კახეთში მევენახეებმა აქცია გამართეს, ისინი ყურძენზე დაბალ ფასს აპროტესტებენ

დედოფლისწყაროს მუნიციპალიტეტის საზღვრისპირა სოფლების, სამთაწყაროს, ფიროსმანისა და საბათლოს მოსახლეობის ნაწილმა, ბაკურციხე-გურჯაანის ავტომაგისტრალზე საპროტესტო აქცია გამართა.

აქციაზე შეკრებილი 100-მდე მევენახე ამბობს, რომ ყურძენზე არსებული ფასი მათთვის მიუღებელია.

მევენახე ოთარ მალაყმაძის თქმით, ღვინის ქარხნები ერთ კილოგრამ რქაწითელში 1.05 თეთრს იხდიან, საფერავში კი 1.30 თეთრს, რაც მათთვის მიუღებელია:

„ოთხი ჰექტარი ვაზი მაქვს და ჯერ ერთი კილო ყურძენიც არ გამიყიდია. ის ფასები, რასაც გვთავაზობენ, ყურძნის თვითღირებულებაა. ჩვენი მოთხოვნაა, სახელმწიფო ჩაერიოს პროცესში და ერთ კილო რქაწითელში 1.50 ლარი, საფერავში კი 2 ლარი გადაგვიხადონ“, - უთხრა რადიო თავისუფლებას ოთარ მალაყმაძემ.

კიდევ ერთი მევენახის არჩილ ხოზრევანიძის თქმით, ღვინის ქარხნები უარს ამბობენ, ჩაიბარონ მიკროზონის ყურძენი „მუსკატი“.

„მხოლოდ ამ სახეობის ყურძენი, სამ სოფლეში, 400 ტონამდეა. გასულ წლებში უპრობლემოდ ვყიდდით, ახლა არ გვინდაო… არ დავიშლებით იმ დრომდე, სანამ ჩვენი მოთხოვნები არ დაკმაყოფილდება“.

აქციის მონაწილეები კახეთში სახელმწიფო რწმუნებულთან და რთველის შტაბის ხელმძღვანელებთან შეხვედრას ითხოვენ.

რთვლის სუბსიდირებას მთავრობა 2024 წელსაც გეგმავს. 1 აგვისტოს გამართულ მთავრობის სხდომაზე პრემიერ-მინისტრმა ირაკლი კობახიძემ თქვა, რომ სახელმწიფო სუბსიდიას მიიღებს ყველა ის კომპანია, რომელიც შეიძენს და გადაამუშავებს კახეთის რეგიონში მოწეულ არანაკლებ 100 ტონა რქაწითლის ჯიშის ყურძენს და შესყიდული 1 კილოგრამი ყურძნის სანაცვლოდ ფერმერს გადაუხდის არანაკლებ 1 ლარს.

კახეთში რთველი აგვისტოს ბოლოდან დაიწყება. რეგიონში წელს 300 ათას ტონამდე მოსავალს ელოდებიან. სახელმწიფო ბიუჯეტიდან რთვლის პირდაპირი სუბსიდირება 11 წელზე მეტია ხდება.