მსოფლიო

ავსტრალიელმა სწავლულებმა გაარკვიეს, რომ სახლში კატების არსებობა შიზოფრენიის განვითარების რისკს ზრდის. ქვინსლენდის უნივერსიტეტის მკვლევარებმა, 11 ქვეყნის მონაცემებზე დაყრდნობით, 17 კვლევა ჩაატარეს, რამაც აჩვენა, რომ ბოლო 44 წლის განმავლობაში, ამ დაავადების მქონე ადამიანები ცხოვრობდნენ და კონტაქტობდნენ კატებთან. სპეციალისტების თქმით, ყველაფერი პარაზიტ Toxoplasma gondii-ის ბრალია, რომელიც ამ ცხოველებში ცხოვრობს. ის ადამიანის ორგანიზმში კატებთან თამაშისას, კბენით ან ნაკაწრით გადადის. შემდეგ ცენტრალურ ნერვულ სისტემაში აღწევს და ზემოქმედებს ნეიროტრანსმიტერებზე, რაც ადამიანებს ფსიქიატრიული კლინიკის პაციენტებად აქცევს.

ამერიკელი სწავლულები შეეცადნენ ამ მონაცემების გაქარწყლებას - მათ განაცხადეს, რომ 345 მოხალისეზე ჩატარებული კვლევებით მსგავსი რამ - კავშირი შიზოფრენიასა და სახლში კატების ყოფნას შორის - არ გამოვლენილა. თუმცა, შემდეგ განაცხადეს, რომ არ გაუთვალისწინებიათ კბენების ფაქტორი და საკუთარი მტკიცებები უკანვე წაიღეს. კატების მფლობელებს კი ურჩიეს, ისინი ვეტერინარებთან პარაზიტებზე შეამოწმონ. 

ნობელის მშვიდობის პრემია მიიღო ორგანიზაციამ - Nihon Hidankyo, ამომავალი მზის ქვეყნიდან, ბირთვული იარაღისგან თავისუფალი სამყაროს მიღწევაში ძალისხმევისა და იმის დემონსტრირებისთვის, რომ ატომური იარაღი აღარასდროს უნდა გამოიყენონ. Nihon Hidankyo - ჰიროსიმასა და ნაგასაკის დაბომბვას გადარჩენილთა მოძრაობაა. მისი წევრები დაუღალავად მუშაობენ ბითვული იარაღის გამოყენების კატასტროფული ჰუმანიტარული შედეგების ცნობიერების ამაღლებაზე. უკვე გამოვლინდნენ პრემიის ლაურეატები ფიზიკაში, ფიზიოლოგიასა და მედიცინაში, ქიმიასა და ლიტერატურაშიც.

ბრიტანელი მსახიობი აარონ ტეილორ-ჯონსონი, რომელიც მომავალი ჯეიმს ბონდის როლის პრეტენდენტია, მსოფლიოში ყველაზე ლამაზ მამაკაცად დასახელდა. ცნობილმა პლასტიკურიმა ქირურგმა, დოქტრომა ჯულინა დე სილვამ „ოქროს თანაფარდობის“ მეთოდი გამოიყენა და პლანეტის 10 ყველაზე მომხიბვლელი მამაკაცი დაასახელა.

34 წლის აარონმა პირველი ადგილი თითქმის იდეალური შედეგიოთ - 93.04%-ით დაიკავა. „ის ყველაზე ლამაზი ჯეიმს ბონდი იქნება, თუკი ამ როლს მიიღებს“, - განაცხადა დე სილვამ. ტეილორ-ჯონსონი მაყურებლისთვის ცნობილია ვრონსკის როლით, ამერიკული „ანა კარენინადან“. სიაში მეორე ადგილზე მოხვდა შაკირას ბოიფრენდი, 32 წლის ლუსიენ ლავისკონტი, სერიალის - „ემილი პარიზში“ მსახიობი, რომელმაც 92.41% მოაგროვა. მესამე საფეხურზეა ირლანდიელი მსახიობი, პოლ მესკალი - 92.38%-ით. ლამაზი მამაკაცების ათეულში მოხვდნენ: რობერტ პატინსონი, ჯეკ ლოუდენი, ჯორჯ კლუნი, ნიკოლას ჰოლტი, ჩარლზ მელტონი, იდრის ელბა და ცნობილი ინდოელი მსახიობი, შახ რუკხ ხანი. 

ინგლისის უმაღლესმა სასამართლომ დაადგინა, რომ სექსუალური ძალადობაა, თუკი მამაკაცს ეტყვით, რომ ის „მელოტია“. როგორც Daily Mail-ი წერს, ახლა ძლიერი სქესის წარმომადგენლის მისამართით ნათქვამი ეს სიტყვა ძალადობად კვალიფიცირდება. ეს გადაწყვეტილება ერთ-ერთი სასამართლო განხილვის შედეგია. ინგლისელი ტონი ფინი მის ყოფილ დამსაქმებელს, კომპანია British Bung-ს უჩიოდა, საიდანაც ფინი 2021 წელს გაათავისუფლეს. მან სააპელაციო სასამართლოში შეიტანა სარჩელი და ამტკიცებდა, რომ სექსუალური ძალადობის მსხვერპლი გახდა შეურაცხყოფის გამო, რაც მისმა უფროსმა ჩხუბის დროს მიაყენა. უფროსმა მას „მელოტი ნაბიჭვარი“ უწოდა.

2022 წელს, სასამართლომ განაჩენი ფინის სასარგებლოდ გამოიტანა, თუმცა დამსაქმებელმა ის მაშინვე გაასაჩივრა. საბოლოოდ, აპელაცია უარყოფილი აღმოჩნდა, მოსამართლემ განაცხადა, რომ ყოფილი უფროსის ნათქვამი სიტყვები ტონის სიმელოტეზე „გენდერთან არის დაკავშირებული“. მისი თქმით, მამაკაცის სიმელოტის აღნიშვნა სამსახურში იგივეა, ქალის მკერდის ზომაზე გააკეთო კომენტარიო. საბოლოო განაჩენი ფინს საშუალებას აძლევს, კომპენსაცია მოითხოვოს არასამართლიანი გათავისუფლებისა და სექსუალური ძალადობისთვის. 

დონალდ ტრამპმა ფლორიდაში, მხარდამჭერებს სიტყვით მიმართა და განაცხადა, რომ ამერიკაში ოქროს ხანა იწყება:

ჩვენ გამოვაჯანმრთელებთ ჩვენს ქვეყანას, რომელსაც ახლა დახმარება სჭირდება. მოვაგვარებთ საზღვრის პრობლემას და ყველაფერს, რაც გვაწუხებს. ჩვენ დღეს ისტორია დავწერეთ და აქამდე რთული გზა გავიარეთ, გადავლახეთ დაბრკოლებები, რომელთა გადალახვა ბევრს შეუძლებელი ეგონა. ეს არის პოლიტიკური გამარჯვება, რომლის მსგავსი ადრე არავის უნახავს. ეს არის ამერიკის ოქროს ხანის დასაწყისი. ეს არის ამერიკელი ხალხის დიდებული გამარჯვება, რომელიც დაგეხმარება, რომ ამერიკა ისევ დიდებული გავხადოთ." განაცხადა ტრამპმა.

Fox News-ის, Associated Press-ისა და , BBC-ის მონაცემებით, აშშ-ის 47-ე პრეზიდენტი რესპუბლიკელი დონალდ ტრამპი ხდება.