მსოფლიო
- Details
- Category: მსოფლიო ამბები
- 158
რუსეთის ხელისუფლებამ შეცვალა თანხის ერთჯერადად გადახდის წესი თავდაცვის სამინისტროსთან კონტრაქტის გაფორმებისთვის, უკრაინის ომში მონაწილეობის მიზნით.
28 დეკემბრით დათარიღებული ახალი ბრძანებით, რუსეთის მოქალაქეები, რომლებიც კონტრაქტის გაფორმების მომენტში საპატიმროებში იხდიან სასჯელს, კარგავენ ამგვარი ანაზღაურების მიღების უფლებას. ახალი წესი 2025 წლის 1 იანვრიდან ამოქმედდება.
მსჯავრდადებულები, რომლებიც კონტრაქტებს გააფორმებდნენ, ამ დრომდე იღებდნენ ერთჯერად ანაზღაურებას, რომლის მოცულობაც ფედერალური და რეგიონული პროგრამებიდან გამომდინარე განისაზღვრებოდა.
მიმდინარე წლის ივლისში, რუსეთის პრეზიდენტმა ვლადიმირ პუტინმა ხელი მოაწერა ბრძანებას, რომელიც ანაზღაურების ოდენობად 400 ათას რუბლს (დაახლოებით 3700 ამერიკული დოლარი) აწესებდა სამხედრო მოსამსახურეებისთვის. ამავდროულად, ბევრ რეგიონში მოქმედებდა დამატებითი ანაზღაურება და მხარდაჭერის სხვა ზომები.
კონტრაქტის გაფორმების გზით სისხლისსამართლებრივი დევნისგან გათავისუფლების შესაძლებლობა მსჯავრდადებულებმა მიიღეს 2023 წელს. 2024 წლის მარტში რუსეთის სახელმწიფო სათათბირომ მიიღო კანონების პაკეტი, რომელიც სისხლისსამართლებრივი პასუხისმგებლობისგან გათავისუფლებას შესაძლებელს ხდიდა მცირე და საშუალო სიმძიმის დანაშაულებში ეჭვმიტანილებისთვის, ბრალდებულებისა და მსჯავრდადებულებისთვის.
თავიდან მსჯავრდადებულების ომში გაწვევა დაიწყო აწ გარდაცვლილი ევგენი პრიგოჟინის გასამხედროებულმა ჯგუფმა "ვაგნერმა". შემდეგ ამ პროცესს თავდაცვის სამინისტრო ჩაუდგა სათავეში.
როგორც წესი, მსჯავრდადებულებს გზავნიან ფრონტის ყველაზე რთულ არეალებში, რათა მაქსიმალურად შეინარჩუნონ ელიტური დანაყოფების ძალები. თავად ყოფილი პატიმრები თვლიან, რომ კოლონიებიდან ფრონტზე გაგზავნილთა 50-დან 70 პროცენტამდე იღუპება.
ომიდან დაბრუნებული მსჯავრდადებულების მხრიდან ხშირია დანაშაულის ისევ ჩადენის შემთხვევები. ინტერნეტგამოცემა Vyorstka იუწყება, რომ 2022 წლის თებერვლიდან 2024 წლის სექტემბრამდე რუსეთის 460-ზე მეტი მოქალაქე გახდა უკრაინიდან დაბრუნებული მსჯავრდადებულების მსხვერპლი. ამ დანაშაულთაგან 242 შემთხვევა მკვლელობა იყო.
- Details
- Category: მსოფლიო ამბები
- 107
უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთმა დღევანდელი მასირებული შეტევა საგანგებოდ დაამთხვია შობის დღესასწაულს.
„დღეს პუტინმა შეტევისთვის შეგნებულად აირჩია შობა. რა შეიძლება იყოს ამაზე უფრო არაადამიანური?“ - დაწერა ზელენსკიმ სოციალურ ქსელებში.
უკრაინა ზოგიერთი სხვა მართლმადიდებლური ქვეყნის, მათ შორის რუსეთის და საქართველოს მსგავსად, შობას 7 იანვარს აღნიშნავდა. 2023 წლის ივლისში უკრაინის პარლამენტმა ზოგიერთი რელიგიური დღესასწაულის აღნიშვნის დღე შეცვალა. მათ შორის შობის - 7 იანვრის ნაცვლად 25 დეკემბერი.
უკრაინის პრეზიდენტის ინფორმაციით, რუსეთმა დღევანდელი მასირებული შეტევისთვის გამოიყენა 70-ზე მეტი რაკეტა და 100-ზე მეტი დრონი, მთავარი სამიზნე კი ენერგეტიკა იყო.
ზელენსკის წინასწარი მონაცემებით, უკრაინის თავდაცვის ძალებმა 50-ზე მეტი რაკეტა და დრონების მნიშვნელოვანი ნაწილი ჩამოაგდეს. უკრაინის პრეზიდენტის თანახმად, ენერგეტიკოსები მუშაობენ რამდენიმე რეგიონისთვის შეწყვეტილი ენერგომომარაგების რაც შეიძლება სწრაფად აღსადგენად.
რუსეთმა უკრაინის ენერგოობიექტების განადგურება ქვეყანაში ფართომასშტაბიანი შეჭრიდან მალევე დაიწყო და ამ სისტემას დღემდე მიზანმიმართულად უტევს. უკრაინაში შექმნილი ენერგოკრიზისი განსაკუთრებით ზამთრის პერიოდში მწვავდება.
უკრაინის ენერგოობიექტების მიზანმიმართულად განადგურების გამო, 2024 წლის მარტში სისხლის სამართლის საერთაშორისო სასამართლომ გასცა რუსეთის შავი ზღვის ფლოტის სარდლის, ადმირალ ვიქტორ სოკოლოვის და საჰაერო-კოსმოსური ძალების შორეული ავიაციის სარდლის, გენერალ-ლეიტენანტ სერგეი კობილაშის დაპატიმრების ორდერები.
