122 ახალი სტატია

Top Stories

Grid List

მედიით ვრცელდება ინფორმაცია, რომ „პატრიოტთა ალიანსის” სიის მეოთხე ნომერი, ავთანდილ ენუქიძე,  საკანონმდებლო ორგანოში შესვლას გეგმავს. 

 „მანდატს არ ვტოვებ, პარტიის მხარდამჭერი ვიყავი და ვიქნები, მაგრამ ბრძოლის სხვა მეთოდებს მივმართავ. როდის შევდივარ ჯერ არ ვიცი. მე არავისზე დამოკიდებული არ ვარ, არავის ვეკთხები როგორ მოვიქცე და არც იმას ვეუბნები, როგორც მე მინდა ისე მოიქეცითქო” – განაცხადა ავთანდილ ენუქიძემ.

საგულისხმოა, რომ მედიაარქივში ავთანდილ ენუქიძის შესახებ მწირი ინფორმაცია მოიპოვება. თუმცა, არქივი ინახავს „პუბლიკა.გე“-ს მიერ გავრცელებულ ინფორმაციას „პატრიოტთა ალიანსის“ შემომწირველთა შესახებ, სადაც ვკითხულობთ:

პატრიოტთა ალიანსის“ შემწირველთა რიგებშია ალექსი ზუმბულიძე18 აგვისტოს მან „ალიანსს“ 10, 0000 ლარი შესწირა. 2010 წლის ამონაწერით ის წილს მფლობს შპს „არდიქსში“. ის კომპანიის 15%-ის მფლობელია. მისი პარტნიორები არიან ავთანდილ ენუქიძე და მამუკა მიქაძე.

ავთანდილ ენუქიძე 35%-ის მფლობელია, მამუკა მიქაძე კი – 50 %-ის.

ავთანდილ ენუქიძემ წილს ფლობს არაერთ კომპანიაში. ის გვხვდება „პატრიოტთა ალიანსის“ შემომწირველთა სიაშიც. 2016 წელს მას „პატრიოტთა ალიანსს“ 60, 000 ლარი შესწირა. ხშირად იწვევენ ტელეკომპანია „ობიექტივში“.

ამასთან, აღსანიშნავია, რომ პარტიაში ენუქიძის გადაწყვეტილების შესახებ კომენტარი ჯერჯერობით არ კეთდება.

 

 
 
 

"სააკაშვილი კიდევ მსუბუქად გადარჩა... ესენი თავს ძალიან მძიმე მდგომარეობაში ჩაიგდებენ!"

მართალია, 1%-იანი ბარიერი ვერ გადალახა, მაგრამ ამტკიცებს, დეპუტატის მანდატიც რომ მოეპოვებინა, ახლაც, 2008 წლის მსგავსად, ხალხის მხარეს დადგებოდა და საყოველთაო ბოიკოტს შეუერთდებოდა. ნანობს, რომ 31 ოქტომბრის არჩევნებამდე, „შუაშისტური“ გათვლით, ნეიტრალური პოზიცია დაიკავა, რის გამოც ამომრჩეველთა ხმები დაკარგა, თუმცა ამ შეცდომის გამეორებას აღარ აპირებს და „ვერსიასთან“ საუბრისას აცხადებს, რომ მომავალ არჩევნებში, სხვა პარტიებთან აუცილებლად „დაბლოკდება“ და ხელისუფლების წინააღმდეგ, მძლავრი კოალიციური ოპოზიციის ეგიდით იბრძოლებს. „ვერსია“ „თავისუფალი საქართველოს“ ლიდერ კახა კუკავას ესაუბრა:
რა თქმა უნდა, იყო ტოტალური გაყალბება და ამის ბევრი მტკიცებულება გვაქვს, თუმცა ასევე, იმაზე ნაკლები ხმებიც იყო, რასაც ველოდით ანუ იყო გაყალბება, როგორც სუბიექტური მიზეზით ასევე, ობიექტურითაც, ჩვენ მიერ დაშვებული შეცდომით.
რა შეცდომას გულისხმობთ? _
ელექტორატი, რომელზეც ვაკეთებდით გათვლას, ე.წ. შუაშისტები, როგორც ჩანს, პრაქტიკულად, არ არსებობენ ანუ საზოგადოებას ხელისუფლების მიმართ ან მკაფიოდ გამოხატული საპროტესტო პოზიცია აქვს, ან ვისაც პროტესტის გრძნობა არ აქვს, შეგუებულია და გადამწყვეტ მომენტში, მაინც ხმას ამ რეჟიმს აძლევს. იმ ხალხის ნაწილმა, ვისზეც „შუაშისტები“ ვაკეთებდით გათვლას, ხმა მისცა ხელისუფლებას. ეს კონტიგენტი კომფორმისტია, რომელიც შეიძლება, იზიარებს ჩვენს პროგრამას, მაგრამ გადამწყვეტ მომენტში, ხმას მაინც აძლევს „ოცნებას“. იმ ელექტორატმა კი, რომელსაც პროტესტი აქვს ხელისუფლების მიმართ, ჩვენი წინასაარჩევნო პოზიციები არასაკმარისად მკაფიოდ ჩათვალა და ეს, ვფიქრობ, ჩვენი შეცდომა იყო, რომელიც მომავალში არ უნდა გავიმეოროთ. _
ანუ ნანობთ, რომ არჩევნებამდე არ დადექით ოპოზიციასთან, მაგალითად, ნაციონალურ მოძრაობასთან?
მოდით, ასე ნუ ვიტყვით, ნაციონალური მოძრაობის გვერდით დადგომაზე არაა საუბარი. _
ამას იმიტომ გეკითხებით, რომ სულ ამბობდით, ამ პარტიის გვერდით არ დავდგებიო... _
ასე ვიტყოდი: კი, მიმაჩნია ჩემი, როგორც პარტიის ხელმძღვანელის შეცდომად, რომ მქონდა ნეიტრალური პოზიცია. რომ გვქონოდა უფრო მკაფიოდ რადიკალური პოზიცია ხელისუფლების მიმართ, ჩვენი ამომრჩევლის იმ ნაწილს არ დავკარგავდით, რომლის იმედიც უნდა გვქონოდა. _
თქვენგან განსხვავებით, მაგალითად, ალეკო ელისაშვილმა მოახერხა გადეპუტატება, რომელმაც, სხვათა შორის, თქვენზეც თქვა, პარლამენტში შესვლაში ოპოზიციას ხელს უშლისო. _
ალეკო ელისაშვილს რაც სჭირს, ამას ყველაზე მეტად შეეფერება რუსული გამოთქმა: „И хочется, и колется“. კახა კუკავა რას უშლის, რა, მანდატი დაუხია? პარლამენტში შესასვლელთან ფეხი დაუდო, თუ რა? ელისაშვილს უნდა, რომ თან იყოს ქერის ორმოში და თან საზოგადოებამ არ აგინოს. ეს ორივე ერთად არ გამოდის. ასე რომ, მისი გადასაწყვეტია. პირადად მე, დიდი ხნის წინ ვმეგობრობდი მასთან და ახლა საზოგადოების ისეთი რისხვა დაატყდა, რომ მიუხედავად იმისა, მის მიმართ ძალიან უარყოფითი განწყობა მქონდა, მაინც შემეცოდა. თუ ჩემს რჩევას გაითვალისწინებს და დამიჯერებს, გულწრფელად ვეუბნები და არა _ სარკაზმით, პარლამენტში არ უნდა შევიდეს იმიტომ, რომ ძალიან მძიმე ტვირთია ეს და ვინც აიკიდა 2008 წელს, ცხოვრების ბოლომდე ვეღარ ჩამოიხსნა. პირადად მე, არ ვურჩევდი და მისგან ყველაზე სწორი ნაბიჯი იქნებოდა, რომ მოეხადა საზოგადოებისა და ოპოზიციისთვის ბოდიში. ეჭვი მეპარება, ეს გააკეთოს, მაგრამ მეორე მხრივ, ვხედავთ, რომ პარლამენტშიც ვერ შედის, რადგან არ არის ეს ადვილი. ვფიქრობ, ოპოზიციამ რაღაც რაუნდი მოიგო, რაღაც კი _ წააგო ხელისუფლებასთან ბრძოლაში, მაგრამ ეს რაუნდი ნამდვილად ოპოზიციამ მოიგო. _
თქვენც, წლებია, პარლამენტში შესვლას ცდილობთ, ახლა ელისაშვილის ადგილას რომ იყოთ, როგორ მოიქცეოდით? _
ჩვენ გვქონდა ეს ალტერნატივა 2008 წელს, მაგრამ არ გაგვჭირვებია და ყოყმანი არ დაგვიწყია. ჩვენი პარტიის დიდი პლუსია, როცა კი საქართველოში რაიმე პროტესტი ყოფილა, ყოველთვის ვიყავით ხალხის მხარეს და ბევრი ვერ დაიკვეხნის, რომ „ვარდების რევოლუციის“ მონაწილეც იყოს, 7 ნოემბრისაც, 26 მაისისაც და თუნდაც იმ პირველი ბოიკოტისაც. ასე რომ, ვიქნებოდით სწორედ იქ, სადაც ახლა ვართ _ ბარიერგადალახულებიც და გადაულახავებიც. _
და მაინც, რა მოლოდინი გაქვთ, პარლამენტში რომელი ოპოზიციონერები შეიძლება ვიხილოთ? _
მაქსიმუმ ელისაშვილი... თუმცა, ტოტალიზატორზე რომ შეიძლებოდეს დადება, ვფიქრობ, ელისაშვილიც ვერ შევა იმიტომ, რომ საკუთარ თავს ისეთი თამასუქები გამოუწერა _ პოლიტპატიმრების გათავისუფლება, ხმების გადათვლა და ა.შ, რომ ამის გამკეთებელი ხელისუფლება არ არის. ასე რომ, ელისაშვილიც კი ვერ შევა, თორემ იმას გამოვრიცხავ, რომ მის გარდა, ვინმე სხვა შევიდეს. _
იურისტი ხართ და, როგორ ფიქრობთ, 90-დეპუტატიანმა პარლამენტმა სადამდე შეიძლება, „გაქაჩოს“? _
ეს იურიდიულზე მეტად, პოლიტიკური საკითხია. სწორად ბრძანეთ, ნამდვილად სადამდე შეიძლება, „გაქაჩოს“ _ ეს არის ამოწურვადი რესურსი. ამის თქმა შეუძლებელია, რადგან ჯერჯერობით, ბევრი ფაქტორია ბუნდოვანი. _
რომელ ფაქტორებს გულისხმობთ? _
აშშ-ში იცვლება ადმინისტრაცია, რაც იქნება ერთ-ერთი წამყვანი ფაქტორი. ამას ემატება ეკონომიკური პრობლემები, რომელიც ზამთარში მწვავდება ხოლმე და რამდენად შეძლებს ხელისუფლება, რომ შეინარჩუნოს, თუნდაც ლარის კურსი. ბუნდოვანია ისიც, თუ როგორი იქნება ოპოზიციის სტრატეგია. ბოიკოტის ეს კონკრეტული რაუნდი კი მოიგო, მაგრამ ჩვენ გვაქვს სამომავლოდ სხვა გეგმები. ასევე ფაქტორია, თავად ხელისუფლება რამდენად იქნება ადეკვატური შექმნილ ვითარებაში. კობახიძის განცხადება მოვისმინე, „სამართლიანი არჩევნების“ წინააღმდეგ გამოძიების დაწყებას აპირებენ. ეს როგორი შემთხვევაა, იცით? – „ყურშა გაყოყოჩდა“ ანუ წარმატებას მიაღწიეს „სამართლიანი არჩევნების“ ნაწილში, უდავოდ მოიგო ეს რაუნდი ხელისუფლებამ და ამ მოგებამ ისე გააყოყოჩა, რომ ახლა სჩადის წარმოუდგენელ სისულელეს _ იწყებს გამოძიებას საერთაშორისო ორგანიზაციის წინააღმდეგ. ამ კონკრეტულ მაგალითზე კი არ ვამბობ, რომ ეს მოახდენს ზეგავლენას ხელისუფლების შეცვლაზე, მაგრამ ზოგადად, ის, რომ ხელისუფლება განწყობილია ასეთი ტიპის სისულელეების ჩასადენად, ვფიქრობ, ერთ-ერთი მნიშვნელოვანი ფაქტორი იქნება, რადგან შეგახსენებთ, რომ წინა კრიზისი, რომელიც ქვეყანაში დაიწყო „გავრილოვის ღამეს“, სწორედ ასეთი სისულელით დაშვებული შეცდომის გამო იყო. _
ამ მოცემულობით, ვადამდელი არჩევნები გარდაუვალია? _
დიახ, ვადამდელი არჩევნები გარდაუვალია და ეს იქნება ყველაზე კარგი გამოსავალი არსებული ვითარებიდან, რადგან ვხედავ, საზოგადოებაში რამდენი აგრესიაა დაგროვილი და ღმერთმა ნუ ქნას, ამან სხვა მიმართულება მიიღოს. _
რევოლუციას ელოდებით? _
რევოლუცია ყველას პირზე აკერია, როგორც არჩევნების ალტერნატივა. არაა ასე, უბრალოდ, როდესაც არჩევნები არ ინიშნება ნებით, ხდება ხოლმე ხელისუფლებაზე გარკვეული ტიპის ზეწოლა, რაც არაერთხელ გვინახავს. ზვიად გამსახურდიამ რკინიგზა რომ გადაკეტა, ეს არ იყო რევოლუცია, მაგრამ კონსტიტუციურ ფარგლებშიც არ ჯდებოდა ანუ ხელისუფლებაზე მოახდინა ზეწოლა. მეორე ამბავსაც გავიხსენებ, როდესაც 2012 წელს, ხელისუფლების შეცვლის შემდეგ, ნაციონალური მოძრაობის წარმომადგენლებს ქუჩაში სცემდნენ და ცეცხლსასროლი იარაღითაც ჭრიდნენ ანუ როდესაც დაგროვილია საზოგადოებაში ძალიან დიდი ხნის მანძილზე აგრესია, ხოლო ქვაბს თავს არ მოხდიან ორთქლის გამოსაშვებად და ორთქლი თვითონ ამოხეთქავს, ასეთი მოვლენები ხდება ხოლმე და უნდა იცოდეს ხელისუფლებამ, რომ რაც უფრო ნელ-ნელა თვითონ გადასცემს ხელისუფლებას, მისთვისაა უკეთესი. სააკაშვილი თუ კიდევ მსუბუქად გადარჩა _ იმდენი არ იცემა, არ დაიჭირეს და არ დაჭრეს, ეს გამოიწვია იმან, რომ ერთი წელი იყო კოჰაბიტაციის პროცესი. ამ პროცესმა ეს აგრესია ერთგვარად დაასტაბილურა. წარმოიდგინეთ, 2012 წელს, დასავლეთს რომ კოჰაბიტაციის პროცესი არ გამოეცხადებინა, ალბათ, ცოცხალი არ დარჩებოდა წინა ხელისუფლებიდან არავინ. ეს უნდა გაითვალიწინოს ამ ხელისუფლებამ, რომ თუ მას გარდამავალი პერიოდი არ ექნა და მოხდა ისე, რომ უცებ ჩამოიშალა ეს რეჟიმი და მეორე დღეს მოვიდა სხვა ხელისუფლება, ძალიან მძიმე მდგომარეობაში ჩაიგდებენ თავს, რადგან საზოგადოებაში დიდ აგრესიას თესავენ. _
წეღან თქვენს შეცდომაზე საუბრობდით. ჰოდა, ვადამდელი არჩევნები რომ დაინიშნოს, შესაძლოა, ისეთ პარტიებთან დაბლოკდეთ, რომელთანაც არასდროს აპირებდით თანამშრომლობას, მაგალითად, ნაციონალურ მოძრაობასთან ან ევროპულ საქართველოსთან? _
ნაციონალურ მოძრაობასთან ბლოკის შესახებ მოლაპარაკებები არ გვაქვს, მაგრამ ზოგადად, გარკვეულ პოლიტიკურ ძალებთან, რა თქმა უნდა, დავბლოკდებით და არა მარტო ჩვენ. ვფიქრობ, ეს ძალიან ბევრისთვის იყო გაკვეთილი, რომ ავტორიტარულ ქვეყანაში მარტო ხმებზე დაყრდნობა ძნელია და სავარაუდოდ, ოპოზიცია, მაქსიმუმ, სამი ძლიერი კოალიციით იქნება წარმოდგენილი არჩევნებზე. ამას წინათ, გვქონდა რაღაც შეხვედრა, სადაც გლდანის მაგალითზე ვთქვი, რომ ნიკა მელიამ მოიგო არჩევნები, დაადასტურა, რომ ოპოზიციამ ყველა მაჟორიტარულ ოლქში უნდა დააყენოს მხოლოდ ერთი კანდიდატი და ეს, პრაქტიკულად, 30 გარანტირებული მანდატია. _
ისე, ოპოზიციის ერთიანობის გაძლიერების ტენდენცია შეინიშნება, თუ მეჩვენება? _ დიახ, ეს გასაკეთებელია ტაქტიკურად ისე, რომ რაღაც ნიუანსები გასათვალისწინებელია, მაგრამ ჯამში, რა თქმა უნდა, ერთიანობა აუცილებელია იმიტომ, რომ ჩვენთან ხშირად გვხვდება არასწორი ანალოგიები დემოკრატიულ ქვეყნებთან, სადაც არანაირი ოპოზიციური ერთობა არ არსებობს. არ შეიძლება ჩრდილო კორეაში ან კუბაზე არსებობდეს მემარცხენე, მემარჯვენე, ლიბერალური ან კონსერვატიული ოპოზიცია. სადაც არის დიქტატურა, ყველგან უნდა არსებობდეს ოპოზიციის ერთიანი ფრონტი! კახა კუკავას სკანდალური აღიარება "სააკაშვილი კიდევ მსუბუქად გადარჩა... ესენი თავს ძალიან მძიმე მდგომარეობაში ჩაიგდებენ!" მ

ქართულ პოლიტიკაში დიდი სკანდალია _ გრიგოლ  ვაშაძემ ნაციონალური მოძრაობის თავმჯდომარის  პოსტი და ასევე, პარტიაც დატოვა. „არის ფაქტები,  რომლებსაც კატეგორიულად ვერ შევეგუები.  არ ვეთანხმები პარტიის ხელმძღვანელობის  უმრავლესობის მიერ, პარტიის წევრებთან  კონსულტაციების გარეშე არჩეულ ტაქტიკას.  კიდევ უფრო მიუღებელია ჩემთვის პარტიული  სტრატეგიის არარსებობა. ეს მხოლოდ ე.წ. ქართულ  ოცნებას აძლევს ხელს. ვერ შევეგუები იმას, რომ  პარტიის გარშემო და მის შიგნითაც გამოჩნდენ ისეთი  ოდიოზური ფიგურები, რომლებიც ჩვენ კარგა ხანია,  თითქოსდა, ჩავაბარეთ წარსულს და რომლებთან  ერთად ვერასდროს, ვიმეორებ, ვერასდროს ვერ  მოვიპოვებთ ამომრჩევლის ნდობას“, _ დაწერა  ვაშაძე-უფროსმა სოციალურ ქსელში და არავინ  იცის, ვის გულისხმობს „ოდიოზურ ფიგურებში“ ან  შეიძლება, ბევრმა იცის, მაგრამ ყველას პირში წყალი  აქვს ჩაგუბებული... ისე, ამ სკანდალურ წასვლას წინ  კულუარული ხმა უძღვოდა, რომ გრიგოლ ვაშაძეს,  რამდენიმე თანამოაზრესთან ერთად, პარლამენტში  შესვლა სურდა, მაგრამ პარტია ვერ დაითანხმა.  ამასთან, საგულისხმოა, რომ ვაშაძე-უფროსს  პარლამენტში შესვლის, უფრო სწორად, უკვე  მიღებული მანდატის გამოყენების უფლება აქვს და  შესაძლოა, ნაციონალური მოძრაობიდან წასვლის  შემდეგ, მან პარლამენტს მიაშუროს.  „ვერსია“ ნაციონალურ მოძრაობაში განვითარებულ  მოვლენებს ანალიტიკოსს, არჩილ გამზარდიასთან  ერთად აფასებს.  

_ არჩილ, გრიგოლ ვაშაძის სკანდალური გადაწყვეტილება პოლიტიკურ პროცესებს ამოაყირავებს?

_ არ მესმის, რატომაა სკანდალური, როდესაც პარტიის თავმჯდომარე ტოვებს პოსტს იმ ფონზე, როცა საქართველოში პრემიერები იცვლებოდნენ ისე, რომ ვერ ვიგებდით, რა ხდებოდა?! ფაქტია, პარტიასა და თავმჯდომარეს შორის შინაარსობრივი განსხვავებები წავიდა იმ დონეზე, რომ შეუთავსებელი გახდა, რაც სავსებით ნორმალური და კანონზომიერი პროცესია. უბრალოდ, ამას ხელისუფლება იყენებს პროპაგანდისთვის, რომ ეს სკანდალად აქციოს და ეს მაშინ, როცა ნაციონალურმა მოძრაობამ, წინა არჩევნებთან შედარებით, ბევრად უკეთესი მაჩვენებელი წარმოადგინა.

_ კი ბატონო, შეიძლება, მშვიდ პოლიტიკურ ფონზე ეს, მართლაც, რიგითი ნიუსი ყოფილიყო, მაგრამ ჯერ ერთი, ოპოზიცია ბოიკოტის რეჟიმშია, მეორეც, ხმა დადის, ვაშაძეს პარლამენტში შესვლა უნდაო... ეს კონტექსტი გასათვალისწინებელი არაა?

_ ეს გადაწყვეტილება მიიღო პოლიტსაბჭომ, მარტო გრიგოლ ვაშაძე კი არა, კიდევ რამდენიმე ადამიანი მიიჩნევდა პარლამენტში შესვლას გონივრულ გადაწყვეტილებად, მაგრამ პარტიული გადაწყვეტილება ასეთია და იმიტომაა პარტიული ცხოვრება რთული, ადამიანების თავისუფლება გარკვეულწილად იზღუდება და ყველა საერთო გადაწყვეტილებას ემორჩილება. თუ ვერ ემორჩილება, მაშინ ტოვებს. შეიძლება, რამდენიმე წევრიც კი წავიდეს ნაციონალური მოძრაობიდან. ესეც სავსებით კანონზომიერია, რადგან პარტიას, მიუხედავად წარმატებისა, სხვა ტიპის განახლება სჭირდება. როდესაც ერთი ეტაპი სრულდება და, ამ შემთხვევაში, არჩევნების შემდეგ, პოლიტიკური პარტიები ახალ ეტაპზე გადადიან, ან უფრო მდგრადი ხდება პარტიული ცხოვრება, ან სიახლეებს გულისხმობს და ამ შემთხვევაში, სიახლეების მიმართულებით მოუწევს წასვლა. კიდევ ერთი მნიშვნელოვანი ფაქტორი: გრიგოლ ვაშაძე კი იყო ფორმალურად პარტიის თავმჯდომარე, მაგრამ თავმჯდომარის რეალურ ფუნქციას ასრულებდა საპატიო თავმჯდომარე ანუ მიხეილ სააკაშვილი, რაც თავისთავად, არ არის სწორი. ნაციონალურ მოძრაობაში, ისევე, როგორც „ქართულ ოცნებაში“, „ჩრდილოვანი მმართველობაა“...

_ ანუ არაფორმალური მმართველობაა?

_ დიახ. საპატიო თავმჯდომარე არ უნდა ადგენდეს პარლამენტის კანდიდატების სიებს, პარტიის სტრატეგიას. მით უმეტეს, ნაციონალურ მოძრაობას რაოდენობრივად საკმაოდ მსხვილი პოლიტიკური საბჭო ჰყავს და ნომინალური არ უნდა იყოს ამ ადამიანების ფუნქცია. ამ მხრივ, პრობლემა „ქართულ ოცნებასაც“ აქვს, სხვა პარტიებში ეს საკითხი მეტ-ნაკლებად სხვანაირად დგას.

_ ყველაფერი ეს გასაგებია და ისიც მესმის, რომ გავლენებისთვის ბრძოლა მიდის პარტიაში, რაც აღარავის უკვირს, მაგრამ ოპოზიციურ პარტიაში ასეთი მნიშვნელოვანი რყევები, საზოგადოებაში უფრო ხომ არ გააღვივებს ნიჰილიზმს და უნდობლობას ოპოზიციის მიმართ?

_ მოდით, სპეციფიკას შევხედოთ _ რა ტიპის ამომრჩეველი ჰყავს ნაციონალურ მოძრაობას. როცა თავის დროზე დაიშალა პარტია და ევროპული საქართველო შეიქმნა, ამან განსაკუთრებული ეფექტი არ მოახდინა. პარტიას აქვს მკვეთრი სწორება მიხეილ სააკაშვილზე და შესაბამისად, ამ ფაქტორის ფარგლებში ჯდება. მთელი ინტელექტუალური თავები, თავის დროზე, წავიდნენ პარტიიდან, მაგრამ გამოიწვია ამან განსაკუთრებული რყევები? ვნახეთ მიმდინარე შედეგები არჩევნებზე, რაც გინდა გაყალბებულად ჩათვალო, მოცემულობიდან ჩანს, რამდენი მანდატი აიღო ნაციონალურმა მოძრაობამ და რამდენი _ ევროპულმა საქართველომ. ამიტომ მსგავსი რაღაცები, უშუალოდ ნაციონალური მოძრაობის ამომრჩევლისთვის არსებითი არ არის. ჰქონდა ის წონა გრიგოლ ვაშაძეს ამომრჩეველთან, რომლის წასვლაც განსაკუთრებულ ეფექტს მოახდენს? _ ვფიქრობ, არა. ის იყო ერთგვარი ადმინისტრატორი, ვიდრე _ პარტიის თავმჯდომარე და პარტიის რამდენიმე აქტიური წევრიც რომ გაჰყვეს, ამასაც კი არსებითი მნიშვნელობა არ ექნება. უბრალოდ, ხელისუფლებას და პარტიის კონკურენტებსაც მისცეს საშუალება, პარტიის წინააღმდეგ გარკვეული საინფორმაციო კამპანიის წარმოებისა, მაგრამ თავად პარტიის ამომრჩეველს ასეთი ნეგატიური კამპანიები კიდევ უფრო მეტად კრავს ხოლმე, პარტიის სასარგებლოდ.

_ ერთი წუთით, წარმოვიდგინოთ, რომ გრიგოლ ვაშაძე და კიდევ რამდენიმე მისი თანამოაზრე, ოპოზიციის ბოიკოტის მიუხედავად, პარლამენტში შევიდა. ასეთ დროს, მოვლენები როგორ განვითარდება?

_ მათთვის, ალბათ, ეს იქნება ბოლო პოლიტიკური აქტი იმიტომ, რომ ისინი რადგანაც ნაციონალური მოძრაობის წარმომადგენლები იყვნენ, ამ პარტიის ელექტორატისთვის სრულიად მიუღებელნი აღმოჩნდებიან და ნებისმიერი პარტიისთვის ასეთი პირები არ იქნებიან სასურველი წევრები. არ მგონია, გრიგოლ ვაშაძის პოლიტიკური ცხოვრება იმდენად გრანდიოზული იყოს, რომ პარტიებში მის მიმართ მოთხოვნა გაჩნდეს, თუ შევა პარლამენტში. ერთადერთი, რასაც ხელს შეუწყობს, იქნება „ქართული ოცნების“ ინტერესი, სხვა ფუნქციას ისინი ვერ შეასრულებენ და ეს პოლიტიკური ცხოვრებისთვის საკმაოდ ნეგატიური იქნება, თან ვიცით, რომ პარლამენტი არ არის მდგრადი და 100 დეპუტატამდეც რომ შეივსოს, 2024 წლამდე რამდენად მივა „ქართული ოცნება“ იმ ფონზე, როგორც მიდის ქვეყანაში ცხოვრება, ესეც ბუნდოვანია. ამიტომ ვეჭვობ, რომ მსგავსი გადაწყვეტილება მიიღონ. _ აბა, რა გზას დაადგებიან? _ სხვათა შორის, ევროპულ საქართველოშიც არის გარკვეული რყევები... ამ პარტიასა და ნაციონალური მოძრაობიდანაც ან გადავლენ სამოქალაქო სფეროში, ან ვაშაძის შემთხვევაში, შესაძლოა, რაიმე დიპლომატიური ფუნქცია მიიღოს, ან წავიდეს პოლიტიკიდან და ჩვეულებრივ პროფესიულ პენსიაზე გავიდეს. _ სხვა პარტიის შექმნას გამორიცხავთ? _ ვინ უნდა იყოს მისი ამომრჩეველი? გრიგოლ ვაშაძე დიპლომატია. მას აქვს ბევრი მნიშვნელოვანი უნარი და გამოცდილებაც, მაგრამ როგორც პოლიტიკოსი რამდენად თავითმყოფადი და ლიდერია, ერთ ეტაპზე, ვნახეთ ნაციონალური მოძრაობის სივრცეში. შესაძლოა, მასში იმალებოდეს გარკვეული უნარები, რომელიც თავისუფლების რეჟიმში გამოხატოს, მაგრამ ნაკლები შანსია იმიტომ, რომ გრიგოლ ვაშაძე და რამდენიმე მისი თანამოაზრე თუ წავიდა, უნდა იყვნენ საინტერესო ლიდერები საიმისოდ, რომ მათი მიზნობრივი ბაზრიდან თავისკენ გადაქაჩონ ამომრჩეველთა ნაწილი, რისი პერსპექტივაც ახლა ძალიან დაბალი მგონია, თორემ თეორიულად შესაძლებელია. არჩილ გამზარდია: `გრიგოლ ვაშაძე პროფესიულ პენსიაზე გავა!~ რა რყევებს გამოიწვევს ოპოზიციაში პრეზიდენტობის ექსკანდიდატის წასვლა და კიდევ ვინ დატოვებს ენმ-ს. 

დღეს, 16 იანვარს, პარტია „ქართული ოცნება - დემოკრატიული საქართველოს“ ყრილობა გაიმართება, რომელსაც მთელი ქვეყნის მასშტაბით 400-მდე დელეგატი დაესწრება.

ყრილობა პარტიის ახალ თავმჯდომარეს და პარტიის პოლიტიკური საბჭოს განახლებულ შემადგენლობას აირჩევს. როგორც ცნობილია პოლიტიკური საბჭოს გადაწყვეტილებით, პარტიის თავმჯდომარის პოსტზე წარდგენილი იქნება ირაკლი კობახიძის კანდიდატურა.

ასევე პოლიტიკურმა საბჭომ დაამტკიცა განახლებული პოლიტიკური საბჭოს წევრობის კანდიდატების 21-კაციანი სია, რომელთა ვინაობაც დღეს გახდება ცნობილი. 

 

აჭარაში ოპოზიციის საპროტესტო აქციები უკვე ორ თვეზე მეტია, გრძელდება. მომიტინგეთა მთავარი მოთხოვნა ვადამდელი არჩევნების ჩატარებაა. „ვერსია“ აჭარის საპროტესტო აქციების ერთ-ერთ ორგანიზატორსა და ლიდერს, კობა ხაბაზს ესაუბრა, რომელიც აცხადებს, რომ სიცივის მიუხედავად, დაშლას არ აპირებენ, სანამ მათი ყველა მოთხოვნა არ შესრულდება:


- ბატონო კობა, რას ელოდებით, როდემდე აპირებთ პროტესტის ქუჩაში გაგრძელებას?

- ეს პროცესი მანამ გაგრძელდება, სანამ არ მივაღწევთ ჩვენი მოთხოვნების შედეგს. ეს მოთხოვნებია: ვადამდელი საპარლამენტო არჩევნები, ცესკო-სა და აჭარის უმაღლესი საბჭოს ადმინისტრირებისა და დაკომპლექტების წესის ცვლილება და პოლიტპატიმრების გათავისუფლება. ხშირად გვესმის ეს კითხვა - რამდენ ხანს შეიძლება, ეს პროტესტი გაგრძელდეს? - დავიწყოთ იქიდან, რომ ასეთი ბრძოლა შედეგს აუცილებლად მოიტანს და ხელისუფლებას უკანდახევა მოუწევს. ჩვენ არ ვაპირებთ, გავჩერდეთ. გუშინწინ გაიხსნა „თავისუფლების კვარტალი“ ხელვაჩაურში, გუშინ - ქობულეთში. ამ დღეებში გაიხსნება ზუგდიდში, ქუთაისში... „თავისუფლების კვარტალი“, თავისუფალი სივრცეები გაჩნდება ყველგან და როცა პროტესტი ასეთ შეუქცევად ხასიათს იღებს, აუცილებლად გამარჯვებით სრულდება. ხელისუფლებას მოუწევს დათმობაზე წასვლა და ვადამდელი საპარლამენტო არჩევნების დანიშვნა. შეიძლება, ბევრისთვის ეს უტოპიაა, მაგრამ თუ გადავავლებთ თვალს ჩვენს წარსულს და მსოფლიოს მაგალითებს, ვნახავთ, რომ არც ერთ ასეთ საპროტესტო მოძრაობას უკვალოდ არ ჩაუვლია. ხანგრძლივია, დროში დამღლელია, რთული ბრძოლაა, მაგრამ ასეთ პროტესტს ყოველთვის მოაქვს შედეგი.

- ანუ, ოპოზიცია ქუჩის პროტესტს შლის, აფართოებს და უფრო მასშტაბურს ხდის?

- რა თქმა უნდა, ეს აქციები გაიშლება, გაფართოვდება და უფრო შეუქცევად, მწვავე ხასიათს მიიღებს იქიდან გამომდინარე, რომ არჩევანი აღარ დაგვიტოვა ხელისუფლებამ.

- გასაგებია, მაგრამ ამის პარალელურად, ოპოზიციის ნაწილი, მაგალითად, „გირჩი“ და ალეკო ელისაშვილი ინდივიდუალურ მოლაპარაკებებს მართავენ და შესაძლოა, პარლამენტში შესვლის ვერსიასაც განიხილავენ. საზოგადოება დაბნეულია და ამიხსენით, რა ხდება ოპოზიციაში?

- თავის დროზე, როცა ხელისუფლებაში ვიყავით და საუბარი იყო ოპოზიციაზე, ჩემთვის სრულიად გაუგებარი იყო, როგორ შეიძლებოდა, მესაუბრა ოპოზიციის შესახებ, როცა ოპოზიციაში იყო სხვადასხვა პოლიტიკური შეხედულებისა და მისწრაფების ადამიანი. იგივეა დღესაც, მიუხედავად იმისა, რომ არის ერთობა, ნამდვილად არ ვფიქრობ იმაზე და ვერ ვინერვიულებ, თუ რას გადაწყვეტს იგივე „პატრიოტთა ალიანსი“, „გირჩი“ და ა.შ. ერთმანეთთან ნამდვილად არ ვაიგივებ, მაგრამ ვიცი, რომ უმთავრების ოპოზიციური პოლიტიკური ძალა, რომელმაც აჩვენა ყველა არჩევნებში 2012 წლიდან დღემდე, ეს პარტია არის ძირითადი და ისევე როგორც ბევრი პარტია გამქრალა ხელისუფლების დაკარგვის შემდეგ, გარდა „ნაციონალური მოძრაობისა“, ასე გაქრება „ქართული ოცნებაც“, ზუსტად ვიცი, რომ დარჩება „ერთიანი ნაციონალური მოძრაობა“ და სხვა პარტიები იმერყევებენ 2-დან 5%-მდე იმიტომ, რომ მათი პოლიტიკა ყოველთვის იყო გარიგება, ვაჭრობა და რაა უმთაავრესი მიზნის მიღწევა საქართველოს და არა საკუთარი პარტიის გამარჯვება.

- მოკლედ, კატეგორიულად დარწმუნებული ხართ, რომ „ნაციონალური მოძრაობა“ პარლამენტში არ შევა?

- მე ვარ დარწმუნებული, რომ „ნაციონალური მოძრაობა“ არ შევა, მაგრამ თუ ვინმეს სულსწრაფობამ, ცდუნებამ სძლია და შევიდა პარლამენტში, ის პარტიიდან იმ ადამიანების მიერ იქნება პოლკიტიკურად განკვეთილი, რომელმა ნახევარ მილიონზე მეტმა ადამიანმაც „ერთიან ნაციონალურ მოძრაობას“ გაყალბებული არჩევნებითაც კი, მხარი დაუჭირა. იქნება განკვეთილი და შეუერთდება იმ 2%-იანი პარტიების ან პიროვნებების რიცხვს, რომლებიც არაერთი გვიანახავს ნაციონალური მოძრაობიდან წასული.

თათია გოჩაძე

აჭარის უმაღლესი საბჭოს ყოფილი დეპუტატი, უფლებადამცველი მერაბ ბლადაძე, სოციალურ ქსელში წერს: „საქართველოს პარლამენტარიზმის ისტორიაში, აჭარის ავტონომიური რესპუბლიკის მაჟორიტარი, ერთ-ერთ დეპუტატი პარლამენტში, ვიცე-სპიკერის პოსტს ყოველთვის იკავებდა... კვოტით იყო განსაზღვრული ეს. აჭარიდან არჩეულ სამივე დეპუტატს, ბრალს ვდებ ავტონომიური რესპუბლიკის ინტერესების არდაცვაში ისევე, როგორც მეათე მოწვევის პარლამენტის მთლიან შემადგენლობას...
ეს კვოტა აუცილებლად აღდგება, ხოლო თქვენ, ეს შავი ლაქა, ლაქად დაგრჩებათ!!!“  ამ თემაზე „ვერსია“ პარლამენტის საპროცედურო კომიტეტის თავმჯდომარის მოადგილეს, გურამ მაჭარაშვილს ესაუბრა, რომელმაც განგვიმარტა:


- რეგლამენტში იყო ასეთი კვოტები განაწილებული პარლამენტის თავმჯდომარის მოადგილეებთან დაკავშირებით. კონსტიტუცია აქ არაფერ შუაშია. რეგლამენტში ბევრი ცვლილება შევიდა და ეს შეეხო პარლამენტის თავმჯდომარის მოადგილეებსაც. დღეს არის პირველი ვიცე-სპიკერი, რომელსაც ასახელებს თავად თავმჯდომარე და შემდეგ არის გადანაწილებული თანაბრად - ორი ვიცე-სპიკერი ეკუთვნის უმრავლესობას, ორი კი - ოპოზიციას. დღეს რეგლამენტით ასეთი კვოტაა გადანაწილებული.
გამომდინარე იქიდან, რომ აფხაზეთიდან ვერ გვყავდა, ეს ჩანაწერი რაღაც უხერხულობას ქმნიდა. რეგლამენტში ეწერა, რომ ერთი აჭარის ავტონომიური რესპუბლიკიდან უნდა ყოფილიყო ვიცე-სპიკერი და ერთიც - აფხაზეთის ავტონომიური რესპუბლიკიდან.

- ანუ, რადგანაც აფხაზეთის ავტონომიური რესპუბლიკის წარმომადგენელი არ იყო წარმოდგენილი, ამიტომაც გააუქმეთ აჭარის წარმომადგენლის კვოტაც?

- არა, მხოლოდ ეს არ იყო მოტივაცია. ოპტიმიზაციასთან დაკავშირებითაც ბევრი რაღაც შეიცვალა პარლამენტში, უბრალოდ, გითხარით ერთ-ერთი საფუძველი, თორემ ცვლილებების შემდეგ ასე გადანაწილდა: 2 ოპოზიციას, 2 - უმრავლესობას.

- ბატონო გურამ, როგორც დეპუტატსა და საპროცედურო კომიტეტის წარმომადგენელს, რამდენად სწორად მიგაჩნიათ რეგლამენტის ეს ცვლილება? აჭარის წარმომადგენელს უნდა ჰქონდეს თუ არა კვოტა პარლამენტის სპიკერატში?

- კვოტის არსებობა ან არარსებობა არ ნიშნავს არანაირად აჭარის ავტონომიური რესპუბლიკის უფლებებში რაიმეს შეზღუდვას ან რაიმე უფლების მიცემას. ეს მოცემულობა არ ქმნის იმას, რომ აჭარის ავტონომიური რესპუბლიკა რამენაირად შეიზღუდა ამ კუთხით. ასე რომ ამაში არ შეიძლება, რამე ნეგატივი დაინახო.

„ვერსია“ აღნიშნულ საკითხზე „ნაციონალური მოძრაობის“ წარმომადგენელ კობა ხაბაზსაც ესაუბრა:


„ზოგადად, ამ პარლამენტს ვუცხადებთ ბოიკოტს. არ ვღებულობთ არჩევნებში მონაწილეობას და მიგვაჩნია, რომ მთლიანად პარლამენტი არის უკანონო გამომდინარე იქიდან, რომ არჩევნები მოგვპარა ივანიშვილმა. ყველამ იცის, რომ ბათუმში თავისუფლების კვარტალი გვაქვს გახსნილი და ვაპროტესტებთ ორ თვეზე მეტია და ვითხოვთ ვადამდელი არჩევნების დანიშვნას. ასე რომ, რა გადაწყვეტილება მიიღეს, ჩვენთვის მეორე ხარისხოვანია.

რაც შეეხება კვოტირების პრინციპს, თავის დროზე ეს გადაწყვეტილება იყო მიღებული იქიდან გამომდინარე, რომ აჭარას აქვს ავტონომიური რესპუბლიკის სტატუსი და ერთი ვიცე-სპიკერის თანამდებობა აჭარის კვოტით იყო განსაზღვრული.

უფრო მეტსაც ვიტყვი, „ქართული ოცნება“ უფრო შორსაც წავიდა და თუ არ ვცდები, სიის ასეულში, გამსვლელ სიაში აჭარიდან ერთი წარმომადგენელიც კი არ ჰყავდა. არ მინდა, იმაზე ვისაუბრო, რომ ისინი უარყოფენ აჭარას და ა.შ., მაგრამ ჩემთვის ერთი რამ ფაქტია - ამ ეტაპზე ყველაფერი ეს მეორე ხარისხოვანია ჩემთვის.
მიმაჩნია, რომ ასეთ ნორმებს არც პლუსი მოაქვს და არც - მინუსი, არაფერი მოაქვს არც ავტონომიისთვის და არც - საერთო საქმისთვის. არაა ეს აუცილებელი, უბრალოდ, მიმაჩნია, რომ უნდა ეყოთ გონიერება და ყველა პარტიას ჰყავდეს წარმომადგენელი გამსვლელ სიებში აჭარიდან იქიდან გამომდინარე, რომ აჭარა არის საქართველოს სრულფასოვანი კუთხე და სრული ჩართულობა გვაქვს ქართულ პოლიტიკურ პროცესში.“

თათია გოჩაძე

 

16 იანვარს, პარტია „ქართული ოცნება - დემოკრატიული საქართველოს“ თავმჯდომარედ ირაკლი კობახიძე ერთხმად აირჩიეს. მმართველი პარტიის ყრილობაზე, რომელიც საგამოფენო ცენტრ „ექსპო ჯორჯიაში“ გაიმართა, პოლიტსაბჭოს ახალი შემადგენლობაც დაასახელეს. ხელისუფლების წარმომადგენლების განცხადებით, „ქართული ოცნება“ ერთიანი გუნდია, რომელსაც 2020 წლის 31 ოქტომბრის საპარლამენტო არჩევნებზე, მოსახლეობამ ნდობა მესამედ გამოუცხადა, ოპოზიცია კი არჩევნების ლეგიტიმურობასთან ერთად, ეჭვქვეშ მმართველი პარტიის ერთიანობასაც აყენებს. ოპოზიციის წარმომადგენლებს მიაჩიათ, რომ „ქართულ ოცნებაში“ რამდენიმე გავლენიანი კლანია, მათ შორის, ირაკლი კობახიძის და კახა კალაძის. ხელისუფლების ოპონენტების აზრით, კალაძისა და კობახიძის კლანები ერთობლივად უტევენ საქართველოს პრემიერ-მინისტრ გიორგი გახარიას და სახელისუფლებო ვერტიკალიდან მის ჩასაჩოჩებლად, ძალებს არ იშურებენ.

დიდი ხანია, რაც ოპოზიცია ხელისუფლების მოსალოდნელი თუ სავარაუდო რღვევის შესახებ კონსპირაციულ თეორიას ანვითარებს. შესაბამისად, გასაკვირი არაა, რომ ბიძინა ივანიშვილის გადაწყვეტილება პოლიტიკიდან წასვლისა და პარტიის თავმჯდომარის პოსტის დატოვების შესახებ, ოპოზიციამ სწორედ ამ კონტექსტში განიხილა. მეტიც, პარლამენტის დეპუტატების - ბექა დავითულიანის, მაია ბითაძისა და ირაკლი ზარქუას ინიცირებული კანონპროექტიც კი, რომელიც საქართველოს ორგანულ კანონში „ადგილობრივი თვითმმართველობის კოდექსის შესახებ“ ცვლილებებს გულისხმობს, სწორედ ხელისუფლებაში არსებული დაპირისპირების მტკიცებულებად მიიჩნია. საქართველოს პარლამენტის ფრაქცია „ქართული ოცნების“ თავმჯდომარის მოადგილე ბექა დავითულიანმა, რომელიც იმავდროულად, რეგიონული პოლიტიკისა და თვითმმართველობის კომიტეტის წევრია, „ვერსიასთან“ ინტერვიუში, ოპოზიციის ამ მოსაზრებაზე გულიანად იცინა, მაგრამ ამაზე ქვემოთ. მანამდე, კანონპროექტი განვიხილოთ.  

 

***

ცვლილებების კანონპროექტი, რომელიც მეათე მოწვევის პარლამენტმა დაჩქარებული წესით განიხილა, იმ მეწარმეებისა და ბიზნესსუბიექტების ხელშეწყობას გულისხმობს, რომლებიც პანდემიის ან ეპიდემიის პირობებში დაზარალდნენ. კანონპროექტის ავტორები და ინიციატორები ბექა დავითულიანი, მაია ბითაძე და ირაკლი ზარქუა არიან. ოპოზიცია სამივე მათგანს კალაძის კლანის წევრებად განიხილავს და აი, რატომ: ბექა დავითულიანი თბილისის საკრებულოს წევრი და საკრებულოს ფრაქცია „ქართული ოცნების“ თავმჯდომარე იყო, ირაკლი ზარქუა - თბილისის საკრებულოს თავმჯდომარის მოადგილე, ხოლო მაია ბითაძე დედაქალაქის მერის ანუ კახა კალაძის მოადგილე გახლდათ.

დავუბრუნდეთ ცვლილებების პროექტს, რომელიც თუ ოპოზიციას დავუჯერებთ, სახელისუფლებო კლანებს შორის დაპირისპირების მიზეზად და ერთგვარ, განხეთქილების ვაშლად იქცა. კანონპროქტის განმარტებით ბარათში ვკითხულობთ: „ეპიდემიის ან/და პანდემიის მდგომარეობიდან გამომდინარე, მთავრობა უფლებამოსილი იქნება ეპიდემიის ან/და პანდემიის დროს, ან მისი გაუქმების შემდეგ, არა უგვიანეს 2021 წლის 1 ივლისისა, მიმართოს თბილისის საკრებულოს, რათა აუქციონის ფორმით პრივატიზებული თბილისის ქონების შემძენისთვის, სარგებლობის ან მართვის უფლებით გადაცემული თბილისის ქონების მიმღებისთვის, ამ ქონებასთან დაკავშირებული საინვესტიციო პირობის შეცვლის ან გაუქმების ან/და ფინანსური პირობის შეცვლის შესახებ“.

ადგილობრივი თვითმმართველობის კოდექსის შესაბამისად, დედაქალაქის მთავრობას ამგვარი უფლება აქვს. კერძოდ, დასაბუთებული აუცილებლობის შემთხვევაში, აუქციონის ფორმით პრივატიზებულ, სარგებლობის ან მართვის უფლებით გადაცემულ თბილისის ქონებასთან დაკავშირებული პირობების (გარდა ფინანსური და საინვესტიციო პირობებისა) შეცვლის ან გაუქმების შესახებ წინადადებით, თბილისის საკრებულოს მიმართავს გადაწყვეტილების მისაღებად. თუმცა, ამავე დებულებიდან გამომდინარე, ფინანსური და საინვესტიციო პირობის შეცვლის უფლება კოდექსით არ არსებობს.

„აუქციონის ფორმით პრივატიზებულ, სარგებლობის უფლებით გადაცემულ ან მართვის უფლებით გადაცემულ თბილისის ქონებასთან დაკავშირებული ფინანსური და საინვესტიციო პირობის შეცვლის შესაძლებლობას, კოდექსი იძლევა მხოლოდ იმ შემთხვევაში, თუ თბილისის ქონების პრივატიზება, სარგებლობის უფლებით გადაცემა ან მართვის უფლებით გადაცემა 2013 წლის 31 დეკემბრამდე განხორციელდა. ამ თარიღის შემდგომ განკარგულ ქონებასთან დაკავშირებით, აღნიშნული შეღავათის გამოყენება კოდექსით დაუშვებელია. სამწუხაროდ, დღეის მდგომარეობით, არა თუ საქართველო, არამედ, მთელი მსოფლიო ებრძვის ახალ კორონავირუსს _ COVID-19, რის გამოც შეფერხებულია მთელი რიგი ეკონომიკური აქტივობები. ცხადია, ეს მძიმე ტვირთად აწვება ბიზნესსექტორს. აღნიშნულიდან გამომდინარე, მართებული იქნება, თუ გარკვეული ნაბიჯების გადადგმით, ბიზნესისთვის გარკვეული შეღავათები დადგინდება. ამ მიზნით, მიზანშეწონილია, რომ პანდემიის ან/და ეპიდემიის დროს, თბილისის მთავრობას მიეცეს შესაძლებლობა, თბილისის საკრებულოს წარუდგინოს წინადადება აუქციონის ფორმით პრივატიზებული თბილისის ქონების შემძენისთვის, სარგებლობის ან მართვის უფლებით გადაცემული თბილისის ქონების მიმღებისთვის, ამ ქონებასთან დაკავშირებული საინვესტიციო პირობის შეცვლის ან გაუქმების ან/და ფინანსური პირობის შეცვლის შესახებ“, - აღნიშნულია კანონპროექტის განმარტებით ბარათში.

საკრებულოს თანხმობის შემთხვევაში, თბილისის ქონებით მოსარგებლე პირების მიმართ გატარდება საშეღავათო რეჟიმი, რაც დადებით გავლენას იქონიებს მათ ფინანსურ მდგომარეობაზე. დეპუტატები ამ კანონპროექტის დაჩქარებული წესით განხილვას იმიტომ ითხოვენ, რომ ამგვარი უფლებამოსილება თბილისის მუნიციპალიტეტს მხოლოდ 2020 წლის 31 დეკემბრამდე გააჩნია:

„იმის გათვალისწინებით, რომ ეპიდემიოლოგიური მდგომარეობა კვლავ მძიმეა და ეკონომიკა კვლავ საჭიროებს გარკვეულ ხელშეწყობას, შესაბამისად, ამ ვალდებულებების შესრულებაზე ანუ გარკვეული შეღავათების თაობაზე გადაწყვეტილებების დროულად მიღების მიზნით, მიზანშეწონილია, კანონპროექტის დაჩქარებული წესით განხილვა“.

 

***

ახლა კი დაპირებული ინტერვიუ კანონპროექტის ავტორსა და ინიციატორ ბექა დავითულიანთან, რომელმაც „ვერსიასთან“ საუბრისას აღნიშნა, რომ პარლამენტს ორი კანონპროექტი წარუდგინა.

- ორი კანონპროექტის მიღების ინიციატივით გამოვედი. პირველი ეხება იჯარის თანხების გადახდას. მერიას უნდა ჰქონდეს შესაძლებლობა, მიმართოს საკრებულოს და მეწარმეებს საიჯარო გადასახადის ვადა გაუგრძელოს. ეს უკანასკნელი ექვსი თვის მანძილზე მოქმედებდა, მაგრამ ვადა გაუვიდა და ახლა, ამ ინიციატივით, კიდევ ერთხელ გადავავადეთ. თუ ჩათვლის მერია, რომ მოიჯარეს ან კომპანიას, რომელსაც აქვს საინვესტიციო ვალდებულებები და ამ პერიოდის განმავლობაში, ანუ პანდემიის გამო ვერ შეძლო განეხორციელებინა თავისი ვალდებულება ან გადაეხადა ქირა, რადგან დახურული იყო, მერიას უნდა შეეძლოს, მიმართოს თბილისის საკრებულოს, სწორედ ამ საიჯარო ან საინვესტიციო პირობების გადავადებასთან ან შეცვლასთან დაკავშირებით. მაგალითად, იჯარის ან ქირის გასაუქმებლად იმ პერიოდში, როდესაც არ მუშაობდა ეს ბიზნესი ან საინვესტიციო ვალდებულებების გადასავადებლად, თუ ვერ განახორციელა იმიტომ, რომ არ მუშაობდა ამ პერიოდში.

რაც შეეხება მეორე კანონპროექტს, ის ჯიხურების დაჯარიმებას ეხება. თბილისში ბევრგან იდგა ჯიხურები, რომლებსაც ვადა გაუვიდა და იმ პერიოდში დაჯარიმდნენ ეს ადამიანები შესაბამისი ორგანოს მხრიდან. ჩვენი ინიციატივა, სწორედ ამ ჯარიმების პატიებას ეხება. ეს იმიტომ, რომ მთელი ამ ხნის მანძილზე, ერთი მხრივ, ვერ მუშაობდნენ ეს ბიზნესები, შეიძლება, ყოყმანობდნენ, გაეგრძელებინათ თუ არა საერთოდ ეს საქმიანობა, მაგრამ არ მოუმართავთ და ჩავთვალეთ, რომ ჯარიმა უსამართლო იქნებოდა ამ პანდემიის პირობებში, ხოლო მეორე მხრივ, თუ განაახლებენ საქმიანობას, ჯარიმა ტვირთად არ უნდა დააწვეთ.

- ბატონო ბექა, ეს ინიციატივა ეხება მხოლოდ იმ ჯიხურებს, რომლებიც თბილისშია განთავსებული?

- არა, რადგან ჯარიმები მოვუხსენით მეწარმეებს მთელი საქართველოს მასშტაბით.

- კანონპროექტს, რომელიც საინვესტიციო და საიჯარო ნაწილს ეხება, თქვენივე კოლეგების უკმაყოფილება მოჰყვა იმიტომ, რომ თბილისის გარდა, პანდემიისგან გამოწვეული შეზღუდვები სხვა დიდ ქალაქებშიც მოქმედებს და დედაქალაქი რა ნიშნით გამოარჩიეთ?  

- იცით, რაში იყო საქმე? ექვსი თვის წინ, მსგავსი ცვლილება იყო ინიცირებული, ამიტომ მისი გადავადება უფრო სწრაფად, მარტივადაა შესაძლებელი და კანონპროექტსაც ნაკლები პროცედურების გავლა უწევს. ახალი კანონი რომ შეგვექმნა, შესაძლოა, ეს პროცესი დროში გაწელილიყო, ტექნიკურადაც მოუხერხებელი იქნებოდა და ბიზნესიც გაიჭედებოდა. აქედან გამომდინარე, თბილისში კანონი გადავავადეთ ანუ იგივე კანონი განვაახლეთ, რაც შეეხება რეგიონებს, მოვრიგდით, რომ დავიწყოთ მუშაობა რეგიონული განვითარებისა და ინფრასტრუქტურის სამინისტროსთან და შესაბამის მუნიციპალიტეტებთან ერთად.

- რატომ?

- ჯერ უნდა შევისწავლოთ, რამდენად აქტუალურია ეს პრობლემა კონკრეტულ რეგიონში, გავითვალისწინოთ მათი სპეციფიკა, რათა დედაქალაქის მსგავსი კანონი შევქმნათ, მაგრამ რეგიონების სპეციფიკის გათვალისწინებით. მოკლე ვადაში ამ ყველაფერს ვერ მოვასწრებდით იმიტომ, რომ თბილისი უკვე შესწავლილია. აქ ერთხელ უკვე მოქმედებდა მსგავსი კანონი და ჩათვალეთ, რომ ამ კანონის ვადა გადავწიეთ ანუ გავახანგრძლივეთ.

რეგიონების კონტექსტის გათვალისწინებით, თბილისსაც გავჭედავდით, ამიტომ დრო მოვიგეთ - კანონპროექტი თბილისისთვის ცალკე გავიტანეთ. რეგიონებთან დაკავშირებით, ჩვენი კომიტეტის დანარჩენ წევრებს გარკვეული ინიციატივები აქვთ, დავამუშავებთ და იგივე კანონს რეგიონებშიც ავამოქმედებთ.

- გასაგებია, მაგრამ ამ კანონპროექტთან დაკავშირებით, ხელისუფლების ოპონენტები ამბობენ, რომ ეს ცვლილება, რეალურად, კახი კალაძის ინიციატივაა თბილისელი მეწარმეების გულის მოსაგებად, ხოლო თქვენ იმიტომ ხართ მისი ავტორი, რომ კალაძის კლანის წევრად მოგიაზრებენ.

- საქმე არის ძალიან მარტივად: არსებობს კანონი თბილისის შესახებ. თბილისს, როგორც დედაქალაქს, თავისი განსხვავებული სპეციფიკა აქვს. ეკონომიკის ძირითადი ბირთვი მოძრაობს თბილისში და ყველაფერს რომ თავი დავანებოთ, ყველაზე უფრო დიდი ქალაქია. შესაბამისად, თავისი სპეციფიკიდან გამომდინარე, საჭიროებს ინკლუზიურ მიდგომას ისევე, როგორც ესა თუ ის რეგიონი. მე თბილისის სპეციფიკა კარგად ვიცი, რადგან დედაქალაქის საკრებულოში ვმუშაობდი.

ძალიან მინდოდა, რომ იგივე ცვლილება რეგიონებშიც გავრცელებულიყო, მაგრამ შეცდომა რომ დამეშვა, ეს ხომ უარესი იქნებოდა? ამიტომ, სხვა მაჟორიტარები რეგიონებიდან და დეპუტატების დიდი სპექტრი ჩაერთვებიან ამ პროცესში, დავხვეწთ ამ კანონს ისე, რომ შესაძლებელი გახდება, მთელ საქართველოზე გავრცელდეს და რა პრობლემაა? რატომ არ უნდა მინდოდეს, რეგიონებში მოქმედ ბიზნესმენებსაც დავეხმარო, წარმოუდგენელია ჩემთვის!

- თქვენი ოპონენტების აზრით, მმართველ პარტიაში რამდენიმე კლანია, საპარლამენტო ფრაქცია „ქართულ ოცნებაში“ კი ორს - ირაკლი კობახიძისა და კახა კალაძის კლანებს ასახელებენ, რომლებიც პრემიერ-მინისტრ გიორგი გახარიას უპირისპირდებიან, ასეა?

- მარტივად გიპასუხებთ: გიორგისთანაც ვმეგობრობ, ირაკლისთანაც და კახისთანაც (იცინის). მითხარით, როგორ ავხსნა, რომელ კლანში ვარ? არცერთ მათგანთან არ მაქვს პრობლემა.

მაია მიშელაძე

 

 

მართალია, დენი და წყალი გაძვირდა, მაგრამ რიგითი მოქალაქეების მსგავსად, ერთი წლის მანძილზე, ამას ბიზნესიც ვერ იგრძნობს. საქართველოს მთავრობის დადგენილებით, უკვე ცნობილია ბიზნესის ის დარგები, რომლებსაც 2021 წლის 1 იანვრიდან, დენის გაძვირებულ ტარიფს დაუსუბსიდირებენ. სუბსიდირება ეხება ელექტროენერგიის სამომხმარებლო ტარიფს შორის წარმოქმნილი სხვაობის 50%-ს.

საქართველოს მთავრობის დადგენილებით, სუბსიდირება ეხება ბიზნესის ისეთ მნიშვნელოვან დარგებს, როგორებიცაა: მეფრინველეობა, ხორცის გადამუშავება და კონსერვირება, შინაური ფრინველის ხორცის გადამუშავება და კონსერვირება, ხორცპროდუქტების წარმოება; თევზის, კიბოსნაირებისა და მოლუსკების გადამუშავება და კონსერვირება; კარტოფილის გადამუშავება და კონსერვირება; ხილ-ბოსტნეულის გადამუშავებისა და კონსერვირების სახეები; ზეთებისა და ცხიმების წარმოება; მარგარინისა და მსგავსი საკვები ცხიმების წარმოება; რძის გადამუშავება და რძის პროდუქტების წარმოება; საფქველ-ბურღულეული პროდუქტების წარმოება, სახამებლებისა და სახამებელი პროდუქტების წარმოება, პურის წარმოება; არახანგრძლივი შენახვის ცომეული საკონდიტრო ნაწარმის, ნამცხვრების, ორცხობილებისა და მშრალი ნამცხვრების წარმოება, მაკარონის, ატრიის, კუსკუსისა და მსგავსი ცომეული პროდუქტების წარმება; შაქრის წარმოება; სუნელ-სანელებლების წარმოება; ჰომოგენიზებული საკვები პრეპარატებისა და დიეტური საკვები პროდუქტების წარმოება; მზა საკვების წარმოება ფერმის ცხოველებისათვის; მზა საკვების წარმოება შინაური ცხოველებისათვის.

როგორც ხედავთ, მთავრობის დადგენილებით, გაძვირებულ დენის ტარიფს არ გადაიხდიან სწორედ ის მეწარმეები, რომლებიც სასიცოცხლოდ მნიშვნელოვან და აუცილებელ საკვებ პროდუქტებს ადგილზე აწარმოებენ, ან ასეთი საკვები პროდუქტები უცხოეთიდან შემოაქვთ. მოკლედ, ძირითადი საკვები პროდუქტების ადგილობრივი მეწარმეებიცა და იმპორტიორებიც ხელისუფლებამ თანაბარ პირობებში ჩააყენა.

მთავრობის დადგენილებაში დეტალურადაა განმარტებული, თუ როგორ უნდა ისარგებლონ მეწარმეებმა დენის ტარიფის ნაწილობრივი სუბსიდირებით. ამისთვის მეწარმე სუბიექტმა ელექტრონული პლატფორმა - https//www.registration.gov.ge საშუალებით, 2021 წლის 13 იანვრიდან 27 იანვრამდე, განცხადება უნდა შეავსონ.  

საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ-ი) გადაწყვეტილებით, 2021 წლის 1 იანვრიდან, ბიზნესსუბიექტებისთვის დენის ტარიფი 12 თეთრით გაძვირდა. მიმდინარე წლის განმავლობაში, ამ 12-დან 6 თეთრს მთავრობა დაასუბსიდირებს. სემეკ-ის გადაწყვეტილებით, ბიზნესსუბიექტებისთვის დენის ტარიფი 12 თეთრით გაიზარდა. აქედან, 2021 წლის განმავლობაში, ექვს თეთრს მთავრობა დაასუბსიდირებს.

სხვათა შორის, გაძვირებული დენის ტარიფის ნაწილობრივი სუბსიდირება ერთადერთი დახმარება არაა, რომელსაც მიმდინარე წელს, მთავრობა კერძო სექტორისა და მოქალაქეების მხარდასაჭერად გაიღებს. ანტიკრიზისული გეგმის მეოთხე ეტაპის ფარგლებში განსახორციელებელი ღონისძიებების ნუსხა ჯერ კიდევ 2020 წლის 27 ნოემბერს გამოქვეყნდა, რომელიც მოქალაქეებზე ზრუნვისა და ბიზნესის მხარდაჭერის პაკეტებად იყოფა. ჯამში, მთავრობის ანტიკრიზისული გეგმის მეოთხე ეტაპზე, ახალი პაკეტის ღირებულება 1 მილიარდ 100 მილიონ ლარს აჭარბებს.  

მოქალაქეებზე ზრუნვის პაკეტი - ამ პროგრამის ბიუჯეტი 545 მილიონი ლარით განისაზღვრა. ბენეფიციართა საერთო რაოდენობა 500 000 პირზე მეტია, თუმცა ამ ციფრებში არ შედის კომუნალური გადასახადების სუბსიდირების მაჩვენებელი. ეს იმიტომ, რომ კომუნალური ხარჯების სუბსიდირებისთვის ცალკე თანხაა განსაზღვრული. ოთხი თვის მანძილზე ანუ 2020 წლის ნოემბრიდან 2021 წლის თებერვლის ჩათვლით, კომუნალური ხარჯების სუბსიდირება განხორციელდება (დენი _ 200 კვტ/სთ და გაზი _ 200 კუბურ მეტრამდე მოხმარება). ბენეფიციართა სავარაუდო რაოდენობაა 1 მილიონი ოჯახი, ხოლო ბიუჯეტი 270 მილიონი ლარი.

1200-ლარიანი დახმარებას მიიღებენ სამსახურდაკარგული პირები, რომლებმაც დროებით დაკარგეს სამსახური. 2021 წლის იანვრიდან ექვსი თვის განმავლობაში, ისინი მიიღებენ 200-ლარიან დახმარებას. ბენეფიციართა სავარაუდო რაოდენობა 125 000-ია, ხოლო ბიუჯეტი _ 150 მილიონი ლარი.

300-ლარიანი ერთჯერადი დახმარება გაიცემა იმ ობიექტებში დასაქმებული პირებისა და ინდმეწარმეების სასარგებლოდ, რომელთაც საქმიანობა შეუჩერდათ დეკემბერში ან შეუჩერდებათ იანვარში. ბენეფიციართა სავარაუდო რაოდენობაა 100 000, ხოლო ბიუჯეტი _ 30 მილიონი ლარი.

600-ლარიან დახმარებას მიიღებენ 65-დან 100 000 სოციალურ ქულამდე მყოფი ოჯახები. 2021 წლის იანვრიდან, ასეთ ოჯახებს თვეში, საშუალოდ, 100 ლარის ოდენობით (ოჯახის წევრთა რაოდენობის მიხედვით) ჩაერიცხებათ დახმარება ექვსი თვის განმავლობაში. ბენეფიციართა სავარაუდო რაოდენობა 72 000-მდე ოჯახი ანუ დაახლოებით, 220 000-მდე პირია, ხოლო ბიუჯეტი _ 55 მილიონი ლარია.

600-ლარიან დახმარებას მიიღებენ 0-დან 100 000 ქულამდე მყოფი ოჯახები, რომლებსაც ჰყავთ 3 ან მეტი 16 წლამდე ბავშვი. ექვსი თვის განმავლობაში, ისინი თვეში 100 ლარს (იანვრიდან ივნისის ჩათვლით) მიიღებენ. საუბარია 24 000 ოჯახზე, ხოლო ბიუჯეტი _ 15 მილიონი ლარია.

18 წლამდე შშმ და მკვეთრად გამოხატული შშმ პირებისთვის გაიცემა 600-ლარიანი დახმარება, თვეში 100 ლარის ოდენობით, ექვსი თვის მანძილზე. ბენეფიციარების რაოდენობაა 43 000 პირი, ბიუჯეტი _ 27 მილიონი ლარია.

საბანკო სესხების გადავადების შესაძლებლობა ექნებათ იმ ობიექტებში დასაქმებულ პირებს, რომელთა საქმიანობა 2020 წლის დეკემბერსა და 2021 წლის იანვარში, ნოემბრის ბოლოს დაწესებული ნახევრად „ლოქდაუნის“ გამო შეიზღუდა.

ბიზნესის მხარდაჭერის პაკეტი - პროგრამის ბიუჯეტი 515 მილიონი ლარია. ეს პაკეტი გულისხმობს საშემოსავლო გადასახადის შეღავათს, რომელსაც 1500 ლარამდე ხელფასის მქონე პირები მიიღებენ. უფრო კონკრეტულად, პირები, რომელთა შემოსავალი 1500 ლარამდეა, 750 ლარამდე თანხის საშემოსავლო გადასახადისგან გათავისუფლდებიან 2021 წლის დეკემბერი-მაისის პერიოდში. ბენეფიციართა სავარაუდო რაოდენობა ასეთია: 33 000 კომპანია და 425 000 დასაქმებული, ხოლო ბიუჯეტი _ 260 მილიონი ლარია.

რაც შეეხება ქონების გადასახადის შეღავათს ტურიზმის სექტორისთვის ანუ სასტუმროებში, რესტორნებსა და მსგავს საქმიანობაში ჩართული ქონება 2021 წელს გათავისუფლდება ქონების გადასახადისგან, რისთვისაც 45 მილიონი ლარია განსაზღვრული.

ტურიზმის სექტორში (სასტუმროებში, რესტორნებსა და მსგავს საქმიანობაში ჩართული კომპანიები), 2020 წლის 1 დეკემბრამდე გადავადებული საშემოსავლო გადასახადი ჩამოიწერება, ამისთვის 20 მილიონი ლარია გამოყოფილი. მეტიც, გაგრძელდება სასტუმროების საბანკო სესხების პროცენტის სუბსიდირება; ამოქმედდება რესტორნების საბანკო სესხების პროცენტის სუბსიდირება ექვსი თვის განმავლობაში. ბენეფიციართა სავარაუდო რაოდენობაა  3700 კომპანია.

გარდა ამისა, მიმდინარეობს მეწარმეობის მიკრო გრანტების პროგრამა, რომელიც ათასობით ახალ ბიზნესპროექტს დააფინანსებს და ამისთვის 40 მილიონი ლარია გამოყოფილი.

2021 წელს, აქტიურად გაგრძელდება საკრედიტო-საგარანტიო ფონდის მუშაობა, რომელიც დაეხმარება კერძო სექტორს, როგორც არსებული სესხების რესტრუქტურიზებაში, ასევე, ახალი სახსრების მოზიდვაში. ამისთვის 100 მილიონი ლარია განსაზღვრული; საბანკო სესხების გადავადების შესაძლებლობა ექნებათ იმ კომპანიებს, რომლებსაც საქმიანობა 2020 წლის დეკემბერსა და 2021 წლის იანვარში შეეზღუდათ.

 

 მაია მიშელაძე

 

 

 

 

 

 

ბოლო დღეებში მედიის, პოლიტიკოსებისა და საზოგადოების ყურადღების ცენტრში ბიძინა ივანიშვილის პოლიტიკიდან წასვლაა. დიახ, მმართველი პარტია „ქართული ოცნების“ თავმჯდომარემ უკვე მეორედ დატოვა პარტიაცა და პოლიტიკაც, თუმცა როგორც თავად ახსნა, ამჯერად მისი გადაწყვეტილება საბოლოოა, რაც იმას ნიშნავს, რომ ისევ ბიზნესს დაუბრუნდა და პოლიტიკაში აღარ მობრუნდება. ამას მოწმობს უპრეცედენტო ფაქტი - მილიარდერმა ივანიშვილმა საკუთარი აქტივები, უფრო ზუსტად, თავისი ქონების 90% საერთაშორისო საქველმოქმედო ფონდ „ქართუში“ გადაიტანა, თავად კი 200 მილიონი აშშ დოლარიღა დაიტოვა.  

 

ფონდი „ქართუს“ შესახებ  

1995 წელს, ბიძინა ივანიშვილმა მეუღლესთან, ეკატერინე ხვედელიძესთან ერთად, არაკომერციული არასამეწარმეო იურიდიული პირი (ააიპ) საერთაშორისო საქველმოქმედო ფონდი „ქართუ“ დააფუძნა. სამწუხაროდ, ამ ფონდის ვებ-გვერდი უმოქმედოა, ყოველ შემთხვევაში, მთავარ გვერდზე მხოლოდ ფონდის ლოგოა განთავსებული, ამიტომ ქართულ „ვიკიპედიაზე“ დაყრდნობით, ვიგებთ, რომ ფონდ „ქართუს“ ერთადერთი დონორი ივანიშვილის ოჯახია.

საჯარო რეესტრის მონაცემებით, ფონდი „ქართუ“ რეგისტრაციაში 1999 წლის 31 აგვისტოს გატარდა. ფონდს დამფუძნებელთა საერთო კრება და გამგეობა მართავს. გამგეობის თავმჯდომარეა ნიკოლოზ ჩხეტიანი, რომელიც იმავდროულად, „ქართუ ბანკის“ სამეთვალყურეო საბჭოს თავმჯდომარეცაა. ფონდი „ქართუს“ წევრები არიან ნატო ხაინდრავა და კახა კობიაშვილი. ნატო ხაინდრავა „ქართუ ბანკის“ გენერალური დირექტორია. „ქართუ ბანკის“ 100%-იანი წილის მფლობელი კი ააიპ საერთაშორისო საქველმოქმედო ფონდი „ქართუა“.

2020 წლის თებერვალში, სააქციო საზოგადოება „ქართუ ჯგუფმა“ საკუთარი აუდიტორული ანგარიში გამოაქვეყნა და საზოგადოებამ ფონდი „ქართუს“ შესახებ დეტალური ინფორმაცია გააცნო. ამ ანგარიშით გაირკვა, რომ 25 წლის განმავლობაში, ფონდმა „ქართუმ“ საქართველოში განხორციელებულ საქველმოქმედო პროექტებში, 3 მილიარდ აშშ დოლარზე მეტი დახარჯა.

სწორედ ამ ანგარიშით ვიგებთ, რომ ფონდი „ქართუს“ დამფუძნებელია სააქციო საზოგადოება „ქართუ ჯგუფი“ და ფიზიკური პირი, დასავლეთ აფრიკული ქვეყნის, ბენინის (ფრანგულენოვანი რესპუბლიკა, რომელსაც 1975 წლამდე, დაჰომეა ერქვა) მოქალაქე, გბეგო ტოსა აოგნიბო ჟილბერი. 2017 წლის 31 დეკემბერს, ჟილბერმა ეს პოზიცია საკუთარი ნებით დატოვა.

რაც შეეხება სს „ქართუ ჯგუფს“, მისი მესაკუთრეები ოფშორულ ზონაში რეგისტრირებული კომპანიები არიან, კერძოდ: „კრისტა ინვესტმენტი“ _ 48.324%; „სარგანს ლიმიტედი“ – 45.353%; „ტარპანი“ – 1.092%; შპს „აგროსერვისი“ – 4.243%; შპს „ინტერ ინვესტი – 0.988 %. ჯგუფის საბოლოო ბენეფიციარი და მესაკუთრე, ბიძინა ივანიშვილის უფროსი ვაჟი, უტა ივანიშვილია.

ისევ საერთაშორისო საქველმოქმედო ფონდ „ქართუს“ დავუბრუნდეთ, საჯარო რეესტრის, „ქართუ ჯგუფის“ აუდიტორული ანგარიშისა და ქართული „ვიკიპედიის“ მიხედვით, ფონდის საქმიანობა რამდენიმე ძირითად სფეროს მოიცავს. კერძოდ, განათლებას, კულტურას, მათ შორის, სარესტავრაციო სამუშაოებს, ქართული სპორტის ხელშეწყობას, ინფრასტრუქტურული პროექტებისა და გარემოსდაცვითი ღონისძებების განხოციელებას.

საჯაროდ გაკეთებული განცხადებებით, ამჟამად, ფონდ „ქართუს“ ყველაზე ძვირადღირებულ პროექტად ქუთაისის საერთაშორისო უნივერსიტეტი ითვლება. ამავე უნივერსიტეტში უნდა გაერთიანდეს ადრონული თერაპიის ცენტრიც, რომელიც თავდაპირველი პროექტის მიხედვით, თბილისში უნდა შექმნილიყო. განათლების მინისტრ მიხეილ ჩხენკელის განცხადებით, ამ ცენტრში ორი ციკლოტრონი განთავსდება. ფონდი „ქართუ“ ამ ტექნოლოგიებს ფრანგული კომპანია IBA-სგან, 40 მილიონ ევროდ შეიძენს. ადრონული თერაპიის ცენტრის გახსნა 2024 წელს იგეგმება.

 

„ქართუს“ მასშტაბური პროექტები

სწორედ, ფონდ „ქართუს“ საშუალებით, ბიძინა ივანიშვილმა საქართველოში მრავალი პროექტი განახორციელა, რისთვისაც 3 მილიარდ დოლარზე მეტი დახარჯა.

ხელოვნება - კაპიტალური სარეკონსტრუქციო სამუშაოები ჩაუტარდა თბილისის შოთა რუსთაველის; ზ.ფალიაშვილის სახელობის ოპერისა და ბალეტის, კ.მარჯანიშვილის, მ.თუმანიშვილის სახელობის კინომსახიობთა, ა.გრიბოედოვის, ვ.აბაშიძის სახელობის მუსიკისა და დრამის, ნ.დუმბაძის სახელობის მოზარდ მაყურებელთა და რ.გაბრიაძის სახელობის მარიონეტების თეატრებს, თბილისის საკონცერტო დარბაზსა და ჯ.კახიძის სახელობის მუსიკალურ-კულტურულ ცენტრს. გარდა ამისა, ფონდმა განახორციელა ბათუმის, ზუგდიდის, ოზურგეთისა და თბილისის სომხური თეატრების რეაბილიტაცია; აღდგა ს.ჯანაშიას სახელობის ეროვნული მუზეუმი, გ.ბააზოვის სახელობის ებრაელთა მუზეუმი; ა.წერეთლის, ი.ჭავჭავაძის, ვ.მაიაკოვსკის სახელობის მუზეუმები. მეტიც, წლების განმავლობაში, ფონდი „ქართუ“ ახორციელებს ამ თეატრებისა და მუზეუმების პერსონალის ფინანსური მხარდაჭერის პროგრამასაც.

საერთაშორისო აუქციონებზე, ფონდმა შეიძინა ნიკო ფიროსმანაშვილის ფერწერული ტილოები და საჩუქრად გადასცა ეროვნულ მუზეუმს. დაარსების დღიდან, ფონდი „ქართუ“ მატერერიალურ დახმარებას უწევს საქართველოს ლიტერატურის, ხელოვნებისა და კულტურის გამოჩენილ მოღვაწეებს.

კულტურული მემკვიდრეობის დაცვა - ქვეყნის მასშტაბით, რეაბილიტაცია ჩაუტარდა კულტურული მემკვიდრეობის 700-ზე მეტ ძეგლს; ფონდის სახსრებით, თბილისში აშენდა სამების საკათედრო ტაძარი.

სპორტი - ქვეყნის მასშტაბით, ფონდი „ქართუს“ სახსრებით, 13 სარაგბო საწვრთნელი ბაზა და სტადიონი მოეწყო. მრავალი წლის განმავლობაში ფინანსდება სპორტის სხვადასხვა პოპულარული სახეობები: ჭიდაობა, ძიუდო, სამბო, ტაიკვანდო, კარატე, კრივი, ტანვარჯიში, ჭადრაკი, წყალბურთი, ხელბურთი, ჩოგბურთი, ფეხბურთი, ფარიკაობა და სროლა.

ფონდი მატერიალურ დახმარებას უწევს საქართველოს რაგბის კავშირსა და რაგბის ეროვნულ ნაკრებს. შესაბამისად, საქართველოში რაგბის განვითარებაში შეტანილი წვლილისთვის, რაგბის საერთაშორისო საბჭომ _ IRB, ბიძინა ივანიშვილი დააჯილდოვა კიდეც. ფონდი ფულად დახმარებას უწევს ქართველ ოლიმპიელ ჩემპიონებს, მსოფლიოსა და ევროპის ჩემპიონატების ოქროს მედალოსნებსა და ვეტერან სპორტსმენებს. 2015 წელს, ფონდის საშუალებით დაფინანსდა თბილისში, ახალგაზრდული ოლიმპიური ფესტივალის მოსამზადებელი სამუშაოები.

სოფლის მეურნეობა - 1992 წელს, ივანიშვილმა საქართველოს საჩუქრად გადასცა 400 ტრაქტორი სრული სახნავ-სათესი აღჭურვილობით. მომდევნო წლებში, „ქართუმ“ განახორციელა მასშტაბური პროექტი ქართული ადგილობრივი ჯიშების გადასარჩენად. ამ მიზნით, სოფლებში – ჯიღაურასა და წილკანში შექმნილმა აგრარულმა მეურნეობებმა, ქართული ვაზის 440 და ხეხილოვანი კულტურების ათეულობით ენდემური ჯიში ააღორძინა. მეტიც, საზღვარგარეთიდან შემოიტანეს ვაზისა და ხეხილის უცხოური, პერსპექტიული ჯიშები, მოხდა მათი აპრობირება ქვეყნის რეგიონებში და ადაპტირებული ჯიშები შესთავაზეს ადგილობრივ ფერმერებს. კერძოდ, ჯიღაურას ბაზის დახმარებით, შეიქმნა რამდენიმე სტანდარტული სანერგე მეურნეობა, რომლებმაც უსასყიდლოდ მიიღეს ნერგები, საძირე და საკვირტე მასალა.

ასევე, აღდგენილია და გენეტიკურ ბანკშია დაცული ერთწლოვანი კულტურების 100-მდე ჯიში-პოპულაცია. გამართულია ელიტური კარტოფილის სანერგე მასალის წარმოების სრული სისტემა. ამ ბაზებიდან სანერგე და სათესლე მასალა წლების განმავლობაში უსასყიდლოდ გადაეცემოდა ფერმერებს (სანერგე მეურნეობის მოწყობის მიზნით), ხოლო ასობით ტონა მოწეული ყურძენი, სხვადასხვა ხილი და ბოსტნეული – მოხუცებულთა და უპატრონო ბავშვთა სახლებს. 2013-2014 წლებში, ფონდმა დააფინანსა სოფლის გადარჩენის სახელმწიფო პროგრამა.

მედიცინა და ჯანმრთელობის დაცვა - საჩხერეში აშენდა თანამედროვე სამედიცინო ცენტრი, რომელიც გადაეცა სახელმწიფოს. დაბა ურეკსა და ხარაგაულის მუნიციპალიტეტის სოფელ ბორითში მოეწყო და აგრეთვე, სახელმწიფოს გადაეცა გადაუდებელი სამედიცინო დახმარების ცენტრები. ფონდის საშუალებით გარემონტდა და აპარატურით აღიჭურვა თბილისის რესპუბლიკური საავადმყოფო. საყოველთაო სახელმწიფო დაზღვევის ამოქმედებამდე, ფონდ „ქართუს“ მიერ, მრავალი წლის განმავლობაში, საჩხერის მუნიციპალიტეტის მოსახლეობის უფასო დაზღვევის პროგრამა მოქმედებდა, რომელშიც ჩართული იყო რეგიონის 50 000-ზე მეტი მაცხოვრებელი. ფონდის დაფინანსებით, ასეულობით ადამიანი გააგზავნეს საზღვარგარეთ, რთული ოპერაციების ჩასატარებლად.

ინფრასტრუქტურა - ფონდი „ქართუს“ მატერიალური დახმარებით დაიგო ასობით კილომეტრი საავტომობილო გზა; ქვეყნის მასშტაბით, განხორციელდა ინფრასტრუქტურული პროექტები; შეიქმნა საჩხერის მუნიციპალიტეტის ინფრასტრუქტურა, 12 652 საცხოვრებელი სახლი გადაიხურა და გარემონტდა, ხოლო ასეულობით აშენდა; მუნიციპალიტეტის სოფლების სრული გაზიფიცირებაც ფონდის სახსრებით განხორციელდა. ფონდი „ქართუს“ დაფინანსებით ხორციელდება საქართველოს ინტერნეტიზაციის დაჩქარების პროექტი, რომელის მიზანია ინტერნეტის ხელმისაწვდომობა მთელი ქვეყნის მოსახლეობისთვის. ფონდს სოლიდური წვლილი შეაქვს ქართული ჯარისა და პოლიციის რეფორმის დაფინანსებასა და შესაბამისი ინფრასტრუქტურის შექმნაში.

ტურიზმის ხელშეწყობა - აშენდა ბათუმის დელფინარიუმი; ზღვისპირა რეგიონში მოეწყო თემატური პარკები, მათ შორი ქართული ხუროთმოძღვრული ძეგლების მინიატიურების პარკი; გურიისა და აჭარის საზღვართან, ფონდმა ააშენა გასართობი ცენტრი „ციცინათელა“, ხოლო ბაკურიანში – ახალი სათხილამურო კომპლექსი „დიდველი“; გურიის რეგიონში აშენდა და შემდეგ სახელმწიფოს გადაეცა ულტრათანამედროვე საკონცერტო დარბაზი „ბლექსი არენა“ (BSA), რომელიც გათვლილია 10 000 მაყურებელზე.  

ეკოლოგია - ფონდის პროგრამებით შენარჩუნდა და აღორძინდა რამდენიმე ბოტანიკური ბაღი; რეაბილიტაცია ჩაუტარდა ლაგოდეხის, ვაშლოვნისა და თუშეთის ეროვნული პარკების ინფრასტრუქტურას; კეთილმოეწყო ბუნების ძეგლი – ყუმისთავის მღვიმე.

მეცნიერება და განათლება – ფონდის დაფინანსებით აშენდა, კაპიტალურად შეკეთდა და კომპიუტერებით აღიჭურვა ასობით საჯარო სკოლა. გარემონტდა და ტექნიკურად აღიჭურვა თსუ-ის პირველი კორპუსი; თბილისის სახელმწიფო კონსერვატორია; სამხატვრო აკადემიის სასწავლო კორპუსი; პარლამენტის ეროვნული ბიბლიოთეკის მესამე კორპუსი;  თბილისში ფრანგული სკოლაც ფონდი „ქართუს“ დახმარებით დაარსდა. „ქართუ“ ფინანსურ დახმარებას უწევს საქართველოს მეცნიერებათა ეროვნულ აკადემიას.

2016 წელს, ფონდმა დაიწყო ახალი მასშტაბური სამეცნიერო-საგანმანათლებლო პროექტი – ქუთაისის საუნივერსიტეტო ქალაქის მშენებლობა. გეგმის მიხედვით, ქუთაისში შენდება 50 000 სტუდენტზე გათვლილი, თანამედროვე ტექნიკით აღჭურვილი, მაღალი საერთაშორისო სტანდარტების მრავალპროფილიანი უნივერსიტეტი. ფონდის დაფინანსებით, ეს მეგაპროექტი ითვალისწინებს სამეცნიერო-კვლევითი ცენტრისა და ადრონული ამაჩქარებლის აგებას. მრავალმხრივი დანიშნულების ცენტრი განახორციელებს სასწავლო-საგანმანათლებლო საქმიანობას, ასევე, ფუნდამენტურ და გამოყენებით სამეცნიერო კვლევებს შემდეგი მიმართულებებით: ფიზიკა, ბიოლოგია, ქიმია, ინჟინერია, კომპიუტერული მეცნიერებები, მედიცინა. სამეცნიერო-ტექნიკური ცენტრი აღჭურვილი იქნება ულტრათანამედროვე ლაბორატორიებით, მათ შორის, კრისტალების ცენტრით, ბიოფიზიკის, იზოტოპების, დაბალი ტემპერატურის ლაბორატორიებით. ცენტრს ასევე ექნება მნიშვნელოვანი სამედიცინო პოტენციალი – მის ბაზაზე, ადრონული თერაპიის მეშვეობით, შესაძლებელი გახდება მძიმე ონკოლოგიური დაავადების მქონე პაციენტების მკურნალობა.

 

მაია მიშელაძე

 

 

Sign up via our free email subscription service to receive notifications when new information is available.
Advertisement