თბილისის საქალაქო სასამართლოში 2008 წლის 16 აგვისტოს თავდაცვის სამინისტროს ბრიგადის სერჟანტის, როინ შავაძის უკანონო დაკავების, განზრახ მკვლელობისა და სამსახურებრივი უფლებამოსილების გადამეტებაზე ბრალდებული მაღალჩინოსნებისა და სპეცდანიშნულების რაზმის თანამშრომლების საქმის განხილვა მიმდინარეობს.
როგორც პროკურორმა, გიორგი მუჯირმა განაცხადა, დაკავებული პირებიდან სამმა აღიარა მკვლელობა და მკვლელობის შემკვეთად აჭარის კუდ-ის ყოფილი უფროსი თეიმურაზ პატარიძე დაასახელა.
პროკურორის განმარტებით, დღევანდელ სხდომაზე მტკიცებულებათა დასაშვებობის საკითხი გადაწყდება და გადაისინჯება აღკვეთის ღონისძიების საკითხიც.
მისივე განმარტებით, საქმის მასალების მიხედვით, სერჟანტ როინ შავაძის პიროვნების შესწავლის ბრძანება კუდ-ის მაშინდელმა უფროსმა, დათა ახალაიამ გასცა. მისივე თქმით, საქმეში მაშინდელი შს მინისტრი ვანო მერაბიშვილიც ფიგურირებს, რომელიც დაიკითხა. პროკურორის განცხადებით, „მისი პასუხები „დიახ“ და „არა”-თი შემოიფარგლა“ და განაცხადა, რომ არ იცოდა ამ საქმის დეტალები. პროკურორის თქმით, მერაბიშვილი ქვეყანაში არ იმყოფება.
ამასთან, ადვოკატ ბექა ბასილაიას განცხადებით, სამმა სპეცრაზმელმა, რომლებიც მანამდე მიცემულ ჩვენებებში დანაშაულს არ აღიარებდნენ, დაკავებიდან რამდენიმე თვის შემდეგ დანაშაული აღიარეს. ბასილაიას თქმით, „გამოძიებას ისრები მერაბიშვილისკენ მიაქვს და სპეცრაზმელები ჩვენებებში ირიბად მერაბიშვილს ახსენებენ“. ბასილაიას განცხადებით, არ იცის, რა გახდა აღიარების საფუძველი. მისივე თქმით, იგი ჩამოშორდა იმ სპეცრაზმელების დაცვას, რომლებმაც დანაშაული აღიარეს.
პროკურატურამ თავდაცვის სამინისტროს ბრიგადის სერჟანტის, 2008 წლის აგვისტოს ომის მონაწილის, როინ შავაძის უკანონო დაკავების, განზრახ მკვლელობისა და სამსახურებრივი უფლებამოსილების გადამეტების ბრალდებით სისხლისსამართლებრივი დევნა 10 პირის მიმართ 2023 წლის 28 ივლისს დაიწყო.
შავაძის უკანონო დაკავების, განზრახ მკვლელობისა და სამსახურებრივი უფლებამოსილების გადამეტების საქმეზე ათ პირს პატიმრობა 29 ივლისს შეეფარდა.
„ბრალდებულების მიმართ სისხლის სამართლებრივი დევნა საქართველოს სისხლის სამართლის კოდექსის 109-ე მუხლის მე-2 ნაწილის „ბ“ და „ე“ ქვეპუნქტებით (ჯგუფურად ჩადენილი, დამნაშავისათვის წინასწარი შეცნობით უმწეო მდგომარეობაში მყოფის განზრახ მკვლელობა), სსკ-ის 147-ე მუხლის მე-3 ნაწილით (განზრახ უკანონო დაკავება, რამაც მძიმე შედეგი გამოიწვია) და სსკ-ის 333-ე მუხლის მე-3 ნაწილის „ბ“ და „გ“ ქვეპუნქტებით (სამსახურებრივი უფლებამოსილების გადამეტება, ჩადენილი ძალადობით ან იარაღის გამოყენებით და დაზარალებულის პირადი ღირსების შეურაცხყოფით) დაიწყო.
სისხლის სამართლის საქმეზე გამოძიება გრძელდება საქართველოს სისხლის სამართლის კოდექსის 109-ე (განზრახ მკვლელობა), სსკ-ის 147-ე (განზრახ უკანონო დაკავება) და სსკ-ის 333-ე (სამსახურებრივი უფლებამოსილების გადამეტება) მუხლებით. ევროპული სასამართლოს გადაწყვეტილებების აღსრულების მიზნით, აღნიშნული კატეგორიის საქმეებზე ეფექტიანი გამოძიების უზრუნველყოფა საქართველოს პროკურატურისთვის ერთ-ერთ მნიშვნელოვან პრიორიტეტს წარმოადგენს“, – აცხადებენ პროკურატურაში.
თბილისის საქალაქო სასამართლოში სერჟანტ როინ შავაძის მკვლელობის საქმეზე სხდომა იმართება
მოირგე სტილი დაასვენე თვალი
- პატარა მოზრდილი საშუალო დიდი უდიდესი
- ჩვეულებრივი ჰელვეტიკა ჰეგოე გეორგია ტაიმსი
- კითხვის რეჟიმი