მწეველებს პომიდვრის ჭამას ურჩევენ

ეს ბაღჩეული კულტურა ისევე, როგორც ტკბილი წიწაკა, კარტოფილი და ბადრიჯანი, მდიდარია ნიკოტინის მჟავით. თუ ადამიანის ორგანიზმი საკმარისი რაოდენობით იღებს ამ ნივთიერებას, შესაბამისად, სიგარეტისადმი მოთხოვნაც ნაკლებად უჩნდება. ასე რომ, თუკი მოწევისთვის თავის დანებება გინდათ, შეგიძლიათ, ზემოთ ჩამოთვლილი ბოსტნეული ხშირად მიირთვათ, განსაკუთრებით - პომიდორი. ის მდიდარია ასევე ლიკოპინით - ანტიოქსიდანტით, რაც მას წითელ ფერს აძლევს. კვლევებით გაირკვა, რომ ეს ნივთიერება აქტიურად ზემოქმედებს სიმსივნურ უჯრედებზე და მათ ზრდას ანელებს. მეტიც, ეს ნივთიერება ზრდის ფერტილობის მაჩვენებელს მამაკაცებში და იცავს გულის დაავადებებისგან, ხოლო სახის კანს - დაბერებისგან. რაც მთავარია, პომიდორი დიეტური, დაბალკალორიული პროდუქტია და შეგიძლიათ, ეს ბოსტნეული თამამად მიირთვათ.