"ბატონი მიხეილი მკურნალობას აგრძელებს თერაპიულ განყოფილებაში... თავს გრძნობს კარგად" - ნინო ნადირაძე

„ვივამედის“ დირექტორის, ნინო ნადირაძის განცხადებით, მიხეილ სააკაშვილს კვლევები უტარდება და ლაბორატორიული მონაცემები გაუარესებული არ არის. მისივე თქმით, უკვე ჩატარებული კვლევის შედეგები სახალხო დამცველს გაეგზავნა.

„მივდივართ ბოლოსკენ - მოვრჩებით კვლევებს. დიაგნოზები კვლავ იგივე რჩება. უბრალოდ, ჩვენ გვაინტერესებდა, დინამიკაში იყო თუ არა გაუარესება. ლაბორატორიული მონაცემები გაუარესებული ნამდვილად არ არის. გუშინ სრული კომპიუტერული ტომოგრაფიაც ჩაუტარდა. რაც შეეხება მოარულ თემებს - რომ [ინფორმაციას] არ ასაჯაროებენ, არ ამბობენ... მე მესმის, რომ თქვენ [ჟურნალისტებს] გჭირდებათ ნიუსი, მაგრამ ეს პაციენტის ჯანმრთელობას ეხება, ეს არ არის საჭორაო თემა. პაციენტი სრულ ნდობას გვიცხადებს და არ გამოთქვამს უკმაყოფილებას არც ჩვენი მკურნალობის ტაქტიკაზე, არც - ჩვენი კვლევების ტაქტიკაზე“, - აცხადებს ნინო ნადირაძე.

ყოფილი პრეზიდენტი, მსჯავრდებული მიხეილ სააკაშვილი კლინიკა „ვივამედში“ 12 მაისს გადაიყვანეს.