2023 წლის მთავარი საფეხბურთო მოვლენები - ხვიჩა კვარაცხელიამ სერია A-ში ფურორი მოახდინა

2023 წელი მნიშვნელოვანი საფეხბურთო მოვლენებით იყო დატვირთული, მაგრამ ჩვენ მხოლოდ ყველაზე მნიშვნელოვანს გამოვარჩევთ.

წლის გოლი

ბათუმის „დინამოს“ ნახევარმცველმა, ცოტნე ფაცაციამ ეროვნული ლიგის მატჩში „თელავს“ საკუთარი მოედნიდან გაუტანა – მსგავსი მანძილიდან ეროვნულ ლიგაში გოლი არ გასულა.

წლის ნახტომი

ფოთის „კოლხეთი 1913“-მა მოახერხა და ორი წლის განმავლობაში ლიგა 3-დან ეროვნულ ლიგაში დაწინაურდა – უძველესმა ქართულმა კლუბმა ეროვნულ ლიგაში ადგილი ხუთწლიანი პაუზის შემდეგ დაიბრუნა.

წლის მოგება

საქართველოს 21-წლამდე ნაკრებმა ევროპის ჩემპიონატის პირველ მატჩში პორტუგალიასთან (2:0) გაიმარჯვა, რაც დიდი სენსაცია იყო.

ფუტსალის ნაკრებმა მსოფლიო ჩემპიონატის შესარჩევ ჯგუფში 2:1 სძლია ასევე პორტუგალიას, რომლითაც მსოფლიოს და ევროპის ჩემპიონის 42-მატჩიანი წაუგებელი სერია შეწყვიტა.

წლის ტრანსფერი

საქართველოს ჩემპიონატიდან გიორგი კვერნაძე სერია A-ს „ფროსინონეში“ გადავიდა. მსგავსი ტრანსფერებით ქართული ფეხბურთი განებივრებული არ ყოფილა.

წლის შეფასება

ხვიჩა კვარაცხელია პირველი ქართველი ფეხბურთელია, რომლის ტრანსფერის პირობითი ღირებულებაც Transfermarkt-მა 85 მილიონი ევროდ შეაფასა.

მეკარის რეკორდი

გიორგი მამარდაშვილის სატრანსფერო ფასი 30 მილიონი ევრო გახდა და პირველი ქართველი მეკარეა, რომლის საბაზრო ღირებულებაც Transfermarkt-მა ასე ძვირად დააფასა.

წლის ტურნირი

საქართველოში ახალგარდული ევროპის ჩემპიონატი გაიმართა. მსგავსი მასშტაბის შეჯიბრება ჩვენს ქვეყანაში დამოუკიდებლობის მოპოვების შემდეგ არ ჩატარებულა.

წლის ნახტომი

გიორგი მიქაუტაძე საფრანგეთის ლიგა 2-ის საუკეთესო ბომბარდირი და მოთამაშე გახდა, შედეგად, 23 წლის თავდამსხმელი ამსტერდამის „აიაქსში“ 16 მილიონ ევროდ გადავიდა.

ყველაზე დიდი ანგარიშით გამარჯვება

საქართველოს ნაკრებმა ტაილანდი ამხანაგურ მატჩში 8:0 დაამარცხა, რაც ჩვენი გუნდის ისტორიაში ყველაზე დიდი ანგარიშით მოგებაა.

მიქაუტაძის პოკერი

ტაილანდის ნაკრებთან მოგებულ (8:0) შეხვედრაში, გიორგი მიქაუტაძემ ტაილანდის კარში ოთხი გოლი გაიტანა და „ჯვაროსნების“ ისტორიაში შევიდა, რადგან ერთ მატჩში ამდენი გოლი ჯერ არც ერთ ქართველ ფეხბურთელს არ გაუტანია.

21-წლამდელთა ევროპის ჩემპიონატზე დასწრების რეკორდი

საქართველოში ევროპის ახალგაზრდულ ჩემპიონატზე დასწრების ახალი რეკორდი დამყარდა. მეოთხედფინალში საქართველოს და ისრაელის 41-წლამდელების შეხვედრას 44,338 ადამიანი დაესწრო.

 წლის მწვრთნელი

რამაზ სვანაძე, რომლის გაწვრთნილმა საქარველოს 21-წლამდე ნაკრებმა ევროპის ჩემპიონატის „სიკვდილის ჯგუფიდან“ გააღწია და ტურნირის რვა საუკეთესო გუნდს შორის მოხვდა. მისი გუნდი ახალ შესარჩევ ციკლში ლიდერებს შორისაა და ევრო 2025-ზე გასვლის რეალური შანსი გააჩნია.

წლის მთავარი მოვლენა

„ნაპოლის“ ქართველი მოთამაშე ხვიჩა კვარაცხელია სერია A-ს საუკეთესო ფეხბურთელი, ასისტენტი, სეზონის ახალგაზრდა მოთამაშე და ჩემპინთა ლიგის საუკეთესო ახალგაზრდა სპორტსმენი გახდა, წლის ბოლოს კი სერია A-ს საუკეთესო გოლის ჯილდოც მიიღო.