Header Blog Banner

შინაგან საქმეთა სამინისტროს თანამშრომლებმა, ჩატარებული კომპლექსური საგამოძიებო მოქმედებების და სიცოცხლის წინააღმდეგ დანაშაულის პრევენციის ღონისძიებების შედეგად, ბოლო პერიოდში, თბილისსა და რეგიონებში, ცეცხლსასროლი იარაღის უკანონო შეძენა-შენახვისა და ტარების ფაქტები აღკვეთეს.
 
დანაშაული 4-დან 7 წლამდე ვადით თავისუფლების აღკვეთას ითვალისწინებს.
 
ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს, თბილისის პოლიციის დეპარტამენტის საგამოძიებო მთავარი სამმართველოს, შიდა ქართლის პოლიციის დეპარტამენტის, იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის, მცხეთა-მთიანეთის პოლიციის დეპარტამენტის, სამეგრელო-ზემო სვანეთის პოლიციის დეპარტამენტის, კახეთის პოლიციის დეპარტამენტის და აჭარის პოლიციის დეპარტამენტის თანამშრომლებმა ცეცხლსასროლი იარაღის უკანონო შეძენა-შენახვისა და ტარებისთვის 12 პირი დააკავეს, ხოლო 2 პირი ამხილეს.
 
სამართალდამცველებმა 1993 წელს დაბადებული ლ. ი., 2003 წელს დაბადებული ბ.ჯ., 1989 წელს დაბადებული მ. გ., 1987 წელს დაბადებული ო. ჩ. - თბილისში, 1975 წელს დაბადებული, წარსულში ნასამართლევი და ამჟამად პირობითი მსჯავრის ქვეშ მყოფი ზ.კ. - გორში, 1976 წელს დაბადებული, წარსულში ნასამართლევი რ.ხ. - ქუთაისში, 1972 წელს დაბადებული ვ. ზ. - დუშეთში, 1942 წელს დაბადებული გ.ვ. - მესტიაში, 1982 წელს დაბადებული, წარსულში ნასამართლევი ჭ.ო. - საგარეჯოში, 1976 წელს დაბადებული ი.ნ. - მარტვილში, 1972 წელს დაბადებული დ. ჯ. - ჩხოროწყუში, 1980 წელს დაბადებული მ.დ. ბათუმში დააკავეს, ლენტეხის და ამბროლაურის მუნიციპალიტეტებში კი მხილებულია 1946 წელს დაბადებული ბ.ტ. და 1996 წელს დაბადებული, წარსულში ნასამართლევი გ.მ.
 
დაკავებულების პირადი, საცხოვრებელი სახლების, ბინების და ავტომანქანების ჩხრეკის შედეგად, სულ ამოღებულია: "მაუზერის" ტიპის ცეცხლსასროლი პისტოლეტი, 2 გადაჭრილი სანადირო თოფი - ე.წ. "აბრეზი", „ტტ“-ს სისტემის ცეცხლსასროლი იარაღი, „აკს 74“-ის მოდელის ავტომატური ცეცხლსასროლი იარაღი, "კალაშნიკოვის" სისტემის 2ავტომატური ცეცხლსასროლი იარაღი, „VALTER-SUPER-X“-ის მოდელის სანადირო თოფი, 3 ცეცხლსასროლი პისტოლეტი, სასიგნალო შაშხანა, 2 სასიგნალო ვაზნა, ცეცხლსასროლი რევოლვერი, „მაუზერის“ სისტემის თვითნაკეთი წესით დამზადებული გლუვლულიანი გადაჭრილი თოფი - ე.წ. "აბრეზი", ქარხნული წესით დამზადებული 1 ცალი კარაბინი, ქარხნული წესით დამზადებული, „იჟ-18-ე“ მოდელის გლუვლულიანი თოფი, “მაკაროვის“ სისტემის არარეგისტრირებული ცეცხლსასროლი პისტოლეტი, „ჩეზეს“ ფირმის ცეცხლსასროლი პისტოლეტი, „კოლტის“ ფირმის რევოლვერი, ,,ვალტერის“ ფირმის ცეცხლსასროლი პისტოლეტი, “ARAL 1071”- ის მოდელის ცეცხლსასროლი პისტოლეტი, „კარაბინი“-ს მოდელის შაშხანა, „აკს“-ის მოდელის ავტომატური ცეცხლსასროლი იარაღი, „GOVERMENT“-ის ფირმის ცეცხლსასროლი იარაღი, თვითნაკეთი რევოლვერი, სხვადასხვა ტიპის ცეცხლსასროლი იარაღისთვის განკუთვნილი 1799 საბრძოლო ვაზნა, 28 მჭიდი და „რგდ“-ის ტიპის 5 ხელყუმბარა.
 
ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვისა და ტარების ფაქტებზე გამოძიება საქართველოს სისხლის სამართლის კოდექსის 236-ე მუხლის მე-3 და მე-4 ნაწილებით მიმდინარეობს.

შინაგან საქმეთა სამინისტროს თანამშრომლებისთვის, ევროკავშირისა და გაეროს განვითარების პროგრამის (UNDP) მხარდაჭერით, შეზღუდული შესაძლებლობის მქონე (შშმ) პირთა უფლებებისა და კომუნიკაციის სტანდარტის შესახებ კასკადური ტრენინგები დაიწყო.
 
სწავლება შინაგან საქმეთა მინისტრის მოადგილემ - ალექსანდრე დარახველიძემ, საპატრულო პოლიციის დეპარტამენტის დირექტორის მოადგილემ - სერგი ბზიშვილმა, საქართველოში ევროკავშირის წარმომადგენლობის ადამიანის უფლებების, მართლმსაჯულების და საშინაო საქმეების გუნდის ხელმძღვანელმა - აგატა ნიებოიმ და გაეროს განვითარების პროგრამის (UNDP) დემოკრატიული მმართველობის მიმართულების ხელმძღვანელმა - გიგი ბრეგაძემ გახსნეს.
 
სწავლების მიზანს წარმოადგენს შინაგან საქმეთა სამინისტროს თანამშრომელთათვის შეზღუდული შესაძლებლობის მქონე პირთა უფლებებისა და მათთან კომუნიკაციის სტანდარტის შესახებ ცოდნის გაღრმავება და საჭირო უნარ-ჩვევების გამომუშავება.
 
პირველ ეტაპზე, კასკადური სწავლებების პრიორიტეტად განისაზღვრა საპატრულო პოლიციის დეპარტამენტის თანამშრომელთა გადამზადება შეზღუდული შესაძლებლობის მქონე პირთა უფლებებისა და კომუნიკაციის სტანდარტების შესახებ.
 
კასკადური ტრენინგების განხორციელების შედეგად, ქვეყნის მასშტაბით გადამზადდება საპატრულო პოლიციის დეპარტამენტის 2200-მდე თანამშრომელი.
 
სამომავლოდ იგეგმება ანალოგიური ტრენინგების სისტემატურად ჩატარება სამინისტროს სხვა შესაბამისი დანაყოფების თანამშრომლებისთვის.

შინაგან საქმეთა სამინისტროს თბილისის პოლიციის დეპარტამენტის ძველი თბილისის მთავარი სამმართველოს თანამშრომლებმა, ცხელ კვალზე ჩატარებული ოპერატიულ-სამძებრო ღონისძიებების და საგამოძიებო მოქმედებების შედეგად, 1985 წელს დაბადებული, წარსულში მრავალჯერ ნასამართლევი ლ.გ. თბილისში დააკავეს. მას ბრალად ორი ან მეტი პირის მიმართ ჩადენილი მკვლელობის მცდელობა და ცეცხლსასროლი იარაღის მართლსაწინააღმდეგო შეძენა-შენახვა- ტარება ედება.
 
დანაშაული 16-დან 20 წლამდე ან უვადო თავისუფლების აღკვეთას ითვალისწინებს.
 
გამოძიებით დადგინდა, რომ ბრალდებულმა მიმდინარე წლის 9 მარტს, თბილისში, სოფიკო ჭიაურელის ქუჩაზე, ურთიერთშელაპარაკების ნიადაგზე, ცეცხლსასროლი იარაღიდან გასროლით 3 პირი დაჭრა და შემთხვევის ადგილიდან მიიმალა. დაჭრილი მამაკაცები საავადმყოფოში გადაიყვანეს, სადაც შესაბამისი მკურნალობა უტარდებათ.
 
გამოძიება მიმდინარეობს საქართველოს სისხლის სამართლის კოდექსის 19-109-ე მუხლის მე-3 ნაწილის „ა“ ქვეპუნქტით, ასევე, 236-ე მუხლის მე-3 და მე-4 ნაწილებით, რაც ორი ან მეტი პირის მიმართ ჩადენილ მკვლელობის მცდელობას და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.

შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა, ინტენსიურ რეჟიმში ჩატარებული კომპლექსური ოპერატიულ-სამძებრო და საგამოძიებო ღონისძიებების შედეგად, 6 ნარკორეალიზატორი: 1987 წელს დაბადებული ა.კ., 1997 წელს დაბადებული მ.თ., 1980 წელს დაბადებული, პირობითი მსჯავრის ქვეშ მყოფი დ.მ., 2000 წელს დაბადებული ა.გ., 1985 წელს დაბადებული მ.ბ. და უცხო ქვეყნის მოქალაქე, 1987 წელს დაბადებული ტ. უ. დააკავეს.
 
სამართალდამცველებმა თბილისში, ფონიჭალასა და რუსთავში, მოსამართლის განჩინების საფუძველზე, რამდენიმე ეტაპად განახორციელეს ნარკოტიკული საშუალებების - "ბუპრენორფინის", „ჰეროინისა“ და „მარიხუანის“ საკონტროლო შესყიდვები და მათი ფარული აუდიო-ვიდეო ჩაწერა.
 
პოლიციამ, ბრალდებული მ.თ.-ის პირადი და საცხოვრებელი ბინის ჩხრეკისას, ნივთმტკიცებად ამოიღო 4 შეკვრად დაფასოებული ნარკოტიკული საშუალება "მარიხუანა", 5 ძირი მცენარე კანაფი და ელექტროსასწორი. ა.გ.-ის საცხოვრებელი სახლის ჩხრეკისას კი ამოღებულია 2 შეკვრა ნარკოტიკული საშუალება "ჰეროინი", ასანთის 10 კოლოფში დაფასოებული ნარკოტიკული ნივთიერება და ელექტროსასწორი. ბრალდებულებისგან ასევე ნივთმტკიცებად ამოღებულია, სავარაუდოდ, ნარკოტიკების რეალიზაციის შედეგად მიღებული ფული.
 
სამეგრელო-ზემო სვანეთის პოლიციის დეპარტამენტის, ცენტრალური კრიმინალური პოლიციის დეპარტამენტის, სახელმწიფო უსაფრთხოების სამსახურის უსაფრთხოების დაცვის რეჟიმის მთავარი სამმართველოსა და შემოსავლების სამსახურის საბაჟო დეპარტამენტის თანამშრომლებმა, ერთობლივად ჩატარებული ოპერატიული და საგამოძიებო მოქმედებების შედეგად, 1968 წელს დაბადებული რ.ა. განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ბრალდებით დააკავეს.
 
სამართალდამცველებმა, დაკავებულის პირადი ჩხრეკისას, ნივთმტკიცების სახით ამოიღეს ნარკოტიკული საშუალება „ბუპრენორფინის“ შემცველი 24 აბი „სუბუტექსი“.
 
შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა ასევე ნარკოდანაშაულისთვის დააკავეს 1980 წელს დაბადებული გ. ს. მისი პირადი ჩხრეკისას ამოღებულია 43 აბი ნარკოტიკული საშუალება "ბუპრენორფინი".
 
ისანი-სამგორის მთავარი სამმართველოს თანამშრომლებმა 1989 წელს დაბადებული ა.ა. განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ბრალდებით, თბილისში დააკავეს. სამართალდამცველებმა, დაკავებულის პირადი ჩხრეკისას, ნარკოტიკული საშუალება “სირეცი” და დიდი ოდენობით თანხა ამოიღეს.
 
ვაკე-საბურთალოს მთავარი სამმართველოს თანამშრომლებმა 1993 წელს დაბადებული ს.რ. ნარკოტიკული საშუალების შეძენა-შენახვის ფაქტზე დააკავეს. დაკავებულის პირადი ჩხრეკისას, პოლიციამ ნარკოტიკული საშუალება „ალფა პვპ “ ნივთმტკიცების სახით ამოიღო.
 
აჭარის პოლიციის დეპარტამენტის დეტექტივების სამმართველოს თანამშრომლებმა, ჩატარებული ოპერატიული და საგამოძიებო ღონისძიებების შედეგად, 1988 წელს დაბადებული თ.ა. განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ბრალდებით დააკავეს.
 
სამართალდამცველებმა, თ.ა.-ს მართვის ქვეშ არსებული ავტომობილის ჩხრეკის შედეგად, ნივთმტკიცების სახით ამოიღეს 4 შეკვრად დაფასოებული „ჰეროინის“ შემცველი ნარკოტიკი.
 
დანაშაულები 8-დან 20 წლამდე ან უვადო თავისუფლების აღკვეთას ითვალისწინებს.
 
გამოძიება საქართველოს სისხლის სამართლის კოდექსის 260-ე და 273-ე 1-ლი პრიმა მუხლებით მიმდინარეობს.

შინაგან საქმეთა სამინისტროს ქვემო ქართლის პოლიციის დეპარტამენტის თანამშრომლებმა, ცხელ კვალზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, 1979 წელს დაბადებული დ.ყ. დააკავეს. მას დამამძიმებელ გარემოებაში ჩადენილ განზრახ მკვლელობის მცდელობაში და განზრახ მკვლელობაში ედება ბრალი.
 
დანაშაული 7-დან 20 წლამდე ან უვადო თავისუფლების აღკვეთას ითვალისწინებს.
 
გამოძიებით დადგინდა, რომ ალკოჰოლის ზემოქმედების ქვეშ მყოფმა დ.ყ.-მ გარდაბნის მუნიციპალიტეტის სოფელ ნორიოში, ურთიერთშელაპარაკებისას, ნაცნობი მამაკაცი - 1986 წელს დაბადებული ი.შ. ცეცხლსასროლი იარაღიდან გასროლით მოკლა, ხოლო 1985 წელს დაბადებული ზ.ქ. დაჭრა და შემთხვევის ადგილიდან მიიმალა. ზ.ქ. საავადმყოფოშია გადაყვანილი, სადაც შესაბამისი მკურნალობა უტარდება.
 
სამართალდამცველებმა ბრალდებული ცხელ კვალზე - მომხდარიდან რამდენიმე საათში დააკავეს.
 
პოლიციამ დანაშაულის ჩადენის იარაღი - სანადირო თოფი ნივთმტკიცების სახით ამოიღო.
 
განზრახ მკვლელობისა და დამამძიმებელ გარემოებაში ჩადენილ განზრახ მკვლელობის მცდელობის ფაქტზე გამოძიება საქართველოს სსკ-ის 108-ე და 19-109-ე მუხლებით მიმდინარეობს.

 

უკრაინის პრეზიდენტი ვოლოდიმირ ზელენსკი დიდი ბრიტანეთის პარლამენტის თემთა პალატაში სიტყვით გამოვიდა და ბრიტანელებს მოუყვა, რა ხდება უკრაინაში ბოლო 13 დღის განმავლობაში – მას შემდეგ, რაც რუსეთმა ომი დაიწყო. ზელენსკიმ თქვა, რომ უკრაინელები არ დანებდებიან და არ დამარცხდებიან, ისინი ბოლომდე იბრძოლებენ ზღვაზე, ჰაერში თუ ხმელეთზე.

პრეზიდენტ ვოლოდიმირ ზელენსკის სიტყვას სრულად გთავაზობთ:

„ბატონო სპიკერო! ბატონო პრემიერ-მინისტრო! მთავრობის, პარლამენტის წევრებო, ლორდებო! ქალბატონებო და ბატონებო! მივმართავ გაერთიანებული სამეფოს ყველა ხალხს. დიდი ბრიტანეთის ყველა ხალხს. დიდებულ ხალხს, დიდებული ისტორიით. მოგმართავთ, როგორც მოქალაქე, როგორც პრეზიდენტი, ასევე დიდებული ქვეყნის, დიდი ოცნებით და დიდი ბრძოლით. მინდა მოგიყვეთ ჩვენს 13 დღეზე. 

სასტიკი ომის 13 დღეზე, ომისა, რომელიც ჩვენ არ დაგვიწყია და არც გვინდოდა, მაგრამ ვომობთ, რადგან არ გვინდა დავკარგოთ ის, რაც გვაქვს, ის რაც ჩვენია – უკრაინა. ისევე, როგორც თქვენ არ გინდოდათ, დაგეკარგათ თქვენი კუნძული, როდესაც ნაცისტები იწყებდნენ ბრძოლას თქვენი დიდებული სახელმწიფოსთვის, ბრძოლას ბრიტანეთისთვის. 

ჩვენი თავდაცვის 13 დღეზე მინდა მოგიყვეთ:

პირველ დღეს, დილის 4 საათზე რაკეტებმა გადაგვიფრინა. გაგვეღვიძა ყველას, ჩვენ, ბავშვებს, ყველა ცოცხალ ადამიანს, მთელ უკრაინას. და მას შემდეგ არ გვძინებია. ყველამ იარაღი ავიღეთ ხელში და დიდ არმიად ვიქეცით.

მეორე დღეს ვიგერიებდით თავდასხმებს ჰაერიდან, მიწაზე და ზღვაში. და ჩვენმა გმირმა მესაზღვრეებმა ზმეინის კუნძულიდან, ყველას გააგებინეს, თუ როგორი იქნება ომის დასასრული. კერძოდ, ბოლოს და ბოლოს საით წავა მტერი. როდესაც რუსულმა ხომალდმა ჩვენი ბიჭებისგან იარაღის დაყრა მოითხოვა, მათ უპასუხეს... ისე მტკიცედ, რომ პარლამენტში ამას ვერ გავიმეორებ. და ჩვენ ვიგრძენით ძალა. დიდი ძალა ჩვენი ხალხისა, რომელიც ბოლომდე იბრძოლებს ოკუპანტის გასაძევებლად.

მესამე დღეს რუსეთის ჯარმა დაუფარავად დაიწყო თავდასხმა მოქალაქეებზე, საცხოვრებელ სახლებზე. საარტილერიო თავდასხმა. საჰაერო დაბომბვა. და ამან საბოლოოდ გვაჩვენა ჩვენც და აჩვენა მსოფლიოსაც, ვინ ვინაა. ვინაა დიდებული ხალხი, და ვინაა უბრალოდ მხეცი. 

მეოთხე დღეს უკვე ათობით ტყვე ავიყვანეთ, მაგრამ ღირსება არც მაშინ დაგვიკარგავს. შეურაცხყოფა არ მიგვიყენებია, მათ, როგორც ადამიანებს, ისე ვეპყრობით. ჩვენ ადამიანებად დავრჩით ამ სამარცხვინო ომის მეოთხე დღესაც.

მეხუთე დღეს ტერორი უკვე სრულიად აშკარა გახდა. ტერორი ქალაქების, პატარა ქალაქების წინააღმდეგ. განადგურებული რაიონები. ბომბები, ბომბები, ბომბები და ისევ ბომბები სახლების, სკოლების, საავადმყოფოების თავზე. და ეს გენოციდია, რომელმაც არათუ ვერ გაგვტეხა, დაგვრაზმა და ჩვენი დიადი სიმართლე გვაგრძნობინა.

მეექვსე დღეს რუსული რაკეტები ბაბინ იარს დაეცა. ეს ის ადგილია, სადაც მეორე მსოფლიო ომის დროს, ნაცისტებმა 100 ათასი ადამიანი სიკვდილით დასაჯეს. 80 წლის შემდეგ, რუსეთმა ისინი ხელახლა დახოცა.

მეშვიდე დღეს მივხვდით, რომ ისინი ჩვენს ტაძრებსაც ანადგურებენ. ბომბებით! ისევ რაკეტებით. მათ არ აქვთ რამე ისე წმინდა და დიდი, როგორც გვაქვს ჩვენ.

მერვე დღეს მსოფლიომ დაინახა, როგორ ესროდნენ რუსული ტანკებიდან ატომურ ელექტროსადგურს. ყველაზე დიდს ევროპაში. და მსოფლიომ დაიწყო იმის გაცნობიერება, რომ ეს არის ტერორი ყველას წინააღმდეგ. ეს დიდი ტერორია.

მეცხრე დღეს ჩვენ NATO-ს სახელმწიფოთა შეხვედრებს ვუსმინეთ. შეხვედრებს ჩვენთვის სასურველი შედეგის გარეშე, სიმამაცის გარეშე. ასეთი იყო ჩვენი განცდა - არ მინდა ვინმეს ვაწყენინო - ჩვენ ვიგრძენით, რომ ალიანსები არ მუშაობს. ცის დაკეტვაც კი არ შეუძლიათ. ამიტომაც ევროპაში უსაფრთხოების გარანტიების შექმნა ნულიდან არის დასაწყები.

მეათე დღეს, ყველგან, ოკუპირებულ ქალაქებში მასობრივად გამოვიდნენ შეუიარაღებელი უკრაინელები. შიშველი ხელებით აჩერებდნენ ჯავშანტექნიკას. ჩვენ დაუმარცხებლები გავხდით.

მეთერთმეტე დღეს, როდესაც უკვე საცხოვრებელ რაიონებს ბომბავდნენ, როდესაც აფეთქებებისგან ყველაფერი ნადგურდებოდა, როდესაც დანგრეული ონკოკლინიკიდან ბავშვები გამოჰყავდათ... ჩვენ გავიაზრეთ: უკრაინელები გმირებად იქცნენ. ასობით ათასი ადამიანი. მთლიანი ქალაქები. ბავშვები, დიდები - ყველა.

მეთორმეტე დღეს, როდესაც რუსეთის არმიის დანაკარგებმა 10 ათას მკვდარ სამხედროს გადააჭარბა, მათ რიგში გენერალიც აღმოჩნდა. ამან ჩვენ რწმენა შეგვძინა: ყველა დანაშაულისთვის, ყველა სამარცხვინო ბრძანებისთვის აგებენ პასუხს - ან საერთაშორისო სასამართლოთი ან უკრაინული იარაღით.

მეცამეტე დღეს რუსული ჯარებით ალყაშემორტყმულ მარიუპოლში ბავშვი დაიღუპა. უწყლობით. ისინი არც პროდუქტებს უშვებენ, არც წყალს აძლევენ ადამიანებს. უბრალოდ დაკეტეს - და ისინი კიდევ სარდაფებში არიან. ვფიქრობ, ყველას ესმის; იქ ადამიანებს წყალი არ აქვთ.

დიდო ბრიტანეთო! უკრაინა არ ისწრაფოდა ამისკენ. არ ეძებდა დიდებას. მაგრამ ამ ომის დღეებში ის გახდა დიადი. უკრაინა, რომელიც ოკუპანტების ტერორის მიუხედავად, ადამიანების გადარჩენას ცდილობს. უკრაინა, რომელიც მსოფლიოს ერთ-ერთი უდიდესი არმიის დარტყმების მიუხედავად, იცავს თავისუფლებას; ჩვენი ცა ჯერ კიდევ ღიაა რუსული რაკეტებისთვის, თვითმფრინავებისა და შვეულმფრენებისთვის, მაგრამ მაინც ვიგერიებთ მტერს.

„ყოფნა, არყოფნა“ - თქვენ კარგად იცით ეს შექსპირული კითხვა. 13 დღის წინ კიდევ შეიძლებოდა დაგვესვა ეს შეკითხვა. მაგრამ ახლა - უკვე აღარ. ახლა ცხადია - „ყოფნა“. და ცხადია, თავისუფლად „ყოფნა“.

ჩვენ ვიბრძოლებთ ტყეებში, მინდვრებში, სანაპიროებზე, ქალაქებსა და სოფლებში, ქუჩებში, ჩვენ ვიბრძოლებთ ბორცვებზე... და მინდა ჩემგან დავამატო: ჩვენ ვიბრძოლებთ მიწაყრილებზე, კალმიუსისა და დნეპრის ნაპირებზე! და ჩვენ არ დავნებდებით!

რა თქმა უნდა, თქვენი დახმარებით, დიდებული ქვეყნების ცივილიზაციის დახმარებით. თქვენი მხარდაჭერით, რისთვისაც მადლობელი ვართ და რომლის ძალიან დიდი იმედი გვაქვს. განსაკუთრებით მადლობელი ვარ შენი, ბორის, ჩემო მეგობარო!

გააძლიერეთ სანქციები ტერორისტი სახელმწიფოს წინააღმდეგ. საბოლოოდ აღიარეთ იგი ტერორისტულ სახელმწიფოდ. იპოვეთ გზა, რომ ჩვენი უკრაინის ცა უსაფრთხო გახადოთ. გააკეთეთ ის, რაც შეგიძლიათ. რასაც გავალდებულებთ თქვენი სახელმწიფოსა და ხალხის სიდიადე.

დიდება დიდ უკრაინას! დიდება დიდ ბრიტანეთს!“.

 

შინაგან საქმეთა მინისტრი, ვახტანგ გომელაური პარლამენტის ნდობის ჯგუფის სხდომას დაესწრო. შეხვედრას შინაგან საქმეთა მინისტრის მოადგილეები - ალექსანდრე დარახველიძე და გიორგი ბუთხუზი დაესწრნენ.

ვახტანგ გომელაურმა დეპუტატებთან საქართველოს შინაგან საქმეთა სამინისტროში 2021 წელს განხორციელებულ და სამომავლოდ დაგეგმილ, ასევე, სახელმწიფო საიდუმლოებასა და პროგრამებთან დაკავშირებულ საკითხებზე ისაუბრა.

შინაგან საქმეთა მინისტრმა ნდობის ჯგუფის წევრებთან ერთად განიხილა რეგიონში განვითრებული მოვლენების პარალელურად საქართველოს უსაფრთხოების საკითხები, სახელმწიფო საზღვრის დაცვის მიმართულებით და საოკუპაციო ხაზთან არსებული ვითარება.

შეხვედრა მედიისთვის დახურულ ფორმატში წარიმართა. სხდომის დასრულების შემდეგ, ვახტანგ გომელაურმა ჟურნალისტების კითხვებს უპასუხა.

"ნდობის ჯგუფის შეხვედრაზე ვისაუბრეთ სხვადასხვა საკითხზე, მათ შორის საზღვრის მიმართულებაზე, ასევე, დანაშაულის სტატისტიკაზე. აგრეთვე იყო მილსადენების საკითხი, რომელიც ძალიან მნიშვნელოვანია ჩვენი ქვეყნისთვის, მაგალითად, ბაქო-თბილისი-ჯეიჰანის მილსადენი. ეს იყო მთავარი მიმართულებები, რომლებზეც ვიმსჯელეთ და ასევე, განვიხილეთ სამინისტროს საიდუმლო შესყიდვების საკითხიც,"- განაცხადა ვახტანგ გომელაურმა.

შინაგან საქმეთა სამინისტროს თბილისის პოლიციის დეპარტამენტში, მიმდინარე წლის 1 მარტს, სოციალურ ქსელში ერთ-ერთი მომხმარებლის მიერ გავრცელებულ განცხადებასთან დაკავშირებით, რომელიც შეიცავს დანაშაულის ნიშნებს, კერძოდ ძალადობრივი ქმედებისაკენ საჯაროდ მოწოდებას, გამოძიება დაიწყო.

გამოძიებით დადგინდა, რომ 1989 წელს დაბადებულმა ს.ჯ-მ, სოციალურ ქსელში მოქალაქეებს თბილისში, ინგოროყვას ქუჩაზე მთავრობის ადმინისტრაციული შენობის პირველ სართულზე ინფრასტრუქტურის დაზიანებისკენ საჯაროდ მოუწოდა.

ფაქტზე გამოძიება სისხლის სამართლის კოდექსის 239-ე პრიმა მუხლით დაიწყო, გამოძიების ფარგლებში დადგინდა მოწოდების ავტორის ვინაობა და ის გამოკითხვის მიზნით პოლიციის შესაბამის დანაყოფში არის დაბარებული.

შინაგან საქმეთა სამინისტრო, როგორც მართლწესრიგის დაცვაზე პასუხისმგებელი უწყება, მოუწოდებს ყველა მოქალაქეს, პოლიტიკურ ლიდერებს, შეკრებისა და მანიფესტაციების ორგანიზატორებს და მონაწილეებს, დაიცვან მართლწესრიგი და დაემორჩილონ პოლიციის კანონიერ მოთხოვნებს.

კანონდარღვევის ნებისმიერი ფაქტი პოლიციის მხრიდან მყისიერად იქნება აღკვეთილი და შესაბამისი სამართლებრივი რეაგირება მოჰყვება.

შინაგან საქმეთა სამინისტროს თბილისის პოლიციის დეპარტამენტის ძველი თბილისის მთავარი სამმართველოს თანამშრომლებმა, ჩატარებული ოპერატიული და საგამოძიებო მოქმედებების შედეგად, სამი პირი: 1997 წელს დაბადებული თ.ქ., 1995 წელს დაბადებული ი.ა. და 1987 წელს დაბადებული დ.ბ. დააკავეს. მათ ჯგუფურად ჩადენილ ძალადობა ედებათ ბრალად.
 
დანაშაული 2 წლამდე ვადით თავისუფლების აღკვეთას ითვალისწინებს.
 
გამოძიებით დადგინდა, რომ ბრალდებულებმა მიმდინარე წლის 21 თებერვალს, თბილისში მდებარე ერთ-ერთ ბარში, 1996 წელს დაბადებულ გ.მ.-ს სიტყვიერი და ფიზიკური შეურაცხყოფა მიაყენეს.
 
სამართალდამცველებმა დანაშაულის სავარაუდო ჩამდენი პირები ცხელ კვალზე დააკავეს.
 
გამოძიება საქართველოს სისხლის სამართლის კოდექსის 126-ე მუხლის პირველი პრიმა ნაწილის “ბ” ქვეპუნქტით მიმდინარეობს, რაც ჯგუფურად ჩადენილ ძალადობას გულისხმობს.

შინაგან საქმეთა სამინისტროს თბილისის პოლიციის დეპარტამენტის დიდუბე-ჩუღურეთის მთავარი სამმართველოს თანამშრომლებმა ჩატარებული საგამოძიებო მოქმედებების შედეგად, 1994 წელს დაბადებული თ.ბ. ორი ან მეტი პირის განზრახ მკვლელობის მცდელობის ბრალდებით დააკავეს.
 
დანაშაული 16-დან 20 წლამდე ან უვადო თავისუფლების აღკვეთას ითვალისწინებს.
 
გამოძიებით დადგენილია, რომ ბრალდებულ თ.ბ.-ს თბილისში, მეტროსადგურ დიდუბის მიმდებარე ტერიტორიაზე სავარაუდოდ ალკოჰოლური ზემოქმედების ქვეშ მყოფ, მისთვის უცნობ მამაკაცებთან ურთიერთშელაპარაკება მოუვიდა, რის ნიადაგზეც თ.ბ.-მ 3 პირს ცივი იარაღის გამოყენებით სხეულზე დაზიანებები მიაყენა და შემთხვევის ადგილიდან მიიმალა.
 
დაჭრილი მამაკაცები სამედიცინო დაწესებულებაში არიან მოთავსებული და უტარდებათ შესაბამისი დახმარება.
 
სამართალდამცველებმა ცხელ კვალზე ჩატარებული საგამოძიებო და სამძებრო მოქმედებების შედეგად თ.ბ. დააკავეს. პოლიციამ დანაშაულის ჩადენის იარაღი - დანა ნივთმტკიცებად ამოიღო.
 
გამოძიება ორი ან მეტი პირის განზრახ მკვლელობის მცდელობის ფაქტზე მიმდინარეობს, სისხლის სამართლის კოდექსის 19-109-ე მუხლის მე-3 ნაწილის "ა" ქვეპუნქტით