Category Blog

დონალდ ტრამპი აცხადებს, რომ შეერთებულ შტატებს ირანთან დაპირისპირებაში უპირატესობა აქვს და საქმეს ბოლომდე მიიყვანს.

ტრამპის თქმით, თეირანი ისეთ შეთანხმებაზე არ თანხმდება, რომელიც ვაშინგტონისთვის მისაღები იქნებოდა.

„ჩვენ უბრალოდ ვიმარჯვებთ. ეს ჩხუბი რომ ყოფილიყო, უკვე შეჩერდებოდნენ. გესმით ეს გამოთქმა? სიმართლეა. ისინი ისეთ გარიგებაზე არ მიდიან, რაც ჩვენ გვჭირდება. ჩვენ ამ საქმეს სათანადოდ მოვაგვარებთ. ჩვენ არ ვაპირებთ ნაადრევად წასვლას, რომ სამი წლის შემდეგ კვლავ ამ პრობლემის წინაშე აღმოვჩნდეთ“, — განაცხადა შეერთებული შტატების პრეზიდენტმა.

რუსეთის პრეზიდენტმა ვლადიმერ პუტინმა და აშშ-ის პრეზიდენტმა დონალდ ტრამპმა ტელეფონით ისაუბრეს. ამის შესახებ ინფორმაციას პუტინის თანაშემწე იური უშაკოვი ავრცელებს და ამბობს, რომ "საუბარი საათ-ნახევარზე მეტხანს გაგრძელდა". დასავლური მედიის ინფორმაციით კი მათ მიმდინარე ომი განიხილეს, სადაც რუსულმა მხარემ აღნიშნა, რომ სამხედრო მოქმედებების განახლებას შესაძლოა, „მძიმე შედეგები“ მოჰყვეს

 რუსეთის პრეზიდენტის თანაშემწემ განაცხადა, პუტინმა ტრამპს უთხრა, რომ ირანის ტერიტორიაზე სახმელეთო ოპერაციის დაწყება სრულიად „მიუღებელი და საშიში“ იქნებოდა

 რუსული მედიის ცნობით ტრამპის ხელახლა გაპრეზიდენტების შემდეგ, ეს რუსეთისა და აშშ-ის პრეზიდენტებს შორის გამართული მე-12 სატელეფონო საუბარია მათ შორის წინა სატელეფონო საუბარი 9 მარტს გაიმართა

მოლდოვის პრეზიდენტი მაია სანდუ უკრაინაში ჩავიდა. კიევში ის უკრაინის პრეზიდენტს, ვოლოდიმირ ზელენსკის შეხვდება, შემდეგ კი ჩერნობილს ეწვევა, სადაც ჩერნობილის ატომური ელექტროსადგურის კატასტროფის მე-40 წლისთავზე კატასტროფის მსხვერპლთა ხსოვნას პატივს მიაგებს.

სანდუმ ვიზიტის შესახებ სოციალური მედიის საშუალებით განაცხადა.

„დღეს, დილით, ჩერნობილის კატასტროფის მე-40 წლისთავზე კიევში მივემგზავრები პრეზიდენტ ვოლოდიმირ ზელენსკისთანმოსალაპარაკებლად, შემდეგ კი – ჩერნობილში, რათა პატივი მივაგო მათ ხსოვნას, ვინც ჯანმრთელობა და სიცოცხლეც კი შესწირა ევროპის კიდევ უფრო დიდი ტრაგედიისგან დაცვას“, – განაცხადა მაია სანდუმ.

მოლდოვის პრეზიდენტის თქმით, „ჩერნობილის ავარიამ აჩვენა, რომ კატასტროფებს საზღვრები არ აქვს და ასევე აჩვენა საერთაშორისო სოლიდარობის ძალა“.

„დაბინძურებული რეაქტორის თავზე არსებული თაღი აჩვენებს, რომ ქვეყნებს შეუძლიათ დიდი წარმატების მიღწევა, როდესაც ისინი ერთად მუშაობენ. დღეს ჩვენ გვჭირდება იგივე ერთიანობა და მონდომება ევროპაში მშვიდობის დასაცავად. მოლდოვის ადგილი მათთანაა, ვინც მშენებლობას ირჩევს და არა ნგრევას“, – წერს მოლდოვის პრეზიდენტი.

ავარია ჩერნობილის ატომურ ელექტროსადგურზე, რომელიც კიევიდან 120 კილომეტრში მდებარეობდა, 1986 წლის 26 აპრილს მოხდა და ბირთვული ენერგიის ისტორიაში ყველაზე მძიმე კატასტროფა იყო. მე-4 ბლოკში აფეთქებისა და ხანძრის შემდეგ ატმოსფეროში დიდი რაოდენობით რადიაქტიური მასალა გამოიყო. რადიაციამ ევროპის მრავალი ქვეყანა დააზარალა, ყველაზე მეტად კი – უკრაინა და ბელარუსი. ელექტროსადგურის მიმდებარე დასახლებებიდან მოსახლეობა ევაკუირებული იქნა. ექსკავატორებით ბევრი სოფელი მიწასთან გაასწორეს. რადიაციის შემდგომი გავრცელების თავიდან ასაცილებლად დანგრეული რეაქტორი „სარკოფაგით“ დაილუქა, ხოლო ატომური ელექტროსადგურის გარშემო 30-კილომეტრიანი „გაუცხოების ზონა“ შეიქმნა

პრეზიდენტობა სახიფათო პროფესიაა, მაგრამ მე მიყვარს ეს ქვეყანა და ძალიან ვამაყობ, – ამის შესახებ აშშ-ის პრეზიდენტმა, დონალდ ტრამპმა განაცხადა.

თეთრი სახლის კორესპონდენტების სადილზე განხორციელებული სროლის შემდეგ გამართულ პრესკონფერენციაზე, რომელსაც თავად ესწრებოდა, ტრამპმა ხუმრობით თქვა, რომ სცოდნოდა, პრეზიდენტობა საშიში იყო, „შეიძლება არც ეყარა კენჭი“.

„რამდენიმე იარაღით შეიარაღებულმა კაცმა უსაფრთხოების საკონტროლო პუნქტს შეუტია და ის საიდუმლო სამსახურის რამდენიმე ძალიან მამაცმა წევრმა გაანეიტრალა, რომლებმაც ძალიან სწრაფად იმოქმედეს. კაცი დააკავეს. ვფიქრობ, კალიფორნიაში ცხოვრობს. ის ავადმყოფია, ძალიან ავადმყოფი. ერთი ოფიცერი დაჭრეს, მაგრამ გადაარჩინა იმ ფაქტმა, რომ მას აშკარად ძალიან კარგი ტყვიაგაუმტარი ჟილეტი ეცვა. მას ძალიან ახლო მანძილიდან ესროლეს ძალიან ძლიერი იარაღიდან და ჟილეტმა თავისი საქმე გააკეთა. ახლახან ვესაუბრე ოფიცერს და ის შესანიშნავად გრძნობს თავს, შესანიშნავ ფორმაშია. ვინ გააკეთებდა ამას, თუ არა ავადმყოფი? მაგრამ მე ვფიქრობ, რომ თქვენ მის შესახებ ყველაფერს გაიგებთ. როგორც ჩანს, ფიქრობენ, რომ ის მარტო მოქმედებდა და მეც ამას ვგრძნობ. ჩვენ განვიხილეთ ყველა ის პირობა, რაც დღეს საღამოს მოხდა და ვიტყვი, რომ იცით, ეს არ არის განსაკუთრებით უსაფრთხო შენობა და არ მინდოდა ამის თქმა, მაგრამ სწორედ ამიტომ უნდა გვქონდეს თეთრ სახლში ყველა ატრიბუტი. მათ ეს საბანკეტო დარბაზი 150 წლის განმავლობაში სურდათ მრავალი მიზეზის გამო, მაგრამ დღეს ცოტა განსხვავებულია, რადგან დღეს ჩვენ გვჭირდება უსაფრთხოების ისეთი დონე, როგორიც ალბათ აქამდე არავის უნახავს

დღევანდელი მოვლენების გათვალისწინებით, მე ვთხოვ ყველა ამერიკელს, კიდევ ერთხელ გულითადად ჩაერთოს ჩვენი უთანხმოების მშვიდობიანად მოგვარებაში. ჩვენ უნდა მოვაგვაროთ ჩვენი უთანხმოებები. ვიტყვი, რომ გყავთ რესპუბლიკელები, დემოკრატები, დამოუკიდებლები, კონსერვატორები, ლიბერალები და პროგრესულები. ეს სიტყვები, შესაძლოა, ურთიერთშემცვლელი იყოს, მაგრამ ვინც იმ ოთახში იმყოფებოდა, დიდი შეკრება გახლდათ, ეს იყო უზარმაზარი სიყვარული და ერთად შეკრება, ვუყურე და ამან ძალიან, ძალიან დიდი შთაბეჭდილება მოახდინა ჩემზე“, – განაცხადა დონალდ ტრამპმა.

თეთრი სახლის კორესპონდენტების ასოციაციის მიღებაზე, რომელიც ვაშინგტონში სასტუმრო „ჰილტონში“ იმართებოდა და რომელსაც აშშ-ის პრეზიდენტი დონალდ ტრამპი და პირველი ლედი მელანია ტრამპი ესწრებოდნენ, სროლა მოხდა.

მედიის ინფორმაციით, ღონისძიებას ასევე ესწრებოდნენ აშშ-ის ვიცე პრეზიდენტი და თავდაცვის მდივანიც.

სროლის შემდეგ აშშ-ის კაბინეტის წევრების ევაკუაცია განხორციელდა. თავდასხმის შედეგად არავინ დაშავებულა, დაკავებულია თავად თავდამსხმელი.

ბულგარეთში ვადამდელი საპარლამენტო არჩევნები მიმდინარეობს, რომელიც ბოლო ხუთ წელიწადში უკვე მერვედ იმართება.

არჩევნებში წინასწარი გამოკითხვის მიხედვით, 35%-იანი მხარდაჭერით, „პროგრესული ბულგარეთის“ ლიდერი, ყოფილი პრეზიდენტი რუმენ რადევი ლიდერობს, რომელიც ევროსკეპტიკურადაა განწყობილი და ასევე ეწინააღმდეგება უკრაინის სამხედრო მხარდაჭერას.

მან პრეზიდენტის თანამდებობა იანვარში დატოვა და არჩევნებში ჩაერთო, რომელიც რიგგარეშედ იმართება მას შემდეგ, რაც მასშტაბური საპროტესტო გამოსვლების ფონზე წინა ხელისუფლება დეკემბერში გადადგა.

არჩევნებში მანდატების მოსაპოვებლად კიდევ ცხრა პარტია იბრძვის.