Category Blog

უკრაინის პრეზიდენტი ვოლოდიმირ ზელენსკი აცხადებს, რომ ვლადიმერ პუტინთან შეხვედრას დათანხმდება შვეიცარიაში, ავსტრიაში ან თურქეთში. ამის შესახებ ზელენსკიმ ჟურნალისტებთან საუბრისას განაცხადა.

ზელენსკის თქმით, უკრაინას სავსებით სამართლიანად მიაჩნია, რომ უკრაინის, აშშ-ისა და რუსეთის ლიდერების შეხვედრა გაიმართოს ევროპის ნეიტრალურ ქვეყნებში, რადგანაც ომი უკრაინაში და ევროპის კონტინენტზე მიმდინარეობს.

„მე ვთქვი, რომ ჩვენ დავთანხმდებით. შვეიცარია, ავსტრია – ჩვენ ვთანხმდებით. თურქეთი? თურქეთი ჩვენთვის ნატო-სა და ევროპის ნაწილია. და ჩვენ ამის წინააღმდეგები არ ვართ.

მოლაპარაკებების მოსკოვში ორგანიზების წინააღმდეგი ვარ. რაც შეეხება ბუდაპეშტს, მე მეჩვენება, რომ დღეს ეს არ არის ადვილი. ეს იოლი არ არის, რადგანაც არსებობს ევროპის ყველა ქვეყნის ერთობა უკრაინის მხარდაჭერაში ომის დროს. სიმართლე რომ ვთქვათ, ბუდაპეშტი ჩვენ მხარს არ გვიჭერდა. მე არ ვამბობ, რომ ორბანის პოლიტიკა უკრაინის საწინააღმდეგო იყო, მაგრამ იყო უკრაინის მხარდაჭერის საწინააღმდეგო“, – აღნიშნა ზელენსკიმ.

ცნობისთვის, მედია მანამდე წერდა, რომ აშშ ზელენსკისა და პუტინის შეხვედრის ჩატარების ადგილად ბუდაპეშტს განიხილავს.

აშშ-ის ვიცე-პრეზიდენტი ჯეი დი ვენსი აცხადებს, რომ ევროპულ ქვეყნებს ლომის წილის აღება მოუწევთ უკრაინის უსაფრთხოების გარანტიების ფინანსური თვალსაზრისით. ამის შესახებ ჯეი დი ვენსმა „ფოქს ნიუსის“ ეთერში განაცხადა.

„არ ვფიქრობ, რომ აქ ტვირთი ჩვენ უნდა ვიტვირთოთ. ვფიქრობ, ჩვენ მხარი უნდა დავუჭიროთ, თუ ეს საჭიროა ომისა და მკვლელობის შესაჩერებლად, მაგრამ ვფიქრობ, რომ ჩვენ უნდა ველოდოთ – და პრეზიდენტი ნამდვილად ელოდება – რომ ევროპა აქ წამყვან როლს შეასრულებს. პრეზიდენტმა ნათლად განაცხადა: ნახეთ, შეერთებული შტატები მზადაა საუბრისთვის, მაგრამ ჩვენ არ ავიღებთ ვალდებულებებს, ვიდრე არ გავიგებთ, რა იქნება საჭირო ომის შესაჩერებლად. რა ფორმაც არ უნდა მიიღოს ამან, ევროპელებს მოუწევთ, ლომის წილი იტვირთონ. ეს მათი კონტინენტია, ეს მათი უსაფრთხოებაა

ზოგჯერ ლიდერების პირისპირ დასხდომას შეუძლია, გაარღვიოს ის ჩიხი, რისი გაკეთებაც მათ გუნდებს არ ძალუძთ. ვენსის თქმით, ორი საკითხია კვლავ მოსაგვარებელი.

პირველი – უკრაინამ უნდა იცოდეს, რომ მას კვლავ არ შეუტევს რუსეთი. უნდა იცოდეს, რომ მას აქვს ტერიტორიული მთლიანობის პერსპექტივა მომავალში. რუსებს უნდათ ტერიტორიის გარკვეული ნაწილები, რომლის უმეტესი ნაწილი მათ აქვთ ოკუპირებული, მაგრამ ზოგიც არ აქვთ. ასე რომ, ეს მართლაც არის ის ადგილი, სადაც მოლაპარაკებები საჭიროა. უკრაინელებს უნდათ უსაფრთხოების გარანტიები, რუსებს უნდათ ტერიტორიის გარკვეული რაოდენობა“, – განაცხადა ვენსმა.

თეთრ სახლში დონალდ ტრამპისა და ვოლოდიმირ ზელენსკის შეხვედრა გაიმართა.

„უკრაინის პრეზიდენტის აქ ყოფნა დიდი პატივია. ვფიქრობ, პროგრესი არის. როგორც იცით, ცოტა ხნის წინ რუსეთის პრეზიდენტთან კარგი შეხვედრა გვქონდა და არის შესაძლებლობა, რომ ეს რაღაც შედეგს გამოიღებს“, - განაცხადა დონალდ ტრამპმა.

ვოლოდიმირ ზელენსკიმ აშშ-ის პირველ ლედის, მელანია ტრამპს გატაცებული უკრაინელი ბავშვების შესახებ ვლადიმერ პუტინისთვის წერილის გადაცემისთვის მადლობა გადაუხადა.

ვოლოდიმირ ზელენსკიმ დონალდ ტრამპს უკრაინის პირველი ლედისგან, ოლენა ზელენსკასგან მელანია ტრამპისთვის განკუთვნილი წერილი გადასცა.

ევროპელი ლიდერები აპირებენ, მხარი დაუჭირონ უკრაინის პრეზიდენტ ვოლოდიმირ ზელენსკის ორშაბათს ვაშინგტონში აშშ-ის პრეზიდენტ დონალდ ტრამპთან დაგეგმილ შეხვედრაზე. ამის შესახებ BBC და სხვადასხვა მედია, წყაროებზე დაყრდნობით წერს. ევროპელი ლიდერების უმეტესობამ უკვე დაადასტურა ვაშინგტონში ვიზიტი. 

უკრაინისა და აშშ-ის პრეზიდენტების შეხვედრაში მონაწილეობის მიღებაზე მზადყოფნა გამოთქვეს ევროკომისიის ხელმძღვანელმა ურზულა ფონ დერ ლაიენმა, საფრანგეთის პრეზიდენტმა ემანუელ მაკრონმა, გერმანიის კანცლერმა ფრიდრიხ მერცმა, დიდი ბრიტანეთის პრემიერ-მინისტრმა კირ სტარმერმა, ფინეთის პრეზიდენტმა ალექსანდერ სტუბმა, იტალიის პრემიერ-მინისტრმა ჯორჯა მელონიმ და ნატოს გენერალურმა მდივანმა მარკ რიუტემ.

ამ გზით უკრაინის მოკავშირეები იმედოვნებენ, რომ თავიდან აიცილებენ აშშ-ისა და უკრაინის პრეზიდენტებს შორის საჯარო დაპირისპირების განმეორებას, რაც წლის დამდეგს მოხდა.

ევროკავშირისა და დიდი ბრიტანეთის ლიდერებმა აშშ-ის პრეზიდენტის დონალდ ტრამპისა და რუსეთის ლიდერის ვლადიმერ პუტინის შეხვედრის შესახებ ერთობლივი წერილი გაავრცელეს, სადაც აღნიშნულია, რომ ისინი უკრაინის სამხედრო მხარდაჭერას გააგრძელებენ. გაგრძელდება აგრეთვე რუსეთზე სასანქციო წნეხი მანამ, სანამ ომი უკრაინაში გრძელდება: 

 "დღეს დილით ადრე, პრეზიდენტმა ტრამპმა ჩვენ და პრეზიდენტ ზელენსკის 15 აგვისტოს ალასკაში რუსეთის პრეზიდენტთან გამართული შეხვედრის შესახებ ინფორმაცია მოგვაწოდა. 

ლიდერები მიესალმნენ პრეზიდენტ ტრამპის მცდელობებს, შეაჩეროს მკვლელობები უკრაინაში, დაასრულოს რუსეთის აგრესიული ომი და მიღწეული იყოს სამართლიანი და მდგრადი მშვიდობა.

როგორც პრეზიდენტმა ტრამპმა განაცხადა, „შეთანხმება არ არსებობს, სანამ შეთანხმება არ იქნება“. პრეზიდენტ ტრამპის ხედვაა, რომ შემდგომი ნაბიჯი უნდა იყოს მოლაპარაკებების დაწყება პრეზიდენტ ზელენსკის მონაწილეობით, რომელსაც ის მალე შეხვდება.

ჩვენ ასევე მზად ვართ ვითანამშრომლოთ პრეზიდენტ ტრამპთან და პრეზიდენტ ზელენსკისთან სამმხრივი სამიტის მოსაწყობად ევროპის მხარდაჭერით.
ჩვენ ნათლად ვიცით, რომ უკრაინას უნდა ჰქონდეს უსაფრთხოების ურყევი გარანტიები, რათა ეფექტურად დაიცვას თავისი სუვერენიტეტი და ტერიტორიული მთლიანობა. ჩვენ მივესალმებით პრეზიდენტ ტრამპის განცხადებას, რომ აშშ მზადაა უსაფრთხოების გარანტიები მისცეს. მსურველთა კოალიცია მზადაა აქტიური როლი შეასრულოს. არანაირი შეზღუდვა არ უნდა დაწესდეს უკრაინის შეიარაღებულ ძალებზე ან მესამე ქვეყნებთან მის თანამშრომლობაზე. რუსეთს არ შეუძლია ვეტოს დადება უკრაინის ევროკავშირისა და ნატოსკენ მიმავალ გზაზე.

უკრაინაზე იქნება დამოკიდებული გადაწყვეტილებების მიღება მის ტერიტორიაზე. საერთაშორისო საზღვრები არ უნდა შეიცვალოს ძალით.
ჩვენი მხარდაჭერა უკრაინის მიმართ გაგრძელდება. ჩვენ მტკიცედ გვაქვს გადაწყვეტილი, რომ მეტი გავაკეთოთ უკრაინის სიძლიერის შესანარჩუნებლად, რათა მივაღწიოთ საბრძოლო მოქმედებების დასრულებას და სამართლიან და ხანგრძლივ მშვიდობას.

სანამ უკრაინაში მკვლელობები გრძელდება, ჩვენ მზად ვართ გავაგრძელოთ ზეწოლა რუსეთზე. ჩვენ გავაგრძელებთ სანქციების და უფრო ფართო ეკონომიკური ზომების გაძლიერებას, რათა ზეწოლა მოვახდინოთ რუსეთის საომარ ეკონომიკაზე მანამ, სანამ არ იქნება სამართლიანი და ხანგრძლივი მშვიდობა.

უკრაინას შეუძლია დაეყრდნოს ჩვენს ურყევ სოლიდარობას, როდესაც ჩვენ ვმუშაობთ მშვიდობისთვის, რომელიც დაიცავს უკრაინისა და ევროპის სასიცოცხლო უსაფრთხოების ინტერესებს" -    ვკითხულობთ ევროპელი ლიდერების - საფრანგეთის პრეზიდენტის, ემანუელ მაკრონის, ბრიტანეთის პრემიერის - ჯორჯა მელონის, გერმანიის კანცლერის - ფრიდრიხ მერცის, ბრიტანეთის პრემიერის - კირ სტარმერის, ფინეთის პრეზიდენტის - ალექსანდრ სტუბის, პოლონეთის პრემიერის - დონალდ ტუსკის, ევროპული საბჭოს პრეზიდენტის - ანტონიო კოშტას და ევროკომისიის პრეზიდენტის, ფონ დერ ლაიენის განცხადებაში.

"რადიო თავისუფლება"

რადიო თავისუფლების რუსულმა საგამოძიებო უწყება “სისტემამ”დაადგინა, რომ რუსეთის ყოფილი პრეზიდენტის, დმიტრი მედვედევის შვილი გიგანტური სახელმწიფო-სამრეწველო კონგლომერატის, “როსტექის” შვილობილ კომპანიაში მუშაობს - ეს კორპორაცია აწარმოებს იმ იარაღის უდიდეს წილს, რომელსაც მოსკოვი უკრაინასთან ომში იყენებს.

2016 წელს, სანამ მოსკოვის ერთ-ერთ ყველაზე პრესტიჟულ უნივერსიტეტს დაამთავრებდა, ილია მედვედევმა რუსულ ტაბლოიდ МК-სთან ინტერვიუში თქვა, რომ დიდ სახელმწიფო კომპანიაში მუშაობა არ უნდოდა.

თუმცა დღეს ის სწორედ ამას აკეთებს. 2022 წლის ოქტომბრიდან, უმცროსი მედვედევი, რომელიც ამ თვეში 30 წლის გახდა, РТ-Развитие бизнеса-ს" ( РТ-ბიზნესის განვითარება) დირექტორის მრჩეველია, ეს კომპანია კი “როსტექის” ნაწილია.

ის ინვესტიციებსა და აქტივებს მართავს და, ფედერალური საგადასახადო სამსახურის გაჟონილი მონაცემების მიხედვით, რომელიც “სისტემამ” შეისწავლა, მისი თვიური ხელფასი 270 000 რუბლია ($3 400).

ვლადიმირ პუტინმა 2008-2012 წელს პრეზიდენტად დიმიტრი მედვედევი დანიშნა, რათა ორი თანმიმდევრული საპრეზიდენტო ვადის კონსტიტუციური ლიმიტი აერიდებინა თავიდან. 2012 წელს პუტინი პრეზიდენტად დაბრუნდა და 2020 წელს ხელი მოაწერა საკონსტიტუციო ცვლილებას, რომელიც მას უფლებას მისცემდა, პრეზიდენტად 2036 წლამდე დარჩენილიყო.

პრეზიდენტობის დროს, მედვედევი ცდილობდა, თავი შედარებით ლიბერალურ და დემოკრატიული რეფორმების მხარდამჭერ მმართველად წარმოეჩინა. ახლა ის პუტინის მრჩეველთა უშიშროების საბჭოს თავმჯდომარის მოადგილე და მმართველი პარტია “ერთიანი რუსეთის” თავმჯდომარეა. ის უკიდურესად აგრესიულად უჭერს მხარს რუსეთის ომს უკრაინაში და სოციალურ ქსელებში დასავლეთზე ღვარძლიან ტექსტებს და ბირთვული შეტევის მუქარებს ავრცელებს.

პუტინის მმართველ სტრუქტურებში მაღალჩინოსნების შვილები იმ სახელმწიფო კომპანიებში ან კერძო ფირმებში იწყებენ მუშაობას, რომლებიც პირდაპირაა ხელისუფლებასთან დაკავშირებული. ზოგი სამთავრობო პოზიციაზეც კი ინიშნება.

“როსტექის” დირექტორი, სერგეი ჩემეზოვი, პუტინთან დაახლოებული ადამიანია. ჯერ კიდევ 1980-იან წლებში ისინი აღმოსავლეთ გერმანიაში საბჭოთა "კგბ-ს" ოფიცრებად მსახურობდნენ და დრეზდენში ერთსა და იმავე საცხოვრებელ კორპუსში ცხოვრობდნენ. როდესაც ილია მედვედევმა РТ-Развитие бизнеса-ში დაიწყო მუშაობა, კომპანიის დირექტორი ალექსანდრ ნაზაროვი იყო - ჩემეზოვის ძველი ნაცნობი.

ილია მედვედევი დმიტრი მედვედევის და მისი ცოლის, სვეტლანა მედვედევას, ერთადერთი შვილია. ილია მედვედევის РТ-Развитие бизнеса-ს მიერ დაქირავების შესახებ საჯარო განცხადება არ გაკეთებულა, არაფერი თქმულა იმაზე, როგორ მიიღო მან ეს სამსახური.

2012-2020 წლებში, პრემიერ-მინისტრობის დროს, დმიტრი მედვედევი პასუხისმგებელი იყო “როსტექთან” კომუნიკაციაზე. საინვესტიციო ფონდი კი, რომელიც დმიტრი მედვედევთანაა დაკავშირებული, “როსტექის” პარტნიორად ითვლებოდა.

2015-2019 წლებში, ილია მედვედევი გიგანტ ინტერნეტკომპანია VK-ში მუშაობდა, თუმცა ვერცერთმა თანამშრომელმა, რომლებსაც “სისტემა” გაესაუბრა, ვერ თქვა, რას აკეთებდა იქ მედვედევი: “სამსახურში ერთხელაც კი არ მინახავს”, - აღნიშნა ყოფილმა უფროსმა მენეჯერმა.

“როსტექი” VK-ში РТ-Развитие бизнеса-ს საშუალებით აქციებს ფლობდა, ხოლო იმ პერიოდში კომპანიის ერთ-ერთი აქციონერი ცნობილი მილიარდერი ალიშერ უსმანოვი იყო. 2019-2022 წლებში ილია მედვედევი მუშაობდა IT კომპანია “კრიპტონიტის” საინვესტიციო განყოფილებაში. კომპანია მაშინ უსმანოვს ეკუთვნოდა.

2022 წელს უსმანოვის წარმომადგენელმა უარყო მილიარდერის მჭიდრო კავშირები მედვედევის ოჯახთან და თქვა, რომ ნებისმიერი მცდელობა, ერთმანეთთან დაეკავშირებინათ უსმანოვი და ილია მედვედევის კარიერა, “მიკერძოებული” მიდგომა იყო.

“როსტექმა” და РТ-Развитие бизнеса-მ ამ თემაზე დასმულ კითხვებს არ უპასუხეს.

დმიტრი მედვედევი “ერთიანი რუსეთის” თავმჯდომარეა - ეს პარტია 2012 წლიდან მოყოლებული ქვეყნის მასშტაბით პუტინის პოლიტიკური კონტროლის ერთ-ერთ ძირითად ბერკეტად ითვლება. რუსეთის სრულმასშტაბიანი ომი უკრაინაში სულ რამდენიმე თვის დაწყებული იყო, როდესაც მედვედევის შვილი პარტიაში გაწევრიანდა. მოგვიანებით მას აშშ-ისა და ევროკავშირის სანქციები დაეკისრა.

2023 წელს “ერთიანმა რუსეთმა” განაცხადა, რომ ილია მედვედევმა კოორდინაცია გაუწია ვებგვერდის, “მე ვარ რუსეთში” შექმნას. ეს პორტალი უკრაინის იმ ოკუპირებულ ტერიტორიებზე მცხოვრებთათვის შეიქმნა, რომლებსაც პუტინი რუსეთის ტერიტორიებად აცხადებს.

თარგმანი: მარიამ ნოზაძე

წყარო: "რადიო თავისუფლება"

აზერბაიჯანმა და სომხეთმა ვაშინგტონში გაფორმებული სამშვიდობო დეკლარაციის სრული ტექსტი გამოაქვეყნეს. დოკუმენტის ტექსტი სომხეთისა და აზერბაიჯანის საგარეო საქმეთა სამინისტროების ვებგვერდზე გამოქვეყნდა. დოკუმენტს აზერბაიჯანის პრეზიდენტმა და სომხეთის პრემიერ-მინისტრმა 8 აგვისტოს თეთრ სახლში მოაწერეს ხელი.

დოკუმენტში ნათქვამია, რომ მხარეები შეთანხმდნენ, აღიარონ და პატივი სცენ ერთმანეთის სუვერენიტეტს, ტერიტორიულ მთლიანობას, საერთაშორისოდ აღიარებული საზღვრების ურღვევობას და პოლიტიკურ დამოუკიდებლობას.

„მხარეები ადასტურებენ, რომ ყოფილი სსრკ-ის სოციალისტური რესპუბლიკების საზღვრები გახდა შესაბამისი დამოუკიდებელი სახელმწიფოების საერთაშორისო საზღვრები და აღიარებულია, როგორც ასეთად საერთაშორისო საზოგადოების მიერ, მხარეები აღიარებენ და პატივს სცემენ ერთმანეთის სუვერენიტეტს, ტერიტორიულ მთლიანობას, საერთაშორისო საზღვრების ხელშეუხებლობას და პოლიტიკურ დამოუკიდებლობას.

მხარეები არ ახორციელებენ არანაირ ქმედებებს, მათ შორის დაგეგმვას, მომზადებას, წახალისებას და ისეთი ქმედებების მხარდაჭერას, რომლებიც მიმართულია მეორე მხარის ტერიტორიული მთლიანობის ან პოლიტიკური ერთიანობის დაშლის ან დარღვევისკენ, მთლიანად ან ნაწილობრივ

ამასთან, მიღწეულია შეთანხმება, რომ მხარეები თავს შეიკავებენ ძალის გამოყენებისა და ძალის გამოყენების მუქარისგან, რომელიც მიმართული იქნება ტერიტორიული მთლიანობის ან პოლიტიკური დამოუკიდებლობის წინააღმდეგ.

მხარეები არ დაუშვებენ მესამე მხარის მიერ თავიანთი ტერიტორიის გამოყენებას მეორე მხარის წინააღმდეგ ძალის გამოსაყენებლად, რაც შეუთავსებელია გაერო-ს ორგანიზაციის წესდებასთან. 

ტექსტის მიხედვით, სომხეთი და აზერბაიჯანი თავს შეიკავებენ ერთმანეთის შიდა საქმეებში ჩარევისგან. ასევე, მხარეები შეთანხმდნენ დიპლომატიური ურთიერთობების დამყარებაზე, თუმცა დეკლარაციაში არ არის მითითებული კონკრეტული ვადა.

მხარეები ასევე თანხმდებიან, რომ გააგრძელებენ მუშაობას საზღვრების დელიმიტაცია-დემარკაციაზე და ასევე აღნიშნულია, რომ სომხეთი და აზერბაიჯანი თანხმდებიან, რომ არ განალაგებენ საზღვრის გასწვრივ ნებისმიერი მესამე ქვეყნის სამხედრო ძალებს.

საერთო საზღვრის დემარკაციამდე და მომდევნო დემარკაციამდე მხარეები განახორციელებენ ურთიერთშეთანხმებულ უსაფრთხოების ღონისძიებებსა და ნდობის განმტკიცების ზომებს, მათ შორის სამხედრო სფეროში, სასაზღვრო რაიონებში უსაფრთხოებისა და სტაბილურობის უზრუნველსაყოფად.

ამასთან, მხარეები პირობას დებენ, რომ მხარეები გმობენ და იბრძოლებენ შეუწყნარებლობას, რასობრივ სიძულვილს და დისკრიმინაციას, სეპარატიზმს, ძალადობრივ ექსტრემიზმსა და ტერორიზმს მათი ყველა გამოვლინებით, თითოეული თავისი იურისდიქციის ფარგლებში.

მხარეები ასევე იღებენ ვალდებულებას გადაწყვიტონ უგზო-უკვლოდ დაკარგული პირებისა და ძალადობრივი გაუჩინარების საკითხები, მათ შორის ასეთ პირებზე ხელმისაწვდომი ყველა ინფორმაციის გაცვლის გზით, პირდაპირ ან, საჭიროების შემთხვევაში, შესაბამის საერთაშორისო ორგანიზაციებთან თანამშრომლობით. 

მხარეებს შეუძლიათ დადონ შეთანხმებები სხვადასხვა სფეროში, რომელიც წარმოადგენს საერთო ინტერესს, მათ შორის ეკონომიკის, სატრანზიტო-სატრანსპორტო, ეკოლოგიის, ჰუმანიტარულ და კულტურის სფეროებში თანამშრომლობის შესახებ.

სომხეთი და აზერბაიჯანი პირობას დებენ, რომ უზრუნველყოფენ ამ შეთანხმების სრულად იმპლემენტაციას და შექმნიან ორმხრივ კომისიას, რომელიც ამ პროცესს მონიტორინგს გაუწევს.

ამასთან, მხარეები პირობას დებენ, რომ „ეს შეთანხმება არ შეზღუდავს მხარეების უფლებებსა და ვალდებულებებს, რომლებიც გამომდინარეობს საერთაშორისო სამართლიდან და ხელშეკრულებებიდან, რომლებიც დაიდო თითოეული მხარის მიერ გაერო-ს ორგანიზაციის სხვა წევრ სახელმწიფოებთან“.

ამასთან ერთად, „მხარეები უზრუნველყოფენ, რომ მოქმედი საერთაშორისო შეთანხმებები მათსა და ნებისმიერ მესამე მხარეს შორის არ მიაყენებს ზიანს ამ შეთანხმების მიხედვით გაწერილი ვალდებულებების შესრულებას“.

„თავიანთ ორმხრივ ურთიერთობებში მხარეები ხელმძღვანელობენ საერთაშორისო სამართლის ნორმებითა და ამ შეთანხმებით. არცერთ მხარეს არ აქვს უფლება, მიმართოს თავის ეროვნულ კანონმდებლობის დებულებებს, როგორც ამ შეთანხმების დაუცველობის გამართლებას. მხარეები, „საერთაშორისო ხელშეკრულებათა სამართლის შესახებ ვენის კონვენციის“ შესაბამისად, თავს შეიკავებენ ნებისმიერი ისეთი ქმედებისგან, რომელიც ეწინააღმდეგება ამ შეთანხმების მიზნებსა და ამოცანებს, მისი ძალაში შესვლამდე“, – ნათქვამია ტექსტში.

ამ შეთანხმების ძალში შესვლიდან ერთ თვეში მხარეებმა უნდა გაიწვიონ ნებისმიერი სახელმწიფოთაშორისი პრეტენზიები, საჩივრები, აპელაციები, დავები, რომლებიც შეტანილია ნებისმიერ სამართლებრივ ფორუმზე და რომლებიც ეხება ამ შეთანხმების ხელმოწერამდე არსებულ საკითხებს.

„ამ შეთანხმების ძალაში შესვლიდან ერთი თვის განმავლობაში მხარეებმა უნდა გაიწვიონ უკან, გააუქმონ ან სხვაგვარად მოაგვარონ ნებისმიერი და ყველა სახელმწიფოთაშორისი პრეტენზია, საჩივარი, აპელაცია, საქმისწარმოება და დავა, რომელიც შეტანილია ნებისმიერ იურიდიულ ფორუმზე ამ შეთანხმების ხელმოწერამდე მხარეებს შორის არსებულ საკითხებთან დაკავშირებით და არ უნდა მოახდინონ ინიცირება ასეთ პრეტენზიებს, საჩივრებს, აპელაციებს, საქმისწარმოებისა და არ უნდა იყვნენ ჩართულნი ნებისმიერი ასეთი პრეტენზიების, საჩივრების, აპელაციებსა და საქმისწარმოებაში, რომელიც შეტანილია რომელიმე მესამე მხარის მიერ მეორე მხარის წინააღმდეგ. მხარეები არანაირი ფორმით არ განახორციელებენ, წაახალისებენ ან არ მიიღებენ მონაწილეობას ერთმანეთის წინააღმდეგ მტრულ ქმედებებში დიპლომატიურ, საინფორმაციო ან სხვა სფეროებში, რომელიც ეწინააღმდეგება ამ შეთანხმებას და ჩაატარებენ რეგულარულ კონსულტაციებს ამ მიზნით“, – ვკითხულობთ ტექსტში.

დეკლარაციაში ნათქვამია, რომ შეთანხმება ძალაში შედის იმ დღიდან, როდესაც მხარეები გაცვლიან შეტყობინებებს შიდა პროცედურების დასრულების შესახებ, რომლებსაც ითვალისწინებს ხელმომწერი ქვეყნების ეროვნული კანონმდებლობა.