27 დეკემბერს აფხაზეთის დე ფაქტო პრეზიდენტმა, ასლან ბჟანიამ ხელი მოაწერა დოკუმენტს, რომლითაც ბიჭვინთის ყოფილი სახელმწიფო აგარაკი რუსეთს გადაეცა. ნაგებობები და 160 ჰექტარი ფართობის ტერიტორია რუსეთის საკუთრებაში 49 წლით გადავიდა.
თბილისში მომხდარს საქართველოს ტერიტორიის ოკუოpაციის შემდეგ მისი ანექსიის პირველი შემთხვევა უწოდეს, ხოლო სოხუმში - ქურდობა.
ბჟანიას ხელმოწერამდე იყო დე ფაქტო პარლამენტის მრავალსაათიანი რიგგარეშე სხდომა, ოპოზიციის საპროტესტო აქცია და „რუსეთ-აფხაზეთის შეთანხმების” დილის 6 საათზე რატიფიცირება.
პოლიტიკური ანალიტიკოსებისათვის აშკარაა, რომ აფხაზეთში მიმდინარეობს მნიშვნელოვანი პოლიტიკური პროცესები, რისი ნაწილიცაა სამოქალაქო პროტესტი. აფხაზური საზოგადოება ცდილობს წინააღმდეგობა გაუწიოს რუსეთის ანექსიურ პოლიტიკას, ხოლო რუსეთი, მიუხედავად საქართველოს ხელისუფლებასთან გადატვირთვის პოლიტიკისა, განაგრძობს თავისი გეოპოლიტიკური ამოცანების შესრულებას.
აფხაზეთში ე.წ. ოპოზიციური პარტიები და სამოქალაქო საზოგადოების წარმომადგენლები მიიჩნევენ, რომ ბიჭვინთის აგარაკი კანონის დარღვევით გადაეცა რუსეთს. მათი აზრით, პირველ რიგში დაირღვა დე ფაქტო რესპუბლიკის კონსტიტუცია და პარლამენტის რეგლამენტი.
როგორც 27 დეკემბერს ე.წ. პარლამენტის სპიკერმა, ლაშა აშუბამ განმარტა, დილის 6 საათამდე გაგრძელებულ რიგგარეშე სესიაზე, სამი მოსმენით მიიღეს ცვლილებები რამდენიმე კანონში, შემდეგ კი კენჭი უყარეს შეთანხმების რატიფიცირებას:
„დღეს ჩვენ მივიღეთ არაერთი დელეგაცია, განვიხილეთ ამ შეთანხმების მიღების რამდენიმე საკითხი, რათა უზრუნველგვეყო რესპუბლიკის უსაფრთხოება. პირველი საკითხი, რომელიც დაკავშირებულია აგარაკისა და მისი ტერიტორიის კოორდინატებთან, რუსულმა მხარემ მიიღო ჩვენი შენიშვნები. მეორე საკითხი, ე.წ. მესამე მხარისთვის გადაცემის გამორიცხვა. შევიდა ცვლილებები „საერთაშორისო ხელშეკრულებების შესახებ“ კანონში, სამოქალაქო კოდექსსა და სპეციალურ კონსტიტუციურ კანონში, რომელიც კონკრეტულად ეხება სახელმწიფო აგარაკის გადაცემას. ჩაიწერა, რომ ობიექტის მესამე პირებისთვის გადაცემის შემთხვევაში, ხელშეკრულება შეწყდება და ქონება დაუბრუნდება აფხაზეთის რესპუბლიკას. 35 დეპუტატიდან რიგგარეშე სესიაში 28 დეპუტატი მონაწილეობდა, ცვლილებებსა და რატიფიკაციას მხარი დაუჭირა 25-მა დეპუტატმა. ყველა ცვლილება მიღებული იქნა სამი მოსმენით“.
აფხაზური ოპოზიციის ლიდერები მიიჩნევენ, რომ გადაწყვეტილების მიღებისას დაირღვა პარლამენტის საქმიანობის პრინციპები, რაც ხელახალი კენჭისყრის საფუძველია.
„თუ ეს რეგლამენტი დარღვეულია ან გამოვლინდა შეცდომები წესებში, ტექნიკასა და კენჭისყრის პროცედურაში, პარლამენტის გადაწყვეტილებით კენჭისყრა განმეორებით უნდა ჩატარდეს. კანონის მოთხოვნაა, რომ საპარლამენტო სხდომები უნდა იმართებოდეს ღიად და შუქდებოდეს მედიით“, - ნათქვამია განცხადებაში, რომელსაც აფხაზური „ნუჟნაია გაზეტა“ ავრცელებს.
თუმცა 27 დეკემბერს მიღებულ გადაწყვეტილებას მხოლოდ პროცედურული ხარვეზების გამო არ აკრიტიკებენ. ოკუპირებულ აფხაზეთში მოქმედი ოპოზიციური პარტიები და სამოქალაქო აქტივისტები მიიჩნევენ, რომ „აფხაზი ხალხისთვის წმინდა ცნებები“ - მიწისა და ბუნების ხელშეუხებლობა უხეშადაა უგულებელყოფილი.
აფხაზი პოლიტოლოგი იზიდა ჭანია ასლან ბჟანიასა და მის მთავრობას ქურდების ხელისუფლებას უწოდებს.
„ღამით პარლამენტის კედლებთან დგომისას, როცა ჩაკეტილ კარს მიღმა დილის 6 საათამდე მიმდინარეობდა პარლამენტის სესიის გამოუცხადებელი სხდომა, გამიჩნდა ასოციაცია, რომ ზუსტად ასე იქცევიან ქურდები, რომლებიც შუაღამისას სხვის სახლში იპარებიან, გააქვთ იქიდან ქონება და თან ფიზიკური ძალადობით იმუქრებიან, მერე კი ნაქურდალი მიაქვთ მოპარულების მყიდველთან, რათა იაფად გაინთავისუფლონ ხელი“, - ამბობს პოლიტოლოგი.
ომის ვეტერანი და სამოქალაქო აქტივისტი ლაშა ზუხბა, რომელმაც ასევე მთელი ღამე გაატარა პარლამენტის წინ გამართულ საპროტესტო აქციაზე და, რომელიც იმედოვნებდა, რომ ე.წ. პარლამენტი ვერ გაბედავდა 2022 წლის 18 იანვარს მოსკოვსა დ სოხუმს შორის ხელმოწერილი ხელშეკრულების რატიფიცირებას, იმედგაცრუებული წერს ფეისბუკზე:
„მძიმეა 30 წლის შემდეგ იმის გააზრება, რომ არასწორ მხარეზე იბრძოდი“.
რადიო თავისუფლების რუსულენოვანი პროექტის, „ეხო კავკაზას“ მიერ სოხუმის ქუჩებში ჩატარებული გამოკითხვაც აჩვენებს, რომ დე ფაქტო ხელისუფლებამ უკიდურესად არაპოპულარული გადაწყვეტილება მიიღო.
ასიდა შაკრილი, ყოფილი ომბუდსმენი: „რიგგარეშე სესიის ჩასატარებლად საჭირო იყო სერიოზული საფუძველი. არადა, ჩვენ არ გვაქვს არც საგანგებო მდგომარეობა და არც ომი, რომ გამართლებული იყოს ასეთი საგანგებო სხდომების ჩატარება. პატარა აფხაზეთისთვის ძვირფასი მიწის უზარმაზარი ტერიტორია გადაეცა სხვა სახელმწიფოს. ჩვენ ვკარგავთ იურისდიქციას ამ ტერიტორიაზე. ეს უპრეცედენტო გადაწყვეტილებაა. პრეზიდენტმა კიდევ ერთხელ დაამტკიცა, რომ მას არ აღელვებს აფხაზეთის სახელმწიფო და აფხაზი ხალხის ბედი“.
ნარსოუ კვიცინია, „აიააირას“ უმაღლესი საბჭოს წევრი: „ეს არის განგაშის ზარი, ჯაჭვური რეაქცია, რომ ნელ-ნელა დავკარგავთ ჩვენს სუვერენიტეტს. ხალხის არჩეულმა დეპუტატებმა იგნორირება გაუკეთეს ხალხს, რომელიც მთელი ღამე იდგა პარლამენტის წინ“.
ალექსანდრა ბარგანჯია, ახალგაზრდული მოძრაობა „ჩვენი ბიჭვინთა“: „ძნელია საჭირო სიტყვების მოძებნა. ჩემთვის ეს არის შავი დღე აფხაზეთის სახელმწიფოებრიობის ისტორიაში. თავს ვგრძნობთ მოტყუებულად და არ ვაპირებთ თვალის დახუჭვას და შეგუებას. ვგეგმავთ ბოლომდე დავიცვათ ჩვენი ეროვნული ინტერესები“.
რუსეთმა ბიჭვინთა წაიღო - ანექსიის პირველი ფაქტი თბილისისთვის, შავი დღე აფხაზებისთვის
მოირგე სტილი დაასვენე თვალი
- პატარა მოზრდილი საშუალო დიდი უდიდესი
- ჩვეულებრივი ჰელვეტიკა ჰეგოე გეორგია ტაიმსი
- კითხვის რეჟიმი