Category Blog

ხმელთაშუა ზღვის დასავლეთ ნაწილში ჩაიძირა რუსული სატვირთო გემი Ursa Major-ი, რომელიც, სავარაუდოდ, სირიისკენ მიემართებოდა, რუსული სამხედრო ბაზიდან პერსონალის და ტექნიკის ევაკუაციის მიზნით.

გემის ჩაძირვის შესახებ ესპანეთის სამაშველო სამსახურის ინფორმაციაზე დაყრდნობით დღეს, 24 დეკემბერს, წერს დამოუკიდებელი რუსული გამოცემა „მედიაზონა“. გემი ესპანეთის ქალაქ აგილესსა და ალჟირის ქალაქ ორანს შორის საერთაშორისო წყლებში ჩაიძირა.

ესპანური გამოცემა La Verdad-ის ინფორმაციით, მაშველებმა 14 მეზღვაური კარტახენის პორტში გადაიყვანეს. ეკიპაჟის კიდევ 2 წევრი დაკარგულად ითვლება. გამოცემის წყაროთა ცნობით, ჩაძირვამდე გემზე აფეთქება მოხდა.

„მედიაზონა“ წერს, რომ გემი 11 დეკემბერს პეტერბურგიდან გავიდა და ოფიციალური დოკუმენტების მიხედვით, ვლადივოსტოკისკენ მიემართებოდა. Ursa Major-ი, რომელიც რუსეთის სატრანსპორტო-ლოგისტიკური კომპანია „ობორონლოგისტიკის“ საკუთრებაა, შორეული აღმოსავლეთის ნაცვლად აღმოჩნდა ხმელთაშუა ზღვაში, სადაც 23 დეკემბერს ჩაიძირა. კატასტროფის მიზეზი ჯერჯერობით უცნობია.

გემების გადაადგილების მარშრუტის ამსახველი სერვისის, MarineTraffic-ის მონაცემების მიხედვით, Ursa Major-ის გარდა, ხმელთაშუა ზღვაში იმყოფებოდა კომპანია „ობორონლოგოსტიკის“ კიდევ ერთი სატვირთო გემი Sparta.

სამხედრო ანალიტიკოსები აღნიშნავენ, რომ ეს ორი გემი 2022 წლამდე გამოიყენებოდა სირიაში დისლოცირებული რუსული სამხედრო ბაზების მომარაგების მიზნით.

ამჟამად ხმელთაშუა ზღვაში იმყოფება რუსეთის სამი სადესანტო გემიც. ანალიტიკოსები ვარაუდობენ, რომ ამ სამხედრო და სატვირთო ხომალდების დანიშნულების ადგილი სირიაა, მიზანი კი ქალაქ ტარტუსში მდებარე რუსული სამხედრო-საზღვაო ბაზის ევაკუაცია.

რუსეთს, რომელიც ბაშარ ასადის რეჟიმის აქტიური მხარდამჭერი იყო, სირიაში ტარტუსის გარდა, აქვს ხმეიმიმის სამხედრო ბაზა. მათი შემდგომი არსებობა ეჭვქვეშ დადგა მას შემდეგ, რაც 2024 წლის დეკემბრის დასაწყისში ადგილობრივმა შეიარაღებულმა დაჯგუფებებმა ასადის რეჟიმი დაამხვეს და მან თავი რუსეთს შეაფარა.

არჩეულმა პრეზიდენტმა დონალდ ტრამპმა პირობა დადო, რომ თანამდებობაზე ყოფნის პირველსავე დღეს „შეაჩერებს ტრანსგენდერულ სიგიჟეს“, რადგან რესპუბლიკელები აკონტროლებენ კონგრესის ორივე პალატას და თეთრ სახლს.

„ხელს მოვაწერ აღმასრულებელ განკარგულებას ბავშვების სექსუალური დასახიჩრების დასრულების შესახებ, უარს ვიტყვი ტრანსგენდერულ პოლიტიკაზე ჯარში და ჩვენს დაწყებით, საშუალო და მაღალ კლასებში“, - თქვა ტრამპმა ახალგაზრდა კონსერვატორებისთვის გამართულ ღონისძიებაზე შტატ არიზონის ქალაქ ფენიქსში.

მან ასევე პირობა დადო, რომ „კაცებს არ დაუშვებენ ქალთა სპორტში“ და დასძინა, რომ „აშშ-ის მთავრობა ოფიციალურად აღიარებს მხოლოდ ორ სქესს - მამრობითსა და მდედრობითს“.

გასულ კვირაში, როდესაც რესპუბლიკელთა მიერ კონტროლირებადმა კონგრესმა დაამტკიცა თავდაცვის წლიური ბიუჯეტი, მასში შეტანილ იქნა დებულება, რომელიც კრძალავს სამხედრო სამსახურში მყოფი ტრანსგენდერი ადამიანების შვილებისთვის ზოგიერთი სახის დახმარების აღმოჩენას.

კონფერენცია AmericaFest-ზე გამოსვლისას ტრამპმა ასევე პირობა დადო, რომ მკაცრ ზომებს მიიღებს „მიგრანტების მხრიდან დამნაშავეობის“ წინააღმდეგ და გაიმეორა დაპირებები, რომ პანამის არხში ამერიკული გემების გასვლაზე მაღალი ტარიფების გამო აღადგენს არხზე აშშ-ის კონტროლს.კვირას თავის გამოსვლაში ტრამპმა თავისი მეორე საპრეზიდენტო ვადის პროგრამა წარმოადგინა და გააკრიტიკა პრეზიდენტი ჯო ბაიდენი და ვიცე-პრეზიდენტი კამალა ჰარისი.

„20 იანვარს შეერთებული შტატები სამუდამოდ გადაშლის ოთხწლიანი წარუმატებლობის, არაკომპეტენტურობისა და ეროვნული დაკნინების ფურცელს, საშინელ წლებს და ჩვენ გავხსნით მშვიდობის, კეთილდღეობისა და ეროვნული სიდიადის ახალ ეპოქას", - თქვა ტრამპმა. „მე დავასრულებ ომს უკრაინაში, მე შევაჩერებ ქაოსს ახლო აღმოსავლეთში და, გპირდებით, თავიდან ავიცილებ მესამე მსოფლიო ომს.“

ჯო ბაიდენის ადმინისტრაციის პირობებში, შეერთებულმა შტატებმა 2021 წლის ოქტომბერში პირველად დაიწყო ამერიკული პასპორტების გაცემა გენდერული ნიშნით „X“. პასპორტები ამ აღნიშვნით განკუთვნილია არაბინარული ადამიანებისთვის, ინტერსქესებისთვის და გენდერულად შეუსაბამოთათვის. ნიუ-იორკელებმა 2018 წელს მიიღეს უფლება, პირად დოკუმენტებში მამრობითი და მდედრობითი სქესის გარდა, მიუთითონ მესამე, „დაუზუსტებელი“ სქესი.

უკრაინულმა მხარემ რუსეთის ჯართან ბრძოლაში დაღუპული 502 მებრძოლის ცხედარი დაიბრუნა. ინფორმაციას უკრაინის სამხედრო ტყვეებთან მოპყრობის საკოორდინაციო შტაბი ავრცელებს.

შტაბის ცნობით, 403 მებრძოლი დონეცკის მიმართულებაზე დაეცა, 12 - ლუგანსკის მიმართულებაზე, 57 - ზაპოროჟიეს მიმართულებაზე, ხოლო 31 ცხედარი რუსეთის პროზექტურებიდან დაიბრუნეს.

დღეს დილით, მოსკოვში მომხდარი აფეთქების შედეგად დაიღუპა რუსეთის ფედერაციის შეიარაღებული ძალების რადიაციული, ქიმიური და ბიოლოგიური თავდაცვის ძალების უფროსი, გენერალ-ლეიტენანტი იგორ კირილოვი. 

თვითმხილველების თქმით, აფეთქება მაშინ მოხდა, როცა გენერალი სახლიდან გამოდიოდა.სავარაუდოდ,  დისტანციური მართვით განხორციელდა. 

კირილოვისა და მისი თანაშემწის სიკვდილი ოფიციალურად დაადასტურა რუსეთის ფედერაციის საგამოძიებო კომიტეტმა.

ცნობისთვის, გუშინ, 16 დეკემბერს, უკრაინის უსაფრთხოების სამსახურმა კირილოვი ეჭვმიტანილად ცნო უკრაინის თავდაცვის ძალების წინააღმდეგ ქიმიური იარაღის გამოყენებაში. უკრაინის გამოძიების თანახმად, მან პირადად გასცა უკრაინის აღმოსავლეთ და სამხრეთ ფრონტებზე ქიმიური იარაღის გამოყენების ბრძანება. 

„ეიბისი ნიუსი“ აშშ-ის არჩეულ პრეზიდენტს, დონალდ ტრამპს ცილისწამების საქმეზე სარჩელის წაგების გამო 15 მილიონ აშშ დოლარს გადაუხდის. შესაბამისი გადაწყვეტილება ფლორიდის სამხრეთ ოლქის სასამართლოს ელექტრონულ მონაცემთა ბაზაში გამოქვეყნდა.

დოკუმენტის მიხედვით, ტელეკომპანია საქველმოქმედო შენატანის სახით ფულს საპრეზიდენტო ფონდსა და მუზეუმს გადაურიცხავს, ასევე აანაზღაურებს ერთი მილიონი დოლარის ოდენობის იურიდიულ ხარჯებს.

ტრამპმა ტელეარხის წამყვანის, ჯორჯ სტეფანო პულოსის წინააღმდეგ შეიტანა სარჩელი. წამყვანმა ტელეკომპანიის ეთერში განაცხადა, რომ ტრამპი დამნაშვედ იყო ცნობილი მწერალ ელიზაბედ კეროლის გაუპატიურებაში. 2023 წლის მაისში მანჰეტენის ფედერალურმა სასამართლომ ტრამპი მწერლის შევიწროებაში ცნო დამნაშავედ, თუმცა ქალმა ვერ დაამტკიცა, რომ ტრამპმა ის გააუპატიურა.