რჩეული

საქართველოს საპატრიარქო მიმდინარე მოვლენებთან დაკავშირებით განცხადებას ავრცელებს.

განცხადებაში აღნიშნულია, რომ შექმნილი ვითარება იწვევს დაპირისპირებას და საფრთხეს უქმნის მოქალაქეთა მშვიდობიან თანაცხოვრებას.

დიდად ვწუხვართ, რომ მიუხედავად ეკლესიის მოწოდებისა, რუსთაველის გამზირზე დემონსტრაცია 30 ნოემბერსაც სერიოზულ დაპირისპირებაში გადაიზარდა. მასმედიასა და სოციალურ ქსელში გავრცელებულ კადრებში ნათლად ჩანს ქმედებები, რომელიც გაცდა კანონიერებისა და ზნეობის ფარგლებს. შექმნილი ვითარება იწვევს დაპირისპირებას და საფრთხეს უქმნის მოქალაქეთა მშვიდობიან თანაცხოვრებას.

ჩვენთვის ძვირფასია ორივე მხარეს მდგომნი და ვლოცულობთ მათთვის; ვლოცულობთ დაშავებულთა მალე გამოჯანმრთელებისთვის. ამასთან, კიდევ ერთხელ ვთხოვთ ახალგაზრდებს, საერთოდ დემონსტრანტებს, გამოიჩინონ კეთილგონიერება და დაიცვან პროტესტის გამოხატვის საზღვრები; ასევე ვთხოვთ სამართალდამცავებს, გამოიჩინონ მაქსიმალური მოთმინება და არ გასცდნენ კანონიერი მოქმედების ფარგლებს; სახელმწიფომ კი აუცილებელია, მოახდინოს დარღვევების სწრაფი და დროული გამოძიება, მათი ობიექტური შეფასება და საზოგადოების ინფორმირებულობა.

რაოდენ დიდი ფასეულობისთვისაც არ უნდა ვიღვწოდეთ, არ უნდა დაგვავიწყდეს, რომ ადამიანი არის ღვთის ხატი და მსგავსი და ყველაზე დიდი ღირსების მატარებელი ქმნილება ამ სამყაროში. შევთხოვთ ყოვლადწმინდა ღვთისმშობელს, დაიცვას თავისი წილხვედრი საქართველო მშვიდობით“, – ნათქვამია საპატრიარქოს მიერ გავრცელებულ განცხადებაში.

ვერძი
ამ კვირაში მხოლოდ საკუთარ თავსა და თქვენს მიზნებზე უნდა იყოთ ორიენტირებული. თქვენ შეიძლება იგრძნოთ გამძაფრებული სურვილი, რომ თქვენი მიზნები აისრულოთ. გამოიყენეთ ეს იმპულსი, რომ იმუშაოთ პირად მიზნებზე და მიიღოთ გადაწყვეტილებები, რომლებიც შეესაბამება თქვენს მომავალ ხედვას. თუმცა, დაიმახსოვრეთ, რომ თქვენს ურთიერთობაში დააბალანსოთ თავდაჯერებულობა და თანაგრძნობა.
მიუხედავად იმისა, რომ თავდაჯერებული იქნებით, თავმდაბლობის გარეშე შეიძლება ურთიერთობები დაგეძაბოთ. სამუშაოს მაძიებლებისთვის ამ კვირას ბრწყინვალე შესაძლებლობები მოაქვს. გააძლიერეთ თქვენი ლიდერობის უნარები და დამოუკიდებლად მუშაობის უნარი.
სიყვარულის ასპექტში, ყურადღებას მარტივად მიიპყრობთ, თუმცა ნუ გამოიჩენთ ზედმეტ ნდობას და ნუ იქნებით მიმნდობი. 
კვირის რჩევა: კონცენტრირდით თქვენს მიზნებზე!
კურო
ეს კვირა არის ინტროსპექტივა - მოიშორეთ ის, რაც დისკომფორტს გიქმნით. ეს შეიძლება იყოს უარყოფითი ჩვევა, მუდმივი წყენა ან სურვილი, რომელიც აღარ ემთხვევა იმ პიროვნებას, რომელსაც თქვენ ხდებით. უნდა გათავისუფლდეთ. მოერიდეთ გარე ვალიდაციის ძიებას; ამის ნაცვლად, ყურადღება გაამახვილეთ თქვენს შინაგან ზრდაზე.
კარიერული თვალსაზრისით, მოერიდეთ იმპულსურ გადაწყვეტილებებს ან დიდ ცვლილებებს, მაგრამ კონცენტრირდით გრძელვადიან მიზნებზე. თუ დასაქმებული ხართ, შეიძლება უფრო კომფორტულად იგრძნოთ თავი. მიუხედავად იმისა, რომ თქვენი ძალისხმევა შეიძლება შეუმჩნეველი დარჩეს ახლა, ის მოგვიანებით ანაზღაურდება. იყავით ყურადღებიანი - დააწესეთ საზღვრები წონასწორობის შესანარჩუნებლად.
სიყვარულში, მარტოხელებისთვის შეიძლება ეს კვირა მშვიდი აღმოჩნდეს, რაც საშუალებას მოგცემთ დაფიქრდეთ იმაზე, რაც ნამდვილად გსურთ პარტნიორში. წყვილებისთვის დროა აზრიანი საუბრებისთვის თქვენი კავშირის გაღრმავების მიზნით.
კვირის რჩევა: უარი თქვით უარყოფით ჩვევებზე!
ტყუპები
ეს კვირა გიბიძგებთ იფიქროთ მაკრო დონეზე და კონცენტრირდეთ თქვენს გრძელვადიან მიზნებზე. შესანიშნავი დროა თქვენი მიზნების დასაგეგმად და წინსვლის რეალისტური გზის გამოსაკვეთად. სხვებთან თანამშრომლობამ ან ჯგუფურმა აქტივობებმა შეიძლება გახსნას ახალი შესაძლებლობები, ამიტომ იყავით მიმღები მეგობრების ან კოლეგების იდეების მიმართ. გულდასმით გაფილტრეთ თქვენი აზრები და ფოკუსირდით პრიორიტეტებზე, ნაცვლად იმისა, რომ ერთბაშად ბევრი აიღოთ საკუთარ თავზე. 
დასაქმებულთათვის ეს შესანიშნავი კვირაა გუნდური მუშაობისა და ინოვაციური იდეების წარდგენისთვის. თქვენი წვლილი დაფასდება, მაგრამ დარწმუნდით, რომ თქვენი ძალისხმევა ინდივიდუალურად არის აღიარებული. გააზიარეთ თქვენი იდეები გაბედულად.
სიყვარულში, მარტოხელა შეიძლება შეხვდეს ვინმე საინტერესოს სოციალურ შეხვედრებზე ან საერთო ჰობის გამო. იყავით ღია საუბრის დასაწყებად, რადგან ეს კავშირები შეიძლება იყოს მნიშვნელოვანი.
კვირის რჩევა: იყავით რეალისტები!
კიბო
ეს კვირა მოგიწოდებთ ცხოვრებისადმი პრაგმატული მიდგომისკენ. თქვენი ძალისხმევა, სავარაუდოდ, შედეგს გამოიღებს, მაგრამ მთავარია დისციპლინა და ორგანიზებულობა. ფოკუსირება მოახდინეთ თქვენი მიღწევებისთვის ძლიერი საფუძვლის ჩაყრაზე და თქვენი მიზნების შენარჩუნებაზე. მოერიდეთ ყურადღების გაფანტვას ან სხვებთან შედარებას - გჯეროდეთ საკუთარი თავის და დარჩით მიწაზე მყარად! 
ეს ასევე იდეალური დროა თქვენი ოცნებების გადახედვისა და თქვენი მიზნების მისაღწევად სტაბილურად მუშაობისთვის.
სიყვარულში, მარტოხელა შეიძლება შეხვდეს ვინმეს სამუშაო ადგილის ან პროფესიული კავშირების მეშვეობით. ეს შეიძლება იყოს ადამიანი, რომელიც იზიარებს თქვენს მიზნებს ან აღფრთოვანებულია თქვენი ამბიციებით. წყვილებისთვის ეს კვირა ურთიერთგამხნევებასა და საერთო მისწრაფებებს ეხება.
კვირის რჩევა: შექმენით საფუძველი მომავალი წარმატებისთვის!
ლომი
ეს კვირა მხოლოდ განვითარებასა და აღმოჩენას დაუთმეთ, მზად იყავით სცადოთ რაიმე ახალი. ეს არის შესაფერისი დრო, რომ კითხვის ნიშნის ქვეშ დააყენოთ ის, რისიც ადრე გჯეროდათ ან სცადოთ რაიმე ახალი. თუ ფიქრობდით, როდის უნდა დაიწყოთ პროექტი ან მიიღოთ გადაწყვეტილება, რომელსაც გამბედაობა სჭირდება, სწორედ ამის დროა!
თქვენ ოპტიმისტი ხართ, რაც კარგია, მაგრამ არ დაკარგოთ კავშირი რეალურ სამყაროსთან.
სიყვარულში, მარტოხელებისთვის კარგი დროა მსგავსი პრეფერენციების ან შეხედულებების მქონე ადამიანებთან დასამეგობრებლად. რაც შეეხება ოჯახურ საკითხებს, ეს კვირა ორიენტირებული იქნება თანამშრომლობაზე და საერთო გამოცდილების მიღებაზე. მამასთან ან თქვენს ცხოვრებაში სხვა უფროს ადამიანთან დისკუსია შეიძლება დაგეხმაროთ მიზნების მიღწევაში ან თუნდაც პიროვნულ განვითარებაში.
კვირის რჩევა: სცადეთ რაიმე ახალი!
ქალწული
ეს კვირა გიბიძგებთ, ღია გონებით მიუდგეთ ცვლილებას. კარგი დროა გათავისუფლდეთ იმისგან, რაც აღარ არის თქვენთვის სასარგებლო, იქნება ეს ჩვევა, რწმენა თუ ემოციები, რომლებიც არ არის მომგებიანი თქვენი ცხოვრებისთვის.
სამუშაოს მაძიებლებს შეუძლიათ მოიპოვონ შესაძლებლობები კვლევასა და ანალიზში ან იმ სფეროებში, რომლებიც დაკავშირებულია პრობლემის გადაჭრასთან. ქალწულებმა შეიძლება დაიკავონ პოზიციები, რომლებიც ეხება ფინანსებს ან ფსიქოლოგიას ან ნებისმიერ სამუშაოს, რომელიც მოითხოვს ანალიზს. 
მათთვის, ვინც ურთიერთობაშია, ეს კვირა არის ურთიერთობების გამყარების ეტაპი. 
კვირის რჩევა: იყავით ღია ცვლილებებისთვის!
სასწორი
ამ კვირაში შეიძლება მოინდომოთ თქვენს ინტერპერსონალურ ურთიერთობებში არსებული პრობლემების გამოსწორება და მათი გაუმჯობესება. მიზანშეწონილია მოუსმინოთ სხვა ადამიანებს და მზად იყოთ მიიღოთ მათი მოსაზრებები. დარწმუნდით, რომ რეალური ინტერესი გაქვთ იმ ადამიანების მიმართ, ვისთანაც ურთიერთობთ, იმის ნაცვლად, რომ ზედაპირული ინტერესით იმოქმედოთ.
თუ ამჟამად მუშაობთ, დაგეხმარებათ პარტნიორობა მიიღოთ ის, რაც გსურთ. დადებითი შედეგები მოჰყვება სამუშაო ადგილზე სხვა ადამიანებთან ან კლიენტებთან ურთიერთობისას. ფრთხილად იყავით კონტრაქტებთან ან შეთანხმებებთან, რომლებიც შეიძლება გაფორმდეს, რადგან მათ მომავალში შეიძლება გავლენა მოახდინონ თქვენს კარიერაზე.
შეყვარებულთათვის ეს შესანიშნავი დროა იმისთვის, რომ დაუთმოთ დრო და განავითაროთ თქვენი ურთიერთობა. უკეთესია, თუ ისაუბრებთ რაიმე პრობლემაზე, რომელიც ჯერ არ არის მოგვარებული.
კვირის რჩევა: მოაგვარეთ არსებული პრობლემები
მორიელი
კვირა იწყება დროისა და ენერგიის მართვის კარგი პოტენციალით. ეს არის დრო, რომ იფიქროთ თქვენს რუტინაზე და შეიტანოთ ცვლილებები, რომლებიც დადებითად იმოქმედებს თქვენს სხეულსა და გონებაზე. შეიძლება შეამჩნიოთ ახალი მოტივაცია თქვენი ყოველდღიური დავალებებისთვის; არ გადააჭარბოთ მათ და არ მიაყენოტ სტრესი საკუთარ თავს. 
ეს კვირა ორგანიზებას და პრობლემების გადაჭრას ეხება. თანამშრომლები კვირას ხელსაყრელად თვლიან ორგანიზაციის პროდუქტიულობის გასაზრდელად. შესაძლოა გქონდეთ დავალებები, რომლებიც საჭიროებს სიზუსტეს ან კოორდინაციას პროექტის ზედამხედველობაში.
დედამ შეიძლება გირჩიოთ, როგორ შეინარჩუნოთ ჯანმრთელობა და კეთილდღეობა; უმეტეს შემთხვევაში, მისი რჩევა სასარგებლო იქნება.
კვირის რჩევა: მართეთ დრო ეფექტურად!
მშვილდოსანი
ეს კვირა არის იმის გახსენება, თუ როგორ უნდა გაერთოთ და როგორ შემოიტანოთ ის, რაც გიყვართ თქვენს ყოველდღიურ ცხოვრებაში. უფრო მაღალი თვითშეფასება გექნებათ და მზად იქნებით რისკებისთვის. ეს ასევე კარგი დროა იმისთვის, რომ იყოთ საკუთარი თავი და აჩვენოთ მსოფლიოს ვინ ხართ. არაფერია ცუდი იმაში, რომ იყოთ ენთუზიაზმით სავსე, მაგრამ ნუ მისცემთ სხვებს უფლებას, რომ ამის გამო გამოგიყენონ.
მარტოხელებისთვის ეს დროა ახალ ადამიანებთან ურთიერთობისთვის, განსაკუთრებით მაშინ, როცა სოციალურ ღონისძიებებზე მოხვდებით. ხალხის ყურადღების მიქცევა გაგიადვილდებათ, ასე რომ, ნუ დაელოდებით თქვენთან მიახლოებას, თუ არის ვინმე, ვისთანაც გსურთ საუბარი.
კვირის რჩევა: გამოიყენეთ შანსი!
თხის რქა
ეს კვირა არის თქვენთვის უსაფრთხო და ხელსაყრელი. იქნება ეს თქვენი სახლის დალაგება, ოჯახთან ერთად ყოფნა თუ იმაზე ფიქრი, რისი მიღწევაც გსურთ, ეს პერიოდი მოითხოვს, რომ ყურადღება გაამახვილოთ იმაზე, რაც გაგრძნობინებთ, რომ მნიშვნელოვანი ხართ. შეიძლება გაგიჩნდეთ საჭიროება ხელახლა გადახედოთ ძველ მოგონებებს ან გეგმებს, რომლებიც შეჩერებული გაქვთ. დაუთმეთ ეს დრო ემოციური საკითხების მოგვარებას და კონცენტრირდით იმაზე, რაც ყველაზე მეტ კომფორტს გიქმნით.
თანამშრომლებისთვის კვირა შეიძლება იყოს დრო, რომ იმუშაონ ზოგიერთ ორგანიზაციულ საკითხზე. ნუ მიიღებთ ნაჩქარევ გადაწყვეტილებებს; ეს საუკეთესო დროა შემდეგი ნაბიჯებისთვის მოსამზადებლად.
ოჯახური ცხოვრება ცენტრალურ ადგილს იკავებს. ესაუბრეთ ოჯახის უფროს წევრებს და მოუსმინეთ მათ რჩევებს გულდასმით.
კვირის რჩევა: ფოკუსირება ემოციურ სტაბილურობაზე
მერწყული
ეს კვირა ხაზს უსვამს გააზრებული კომუნიკაციისა და აქტიური მოსმენის მნიშვნელობას. იქნება ეს წერა, ლაპარაკი, ხელოვნების შექმნა თუ უბრალოდ სხვებთან ურთიერთობა, ეს საუკეთესო დროა საკუთარი თავის გამოხატვისთვის. მოკლე მოგზაურობებში ან ახლომდებარე გამოცდილებაში ჩართვამ შეიძლება გაგიჩინოთ ახალი იდეები და განავითაროს თქვენი პირადი და პროფესიული ცხოვრება. იყავით ყურადღებიანი თქვენი სიტყვების მიმართ და ეცადეთ, ღია იყოთ სხვისი პერსპექტივების მოსმენისთვის, რათა ხელი შეუწყოთ უკეთეს თანამშრომლობას. 
თქვენი შემოქმედებითი იდეები და წვლილი დაფასდება, ასე რომ აიღეთ ინიციატივა, მაგრამ მოერიდეთ საკუთარი თავის გადატვირთვას. იყავით ორგანიზებული და დანიშნეთ პრიორიტეტული ამოცანები პროდუქტიულობის შესანარჩუნებლად.
სიყვარულში მთავარია კომუნიკაცია. არ მოერიდოთ ახალი ადამიანების გაცნობას და მათთან საუბარს. 
კვირის რჩევა: მოუსმინეთ ყურადღებით!
თევზები
ეს კვირა გიწვევთ დაფიქრდეთ იმაზე, თუ რას აფასებთ, განსაკუთრებით ფულსა და მატერიალურ ფასეულობებთან დაკავშირებით. იდეალური დროა დაზოგვაზე, სამომავლო საჭიროებების დაგეგმვაზე ან დამატებითი შემოსავლის წყაროებზე დასაფიქრებლად. 
დასაქმებულებმა ფოკუსირება მოახდინეთ იმ ამოცანებზე, რომლებიც მოითხოვს დაგეგმვასა და დეტალებზე ყურადღებას. შეიძლება გქონდეთ შანსი, რომ შთაბეჭდილება მოახდინოთ თქვენს უფროსებზე ინოვაციებისა და საიმედოობის დემონსტრირებით. მოერიდეთ სარისკო არჩევანს და დაისახეთ სტაბილური მიზნები. 
მარტოხელა ადამიანებს შეიძლება მოეწონოთ ადამიანი, რომელსაც აქვს მსგავსი ღირებულებები და მიზნის მკაფიო გრძნობა. პრიორიტეტი მიანიჭეთ კავშირებს, რომლებიც უზრუნველყოფენ უსაფრთხოებას, ვიდრე წარმავალ მღელვარებას. ოჯახურ ცხოვრებაში, დისკუსიები შეიძლება ეხებოდეს პასუხისმგებლობებს ან ფინანსურ საკითხებს. 
კვირის რჩევა: იფიქრეთ თქვენს ღირებულებებზე!

რეორგანიზაციის ფარგლებში საგამოძიებო დეპარტამენტის ბაზაზე ჩამოყალიბდება სპეციალურ საქმეთა გამოძიების დეპარტამენტი, რომელიც სამართალდამცავების მიერ ჩადენილ არასათანადო მოპყრობის და ძალადობრივ დანაშაულებს, ჟურნალისტების მიმართ ჩადენილ დანაშაულებს გამოიძიებს, ასევე სტრასბურგის ადამიანის უფლებათა და თავისუფლებათა დაცვის ევროპული სასამართლოს გადაწყვეტილების საფუძველზე ხელახალი გამოძიების ჩატარებას უზრუნველყოფს.

სამსახურში შეიქმნება პირადი ცხოვრების ხელყოფის საქმეთა გამოძიების დეპარტამენტი, რომელიც პედოფილიის, სექსუალური გამოძალვისა და პირადი ცხოვრების კადრებით შანტაჟის ფაქტებს გამოიძიებს.

ორი დამოუკიდებელი საგამოძიებო დეპარტამენტის შექმნით სამსახურს მიეცემა საშუალება, ერთი მხრივ, ყველა კატეგორიის დანაშაულის გამოსაძიებლად საგამოძიებო რესურსი რაციონალურად გაანაწილოს და, მეორე მხრივ, ყველა გამომძიებელს მხოლოდ ერთი კატეგორიის დანაშაულზე მუშაობის შესაძლებლობა ექნება. ამ საკითხის დარეგულირების შესახებ რეკომენდაციები ასევე ხაზგასმულია საერთაშორისო ორგანიზაციებისა და უფლებადამცველების ანგარიშებში.

გარდა ამისა, სტრუქტურული ცვლილებები ასევე უკავშირდება ბავშვებისა და მოზარდებისთვის საშიშ ისეთ გამოწვევას, როგორიც არის ინტერნეტსივრცეში პედოფილიის, სექსუალური გამოძალვის, პირადი ცხოვრების კადრებით შანტაჟის შემთხვევები. შესაბამისად, ახალმა სპეციალიზებულმა საგამოძიებო დანაყოფმა ერთგვაროვანი მიდგომების ჩამოყალიბებით უნდა უზრუნველყოს როგორც საქმეთა დროული და ეფექტური გამოძიება, ასევე ამ დანაშაულის პრევენცია და საზოგადოების ცნობიერების ამაღლება.

შესაბამისი საკანონმდებლო ცვლილებების განხორციელების შემდეგ, რომლის თაობაზე სპეციალურმა საგამოძიებო სამსახურმა პარლამენტს მიმდინარე წლის სექტემბერში მიმართა, პირადი ცხოვრების ხელყოფის საქმეთა გამოძიების დეპარტამენტში ასევე ჩამოყალიბდება პედოფილიასა და სექსუალურ გამოძალვაში მსჯავრდებულ პირთა მონიტორინგის სამმართველო. ახალი სამმართველო გააკონტროლებს ამ დანაშაულისთვის ნასამართლევი პირების ქცევას და მათი მხრიდან განმეორებითი დანაშაულის ჩადენის თავიდან ასაცილებლად აუცილებელი ზომების გატარებას უზრუნველყოფს.

დეპარტამენტში ასევე გაერთიანდება მსხვერპლთა უფლებების დაცვის სამმართველო, მისი თანამშრომლები ყოველდღიურ რეჟიმში უზრუნველყოფენ დაზარალებული მოქალაქეებისთვის, მათ შორის განმცხადებლებისთვის უფლება-მოვალეობების შესახებ დეტალური ინფორმაციის მიწოდებას, მათ ფსიქოლოგიურ მხარდაჭერას, საქმის მასალების გაცნობას, დაცვის სპეციალური პროგრამების შეთავაზებას, საქართველოს სახალხო დამცველის აპარატის წარმომადგენლებისთვის საქმის მასალების გაცნობის პროცესის ორგანიზებას.

რეორგანიზაციის ფარგლებში უწყების გაძლიერების და გეოგრაფიული ხელმისაწვდომობის უზრუნველსაყოფად სამსახური ქვემო ქართლში, ქ. რუსთავში მორიგ მეხუთე რეგიონულ სამმართველოს აამოქმედებს. რეგიონული ოფისის მშენებლობის დასრულება 2025 წლის აპრილში იგეგმება.

შექმნის დღიდან სამსახურის მიერ გატარდა არაერთი ღონისძიება უწყების გაძლიერებისა და ტერიტორიული დაფარვის გაფართოების უზრუნველსაყოფად, რამაც დადებითი გავლენა იქონია როგორც სამსახურის მიმართ მომართვიანობაზე, ასევე სწრაფი და ეფექტიანი გამოძიების წარმოებაზე. სამსახური ინსტიტუციური გაძლიერების და გაფართოებისკენ მიმართულ ნაბიჯებს მომავალშიც გადადგამს.

ინფორმაციას სპეციალური საგამოძიებო სამსახურის პრესსამსახური ავრცელებს.

საქართველოს მართლმადიდებელი ეკლესია 23 ნოემბერს წმინდა გიორგის ბორბალზე წამების დღეს აღნიშნავს.  გიორგობა წელიწადში ორჯერ აღნიშნება: 6 მაისს – წმინდანის აღსრულების დღეს და 23 ნოემბერს – მისი ბორბალზე წამების დღეს.

რელიგიური სწავლების მიხედვით, წმინდა საკვირველთმოქმედი და ძლევაშემოსილი გიორგი ქართველი ერის მფარველად მიიჩნევა და საქართველოში განსაკუთრებულად უყვართ. მის სახელზე ქვეყნის ყველა კუთხეში არაერთი სალოცავია. წმინდა გიორგის თაყვანისცემა საქართველოში მე-4 საუკუნის დასაწყისიდან დაიწყო. გადმოცემის თანახმად, საქართველოს განმანათლებელი წმინდა ნინო დიდმოწამის ბიძაშვილი ყოფილა და ქართველებს მისგან შეუტყვიათ წმინდა გიორგის მოწამეობის შესახებ. საქართველოში უამრავი ლეგენდა არსებობს იმის შესახებ, როგორ შეეწეოდა ხოლმე წმინდანი ქართველთა ლაშქარს მრავალრიცხოვან მტერთან ბრძოლაში, მათ შორის დიდგორის ბრძოლაშიც.
წმ. გიორგი კაბადოკიაში დაიბადა (მე-3 საუკუნის მეორე ნახევარი) მდიდარ ქრისტიანულ ოჯახში. მამამისი სარწმუნოებისთვის მოწამეობრივად აღესრულა. დაქვრივებულმა დედამ კაბადოკიიდან, თავის სამშობლოს, პალესტინას მიაშურა და იქ განაგრძო შვილის ქრისტიანულად აღზრდა. ჭაბუკი გიორგი რომის ლაშქარში განწესდა მხედრად. ახოვანმა, მამაცმა და უშიშარმა მეომარმა მალე იმპერატორ დიოკლეტიანეს ყურადღება მიიპყრო. მან თავის პირად მცველად დანიშნა წმ. გიორგი და მხედართმთავრის მაღალი წოდებაც უბოძა.
კერპთაყვანისმცემელმა დიოკლეტიანემ თავისი განმგებლობის ბოლო წლებში სასტიკი ბრძოლა გამოუცხადა ქრისტიანობას. წმ. გიორგი უშიშრად გამოვიდა იმპერატორის გადაწყვეტილების წინააღმდეგ და თავი ქრისტიანად გამოაცხადა, თავზარდაცემულმა დიოკლეტიანმე, დაერწმუნებინა გიორგი, რომ ქრისტეს განდგომოდა მაგრამ უარი მიიღო.  იმპერატორის განკარგულებით, განრიხებული მეომრები შეეცადნენ, შუბის კვრით გაეყვანათ წმ. გიორგი დარბაზიდან, მაგრამ მის სხეულზე შეხებისას შუბი იდრიკებოდა და რბილდებოდა.  საპყრობილეში მას ფეხებზე ხუნდები, მკერდზე კი დიდი ლოდი დაადეს, ასე ამყოფეს დილამდე. მეორე დღეს წმ. გიორგიმ დიოკლეტიანეს მიუგო - „ უფრო მალე შენ მოუძლურდები ჩემი ტანჯვით, ვიდრე მე, შენ მიერ გვემული“ . განრისხებულმა მბრძანებელმა ბრძანება გასცა რომ იგი ყველაზე ძლიერი სატანჯველით ეწამებინათ. დიდმოწამე გიორგი მბრუნავ ბორბალზე დააკრეს, რომლის ქვეშაც წვერბასრი რკინის მახვილებიანი ძელები დაედოთ.  სხეულდასერილმა ხმამაღლა უხმო უფალს, შემდეგ კი დუმილი არჩია. დიოკლეტიანემ იფიქრა, უკვე აღესრულაო და ბრძანა ჩამოეხსნათ ბორბლიდან და გაეშურა. 
მოულოდნელად სრულიად ჩამობნელდა, იქაურობა ჭექა-ქუხილმა გააყრუა, ცოტა ხნის შემდეგ მაღლიდან მოისმა ხმა: „ნუ გეშინის, გიორგი, მე შენ თანა ვარ!“ ბორბალთან ნათლით მოსილი უფლის ანგელოსი გამოჩნდა, ხელი შეახო მოწამეს და უთხრა : „გიხაროდენ“!, ანგელოსი მაშინვე გაუჩინარდა, წმ. გიორგი კი სრულიად უვლენებლი წამოდგა.
ყოველივე ამის მხილველმა მეომრებმა წმ. გიორგი მაშინვე იმპერატორთან წაიყვანეს, დიოკლეტიანემ თვალს არ დაუჯერა და განცვიფრდა. ამავდროულად თვით დიოკლეტიანეს მეუღლეც ალექსანდრაც ხმამაღლა განადიდებდა ქრისტეს. იმპერატორი ამის შემდეგ კიდევ უფრო სასტიკი გახდა. მისი ბრძანებით, წმ. გიორგი ღრმა ორმოში ჩააგდეს და თავზე გამოუწვავი, გახურებული კირი დააყარეს, ხოლო როცა სამი დღის შემდეგ კირი ამოყარეს და წმინდანი სრულიად უვნებელი იხილეს, იმპერატორის ბრძანებით ამჯერად, წვერწამახულლურსმებიანი გავარვარებული ჩექმა ჩააცვეს და ცემით წაიყვანეს საპყრობილეში. მეორე დღეს, როდესაც დიოკლეტიანემ კვლავ ისურვა წმ. გიორგის ნახვა, წამებულმა დაუზიანებელი ფეხები უჩვენა და ღიმილით უთხრა, ჩექმა ძალიან მომეწონაო. ამისთვის კი ის სასტიკად სცემეს.
იმპერატორმა დასახმარებლად წარმართ მოგვს ათანასეს უხმო. მისნის რჩევით, დიოკლეტიანემ წმ. გიორგის უბრძანა, ქრისტიანობის ჭეშმარიტების დასამტკიცებლად მიცვალებული მკვდრეთით აღედგინა. იგი საფლავთან მიიყვანეს, უფალს შეღაღადა და მყის მიწა გაიხსნა, იქიდან კი მკვდრეთით აღმდგარი ადამიანი ამოვიდა. ამ სასწაულის მომსწრე ათანასემ იმ წამსვე აღიარა ქრისტიანული სარწმუნოება. გამწარებულმა დიოკლეტიანემ ათანასე სიკვდილით დასაჯა, წმ. გიორგი კი საპყრობილეში ჩააგდო. 
დილით იმპერატორმა ისევ შესთავაზა წმინდა მოწამეს, რომ თაყვანი ეცა კერპისათვის, წმ. გიორგი დათანხმდა და აპოლონის სამსხვერპლოში გაყვა, როდესაც მიუახლოვდა ბომონს, ჯვარი გადასახა და როგორც ცოცხალს ისე მიმართა „გსურს განა, ჭეშმარიტი ღმერთის მსგავსად, მსხვერპლი მიიღო ჩემგან?“ კერპში დამკვიდრებულმა ეშმაკმა კი მიუგო „მე არა ვარ ჭეშმარიტი ღმერთი, ჩვენ მისი მსახური ანგელოსნი, განდგომილი ვიქმენით, შურით და ამპარტავნებით  და მას შემდეგ ვაცდუნებთ ადამიანებს“. ამ სიტყვების შემდეგ ყველა კერპი თავისით დაიმსხვრა. ხმაურზე დედოფალი ალექსანდრა გამოვიდა, როცა ნახა, რომ წმ გიორგი მოსაკლავად მიჰყავდათ, თვითონაც აღიარა ქრისტიანობა და დიოკლეტიანესაგან სიკვდილმისჯილი სიხარულით გაჰყვა საყვარელ წმინდანს.
წმ. გიორგი 303 წელს, 6 მაისს აღესრულა, მას თავი მოჰკვეთეს. ანდერძის თანახმად სხეული, პალესტინის ქალაქ რამლაში დაკრძალეს, შემდეგ კი ქალაქ ლიდიაში, იერუსალიმის მახლობლად გადაასვენეს. ის მართლმადიდებელი ეკლესიის ისტორიაში შევიდა, როგორც ძლევაშემოსილი და უძლეველი ზეციური მხედარი.
წმ. გიორგის მიერ აღსრულებულ სასწულთაგან ყველაზე ცნობილი შემდეგი სასწაულია:
ქალაქ ბეირუთის შორიახლოს დიდ ტბაში უზარმაზარი ურჩხული დაბუდებულიყო, რომელიც ნელნელა ანადგურებდა მოსახლეობას. ქვეყნის მეფეს გადაუწყვიტავს ყოველდღიურ საზრდოდ მისთვის ქალწულები და ჭაბუკები მიეცა, როცა მეფის ასულის რიგმაც მოაღწია, ხელმწიფემ მორჩილად დაუტოვა ტბის ნაპირას ურჩხულს ქალიშვილი. მწარედ ატირებულ მეფის ასულს უცებ თეთრ ცხენხე ამხედრებული წმ. გიორგი გამოეცხადა შუბით ხელში. მან დაამშვიდა ასული, ურჩხულს პირჯვარი გადასახა და ამის შემდეგ წმინდანმა მეფის ასულს უბრძანა მოება ქამარი დაჭრილი ურჩხულისთვის და ძაღლივით წაეყვანა. ქალაქის მოსახლეობა განცვიფრებული უყურებდა ამ სანახაობას და განცვიფრებული გარბოდნენ. წმ. გიორგი აჩერებდა მათ და ეუბნებოდა რომ არ შეშინებოდათ და ქრისტე ეწამათ. მან მთელი ქალაქის წინ განგმირა გველეშაპი. იმ დღეებში 25 ათასი კაცი მოინათლა. ამ მოვლენის აღსანიშნავად ტაძრები ააგეს. 
საქართველოში წლის ყველა დღეს რომელიმე სოფელში აღინიშნება წმ. გიორგის ხსენება. 23 ნოემბერი კი უქმე დღედ არის გამოცხადებული.

ავტორი: ია გრიგალაშვილი

შინაგან საქმეთა სამინისტროს ინფორმაციით, ზამთრის პერიოდში, პირველი დეკემბრიდან პირველ მარტამდე, გზის ცალკეულ მონაკვეთებზე სატრანსპორტო საშუალების ზამთრის საბურავებით მოძრაობა სავალდებულოა.

უწყების ცნობით, ზამთარში, მეტეოროლოგიური პირობების გათვალისწინებით, პოლიციის მიერ შესაძლოა დაწესდეს სატრანსპორტო საშუალების არანაკლებ წამყვან თვლებზე მოცურების საწინააღმდეგო ჯაჭვის დამაგრების მოთხოვნა.

ზამთრის საბურავი უნდა აკმაყოფილებდეს შემდეგ კრიტერიუმებს:

საბურავზე დატანილი უნდა იყოს სიმბოლო − ფიფქი.

საბურავის პროტექტორის სიღრმე უნდა იყოს:

- არანაკლებ 3 მმ. − მსუბუქი ავტომობილებისთვის (M1) და სატვირთოებისთვის (N1, N2, N3);

- არანაკლებ 4 მმ. − მიკროავტობუსისთვის (M2) და ავტობუსისთვის (M3);

საბურავის დამზადებიდან არ უნდა იყოს გასული 10 წელი;

საბურავზე შესაძლებელი უნდა იყოს დამზადების თარიღის წაკითხვა;

ავტობუსისთვის (M3) და 3.5 ტონაზე მეტი სრული მასის მქონე სატვირთო სატრანსპორტო საშუალებისთვის (N2, N3) დასაშვებია იმგვარი ზამთრის საბურავით გადაადგილება, რომელზეც არ არის დატანილი სიმბოლო - ფიფქი. ამ შემთხვევაში საქართველოს შინაგან საქმეთა სამინისტროს დანაყოფი უფლებამოსილია ზემოაღნიშნული კატეგორიების სატრანსპორტო საშუალებებისთვის დააწესოს არანაკლებ ერთი წამყვანი ღერძის ყველა თვალზე სათანადო მახასიათებლების მქონე მოცურების საწინააღმდეგო ჯაჭვის დამაგრების მოთხოვნა.

მოცურების საწინააღმდეგო ჯაჭვი უნდა იყოს ქარხნული წესით დამზადებული, სატრანსპორტო საშუალების საბურავის ზომის შესაბამისი და თოვლით/ყინულით დაფარული გზის ზედაპირზე გამოსაყენებლად ვარგისი.

მოცურების საწინააღმდეგო ჯაჭვი გამოყენებული უნდა იყოს მხოლოდ თოვლით ან/და ყინულით დაფარულ გზაზე.

- თუ ზამთრის საბურავი ან/და მოცურების საწინააღმდეგო ჯაჭვი არ შეესაბამება დადგენილ მოთხოვნებს, პოლიციელი უფლებამოსილია პირს აუკრძალოს დადგენილებით განსაზღვრულ ადგილას/გზის მონაკვეთზე შესვლა.

- თუ ზამთრის საბურავი ან/და მოცურების საწინააღმდეგო ჯაჭვი არ შეესაბამება დადგენილ მოთხოვნებს და ამ სატრანსპორტო საშუალებით მოძრაობა საფრთხეს უქმნის საგზაო მოძრაობის მონაწილეებს, პირს შესაძლოა დროებით ჩამოერთვას სატრანსპორტო საშუალება და განთავსდეს დაცულ სადგომზე.

ზამთრის საბურავისა და მოცურების საწინააღმდეგო ჯაჭვის მოთხოვნებთან შეუსაბამობის შემთხვევაში, პირი დაჯარიმდება 100 ლარით და მართვის მოწმობისთვის მინიჭებული ქულათა რაოდენობა შეუმცირდება 5 ქულით.

ზამთრის საბურავისა და მოცურების საწინააღმდეგო ჯაჭვის სათანადო მახასიათებლები და გზის მონაკვეთების ჩამონათვალი, სადაც აღნიშნული წესით მოძრაობა სავალდებულოა იხილეთ ბმულზე.