104 ახალი სტატია

როგორ ასაბუთებს ენმ-ს წევრი პარლამენტში შესვლას - ინტერვიუ ნონა მამულაშვილთან

პოლიტიკა
მოირგე სტილი დაასვენე თვალი
  • პატარა მოზრდილი საშუალო დიდი უდიდესი
  • ჩვეულებრივი ჰელვეტიკა ჰეგოე გეორგია ტაიმსი

 „დასავლელი პარტნიორები კულუარებში აღიარებენ, რომ არჩევნები გაყალბდა“

 

 შვიდთვიანი ბოიკოტი დასრულდა - საქართველოს პარლამენტში ნაციონალური მოძრაობაც შედის, თუმცა როგორც პარტიის თავმჯდომარე ნიკა მელიამ განაცხადა, შარლ მიშელის მიერ შემოთავაზებულ შეთანხმების დოკუმენტს ხელს არ აწერს. „ნაცმოძრაობისთვის“ მიუღებელი ამნისტიის შესახებ პუნქტი აღმოჩნდა. „ვერსია“ ნაციონალური მოძრაობის წარმომადგენელ ნონა მამულაშვილს ესაუბრა, რომლის თქმითაც, როგორც დეპუტატი, საკანონმდებლო ორგანოში საქმიანობას, მომავალი კვირიდან შეუდგება:

 

- ქალბატონო ნონა, თუ პარლამენტში შესვლა გადაწყვიტეთ, შარლ მიშელის დოკუმენტს ხელს რატომ არ აწერთ?

- ამ დოკუმენტთან მიმართებაში, ჩვენი პოზიცია თავიდანვე ნათელი იყო: მიუხედავად იმისა, რომ მივესალმებით ევროკავშირის ასეთ ძალისხმევას, რითაც პოლიტიკური კრიზისი დასრულდა საქართველოში, რაც უპრეცედენტოა იმიტომ, რომ არ არსებობს პრეცენდენტი, ევროკავშირს გამოესყიდა პოლიტიკური ტყვეობიდან პიროვნება, არ ვეთანხმებით ამნისტიის შესახებ პუნქტს, რომელიც ჩადებული იყო შეთანხმებაში. „ქართულმა ოცნებამ“ ისეთი ინტერპრეტირება გაუკეთა, რომელიც თავად აწყობს, რათა გადაარჩინოს სისხლის სამართლის დამნაშავეები. არადა, ეს პუნქტი ჩაიდო მხოლოდ იმისთვის, რომ ნიკა მელია და გიორგი რურუა დაეხსნათ ტყვეობიდან, „ქართულმა ოცნებამ“ კი მორიგი „ტრიუკი“ ჩაატარა და გადაათამაშა ისე, რომ დამნაშავეები პასუხისმგებლობას აარიდოს. ეს ძალიან პრინციპული საკითხია. მიუხედავად იმისა, რომ ხელი არ მოვაწერეთ შარლ მიშელის დოკუმენტს, ყველანაირად ჩართულები ვიქნებით და ვიმუშავებთ ყველაფერზე, მაგრამ ამნისტიის შესახებ პუნქტი, ჩვენთვის სრულიად მიუღებელია.

- ამნისტიის შესახებ პუნქტი დოკუმენტში მაშინ ჩაიდო, როცა მელია უარს აცხადებდა გირაოს სანაცვლოდ გათავისუფლებაზე. შემდეგ კი დათანხმდა, თუმცა ეს მაშინ მოხდა, როცა მოლაპარაკების მხარეები ვეღარ ამოიღებდნენ ვერც ერთ პუნქტს ხელმოწერილი დოკუმენტიდან. ამიტომ, აქ ნიკა მელიასა და „ნაციონალური მოძრაობის“ პასუხისმგებლობას ვერ ხედავთ?

- ნიკა მელია პირველივე დღიდან აცხადებდა, რომ არ აპირებდა გირაოს გადახდას, რადგან ის იყო პოლიტიკური პატიმარი და ეს აღიარა ევროკავშირმაც. პოლიტიკური პატიმრის ამ სახით შანტაჟი კი აბსოლუტურად მიუღებელია, თუმცა ეს „ქართული ოცნებისთვის“ უცხო  არაა. გვაჩვენეს ბოლო 8 წლის განმავლობაში, რომ სამართალი მაქსიმალურად პოლიტიზირებულია...

- კი, მაგრამ შემდეგ ხომ დათანხმდა მელია გირაოს?

- ამ შეთანხმების მიხედვით, ტექნიკურად, მელიას თანხმობა საჭირო არც იყო, რომ ევროკავშირს ეს გაეკეთებინა. ეს „ოცნების“ პიარსვლა იყო, თითქოს მელიას თანხმობა სჭირდებოდა და ვნახეთ ეს ხელისუფლებისთვის რითაც დასრულდა - ფაქტობრივად, მოუწია  აღიარება, რომ ჰყავდა პოლიტიკური პატიმარი, რომელიც გამოისყიდა ევროკავშირმა. ასეთი პრეცენდენტი გახსენდებათ? - მსგავსი რამ არ ყოფილა.

- ქალბატონო ნონა, როგორ ფიქრობთ, თქვენი პარლამენტში შესვლით, ამომრჩეველი არ დაიბნევა? პარტიები ერთმანეთის მიყოლებით შედიან პარლამენტში და აგვიხსენით, რა მოხდა ასეთი პოლიტიკურ სივრცეში, რამაც ბოიკოტი დაგასრულებინათ?

- ოპოზიციას ერთადერთი ინსტრუმენტი - ბოიკოტი დარჩა, რომ გაეპროტესტებინა არჩევნების შედეგები. კულუარებში, დასავლელი პარტნიორები აღიარებენ, რომ რეალურად იციან, გაყალბდა, მაგრამ, სამწუხაროდ, არ ჰყავდათ საკმარისი დამკვირვებლები და ეს იყო ის გარღვევა, რის გამოც, ამაზე უფრო ხმამაღლა ვერ ლაპარაკობენ.

რაც შეეხება ჩვენს ამომრჩეველს, პირველივე დღიდან ვუხსნიდით, თუ რატომ იყო ბოიკოტი საჭირო და რა რეზულტატი მოიტანა.

- და რა რეზულტატი მოიტანა?

- ის, რომ პოლიტპატიმრები დავიხსენით. პრემიერ-მინისტრი თანამდებობიდან გადადგა, პარლამენტის თავმჯდომარეები, ერთი-მეორეს მიყოლებით, გადააყენეს. ევროპამ და აშშ-მა ასეთი ყურადღება მიაქცია ჩვენს ქვეყანას, როცა, პრაქტიკულად, რუკიდან ვიყავით წაშლილი „ქართული ოცნების“ პერიოდში, რომელმაც ყველანაირად სცადა, საქართველოს თემა არც ერთ საერთაშორისო ფორმატში არ გაჟღერებულიყო. ახლა კი ევროკავშირმა და აშშ-მა აჩვენეს, რომ საქართველოს არ დაუთმობენ რუსეთს, რაც, სწორედ, ამ ბოიკოტის შედეგია. შარლ მიშელი, ამხელა რანგის დიპლომატები ჩამოვიდნენ საქართველოში, სენატმა მოსმენა მოგვიძღვნა, უამრავი სტატია დაიწერა საერთაშორისო პრესაში და ბოლო 8 წლის განმავლობაში გახსენდებათ, რომ ასეთი გამოხმაურება ჰქონოდა საქართველოს?

- როგორც ოპოზიცია ამბობდა, ბოიკოტის შედეგი უნდა ყოფილიყო ვადამდელი არჩევნები. ასე არაა?

- რეალურად, ეს 43%-იანი ბარიერი, რომელიც ჩაიდო დოკუმენტში, არის ის რეფერენდუმი, რომელსაც ვითხოვდით. აქ ლაპარაკი მხოლოდ ადგილობრივი თვითმმართველობის არჩევნებზე კი არა, იმაზეა, რომ მოსახლეობამ უნდა გააკეთოს არჩევანი - იქნება თუ არა ვადამდელი არჩევნები და დარჩება თუ არა „ქართული ოცნება“ ხელისუფლებაში.

- ისე, პარტიაში როგორი მოლოდინი გაქვთ, „ქართულ ოცნებას“ აქვს რესურსი, რომ 43% აიღოს ადგილობრივ არჩევნებში?

- ეს ციფრი რომ დაიდო, ევროკავშირს მოუწია სხვადასხვა ვარიანტზე მუშაობა და შეთანხმდნენ „ქართული ოცნებისთვის“ მისაღებ 43%-ზე. რაც შეეხება ჩვენს ამომრჩეველს, სანამ პოზიციას გავაჟღერებდით, მათ აქტიურად ვესაუბრეთ. შიდა კვლევაც ჩატარდა, რომ გაგვეგო, უნდა თუ არა ჩვენს ამომრჩეველს, რომ შევიდეთ პარლამენტში და დადებითი შედეგი მივიღეთ, 50%-ზე მეტს უნდოდა, რომ პარლამენტში ვყოფილიყავით.

რაც შეეხება საშემოდგომო არჩევნებს, წინა კვირას, ბრიუსელში, ბატონ მიხეილ სააკაშვილთან ერთად, აქტიური შეხვედრები გვქონდა ჩვენს დასავლელ პარტნიორებთან და ერთადერთი საკითხი, რაზეც ვთანხმდებით, ისაა, რომ შარშანდელ საპარლამენტო არჩევნებში არ იყო დამკვირვებლების საკმარისი რაოდენობა. ძალიან ცოტა დამკვირვებელი ჩამოვიდა.

- პანდემიის გამო იყო ეს შეზღუდვა...

- პანდემია, როგორც პოლიტიკური ინსტრუმენტი, ძალიან გამოადგა „ქართულ ოცნებას“, რეალურად, 100 დამკვირვებელი არაა საკმარისი. ამიტომ, ვთხოვეთ და პარტნიორებიც დაგვპირდნენ, რომ მაქსიმალურად ეცდებიან, ამ არჩევნებზე ჰყავდეთ დამკვირვებლების უპრეცედენტო რაოდენობა. მიუხედავად იმისა, რომ „ქართული ოცნება“ ეცდება, გააყალბოს, რადგან თავადაც იცის, რომ სხვანაირად ვერ მიიღებს 43%-ს, ჩვენ გვეყოლება საერთაშორისო დამკვირვებლები და ვეცდებით, მაქსიმალურად  გავაკონტროლოთ პროცესი, რათა არ გაყალბდეს.