პოლიტიკა

24 მარტს ცნობილი გახდა, რომ The Atlantic-ის მთავარმა რედაქტორმა ჯეფრი გოლდბერგმა მაიკ  უოლცისგან მიიღო მიწვევა Signal-ის დახურულ ჩატში, სადაც ამერიკელი მაღალჩინოსნები, მათ შორის თავდაცვის მინისტრი პიტ ჰეგსეთი, სახელმწიფო მდივანი მარკო რუბიო  და სხვები განიხილავდნენ იემენში მეამბოხე „ჰუსითების“ პოზიციებზე შეტევას. თავიდან ჟურნალისტს ეს ყველაფერი ხუმრობა ეგონა და ინფორმაცია სანდოდ არ მიიჩნია, თუმცა როდესაც „ჰუსიტებზე“ თავდასხმა ჩატში მითითებულ დროს დაემთხვა და ამ ყველაფრის  გამოქვეყნება გადაწყვიტა. თავად გოლდბერგმა განმარტა, რომ მან ჩატი მაშინვე დატოვა მას შემდეგ, რაც დარწმუნდა, რომ მიმოწერაში მართლაც განიხილავდნენ აშშ-ის ეროვნული უსაფრთხოების უზრუნველყოფის საკითხებს.

ბევრმა ჟურნალისტმა თუ ექსპერტმა ამ ამბავს Signalgate-ც კი უწოდა და ცნობილი Watergate-ის სკანდალს შეადარა. აღშფოთება სწორედ იმან გამოიწვია, რომ მიმოწერები კონფიდენციალურ სამხედრო ინფორმაციას შეიცავდა, რომელიც დაუცველ სოციალურ ქსელში განიხილებოდა. ასეთი საკითხები კი მხოლოდ დახურულ ოთახში უნდა განიხილებოდეს მობილური ტელეფონების გარეშე, რადგან ინფორმაცია გარეთ არ გავიდეს და მოწინააღმდეგის ხელში არ ჩავარდეს.  რამდენიმე დღეა ამერიკელი მაღალჩინოსნები კონგრესში გამოკითხვისას უარყოფენ, რომ მიმოწერა კონფიდენციალურ სამხედრო ინფორმაციას შეიცავდა.

„აშკარაა, რომ ვიღაცამ დიდი შეცდომა დაუშვა და ჟურნალისტი დაამატა. არაფერი მაქვს პირადად ჟურნალისტების საწინააღმდეგო, მაგრამ თქვენ იქ არ უნდა იყოთ. იქ არ იყო სადაზვერვო ინფორმაცია. და მესმის, როდესაც ეს ამბავი პირველად გავრცელდა, გარკვეულწილად მიანიშნებდნენ, რომ იქ საომარი რუკები იყო, მაგრამ საომარი გეგმები საერთოდ არ იყო. როგორ მოხვდა ჟურნალისტი იქ? რატომ იყო ეს შესაფერისი? მიმაჩნია, რომ იქნება რეფორმები და ცვლილებები, რათა ეს აღარასოდეს გამეორდეს. ეს შეუძლებელია“, – განაცხადა სახელმწიფო მდივანმა რუბიომ.

ამერიკის შეერთებული შტატების პრეზიდენტის მრჩეველმა ეროვნული უსაფრთხოების საკითხებში, მაიკ უოლცმა სრული პასუხისმგებლობა აიღო Signal-ის დახურულ „ჩატში“ The Atlantic-ის მთავარი რედაქტორის მოხვედრის გამო.

ასევე დაამატა, რომ არ იცის, როგორ აღმოჩნდა ჯეფრი გოლდბერგი „ჩატში“ და გასცა დაპირება, რომ ილონ მასკი ამ ყველაფერს ტრამპის ადმინისტრაციასთან ერთად გამოიძიებს. სწორედ ამიტომ, მედიაში გავრცელდა ინფორმაცია, რომ „ატლანტიკის“ რედაქტორის მოხვედრის საქმის დეტალების დადგენაში მთავრობის ეფექტიანობის დეპარტამენტი ჩაერთვება. ილონ მასკის გუნდი შეეცდება, დაადგინოს, როგორ აღმოჩნდა მესენჯერ „სიგნალის“ დახურულ ჩატში ამერიკული ჟურნალისტი და იყო თუ არა ჰაკერები ჩართული ამ საქმეში.

ოთხშაბათს ჟურნალმა The Atlantic-მა გამოაქვეყნა მიმოწერის სრული ტექსტი აშშ-ი პენტაგონის ხელმძღვანელსა და აშშ-ის ვიცე-პრეზიდენტს შორის. მიმოწერა შეიცავს, ისეთ მონაცემებს, როგორიცაა ამერიკის შეტევების დრო იემენელ  „ჰუსითებზე“ და ამ დარტყმებისთვის გამოყენებული თვითმფრინავების ტიპები, ასევე წინასწარი ინფორმაცია დარტყმების შედეგების შესახებ. გამოქვეყნებულ მასალაში ასევე მკაფიოდ ჩანს, რომ Atlantic-ის მთავარი რედაქტორი  ჯეფრი გოლდბერგი Signal-ის ჩატში ნამდვილად უოლცმა დაამატა.

Atlantic-ის პუბლიკაციაში აღნიშნულია, რომ გამოცემამ კორესპონდენციის გამოქვეყნება გადაწყვიტა, რადგან პრეზიდენტ დონალდ ტრამპის ადმინისტრაციამ არაერთხელ განაცხადა, რომ ის არ შეიცავს რაიმე საიდუმლო ინფორმაციას. მისი თქმით, ის ასევე  არ აპირებს გაავრცელოს ინფორმაცია ამ ჩატში ნახსენები სამომავლო სამხედრო ოპერაციების შესახებ.

მანამდე მან გამოაქვეყნა მხოლოდ ნაწყვეტები მიმოწერიდან, რომელიც წარმოდგენას იძლევა მისი ხასიათის შესახებ, მაგრამ აშკარად არ შეიცავდა რაიმე საიდუმლო ინფორმაციას.

თურქეთში რამდენიმე დღეა მასობრივი საპროტესტო აქციები მიმდინარეობს. ყველაფერი კი იქიდან დაიწყო, რომ თურქეთის პოლიციამ სტამბოლის მერი, ექრემ იმამოღლუ 19 მარტს, 07:30 საათისთვის, საკუთარ სახლში დააკავა. დაკავება საპრეზიდენტო კანდიდატის დასახელებამდე რამდენიმე დღით ადრე მოხდა. ერთი დღით ადრე, სტამბოლის უნივერსიტეტმა იმამოღლუს დიპლომი გაუუქმა, რითაც ფაქტობრივად პოპულარული ოპოზიციური ფიგურის საპრეზიდენტო არჩევნებიდან დისკვალიფიკაცია მოახდინა. როგორც თურქული მედია წერს, მთავარ ოპოზიციურ რესპუბლიკურ სახალხო პარტიას (CHP) იმამოღლუ საპრეზიდენტო კანდიდატად უნდა დაესახელებინა.

იმამოღლუს, რომელსაც თურქეთის პრეზიდენტის, რეჯეფ თაიფ ერდოღანის მთავარ მეტოქედ მიიჩნევენ, დაკავების შემდეგ ბრალი კორუფციაში ოფიციალურად წაუყენეს და წინასწარი პატიმრობა შეუფარდეს. პოლიტიკოსი ბრალდებას უარყოფს და მის დაპატიმრებას პოლიტიკურად მოტივირებულ გადაწყვეტილებად აფასებს.

ექრემ იმამოღლუმ მხარდამჭერებს პლატფორმა X-ზე გამოქვეყნებული განცხადებით მიმართა: „ჩემო დიადო ერო, არ იდარდოთ, არასოდეს დაკარგოთ იმედი. ერთად, ჩვენ ერთხელ და სამუდამოდ მოვიშორებთ ამ შავ ლაქას, ამ დარტყმას ჩვენს დემოკრატიაზე. ახლოვდება ის დღეები, როდესაც ამ ბნელი შეთქმულების ავტორები პასუხს აგებენ, ამ სამყაროშიც და ღმერთის წინაშეც. მოვუწოდებ ჩემს 86 მილიონ თანამოქალაქეს – მიდით საარჩევნო ყუთებთან და აჩვენეთ მსოფლიოს, ჩვენი ბრძოლა დემოკრატიისა და სამართლიანობისთვის“.

სწორედ ამ გარემოებების გამო ოპოზიციურმა „რესპუბლიკური სახალხო პარტიამ“ იმამოღლუს დაკავება პოლიტიკურად მოტივირებულად მიიჩნია და ქვეყნის სხვადასხვა ქალაქში მასშტაბური დემონსტრაციები დაიწყო. აქციის მონაწილეები მთავრობის გადადგომას ითხოვენ. რამდენიმე დღის მანძილზე სპეცრაზმმა მომიტინგეები წიწაკის სპრეი, ცრემლსადენი გაზი და წყლის ჭავლის გამოყენებით დაშალა.

პრეზიდენტმა რეჯეფ თაიფ ერდოღანმა საპროტესტო აქციები „ქუჩის ტერორად“ დაახასიათა და განაცხადა, რომ ხელისუფლება რესპუბლიკურ სახალხო პარტიას და მის მხარდამჭერებს საზოგადოებრივი წესრიგის დარღვევის უფლებას არ მისცემს.

25 მარტს,  თურქეთის შინაგან საქმეთა მინისტრმა განაცხადა, რომ საპროტესტო აქციების მიმდინარეობისას 1 133 ადამიანი დააკავეს. მათ შორის არიან ჟურნალისტები.

სტამბოლის სარაჩანეს რაიონში, მუნიციპალიტეტის შენობის წინ გამართულ დემონსტრაციაზე სიტყვით გამოსვლისას „რესპუბლიკური სახალხო პარტიის“ ლიდერმა, ოზგურ ოზელმა განაცხადა, რომ ისინი გააგრძელებენ საპროტესტო აქციებს იმამოღლუს გათავისუფლებამდე.

საქართველოს პრემიერ-მინისტრმა ირაკლი კობახიძემ სომეხ კოლეგას, ნიკოლ ფაშინიანს უმასპინძლა, რომელიც თბილისს საქართველო-სომხეთის საფეხბურთო ნაკრებების მატჩზე დასასწრებად ეწვია.

პირისპირ შეხვედრისას მხარეებმა კიდევ ერთხელ გაუსვეს ხაზი ორ ქვეყანას შორის არსებულ სტრატეგიულ პარტნიორობას და ორმხრივი ურთიერთობების განვითარების პოზიტიურ დინამიკას.

აღინიშნა როგორც ორმხრივ, ისე მრავალმხრივ ფორმატებში თანამშრომლობის განსაკუთრებული მნიშვნელობა და ერთობლივი ძალისხმევის როლი რეგიონში მშვიდობისა და სტაბილურობის უზრუნველყოფაში.

ირაკლი კობახიძე და ნიკოლ ფაშინიანი დღეს საქართველოსა და სომხეთის ეროვნული ნაკრებების მატჩს დაესწრებიან. ერთა ლიგის პლეიოფის მეორე შეხვედრა „დინამო არენაზე“ გაიმართება.

ინფორმაციას საქართველოს მთავრობა ავრცელებს.