თუ ბიჭვინთის აგარაკს რუსეთს გადასცემენ, აფხაზური ოპოზიცია ასლან ბჟანიას „დამხობით“ ემუქრება

28 დეკემბერს აფხაზეთის პარლამენტი ბიჭვინთის სახელმწიფო აგარაკის რუსეთისთვის გადაცემის შესახებ ხელშეკრულების რატიფიცირების საკითხს კიდევ ერთხელ განიხილავს. ოპოზიცია და სამოქალაქო საზოგადოების წარმომადგენლები ამის თავიდან აცილებას „ხალხის ძალით“ აპირებენ, და თუ მათ ესეც არ დაეხმარებათ, მაშინ ასლან ბჟანიას “დამხობას” განიხილავენ.

მანამდე ეს საკითხი დღის წესრიგიდან მოიხსნა, რადგან ბოლო მომენტში გაირკვა, რომ მოსკოვსა და სოხუმს შორის 2022 წლის დასაწყისში გაფორმებულ ხელშეკრულებაში არასწორად იყო მითითებული რუსეთის საკუთრებაში გადაცემული ბიჭვინთის სახელმწიფო აგარაკის კოორდინატები. ამ შეცდომის გამო აღმოჩნდა, რომ აგარაკის ტერიტორიის 180 ჰექტრის გარდა, თავად ბიჭვინთის კურორტის ტერიტორიის უმეტესი ნაწილიც რუსეთს ეკუთვნოდა.

შეცდომა ორივე მხარემ აღიარა. მაგრამ მოსკოვი ხედავდა გამოსავალს, რომ აფხაზეთის პარლამენტმა ჯერ ამ ფორმით მოახდინა შეთანხმების რატიფიცირება და მხოლოდ ამის შემდეგ შეცვალოს იგი ცალკეული აქტით. მაგრამ პარლამენტი არ დათანხმდა და უკანონოდ მიიჩნია. შედეგად, რატიფიკაციის საკითხი გაურკვეველი ვადით გადაიდო.

თუმცა, კოორდინატებთან დაკავშირებული შეცდომა უფრო მეტად ფორმალური მიზეზი გახდა, რადგან თავად ამ შეთანხმებამ სერიოზული რეზონანსი გამოიწვია აფხაზურ საზოგადოებაში. ოპოზიციური ფლანგის იურისტებმა დოკუმენტში დათვალეს 30-მდე პუნქტი, რომელიც ეწინააღმდეგება აფხაზურ კანონმდებლობას.

ახლა კი ასლან ბჟანიას – რომელიც აქტიურად ლობირებს ამ საკითხს – მორიგი მცდელობა აქვს, რომ საბოლოოდ დადოს გარიგება. ამისათვის ის დეკემბრის დასაწყისში სპეციალურად ეწვია პარლამენტს, სადაც დეპუტატებს განუცხადა, რომ მოსკოვმა გამოასწორა შეცდომა კოორდინატებში და დადგა დრო, სოხუმმა მოახდინოს შეთანხმების რატიფიცირება.

მას შემდეგ, რაც ცნობილი გახდა, რომ ეს საკითხი 28 დეკემბერს დაგეგმილი პარლამენტის სესიის დღის წესრიგში დადგა, შეთანხმების მოწინააღმდეგეები მკვეთრად გააქტიურდნენ.

22 დეკემბერს ოპოზიციამ და სამოქალაქო სექტორის წარმომადგენლებმა ერთობლივი შეხვედრა გამართეს, რომელზეც გადაწყვიტეს გამოიყენონ ყველა შესაძლო საშუალება ხელისუფლების განზრახვების ჩასაშლელად.

ისტორიკოსი გურამ გუმბა:

„ჩვენ მუდმივად გვრცხვენია, როდესაც ჩვენი არჩეული პრეზიდენტი გამოჩნდება. როგორ შეიძლება ეს? ჩვენ ვხედავთ ელიტას, რომელიც არა მხოლოდ მოწყვეტილია ხალხს და მის მისწრაფებებს, არამედ ახორციელებს ანტისახელმწიფოებრივ, ანტიაფხაზურ პოლიტიკას“, – განაცხადა მან შეხვედრაზე.

ახალგაზრდული მოძრაობა „ჩვენი ბიჭვინთა“ აქტივისტი ნაიდა აბიდოვა:

„ხელისუფლების რიტორიკა იმის შესახებ, რომ ბინების შესახებ კანონის მიღება ან ბიჭვინთაში აგარაკის რუსეთისთვის გადაცემა, სავარაუდოდ, ჩვენი მომავლისთვის დადებით როლს ითამაშებს, ფუნდამენტურად არასწორია. ამგვარმა რიტორიკამ უნდა გამოიწვიოს საზოგადოების გაბრაზება და აღშფოთება. მე არ მჯერა, რომ აფხაზეთის განვითარება მხოლოდ მისი დაკარგვით შეიძლება“.

სოხუმის ყოფილი მერი, ოპოზიციური დეპუტატი კან კვარჩია:

„თუკი პარლამენტი იძულებული გახდება რატიფიცირება 28 დეკემბერს განიხილოს, მაშინ ჩვენ უნდა მოვახდინოთ ხალხის მობილიზება. ჩვენ უნდა დავიცვათ ქვეყანა. ახალგაზრდებმა ახალგაზრდებს უნდა მიმართონ, უფროსმა თაობამ უფროს თაობას, ქალებმა ქალებს, ალბათ უფრო გაუგებენ ერთმანეთს. ჩვენ უნდა შევაჩეროთ პრეზიდენტი“.

ბჟანიას ოპონენტებმა არ დაასახელეს თავიანთი გეგმის დეტალები, მაგრამ ისინი ძალიან მტკიცედ არიან განწყობილნი. მათი თქმით, შეთანხმება არ შეესაბამება სახელმწიფოთაშორის დოკუმენტს, ვინაიდან შეიცავს ანტიკონსტიტუციურ ნორმებს. ოპოზიციური ორგანიზაციები მოუწოდებენ დეპუტატებს „არ მიიღონ მონაწილეობა პრეზიდენტის საეჭვო ავანტიურებში“.

აფხაზეთის ოპოზიციის წარმომადგენლები ღიად ამბობენ, რომ თუ ასლან ბჟანია დოკუმენტს არ გააუქმებს, ისინი ყველაფერს გააკეთებენ, რათა მის გადადგომას მიაღწიონ.

წყარო:jam-news