ულტიმატუმი ასლან ბჟანიას-ოპოზიცია ხელისუფლების გადადგომას და რუსეთისთვის „არას“ თქმას ითხოვს

აფხაზეთის ოპოზიციამ პრეზიდენტ ასლან ბჟანიას ორი კვირა მისცა მათი მოთხოვნების შესასრულებლად. თუ ამ პერიოდის შემდეგ არაფერი შეიცვლება, ოპოზიცია მასობრივი საპროტესტო აქციებით იმუქრება. ულტიმატუმის ერთ-ერთი მთავარი პირობა მთავრობის გადადგომაა, მაგრამ უფრო მნიშვნელოვანი და პრაქტიკულად შეუსრულებელია რუსეთთან დადებული რამდენიმე ხელშეკრულების გაუქმების მოთხოვნა.

***

ულტიმატუმის პაკეტი მოიცავს რამდენიმე პუნქტს, რომლებსაც მანამდე ფართო საზოგადოების გამოხმაურება მოჰყვა.

კერძოდ, ოპოზიცია დაჟინებით მოითხოვს, რომ პრეზიდენტმა ასლან ბჟანიამ გააუქმოს ორი რუსულ-აფხაზური შეთანხმება – ბიჭვინთაში მდებარე სახელმწიფო აგარაკის რუსეთისთვის გადაცემა და კანონი ეკონომიკურ საქმეებზე სასამართლო და საარბიტრაჟო გადაწყვეტილებების ურთიერთაღიარებისა და აღსრულების შესახებ.

გარდა ამისა, ოპოზიცია ელექტროენერგიის სოციალურად ორიენტირებულ ტარიფზე დაბრუნებას და „სასტუმროებისა და ბინების სამართლებრივი სტატუსის მოწესრიგების შესახებ“ კანონპროექტის პოპულარიზაციაზე უარის თქმას ითხოვს.

“თუ ორი კვირის განმავლობაში ხელისუფლება არ შეასრულებს ჩვენს ყველა მოთხოვნას და არ მოაწერს ხელს განკარგულებას ანტიეროვნული მინისტრთა კაბინეტის დათხოვნის შესახებ, პოლიტიკური პარტიები და სამოქალაქო ორგანიზაციები გამოაცხადებენ ქალაქ სოხუმში პროტესტის აქციის ჩატარების თარიღს.” – ნათქვამია ოპოზიციის განცხადებაში.

აფხაზეთის პოლიტიკურ ცხოვრებაში ყველაფერი ჩვეულ რეჟიმშია. ოპოზიცია ასლან ბჟანიასგან თითქმის შეუძლებელს ითხოვს.

გარე დამკვირვებელს შეიძლება მოეჩვენოს, რომ ამ პაკეტში ყველაზე მნიშვნელოვანი მთავრობის გადადგომაა.

სინამდვილეში, ეს ძალიან საკამათო საკითხია.

ასლან ბჟანიასთვის ორი რუსულ-აფხაზური შეთანხმების გაუქმება გაცილებით მტკივნეული თემაა. მან კარგად იცის, რას ნიშნავს ეს: კრემლთან შეთანხმება და შემდეგ პირობის უკან წაღება.

ეს დიდი და მძიმე ჯვარია პოლიტიკურ კარიერაზე. მოსკოვი ნაკლებად სავარაუდოა, რომ აპატიებს მას ასეთ შეურაცხყოფას. ხმაურიანი განცხადებები არ იქნება, მაგრამ აფხაზეთისთვის ფინანსური დახმარების მოულოდნელად შეჩერება, ან, მაგალითად, რუსეთ-აფხაზეთის საზღვარზე კონტროლის იმდენად გამკაცრება, რომ რუსი ტურისტისთვის შენგენის ვიზის აღება უფრო ადვილი იქნება, ვიდრე აფხაზეთის პლაჟებზე მოხვედრა – ეს კრემლის შეუძლია.

და მაშინ ბჟანიას ოპოზიციაც კი არ სჭირდება – მას პრეზიდენტის სასახლიდან საკუთარი ხალხი გააძევებს.

მოთხოვნებში არის სხვა მტკივნეული საკითხებიც.

ერთ-ერთი მათგანი ელექტროენერგიის ტარიფს უკავშირდება. ახლა, მისი ღირებულების მკვეთრი ზრდის გამო, მთავრობა აპირებს ნაწილობრივ მაინც მოაგვაროს ენერგეტიკული კრიზისი.

და კიდევ ერთი ძალიან მნიშვნელოვანი პუნქტი ეხება ძალიან მომგებიან თემას – უცხოელებისთვის აფხაზეთში ბინების შეძენის ნებართვას.

დასავლეთის სანქციებმა რუსეთის მოქალაქეებისთვის მკვეთრად გაზარდა აფხაზეთის მიმართ მიმზიდველობა. უძრავი ქონების ყიდვის წარსული შესაძლებლობა ლაჟვარდოვან ნაპირებზე, ვილა ესპანეთში, ან თუნდაც ბინა ბულგარეთში, ახლა მდიდარი რუსისთვის ოცნებად იქცა.

აფხაზეთის ხელისუფლებას აშკარად ესმის რუსებისთვის ხელმისაწვდომი უძრავი ქონების უცხოურ ბაზარზე არსებული კონიუნქტურა. მოთხოვნა დიდია. დიდი ფულია სასწორზე, რაც ძალიან მნიშვნელოვანია აფხაზეთის სამთავრობო სისტემაში კორუფციის ხარისხის გათვალისწინებით. აფხაზეთში უცხოელების მიერ უძრავი ქონების შეძენის შესახებ ტაბუს დე ფაქტო მოხსნის მთავარი ბენეფიციარი სწორედ ადგილობრივი ბიუროკრატია იქნება.

რაც შეეხება მთავრობას, ის შეიძლება ბჟანიამ დაითხოვოს, შემდეგ კი ხელახლა დანიშნოს – კოსმეტიკური ცვლილებებისთვის. შეიძლება შეცვალოს რამდენიმე სუსტი რგოლი. არსებული კანონმდებლობით, ეს ყველაფერი პრეზიდენტის ექსკლუზიურ კომპეტენციაშია.

მაგრამ ასეთ „ტექნიკურ“ დათმობაზეც კი, პრეზიდენტი, დარწმუნებული ვარ, რომ არ დათანხმდება. აფხაზეთის პრეზიდენტები, ოპოზიციასთან ურთიერთობის დამკვიდრებული ტრადიციის მიხედვით, არ მიდიან დათმობებზე, რადგან ეს სისუტედ ითვლება.

თავად ოპოზიცია კი, ზოგადად, არ ელის პრეზიდენტის მიმართ წარდგენილი ულტიმატუმიდან ერთი პუნქტის შესრულებასაც კი.

გზავნილის რეალური მნიშვნელობა ასეთია: „ასლან ბჟანია, მოემზადე. ახლა ჩვენი ჯერია, რომ პრეზიდენტის სასახლეზე იერიში მივიტანოთ“.

 

წყარო:jam-news