კახა კუკავას პოლიტიკური აღსარება

(ო) პოზიცია

 

 

რატომ არ აპირებს 2024 წლის არჩევნებში მონაწილეობას და რას თვლის „მიქარვად“ პოლიტიკოსი

 

თათია გოჩაძე

 

ზოგი ოპოზიციონერის მიერ დაანონსებული პოლიტიკურად ცხელი შემოდგომისა რა მოგახსენოთ, მაგრამ ქვეყანაში პოლიტიკური პროცესები რომ წყნარ ტონში ვითარდება, ცალსახაა. მმართველი ძალა ევროკავშირის მიერ გადმოცემული 12-პუნქტიანი გეგმის შესასრულებლად საკანონმდებლო ინიციატივებს ქმნის და განიხილავს. საპარლამენტო ოპოზიციის ნაწილი ამ გეგმის შესასრულებლად დამოუკიდებლად მუშაობს. პარალელურად, პარლამენტი ახალი სახალხო დამცველის ასარჩევად ემზადება და ენმ-ის მიერ დაანონსებული საპროტესტო აქციებიც ვადამდელი არჩევნების მოთხოვნით, არ ჩანს... ამის ფონზე, საინტერესოა, რას გეგმავს, როგორ მოქმედებს და რატომ აღარ ჩანს მედიაში ე.წ. შუაშისტური პოლიტიკური ფლანგი... „ვერსია“ თავისუფალი საქართველოს ლიდერ კახა კუკავას ესაუბრა:

 

- ბატონო კახა, რატომ აღარ ჩანხართ აქტიურ პოლიტიკაში, რას საქმიანობთ, რას გეგმავთ?

- ტელევიზიებით არ ვჩანვართ იმიტომ, რომ ბოიკოტი აქვთ გამოცხადებული იმ ოპოზიციური პარტიების მიმართ, რომლებიც არც „ქოცების“ ფლანგზე არიან და არც - „ნაცების“, თუმცა სოციალურ ქსელში თუ დააკვირდებით ჩვენს აქტივობას, თუნდაც გამოსახლებებთან დაკავშირებით, ნათლად ჩანს, რომ ჩვენი მოძრაობის მიმართ ინტერესი გაცილებით მაღალია, ვიდრე - სხვა პარტიების. პარტიების ათასობით დოლარით დარეკლამებულ გვერდებზე ათჯერ მეტი ინტერესი ჩვენს გვერდზე დადებული ვიდეოების მიმართ აქვს ხალხს.

რაც შეეხება იმას, თუ რას ვგეგმავთ არასაპარლამენტო ოპიზიციაში, ამაზე თქვენთან არაერთხელ მისაუბრია და იმავეს ვფიქრობ, რომ უნდა მოხდეს „არაქოც“ და „არანაც“ პოლიტიკურ-საზოგადოებრივი ჯგუფების ერთ კოალიციაში გაერთიანება, თუმცა ვერ გეტყვით, რომ ამაზე ინტენსიურად ვმუშაობთ.

ამ საკითხზე ვსაუბრობთ, თუმცა ეს პროცესი მიდის ძალიან ნელა გამომდინარე იქიდან, რომ ძალიან ამორფულია ე.წ. შუაშისტების მასა და ჭირს ყველაფერ ამის პოლიტიკურ ერთეულად გარდაქმნა, თუმცა დღეს იქნება თუ ხვალ, ეს უნდა მოხდეს, რადგან „ქოცი“ და „ნაცი“ არის ერთი და იგივე ჭაობი ქვეყნისთვის და რაც უნდა რთული იყოს, უნდა შეიქმნას ახალი მოძრაობა ქვეყანაში.

- რატომაა ამორფული არასაპარლამენტო ოპოზიცია?

- დავაკონკრეტოთ, რომ არ ვგულისხმობ მხოლოდ პარტიებს, რადგან პარტიული სპექტრი საკმაოდ სუსტი ვართ და პარტიების მექანიკური ჯამი არაფერს იძლევა. თუ ვსაუბრობთ გარკვეულ ერთიან ძალაზე, უფრო სწორი იქნება, გამოვთვალოთ არჩევნებში მონაწილეთა რაოდენობიდან ის, რომ მოსახლეობის მინიმუმ 50% პოლიტიკურ პროცესში არ მონაწილეობს. პირველ რიგში, ეს ხალხი უნდა ჩამოყალიბდეს მოძრაობად, მათ შორის, არასაპარლამენტო პარტიებიც...

- იმას გულისხმობთ, რომ არასაპარლამენტო ოპოზიციამ უნდა აითვისოს ხმები, რომელსაც ვერც ერთი საპარლამენტო პარტია ვერ იღებს და რა გიშლით ამაში ხელს?

- ალბათ, ის, რომ არასაპარლამენტო პარტიების დიდი ნაწილი არის ორიენტორებული საპარლამენტო, ლიბერალურ პარტიებსა და მედიაზე. სახელებსა და გვარებს ნუ მომთხოვთ, მაგრამ ვერ დავარწმუნე ისინი, რომ სჯობდა დამოუკიდებლად მოქმედება. ისინი მაინც მიიჩნევენ, რომ ჩვენ არ გვაქვს ტელევიზია, ფული, ვართ სუსტები და ამიტომ სჯობს, მაინც „ნაცების“ ირგვლივ ვიტრიალოთ. ეს საკუთარი ძალების უნდობლობაა...

ობიექტურ მიზეზებს რაც შეეხება, კარგად ვხვდებით, რომ უზარმაზარი ფულია ლიბერალურ ოპოზიციაში, რომელთანაც კონკურენცია მართლა ძნელია. უბრალოდ, როცა ჩემს მეგობრებს ვეუბნები, შეეშვით „ნაცებს“ და კოალიცია შევქმნათ-მეთქი, გამოვდივარ იქიდან, რომ რაც უნდა ბევრი ფული ჰქონდეთ მათ, მაინც წყალში გადაყრილია და „ნაცების“ თითოეული აქტივობა აძლიერებს „ქართულ ოცნებას“...

- რადგან არაერთხელ ახსენეთ, ენმ-ში მიმდინარე პროცესებზეც მაინტერესებს თქვენი მოსაზრება... როგორც ვხედავთ, ღია დაპირისპირებაა პარტიაში გავლენების გადანაწილებისთვის. როგორ ფიქრობთ, მთავარ ოპოზიციურ პარტიაში მიმდინარე ეს პროცესი ქვეყნისთვის სასარგებლო იქნება თუ საზიანო?

- ქვეყნისთვის იქნება სასარგებლო, თუ  ყველაფერი დამთავრდება ნაციონალური მოძრაობის განადგურებით, რადგან დღეს ქვეყნის სერიოზული პრობლემაა ის, რომ ბიძინა ივანიშვილის მთავარი დასაყრდენი არის მიხეილ სააკაშვილი. რომ არა სააკაშვილი, ბიძინა ივანიშვილი ამდენხანს ვერ იქნებოდა ხელისუფლებაში. ამიტომ, როგორც კი დაემხობა სააკაშვილის პარტია, მიჰყვება „ქართული ოცნებაც“. აქედან გამომდინარე, მივესალმები,  თუ განადგურდება ან ნაწილებად დაიშლება ერთიანი ნაციონალური მოძრაობა.

- სააკაშვილის ადვოკატებმა განაცხადეს, რომ მესამე პრეზიდენტი დისტანცირდა ქართული პოლიტიკიდან.

- თათია, ძალიან ახალგაზრდა ხარ და ალბათ, არ გახსოვს მიხეილ სააკაშვილი... ის არის ჩვეულებრივი თაღლითი, რომელიც ადვოკატსა და შვილს ეუბნება მაგას და უშვებს ამ მესიჯს, მაგრამ მეორე მხრივ, ვხედავთ, რას აცხადებენ მის პარტიაში, ამიტომაც ორ ცხენზე ჯდომა მისთვის დამახასიათებელია. თუ ეს რეალურად აქვს გადაწყვეტილი, მაშინ ამაზე უნდა ილაპარაკოს არა მარტო ვალერი გელბახიანმა, რომელიც არაა ნაციონალური მოძრაობის წევრი... ადვოკატი გელბახიანი ამბობს, მიშა პოლიტიკიდან მიდისო, მერე გამოდის ნუგზარ წიკლაური, მიშა ჩვენთანაა და ბრძოლა ბოლომდეო... ეს ორი ერთმანეთის საწინააღმდეგო მესიჯი მკაფიოობას არ წარმოშობს.

- როგორც ჩანს, ნიკა მელიას უპირისპირდება პარტიაში სააკაშვილის მხარდამჭერი ჯგუფი. გიორგი მუმლაძემ ისიც კი თქვა, მელია თავმჯდომარეობიდან პანღურითაა გასაგდებიო. როგორ ფიქრობთ, მელია წავა პარტიიდან და დაშლის ენმ-ს?

- არ ვიცი, ეს ინტრიგები როგორ დამთავრდება.

ნიშანდობლივია ორი ფაქტორი, რაც ნაცმოძრაობის შიგნით დუღილს ამოძრავებს. ერთია უნიჭობა, ენმ-ში დღეს არც ერთი ნიჭიერი პოლიტიკოსი არაა, რომელიც იტვირთებდა ლიდერის ფუნქციას, ყველაზე მეტი მონაცემები, ამ თვალსაზრისით, ჰქონდა მელიას. ყველა დანარჩენი უნიჭოა, პოლიტიკაში შემთხვევით მოხვედრილი, რომელიც არათუ ივანიშვილის წინააღმდეგ ვერ იმოქმედებს, არამედ, პირიქით, ვნახეთ ბოლო წლებში არაერთი შემთხვევა, როცა ქუჩაში გასაპროტესტებლად გამოსული ძალიან ბევრი ადამიანის მუხტი ნაციონალური მოძრაობის ლიდერებმა ჩააცხრეს.

მეორე პროცესი არის ივანიშვილის „ჯაშუშები“ ნაციონალურ მოძრაობაში, „ივანიშვილის ფული“ - ასე დავარქვათ, რომლებიც ყველანაირად ცდილობენ, ნაციონალური მოძრაობა არ ჩამოყალიბდეს რეალურ ოპონენტად. ივანიშვილი ცდილობს, ოპოზიციის ნებისმიერი ქმედება დაუკავშიროს სააკაშვილს და მისთვის ნაცმოძრაობა, რომელიც იქნება იდენტიფიცირებული სააკაშვილთან, იქნება უსაფრთხო, მაგრამ ნებისმიერი კოალიცია, რომელიც არ იქნება რევანშიზმსა და სააკაშვილთან ასოცირებული, შეიძლება გახდეს წარმატებული.

- პოლიტიკურად ცხელ შემოდგომას რომ აანონსებდა ზოგი ოპოზიციონერი და ჯერჯერობით, მსგავსი არაფერი ჩანს, ამას როგორ აფასებთ?

- როცა ეს დააანონსეს, მაშინვე დავწერე „ფეისბუქზე“, ხოშტარია და ჯაფარიძე 70 კაცს ვერ გამოიყვანენ ქუჩაში-მეთქი.

ბოლო-ბოლო, გამოცდილება დაგროვდა და ვხედავთ, რა რესურსია. როცა ვამბობ, რომ ოპოზიციაში უნიჭო ადამიანები არიან, პირადი გულისწყრომა კი არ მაქვს, ამას ვხედავ. მე არც ის გაერთიანებული ოპიზიცია მომწონდა, რომლის მონაწილეც ვიყავი 2007-2008-2009 წლებში, მაგრამ იმას ვერც კი შეადარებ...

დღევანდელთან შედარებით, ის „რომის სენატი“ იყო. ასეთ ხალხს, დღეს რომ განაგებს ოპოზიციას, ჩვენ დროშებს ვატარებინებდით აქციაზე დასაჭერად. არიან აბსოლუტურად აპოლიტიკური, საკუთარი ხალხის, კულტურის არმცოდნე ადამიანები.

ერთ მაგალითს მოგიყვანთ, ოპოზიცია რომ ხვიჩა კვარაცხელიას ლანძღვას დაიწყებს, ეს ხომ კარგად აჩვენებს, რამდენად აცდენილნი არიან საკუთარ ხალხს.

დღეს ამ ბიჭით ცხოვრობს, ხარობს ხალხი და ოპოზიცია მას რომ ლანძღავს, ეს ხომ ნიშნავს, რომ სხვა პლანეტაზე ცხოვრობენ?!   

ავტორიტარიზმის წინააღმდეგ ბრძოლა გულისხმობს მასობრივი მოძრაობის ჩამოყალიბებას, რომელიც ოპიზიციას გააერთიანებს. დღევანდელი ლიბერალური ოპოზიცია კი ყველგან კლავს წინააღმდეგობის მუხტს. ელენე ხოშტარია და ზურა ჯაფარიძე რომ აანონსებდნენ ცხელ შემოდგომას, რა თქმა უნდა, მათ ეთნიკურ ქართველობაში ეჭვი არ შემაქვს, მაგრამ მენტალურად ქართველი არც ერთია.

უცხოა ჩვენი საზოგადოებისთვის ეს ხალხი და არც მალავენ ისინი ერთგვარ ზიზღს. მუდმივად ზემოდან უყურებენ საზოგადოებას, აკრიტიკებენ ხალხს, რომ ჩამორჩენილი და ბნელია...

- ბატონო კახა, წეღან თქვით, დიდი ოპოზიციური გაერთიანებაა გამოსავალიო და იმ ოპოზიციამ, რომელსაც ასე მწვავედ აკრიტიკებთ, გაერთიანება და ერთ მაგიდასთან დაჯდომა რომ შემოგთავაზოთ, დათანხმდებით?

- არა, რა თქმა უნდა იმიტომ, რომ ამას ერთხელ უკვე დავთანხმდი და ძალიანაც „მივქარე“. გახსოვთ, ალბათ, შალვას „ფანჩატური“. ეს იყო ექსპერიმენტი და ეს შეცდომა ერთხელ უნდა დამეშვა. მაშინ გამაკრიტიკეს ამის გამო, თუმცა იმ დროს, გაერთიანების საკითხი ყველა კონკრეტული პარტიის ინტერესზე მაღლა იდგა. დავრწმუნდი, რომ შეუძლებელია ამ ადამიანებთან თანამშრომლობა, რადგან ცდილობენ, ნებისმიერი პოლიტიკური პროცესი საკუთარ ვიწროპარტიულ ინტერესს მოარგონ.

- ცოტა ხნის წინ, ე.წ. გამოსახლებების წინააღმდეგ საპროტესტო აქციაზე დაგაკავეს... ზოგი პოპულიზმში გადანაშაულებთ, რადგან მიიჩნევენ, რომ ბანკების მიერ გამოსახლება კანონიერი გზით ხდება. საინტერესოა, რატომ აირჩიეთ ეს საკითხი პროტესტისთვის?

- ზუსტად იმიტომ ავირჩიე, რომ ეს საკითხი ჩემი გამოგონილი კი არა, არამედ, საზოგადოებისთვის აქტუალურია და ოპოზიცია ასეთ სასიცოცხლო საკითხებზე რომ არ საუბრობს, იმიტომაც აგებს ყველა არჩევნებს ივანიშვილთან.

ოპოზიცია მუდმივად უნდა იყოს ორიენტირებული იმაზე, რაზეც ხალხი ლაპარაკობს და მსჯელობს. ასე თუ არ მოხდა, მაშინ ოპიზიცია ხალხს დასცილდება. გამოსახლების პრობლემა, მინიმუმ, ნახევარი მილიონი ქართველისთვის სიკვდილ-სიცოცხლის მნიშვნელობისაა. ამას არ აშუქებს არც ერთი მედიასაშუალება, ამაზე არ საუბრობს არც ერთი პარტია ჩვენ გარდა და მერე უკვირთ, რატომ არ აქვთ მხარდაჭერა.

- 2024 წლის არჩევნებში მონაწილეობას აპირებთ?

- დღეს შემიძლია გითხრათ, რომ  არ ვაპირებ და ვფიქრობ, შეიძლება, ჩემი შეცდომა ესეც იყო...

არჩევნებში მონაწილეობა არ უნდა იყოს ძირითადი თვითმიზანი პოლიტიკური საქმიანობისთვის. ჩემი ამოცანაა, შეიქმნას ის მოძრაობა, რაზეც გესაუბრეთ და თუ ეს მოხდა, არჩევნებში აუცილებლად აჩვენებს კარგ შედეგს. ხოლო თუ არ შეიქმნა, ყველა პარტიის ერთადერთი ამოცანა არის ხოლმე არჩევნებში არა რეალურად ხელისუფლებასთან კონკურენცია, არამედ, ერთი ან ორი მანდატის მოპოვება.

გამოდის პარტია, ყველამ იცის, რომ 1 ან 2 პროცენტს აიღებს და ბაქიბუქობს, ყველაფერს შევცვლი, უმრავლესობით მოვალო.

ერთმანეთსაც ვატყუებთ, საკუთარ თავსაც და ყველას... დაახლოებით, ყველამ ვიცით, რომ იმ პოლიტიკურ სპექტრს, რომელიც საქართველოშია, ერთი-ორი პროცენტი აქვს... შეიძლება გახარიამ 3% აიღოს, თუ გაუმართლა...

- ბატონო კახა, პოლიტიკურ აღსარებას მაბარებთ? ასე თვითკრიტიკული ადრე არ მახსოვხართ...

- ადრეც ამ პოზიციაზე ვიყავი. არასდროს მითქვამს ჩემს პარტიაზე, რომ 50%-ის აღებას შეძლებდა. უბრალოდ, ადრე ვთვლიდი, რომ არჩევნებში მონაწილეობა გამოგვეყენებინა, როგორც საეტაპო პროცესი,  მაგრამ ესეც შეუძლებელი გახდა, რადგან ხელისუფლებამ პარლამენტში შეიყვანა ის პარტიები, რომელთა განეიტრალებას უფრო ადვილად შეძლებს, ჩვენ კი დაგვტოვა გარეთ.

პარლამენტში მყოფ ოპოზიციას ხელისუფლება დებატებს ყოველთვის მოუგებს, მაგრამ დღეს რომ იქ იყოს „თავისუფალი საქართველოს“ ფრაქცია, რომელიც იტყოდა, გამოსახლებებზე უნდა გამოვაცხადოთ მორატორიუმიო, ხელისუფლება ჩავარდებოდა უხერხულ მდგომარეობაში და ესაა პასუხი იმაზე, თუ რატომ შეიყვანეს ელისაშვილი, ვაშაძე და რატომ დაგვბლოკეს ჩვენ.