“მსოფლიოს ყველაზე წარმატებული და მშვიდობიანი დემოკრატიების კლუბში გაწევრიანება უკრაინას, ბალკანეთს, საქართველოსა და მოლდოვას ახალ, პერსპექტიულ გზაზე დააყენებს - “ეკონომისტი”

მსოფლიოს ყველაზე წარმატებული, მშვიდობიანი, აყვავებული დემოკრატიების კლუბში გაწევრიანება უკრაინას და ასპირანტ წევრებს დასავლეთ ბალკანეთში, საქართველოსა და მოლდოვას ახალ და პერსპექტიულ გზაზე დააყენებს, – ამის შესახებ საუბარია გამოცემა „ეკონომისტის“ სტატიაში.

სტატიის მიხედვით, ევროპის ქვეყნების პირველი კავშირიდან 70 წლის შემდეგ უკრაინის ნანგრევებიდან ისევ იღვიძებს რაღაც იმ სენტიმენტის მსგავსი, რომელმაც აღძრა ევროკავშირის დამფუძნებელი მამები, რადგან ახლა საუბარია ცხრა ახალი წევრის, მათ შორის, უკრაინის მიღებაზე.

„ლიდერები მთელი კონტინენტიდან, მათ შორის, წევრობის ახალი მსურველები შეხვდებიან ესპანეთის ქალაქ გრანადაში 5 ოქტომბერს. მეორე დღეს უკვე კლუბში მყოფები გამოაცხადებენ, რა რეფორმები იქნება საჭირო, რომ შოუ უფრო მეტი (და უფრო მრავალფეროვანი) წევრებით გაგრძელდეს. მოჰყვება რთული პროცესი. განმცხადებლები და ევროკავშირის მანქანა – ორივე უნდა შეიცვალოს. გაფართოების დასრულების სავარაუდო თარიღი – 2030 წელი ოპტიმისტურია. ლიდერებს, რომლებიც განიხილავენ კავშირის მომავალ ფორმას, უნდა ახსოვდეთ, რომ გაფართოება იყო ევროკავშირის ყველაზე წარმატებული პოლიტიკა. ისეთი გრანდიოზული პროექტები, როგორებიცაა ევრო, ერთიანი ბაზარი და ტექნიკური გიგანტების რეგულირება, მნიშვნელოვანია, მაგრამ მათი ღირებულების დიდი ნაწილი გამომდინარეობს იქიდან, რომ მათი ფარგლები ვრცელდება საფრანგეთისა და გერმანიის ფარგლებს, ფინეთში, საბერძნეთში, სლოვაკეთსა და ესპანეთში. წარმოიდგინეთ, რამდენად ნაკლებად მოქნილი იქნებოდა ევროკავშირი უკრაინის დახმარებაში, რომ მას არ მიეღო ომის ზონის მოსაზღვრე ოთხი ქვეყანა. შემდგომმა გაფართოებამ შეიძლება, გაზარდოს ევროპის გეოპოლიტიკური წონა. როგორც ჩანს, საფრანგეთის პრეზიდენტი ემანუელ მაკრონი, რომელიც ოდესღაც სკეპტიკოსი იყო გაფართოების მიმართ, ახლა აღიარებს ამას“, – აღნიშნულია სტატიაში.

„ეკონომისტი“ წერს, რომ ევროპელი მეზობლების ნაცრისფერ ზონაში დატოვება კარს უხსნის მათ, ვინც დესტაბილიზაციას მოახდენს კონტინენტზე, დაწყებული რუსეთის პრეზიდენტ ვლადიმერ პუტინით. სტატიის თანახმად, არცერთი ქვეყნის ინტეგრირება არ იქნება მარტივი, რადგან საქართველოს, მოლდოვას და უკრაინას აქვთ რუსეთის მიერ ოკუპირებული ტერიტორიები.

სტატიის მიხედვით, მისიის შესრულებისას ევროკავშირმა სამი მტკიცე ვალდებულება უნდა მიიღოს. პირველი, ეს არის იმედის გზავნილი აპლიკანტებისთვის, რომ წევრობის გარკვეული სარგებელი შეიძლება, მიენიჭოთ ეტაპობრივად, ეკონომიკური რეფორმების შემდეგ, მათ შორის ერთიან ბაზარზე წვდომის ჩათვლით;

როგორც „ეკონომისტი“ წერს, ევროკავშირის მეორე ვალდებულება არის ის, რომ ევროკავშირის შიდა რეფორმებმა არ უნდა შეაფერხოს მათი გაწევრიანება, ვინც მზად იქნება წევრობისთვის. გამოცემის თანახმად, ევროკავშირმა უნდა გააუქმოს ერთი ქვეყნის ვეტო კოლექტიურ გადაწყვეტილებებზე;

მესამე ვალდებულებად „ეკონომისტი“ ასახელებს მექანიზმს, რომლის მეშვეობითაც ბრიუსელს უნდა ჰქონდეს საშუალება იმ ახალწვეულების ცუდი ქცევის დასასჯელად, რომლებსაც ექნებათ არასტაბილური მმართველობა.

წყარო: 1tv.ge