საპატრულო პოლიციის ერთიანი მომსახურების ცენტრში 2023 წლიდან 50-მდე სერვისი ჟესტურ ენაზე ხელმისაწვდომი გახდა
შინაგან საქმეთა სამინისტროს საგანგებო სიტუაციების მართვის სამსახურის მყვინთავ-მაშველებს სპეციალური აღჭურვილობა გადაეცათ
შსს-ს წარმომადგენლებმა, კამპანიის - ”ემეგობრე პოლიციას” ფარგლებში, ბოლო შეხვედრები მოსწავლეებთან თბილისსა და რეგიონებში გამართეს
შინაგან საქმეთა სამინისტროს კამპანიის - "ემეგობრე პოლიციას" ფარგლებში, მიმდინარე წელს ბოლო საინფორმაციო შეხვედრები თბილისისა და სხვადასხვა რეგიონის სკოლებში განხორციელდა.
სამინისტროს დანაყოფების წარმომადგენლები იმყოფებოდნენ სამტრედიის მუნიციპალიტეტის N1 და N10, სენაკის N1 და N7, ფოთის N4 და N5, ბოლნისის N1 და N5 საჯარო სკოლებში, აგრეთვე, შეხვედრები გაიმართა თბილისის N119 და N208 საჯარო სკოლებში, ნიჭიერთა კერძო სკოლასა და სკოლა-ლიცეუმ "პრომეთეში".
საინფორმაციო შეხვედრებზე შინაგან საქმეთა სამინისტროს წარმომადგენლებმა ბავშვებს საგზაო მოძრაობის უსაფრთხოებისა და ორგანიზებულ დანაშაულთან ბრძოლის შესახებ გადაღებული ვიდეორგოლები უჩვენეს. სამინისტროს თანამშრომლებმა მოზარდებს ინფორმაცია მიაწოდეს მათთვის აქტუალურ საკითხებზე, ბავშვთა უფლებების, ბულინგის, ძალადობის, ორგანიზებული დანაშაულისა და სხვა მნიშვნელოვან თემებზე.
ვახტანგ გომელაურმა პოლიციის დეპარტამენტების ხელმძღვანელებთან სამუშაო თათბირი გამართა
შინაგან საქმეთა მინისტრმა, ვახტანგ გომელაურმა პოლიციის დეპარტამენტების ხელმძღვანელებთან მიმდინარე წლის შემაჯამებელი სამუშაო თათბირი ჩაატარა. პოლიციის დეპარტამენტების დირექტორებთან შეხვედრას მინისტრის პირველი მოადგილე - შალვა ბედოიძე ესწრებოდა.
სამხარეო პოლიციის დეპარტამენტების დირექტორებმა მინისტრს რეგიონებში განხორციელებული საპოლიციო ღონისძიებების, დანაშაულთან ბრძოლის მიმართულებით არსებული ვითარებისა და ინფრასტრუქტურული პროექტების შესახებ დეტალური ინფორმაცია მიაწოდეს.
ვახტანგ გომელაურმა თითოეული პოლიციის დეპარტამენტის მიერ მთელი წლის განმავლობაში გახსნილი დანაშაულების გახსნის მაჩვენებელზე ისაუბრა და აღნიშნა, რომ მიმდინარე წელს გარკვეული ტიპის დანაშაულის რაოდენობის კლება დაფიქსირდა, გახსნის მაჩვენებელმა კი მოიმატა.
„ბევრად უკეთესია წლევანდელი წელი. ეს თქვენი დამსახურებაა, თქვენი მუშაობის, ბიჭების მუშაობის. გახსნის მაჩვენებელი ძალიან მკვეთრადაა გაზრდილი, რაც, პირველ რიგში, არის ძალიან კარგი. სხვადასხვა თვეებში იყო სხვადასხვა მუხლის, დანაშაულების მატება-კლება, სტატისტიკა ცოცხალი ორგანიზმია, ხან იმატებს, ხან იკლებს, თუმცა, მთლიანობაში დაკლებულია, რაც კარგია“, - განაცხადა ვახტანგ გომელაურმა.
შეხვედრაზე შინაგან საქმეთა მინისტრმა ყურადღება გაამახვილა გატარებულ და მიმდინარე რეფორმებზე, მიმდინარე წელს განხორციელებულ ინფრასტრუქტურულ პროექტებზე, ტექნიკური აღჭურვილობის განახლებაზე, ასევე, დანაშაულთან ბრძოლის შედეგებსა და საზოგადოების უსაფრთხოების მიმართულებით არსებულ გამოწვევებზე.
ვახტანგ გომელაურმა დეპარტამენტების ხელმძღვანელებთან ერთად განიხილა არსებული საერთაშორისო საპოლიციო თანამშრომლობა და სამომავლო თანამშრომლობის გაფართოების პერსპექტივებზე ისაუბრა.
მინისტრმა საპოლიციო დანაყოფების ხელმძღვანელებთან აგრეთვე განიხილა მომავალ წელს დაგეგმილი ინფრასტრუქტურული პროექტები და მთავრობის მეთაურის ინიციატივით სამინისტროს თანამშრომლებისთვის შრომის ანაზღაურების 20%-ით გაზრდის შესახებ ისაუბრა. მან ასევე ყურადღება გაამახვილა საპოლიციო საქმიანობის გაუმჯობესებისთვის საჭირო სამუშაოებსა და პრევენციულ ღონისძიებებზე.
ვახტანგ გომელაურმა მთელი წლის განმავლობაში შესრულებული ნაყოფიერი საქმიანობისთვის თანამშრომლებს მადლობა გადაუხადა და განაცხადა, რომ დანაშაულთან ბრძოლის მიმართულებით კომპლექსური ღონისძიებები 2023 წელსაც აქტიურად გაგრძელდება.
შინაგან საქმეთა სამინისტრო ფრანგულ კომპანია ”Airbus Helicopters”-სგან 3 ახალ შვეულმფრენს შეისყიდის
შინაგან საქმეთა სამინისტროში, ფრანგულ კომპანია "Airbus Helicopters"-თან 3 ახალი შვეულმფრენის შესყიდვის მიზნით ხელშეკრულება გაფორმდა. საქართველოს მხრიდან ხელშეკრულებას ხელი მოაწერა სასაზღვრო პოლიციის უფროსმა - ნიკოლოზ შარაძემ, ხოლო მომწოდებელი კომპანიის მხრიდან - "Airbus Helicopters"-ის წარმომადგენელმა, რომეინ ლანამ.
საქართველოს მთავრობასთან კოორდინაციით, შინაგან საქმეთა სამინისტროს შესაძლებლობების გაძლიერების მიზნით, სასაზღვრო პოლიცია "H145"-ის ტიპის 3 შვეულმფრენს შეიძენს. "Airbus"-თან რამდენიმეთვიანი მოლაპარაკებების შემდეგ, პროექტის ჯამური ღირებულება დაახლოებით 26 500 000 ევროს შეადგენს.
ხელშეკრულების პირობის მიხედვით წლების წინ მაღალი თანამდებობის პირებისთვის შესყიდულ AS332 L1e S/N 2833-ის (სუპერ პუმა) შვეულმფრენს ქართული მხარე Airbus Helicopters-ს გადასცემს. აღნიშნული ბორტის პრივატიზებით ახალი შვეულმფრენების შესყიდვისთვის სახელმწიფოს გასაწევი ხარჯი 5 500 000 ევროს ოდენობით დაიზოგება.
"H145" მრავალფუნქციური შვეულმფრენია, რომელსაც შეუძლია შეასრულოს პოლიციური, სატრანსპორტო, სამძებრო და სამაშველო ფუნქციები. ახალი შვეულმფრენები სრულად იქნება დაკომპლექტებული ხანძართან ბრძოლისა და სამთო-სამაშველო აღჭურვილობით. მათ გააჩნიათ 2 ძრავა, რაც ზრდის ფრენის უსაფრთხოებას. ამ ტიპის შვეულმფრენი მაღალ სიმაღლეზე ოპერირებისა და მანევრის შესაძლებლობებით გამოირჩევა, რაც, საქართველოს მაღალმთიანი რელიეფის გათვალისწინებით, არსებულ ამოცანებთან სრულად თავსებადი იქნება.
"H145" წარმოადგენს "Airbus"-ის ერთ-ერთ უახლეს მოდელს, რომელსაც წარმატებით იყენებენ გერმანიის, შვეიცარიის, საფრანგეთის, კანადისა და სხვა ქვეყნების პოლიციისა და საგანგებო სიტუაციების მართვის სამსახურები.
შინაგან საქმეთა სამინისტროში გაფორმებული ხელშეკრულების შესაბამისად, ქართულ მხარეს პირველი შვეულმფრენი კონტრაქტის ხელმოწერიდან 17 თვეში გადმოეცემა, ხოლო სამივე საავიაციო ტექნიკა 20 თვემდე პერიოდში საქართველოში იქნება, სრულ საფრენოსნო მდგომარეობაში. კონტრაქტი ახალი შვეულმფრენების შეძენასთან ერთად, მოიცავს პილოტებისა და ინჟინრების გადამზადებას, მარაგი ნაწილების შეძენასა და 3-წლიან საქარხნო გარანტიას.