ვენეციაში გონდოლიერების ვაკანსია გაჩნდა

აპენინებზე ახალ გონდოლიერებს ეძებენ. ეს იშვიათი შემთხვევაა, რადგან აქამდე, ამ სამუშაოზე მიღება მხოლოდ მემკვიდრეობით იყო შესაძლებელი. ვენეციელი მენავეების ჩვეულებრივი ხელფასი, საშუალოდ, 150 ათასი ევროა წელიწადში. იმ შემთხვევაში, თუ გონდოლიერი მღერის, ან უკრავს მუსიკალურ ინსტრუმენტზე, ხელფასი კიდევ უფრო მეტი გამოსდის. წყალზე მდგარმა ქალაქმა გონდოლიერების სკოლაში მიღებაზე კონკურსი გამოაცხადა. სწავლება უფასო არ არის - მსურველს კურსის გავლა 1000 ევრო დაუჯდება, რაც ძვირია, თუმცა ამ თანხას ერთ კვირაში ამოიღებენ. გონდოლიერობის კანდიდატები უნდა ლაპარაკობდნენ იტალიურად, იყვნენ ჯანმრთელები, იცოდნენ ცურვა, პირველადი სამედიცინო დახმარების გაწევა და ვენეციის ისტორია. აღსანიშნავია, რომ სეზონზე, გონდოლით ერთი გასეირნება, შესაძლოა, ერთ ადამიანს 80-100 ევრო დაუჯდეს.