დედაქალაქი

საცხოვრებელი ფართები სიმბოლურ ფასად - ერთ ლარად დამატებით 30 ოჯახს დაუკანონდა.

თბილისის ათივე რაიონში მცხოვრებ მოქალაქეებს საკუთრების დამადასტურებელი მოწმობები დედაქალაქის მერმა კახა კალაძემ და ქონების მართვის სააგენტოს ხელმძღვანელმა გიორგი კობიაშვილმა გადასცეს.

“ჩვენ ვაგრძელებთ დაკანონების პროგრამას, რომელიც 2017 წლიდან დავიწყეთ. ამ წლების განმავლობაში ძალიან ბევრ ადამიანს დავუდექით გვერდით. დღეს, სხვადასხვა რაიონში მცხოვრებ 30 ოჯახს საცხოვრებელი ფართები საკუთრებაში გადაეცა. ძალიან მიხარია მათი ამბავი, ვუერთდები მათ სიხარულს. ამ ოჯახებს ყველაფერი საუკეთესო მინდა ვუსურვო. აქვე კიდევ ერთხელ გავიმეორებ, რომ ვინც ანალოგიური პრობლემის წინაშე დგას, თავისი რაიონის გამგეობას უნდა მიმართოს. ჩვენი თანამშრომლები დაეხმარებიან, აუხსნიან თუ რა საბუთები არის შესაგროვებელი, რომ პროცესი დაიწყოს და ფართების დაკანონება მოხდეს.

ზოგადად, ამ პროგრამის ფარგლებში, დღეის მდგომარეობით ასეულობით მილიონი ლარის სახელმწიფო ქონება არის დარეგისტრირებული და გადაცემული იმ ოჯახებზე, ვინც ათეული წლების განმავლობაში ცხოვრობდა დაუკანონებელ ფართებში. პროგრამა გაგრძელდება იქამდე, სანამ ყველა ოჯახი ფართებით არ დაკმაყოფილდება”, - აღნიშნა კახა კალაძემ.

საკუთრების დამადასტურებელი მოწმობების გადაცემის ღონისძიებას თბილისის ათივე რაიონის გამგებლები, საკრებულოს მაჟორიტარი დეპუტატები და პარლამენტის დელეგატები დაესწრნენ.

დედაქალაქის მერის ინიციატივით, მოქალაქეებისთვის საცხოვრებელი ფართების დაკანონების პროცესი გრძელდება. იმ მოქალაქეებს, რომელთაც წლების განმავლობაში საცხოვრებელი ფართების დაკანონების პრობლემა ჰქონდათ, საცხოვრებელი ფართები სიმბოლურ ფასად გადაეცემათ.

მუნიციპალიტეტის მერიაში დაკანონების მსურველთა ასამდე განაცხადია შემოსული, რომელთა განხილვა და დაკმაყოფილება ეტაპობრივად მიმდინარეობს. პროგრამის ფარგლებში, ამ ეტაპზე, 3 150-მდე ოჯახია დაკმაყოფილებული.

თბილისის მერია ცხოველთა თავშესაფართან აქციის შესახებ განცხადებას ავრცელებს.

როგორც განცხადებაშია ნათქვამი, მოქალაქეთა ჯგუფი შენობაში თვითნებურად შეიჭრა, ვოლიერებიდან გამოიყვანეს დაავადებული ძაღლები, ასევე ცოფის ვირუსზე დაკვირვების ქვეშ მყოფი ცხოველები, რაც წარმოადგენს როგორც უსაფრთხოების ნორმების, ისე კანონის უხეშ დარღვევას.

„გვსურს, გამოვეხმაუროთ დედაქალაქში, ცხოველთა თავშესაფართან მიმდინარე აქციას, რა დროსაც მოქალაქეთა ჯგუფი შენობაში თვითნებურად შეიჭრა, ხელი შეუშალა თავშესაფრის ვეტერინარებს საქმიანობაში. აქციის მონაწილეებს შორის იყო რადიკალური ოპოზიციის წარმომადგენელი, რომელიც უშუალოდ ხელმძღვანელობდა პროვოკაციის მოწყობას. მოქალაქეთა ნაწილი ასევე არ დაემორჩილა ადმინისტრაციის წარმომადგენლების მითითებებს, რომლებიც მზად იყვნენ, მათთვის კანონის ფარგლებში ეჩვენებინათ თავშესაფრის ტერიტორია და გაეცნოთ სამუშაო პროცესი.

მიუხედავად არაერთი მოწოდებისა, მოქალაქეთა აგრესიული ჯგუფი შეიჭრა თავშესაფრის ისეთ ტერიტორიაზეც, სადაც განთავსებული არიან დაავადებული და დაკვირვების ქვეშ მყოფი ძაღლები, შესაბამისად, სანიტარიულ-ჰიგიენური ნორმებიდან გამომდინარე, იქ უცხო პირთა შესვლა აკრძალულია. უფრო მეტიც, მათ ვოლიერებიდან გამოიყვანეს დაავადებული ძაღლები, ასევე ცოფის ვირუსზე დაკვირვების ქვეშ მყოფი ცხოველები, რაც როგორც უსაფრთხოების ნორმების, ისე კანონის უხეშ დარღვევას წარმოადგენს.

სრული პასუხისმგებლობით ვაცხადებთ, რომ ცხოველთა მუნიციპალურ თავშესაფარში დაცულია შესაბამისი სანიტარიული ნორმები, სამუშაო პროცესი მიმდინარეობს შინაგანაწესისა და კანონის სრული დაცვით. ასევე, თავშესაფრის ტერიტორიაზე არ არსებობს კრემატორიუმი, რომელსაც აქციის მონაწილეები ეძებდნენ. მოვუწოდებთ მოქალაქეებს და მედიასაშუალებების წარმომადგენლებს, დაემორჩილონ კანონს, რადგან ადმინისტრაციულ შენობაში შეჭრა კანონდარღვევას წარმოადგენს, რომელსაც შესაბამისი რეაგირება მოჰყვება.

ცხოველთა მონიტორინგის სააგენტო მზად არის, ნებისმიერ დაინტერესებულ პირს, შესაბამისი ნორმების დაცვით, თავშესაფრის ტერიტორია დაათვალიერებინოს და სამუშაო პროცესი გააცნოს“, – ნათქვამია თბილისის მერიის განცხადებაში.

ბინათმესაკუთრეთა ამხანგობების განვითარების ხელშეწყობის პროგრამის ფარგლებში, ვარკეთილის 3, I მიკრო რაიონში, N12 მრავალბინიან საცხოვრებელ სახლში შიდა წყალარინების ქსელის მოწყობის სამუშაოები განხორციელდა.

71 გრძივ მეტრზე გამოიცვალა გარე და შიდა ქსელი, დამონტაჟდა წყალარინების ორი ჭა. 

სამუშაოების ღირებულებამ 37 718 ლარი შეადგინა.

სამგორის რაიონის გამგეობა ჯანსაღი ცხოვრების წესის ხელშეწყობას განაგრძობს და სპორტულ აქტივობებში მოქალაქეთა ჩართვის მიზნით, სხვადასხვა აქტივობას ახორციელებს.

გამგეობის ორგანიზებით, ამჯერად, რაიონის მასშტაბით კლუბებს შორის ძიუდოს ტურნირი “სამგორის თასი" გაიმართა.  

ფინალური შეხვედრების დასრულების შემდეგ, გამარჯვებულ გუნდებს თასები, მედლები, სიგელები და ვაუჩერები სამგორის რაიონის გამგებელმა კახა სამხარაძემ და ქვემო სამგორის მაჟორიტარმა დეპუტატმა საკრებულოში ზაქარია წიკლაურმა გადასცეს.

სამგორის რაიონის გამგეობა ინფრასტრუქტურული პროექტების განხორციელებას განაგრძობს. 

სარეაბილიტაციო სამუშაოები ამჯერად მიხეილ ცისკარიშვილის ქუჩაზე მიმდინარეობს. 
პროექტის ფარგლებში, 3 650 კვ.მ ფართობზე იგება ორფენიანი ასფალტის საფარი, მოწესრიგდა ბორდიური და საფეხმავლო ბილიკები. 

პროექტის საორიენტციო ღირებულება 270 000 ლარს შეადგენს. 
სამუშაოებს სამგორის რაიონის გამგებელი კახა სამხარაძე, მოადგილესთან ერთად გაეცნო.

გარემოს დაცვის კვირეულის ფარგლებში, სამგორის რაიონის გამგეობის ინიციატივით, რაიონში მცხოვრები ახალგაზრდების მონაწილეობით, გაიმართა ღონისძიება „სამგორი - მწვანე რაიონი“. ღონისძიების მიზანია მომავალ თაობებში ეკოლოგიის საკითხებზე ცნობიერების ამაღლება და ეკომომავლისადმი ინტერესის გაღრმავება. შეხვედრაზე მოეწყო სამგორის რაიონში განხორციელებული და დაგეგმილი რეკრეაციული სივრცეების პროექტების ფოტოგამოფენა, გაიმართა პრეზენტაცია და ჩატარდა საინფორმაციო ლექცია, რომელიც ინტერაქციულ ფორმატში წარიმართა. შეხვედრაში მონაწილეობა მიიღო სამგორის რაიონის გამგებელმა კახა სამხარაძემ.

სამგორის რაიონს რეკრეაციული სივრცე შეემატება   

 ვარკეთილის მე-4 მ/რ-ის II რიგის, კორპუსი N2-სა და N3-ს შორის, 15-მდე უსახური ავტოფარეხისა და უკანონო ნაგებობების დემონტაჟის შედეგად გამოთავისუფლებულ 3200  კვ.მ ფართობზე, რეკრეაციული სივრცის მოწყობა მიმდინარეობს.  

პროექტის ფარგლებში,  მოეწყობა დასასვენებელი სივრცე და პავილიონი, ასევე, ბავშვთა გასართობი სივრცე. დამონტაჟდება გარე განათების და სარწყავი სისტემები. ტერიტორია აღიჭურვება შესაფერისი ინვენტარით და გამწვანდება ხე-მცენარეებით. 

პროექტისთვის გამგეობის ბიუჯეტიდან 550 000 ლარი გამოიყო.

 სამუშაოებს სამგორის რაიონის გამგებელი კახა სამხარაძე ადგილზე გაეცნო.

შინაგან საქმეთა სამინისტროს ინფორმაციით, საქართველოს კათოლიკოს - პატრიარქის, ილია მეორის დაკრძალვასთან დაკავშირებით, 22 მარტს თბილისის მასშტაბით ტრანსპორტის გადაადგილებაზე შეზღუდვები დაწესდება.

შეზღუდვები შეეხება, როგორც კერძო ავტომობილებს, ასევე, მუნიციპალურ ტრანსპორტს.

22 მარტს, 02:00 საათიდან დაკრძალვის ცერემონიის დასრულებამდე ტრანსპორტის გადაადგილება სრულად შეიზღუდება შემდეგი მიმართულებებით:

• მტკვრის მარჯვენა სანაპიროზე გალაკტიონის ხიდიდან ორთაჭალის მიმართულებით აბანოებამდე;
• თავისუფლების მოედანზე, რუსთაველის გამზირსა და ყველა დამაკავშირებელ ქუჩაზე პირველი რესპუბლიკის მოედნის ჩათვლით;
• მოძრაობა იზღუდება ასათიანის, შალვა დადიანის, კოტე აფხაზის, პუშკინის, ვერცხლისა და ბარათაშვილის ქუჩებზე. სოლოლაკიდან მოძრაობა ნებადართული იქნება მხოლოდ ამაღლების ქუჩიდან ჭონქაძის ქუჩის მიმართულებით, საიდანაც ტრანსპორტს შეეძლება გადაადგილება ბარნოვის ქუჩით მრგვალი ბაღის მიმართულებით და ასევე, მელიქიშვილის გამზირის მიმართულებით;
• მოძრაობა სრულად იზღუდება თაბუკაშვილის, ჭანტურიას, ვირსალაძის, ათონელის ქუჩებზე, მშრალ ხიდზე, ზაარბრიუკენის მოედანზე, ხეთაგუროვის მოედანზე. ასევე, ბარათაშვილის ხიდზე, ბარათაშვილის აღმართზე, ქეთევან დედოფლის გამზირზე ლეხ კაჩინსკის ქუჩის კვეთამდე. ასევე, მოძრაობა იზღუდება ავლიპ ზურაბაშვილის, თელავისა და წურწუმიას ქუჩებზე.
• მოძრაობა შეზღუდული იქნება ევროპის მოედანზე, გორგასლის მოედანზე, გორგასლის ქუჩაზე, აბანოების მიმდებარე ტერიტორიაზე;
• მტკვრის მარცხენა სანაპიროზე მოძრაობა შეიზღუდება გალაკტიონის ხიდიდან ბოჭორმის ქუჩისა და ლევილის სანაპიროს კვეთამდე ("სოკარის" სათავო ოფისამდე).
• ავტომობილების გადაადგილების ალტერნატიული მარშრუტები:
• "ლაგუნა-ვერედან" გადაადგილება შესაძლებელი იქნება გალაკტიონის ხიდზე და ასევე, მიხეილ ჯავახიშვილის აღმართის გავლით კოსტავას ქუჩაზე ფილარმონიის მიმართულებით;
• ინგოროყვას ქუჩიდან ავტომობილების გადაადგილება ნებადართული იქნება გრიბოედოვის ქუჩის გავლით ფილარმონიის მიმართულებით;
• კახეთის გზატკეცილიდან ავტომობილების მოძრაობა შესაძლებელი იქნება ლეხ კაჩინსკის ქუჩაზე ბოჭორმის ქუჩის კვეთამდე მეტროსადგური "ისნის" მიმართულებით;
• ორთაჭალიდან, გულიას მოედნიდან მოძრაობა შეიზღუდება გალაკტიონის ხიდამდე. ჟანი კალანდაძისა და ორთაჭალის ქუჩებიდან კი ავტომობილები იმოძრავებენ გორგასლის ქუჩაზე მხოლოდ პროკურატურის მიმართულებით.

ამასთან, ძალაში რჩება სამების საკათედრო ტაძრის მიმდებარე ქუჩებზე არსებული ყველა შეზღუდვა.

შინაგან საქმეთა სამინისტრო და თბილისის მერია მოქალაქეებს მოუწოდებს, გადაუდებელი აუცილებლობის გარდა, სხვა შემთხვევაში თავი შეიკავონ ავტომობილებით გადაადგილებისგან.