Category Blog

კიევში მუშაობა განაახლა ამერიკის შეერთებული შტატების საელჩომ, რომელიც 20 ნოემბერს დროებით დახურეს შესაძლო მასშტაბური საჰაერო შეტევის გამო. 20 ნოემბერს მუშაობა შეაჩერეს იტალიის, ესპანეთის და საბერძნეთის საელჩოებმაც.

აშშ-ის საელჩოს საიტზე გამოქვეყნებული ინფორმაციით, მუშაობის რეჟიმი დროებით შეცვალეს სავარაუდო საჰაერო შეტევასთან დაკავშირებული ცნობების გამო, თუმცა, უკვე ჩვეული რეჟიმით მუშაობას განაგრძობენ.

შეერთებული შტატების დიპლომატიური წარმომადგენლობა უკრაინაში მყოფ ამერიკელებს მიმართავს, საჰაერო განგაშის დროს ადგილობრივი ხელისუფლების ინსტრუქციები შეასრულონ და შესაბამისი მითითების შემთხვევაში, დაუყოვნებლივ მოძებნონ თავშესაფარი.

უკრაინის თავდაცვის სამინისტროს დაზვერვის მთავარმა სამმართველომ 20 ნოემბერს, დღის მეორე ნახევარში განაცხადა, რომ მისი სახელით სოციალურ ქსელებში გავრცელდა „ფეიკი“ მოსალოდნელი მასირებული შეტევის შესახებ.

უკრაინის სამხედრო დაზვერვამ ცრუ ინფორმაციის გავრცელებასა და საზოგადოების დაშინების მცდელობაში რუსეთი დაადანაშაულა და მოქალაქეებს მოუწოდა, სიმშვიდე შეინარჩუნონ და მხოლოდ ოფიციალურ ინფორმაციას დაუჯერონ.

უკრაინის პრეზიდენტმა ვოლოდიმირ ზელენსკიმ 20 ნოემბერს, საღამოს გაავრცელა მიმართვა, რომ რუსეთი ყოველდღე ერთნაირ სიგიჟეს სჩადის და დღის განმავლობაში პანიკური შეტყობინებების გაგზავნა და საინფორმაციო გარემოს დაძაბვა იმით, რომ რაღაც განსაკუთრებული საფრთხე არსებობს, მხოლოდ რუსეთს ეხმარება. ზელენსკიმ ყველას მოუწოდა, ყოველთვის ყურადღებით იყვნენ საჰაერო განგაშის დროს.

ამერიკის შეერთებული შტატების ახლად არჩეულმა პრეზიდენტმა, დონალდ ტრამპმა  ოფიციალურად დაასახელა რამდენიმე კანდიდატი, რომლებიც ახალ ადმინისტრაციაში თანამდებობებს დაიკავებენ.

CNN-ი ავრცელებს  ინფორმაციას, რომ ტრამპმა Fox News-ის წამყვანი და არმიის ვეტერანი, პიტ ჰეგსეთი თავდაცვის მინისტრის თანამდებობაზე დაასახელა. 

ჰეგსეთს სამხედრო სამსახურში ყოფნის დიდი ხნის გამოცდილება აქვს, ის ავღანეთისა და ერაყის მისიებშიც მსახურობდა.

რაც შეეხება ილონ მასკსა და ვივეკ რამასვას, დონალდ ტრამპის თქმით, „მთავრობის ეფექტიანობის დეპარტამენტს“ უხელმძღვანელებენ - ინფორმაციას CNN-ი ავრცელებს.

მისი თქმით, დეპარტამენტი მუშაობა დასრულდება არაუგვიანეს 2026 წლის 4 ივლისისა.

ილონ მასკის თქმით, ახალი დეპარტამენტი შოკისმომგვრელი იქნება იმათთვის, ვინც ჩართულია სამთავრობო რესურსების გაფლანგვაში.

ილონ მასკის კომპანიების შემადგენლობა მოიცავს ელექტრომობილების კომპანია Tesla-ს, სოციალური მედიის პლატფორმა X-ს და სარაკეტო კომპანია SpaceX-ს.

რამასვამი ფარმაცევტული კომპანიის დამფუძნებელია, რომელიც კენჭს იყრიდა „რესპუბლიკელების“ საპრეზიდენტო კანდიდატობისთვის, მაგრამ მოგვიანებით საარჩევნო რბოლას გამოეთიშა და მხარდაჭერა დონალდ ტრამპს გამოუცხადა.

რაც შეეხება ეროვნული უსაფრთხოების საკითხებში მრჩეველს, ამ თანამდებობაზე ამერიკის პრეზიდენტმა კონგრესმენი მაიკ უოლცი დაასახელა. 

ტრამპი ამბობს, რომ მისი სამომავლო ეროვნული უსაფრთხოების მრჩეველი არის “ექსპერტი ჩინეთის, რუსეთის, ირანისა და გლობალური ტერორიზმის მხრიდან მომავალი საფრთხეების საკითხში”.

მაიკ უოლცი აშშ-ის კონგრესის ქვედა პალატაში - წარმომადგენელთა პალატაში - ფლორიდის შტატს წარმომადგენს და პირველი “მწვანე ბერეტია” (მსახურობდა ამერიკული არმიის სპეციალური დანიშნულების ძალებში), ვინც ამერიკის კონგრესში იქნა არჩეული. 

რამდენიმე საათის წინ ცნობილი გახდა ცენტრალური სადაზვერვო სააგენტოს დირექტორის თანამდებობაზე წარდგენილი პირის ვინაობაც. 

დონალდ ტრამპი ამ თანამდებობაზე, აშშ-ის წარმომადგენელთა პალატის ყოფილ წევრს, „რესპუბლიკელ“ ჯონ რეტკლიფს წარადგენს.

ჯონ რეტკლიფი დონალდ ტრამპის პრეზიდენტობის პირველი ვადის ბოლოს, 2020 წლის მაისიდან 2021 წლის იანვრამდე აშშ-ის ეროვნული დაზვერვის დირექტორის თანამდებობას იკავებდა.

დონალდ ტრამპის ცნობით, ისრაელში აშშ-ის ელჩის პოსტზე არკანზასის ყოფილ გუბერნატორს მაიკ ჰაკაბის წარადგენს.