გეგე დადიანი, რომლისთვისაც „საშიში იდეალისტები“ სადებიუტო რომანია, წინასიტყვაობაში განმარტავს, რომ წიგნი: ახალგაზრდებზეა, მშობლებზეა, რა თქმა უნდა მანკიერებებზე ჩვენს ირგვლივ და წარმატებებზე, ურთიერთობებზე და სიყვარულზე, სიკვდილსა და სიცოცხლეზე, რწმენასა და ფარისევლობაზე.

„წიგნი ეძღვნება ახალგაზრდებს, ადამიანებს, რომლებიც არასოდეს დაიღლებიან თავისუფლებისა და დამოუკიდებლობისათვის ბრძოლაში, წიგნი ეძღვნება სახელმწიფოს“, - წერს ავტორი.

ხელოვნებთმცოდნეობის დოქტორის ლელა ოჩიაურის თქმით, წიგნი არის მოწოდება თავისუფლებისკენ.

„მინდა ვურჩიო მოაზროვე ადამიანებს ამ წიგნის წაკითხვა. კარგი მასალაა აზროვნებისა და ფიქრისთვის. მთავარი რისკენაც არის მოწოდებული ეს ამბავი, ალბათ რისთვისაც დაიწერა ეს ყველაფერი, რა გზავნილიც გამოგვიგზავნა ჩვენ, თითოეულ მკითხველს, განურჩევლად ასაკის, სოციალური მდგომარეობის, თუ პოლიტიკური შეხედულების, რითაც ვიყოფით თითქოს ადამიანები, არის მოწოდება თავისუფლებისკენ“,- აცხადებს ლელა ოჩიაური.

წიგნში ადამიანის ცხოვრება და ღირებულებებია აღწერილი. ინსტიტუციონალური და საზოგადოებრივი მანკიერებები სახელმწიფოს მშენებლობის საკითხში. გმირის გარშემო განვითარებული მეგობრობის, სიყვარულის, სიკვდილის, ღირებულებითი ტრანსფორმაციის, ფსიქოლოგიური განსჯისა და გამარჯვებისთვის ბრძოლის ისტორია. თაობებისა და ინსტიტუციების ურთიერთობები.

წიგნის გაფორმება და პოსტერები ირაკლი ნაკუდაიძეს /IRAKKLIO/ ეკუთვნის, წიგნის მთავარი რედაქტორი - თამარ ნუცუბიძეა, არტ დირექტორი - ბაკურ თვრინელი, დიზაინერი - გიორგი ნავროზაშვილი, წიგნი გამომცემლობა დიდი ფაქტორმა დაბეჭდა.

წიგნი შეძება შესაძლებელია შემდეგ მისამართებზე: ბიბლუსის ქსელი, სანტა ესპერანსა (ქ.თბილისი, სანქტ-პეტერბურგის 12) იერი (თბილისი, ქიქოძის 10), პარნასი (თბილისი. ჭავჭავაძის გამზ. 22), შაქრო ბაბუა (თბილისი. ჭავჭავაძის გამზ. 17ბ), რუსთაველის 16 (თბილისი, რუსთაველის 16).

3 დღის წინ გამოაგზავნეს მოსაწვევი და შემდეგ გაუქმდა, რაც არასერიოზულია, - ამის შესახებ საქართველოს პრემიერ-მინისტრმა ირაკლი კობახიძემ ნიუ-იორკში, ქართველ ჟურნალისტებს ბაიდენის მიღებაზე მიწვევის გაუქმებასთან დაკავშირებით დასმული კითხვის საპასუხოდ განუცხადა.

პრემიერის შეფასებით, ეს იყო ერთგვარი ჰუმანიტარული აქტი ოპოზიციის სასარგებლოდ, თუმცა ვერავითარი პრაქტიკული ეფექტი ამას ვერც ოპოზიციისთვის ვერ ექნება.

„განსაკუთრებულ კომენტარს ამაზე ვერ გავაკეთებ. არასერიოზულია, 3 დღის წინ გამოაგზავნეს მოსაწვევი და შემდეგ გაუქმდა. ეს იყო ერთგვარი ჰუმანიტარული აქტი ოპოზიციის სასარგებლოდ, თუმცა ვერავითარი პრაქტიკული ეფექტი ამას ვერც ოპოზიციისთვის ვერ ექნება. ამაზე მეტი კომენტარის გაკეთება ამ თემაზე გამიჭირდება“, - განაცხადა ირაკლი კობახიძემ.

ჩვენი ამოცანაა, მშვიდობიანი გზით, საქართველოს ტერიტორიული მთლიანობის აღდგენა და გზა ამ მიმართულებით გადის, რა თქმა უნდა, ურთიერთპატიებასა და ურთიერთშერიგებაზე, - ამის შესახებ საქართველოს პრემიერ-მინისტრმა, ირაკლი კობახიძემ ნიუ-იორკში ქართველ ჟურნალისტებს განუცხადა.

მთავრობის მეთაურის თქმით, საქართველოს ტერიტორიული მთლიანობის აღდგენა ხელისუფლების ერთ-ერთი უმთავრესი ეროვნული ამოცანაა.

„ჩვენი ერთ-ერთი უმთავრესი ეროვნული ამოცანა არის საქართველოს ტერიტორიული მთლიანობის აღდგენა და, რა თქმა უნდა, გაერო-ს გენერალური ასამბლეის 79-ე სესიის პლატფორმა გამოვიყენეთ ამ თემაზე სასაუბროდ. ჩვენ მივმართეთ ჩვენს დებსა და ძმებს, რომლებიც ცხოვრობენ საოკუპაციო ხაზს მიღმა და ჩვენი მთავარი მოწოდება არის ის, რომ ჩვენ გვინდა ვიცხოვროთ ერთიან, მშვიდობიან, განვითარებულ საქართველოში და ეს გზავნილი კიდევ ერთხელ ხმამაღლა უნდა გავიმეოროთ. ჩვენი ამოცანაა, მშვიდობიანი გზით, საქართველოს ტერიტორიული მთლიანობის აღდგენა და გზა ამ მიმართულებით გადის, რა თქმა უნდა, ურთიერთპატიებასა და ურთიერთშერიგებაზე, ეს არის ჩვენი უმთავრესი ამოცანა,“- განაცხადა პრემიერმა.

ნატო რუსეთთან შესაძლო ომის შემთხვევისთვის საბრძოლო ხაზიდან დაჭრილთა ევაკუაციის გეგმას ამზადებს. პროგნოზების მიხედვით, ომი ფართო საბრძოლო ველზე გაიშლება და ნატო-ს მნიშვნელოვანი დანაკარგი ექნება, – ამის შესახებ განცხადება ჩრდილოატლანტიკური ალიანსის ლოჯისტიკის სარდლობის ხელმძღვანელმა, გენერალ-ლეიტენანტმა, ალექსანდრ ზოლფრანკმა „დეილი მეილთან“ ინტერვიუში გააკეთა.

გენერალმა აღნიშნა, რომ რუსეთის საჰაერო ძალების ფართო შესაძლებლობების გამო, დაჭრილთა თვითმფრინავებით ევაკუაცია შეიძლება, ძალიან სახიფათო იყოს, ამიტომ უმჯობესია სანიტარული მატარებლების გამოყენება.

„ყველაზე უარეს შემთხვევაში ჩვენი ამოცანა იქნება დიდი რაოდენობით დაზარალებულების ოპერატიული და ხარისხიანი დახმარებით უზრუნველყოფა“, – განაცხადა მან.

ზოლფრანკმა ასევე ხაზი გაუსვა ნატო-ს სამედიცინო წესების უნიფიკაციის მნიშვნელობას. მისივე თქმით, გამოსავალი ამ შემთხვევაში შეიძლება იყოს „სამხედრო-სამედიცინო შენგენის“ შექმნა, რომელიც უზრუნველყოფს პრეპარატების, მათ შორის მძიმე დაზიანებებისთვის საჭირო ტკივილგამაყუჩებლების, თავისუფალ გადატანას.

„დეილი მეილის“ ცნობით, სამედიცინო ევაკუაციის გეგმა რუსეთთან შესაძლო ომისთვის სამზადისის მხოლოდ ერთი ელემენტია.

გამოცემა ასევე აღნიშნავს, რომ 22 იანვრიდან 31 მაისამდე ნატო-მ უდიდესი სწავლება ჩაატარა, რომელშიც 90 000-ზე მეტი სამხედრო მოსამსახურე მონაწილეობდა. ეს მანევრები ასევე იყო რუსეთის აგრესიისთვის მზადების ნაწილი და მოიცავდა ისეთ ქვეყნებს, როგორიცაა დიდი ბრიტანეთი, გერმანია, უნგრეთი, საბერძნეთი, პოლონეთი, ფინეთი, შვედეთი და სხვა.

იანვარში გერმანიის თავდაცვის მინისტრმა, ბორის პისტორიუსმა განაცხადა, რომ დასავლეთის ქვეყნები მომდევნო სამი-ხუთი წლის განმავლობაში აქტიურად უნდა მოემზადონ რუსეთთან შესაძლო ომისთვის და ეს დრო „ინტენსიური შეიარაღებისთვის“ გამოიყენონ.

საქართველოს სტრატეგიული მდებარეობის წყალობით, რომელიც წარმოადგენს ბუნებრივ ხიდს ევროპასა და აზიას შორის, ჩვენი ქვეყანა უზრუნველყოფს უმოკლეს მარშრუტს აღმოსავლეთსა და დასავლეთს შორის, - ამის შესახებ საქართველოს პრემიერ-მინისტრმა ირაკლი კობახიძემ გაერო-ს გენერალური ასამბლეის 79-ე სესიაზე სიტყვით გამოსვლისას განაცხადა.

მთავრობის მეთაურის თქმით, საპორტო ინფრასტრუქტურის მეშვეობით საქართველო უზრუნველყოფს სამხრეთ კავკასიასა და ცენტრალურ აზიაში ზღვაზე გასასვლელის არმქონე 7 ქვეყნის კავშირს დანარჩენ მსოფლიოსთან ქვეყნის ინფრასტრუქტურის მეშვეობით.

„ზღვაზე გასასვლელის, ასევე ჩინეთსა და ცენტრალური აზიის ქვეყნებთან ჩვენი მტკიცე ურთიერთობების გათვალისწინებით, საქართველო წარმოადგენს წამყვან მოთამაშეს რეგიონულ და ფართო ევრაზიულ კონტექსტში. ჩვენ ვართ არა მხოლოდ პროდუქციის გაცვლის, არამედ ელექტროენერგიის ტრანზიტის ცენტრი და ბევრად მეტიც. ჩვენი საპორტო ინფრასტრუქტურის მეშვეობით საქართველო უზრუნველყოფს სამხრეთ კავკასიასა და ცენტრალურ აზიაში ზღვაზე გასასვლელის არმქონე 7 ქვეყნის კავშირს დანარჩენ მსოფლიოსთან ჩვენი ინფრასტრუქტურის მეშვეობით. ჩვენ მტკიცედ გვაქვს გადაწყვეტილი ამ ინფრასტრუქტურის შემდგომი განვითარება ანაკლიის ღრმაწყლოვანი პორტის მშენებლობის გზით, რომელიც მალე დაიწყება.

თუკი შევხედავთ პოლიტიკურ რუკას, დავრწმუნდებით, რომ საქართველო გვთავაზობს ყველაზე უსაფრთხო და სანდო სატრანზიტო მარშრუტს, რომლითაც უზრუნველყოფილია პროდუქციისა და მომსახურების დროული და ეფექტიანი ტრანსპორტირება. ჩვენი მიზანმიმართულება სანდო სატრანზიტო დერეფნის როლის შენარჩუნების და გაფართოების თვალსაზრისით გვაძლევს საშუალებას, მხარში დავუდგეთ ჩვენს სტრატეგიულ პარტნიორებს ევროპაში ენერგოუსაფრთხოებასთან დაკავშირებულ საჭიროებებზე რეაგირებაში. მიწოდების მარშრუტების დივერსიფიკაციის და გამძლე ინფრასტრუქტურაში ინვესტიციის გზით საქართველოს შეუძლია პროგნოზირებადობის ხარისხის ამაღლება აღმოსვლეთ-დასავლეთის დაკავშირებადობის მხრივ, განსაკუთრებით კი შუა დერეფნის ინიციატივის ფარგლებში“, - განაცხადა ირაკლი კობახიძემ.

მთავრობის მეთაურის თქმით, საქართველო დგას უახლესი ისტორიის გზაგასაყარზე და მთავრობა მოწოდებულია, ქვეყანა ერის საუკეთესო ინტერესებიდან გამომდინარე მართოს.

„ჩვენი საქართველო დგას თავისი უახლესი ისტორიის გზაგასაყარზე, ხოლო ჩვენ, როგორც ხალხის მთავრობა, მოწოდებულნი ვართ, ვმართოთ ჩვენი ქვეყანა ჩვენი ერის საუკეთესო ინტერესებიდან გამომდინარე, გავაკეთოთ ყველაფერი, რათა დავძლიოთ ჩვენ წინაშე მდგარი ყველა გამოწვევა და გავხდეთ უფრო ძლიერნი და წარმატებულნი, ვიდრე ოდესმე ვყოფილვართ. ჩვენ ოპტიმისტურად ვართ განწყობილნი და გვჯერა, რომ საქართველოს სურვილი, გახდეს ევროკავშირის სრულფასოვანი წევრი, 2030 წლისთვის ასრულდება. ვიყურებით რა მომავალში და, ამავე დროს, ჩვენს მოკავშირეებსა და პარტნიორებთან ერთად ერთგულად ვემსახურებით აყვავებული საზოგადოების შექმნის იდეას, ჩვენი ერთობლივი ძალისხმევა მომავალშიც იქნება მიმართული მშვიდობის დასამყარებელი ზომების მხარდასაჭერად და მდგრადი განვითარების უზრუნველსაყოფად. ამ გზით კი, ჩვენ ავამაღლებთ ადამიანის ღირსებას არა მხოლოდ საქართველოს ამჟამინდელი მოქალაქეებისთვის, არამედ ყველა მომავალი თაობის საკეთილდღეოდ,“- განაცხადა ირაკლი კობახიძემ.

მიუხედავად იმისა, რომ ჩვენი ტერიტორიის 20% უკანონოდ ოკუპირებულია, ჩვენ ვაგრძელებთ წინსვლას, ზრდას და ვმუშაობთ, რათა უზრუნველვყოთ, რომ ჩვენმა შვილებმა იცხოვრონ უკეთეს, უფრო ძლიერ და უფრო ღირსეულ საქართველოში, - ამის შესახებ საქართველოს პრემიერ-მინისტრმა ირაკლი კობახიძემ გაერო-ს გენერალური ასამბლეის 79-ე სესიაზე სიტყვით გამოსვლისას განაცხადა.

მთავრობის მეთაურის თქმით, ხელისუფლება თანმიმდევრულად და დაუღალავად შრომობს, რათა საქართველოს ყველა მოქალაქე ამაყობდეს საკუთარი ქვეყნით.

„მინდა, ვისარგებლო ამ შესაძლებლობით და მივმართო ჩვენს ხალხს საოკუპაციო ხაზის მეორე მხარეს, აფხაზეთისა და ცხინვალის რეგიონებში. ჩვენი ყველა ნაბიჯი მიმართულია იმისკენ, რომ დავეხმაროთ ჩვენს ხალხს და ერთ დღეს ჩვენ, ჩვენს შვილებთან ერთად, შევძლოთ ერთად ცხოვრება ბედნიერ, გაერთიანებულ და განვითარებულ საქართველოში. საოკუპაციო ხაზის ამ მხარეს ჩვენ ყოველთვის გულღიად მიგიღებთ. ჩვენ უნდა აღვადგინოთ ყველა დანგრეული ხიდი ჩვენს ქვეყანაში,“- განაცხადა პრემიერმა.

ვაღიარებთ რა მშვიდობის ფასს, ყველა ძალისხმევას ვიყენებთ იმისთვის, რომ ჩვენი რეგიონი, სამხრეთ კავკასია კონფლიქტის ზონიდან შესაძლებლობათა რეგიონად ვაქციოთ, - ამის შესახებ საქართველოს პრემიერ-მინისტრმა ირაკლი კობახიძემ გაეროს უშიშროების საბჭოს შეხვედრაზე სიტყვით გამოსვლისას განაცხადა, რომლის მთავარი თემაა - “ლიდერები მშვიდობისთვის: გაერთიანებულნი გაეროს წესდებისადმი პატივისცემით, უსაფრთხო მომავლის ძიებაში”.

მთავრობის მეთაურის თქმით, საქართველო მიესალმება აზერბაიჯანსა და სომხეთს შორის არსებული კონფლიქტის მშვიდობიანი გზით მოგვარების პროცესს.

„მთელი გულით მივესალმებით და გვახარებს აზერბაიჯანსა და სომხეთს შორის არსებული კონფლიქტის მშვიდობიანი გზით მოგვარების პროცესი, რითაც შეიქმნა პლატფორმა რეგიონული თანამშრომლობისთვის, ნდობის, ერთიანობის გაძლიერებისა და საერთო მომავლის უზრუნველყოფისთვის,“- განაცხადა პრემიერმა.

დღეს ცესკოში გაიმართება სხდომა, სადაც 42 ქვეყანაში 60 საარჩევნო უბნის გახსნის საკითხს განიხილავენ. ცენტრალური საარჩევნო ადმინისტრაციის ცნობით, საგარეო საქმეთა სამინისტროდან მიიღეს განახლებული მონაცემები ქვეყნის ფარგლებს გარეთ საკონსულო აღრიცხვაზე მყოფი 65 508 საარჩევნო უფლების მქონე საქართველოს მოქალაქის შესახებ.

ცესკოში ასევე ამბობენ, რომ 26 ოქტომბრის პარლამენტის არჩევნებისთვის საზღვარგარეთ იხსნება იმაზე მეტი უბანი, ვიდრე იყო 2020 წლის საპარლამენტო არჩევნებზე.

"იხსნება ისეთ ქვეყნებშიც, სადაც საარჩევნო უბნები არ იყო წინა საპარლამენტო არჩევნებზე, ან ზოგადად არც ერთ წინა არჩევნებზე. ეს ქვეყნებია: არაბთა გაერთიანებული საამიროები, ფინეთის რესპუბლიკა, კორეის რესპუბლიკა, იაპონია, ავსტრალიის თანამეგობრობა.

საზოგადოებას შევახსენებთ, რომ კანონმდებლობის თანახმად, საზღვარგარეთ საარჩევნო უბანი იქმნება საკონსულო აღრიცხვაზე მყოფი არანაკლებ 50 და არაუმეტეს 3 000 ამომრჩევლისთვის. სხვა რეგულაციებს საქართველოს საარჩევნო კანონმდებლობა საზღვარგარეთ მყოფი საქართველოს მოქალაქეების არჩევნებში მონაწილეობასთან დაკავშირებით არ ითვალისწინებს. თუმცა, ბოლო პერიოდში დაინტერესებული მხარეების მხრიდან, მიუხედავად საარჩევნო ადმინისტრაციის მიერ არაერთხელ გაკეთებული განცხადებისა და განმარტებებისა, იყო საკითხის სამართლებრივიდან პოლიტიკურ სივრცეში გადატანის და ამომრჩევლის შეცდომაში შეყვანის მცდელობა. სწორედ ამიტომ, კიდევ ერთხელ მოვუწოდებთ ჩართულ მხარეებს, პოლიტიკური ინტერესებიდან გამომდინარე ნუ შეიყვანენ ამომრჩევლებს შეცდომაში და ხელი შეუწყონ ჯანსაღ საარჩევნო გარემოს.

თავის მხრივ საარჩევნო ადმინისტრაცია უზრუნველყოფს საარჩევნო საკითხების შესახებ საზოგადოების სწორ და დროულ ინფორმირებას, ასევე პროცესების გამჭვირვალედ წარმართვას, რათა არ დარჩეს არც ერთი კითხვის ნიშანი და მანიპულაციის საფუძველი სხვადასხვა მნიშვნელოვან საარჩევნო საკითხთან დაკავშირებით"- აცხადებენ ცესკოში.

დეტალური ინფორმაცია სხდომის შედეგების და საზღვარგარეთ საარჩევნო უბნების შესახებ სხდომის დასრულების შემდეგ გახდება ცნობილი.

ლეგენდარული ფრანგი ფეხბურთელი, 2007-დან 2015 წლამდე უეფას პრეზიდენტი, მიშელ პლატინი საინტერესო იდეით გამოვიდა. მისი აზრით, მოედანზე, ერთი გუნდის შემადგენლობაში 11 ფეხბურთელი ბევრია და ათიც საკმარისი იქნება. ფრანგმა საკუთარი მოსაზრება საინტერესოდ ახსნა.

„საუკუნეზე მეტია, გუნდების სასტარტო შემადგენლობა 11 ფეხბურთელისგან შედგება. თუმცა, ადრე, ფეხბურთელები ნაკლებად და ნელა დარბოდნენ, ისინი ფიზიკურად გაცილებით სუსტები იყვნენ, ვიდრე დღეს. შეხედეთ ახლანდელ მოთამაშეებს, ყველა ათლეტია და ამიტომ, ვფიქრობ, თითო გუნდში 10 კაცი, მეტ სივრცეებს გააჩენს და თამაშს უფრო სანახაობრივს გახდის“, - განაცხადა პლატინიმ და არ არის გამორიცხული, ამ იდეის განხილვა უკვე ახალი წლის შემდეგ დაიწყოს.

სამი თვის წინ, კრივში, სუპერმძიმე წონაში აბსოლუტური ჩემპიონი უკრაინელი ალექსანდრ უსიკი გახდა. მან ლეგენდარული ტაისონ ფიური დაამარცხა და კრივის სამყაროში ყველაზე პრესტიჟული ქამარი შემოირტყა წელზე. ჰოდა, უკრაინელი ჩემპიონი გასულ კვირას, პოლონელმა სამართალდამცავებმა დააკავეს.

„ავტომობილი, რომელსაც უსიკი მართავდა, გადაჭარბებული სიჩქარით მოძრაობდა, ის არ დაემორჩილა სამართალდამცავების მოწოდებას, არ შეაჩერა მანქანა და განხორციელდა დევნა, რის შემდეგაც უსიკი დავაკავეთ“, - განაცხადეს პოლონელმა სამართალდამცავებმა.

დაკავებულმა უსიკმა ერთი ზარის უფლება ითხოვა და პირდაპირ ქვეყნის პრეზიდენტს, ვოლოდიმირ ზელენსკის დაურეკა.

„ველაპარაკე ტელეფონით ალექსანდრ უსიკს, როცა ის დაკავებული იყო. აღშფოთებული ვიყავი ჩვენი ქვეყნის მოქალაქისა და ჩემპიონის მიმართ ამგვარი მოპყრობით. დავავალე უკრაინის შს და საგარეო საქმეთა მინისტრებს, დაუყოვნებლივ გარკვეულიყვნენ ინციდენტის ყველა დეტალში. როგორც მაცნობეს, ახლა ყველაფერი კარგადაა, ჩვენი ჩემპიონი გაუშვეს და მას აღარავინ დააკავებს“, - დაწერა ოფიციალურ გვერდზე ზელენსკიმ.

სხვისი რა გითხრათ და, ჩვენი აზრით, კანონი როგორც ჩემპიონისთვის, ისე რიგითი ადამიანებისთვისაც ერთი უნდა იყოს და სამართალდარღვევის გამო, პასუხი უნდა აგოს ყველამ, ვისაც პრეზიდენტთან დარეკვა შეუძლია და არ შეუძლია.

საქართველოს პრეზიდენტმა დღეს ვიდეომიმართვა გაავრცელა, სადაც მან დიასპორის წევრებს მიმართა და მათ არჩევნებში აქტიური მონაწილეობისკენ მოუწოდა.

"თქვენ ხელშია საქართველოს მომავალი. თქვენ ხელში, ჩემს ხელში, ჩვენ ხელში. ჩვენ უნდა გადავწყვიტოთ საქართველო იქნება დამოუკიდებელი, ევროპული, თავისუფალი და დემოკრატიული ქვეყანა თუ დაუბრუნდება გაურკვეველ წარსულს რუსეთის გავლენის ქვეშ, სადაც თქვენ და თქვენი შვილები ალბათ არც ჩამოხვალთ და არც გექნებათ სურვილი რომ დაბრუნდეთ.

ეს არჩევნები არის გადამწყვეტი და თქვენ უნდა მიიღოთ მონაწილეობა. მე ვიცი რამდენად გართულდა ეს მონაწილეობის მიღება, რომ უბნები სამწუხაროდ არ გაგვიხსნეს. მაგრამ ამის მიუხედავად მე ვიცი, რომ თქვენ მზად ხართ აქტიურად მიიღოთ მონაწილეობა. როგორც გუშინ გამოხვედით და გულშემატკივრები იყავით ჩვენი ფეხბურთელების, გადალახეთ საზღვრები, ჩახვედით იმისთვის, რომ გამოგეჩინათ ქართული დროშა. ასევე ვიცი, რომ 26 ოქტომბერს წახვალთ სადაც არ უნდა იყოს, თუნდაც შორს, ერთმანეთს გამოუჩენთ სოლიდარობას და ყველანი ერთად დავდგებით იქ სადაც დგას საქართველოს მომავალი."- განაცხადა სალომე ზურაბიშვილმა.

ჩვენ ვიბრძვით მშვიდობის, კეთილდღეობის, პროგრესისა და მდგრადობის უზრუნველყოფისთვის, უკლებლივ ყველასთვის და ამ პირობებში დიდად სამწუხაროა უკრაინაში მიმდინარე ომის მომსწრენი რომ გავხდით, - ამის შესახებ საქართველოს პრემიერ-მინისტრმა ირაკლი კობახიძემ გაეროს უშიშროების საბჭოს შეხვედრაზე სიტყვით გამოსვლისას განაცხადა, რომლის მთავარი თემაა - “ლიდერები მშვიდობისთვის: გაერთიანებულნი გაეროს წესდებისადმი პატივისცემით, უსაფრთხო მომავლის ძიებაში”.

მთავრობის მეთაურის თქმით, საქართველოს მთავრობა, ომის დაწყების დღიდან უზრუნველყოფს მშვიდობიან ჰუმანიტარულ დახმარებას, როგორც ომში მყოფი ქვეყნის შიგნით, ასევე მათთვის, ვინც ამჟამად საქართველოში ცხოვრობს.

„გვესმის, რა გამოწვევების წინაშე იმყოფება ამჟამად უკრაინა და სოლიდარობას ვუცხადებთ უკრაინელ ხალხს. ჩვენ ხელი შევუწყვეთ, შევუერთდით, მხარი დავუჭირეთ 600-ზე მეტ რეზოლუციას, განცხადებას, ერთობლივ კომუნიკეს და სხვა ინიციატივებს უკრაინის მხარდასაჭერად. ასევე, საქართველოს მთავრობა, ომის დაწყების დღიდან უზრუნველყოფს მშვიდობიან ჰუმანიტარულ დახმარებას, როგორც ომში მყოფი ქვეყნის შიგნით, ასევე მათთვის, ვინც ამჟამად საქართველოში ცხოვრობს,“- განაცხადა ირაკლი კობახიძემ.

როგორც საერთაშორისო თანამეგობრობის პასუხისმგებლიანი წევრი, საქართველო აქტიურად უწყობს ხელს გლობალურ მშვიდობას, - ამის შესახებ საქართველოს პრემიერ-მინისტრმა ირაკლი კობახიძემ გაეროს უშიშროების საბჭოს შეხვედრაზე სიტყვით გამოსვლისას განაცხადა, რომლის მთავარი თემაა - “ლიდერები მშვიდობისთვის: გაერთიანებულნი გაეროს წესდებისადმი პატივისცემით, უსაფრთხო მომავლის ძიებაში”.

მთავრობის მეთაურის თქმით, საქართველო, მსოფლიოს მასშტაბით, ერთ-ერთი ყველაზე დიდი წვლილის მქონე ქვეყნად იქცა ნატოს მისიებში ერაყსა და ავღანეთში.

„მახარებს აქ, თქვენთან ერთად ყოფნა და მადლობას ვუხდი სლოვენიის პრემიერ-მინისტრს ამ ძალიან დროული დებატების წამოწყებისთვის.
1946 წლის გაერო-ს პირველ სესიაზე დამფუძნებლები მსოფლიოს დაპირდნენ გაერთიანებას გლობალური მშვიდობისა და უსაფრთხოების შესანარჩუნებლად. როგორც საერთაშორისო თანამეგობრობის პასუხისმგებლიანი წევრი, საქართველო აქტიურად უწყობს ხელს გლობალურ მშვიდობას. 2-ათეულ წელზე მეტი ხნის განმავლობაში, ჩვენ მნიშვნელოვანი წვლილი შევიტანეთ ნატოსა და ევროკავშირის მისიებში, მთელი მსოფლიოს მასშტაბით, რითაც სულადობრივად, ერთ-ერთ ყველაზე დიდი წვლილის შემტან ქვეყნად იქცა საქართველო ნატოს მისიებში ერაყსა და ავღანეთში. 32-მა მამაცმა ქართველმა ჯარისკაცმა გაიღო საბოლოო მსხვერპლი ავღანეთში, ხოლო ასობით სხვა დაშავდა თავისუფლებისა და საერთაშორისო მშვიდობის უზრუნველყოფაში,“- განაცხადა პრემიერმა.

პოლიციამ თბილისში განზრახ მკვლელობის მცდელობის ფაქტთან დაკავშირებით 3 პირი დააკავა - ინფორმაციას ამის შესახებ შსს ავრცელებს.

უწყების ცნობით, ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, 1966 წელს დაბადებული ა.ჯ. განზრახ მკვლელობის მცდელობის ბრალდებით დააკავეს, ხოლო წარსულში ნასამართლევი პირები: 1969 წელს დაბადებული თ.ზ. და 1993 წელს დაბადებული ბ.ჯ. დანაშაულის შეუტყობინებლობის ბრალდებით დააკავეს.

დანაშაულები 15 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ მიმდინარე წლის 24 სექტემბერს, ბრალდებულმა ა.ჯ.-მ ურთიერთშელაპარაკების ნიადაგზე თბილისში, დიდ დიღომში, ცეცხლსასროლი იარაღით რამდენიმე ჭრილობა მიაყენა 1993 წელს დაბადებულ გ.ჯ.-ს და შემთხვევის ადგილიდან მიიმალა. დაჭრილი მამაკაცი საავადმყოფოში გადაიყვანეს, სადაც შესაბამისი სამედიცინო დახმარება უტარდება.

ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად სამართალდამცველებმა ა.ჯ ბრალდებულის სახით დააკავეს.

გამოძიებით ასევე დადგინდა, რომ დაჭრის ფაქტს შეესწრნენ - ბ.ჯ. და თ.ზ., თუმცა მათ პოლიციას მომხდარი დანაშაულის შესახებ არ შეატყობინეს.

გამოძიება საქართველოს სისხლის სამართლის კოდექსის 19-108-ე და 376-ე მუხლებით მიმდინარეობს, რაც განზრახ მკვლელობის მცდელობას და დანაშაულის შეუტყობინებლობას გულისხმობს.