რჩეული
- Details
- Category: განათლება
ენერგეტიკის სექტორში შექმნილი მძიმე ვითარების გამო, ოკუპირებული აფხაზეთის დე ფაქტო ხელისუფლებამ 11-დან 17 დეკემბრის ჩათვლით სასწავლო პროცესის შეჩერების გადაწყვეტილება მიიღო. ამის შესახებ ე.წ. პრეზიდენტის მოვალეობის შემსრულებელმა ბადრ გუნბამ განაცხადა.
გადაწყვეტილება სკოლებისა და საბავშვო ბაღების გათბობასთან დაკავშირებული სირთულეებით არის განპირობებული, განაცხადა “განათლების მინისტრის” მოვალეობის შემსრულებელმა ინალ გაბლიამ.
„ჩვენ ვთავაზობთ დამატებით არდადეგებს, ვაცნობოთ მასწავლებლებს, სკოლებისა და კოლეჯების დირექტორებს, სკოლამდელი აღზრდის დაწესებულებების ხელმძღვანელებს, რათა მათ გააკონტროლონ სასწავლო პროცესი და ბავშვებმა იმეცადინონ სახლებში“, - აღნიშნა გაბლიამ.
გარდა ამისა, კრიპტოვალუტის მაინინგთან ბრძოლის გაძლიერების მიზნით, აფხაზ აბონენტებს ინტერნეტს გაუთიშავენ 00.00-დან 07.00 საათამდე. ენერგეტიკის სექტორში საგანგებო რეჟიმის შემოღების საკითხს კი ხვალ განიხილავენ.
“ჯანდაცვის მინისტრის” მოვალეობის შემსრულებლის ედუარ ბუთბას განცხადებით მსხვილ სამედიცინო დაწესებულებებში არსებული გენერატორები გამართულ რეჟიმში მუშაობს, მაგრამ მათი რესურსი შეზღუდულია. მისი თქმით, რეზერვების მეტი მოცულობაა აუცილებელი საავადმყოფოების რეანიმაციული განყოფილებებისთვის.
დე ფაქტო მთავრობის მეთაურის მოვალეობის შემსრულებლის ვალერი ბგანბას განაცხადებით, ენგურჰესის წყალსაცავში წყლის დონე კრიტიკულ დონეზე რჩება. ელექტროენერგიის მიწოდების კუთხით მდგომარეობა შეიძლება გაუარესდეს, თუ სოხუმისთვის რუსული ელექტროენერგიის საფასურის გადახდის საშუალება არ მოიძებნა.
“ჩვენ მოხმარებულ ელექტროენერგიაზე დამატებითი შეზღუდვების შემოღება მოგვიწევს”, - თქვა ბგანბამ.
“ფინანსთა მინისტრის” მოვალეობის შემსრულებელი ვლადიმერ დელბა ამბობს, რომ „(საჯარო მოსამსახურეებისთვის) ხელფასების ანაზღაურებასთან დაკავშირებით არსებული მდგომარეობა რთულია, მაგრამ კონტროლირებადი“.
ოკუპირებული აფხაზეთის ლიდერის ასლან ბჟანიას გადადგომის და რუსეთთან „საინვესტიციო ხელშეკრულების“ უარყოფის შემდეგ რუსეთმა თითქმის სრულად შეაჩერა დე ფაქტო რესპუბლიკის საბიუჯეტო დაფინანსება.
- Details
- Category: ჯანდაცვა
სტომატოლოგიური კლინიკების შემოწმება ე.წ უწყვეტი სამედიცინო განათლების ქულებთან დაკავშირებით 2025 წლის პირველ მარტამდე შეჩერდა.
"ქართული ოცნების" პრემიერ-მინისტრი ირაკლი კობახიძის დადგენილებით, 2024 წელს მოპოვებული ქულების შემოწმება 2025 წლის 1 მარტიდან დაიწყება. ამას გარდა, პირველ მარტამდე შესაძლებელია 2024 წელს მოსაპოვებელი ქულების შევსებაც, თუმცა აღნიშნული ქულები არ იქნება ჩათვლილი 2025 წელს მოსაპოვებელი ქულების ჯამურ რაოდენობაში.
"დაწესებულების/ერთეულის ყველა ექიმ-სპეციალისტი უნდა მონაწილეობდეს უწყვეტი სამედიცინო განათლების სისტემაში საქმიანობის პროფილის შესაბამისად, ასევე გადაუდებელი მდგომარეობების (მათ შორის, ალერგიული რეაქციებით გამოწვეული) მართვის საკითხებზე და ყოველწლიურად აგროვებდეს არანაკლებ 20 უსგ ქულას წელიწადში", - აღნიშნულია დადგენილებაში.
სტომატოლოგებს უწყვეტ სამედიცინო განათლების (უსგ) სისტემაში ჩართვისა და ტრენინგებზე დასწრებით 20 ქულის დაგროვების ვალდებულება 2025 წლის 1-ლი იანვრიდან უჩნდებოდათ. რეგულაციის გადავადებას წინ უძღოდა სფეროს წარმომადგენლების პროტესტი. 700-ზე მეტმა სტომატოლოგმა 2024 წლის სექტემბერში კობახიძეს განცხადებითაც მიმართეს. სტომატოლოგები ეთანხმებოდნენ უწყვეტი გადამზადების მოთხოვნებს, თუმცა მიიჩნევდნენ, რომ ამ ეტაპისთვის რთულად მისაღწევი იქნებოდა, განსაკუთრებით კი რეგიონში მცხოვრები ექიმებისთვის, რადგან მოთხოვნილ ტრენინგებში მონაწილეობა წლის განმავლობაში 10 ათასი ლარის ფარგლებში მერყეობდა, რაც რიგ შემთხვევაში სტომატოლოგიური საქმიანობის მიწისქვეშეთში გადასვლას, რიგ შემთხვევაში კი მომსახურების გაძვირება გამოიწვევდა.