი ასევე იხსენებს ნანა ლეჟავასთან და სანდრო თოფურიასთან შეხვედრას და ამბობს, რომ "ძალიან ცუდი მოსასმენი იყო მათი საუბარი".

"ყველანაირად ვეცადე, რომ პრობლემები გადაგვეჭრა. ეს შეხვედრა ქალბატონმა ნანამ ჩაშალა, გაიქცა, დანარჩენი მათი გადაწყვეტილებები აბსოლუტურად დამოუკიდებელი იყო ჩვენი ოჯახიდან. მე საერთოდ არ ვერევი.

მე ვთხოვე, თუ გინდათ მოგისმინოთ, ყველა პრობლემა გადავდოთ, მხოლოდ პრობლემების გადაჭრაზე ვისაუბროთ-მეთქი და გარჩევები დაიწყეს. გარჩევების ინიციატორი იყო ქალბატონი ნანა [ლეჟავა], რაღაც პრეტენზია ჰქონდა სანდროსთან [თოფურიასთან]. ასეთ დროს ძალიან ძნელია, როდესაც მტკიცებულებები არცერთი მხრიდან არ არის... ჩემთან რა საერთო აქვს? შოთა რა შუაშია? და თაღლითობა სად დაინახა?" - ამბობს შალელაშვილი.

კითხვაზე, იყო თუ არა საუბარი თანამშრომლების მხრიდან საშემოსავლოს გადახდაზე, იგი ამბობს, რომ პირადად არ ჩარეულა არც ხელშეკრულებების შედგენაში და არც მის შინაარსში:

"მაგის არც უფლებამოსილება მაქვს, რაიმე გადავიხადო ან არ გადავიხადო. ხელს არავისკენ არ ვიშვერ, არც ქალბატონი ნანასკენ, არც სანდროსკენ. მათ ერთმანეთში დამოუკიდებელი ურთიერთობა ჰქონდათ ჩარევის გარეშე. ჰქონდათ აბსოლუტური დამოუკიდებლობა სარედაქციო პოლიტიკაშიც. ერთხელაც, ერთი თვის განმავლობაში შოთას [შალელაშვილის] ან მისი ოჯახის სახელი ამ ტელევიზიაში არ გაჟღერებულა. თუკი რაიმე პრეტენზიები აქვს, მზად ვარ მოვისმინო, მაგრამ ეს იქნება მისი მხრიდან ცილისწამება".

ნანა ლეჟავას მიერ ტელეკომპანია TV24-ის დატოვების შესახებ ინფორმაცია 8 ივლისს გავრცელდა.

საინფორმაციო სამსახურის ხელმძღვანელმა იმედა დარსალიამ მაშინ რადიო თავისუფლებას დაუდასტურა, რომ რომ ნანა ლეჟავამ გადაწყვეტილება ფინანსური საკითხების გამო მიიღო, თუმცა უარყო, რომ არხის თანამშრომლებს ხელფასის ჩარიცხვასთან დაკავშირებით პრობლემა შეექმნათ.

TV24 „ქართული ოცნების“ ყოფილი დეპუტატისა და მილიონერი ბიზნესმენის, შოთა შალელაშვილის ოჯახმა დააფუძნა.

ამ დრომდე ეთერში მხოლოდ საინფორმაციო გამოშვებები და ერთი პოლიტიკური ტოქშოუ გადის.