კონსერვატიულად დაგეგმილი ბიუჯეტი, 5%-იანი ეკონომიკური ზრდის გათვალისწინებით - 2024 წლის მთავარი ფინანსური დოკუმენტის მეორე, გადამუშავებული ვარიანტი უკვე პარლამენტშია. მთავრობის სხდომა კი მთლიანად მომდევნო წლის ბიუჯეტის განხილვას მიეძღვნა. პოლიტიკური ოპონენტების განცხადებით, ხელისუფლებამ 2024 წლის ბიუჯეტი საარჩევნო წლის შესაბამისად დაგეგმა, თუმცა ასეა თუ ისე, ფაქტია, მომდევნო წელს, საზოგადოების აბსოლუტურად ყველა ფენა იგრძნობს ფინანსურ სიკეთეს - პენსიონერი იქნება ის, შშმ პირი, ვეტერანი, თუ მოქმედი სამხედრო პირი. კერძოდ, უსახლკარო მრავალშვილიან ოჯახებს საცხოვრებლები გადაეცემათ, ქრონიკული დაავადებების მქონე პენსიონერები მედიკამენტებს უფასოდ მიიღებენ. თუმცა, ყველაზე მთავარი ისაა, რომ სათამაშო ბიზნესი დაიბეგრება მოგების 15%-იანი გადასახადით, დღეს არსებული 10%-ის ნაცვლად. შედეგად, ბიუჯეტში, დამატებით 400 მილიონი ლარი შევა.
„ვერსია“ 2024 წლის ბიუჯეტის ძირითად პარამეტრებს გაგაცნობთ - ვნახოთ, რა ფინანსური პრიორიტეტები გამოკვეთა ხელისუფლებამ მომდევნო წელს.
როგორც აღვნიშნეთ, გასული კვირის ბოლოს, მთავრობის სხდომა მთლიანად 2024 წლის ბიუჯეტის განხილვას მიეძღვნა, რომელიც პრემიერ-მინისტრმა, ირაკლი ღარიბაშვილმა წარადგინა. მისი თქმით, ნომინალური მთლიანი შიდა პროდუქტის პროგნოზი 85 მილიარდ 370 მილიონი ლარია.
„მოგეხსენებათ, ბიუჯეტის პირველად ვარიანტზე საკმაოდ ინტენსიურად ვიმუშავეთ. ამის შემდეგ, წარვუდგინეთ პარლამენტს, სექტემბრის ბოლოს და მთელი ამ პერიოდის განმავლობაში, გავაგრძელეთ მუშაობა თითოეულ სამინისტროსთან. გარდა ამისა, გვქონდა სამუშაო შეხვედრა პარლამენტთან, უმრავლესობასთან, კომიტეტებთან, ყველასთან დეტალურად გავიარეთ ბიუჯეტის პირველი ვარიანტი, შემდეგ ვიმუშავეთ და ახლა წარმოვადგენთ მეორე ვარიანტს. მინდა აღვნიშნო, რომ კონსერვატიულად არის დაგეგმილი ბიუჯეტი, 5%-იანი ეკონომიკური ზრდა გვაქვს გათვალისწინებული 2024 წელს. ამავდროულად, მინდა ვთქვა, რომ შემცირებულია ბიუჯეტის დეფიციტი, რომელიც 2024 წელს გვექნება 2.5% და შემდგომ წლებში კიდევ შემცირდება, ხოლო მთავრობის ვალი შეადგენს მშპ-ს 38.2 %-ს, რაც ძალიან დაბალი მაჩვენებელია. სულ რაღაც სამი წლის წინ, 60%-ზე მეტი იყო და ეს მოვახერხეთ მოკლე პერიოდში.
ასევე, მინდა ვთქვა, რომ ასეთი კონსერვატიული დაგეგმვის პირობებშიც, ნომინალური მთლიანი შიდა პროდუქტის პროგნოზი იქნება 85 მილიარდ 370 მილიონი ლარი - მთელი ქვეყნის ეკონომიკა იქნება 85 მილიარდ 370 მილიონი ლარი. შედარებისთვის, მინდა შევახსენო საზოგადოებას, რომ 2012 წელს იყო 27 მილიარდი ლარი ანუ გასამმაგდა მთელი ქვეყნის ეკონომიკა ჩვენი მმართველობის პერიოდში, 11 წელიწადში. 85 მილიარდი იქნება 2024 წელს და 2012 წელს იყო 27 მილიარდი ლარი“, - განაცხადა ირაკლი ღარიბაშვილმა.
მისი თქმით, ამგვარი ტემპით ზრდის შემთხვევაში, 2027 წლისთვის, პროგნოზირებულია ნომინალური მთლიანი შიდა პროდუქტის ზრდა 108 მილიარდ ლარამდე, რაც ერთ სულ მოსახლეზე გადაანგარიშებით, 10 800 დოლარს გადააჭარბებს.
„მინდა შეგახსენოთ, რომ 2020 წელს, მშპ იყო 50 მილიარდი ლარი ანუ კიდევ ვიმეორებ, რომ 30-მილიარდიანი ზრდა გვაქვს სამ წელიწადში, დაახლოებით. ერთ სულ მოსახლეზე გადაანგარიშებით, მშპ იყო 4 250 დოლარი, და 2024 წელს გვექნება უკვე 8 500 დოლარი. ასეთი ზრდა გვაქვს სულ რაღაც სამ წელიწადში. ამგვარი ტემპით ზრდის შემთხვევაში, 2027 წლისთვის, პროგნოზირებულია ნომინალური მთლიანი შიდა პროდუქტის ზრდა 108 მილიარდ ლარამდე, რაც ერთ სულ მოსახლეზე გადაანგარიშებით, 10 800 დოლარს გადააჭარბებს. ეს ძალიან დამაიმედებელი პროგნოზია. იცით, რომ ჩვენ 2030 წლისთვის, ვპროგნოზირებდით 10 000 დოლარს და ნახეთ, რომ სულ რაღაც ორ-სამ წელიწადში, დიდი ნახტომი გავაკეთეთ“.
თავდაპირველად, 2024 წლის ნაერთი ბიუჯეტის ხარჯვითი ნაწილი 27 მილიარდ 800 მილიონ ლარზე იყო გათვლილი. 27 მილიარდ 800 მილიონ ლარში გათვალისწინებული იყო დაფინანსების ზრდა თითქმის ყველა მიმართულებით, მათ შორის, პენსიების ზრდა.
„ზემოაღნიშნული პარამეტრები ბიუჯეტის გადამუშავებულ ვარიანტშიც არ იცვლება.
შეგახსენებთ, პენსიები გაიზარდა მაღალმთიან რეგიონში, 70 წელს ზემოთ პენსია უკვე 500 ლარამდე იქნება, თითქმის 400 ლარამდე იქნება 70 წელს ქვემოთ პენსია. ასევე, საჯარო მოხელეებს, ყველას გაეზრდება ხელფასი 2024 წელსაც. 10%-იანი ზრდა არის ჩადებული და მინდა შეგახსენოთ, რომ ბოლო სამ წელიწადში, 30%-ით გაეზარდა ხელფასი ყველა საჯარო მოხელეს, მათ შორის, პოლიციელებსა და ჯარისკაცებს 45-50%-ით. აღსანიშნავია, რომ მომავალ წელს, 400 მილიონ ლარზე მეტით გაიზრდება განათლების დაფინანსება.
მიუხედავად მნიშვნელოვანი ზრდისა, ბიუჯეტის განხილვის პროცესში, დამატებითი საჭიროებები გამოიკვეთა. ჩვენს მეგობრებთანაც გვქონდა ამაზე საუბარი პარლამენტში, საინტერესო მოსაზრებებიც გაგვიზიარეს, ბევრი რეკომენდაცია და რჩევა გავიზიარეთ და გავითვალისწინეთ“.
პრემიერ-მინისტრის თქმით, მთავრობამ საბანკო სფეროში, 9 თვის განმავლობაში მიმდინარე ტენდენციები გააანალიზა და გამოიკვეთა, რომ 2024 წელს, შესაძლებელია დამატებით 300 მილიონი ლარის შემოსავლის მიღება საბანკო-საფინანსო სექტორიდან.
„ჩვენ ეს პერიოდი ვმუშაობდით და დამატებითი რესურსების მობილიზებაზე გამახვილდა ყურადღება. გავაანალიზეთ საბანკო სფეროში 9 თვის განმავლობაში მიმდინარე ტენდენციები, გამოიკვეთა, რომ 2024 წელს შეგვეძლება დამატებით 300 მილიონი ლარის შემოსავლის მიღება საბანკო-საფინანსო სექტორიდან. ვითვალისწინებთ მათ მოგებას და აქვე მინდა ვთქვა, რომ ეს დაკვირვება გაგრძელდება და ვნახავთ, გარდა ამისა, რა რესურსები შეიძლება გამოინახოს კიდევ. 300 მილიონი ლარი დამატებით მოგვაქვს საბანკო-საფინანსო სექტორიდან.
გარდა ამისა, საპარლამენტო უმრავლესობას წარვუდგენთ ახალ ინიციატივას, რომელიც ახლა მინდა, რომ საზოგადოებას გავაცნო. სათამაშო ბიზნესის დაბეგვრის განაკვეთები უნდა შევცვალოთ და გეგმის მიხედვით, ახალი ინიციატივით, სათამაშო ბიზნესი დაიბეგრება მოგების 15%-იანი განაკვეთით, დღეს არსებული 10%-ის ნაცვლად, ხოლო სათამაშო ბიზნესიდან თანხის გატანა დაიბეგრება 5%-ით, დღეს მოქმედი 2%-ის ნაცვლად.
ასევე, მინდა საზოგადოებას ვაცნობო, რომ აღნიშნული ცვლილებები დამატებით ბიუჯეტში მოიტანს 400 მილიონ ლარს. ამ ცვლილებათა შედეგად, 300 მილიონი ბანკებიდან და 400 მილიონი სათამაშო ბიზნესიდან, ჯამში, 700 მილიონი ლარია, რაც ნიშნავს, რომ სწორედ 700 მილიონი ლარის დამატებითი შემოსავალი გვექნება 2024 წელს“. ღარიბაშვილის განცხადებით, სამწუხაროა ის ფაქტი, რომ სათამაშო ბიზნესის ბრუნვა იზრდება.
„აქვე მინდა, ერთი მხრივ, გაკვირვება გამოვხატო, მეორე მხრივ, ძალიან სამწუხაროა ის ფაქტი, რომ სათამაშო ბიზნესის ბრუნვა იზრდება. მე ნამდვილად არ მიხარია, ძალიან ბევრი მოქალაქე ჯერ კიდევ არის ჩართული სათამაშო ბიზნესში. ცნობისთვის, უბრალოდ მინდა, რომ ინფორმაცია მოგაწოდოთ: 2022 წელს, 48 მილიარდიდან 52 მილიარდ ლარამდე გაიზარდა სათამაშო ბიზნესის მთელი ბრუნვა, რაც კატასტროფული მაჩვენებელია. ამდენი ადამიანი ჯერ კიდევ არის ჩართული სათამაშო ბიზნესში. იცით, რომ ჩვენ შარშან განვახორციელეთ მნიშვნელოვანი ცვლილებები, როცა ავკრძალეთ რეკლამა და ასევე, 25 წლამდე შევუზღუდეთ ჩვენს მოქალაქეებს სათამაშო ბიზნესში მონაწილეობა. ავტომატურად, მილიონ 500 ათას მოქალაქეს შეეზღუდა სათამაშო ბიზნესში მონაწილეობა. ამის მიუხედავად, ვხედავთ, რომ საკმაოდ ბევრი მოქალაქეა ჩართული ამაში.
შესაბამისად, ჩვენ მივიღეთ გადაწყვეტილება, რომ გავუზარდოთ დამატებით გადასახადები ამ ბიზნესს და, როგორც მოგახსენეთ, 400 მილიონი ლარი იქნება დამატებით ამოღებული. ჯამში, მეგობრებო, ბიუჯეტის გადამუშავებული ვარიანტი გაიზრდება 700 მილიონით და მთლიანი ნაერთი ბიუჯეტი შეადგენს უკვე 28 მილიარდ 500 მილიონ ლარს ანუ 28 მილიარდ 500 მილიონი ლარი იქნება 2024 წლის ბიუჯეტი. შედარებისთვის, მინდა გითხრათ, რომ 2012 წელს, ბიუჯეტი იყო თითქმის 9 მილიარდამდე ანუ თითქმის 20-მილიარდიანი ზრდა გვაქვს 11 წელიწადში. აი, ეს საკმაოდ შთამბეჭდავი შედეგი გვაქვს ჩვენი გუნდის მუშაობის“.
მთავრობის მეთაურის თქმით, დამატებით, 160 მილიონი ლარი გამოეყო განათლებისა და მეცნიერების სამინისტროს.
„რაც შეეხება დამატებით ამ 700 მილიონის განაწილებას, როგორც უკვე დავაანონსეთ პედაგოგებთან შეხვედრისას, დამატებით 160 მილიონი ლარი გამოვუყავით განათლების სამინისტროს. ჯამში, განათლებისა და მეცნიერების სამინისტროს ბიუჯეტი შეადგენს 2 მილიარდ 500 მილიონ ლარს. შედარებისთვის მინდა აღვნიშნო, რომ 2012 წელთან შედარებით, განათლების ბიუჯეტი გაზრდილია 1 მილიარდ 800 მილიონამდე ლარით - 300%-იანი ზრდა გვაქვს ბოლო 11 წელიწადში. აქაც კარგად ჩანს, როგორ ყურადღებას აქცევდნენ განათლებას.
როგორც უკვე ჩვენს ძვირფას მასწავლებლებს ვაცნობეთ, მნიშვნელოვნად გაიზრდება პედაგოგების ხელფასები 2024 წელს, რაც ნიშნავს იმას, რომ სრულ განაკვეთზე მომუშავე მასწავლებელთა ხელფასი, საშუალოდ, 500 ლარით და მეტით გაიზრდება. ზოგს შეიძლება 600 ან 700 ლარით გაეზარდოს. ძალიან მნიშვნელოვანი ზრდა არის და მინდა ჩვენს მასწავლებლებს კიდევ ერთხელ გადავუხადო მადლობა და ვუსურვო წარმატებები. ეს არის მნიშვნელოვანი სიახლე, რაც სკოლების ინფრასტრუქტურის გაუმჯობესებასთან ერთად, განათლების ხარისხის ამაღლების კიდევ უფრო მეტი მოტივაცია და უდიდესი კომპონენტი იქნება“.
მთავრობის მეთაურის თქმით, ჯანდაცვის სამინისტროს დამატებით გამოეყოფა 65 მილიონი ლარი და ჯამური ბიუჯეტი იქნება 7 მილიარდ 800 მილიონი ლარი.
„2012 წელთან შედარებით, რადიკალური ცვლილება გვაქვს - 6 მილიარდი ლარით არის გაზრდილი ჯანდაცვის ბიუჯეტი ბოლო 11 წელიწადში. 2012-ში, შესაბამისად, ძალიან დაბალი იყო ჯანდაცვის ბიუჯეტი, ჩვენ 325%-იანი ზრდა გვაქვს.
ახლა, რაც შეეხება ახალ პროექტებსა და ინიციატივებს, რომელიც მინდა გავაცნო საზოგადოებას. გაიზარდა ჯანდაცვის პროგრამების დაფინანსება და მომდევნო წელს, პენსიონერები, მთელი წლის განმავლობაში, უფასოდ მიიღებენ ქრონიკული დაავადებების სამკურნალო მედიკამენტებს. ეს არის, დაახლოებით, 400 000 პენსიონერი, რაც, რა თქმა უნდა, ძალიან მნიშვნელოვანი შეღავათია. გარდა იმისა, რომ პენსიონერებს გავუზარდეთ პენსია და 500 ლარამდე, 110 ლარი იყო 2012 წელს, ახლა გახდა 500 ლარამდე, ასევე - ქრონიკული დაავადებების მქონე პენსიონერები უფასოდ მიიღებენ მედიკამენტებს 2024 წელს და ჩვენ ამ ტენდენციას შევინარჩუნებთ“.
მთავრობის მეთაურის თქმით, დაიწყება ონკოლოგიურ პაციენტთა ადრეული კვლევების დაფინანსება, რაც საკმაოდ დიდ დანახარჯებთანაა დაკავშირებული.
„რაც შეეხება ახალ ინიციატივას, რომელიც ბატონ ზურას აქვს დაგეგმილი, დაიწყება ონკოლოგიურ პაციენტთა ადრეული კვლევების დაფინანსება, რაც საკმაოდ დიდ დანახარჯებთანაა დაკავშირებული. მედიკამენტებზე მინდა ვთქვა, რომ ჩვენ მიერ გატარებული საკმაოდ ეფექტიანი ღონისძიებების შედეგად, ჯამურად, 300-დან 400 მილიონ ლარამდე დაეზოგება ჩვენს მოქალაქეებს ჯიბიდან გადახდილი, რაც ძალიან დიდი შეღავათია. მედიკამენტები გაიაფდა, ძალიან მნიშვნელოვანი ცვლილებები განახორციელა სამინისტრომ. რა თქმა უნდა, ჩვენ ამ პროცესს კიდევ უფრო მეტად გავაკონტროლებთ და გავაუმჯობესებთ.
კიდევ ერთი სიახლე, რომელიც მნიშვნელოვანია ჩვენი ძალოვანი უწყებების წარმომადგენლებისთვის, ისაა, რომ მივიღეთ გადაწყვეტილება და ყოფილი პოლიციელები, ჯარისკაცები, სპეცსამსახურების წარმომადგენლები მიიღებენ გაზრდილ პენსიას. იცით, რომ ჩაკეტილი იყო დღემდე, 560 ლარი იყო მაქსიმალური ზღვარი პენსიისა და ეს გაიზრდება 1 000 ლარამდე. ასევე, საშუალოდ, 20%-ით გაიზრდება ნამსახურების თითოეულ წელზე გათვლილი თანხის მოცულობა. მადლიერება მინდა გამოვხატო ჩვენი ძალოვანი უწყებების მიმართ და ეს იქნება ღირსეული პენსია, რომელიც გვინდა, ეტაპობრივად გავზარდოთ იმის მიხედვით, თუ რა შემოსავალი გვექნება“.
მთავრობის მეთაურის თქმით, სამსახურებრივი მოვალეობის შესრულების დროს დაღუპულთა და მიღებული ჭრილობების შედეგად გარდაცვლილთა ოჯახების კომპენსაცია 1 000 ლარიდან 1 200 ლარამდე გაიზრდება.
„გვინდა, კიდევ ერთხელ, ჩვენი მადლიერება გამოვხატოთ სამსახურებრივი მოვალეობის შესრულების დროს დაღუპულთა და მიღებული ჭრილობების შედეგად გარდაცვლილთა ოჯახების მიმართ. მათი კომპენსაცია 1 000 ლარიდან 1 200 ლარამდე გაიზრდება. 2012 წელს, იყო ნული ლარი, არავითარი ყურადღება არ ექცეოდა ამ ადამიანებს და ჩვენ ამ ოჯახებს 1 200 ლარს დავუნიშნავთ ყოველთვიურ კომპენსაციას. კიდევ ერთხელ, დიდება, ჩვენს გმირებს!“
ირაკლი ღარიბაშვილის თქმით, გაიზრდება 9 აპრილის მონაწილეთა, პოლიტრეპრესირებულთა ოჯახის წევრების ყოველთვიური საყოფაცხოვრებო სუბსიდია და ეს ჯამურად საკმაოდ დიდი თანხებია.
„ჩვენ მოვიცავით თითქმის ყველა ჯგუფი, გაიზრდება 9 აპრილის მონაწილეთა, პოლიტრეპრესირებულთა ოჯახის წევრების ყოველთვიური საყოფაცხოვრებო სუბსიდია და ეს ჯამურად საკმაოდ დიდი თანხებია, რამდენიმე მილიონ ლარს შეადგენს. საკმაოდ მცირე თანხები იყო და ესეც ზოგჯერ გავაოთხმაგეთ და გავახუთმაგეთ, რიგ შემთხვევაში.
ასევე, მომდევნო წელს, დავიწყებთ ახალ პროგრამას, რომლის ფარგლებშიც, ეტაპობრივად, საცხოვრებლით უზრუნველვჰყოფთ უსახლკარო, მრავალშვილიან ოჯახებს. ჩემი დავალებით შევისწავლეთ რეგიონში არსებული სიტუაცია, სამი შვილი და მეტი ვისაც ჰყავს უსახლკარო ან გაუსაძლის პირობებში, ასე ვთქვათ, მაცხოვრებლებს, შევაფასეთ მათი მდგომარეობა და ასეთი არის, დაახლოებით, 1 000-მდე ოჯახი, ვისაც სამი შვილი და მეტი ჰყავს, არიან გაჭირვებულები და სოციალურად დაუცველები. ამიტომ, მივიღეთ გადაწყვეტილება, რომ ათასამდე ასეთ ოჯახს ჩვენ შევუძენთ ბინებს და იცხოვრებენ ღირსეულ საცხოვრებელ პირობებში. ეს იქნება, მაქსიმუმ, ორწლიანი პროგრამა. ჩვენ გაისად დავიწყებთ ამ პროგრამას და აქაც, დაახლოებით, 50 მილიონი ლარი ჯამურად დაიხარჯება. 25 მილიონი ლარი დაიხარჯება 2024 წელს და შემდეგ მეორე 25 მილიონი ლარი - 2025 წელს. ვფიქრობ, ძალიან მნიშვნელოვანია, რომ ჩვენი მოქალაქეები იღებდნენ ასეთ ყურადღებას და მთავრობისგან არ უნდა იყვნენ მიტოვებული“.
პრემიერ-მინისტრის თქმით, ეკონომიკის სამინისტროს დამატებით გამოეყოფა 150 მილიონი ლარი და ჯამში, 800 მილიონ ლარამდე იქნება ბიუჯეტი.
„2012 წელთან შედარებით, გაზრდილია 326 მილიონი ლარით ბიუჯეტი. მინდა, მნიშვნელოვანი სიახლე გაცნობოთ - ანაკლიის პორტის მშენებლობისთვის გათვალისწინებული იქნება ჯამურად 70 მილიონი ლარი. 50 მილიონი ლარი ჩაიდება 2024 წელს და 20 მილიონი უკვე წელს გამოვუყავით. ჩვენი მხრიდან დასადები თანხები უკვე მობილიზებულია, დაიწყება მშენებლობა გაზაფხულზე, ასეთი გეგმის მიხედვით. ასევე, აქტიურად მიმდინარეობს ახლა ინვესტორის შერჩევა, რომელიც მალე დასრულდება, მაქსიმუმ, დეკემბერ-იანვარში გამოვაცხადებთ გამარჯვებულ ინვესტორს და ჩვენ ერთობლივად დავიწყებთ ანაკლიის პორტის მშენებლობას 2024 წლის მარტ-აპრილში, დაახლოებით, ასეთი გეგმა გვაქვს.
დამატებით 70 მილიონი ლარის გამოყოფაა განსაზღვრული ეკონომიკის სამინისტროსთვის აეროპორტების მშენებლობისთვის. ეს არის ქუთაისის აეროპორტის ახალი ასაფრენ-დასაფრენი ზოლი, ასევე, თელავისა და ვაზიანის აეროპორტის პროექტირება, მათ შორის, კვლევების დასრულება“.
ირაკლი ღარიბაშვილის თქმით, რეგიონული განვითარებისა და ინფრასტრუქტურის სამინისტროს პროექტებზე დამატებით გამოიყოფა 50 მილიონი ლარი, მაგრამ ჯამურად ბიუჯეტი იქნება 3 მილიარდ 400 მილიონი ლარი.
„შემდეგი საკითხია რეგიონული განვითარებისა და ინფრასტრუქტურის სამინისტროს დაფინანსება, რომლის პროექტებზე დამატებით გამოიყოფა 50 მილიონი ლარი, მაგრამ ჯამურად ბიუჯეტი იქნება 3 მილიარდ 400 მილიონი ლარი. შედარებისთვის, მინდა ვთქვა, რომ 2012 წელს, ბიუჯეტი გაიზარდა 2 მილიარდ 700 მილიონ ლარით, 419%-ითაა გაზრდილი ბატონი ქარსელაძის სამინისტროს ბიუჯეტი, 2012 წელს იყო 2 მილიარდ 700 მილიონი ლარით ნაკლები, რაც, რა თქმა უნდა, ძალიან დიდი ზრდაა. ეს ყველაფერი ჩანს და ხედავთ, რომ მთელი ქვეყნის მასშტაბით არის მშენებლობა გაჩაღებული, იქნება ეს გზები, ხიდები, ავტობანები, თუ მაგისტრალები. ყველა მუნიციპალიტეტის ურბანული განახლება, კურორტების განახლება.
ძალიან საინტერესო პროექტები გვაქვს დაგეგმილი 2024 წელს, ათ ქალაქში დავიწყებთ მასშტაბურ სამუშაოებს, ათი ტურისტული ქალაქი გამოვყავით: ბორჯომი, ყაზბეგი, მესტია, ბათუმი, ქუთაისი, თელავი, ზუგდიდი და ძალიან მნიშვნელოვანი სიახლეები გვექნება 2024 წელს. ასევე, დასრულდება მთავარი მაგისტრალი რიკოთის უღელტეხილზე და მოკლედ, ძალიან მნიშვნელოვანი სიახლეები გვექნება ამ მიმართულებითაც“.
მთავრობის მეთაურის თქმით, რაც შეეხება პროექტების დასაფინანსებლად გამოყოფილ თანხებს, ამისთვის დამატებით 110 მილიონი ლარი გამოიყოფა.
„რეგიონებისთვის, ჯამში, ახლა გვაქვს გათვალისწინებული 450 მილიონი ლარი, მაგრამ ვნახოთ, შეიძლება კიდევ დავამატოთ 500 მილიონ ლარამდე და დამატებით გაზრდას ვფიქრობთ, მაგრამ ამ ეტაპზე, 450 მილიონი ლარი მიემართება რეგიონებში, რომელიც გადანაწილდება მუნიციპალიტეტებზე და ისინი დაიწყებენ საინტერესო პროექტების განხორციელებას.
ზრდა არის გათვალისწინებული თბილისშიც. მინდა, შედარებისთვის გითხრათ, რომ 2012 წელს, თბილისის ბიუჯეტი საკმაოდ დაბალი იყო. 2024 წლიდან, თბილისის მთლიანი ბიუჯეტი იქნება მილიარდ 875 მილიონი ლარი და შედარებისთვის გეტყვით, რომ ეს არის მილიარდ 190 მილიონამდე ანუ 173 %-იანი ზრდა თბილისის შემთხვევაში, რაც, რა თქმა უნდა, ძალიან ეფექტიანი მატებაა“.
რაც შეეხება ძალოვან უწყებებს, პრემიერის თქმით, თითქმის 200 მილიონზე მეტით გაეზარდა ჯამური დაფინანსება შინაგან საქმეთა და თავდაცვის სამინისტროებს, ასევე, სახელმწიფო უსაფრთხოების სამსახურს.
„ჩვენ დამატებით გამოვუყოფთ თავდაცვას 10 მილიონს. 50 მილიონს შინაგან საქმეთა სამინისტროს მივცემთ, საიდანაც 20 მილიონი ლარი მოხმარდება სახანძრო-სამაშველო მანქანებისა და ტექნიკის შეძენას, რაც ძალიან მნიშვნელოვანია. იცით, რომ სამი ვერტმფრენი უკვე შეძენილია - ფრანგული წარმოების ვერტმფრენები შეძენილია და ეტაპობრივად დაიწყება მოწოდება 2024 წელს. სპორტის მიმართულებით, დამატებით გამოვყოფთ 20 მილიონ ლარს, აქედან 15 მილიონი ლარი მოხმარდება სპორტულ ფედერაციებს და 5 მილიონი ლარი მიემართება დამსახურებული სპორტსმენების, მწვრთნელების, საექიმო პერსონალის ყოველთვიური სტიპენდიების ზრდას.
ბოლოს, მინდა, ელექტრონული არჩევნების საკითხს შევეხო. დამატებით 25 მილიონ ლარს გამოვუყოფთ საარჩევნო კომისიას და ჯამში, ბიუჯეტში გათვალისწინებულია 125 მილიონი ლარი, რომელიც მოხმარდება ელექტრონული არჩევნების ჩატარებას. აი, ეს არის ის ძირითადი საკითხები, რომელიც გავითვალისწინეთ 2024 წლისს ბიუჯეტის კორექტირებულ ვარიანტში. ჩვენ უვკე გადავუგზავნეთ პარლმენტს ეს მეორე ვარიანტი, მაგრამ გვექნება კიდევ დამატებით ერთი თვე, ვიმუშავებთ ჩვენს გუნდთან ერთად, პარლამენტთან ერთად აქტიურად, კიდევ დავაზუსტებთ, დავხვეწთ ბიუჯეტს და ვფიქრობ, 2024 წელს გვექნება ძალიან ძლიერი, გამართული ბიუჯეტი, რომელიც ჩვენ წინაშე არსებულ გამოწვევებს სათანადოდ უპასუხებს“.
ავტორი: მაკა რუხაძე
85 მილიარდ 370 მილიონი ლარი - 2024 წლის სახელმწიფო ბიუჯეტის მეორე, გადამუშავებული ვარიანტი უკვე პარლამენტშია
მოირგე სტილი დაასვენე თვალი
- პატარა მოზრდილი საშუალო დიდი უდიდესი
- ჩვეულებრივი ჰელვეტიკა ჰეგოე გეორგია ტაიმსი
- კითხვის რეჟიმი