დედაქალაქი

ვარკეთილის დასახლებაში, ჯავახეთისა და კუპრაძის ქუჩებზე გარე განათების ახალი ქსელი მოეწყო. პროექტის ფარგლებში, 58 ერთეული 12-მეტრიანი მრავალსანათიანი საყრდენი ბოძი და 696 ცალი პროჟექტორი დამონტაჟდა; ქსელის სიგრძე 3 200 მეტრია.
განათების ახალი სისტემა შპს „თბილსერვის ჯგუფის“ დირექტორმა დავით ფაჩულიამ საკრებულოს სამგორის რაიონის მაჟორიტარ დეპუტატთან, რევაზ სოხაძესთან ერთად დაათვალიერა.
„ვარკეთილში ე.წ. ბაბლთაურების მოწყობის პირველი ეტაპი დავასრულეთ, რამაც სრულიად შეცვალა ამ ქუჩების იერსახე. სამომავლოდ მეორე ეტაპს დავიწყებთ, რომლის ფარგლებშიც კუპრაძის ქუჩის ბოლომდე და ზედგენიძის ქუჩაზე კიდევ 40-მდე ასეთივე განათების ბოძი დამონტაჟდება“, - აღნიშნა დავით ფაჩულიამ.
პროექტის პირველი ეტაპის ღირებულება 799 578 ლარს შეადგენს. სამუშაოები თბილისის მერიის ინფრასტრუქტურის განვითარების საქალაქო სამსახურის დავალებით, „თბილსერვის ჯგუფის“ თანამშრომლებმა შეასრულეს.

1 სექტემბრიდან მოტოციკლებს თბილისის BUSLane-ებში გადაადგილება შეეძლებათ. დადგენილება დედაქალაქის საკრებულომ დღეს, 16 აგვისტოს, მიიღო.

თბილისის მერია მიიჩნევს, რომ მოტოციკლების და მოპედების საავტობუსო ზოლებში გადაადგილებით შემცირდება საგზაო შემთხვევების რაოდენობა და ამის მაგალითად ავსტრია და ესპანეთი მოჰყავს.

„ერთ-ერთი მნიშვნელოვანი მიზეზი არის ის გარემოება, რომ საგზაო მოძრაობის სხვა მონაწილეებისთვის უფრო მარტივი ხდება მოტოციკლების და მოპედების დანახვა, რაც მკვეთრად ამცირებს საგზაო შემთხვევებს“, - მისწერა მერიამ საკრებულოს.

თბილისის საკრებულოს დადგენილების თანახმად:

• 1 სექტემბრიდან ორთვლიან მოტოციკლებსა და მოპედებს საავტობუსო ზოლში გადაადგილება შეეძლებათ დღე-ღამის მონაკვეთში;
• კვლავ აკრძალული იქნება მოტოციკლებისა და მოპედების გადაადგილება იმ საავტობუსო ზოლებში, სადაც საზოგადოებრივი ტრანსპორტი მოძრაობის საპირისპირო მიმართულებით გადაადგილდება (მაგალითად, ჭავჭავაძის გამზირი).

თბილისში მოტოციკლებისა და მოპედებისთვის განსხვავებული გადაადგილების წესების დადგენის უფლება პარლამენტმა საკრებულოს 19 ივლისს მისცა.

სამგორის რაიონში, ბოგდან ხმელნიცკის მე-5 შესახვევში, N2 კორპუსის მიმდებარედ გზის საფარის მოწყობის სამუშაოები აქტიურ რეჟიმში მიმდინარეობს .
პროექტის ფარგლებში, 900 კვ. მ ფართობი კეთილმოეწყობა, რისთვისაც გამგეობის ბიუჯეტიდან, დაახლოებით, 55 000 ლარია გამოყოფილი.
მიმდინარე საგზაო სამუშაოებს სამგორის რაიონის გამგებლის
მოადგილე სოსო ბურდულაძე ადგილზე გაეცნო.

„ჯორჯიან უოთერ ენდ ფაუერი“ წყალმომარაგების ქსელის სისტემური გაუმჯობესების მიზნით სამგორის რაიონში, მამისაშვილის ქუჩაზე წყალარინების ქსელს აახლებს.

„ჯივიპის“ ინფორმაციით, რეაბილიტაციის ფარგლებში იცვლება 1 კილომეტრზე მეტი სიგრძის მოძველებული წყალარინების მაგისტრალური ქსელი, ახალ ქსელზე 22 წყალარინების ჭა დამონტაჟდება. პროექტში კომპანია 900 000 ლარამდე ინვესტიციას ახორციელებს.

„ჯივიპი“ აქტიურად აგრძელებს მოძველებული ქსელების შეცვლა-განახლებას, ახლა ჩვენ ვიმყოფებით სამგორის რაიონში, მამისაშვილის ქუჩაზე, სადაც უკვე ხუთი თვეა წყალარინების მოძველებული ქსელის შესაცვლელად მასშტაბური რეაბილიტაცია მიმდინარეობს. აღნიშნული ქსელი იყო ამორტიზირებული და მოსახლეობას ხშირად უქმნიდა დისკომფორტს. პროექტი დასრულების ეტაპზეა, შეიცვლება 1 კილომეტრზე მეტი სიგრძის წყალარინების ქსელი, რის შემდეგაც სამგორის რაიონში მამისაშვილის ქუჩისა და მიმდებარე ქუჩების მოსახლეობას მნიშვნელოვნად გაუუმჯობესდება მომსახურება”, - განაცხადა „ჯივიპის“ აქტივების მართვის დირექტორმა, გიგა ნადირაძემ.

კომპანიის ცნობით, მამისაშვილის ქუჩაზე მიმდინარე სარეაბილიტაციო სამუშაოები სექტემბრის ბოლოს დასრულდება.

მათივე განმარტებით, წყალმომარაგებისა და წყალარინების ინფრასტრუქტურის განახლება და განვითარება „ჯივიპის“ ერთ-ერთი პრიორიტეტული მიმართულებაა. სარეაბილიტაციო სამუშაოებს კომპანია ყოველწლიურად, გეგმის მიხედვით, აქტიურად რეჟიმში განახორციელებს.

თბილისის მერიის ინფორმაციით სამგორის რაიონში, კახეთის გზატკეცილზე, ჯავახეთის ქუჩის მიმდებარედ არსებული ხიდის სადეფორმაციო ნაკერების რეაბილიტაცია იწყება.

„დაგეგმილი სამუშაოების გამო, 15 აგვისტოს 23:00 საათიდან, ათი დღის განმავლობაში, ჯავახეთის ქუჩის მიმდებარედ არსებულ ხიდზე, ქალაქში შემომსვლელი ტრანსპორტისთვის გადაადგილება ნაწილობრივ შეიზღუდება.

აღსანიშნავია, რომ შეზღუდვის პერიოდში, მოძრაობის სქემა არ შეიცვლება.

თბილისის მერია ბოდიშს გიხდით შექმნილი დისკომფორტისთვის!“, - ნათქვამია თბილისის მერიის მიერ გავრცელებულ ინფორმაციაში.

საბურთალოს რაიონში, მდინარე დიღმურას ხიდზე მძიმეწონიანი ავტოტრანსპორტის გადაადგილება დროებით შეიზღუდება. ამის შესახებ ინფორმაცის თბილისის მერიის პრესსამსახური ავრცელებს.

თბილისის მერიის ინფრასტრუქტურის განვითარების საქალაქო სამსახურმა მონიტორინგი განახორციელა და სპეციალისტების რეკომენდაციით, დიღმურას ხიდ-გზაგამტარზე, ამ ეტაპზე, მძიმეწონიანი ავტომობილების მოძრაობა მიზანშეწონილი არ არის.

უსაფრთხოების მიზნით, 6 აგვისტოდან აღნიშნულ ტერიტორიაზე საზოგადოებრივი ტრანსპორტის გადაადგილების სქემა შეიცვლება. კერძოდ, N367 ავტობუსი სოფელი დიღმიდან დიდუბის მიმართულებით მოძრაობისას, დავით აღმაშენებლის ქუჩიდან დაუკავშირდება მარშალ გელოვანის გამზირს, მარჯვნივ მოხვევით იმოძრავებს პეტრე სარაჯიშვილის ქუჩისკენ, საიდანაც კვლავ გელოვანის გამზირზე გადავა და შემდეგ დადგენილი სქემით იმოძრავებს.

რაც შეეხება N327 და N389 ავტობუსებს, რომლებიც ვაშლიჯვრის მიმართულებით გადაადგილდებიან, მდინარე დიღმურას ხიდის ნაცვლად, გელოვანის გამზირიდან მოძრაობას გააგრძელებენ და მარჯვნივ მოხვევით დაუკავშირდებიან პეტრე სარაჯიშვილის ქუჩას, რის შემდეგაც, მარცხნივ მოხვევით იმოძრავებენ ვასო გოძიაშვილის ქუჩისკენ და მგზავრებს არსებული სქემით მოემსახურებიან.

თბილისის მერია ბოდიშს გიხდით შექმნილი დისკომფორტის გამო!

სამგორის რაიონის გამგეობა ბინათმესაკუთრეთა ამხანაგობების განვითარების პროგრამის ფარგლებში სხვადასხვა პროექტის განხორციელებას განაგრძობს. მათ შორის არის ამორტიზებული ლიფტების რეაბილიტაცია.
ამ ეტაპზე, სამუშაოები 22 მისამართზე დასრულდა, რისთვისაც 990 000 ლარი დაიხარჯა. ამასთან, ლიფტების სარეაბილიტაციო სამუშაოები ამ ეტაპზე კიდევ 8 მისამართზე კი მიმდინარეობს.

გმირთა მოედნის ესტაკადაზე ვარაზისხევის მიმართულებით არსებული სადეფორმაციო ნაკერების რეაბილიტაცია იწყება.

როგორც დედაქალაქის მერიის მიერ გავრცელებულ ინფორმაციაშია ნათქვამი, სამუშაოების გამო გმირთა მოედნის ესტაკადაზე გადაადგილება ნაწილობრივ შეიზღუდება.

„დაგეგმილი სამუშაოების გამო ვარაზისხევისკენ მიმავალ გზაგამტარზე 14 აგვისტოს 23:00 საათიდან ათი დღის განმავლობაში ტრანსპორტის გადაადგილება ნაწილობრივ შეიზღუდება. თბილისის მერია ბოდიშს გიხდით შექმნილი დისკომფორტისთვის“, – ნათქვამია თბილისის მერიის ინფორმაციაში.

აღმაშენებლის ხეივანში, ჰიპერმაკეტ „გუდვილის“ მიმდებარედ არსებული ხიდის სადეფორმაციო ნაკერების გეგმიური სარეაბილიტაციო სამუშაოები მიმდინარეობს, - ამის შესახებ თბილისის მერიის განცხადებაშია ნათქვამი.

მერიის ცნობით, აღნიშნული სამუშაოების გამო, მიმდინარე წლის 2 აგვისტოდან, ორი კვირის განმავლობაში ხიდზე საავტომობილო მოძრაობა ნაწილობრივ შეიზღუდება.

თბილისის მერია ბოდიშს გიხდით შექმნილი დისკომფორტისთვის.

სამგორის რაიონში, ორხევის დასახლებაში, ქიზიყის ქუჩა N7-ის მიმდებარედ ინფრასტრუქტურული სამუშაოები დასრულდა. პროექტის ფარგლებში, თანამედროვე სტანდარტების შესაბამისი, ხელოვნურსაფარიანი ფეხბურთის მოედანი 450 კვ. მ ფართობზე მოეწყო.
სპორტული ინფრასტრუქტურის მოწყობისთვის გამგეობის ბიუჯეტიდან 219 334 ლარი გამოიყო.

დასრულებულ სამუშაოებს სამგორის რაიონის გამგებელი კახა სამხარაძე, მოადგილე სოსო ბურდულაძესთან ერთად ადგილზე გაეცნო.

„თბილისის საჯარო ხელოვნების ფონდი“ ორ ახალ პროექტს ახორციელებს. პროექტების შესახებ ინფორმაცია საზოგადოებას თბილისის მერმა, კახა კალაძემ დღეს დედაქალაქის მთავრობის სხდომაზე მიაწოდა.

„ერთი წლის წინ მერიის ხელშეწყობით შეიქმნა ახალი თანამედროვე ხელოვნების ინსტიტუცია „თბილისის საჯარო ხელოვნების ფონდი“. ფონდი აცხადებს კონკურსებს და გამარჯვებული არტისტების ნამუშევრები ქალაქის სხვადასხვა უბნის საჯარო სივრცეებში დროებით იფინება. უკვე განხორციელდა შვიდი პროექტი. მინდა, ინფორმაცია მოგაწოდოთ ორი ახალი პროექტის შესახებ: ვარკეთილში, მეორე მიკრორაიონის ერთ-ერთი კორპუსის სახურავზე განთავსდა ზურა ჯიშკარიანის ლიტერატურული ტექსტი, ლადო ლომიტაშვილის ძალიან საინტერესო არქიტექტურული დიზაინით. ასევე, ქალაქის ქუჩებში შეგიძლიათ, დაათვალიეროთ შთამბეჭდავი ფოტოგამოფენა. მთელი თბილისის მასშტაბით 47 ბილბორდზე შეგხვდებათ ოთხი ახალგაზრდა ქართველი ხელოვანის – ანა ფატლაძის, სანდრო ხუციშვილის, გიორგი შენგელიასა და საბა გორგოძის ფოტონამუშევრები“, – განაცხადა კახა კალაძემ.

ამასთან, როგორც თბილისის მერმა აღნიშნა, პროექტების ზუსტ მისამართებსა და სხვა ინფორმაციას საზოგადოება ფონდის ვებგვერდზე იხილავს. მისივე თქმით, ფონდს ასევე აქვს მრავალმხრივი საგანმანათლებლო პროგრამა სხვადასხვა უბანში არსებული საჯარო და კერძო სკოლებისთვის, ბაღებისა და უნივერსიტეტებისთვის.

გარდა ამისა, კახა კალაძის ინფორმაციით, ხშირად ტარდება საჯარო ლექციები, ვორკშოფები, შეხვედრები არტისტებთან, სადაც დასწრება თავისუფალია.

სამგორის რაიონში, ე.წ. სამხედრო ქალაქის ტერიტორიაზე, აბაშვილის ქ. N3-ში რეკრეაციული სივრცე მოეწყობა.

როგორც თბილისის მერმა. კახა კალაძემ დღეს დედაქალაქის მთავრობის სხდომაზე განაცხადა, პარკი 12 ჰექტარ ტერიტორიაზე გაშენდება.

„ვფიქრობთ, აღნიშნული პარკი ძალიან მნიშვნელოვანი იქნება, პირველ რიგში, ირგვლივ მცხოვრები ადამიანებისთვის. ასევე, ზოგადად, ქალაქში მწვანე სივრცეების არსებობა აუცილებელია. პროექტის ფარგლებში დაგეგმილია საფეხმავლო და საველოსიპედე ბილიკების, სპორტული მოედნების, საბავშვო სივრცეების, ცხოველთა სასეირნო სივრცის, ფანჩატურების, სკეიტპარკის, პარკურპარკის, საჭადრაკო სივრცის, მშრალი შადრევნისა და ამფითეატრის მოწყობა. დაირგვება ხე-მცენარეები, მოეწყობა განათებისა და სარწყავი სისტემები“, – განაცხადა კახა კალაძემ.

მისივე თქმით, პროექტის ბიუჯეტი დაახლოებით 20 მლნ ლარია, პარკის მოწყობის სამუშაოები კი ორი წლის განმავლობაში გაგრძელდება.