დედაქალაქი

ქ. თბილისის მუნიციპალიტეტის სამგორის რაიონის გამგეობის განათლების, კულტურის, სპორტისა და ახალგაზრდობის განყოფილება ხუთდღიან ახალგაზრდულ ბანაკში მიღებას აცხადებს.

პროექტის ფარგლებში, ახალგაზრდებს შეეძლებათ, არაფორმალური განათლების მიმართულებით აიმაღლონ ცოდნა, აღმოაჩინონ და განავითარონ სხვადასხვა თეორიული და პრაქტიკული უნარები აქტიურ სამოქალაქო ცხოვრებაში ჩასართველად, ასევე, განავითარონ ლიდერული და გუნდური მუშაობისათვის საჭირო თვისებები.
 _ღონისძიება სამცხე-ჯავახეთში ინტერაქციულ ფორმატში გაიმართება, რაც ტრენინგ პროგრამაში მონაწილეობას მოიცავს.
  _ბანაკის თემატური მიმართულებებია:
  _ლიდერობა;
  _გუნდურობა;
  _გუნდის მშენებლობა;
 _ეფექტური კომუნიკაციისთვის საჭირო უნარ-ჩვევების დახვეწა;
_ მონაწილეობის მსურველები აპლიკაციის შევსებას 28 სექტემბრის ჩათვლით შეძლებენ ბმულზე: https://shorturl.at/mnxV4
 

ასევე, ბანაკის ფარგლებში იგეგმება სხვადასხვა ტიპის ინტერაქციული/გასართობი აქტივობა, რაც მონაწილეებს საშუალებას მისცემს, გუნდური მუშაობის პრინციპით უკეთ გაიცნონ ერთმანეთი.

 ახალგაზრდული ბანაკი გაიმართება 6-დან 10 ოქტომბრის ჩათვლით;
 

მინიმალური მოთხოვნები მონაწილეებისათვის:
 _მონაწილეთა ასაკი : 16-დან 20 წლის ჩათვლით
 _მონაწილეობის მსურველი რეგისტრირებული უნდა იყოს სამგორის რაიონში
_მონაწილეობის მსურველმა აუცილებლად უნდა შეავსოს აპლიკაცია სრულყოფილად,
_უნდა იყოს აქტიური, ენერგიული და კრეატიული

  აპლიკაციის შევსების შემდეგ, მონაწილეობის მსურველ ახალგაზრდებთან გაიმართება გასაუბრება, რომლის საფუძველზეც შეირჩევიან მონაწილეები.
  _ახალგაზრდულ ბანაკში მონაწილეობა უფასოა
  _მონაწილეთა მგზავრობას, სასტუმროში განთავსებასა და კვებას სამგორის გამგეობა უზრუნველყოფს.

დედაქალაქის მერის, კახა კალაძის განცხადებით, მუნიციპალიტეტმა მოამზადა კანონპროექტი, რომელიც ითვალისწინებს კულტურული მემკვიდრეობის დამცავ ზონებში მშენებარე ობიექტების კონსერვაციის წესის დარღვევით მიტოვებისთვის ჯარიმების გაზრდას.

როგორც მან თბილისის მუნიციპალიტეტის მთავრობის სხდომაზე აღნიშნა, უნებართვო ან სანებართვო პირობების დარღვევით ნაწარმოები მშენებლობები დიდ პრობლემას წარმოადგენს, განსაკუთრებით კულტურული მემკვიდრეობის დამცავ ზონებში.

„წინა მთავრობის სხდომაზე ვისაუბრე უნებართვო ან სანებართვო პირობების დარღვევით ნაწარმოებ მშენებლობებთან დაკავშირებით და მაშინ ვთქვი, რომ კიდევ უფრო მეტი პრევენციისთვის ჯარიმების გაზრდის ინიციატივით მივმართავდით პარლამენტს. არის შემთხვევები, როცა კონკრეტული პირები იღებენ მშენებლობის ნებართვას, იწყებენ მშენებლობას, თუმცა შემდგომ გარკვეული მიზეზების გამო ვერ აგრძელებენ სამშენებლო პროცესს. ასეთი ობიექტები იერსახის თვალსაზრისითაც ძალიან ცუდია და ირგვლივ მცხოვრები ადამიანებისთვისაც დიდ დისკომფორტს წარმოადგენს. შესაბამისად, გვინდა, რომ ეს ყველაფერი დავარეგულიროთ, მოვაწესრიგოთ. კონსერვაციას აქვს თავისი წესები“, – განაცხადა დედაქალაქის მერმა.

ამასთან, კახა კალაძემ წარმოადგინა ისეთი მშენებლობების ფოტომასალა, სადაც კონსერვაციის წესები ნაწილობრივ ან საერთოდ არაა დაცული.

მისივე თქმით, კანონპროექტი ითვალისწინებს სანქციების გამკაცრებას. კერძოდ, I და II კლასის შენობა-ნაგებობის მშენებლობისას ჯარიმა 5 000 ლარის ნაცვლად, იქნება 15 000 ლარი; III და IV კლასის შენობა-ნაგებობის მშენებლობისას ჯარიმა 20 000 ლარის ნაცვლად, იქნება 100 000 ლარი.

„აღნიშნულიდან გამომდინარე, ვფიქრობთ, რომ ამ მიმართულებითაც საჭიროა სანქციების გამკაცრება. შესაბამისად, მოვამზადეთ კანონპროექტი, რომელიც ითვალისწინებს კულტურული მემკვიდრეობის დამცავ ზონებში მშენებარე ობიექტების კონსერვაციის წესის დარღვევით მიტოვებისთვის ჯარიმების გაზრდას – I და II კლასის შემთხვევაში 3-ჯერ, ხოლო III და IV კლასის შემთხვევაში 5-ჯერ. კერძოდ, კანონპროექტის მიხედვით: კულტურული მემკვიდრეობის დამცავ ზონაში მშენებლობის ექვს თვეზე მეტი ვადით კონსერვაციის წესის დარღვევით შეჩერება: – I და II კლასის შენობა-ნაგებობის მშენებლობისას ჯარიმა 5 000 ლარის ნაცვლად, იქნება 15 000 ლარი; – III და IV კლასის შენობა-ნაგებობის მშენებლობისას ჯარიმა 20 000 ლარის ნაცვლად, იქნება 100 000 ლარი. ჩვენ ამ კანონპროექტსაც გადავუგზავნით პარლამენტს და დიდი იმედი გვაქვს, ისინი აღნიშნულ ინიციატივას მხარს დაუჭერენ. პროექტის მიზანი, კიდევ ერთხელ აღვნიშნავ, კულტურული მემკვიდრეობის დამცავ ზონებში უკანონო მშენებლობების მაქსიმალურად აღკვეთა, ხელის შეშლა და მისი სახით, ერთგვარი პრევენციული მექანიზმის შემოღებაა“, – აღნიშნა თბილისის მერმა.

ჭაბუა ამირეჯიბის გზატკეცილზე არსებულ კლდოვან ფერდობზე ქვათაცვენის საწინააღმდეგო ბადის მოწყობა გრძელდება, – ამის შესახებ ინფორმაციას თბილისის მერია ავრცელებს.

მათივე ცნობით, მიმდინარე სამუშაოების გამო 20 სექტემბრიდან 30 ნოემბრის ჩათვლით 23:00-დან 06:00 საათამდე პერიოდში ჭაბუა ამირეჯიბისა და ქაქუცა ჩოლოყაშვილის გზატკეცილების კვეთიდან მიხეილ თამარაშვილის ქუჩამდე არსებულ საგზაო მონაკვეთში ავტომობილების გადაადგილება შეიზღუდება.

„შეზღუდვის პერიოდში ავტომობილები გადაადგილებას შეძლებენ ქაქუცა ჩოლოყაშვილის გზატკეცილის, სულხან ცინცაძისა და მიხეილ თამარაშვილის
ქუჩების გამოყენებით. თბილისის მერია ბოდიშს გიხდით შექმნილი დისკომფორტისთვის“, – აღნიშნულია მერიის ინფორმაციაში.

დედაქალაქის მერი კახა კალაძე საქართველოს ყოფილი პრემიერ-მინისტრის, ბიძინა ივანიშვილის პოლიტიკაში შესაძლო დაბრუნების შესახებ გავრცელებულ ინფორმაციას სიცრუეს უწოდებს. მისი თქმით, ბიძინა ივანიშვილს დღეს ქართულ პოლიტიკასთან არანაირი კავშირი არ აქვს და ის ქვეყნის მასშტაბით, საქველმოქმედო საქმიანობით არის დაკავებული.

„როდესაც გინდათ, ამბობთ, რომ ივანიშვილი პოლიტიკაშია და პოლიტიკურ პროცესებს მართავს. ხოლო, როდესაც გაწყობთ, ამბობთ, რომ ის შეიძლება პოლიტიკაში დაბრუნდეს. ამ ადამიანმა მაშინ, როდესაც საჭირო იყო, გააკეთა განცხადება პოლიტიკიდან წასვლასთან დაკავშირებით. მას შემდეგ, მას არანაირი კავშირი არ აქვს ქართულ პოლიტიკასთან.

რა თქმა უნდა, ივანიშვილი სარგებლობს ძალიან დიდი ავტორიტეტით ჩვენი ქვეყნის მოსახლეობაში იმიტომ, რომ უამრავი კეთილი საქმე აქვს გაკეთებული ქველმოქმედების სახით. დღესაც, რა თქმა უნდა, მთელი საქართველოს მასშტაბით გრძელდება მსგავსი პროექტები, რომელსაც ბიძინა ივანიშვილის ოჯახი და  „ქართუ ფონდი“ ახორციელებს. შესაბამისად, განცხადებები იმასთან დაკავშირებით, რომ ბიძინა ივანიშვილი პოლიტიკაში დაბრუნებას აპირებს, არის ძალიან დიდი სიცრუე“, - განაცხადა კახა კალაძემ. 

სახალხო დღესასწაული „თბილისობა 2023“, 30 სექტემბერს და 1-ელ ოქტომბერს გაიმართება. როგორც დედაქალაქის მერმა, კახა კალაძემ თბილისის მუნიციპალიტეტის მთავრობის სხდომაზე აღნიშნა, ორი დღის განმავლობაში სხვადასხვა კულტურულ-გასართობი ღონისძიება გაიმართება, 30 სექტემბერს, 20:00 საათზე კი თბილისის საპატიო მოქალაქეებს დააჯილდოებენ.

„ტრადიციულად, წელსაც დედაქალაქი „თბილისობას“ აღნიშნავს. 30 სექტემბერს და 1-ელ ოქტომბერს რიყის პარკში, აბანოთუბანში და ორბელიანის მოედანზე, 12:00-დან 22:00 საათამდე სხვადასხვა კულტურული და გასართობი ღონისძიება გაიმართება. 30 სექტემბერს, 20:00 საათზე კი სახელმწიფო ცერემონიების სასახლეში გაიმართება თბილისის საპატიო მოქალაქეების დაჯილდოების ცერემონია, რომლის ოფიციალური ნაწილის დასრულებისთანავე დაიწყება საზეიმო კონცერტი. ღონისძიება პირდაპირ ეთერში გადაიცემა“, - აღნიშნა კახა კალაძემ.

მისივე თქმით, უახლოეს დღეებში მუნიციპალიტეტი საზოგადოებას მიაწვდის დეტალურ ინფორმაციას „თბილისობის“ პროგრამასთან დაკავშირებით.

„რამდენიმე დღეში თბილისელებს და დედაქალაქის სტუმრებს გავაცნობთ უფრო დეტალურ ორდღიან პროგრამას, სად რა კონცერტი გაიმართება. ბევრ სტუმარს ველოდებით. ვიცი, რომ ბევრი თბილისელი და ასევე, რეგიონებში მცხოვრებლები ელოდებიან „თბილისობის“ დღესასწაულს. წელსაც გვექნება შესაძლებლობა, ერთად ვიზეიმოთ ჩვენი ქალაქის დღე“, - განაცხადა კახა კალაძემ.

თბილისის მერი კახა კალაძე მის მოადგილესთან კახაბერ გულედანთან და საბავშვო ბაგა-ბაღების მართვის სააგენტოს ხელმძღვანელ გოგი ჩიქოვანთან ერთად, სამგორის თბილისის მერი კახა კალაძე მის მოადგილესთან კახაბერ გულედანთან და საბავშვო ბაგა-ბაღების მართვის სააგენტოს ხელმძღვანელ გოგი ჩიქოვანთან ერთად, სამგორის რაიონში, N130 საბავშვო ბაგა-ბაღის ახალი შენობის გახსნის ღონისძიებას დაესწრო და ბაღის აღსაზრდელებს ახალი სააღმზრდელო წლის დაწყება მიულოცა.

„თბილსერვის ჯგუფის“ პროფესიულ დღესთან დაკავშირებით დედაქალაქის მერი კახა კალაძე კომპანიის თანამშრომლებს შეხვდა და მადლობის სიგელები გადასცა. ინფორმაციას თბილისის მერია ავრცელებს.

დაჯილდოების ცერემონიაში ასევე მონაწილეობდნენ თბილისის მერის მოადგილე ანდრია ბასილაია და „თბილსერვის ჯგუფის“ დირექტორი დავით ფაჩულია.

კახა კალაძემ თანამშრომლებს სიტყვით მიმართა და ხაზი გაუსვა მათი სამუშაო პირობების გაუმჯობესების, მათ შორის, შესაბამისი ტექნიკით უზრუნველყოფის საკითხს.

თბილისის მერის თქმით, ქალაქს ბოლო ორი წლის განმავლობაში სხვადასხვა ტიპისა და წარმოების 104 ახალი სპეცმანქანა შეემატა, აქედან 23 ერთეული მიმდინარე წელს იქნა შემოყვანილი.

„მადლობა, მინდა, გითხრათ თითოეულ თქვენგანს იმისთვის, რასაც აკეთებთ დედაქალაქისთვის. 20 სექტემბერს 16 წელი გავიდა, რაც „თბილსერვის ჯგუფი“ დაარსდა. ჩვენი ქალაქი რომ ასეთი სუფთა, მოწესრიგებული და განათებულია, თქვენი დამსახურებაა. ჩვენი მხრივ, ვცდილობთ, ხელი შეგიწყოთ, შეგიმსუბუქოთ მუშაობა ტექნიკით, აღჭურვილობით. ბოლო ორი წლის განმავლობაში 104 ერთეული ტექნიკა შევისყიდეთ. განვაგრძობთ შესყიდვებს იმისთვის, რომ „თბილსერვის ჯგუფი“ იყოს აღჭურვილი. წარმატებებს გისურვებთ თქვენს საქმიანობაში ჩვენი ქალაქის საკეთილდღეოდ“, – განაცხადა კახა კალაძემ.

სიგელები გადაეცა დასუფთავების დეპარტამენტის, გარე განათების, სანიაღვრე ქსელების, საგზაო მონიშვნებისა და სხვა სამსახურების 101 თანამშრომელს.

ინფორმაციას თბილისის მერიის პრესსამსახური ავრცელებს.

თბილისის მერიის „გაფანტული სკლეროზის სამკურნალო მედიკამენტების და კვლევების დაფინანსების“ პროგრამა ფართოვდება, - ამის შესახებ თბილისის მერმა კახა კალაძემ დედაქალაქის მთავრობის დღევანდელ სხდომაზე განაცხადა.

„გაცნობებთ, რომ თბილისის მერიის „გაფანტული სკლეროზის სამკურნალო მედიკამენტების და კვლევების დაფინანსების“ პროგრამა ფართოვდება. პროგრამის ფარგლებში, ძვირადღირებული სამკურნალო მედიკამენტები სოციალურად დაუცველთა ბაზაში მყოფი მოქალაქეების მსგავსად, პროგრამის ყველა მოსარგებლეს, სოციალური სტატუსის მიუხედავად, 100%-ით დაუფინანსდება.

ჯანდაცვისა და სოციალური მომსახურების საქალაქო სამსახური, აღნიშნულ ცვლილებამდე, პროგრამით გათვალისწინებულ მომსახურებას სოციალურად დაუცველის სტატუსის არმქონე პირებს 80%-ით უფინანსებდა, ხოლო სოციალურად დაუცველი ოჯახების მონაცემთა ერთიან ბაზაში რეგისტრირებულ პირებს, რომელთა სარეიტინგო ქულა არ აღემატება 150 000-ს, სრულად, 100%-ით.

მერიამ ეს გადაწყვეტილება გაფანტული სკლეროზის დიაგნოზის მქონე პირთა და მათი ოჯახების ფინანსური მხარდაჭერის მიზნით მიიღო, რადგან დარჩენილი 20% მათთვის მნიშვნელოვანი ფინანსური ტვირთი იყო. თბილისის მერიამ „გაფანტული სკლეროზის სამკურნალო მედიკამენტების“ პროგრამა 2021 წელს დაიწყო და თავდაპირველად ორი სახეობის ძვირადღირებული მედიკამენტი ფინანსდებოდა. 2022 წელს კი, მედიკამენტებს თავის ტვინის ან/და ხერხემლის და ზურგის ტვინის მაგნიტორეზონანსული ტომოგრაფიის დაფინანსება დაემატა.

პროგრამის მოსარგებლეები 15-დან 60 წლის ასაკის ჩათვლით საქართველოს მოქალაქეები არიან და ერთი მოქალაქის მედიკამენტების და მაღალტექნოლოგიური კვლევების დასაფინანსებლად, წელიწადში 25 ათას ლარამდე თანხა არის გათვალისწინებული. პროგრამის ბიუჯეტი 2 676 500 ლარს შეადგენს“, - განაცხადა თბილისის მერმა.

დედაქალაქის მერმა, კახა კალაძემ ჩქაროსნულ ავტომაგისტრალზე, კერძოდ, გორის მიმდებარედ დამონტაჟებული ელექტროდამტენების სადგური პირადად შეამოწმა. კახა კალაძის განცხადებით, 20 ელექტროდამტენი ჩქაროსნულ ავტომაგისტრალზე, ოთხ ადგილზე თბილისის მერიის ინიციატივით „ვისოლ ჯგუფმა“ დაამონტაჟა.

„ძალიან მიხარია, რომ ასეთი მაგარი პროექტები ხორციელდება. მიხარია იმიტომაც, რომ ჩვენ ვიყავით ადამიანები, რომლებმაც დავიწყეთ ამ მიმართულების პოპულარიზაცია და ხელშეწყობა. უკეთესია, რაც მეტი ელექტრომობილი იქნება ქვეყანაში, დედაქალაქში, სადაც 600 000-ზე მეტი ავტომობილი გადაადგილდება პიკის საათებში, რაც ძალიან მძიმეა ქალაქისთვის გამონაბოლქვის, ეკოლოგიური მდგომარეობის თვალსაზრისით. ამ ფონზე უფრო მეტი ელექტრომობილის შემოყვანის ხელშეწყობა მნიშვნელოვანია. რა თქმა უნდა, როდესაც ადამიანი ფიქრობს, იყიდოს თუ არა ელექტრომობილი, პირველ რიგში, უყურებს ინფრასტრუქტურას, თუ სად დატენის ავტომობილს, რაც ძალიან დიდი პრობლემა იყო წლების განმავლობაში. დღეს თბილისში უკვე 80-მდე ელექტროდამტენი გვაქვს დამონტაჟებული. გავცდით თბილისის ფარგლებსაც. ახლა გორში ვიმყოფებით, სადაც „ვისოლის“ ბენზინგასამართი სადგურის მიმდებარედ დავამონტაჟეთ სწრაფი დამტენები. სწრაფი დამტენები ასევე ხელმისაწვდომია თერჯოლაში, ბორჯომში, თუმცა ამაზე არ ვჩერდებით. გვინდა, მთელი ქვეყნის მასშტაბით რაც შეიძლება მეტი ასეთი პროექტი განვახორციელოთ. ასევე, ვგეგმავთ, დედაქალაქში გამოვყოთ კონკრეტული სივრცეები, სადაც შესაძლებელი იქნება ასეთი თანამედროვე სადგურების მოწყობა, კაფეებით. მინდა, მადლობა გადავუხადო „ვისოლ ჯგუფს“ თანამშრომლობისთვის. ეს კონკრეტული პროექტი მათთან ერთად განვახორციელეთ. ვაგრძელებთ მუშაობას ამ მიმართულებით“, – განაცხადა კახა კალაძემ.

თბილისის მერიის ინფორმაციით, ელექტროდამტენების სადგურები ასევე მოწყობილია და ფუნქციონირებს ჩქაროსნული ავტომაგისტრალის თერჯოლა-ზესტაფონის მონაკვეთზე, გზის ორივე მხარეს, და ქალაქ ბორჯომის ტერიტორიაზე, ბორჯომი-ბაკურიანი-ახალციხის მიმართულებით.

ვარკეთილი 3-ში, ჩხენკელის ქუჩის l შესახვევში, საგზაო ინფრასტრუქტურა მოეწყო.

პროექტის ფარგლებში, 1 800 კვ. მ ფართობის ასფალტის საფარი დაიგო. პროექტისთვის რაიონის ბიუჯეტიდან 147 987 ლარი გამოიყო.

სამუშაოებს სამგორის რაიონის გამგებელი კახა სამხარაძე, მოადგილე სოსო ბურდულაძესთან ერთად ადგილზე გაეცნო.

სამგორის რაიონს შემოდგომაზე ორი ახალი საბავშვო ბაღი შეემატება. დასრულებული და მიმდინარე პროექტები დღეს თბილისის მერის მოადგილემ კახა გულედანმა თბილისის საბავშვო ბაგა-ბაღების მართვის სააგენტოს ხელმძღვანელ გოგი ჩიქოვანთან ერთად დაათვალიერა.

ვარკეთილის დასახლებაში, რუსთაველის ქუჩაზე მდებარე N130 საბავშვო ბაგა-ბაღი 18 სექტემბერს გაიხსნება და ის 250-ზე მეტ აღსაზრდელს მიიღებს. შენობა აღჭურვილია თანამედროვე სტანდარტების შესაბამისად. გათვალისწინებულია ბავშვთა უსაფრთხოების საერთაშორისო და ადგილობრივი კანონმდებლობით დადგენილი ნორმები, მათ შორის სახანძრო უსაფრთხოება, ვიდეოსამეთვალყურეო სისტემები. ამასთან, სამზარეულო ბლოკი აღჭურვილია HACCP-ის სტანდარტების შესაბამისად. ბაღის ეზოში მოწყობილია სათამაშო მოედნები და თანამედროვე ატრაქციონები, დამონტაჟებულია მზის ენერგიაზე მომუშავე გარე-განათების სისტემა.
მერის მოადგილე აფრიკის დასახლებაში, ბ. ჭიჭინაძის ქუჩაზე აშენებული ახალი საბავშვო ბაღის მშენებლობის მიმდინარეობასაც გაეცნო. 15-ჯგუფიანი ბაღის ექსპლუატაციაში მიღება ნოემბრის ბოლოსთვის იგეგმება.

„ორი მასშტაბური ინფრასტრუქტურული პროექტი სამგორის რაიონში, ფაქტობრივად, დასრულებულია. N130 საბავშვო ბაღი აღსაზრდელებს 18 სექტემბერს, ახალ სააღმზრდელო წლის დასაწყისში, საზეიმო ვითარებაში მიიღებს. ბავშვებს დახვდებათ ულამაზესი და უსაფრთხო გარემო, კეთილმოწყობილი ჯგუფები, სათამაშო მოედნები, ატრაქციონები. კიდევ ერთი, 15-ჯგუფიანი საბავშვო ბაღის მშენებლობა კი ნოემბერში დასრულდება და წლის ბოლომდე სამგორის რაიონს კიდევ ერთი ახალი, თანამედროვე საბავშვო ბაღი შეემატება,“ - განაცხადა თბილისის საბავშვო ბაგა-ბაღების მართვის სააგენტოს ხელმძღვანელმა გოგი ჩიქოვანმა.
თბილისის მერის მოადგილესთან ერთად, ბაღების სააგენტოს პროექტებს რაიონის გამგებელი კახა სამხარაძე, ასევე, პარლამენტისა და საკრებულოს მაჟორიტარი დეპუტატები, სოზარ სუბარი და რევაზ სოხაძეც გაეცნენ.