რჩეული სტატიები

ნიკა გვარამიას მოსამართლემ 3 წლითა და 6 თვით პატიმრობა შეუფარდა და სასამართლო დარბაზში დაკავების გადაწყვეტილება მიიღო. 

თბილისის საქალაქო სასამართლოს მოსამართლემ, ლაშა ჩხიკვაძემ გადაწყვეტილება რამდენიმე წუთის წინ გამოაცხადა.

 ნიკა გვარამიას პროკურატურა ედავება ჯერ კიდევ "რუსთავი 2"-ის დირექტორობის დროს, სამაუწყებლო კომპანიის "კანონიერი ინტერესების საწინააღმდეგოდ უფლებამოსილების ბოროტად გამოყენებასა და მისი კუთვნილი დიდი ოდენობით თანხის სამსახურებრივი მდგომარეობით გამოყენებას". მასთან ერთად ბრალდებულია კიდევ ორი პირი - კახა დამენია და ზურაბ იაშვილი.

სუს-ის უფროსმა გრიგოლ ლილუაშვილმა ორი ტელეკომპანიის და დეპუტატ ლევან ხაბეიშვილის წინააღმდეგ სარჩელი შეიტანა.

როგორც გრიგოლ ლილუაშვილის ადვოკატი მამუკა ღვინიაშვილი აცხადებს, ტელეკომპანიების „მთავარი არხისა“ და „ფორმულას“ ეთერებით გავრცელდა ინფორმაცია ე.წ. ქოლ-ცენტრების საქმიანობის, ფულის მოპარვის სქემებთან დაკავშირებით და „ქოლ-ცენტრებთან“ შემხებლობაში მყოფ ერთ-ერთ პირად დასახელდა სუს-ის უფროსი გრიგოლ ლილუაშვილი, რაც სიცრუეა. ადვოკატი მიიჩნევს, რომ აღნიშნული ინფორმაციის გავრცელებით ზიანი მიადგა გრიგოლ ლილუაშვილის სახელს, ღირსებას და რეპუტაციას, რის გამოც სასამართლოს მიმართავს.

გრიგოლ ლილუაშვილის ადვოკატის გ ა ნ ც ხ ა დ ე ბ ას უცვლელად გთავაზობთ:

„ტელეკომპანიების „მთავარი არხისა“ და „ფორმულას“ ეთერებით გავრცელდა ინფორმაცია ე.წ. „ქოლ-ცენტრების“ საქმიანობის, მათი შესაძლო ფიგურანტების და მონაწილეების შესახებ.

გავრცელებული სიუჟეტებით „ქოლ-ცენტრებთან“ შემხებლობაში მყოფ ერთ-ერთ პირად დასახელდა სახელმწიფო უსაფრთხოების სამსახურის უფროსი გრიგოლ ლილუაშვილი.

როგორც გრიგოლ ლილუაშვილის ადვოკატი, ვაცხადებ, რომ „მთავარი არხისა“ და „ფორმულას“ ეთერებით გავრცელებული ინფორმაცია, ე.წ. „ქოლ-ცენტრების“ საქმიანობასთან, თაღლითურ, კრიმინალურ თუ ფულის მოპარვის სქემებთან ან რაიმე სახის დანაშაულებრივ ჯგუფებთან გრიგოლ ლილუაშვილის კავშირის შესახებ, არის სრული სიცრუე და ცილისწამება.

აღნიშნული ცილისწამებლური ინფორმაციის გავრცელებით შეილახა და ზიანი მიადგა გრიგოლ ლილუაშვილის სახელს, ღირსებას და საქმიან რეპუტაციას.

გვსურს საზოგადოებას ვაცნობოთ, რომ ტელეკომპანიების „მთავარი არხისა“ და „ფორმულას“, ასევე, ლევან ხაბეიშვილის მიმართ სასამართლოში წარდგენილია სარჩელი.

სასარჩელო მოთხოვნას წარმოადგენს: 1) იმ ფაქტების უარყოფა, რომელიც არის სრული სიცრუე და ცილისწამება; 2) მოპასუხეებისათვის ზიანის ანაზღაურების სახით სიმბოლურად 1 ლარის დაკისრება.

განვმარტავთ, რომ საერთაშორისო სტანდარტებით დადგენილი მტკიცების ტვირთის განაწილების მხედველობაში მიღებით, სასამართლოში წარდგენილი გვაქვს არგუმენტირებული და დასაბუთებული სარჩელი. სარჩელის წარდგენის მიზანი კი არის ის, რომ საზოგადოებამ გაიგოს სიმართლე“, - ნათქვამია ადვოკატის განცხადებაში.

კასპში მოკლული 34 წლის ნოდარ ღუნაშვილის სასამართლო-სამედიცინო ექსპერტიზის დასკვნა ცნობილია. ექსპერტიზის დასკვნით დასტურდება, რომ ღუნაშვილის გარდაცვალება კისერში მიყენებულმა ჭრილობებმა გამოიწვია. გარდაცვლილს სულ 19 ჭრილობა აქვს მიყენებული. ექსპერტიზის დაკვნით გამოირიცხა ვერსია, თითქოს ნოდარ ღუნაშვილის მეუღლემ, ქეთა ჩხაიძემ თავში საგნის დარტყმით მოკლა გარდაცვლილი. საქმის მასალებით ირკვევა, რომ ნოდარ ღუნაშვილი მის ბავშვობის მეგობართან, ზურაბ კახიშვილთან ერთად გავიდა სახლიდან და სავარაუდოდ, მანქანაში მოხდა მისი მკვლელობა. საქმეში არსებული ვიდეო კამერების ჩანაწერებით ირკვევა, რომ ამ დროს ქეთა ჩხაიძე სახლში იმყოფებოდა. შესაბამისად, ასევე გამორიცხა ეჭვი, რომ ქეთა ჩხაიძეს შესაძლოა, მიეყენებინა დანით რომელიმე ჭრილობა ნოდარ ღუნაშვილისთვის. საქმეში ერთ-ერთი მთავარი მტკიცებულება ზურაბ კახიშვილის მიმართ არის ქეთა ჩხაიძის მიერ გამოძიებაში მიცემული ჩვენება, რომელშიც ის ზურაბ კახიშვილს ამხელს მისი მეუღლის მკვლელობაში. ცნობისთვის, 13 მარტს, კასპში 34 წლის ნოდარ ღუნაშვილი მოკლეს. მკვლელობის ფაქტზე, შემთხვევიდან მეორე დღეს სამართალდამცავებმა მისი მეგობარი, 30 წლის მამაკაცი - ზურაბ კახიშვილი დააკავეს. გამოძიების ინფორმაციით, ბრალდებულმა ღუნაშვილს ანგარიშსწორების მიზნით, ცივი იარაღით სხეულზე სასიკვდილო ჭრილობები მიაყენა. მომხდარიდან რაღაც პერიოდის შემდეგ, სამართალდამცავებმა განსაკუთრებით მძიმე დანაშაულის დაფარვის ბრალდებით მოკლული მამაკაცის მეუღლე - 31 წლის ქეთევან ჩხაიძე დააკავეს. საქმეზე გამოძიება განზრახ მკვლელობისა და განსაკუთრებით მძიმე დანაშაულის დაფარვის ფაქტებზე, სსკ-ს 108-ე და 375-ე მუხლის მესამე ნაწილით მიმდინარეობს.

 

ვინ არის ბიჭი, რომელიც მოქალაქეებს შიშველი ვიდეოების გავრცელების მუქარით ფულს სძალავდა

ავტორი: ბათო ჯაფარიძე

ბოლო დროს ძალიან ბევრი ადამიანი ცდილობს, ახალ საცხოვრებელ სახლში ბუხარი მოიწყოს. დღეს ბუხრის ოსტატები ბევრნი არიან, მაგრამ ადრე ასე არ იყო, ხელობა ცოტამ იცოდა და რაც მთავარია, კორპუსებში ბუხარს იშვიათად შეხვდებოდით, უფრო ძველ შენობებს ჰქონდა, თუმცა სოფლებში ბუხარი ჩვეულებრივმა, რკინის „ფეჩმა“ ჩაანაცვლა. ახლა კი ბუხარი ერთგვარი აუცილებელი ატრიბუტია და შინ, მაგალითად, მეხუთე თუ მეექვსე სართულზე, მწვადის შეწვა ნაკვერჩხალზე წარმოუდგენელი აღარ არის.

ჰოდა, იმას მოგახსენებდით, ადრე ასე არ იყო-თქო. ბუხარი ვისაც სურდა (და ის, ძირითადად, შეძლებულ ჩინოვნიკებს სურდათ), ნორმალური ხელოსანი კარგა ხანს უნდა ეძებნა. იყო კიდეც ძალიაან, ძალიან კარგი ხელოსანი, მაგრამ ავარიაში მოჰყვა, რომელიც მსხვერპლით დასრულდა და ოთხწლიან სასჯელს იხდიდა. ამის მიუხედავად, ციხის ადმინისტრაციას გავლენიანი ჩინოვნიკები ხშირად მიმართავდნენ და ბუხრის ოსტატი ციხიდან ჩუმად გაჰყავდათ. ისიც, ხან 4 და ხან 5 დღეს სხვადასხვა ჩინოვნიკის ბინაში ცხოვრობდა, კარგს სვამდა, კარგს ჭამდა, ჯამაგირსაც იღებდა, შინაც აგზავნიდა და გაქცევაზე არც ფიქრობდა. თავად ციხის ადმინისტრაციამაც იცოდა, რომ ყველაზე უწყინაარი პატიმარი არსად გაიქცეოდა და ხშირად მეთვალყურესაც არ უტოვებდა. ბუხრის ოსტატი ჩინოვნიკების ცარიელ სახლში, როცა საქმეს მორჩებოდა, ტელეფონზე რეკავდა, წამიყვანეთ, დავასრულეო. რა თქმა უნდა, ყველაფერი ეს ოფიციალურად აკრძალული გახლდათ, მაგრამ ჩინოვნიკები ერთმანეთს მარტივად უყვებოდნენ ასეთ ამბებს და ციხის ადმინისტრაციასთან ზარის განხორციელებაც არ იყო დიდი პრობლემა. ასე გრძელდებოდა მანამ, სანამ...

მილიციის განყოფილებაში შეტყობინება შევიდა, წყნეთში, ერთ-ერთ სახლში ქურდობის დროს, მეპატრონეები დაბრუნდნენ და ქურდობა ყაჩაღობაში გადაიზარდა. თავდამსხმელებმა ბინის მეპატრონე და მისი დისშვილი, ახალგაზრდა გოგონა ლამის სასიკვდილოდ სცემეს. განსაკუთრებით მძიმედ მამაკაცი იყო, გოგო, ასე თუ ისე, მსუბუქად გადარჩა, თუმცა მისი დაკითხვა მხოლოდ მეოთხე დღეს მოხერხდა.

„სახლში დათქმულზე ერთი საათით ადრე დავბრუნდით. თეატრში ვიყავით, მაგრამ თავბრუ დამეხვა და ბიძაჩემმა აღარ დამტოვა, წამოვედით. შინ კი ასეთი ამბავი დაგვხვდა. მეგონა, გული წამივიდოდა, რადგან დაახლოებით, ათი წლის წინ, ჩემი მშობლები სწორედ ყაჩაღობის დროს მოკლეს და ბიძასთან მას შემდეგ ვცხოვრობ. გული არ წამსვლია, წინააღმდეგობაც კი გავუწიე, მაგრამ თავში მძიმე საგანი მომხვდა. ბიძაც, როგორც ვიცი, მძიმე საგნით გათიშეს. სულ სამნი იყვნენ, იმ ორის არ ვიცი და მე რომელსაც ვეჩხუბებოდი, დაწვრილებით აღვწერ“, - თქვა გოგონამ.

ძალოვნებისთვის ცხადი გახდა, კრიმინალები საქურდად იყვნენ შესულნი და ნიღბებიც ამიტომ არ ჰქონდათ, რაც ყველაზე საინტერესოა, მათ მთელი სახლი კი არ დააყენეს ყირაზე, არამედ, ზუსტად ის უჯრა და კარადა ჰქონდათ გაღებული, რომელშიც ძვირფასეულობა ინახებოდა. სამართალდამცავებმა ისიც გაიხსენს, რომ ეს უკვე მეათე თუ მეთორმეტე შემთხვევა იყო, როცა ქურდები ბინას ისე ასუფთავებდნენ, ზედმეტ მოძრაობას, პრაქტიკულად, არ აკეთებდნენ ანუ მათ ჰყავდათ ძალიან კარგი „ნაკოლშიკი“, მაგრამ ვინ? ერთადერთი, რაც ამ სახლებს აერთიანებდა, ის გახლდათ, რომ ყველას მფლობელი შეძლებული იყო და ყველგან კედელში ჩაშენებული გახლდათ... ბუხარი.

გამომძიებლებმა ბუხრის ოსტატი მოიკითხეს და გაარკვიეს, რომ ყველა მათგანი ერთმა და იმავე ადამინმა გააკეთა და ის კაცი ისევ სასჯელს იხდიდა. ამიტომ, მისი დაკითხვა არ გასჭირვებიათ. მებუხრე, რომელიც ყველას უწყინარი პატიმარი ეგონა, მოულოდნელად, კრიმინალებისთვის საქმის მიმცემი აღმოჩნდა.

„როცა პირველად წამიყვანეს ბუხრის გასაკეთებლად, ძალიან ბედნიერი ვიყავი. უკან რომ დავბრუნდი, საკანში მოვყევი, სამეფო ოჯახი იყო, ასეთი არასოდეს მინახავს-მეთქი. მესამე დღეს ერთი გამცოდილი კრიმინალი მოვიდა და მთხრა, შენი მისამართი ვიცი, ცოლ-შვილის სახელებიც ვიცი და თუ გინდა ცოცხლები დაგხვდნენ, ყველა სახლი, სადაც ბუხარს გააკეთებ, უნდა აღმიწერო, მისამართი უნდა მთხრა, სად რა დგას, სქემა უნდა დამიხაზოო. შემეშინდა, ძალიან შემეშინდა. მართალია, მაღალჩინოსნების სახლებს ვაკეთებდი, მაგრამ ამ კრიმინალმა მითხრა, რომ ჩამიშვა, შენ აქ მოგკლავენ და იმათ კიდევ გარეთო. ამიტომ, ვხაზავდი და ვუყვებოდი ყველაფერს, რაც შემეძლო. ის რამდენიმე თვის წინ გათავისუფლდა და მეტი არაფერი ვიცი“, - ასეთი იყო მებუხრის მონაყოლი.

ძალოვნებმა ეჭვმიტანილის სავარაუდო ადგილსამყოფელის დადგენა დაიწყეს და მალევე მიაგნეს. ის კიდევ ორ რეციდივისტთან ერთად, ქალაქგარეთ, პატარა სახლში ცხოვრობდა, ისეთში, რომელზეც იერიშის მიტანა დღისით ძნელი იქნებოდა. ამიტომ, დაღამებას დაელოდნენ და სპეცოპერაციაც ჩაატარეს. აყვანის დროს, ერთ-ერთი კრიმინალი შეიარაღებული გაწევის დროს მოკვდა, მეორე - დაიჭრა, მესამე კი უვნებელი ჩაუვარდათ ხელში. მთავარი იყო, რომ ბანდის მეთაური, რომელცი დაჭრილი გახლდათ, გადარჩებოდა და სწორედ მას უნდა დაედასტურებინა მებუხრის მონაყოლი. გადარჩენილი ის იყო, რომელსაც გოგონამ გაუმართა ბრძოლა და ის ამოცნობაზე წაიყვანეს. რაღა თქმა უნდა, გოგომ თავდამსხმელი მაშინვე ამოიცნო და შეუცდომლად დაადო ხელი, მერე კი მაგიდაზე დაყრილ სურათებს დახედა და გული წაუვიდა.

ძალოვნებმა ჩათვალეს, რომ ის გადაიღალა და ყაჩაღთან შეხვედრამ ბოლო მოუღო, აზრზეც მალე მოიყვანეს და იქვე დივანზე წამოაწვინეს, თუმცა გოგომ მაგიდისკენ გაიწია, იქ დადებული სურათებიდან ერთ-ერთს ხელი დაადო და იკითხა - „ეს ვინ არის?!“

„ეს ბანდის მეთაურია, ყველაზე სტაჟიანი და გამოცდილი რეციდივისტი. სავარაუდოდ, ისიც გეცნოთ, თვალს მოკრავდით იმ დღეს, გონებამ კი ახლა აღიქვა და გულიც ამიტომ წაგივიდათ. დაჭრილია, საავადმყოფოში წევს, მაგრამ გადარჩება და გადავარჩენთ იმისთვის, რომ ციხეში ხანგრძლივი დროით გავუშვათ“, - უთხრა გამომძიებელმა და გოგონამაც თავი დააქნია.

საქმე გახსნილი გახლდათ, დაკავებულთა ბუნაგიდან ძალოვნებმა, პრაქტიკულად, ყველა ბინიდან მოპარული ნივთები ამოიღეს და მფლობელებს დაუბრუნეს. საქმე სასამართლოზე უნდა გადაცემულიყო და მარტო ის გახლდათ გასარკვევი, რა როლი ექნებოდა საქმეში მებუხრეს და დაუმატებდნენ თუ არა სასჯელს. ამ დროს კი გაუთვალისწინებელი რამ მოხდა - საავადმყოფფოში მყოფ დაჭრილ კრიმინალს თავს მედდა დაესხა და დანით სამი ჭრილობა მიაყენა. ყვირილზე ბადრაგი შევარდა და... გამომძიებელი ადგილზე მალე მივიდა და პირველი რაც გააკეთა, მთავარ ექიმს მაგიდაზე მუშტი უბრახუნა, როგორ გაბედა შენმა თანამშრომელმა და დაჭრილს დანა როგორ დაარტყაო, რაზეც ექიმმა მიუგო, ეს გოგო ჩემი თანამშრომელი არ არის, პირველად ვხედავ, პალატაშ მედდის ხალათში გადაცმული შეიპარაო.

გამომძიებელი მეორე ოთახში შევიდა, სადაც გოგონა ჰყავდათ დაკავებული და ხელში... სწორედ ის ქალიშვილი შერჩა, რომელიც ბინის ქურდების ბოლო მსხვერპლი იყო და რომელმაც დამნაშავე ამოიცნო. გამომძიებელმა გაოცებისგან პირი დააღო.

„თქვენს მაგიდაზე დაყრილ სურათებს რომ დავხედე, ის პირი ვიცანი, ვინც ჩემი მშობლები დახოცა. მაშინ პატარა ვიყავი, მაგრამ ამის სახეს რა დამავიწყებს. გამომძიებლებსაც ვუყვებოდი, თუმცა არავინ მომისმინა, ბავშვია, ემოციებშიაო. და ამ კაცს ვეძებდი ყველგან, სადაც კი შესაძლებელი იყო, მაგრამ ვერ ვნახულობდი. ახლა კი ვიპოვე და მივხვდი, ეს ჩემი შანსი იყო. ძალიან დამწყდება გული, თუ ის გადარჩება“, - მშვიდად თქვა გოგონამ.

იმის მიუხედავად რომ გოგო ამტკიცებდა, მშობლები სწორედ ამ კაცმა დამიხოცაო, დაკავებულს ვერაფერი დაუმტკიცეს, გარდა ბინების ქურდობისა. ის საქმე კვლავ გაუხსნელი დარჩა და მართალია, სერიულ ქურდობებსა და ყაჩაღობაზე დაკავებულებს 11-11 წელი ერგოთ, ისე გამოვიდა, რომ ბანდის მეთაურს რეალურად მკვლელობა შერჩა, თუმცა შერჩა კი? მას ციხიდან გამოსვლა აღარ ეწერა, რადგან ტუბერკულოზით სამ წელიწადში გარდაიცვალა. მებუხრეს რეალური სასჯელი არ დაუმატეს, პირობითი აკმარეს. ზუსტად ისევე, როგორც გოგონას, რომელსაც ეჭვმიტანილზე თავდასხმის გამო, სამწლიანი პირობითი სასჯელი დააკისრეს.

ვინ მიიყვანა თვითმკვლელობამდე და რატომ ჩამოიხრჩო თავი გოგონას მამინაცვალმა - გრიფით „საიდუმლო“ საქმის დეტალები 

იგი სასჯელს სტივენ სიგალის დარეკეტების გამო იხდიდა

ამერიკის შეერთებულ შტატებში, ჩრდილოეთ კაროლინის შტატში, ბატნერის ფედერალურ ციხეში, 81 წლის ასაკში გარდაიცვალა გამბინოს კლანის ბოსი პიტერ არტურ გოტი. იგი იყო მაფიის მეთაურის ჯონ გოტის უფროსი ძმა, რომელმაც მისი ადგილი 2002 წელს, ჯონის გარდაცვალების შემდეგ, დაიკავა.

პიტერი ერთ-ერთი იყო 13 შვილიდან, მათგან ჯონ ჯოზეფ გოტსა და ფილომენტა დე კარლოს ხუთი ვაჟიშვილი ჰყავდა, უფროსი კი სწორედ პიტერი იყო. გამბინოს კლანში შედიოდნენ პიტერ გოტი, ჯონ გოტი, გამბინი კაპო ჯინ გოტი, კაპო რიჩარდ გოტი და ვინსენტ გოტი, რომელიც კლანის ხელმძღვანელი ვერ გახდა და ბოლომდე იტალიური მაფიის ჩვეულებრივ „ჯარისკაცად“ დარჩა.

პიტერ გოტის ჰყავდა ერთადერთი ვაჟი - პიტერ გოტი უმცროსი, რომელიც მაფიის სამყაროში ცნობილია მეტსახელით „ცალთვალა“, რადგან გლაუკომის გამო ერთი თვალით დაბრმავდა. მაფიის მეთაური - ჯონი არ ფიქრობდაა, რომ მისი უფროსი ძმა პიტერი საკმარისად ჭკვიანი იყო საიმისოდ, რომ მაფიის წევრი ყოფილიყო და, ალბათ, სწორედ ამიტომ იგი გახდა ცნობილი, მეტსახელით - „უჭკუო დონი“. პიტერი მამის კვალს გაჰყვა და ნაგვის მანქანაზე მუშაობდა მანამდე, სანამ მან თავი არ დაარტყა გიგანტური ამერიკული ნაგვის მანქანის ბორტს და არ მიიღო ინვალიდობის პენსია. პენსიაზე გასვლის შემდეგ იგი დაკავებული იყო რეკეტით, რაც შეერთებულ შტატებში ორგანიზებული დანაშაულებრივი საქმიანობაა.

დიდი ხნის განმავლობაში ჯონ გოტი წყლიდან მშრალი გამოდიოდა (ძირითადად მისი ადვოკატის - ბრიუს კატლერის ძალისხმევით), მაგრამ 1992 წელს მას საბოლოოდ სამუდამო პატიმრობა მიუსაჯეს. პროკურატურას დიდად დაეხმარა წარმატებით დამონტაჟებული მიკროფონი და განგსტერი სემი გრავანო, მეტსახელად „ხარი“, რომელიც ჯონის მარჯვენა ხელი იყო და 19 ადამიანი მოკლა, მაგრამ დაკავების შემდეგ ჩვენება მისცა მის წინააღმდეგ.

პიტერი, ბუტნერის ციხეში სწორედ „ხარის“ მკვლელობის შეკვეთის გამო მოხდა, მან მოღალატის მკვლელობა 70 000 დოლარად შეუკვეთა. გრავანოს მკვლელობა ჩაიშალა, „ხარს“ მოსწყინდა მოწმეთა დაცვის პროგრამით ცხოვრება. მიატოვა იგი და დაუბრუნდა ჩვეულ საქმიანობას. ცოტა ხანში იგი დააკავეს ნარკოტიკების რეალიზაციის გამო, წარსული დამსახურებების მიუხედავად, ეს ფაქტი მას არ აპატიეს და ციხეში გაუშვეს.

ჯონ გოტის გასამართლების შემდეგ, მისი ვაჟი ჯონ უმცროსი და პიტერ გოტი ნათლიის ბრძანებებს გადასცემდნენ გამბინოს კლანის წევრებს. 1999 წელს თავად ჯონ უმცროსიც ციხეში მოხვდა, ხოლო პიტერი, ანუ „უჭკუო დონი“, ოფიციალურად გახდა კლანის ლიდერი.

2002 წელს, ჯონ გოტის საპყრობილეში გარდაცვალებამდე რამდენიმე დღით ადრე, „ფებეერ“-მა პიტერსაც რეკეტირების ბრალი წაუყენა, იგი ამჯერად გამოძალვას, ფულის გათეთრებას, დოკერებისგან და სატრანსპორტო კომპანიებისგან ხარკის შეგროვებასა და ბოლოს, კინომსახიობ სტივენ სიგალის დარეკეტებას ეხებოდა. ეკრანზე სიგალი ვაჟკაცურად ანადგურებს მკვლელებსა და განგსტრებს, მაგრამ რეალურ ცხოვრებაში მაგრად შეშინდა.

ბრუკლინში პიტერ გოტის სასამართლო პროცესამდე 12 წლით ადრე, მსახიობი მონაწილეობდა გადაღებებზე ფილმისა „სამართლიანობის სახელით“, სადაც იგი მუშტებით, ფეხებითა და ბილიარდის ჯოხით გაუმკლავდა ყაჩაღებს. მაგრამ როდესაც მაფიოზები 2000 წელს მას ტორონტოში ეწვივნენ, სადაც ის „გამჭოლ ჭრილობებს“ იღებდა და მას ბრუკლინის რესტორანში შეხვედრა დაუნიშნეს, სიგალმა, მისი თქმით, შიში იგრძნო, თუმცა ის, როგორც ყოველთვის, იარაღით იყო და მისი დაცვაც იქვე ტრიალებდა.
2003 წლის თებერვალში, როდესაც ბრუკლინის ფედერალურ სასამართლოში დაზარალებული სიგალი ჩვენების მისაცემად მივიდა, 7 განგსტერის, მათ შორის სამი გოტის, მოსამართლეს ფრედერიკ ბლოკს მანამდე ნახევრადცარიელი დარბაზი, გადაჭედილი დახვდა.

სასამართლო დარბაზში წლების განმავლობაში პერიოდულად ვხვდებოდი „ცხვირის ცხვირს", ან "ცხვირს", როგორც რუსმა კრიმინალებმა თავიანთ კოლეგა ამერიკული მაფიის წარმომადგენლები უწოდეს, მაგრამ მისი ნომენკლატურა ასე ახლოდან პირველად ვხედავდი.

დარბაზში შესულმა პიტერ გოტიმ მეგობრულად უთხრა პრესას „დილა მშვიდობისა“ და სასამართლოს მხატვარს ჰკითხა: „როგორ მოგწონთ ჩემი ჰალსტუხი?“ ჯონ გოტი ცნობილი ფრანტი იყო, ათასდოლარიანი იმპორტირებული კოსტუმები ეცვა (მაშინ ეს ფული იყო) და ხელით შეღებილი აბრეშუმის ჰალსტუხები ეკეთა. პიტერს ამჯერად ოქროსფერი ჰალსტუხი ეკეთა.

სანამ სიგალს დაკითხავდა, მოსამართლემ შესვენება გამოაცხადა. ზოგი ბრალდებული ადგა, პიტერ გოტი და მისი ნათესავები მიუახლოვდნენ დაბალ ბარიერს, რომელიც საზოგადოებას მათგან აშორებდა და მცირე საუბარი დაიწყეს სასამართლოს მხატვრებთან, დედა-შვილ შეპარდებთან, რომლებიც ბარიერს მიუახლოვდნენ. მეორე მხრიდან და მაფიოზებს ესკიზები აჩვენეს, რომელიც მოეწონათ. განგსტრები იყვნენ დახვეწილები, გალანტურები და გამოირჩეოდნენ მომხიბვლელობით. მათ სისხლის სამართლის საქმეში არ იყო არც ერთი მკვლელობა, რაც ძალზე იშვიათია ამ წრეში.

სიგალი შემოიყვანეს არა დარბაზის ფართო კარიდან, რომლითაც პრესა და საზოგადოება შემოდიოდა, არამედ მოსამართლის უკანა კარიდან, რომელსაც ჩვეულებრივ ნაფიცი მსაჯულები იყენებენ. მსახიობს აბრეშუმის პერანგი და ყავისფერი პიჯაკი ეცვა.

მოკლედ, მისმა ყოფილმა ბიზნესპარტნიორმა, ბრუკლინის ფარმაცევტმა, ჯულიუს ნასომ, სიგალს მოსთხოვა ვალი გადაეხადა. სიგალს სჯეროდა, რომ მას არაფერი ევალებოდა. ნასომ დახმარებისთვის მიმართა თავის ძველ მეგობარს ენტონი სიკონს, რომელიც ბრალდებული იყო არა მხოლოდ სიგალის, არამედ დოკის მუშების რეკეტშიც. მათგან მიღებული ხარკი კონვერტებში მოათავსეს და კლანის ნომენკლატურის ზედა ნაწილს, ანუ გოტებს გადასცეს. თავდაპირველად, სიგალმა ძალიან ჩუმად უპასუხა პროკურორის კითხვებს და მოსამართლემ სთხოვა, უფრო ხმამაღლა ესაუბრა.

მსახიობს ჰკითხეს, რატომ არ დაურეკა მაშინვე FBI-ს. სიგალმა განმარტა, რომ თუ იგი მოწმეების დაცვის პროგრამით ისარგებლებდა, მას გაუჭირდებოდა ფილმებში თამაში. „ისინი ვერ დამეხმარებიან,“ - თქვა მან FBI– ს შესახებ, „მათ არ შეუძლიათ ჩემი დაცვა“.

როდესაც ფედერალური ბიურო მასთან მივიდა, მან უარი თქვა კითხვებზე პასუხის გაცემაზე, კონსტიტუციის მეხუთე შესწორების მოტივით, რომელიც იცავს ადამიანს თვითდანაშაულისგან. პროკურატურას მოუწია მისი სასამართლოში გამოძახება და იმუნიტეტის დაპირება.

მან ახსნა, თუ როგორ ისწავლა საბრძოლო ხელოვნება და ცეცხლსასროლი იარაღის გამოყენება. ასევე შენიშნა, რომ ზოგჯერ გაკვეთილებს აძლევდა სამართალდამცავებს. მას ჰკითხეს, თან იარაღი ხომ არ გაქვსო და „სულ ვატარებო“, - უპასუხა სიგალმა.

- ახლაც თან ხომ არ გაქვს, შემთხვევით? - მხიარულად იკითხა მოსამართლემ (აშშ-ს სასამართლოში შესვლისას FBI–ს ოფიცრებიც კი ვალდებულნი არიან, იარაღი დაცვას გადასცენ).

ბრუკლინში, რესტორან Gage & Toller-ში შეხვედრის აღწერის დროს, მსახიობმა აღნიშნა, რომ როდესაც სიკკონმა დამიღრიალა, „მიყურე, როცა ლაპარაკობ!“, განგსტერული ფილმი გაახსენდა. ბრალდებულების ადვოკატმა ჯორჯ სანტ-ანჯელომ სარკასტულად იკითხა თუ რატომ იმალებოდა სიგალი მეხუთე შესწორების უკან, თუ იგი უდანაშაულო მსხვერპლი იყო, და რატომ ცდილობდა ცენტრალური სადაზვერვო ბიუროს ყოფილი თანამშრომლის დაქირავებას ვინმეს მოსაკლავად.

თუ სანტ-ანჯელოს სურდა სიგალი წონასწორობიდან ამ გზით გამოეყვანვა, მიზანი მიღწეული იქნა. მსახიობმა ხელები აიქნია და აყვირდა: „ეს გიჟია! მე აქ ბრალდებული არ ვარ!“ მოსამართლემ ადვოკატს დაავალა თემა შეეცვალა. დაცვის მხარის თქმით, სიკკონი სიგალს კი არ დაემუქრა, მას უბრალოდ სურდა დახმარებოდა მხარეებს საკითხის მშვიდობიანად მოგვარებაში. სიკკონი ნასამართლევი იყო ისევე, როგორც მისი თანამზრახველები.

ამის შემდეგ, პიტერ გოტი მანჰეტენში სხვა დანაშაულისთვის გაასამართლეს, დამნაშავედ სცნეს და 25 წელი მიუსაჯეს. შარშან, მისმა ადვოკატმა ორჯერ მიმართა სასამართლოს გამოეშვათ მოხუცი, რომელიც უკვე 17 წელია იჯდა. მან ასევე სასამართლოს გადასცა გოთის 22 დაავადების სია, პოდაგრიდან დაწყებული დემენციით დამთავრებული, თუმცა მოსამართლემ უარი განაცხადა პიტერის გათავისუფლებაზე.

რუსეთში ცნობილი ქართველი „კანონიერი ქურდის“, გიორგი უგლავას (მეტსახელად ტახი) სასამართლო პროცესი მიმდინარეობს. რუსი სამართალდამცავები მას კრიმინალური დაჯგუფების ჩამოყალიბებას და არაერთი დანაშაულის ჩადენას ედავებიან. უფრო ზუსტად, რუსული მართლმსაჯულება ამტკიცებს, რომ „ტახი“ ამ დაჯგუფებას მართავდა და თავად არც ქურდობაში იღებდა მონაწილეობას, არც _ ძარცვასა და ყაჩაღობაში.
საერთო ჯამში, რუსები ამტკიცებენ, რომ უგლავას მიერ შექმნილმა კრიმინალურმა დაჯგუფებამ 163 (!) დანაშაული ჩაიდინა, დაზარალებულთა რიცხვი 280 ადამიანს აჭარბებს, მაგრამ საქმე ის გახლავთ, რომ არცერთი დაზარალებული და არცერთი დაკავებული ხელს „ტახისკენ“ არ იშვერს და არ ამბობს, რომ მას მომხდარ დანაშაულებთან საერთო აქვს.
როგორც რუსული მედია ამტკიცებს, ყველაზე „ცუდ“ შემთხვევაში, „კანონიერი ქურდის“ სტატუსის გამო, უგლავას რამდენიმე წლით აღუკვეთენ თავისუფლებას.
პარალელურად, მოსკოვში, კიდევ ერთი „კანონიერი ქურდი“, დავით ფანჩვიძე (იგივე, გიორგი ყიფიანი) დააკავეს. მას ნარკოტიკების შენახვა ედება ბრალად, თუმცა დიდია შანსი, რომ ფანჩვიძეც სწორედ სტატუსის გამო გაასამართლონ. ბოლოს ის ციხიდან სამი წლის წინ გათავისუფლდა, თუმცა „კანონიერი ქურდების“ წინააღმდეგ მიღებული კანონის მიუხედავად, რუსეთი არ დაუტოვებია და მოსკოვის პრესტიჟულ უბანში მშვიდად ცხოვრობდა.

ბათო ჯაფარიძე