თბილისის მერმა, კახა კალაძემ შპს „თბილსერვის ჯგუფის“ ახალი სპეცმანქანების პრეზენტაცია გამართა. ევროპული სტანდარტების სპეცტექნიკა, რომელიც მუნიციპალიტეტმა „ევროპის რეკონსტრუქციისა და განვითარების ბანკის“ ფინანსური მხარდაჭერით, სასესხო შეთანხმების ფარგლებში შეისყიდა, აღჭურვილია სპეციალური დანადგარებით და გამოიყენება სხვადასხვა მუნიციპალური სერვისისთვის – დასუფთავებისთვის, ნარჩენების შეგროვებისა და პოლიგონზე განთავსებისთვის, სანიაღვრე ქსელებისა და გარე განათების გამართულობისთვის.

„მინდა, გავიხსენო 2017 წელი, როდესაც საარჩევნო კამპანიას ვატარებდით. ის შედგებოდა შვიდი ძირითადი მიმართულებისგან. ერთ-ერთი მთავარი იყო გარემოს დაცვა, ეკოლოგიაზე ზრუნვა. ამ მიმართულებით სერიოზული პრობლემები არსებობდა. გვახსოვს წლები, როდესაც რეკრეაციული სივრცეების, სპორტული მოედნების გასხვისება ხდებოდა და გარკვეული სახის მშენებლობა ხორციელდებოდა. მას შემდეგ, რაც დედაქალაქის მოსახლეობის უმრავლესობამ მხარი დაგვიჭირა, პოლიტიკა და მიდგომები შეიცვალა. დღეს ყველაზე მნიშვნელოვანი კომპონენტი გახლავთ ზრუნვა გარემოზე, ეკოლოგიური მდგომარეობის გამოსწორება. რა თქმა უნდა, განსაკუთრებული ყურადღება ეთმობა რეკრეაციულ სივრცეებს. მოგვიწია ბევრი გასხვისებული არეალის გამოსყიდვა და იქ, მშენებლობის ნაცვლად, პარკები და სკვერები გაკეთდა. ასევე, დავიბრუნეთ გასხვისებული სტადიონები, რომლებიც დღეს ჩვენს პატარებს ემსახურება, რათა ხელი შევუწყოთ ჯანსაღი ცხოვრების წესის განვითარებას“, – განაცხადა კახა კალაძემ.

დედაქალაქის მერმა ხაზი გაუსვა ეკოლოგიის გაუმჯობესებასა და მყარი ნარჩენების მართვაში სპეცტექნიკის მნიშვნელობას. მანვე მადლობა გადაუხადა მუნიციპალიტეტის თანამშრომლებს და „ევროპის რეკონსტრუქციისა და განვითარების ბანკს“ მიღწეული შედეგისთვის.

„ჩვენ როდესაც ვსაუბრობთ ეკოლოგიური მდგომარეობის გაუმჯობესებაზე, შესაბამისი ტექნიკის გარეშე შეუძლებელია ამ ყველაფერზე ზრუნვა და კონკრეტული ნაბიჯების გადადგმა. მადლობას ვუხდი „თბილსერვის ჯგუფის“ ხელმძღვანელს, თითოეულ თანამშრომელს. ეს ადამიანები ყოველდღიურად ზრუნავენ ქალაქის სისუფთავეზე. ყოველდღიურად ზრუნავენ, რომ ქალაქი იყოს განათებული, მოწესრიგებული. მადლობა დედაქალაქის მერიის თითოეულ თანამშრომელს. მინდა, ასევე, ვისარგებლო შემთხვევით და მადლობა გადავუხადო საერთაშორისო საფინანსო ორგანიზაციას „ევროპის რეკონსტრუქციისა და განვითარების ბანკს“ (EBRD) დახმარებისთვის. მათი ფინანსური მხარდაჭერით შევძელით აღნიშნული პროექტის განხორციელება.

შევიძინეთ 65 ერთეული სპეცტექნიკა. 52 უკვე ადგილზეა. აქ არის სხვადასხვა სახის მანქანები, რომლებიც მნიშვნელოვანია, რათა ჩვენი ქუჩები იყოს სუფთა, ნარჩენების დროული, უსაფრთხო და უპრობლემო გატანა მოხდეს დედაქალაქიდან. ეს ყველაფერი ხელს შეუწყობს, რომ „თბილსერვის ჯგუფი“ მუშაობდეს ძალიან კარგად, შეფერხებების გარეშე. რა თქმა უნდა, სასიხარულოა, როდესაც ასეთი მნიშვნელოვანი შენაძენი გვაქვს, რადგან ეს პირდაპირ აისახება დედაქალაქზე, ამ ქალაქში მცხოვრებლებზე. ჩვენთვის მნიშვნელოვანია მოწესრიგებული გარემო, ეკოლოგიაზე კიდევ უფრო ზრუნვა, რეკრეაციული სივრცეების მოწესრიგება და ახლების გაკეთება. ჩვენ გვაქვს კონკრეტული ხედვა. მართალია, უკვე არაერთი მსგავსი პროექტი განვახორციელეთ, მაგრამ მხოლოდ ამაზე არ ვჩერდებით და სამომავლოდ ბევრი საინტერესო პროექტის განხორციელება გვაქვს დაგეგმილი. წარმატებებს ვუსურვებ ჩემს ქალაქს, აქ მცხოვრებ ადამიანებს და ყველას, ვისაც ქალაქის განვითარება, წინსვლა და აღმშენებლობა უხარია“, – აღნიშნა თბილისის მერმა.

მიმართვის შემდეგ, კახა კალაძემ, მერის მოადგილესთან, ანდრია ბასილაიასთან, თბილისის საკრებულოს თავმჯდომარესთან, გიორგი ტყემალაძესა და „თბილსერვის ჯგუფის“ ხელმძღვანელთან, დავით ფაჩულიასთან ერთად სპეცტექნიკა დაათვალიერა.

„ევროპის რეკონსტრუქციისა და განვითარების ბანკის“ ფინანსური მხარდაჭერით შესყიდული სპეტექნიკის ნაწილი დედაქალაქს წლის ბოლომდე, ეტაპობრივად მიეწოდება. 65 ერთეული სპეცმანქანის ღირებულება დღგ-ის გარეშე 9 564 750 ევროს შეადგენს (დღგ-ის ჩათვლით – 11 286 405 ევრო). შესყიდულია სხვადასხვა ტიპისა და მოცულობის ნარჩენების შემგროვებელი სატვირთოები, ქუჩის მექანიკური მხვეტავი მანქანები, ევაკუატორი, ღია სატვირთო ავტომობილი ჰიდრავლიკური ამწით, სატვირთოები ტელესკოპური ამწე კალათით, ასევე, სხვადასხვა ზომის სატვირთო მანქანები თვითმცლელით, სანიაღვრე ქსელების წნევით გასარეცხი კომბინირებული სპეცმანქანები, ასფალტის გადამზიდი სატვირთო, ნარჩენების სატკეპნი კომპაქტორი და სხვა. ევროპული კომპანიების, „ივეკოსა“ და „დულევოს“ მიერ წარმოებული სპეცმანქანები აწყობილია იტალიაში, ესპანეთსა და თურქეთში, ერთი კომპაქტორი კი ფინური კომპანიის, „ტანას“ წარმოებისაა.

გარდა ამისა, დედაქალაქის, კერძოდ, „თბილსერვის ჯგუფის“ ბიუჯეტითაც ხორციელდება სპეცტექნიკის შესყიდვა. 2024 წელს შემოყვანილია 24 ერთეული ახალი სპეცმანქანა, რაც უკვე ემსახურება ქალაქს. ახლო მომავალში, ასევე, შემოვა 15 ერთეული, ხოლო წლის ბოლომდე მუნიციპალიტეტი ნარჩენების შემგროვებელ კიდევ 10 მანქანას შეიძენს.

შინაგან საქმეთა სამინისტროს აჭარის პოლიციის დეპარტამენტის თანამშრომლებმა, ცხელ კვალზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, 1995 წელს დაბადებული, წარსულში ნასამართლევი რ.ც. განზრახ მკვლელობის ბრალდებით დააკავეს.
დანაშაული 15 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ ბრალდებულმა, ბათუმში, ურთიერთშელაპარაკებისას, 1997 წელს დაბადებული ა.წ. დანის გამოყენებით დაჭრა და შემთხვევის ადგილიდან მიიმალა. დაჭრილი მამაკაცი სამედიცინო დაწესებულებაში მიყვანამდე გარდაიცვალა.
პოლიციამ რ.ც. ცხელ კვალზე, ბრალდებულის სახით დააკავა.
განზრახ მკვლელობის ფაქტზე გამოძიება სისხლის სამართლის კოდექსის 108-ე მუხლით მიმდინარეობს.

2023 წლის 14 დეკემბერს, როცა საქართველომ ევროკავშირის წევრობის კანდიდატის სტატუსი მიიღო, დეპუტატ ხათუნა სამნიძეს თითქმის ორთვიანი სამედიცინო კვლევების შემდეგ სიმსივნე აღმოაჩნდა, სიმსივნე, რომელიც უკვე შორს იყო წასული და სასწრაფოდ საჭიროებდა ჯერ ქირურგიულ ჩარევას, შემდეგ კი მკურნალობას.

ხათუნა სამნიძე რადიო თავისუფლებასთან ინტერვიუში გულახდილად ჰყვება საკუთარი დაავადების შესახებ, რამდენიმე თვიანი ინტენსიური მკურნალობის შემდეგ იგი ამბობს, რომ ის უკვე გამოჯანმრთელდა და სურს სხვა ონკოპაციენტებისთვის იმუშაოს უკეთესი სამედიცინო სისტემის შექმნაზე და იყოს მათთვის მოტივაციის წყარო. 

ხათუნა სამნიძე რადიო თავისუფლებასთან აღნიშნავს, რომ ჯანმრთელობის პრობლემებზე აუცილებელია ხანდახან საჯაროდაც ვისაუბროთ, რადგან ჯანდაცვა არის პოლიტიკა. 

"მე თვითონ შევეჯახე ამ პროცესს, უდიდესი მნიშვნელობა აქვს ჯანდაცვის პოლიტიკას, იმისთვის, რომ პაციენტზე იყოს ორიენტირებული".

პირველი ეჭვი მძიმე სენის შესახებ 

"მე ძალიან ჯანმრთელ ცხოვრების წესს მივსდევდი, განსაკუთრებით ბოლო წლებში: კვება, ვარჯიში. ძალიან ჯანმრთელად ვგრძნობდი თავს. დღეში 20 კილომეტრს დავდიოდი, არანაირი პრობლემა არ მქონდა, პოლიტიკურადაც აქტიური ვიყავი. ამ დროს სრულიად შემთხვევით დამისვეს ასეთი დიაგნოზი. ეს იმდენად მოულოდნელი და შოკისმომგვრელი იყო, რომ თავიდან ეჭვი რომ გაჩნდა მე არ დავიჯერე და გავაგრძელე ჩვეულებრივად ცხოვრება. მინდა ქალებს ვუთხრა, რომ არ დაიზარონ არასდროს და ყოველ 6 თვეში შეემოწმონ, რაც არ უნდა კარგად გრძნობდნენ თავს, იმიტომ, რომ ჩემს დაავადებას "ჩუმ მკვლელს" - ეძახიან. ჩუმი მკვლელია, რომელსაც ბოლო სტადიამდე ვერ გრძნობს ქალი. 

ეს დაავადება დამიდასტურეს მაშინ, როდესაც ჩვენმა ქვეყანამ კანდიდატის სტატუსი მიიღო. მანამდე იყო ეჭვი, ამ ეჭვს ერთი წამითაც არ გავუჩერებივარ. ოქტომბერში, ბათუმში ვიყავი და ვიბანავე, მეგონა, რომ გავცივდი. წელიწადში ორჯერ დავდივარ ყოველთვის ექიმთან, ჩემი დაბადებისდღის წინ, ტრადიციად მაქვს, ამ შემთხვევაში დროზე ადრე მივედი. მე ასევე დედა გარდამეცვალა, ისიც ონკოპაციენტი იყო, მისი ბრძოლა მაქვს ნანახი, მაგრამ მაინც საშინლად დასრულდა, სულ ვიძახდი ხოლმე ამის შემდეგ, რომ მე თუ დამემართა აზრი არ ჰქონდა არაფერს. 

ექიმმა მითხრა, რომ არ ვიყავი გაციებული და მირჩია, რომ სხვანაირადაც შევმოწმებულიყავი, ონკომარკერზე გამიშვა, ამას სხვადასხვა ეჭვის გარეშე არ იტარებენ. მარკერი იყო მაღალი, მაგრამ სერიოზულად არ მიმიღია, ჩავთვალე, რომ ანთებითი პროცესები იყო. გამიშვა ექოზე და მანაც არაფერი არ აჩვენა, ამიტომ ეძახიან მას ჩუმ მკვლელს, რადგან არაფერი ჩანდა გავიკეთე კომპიუტერიული ტომოგრაფია. 

ეს არის საკმაოდ ძვირი ჩვენს ქვეყანაში, მე დაზღვევა მქონდა, პარლამენტის წევრი ვარ და ამან ხელი შემიწყო, მაგრამ სხვა ადამიანებს, როცა აქვთ ეჭვი შეიძლება ეს პროცედურა არ ჩაიტაროს. თუმცა არც კომპიუტერულმა ტომოგრაფიამ აჩვენა ბოლომდე, ეჭვის დონეზე ეწერა. ეს იყო მეოთხე სტადიაში გადასული, რომელიც არ ჩანდა ასე კარგად".

დადასტურებული დიაგნოზი და სიკვდილთან თვალის გასწორება

"ამის შემდგომ წავედი პროფესიონალ ქირურგთან, რომელმაც ამ ყველაფერს გადახედა და მთხოვა, რომ გაგვეკეთებინა ლაპარასკოპია, რაც არის პატარა ოპერაციული ჩარევა, მიკროსკოპით შემოწმება, თუ რა ხდება. მე ძალიან ვიუარე, რადგან ბოლომდე არაფერი იყო დადასტურებული. პირველი ეჭვი იყო ჩემს დაბადების დღეზე, ტორტი ჩავაქრე სამსახურში და მოვიდა მესიჯი.

მოკლედ, დავუჯერე ქირურგს და გავიკეთე ლაპარასკოპია, როდესაც გავიღვიძე, დღესაც მახსოვს ეს კოშმარი, ექიმმა მითხრა, რომ ეს ის იყო რაზეც ეჭვი გვქონდა. ძალიან განვიცადე. მაგ დღეს მარტო დამტოვეს პალატაში ამ ინფორმაციასთან, მეორე დღეს უნდა გავეწერე. ეს იყო უმძიმესი ღამე ჩემს ცხოვრებაში, ყველაფერი წინ დამიდგა, რაც დედამ გადაიტანა. ქირურგი იცნობდა დედაჩემს და მითხრა, რომ შემეწყვიტა დედაზე ფიქრი, რაგდან ეს სულ სხვა ვითარება იყო. არ მახსოვდა ვინ რას მეუბნებოდა. იმ დღეს ყველა მატყუებდა, ვიცოდი, რომ მქონდა პირველი სტადია, რადგან ძალიან ემოციურად ვიყავი. 

დავრჩი მარტო და ხმამაღლა ვტიროდი მთელი ღამე. სიკვდილზე ფიქრობ ამ დროს, რომ შენი ცხოვრება შემოისაზღვრა. 

რეალურად მთელი თვე იყო ეჭვი, რომელსაც თვალებში არ ვუყურებდი. საბოლოო დიაგნოზი სწორედ დაემთხვა იმ დღეს, როდესაც სტატუსი მივიღეთ. ჩემი თავი, რომ გამოვიტირე შემდეგ მოვიდა უდიდესი სიხარული ჩვენი ქვეყნის ევროპული სტატუსის შესახებ. შამპანურით ხელში მივედი პარლამენტში და ბრიფინგი ჩავატარეთ გოგოებმა. ჩემს შესახებ არავინ არ იცოდა.

ექიმმა შემაპარა საბოლოოდ, რომ ეს იყო მესამე სტადია და სასწრაფოდ უნდა ჩაგვეტარებინა ოპერაცია. ახალ წელს გავიკეთე ოპერაცია. 

პირველად ვუთხარი უახლოეს მეგობრებს და ჩემს და-ძმას, რომლებიც ჩემსავით სკეპტიკურად იყვნენ განწყობილნი, რომ არაფერი არ იქნებაო, რომ მოვიდა მესიჯი ყველაფერი სერიოზულად ყოფილაო- ეს იყო ჩემი ძმის რეაქცია. გამოიქცა ბათუმიდან და იმის შემდეგ არ მომშორებია გვერდიდან. ბოლოს ვუთხარი ჩემს შვილს".

პოსტოპერაციული მომზადება და ოპერაციის შედეგები

ოპერაციის წინ, როდესაც ქირურგმა ამიხსნა სირთულე ოპერაციის, რომელიც ძალიან რადიკალური იყო. მან გამაფრთხილად, რომ შენ ფიზიკურად მზად ხარ, მაგრამ აქ არის მთავარი პრობლემა, მთავარი შოკი ტვინისთვის, რომ ამხელა რაღაც უნდა გადაიტანო. გამაფრთხილა, მელაპარაკა ამაზე. 

ოპერაციამ კარგად ჩაიარა, დიდხანს ვიყავი კლინიკაში. ახალ წელს და შობას იქ შევხვდი. ჩემი მეგობრები მორიგეობით ჩემთან იყვენენ. როდესაც უკვე ფეხზე წამოვდექი, დაიწყო გაუარესება ჩემი მდგომარეობის.

მკურნალობის დაწყების რთული ეტაპი 

მე ვგეგმავდი აქ მკურნალობას, არ მინდოდა ჩემი დის შეწუხება, რომელიც ამერიკაშია, დედა იქ გარდაიცვალა და მე იგივე ტრავმას ვერ მივაყენებდი. არ წავიდოდი იქ, სადაც ვსწავლობდი და იყვნენ ჩემი მეგობრები, რადგან ეს არის ძალიან სერიოზული ამბავი, ასეთი დაავადებით არავის ცხოვრებაში არ უნდა შეიჭრა. თურქეთზე იყო საუბარი და არ დავთანხმდი, ენა უნდა მესმოდეს სადაც ვიქნები-მეთქი - პრინციპული საკითხი იყო. ამიტომ გადავწყვიტე დავრჩენილიყავი აქ. 

გაუარესდა ვითარება, როდესაც რამოდენიმე ექიმმა შეკითხვებით დაიწყო საუბარი, ამ ყველაფერმა ჩემს ფსიქიკაზე ძალიან იმოქმედა. სიცხეები მქონდა და ვერსიების ჩამოთვლა დაიწყო. ინფექცია, რომელიც ოპერაციის შემდეგ შეიძლებოდა ყოფილიყო, ანთება, ბევრ ვერსიას განიხილავდნენ. კიდევ ერთხელ დამაწვინეს კლინიკაში, ემოციურად ისე იმოქმედა, რომ მე უკვე წინააღმდეგობა გავუწიე, რომ არ დავწვებოდი. მაშინ უნდა მცოდნოდა რას აკეთებდნენ, მიხსნიდნენ, მაგრამ მაინც მეშინოდა. უნდა წავსულიყავი სხვა კლინიკაში ანალიზებზე, პაციენტი, რომელიც ვერ დადის რატომ უნდა წავიდეს სხვა კლინიკაში არ მესმის, იქ რატო არ უნდა იყოს ყველაფერი. არცერთ ექიმს არ ვაბრალებ ამას, მესმის, რომ ეს ასეთი პოლიტიკაა. ყველგან იყო ეჭვი. 

მკურნალობის გაგრძელება სხვა ქვეყანაში და ფინანსური პრობლემები 

ჩემმა მეგობრება გადაწყვიტეს და უკვე ნათესავებიც ჩაერივნენ, რომ უნდა წავსულიყავი სხვა ქვეყანაში. დავთნხმდი მეც, იმიტომ, რომ ღამის 12 საათზე მივდიოდი ერთ კლინიკაში გადასხმაზე, შემდეგ დილით და ამას არ მოჰქონდა შედეგი. უფრო უარესად ვხვდებოდი. მე ძალიან განვიცდიდი, სხვისი შეწუხება არ მინდოდა. საბოლოოდ, როგორც კი დამრთეს ნება რომ მგზავრობა შეიძლებოდა, ძმამ წამიყვანა, მან გვერდზე გადადო ყველაფერი და თავიდან ბოლომდე იყო ჩემთან. 

საზღვარგარეთ მკურნალობა ძალიან ძვირია. რამდენიმე ადამიანია ჩემს ცხოვრებაში, ურთულეს პერიოდში, რომელებიც გამორჩეულად მედგნენ გვერდში. მთავარი პერსონები არიან ვინც გადამარჩინა. ფინანსურად ძალიან დამიდგნენ მხარში, იყო ერთ-ერთი მთავარი ვინც მითხრა, რომ აგერ ვარ. არ იყო ჯერ შეგროვებული თანხა, მაგრამ გამგზავრებისთვის სასწრაფოდ შეგროვდა. ყოველ დღეს ჰქონდა მნიშვნელობა, რადგან ქიმიას აქ ვერ მიწყებდნენ. 

ძალიან განვიცდიდი, რომ მივდიოდი, რადგან პარლამენტის წევრი ვარ და სხვა ქვეყანაში მიწევდა ამ ყველაფრის გაკეთება. გულწრფელად დიდხანს არც ვჩანდი და ვამბობდი, რომ წასული ვიყავი, დამნაშავის შეგრძნება მქონდა. 

როდესაც იქ ჩავედი და გავიცანი პაციენტები, რაღაცნაირი გარემო იყო, გადასხმაზე, რომ ვიჯექი, თითქოს ცოცხალი იყო ყველა. პირველი, რაც მკითხა ერთ-ერთმა ექიმმა, შენ სიკვდილზე ფიქრობო - კი-მეთქი და შეწყვიტეო მითხრა, რადგან გამოგაჯანმრთელებთო. 

ყველამ ვიცით, რომ სიკვდილი გარდაუვალია, მაგრამ ამაზე არ ვფიქრობთ, ამ დაავადების დროს ისეთი განცდა გაქვს, რომ შენი ცხოვრება შემოსაზღვრულია. 

იქ მკურნალობის დროს, მიდგომა ასეთი იყო, რომ ეს იყო ჩვეულებრივი ქრონიკული დაავადება და უბრალოდ იბრძვი, იქ არ ხარ იმიტომ, რომ იმკურნალო და წახვიდე, სანამ მკურნალობ მაშინაც ცხოვრობ. ეს განცდა არ მქონდა საქართველოში. 

მკურნალობის პრობლემები საქართველოში 

როდესაც ფეხზე დავდექი მყარად, ვთხოვე, რომ მინდოდა საქართველოში დაბრუნება და მითხრეს, რომ უსაფრთხო იყო ჩემი წამოსვლა. ბევრი ლაპარაკობს ამაზე და მე არ ვარ პირველი, რომ ჩვენთან წამლების ხარისხი არ არის ისეთი, როგორიც უნდა იყოს. გვიან შემოდის, ხარისხზეც ეჭვებია, კორუფციაზეც... ამაზე უნდა ვიმუშავო და დავეხმარო ონკოპაციენტებს. 

წამოვედი და წამლები გამომატანეს. ბოლო სამი ქიმია აქ უნდა გამეკეთებინა. ავარჩიე ექიმი, ჩვენთან მიდგომა ასეთია, რომ ყველაზე ცნობილი ონკოლოგი უნდა აარჩიო, ყველაზე მაგარი და სახელგანთქმული ვინც არი, რომლების სფეციპიკაც ის არის, რომ ერთხელ გნახავენ, სქემას შეგიდგენენ და არასდროს აღარ გნახულობენ. მერე გხვდება მათი თანაშემწე და დგახარ საათობით რიგში, ეს მოვისმინე უამრავი ონკოპაციენტისგან და ძალიან გაბრაზებული ვარ. საზღვარგარეთ არცერთ შემოწმება არ ყოფილა ჩემი მკურნალი ექიმის გარეშე. აქ ეს ასე არ ხდება. 

ამიტომ, რომ ჩამოვედი ვინც ჩემმა ქირურგმა მირჩია, იმ ექიმის პაციენტი ვარ დღემდე. ძალიან ყურადღებიანი ადამიანია. როდესაც სხვა კლინიკაში მივედი დარჩენილი სამი გადასხმის გასაკეთებლად, დამოკიდებულება ვიგრძენი ძალიან უხეში. აქ ვიგრძენი, რომ ონკოპაციენტი გადადებულები არიან. მთლიან კლინიკაში იყო ეს გარემო. ეს მათი ბრალი არ არის, ასეთი აღქმაა ქვეყანაში, დაბალი ხელფასები, რამდენიმე ადგილას მუშაობენ ეს ექიმები, ეს არ არის მათი ბრალი, ეს არის სისტების, რადგან მათ არ აქვთ იმდენი დრო, რომ პაციენტებზე იყვნენ ორიენტირებულები. ეს არის შესაცვლელი. 

რწმენა და განწყობა ძალიან მნიშვნელოვანია, მე აქ ჩამოვედი, სამსახურში გავედი, ბედნიერი ვარ, რომ მუშაობა ისევ შემიძლია. პარლამენტში, რომ შევედი ეს იყო სასწაული განცდა. 

მომავლის გეგმები 

ყველა ვერსიას განვიხილავდი, დამენებებინა ყველაფრისთვის თავი და სხვაგან გადავსულიყავი. ბოლოს მივედი დასკვნამდე, რომ არა, ჯანდაცვა არის პოლიტიკა და აქ უნდა ვცადო ამ თემატიკის წამოწევა წინასაარჩევნო პერიოდში, თუ მოვხვდები პარლამენტში შემდეგ მოწვევაში, იქ უკვე ამ თემების საკუთარი გამოცდილებით შევეჭიდები. ექიმებმა კარგად იციან, რომ პრობლემებია ამ მხრივ, რადგან თავად არიან ნაწილი ამ ყველაფრის, ამიტომ მგონია, რომ იმ ექიმებისთვისაც ძალიან მნიშვნელოვანი იქნება, რომ ეს საკითხი პოლიტიკაში გააქტიურდეს. ჩემი მთავარი თემა იქნება ჯანდაცვა, არამგონია გადავუხვიო, მითუმეტეს მაშინ როდესაც ვხედავ რამხელა იმედი გაუჩნდათ ჩემნაირ პაციენტებს. ყველასთვის მინდა ვიყო ხმა პარლამენტში, მინდა, რომ ამ თემების გაჟღერების და შედეგამდე მიყვანის იმედი გავაჩინო და შევძლო მიზნის შესრულებაც. 

მომზადებულია რადიო თავისუფლების ინტერვიუს მიხედვით

გამოძიების ფედერალური სამსახური (FBI) ავრცელებს ინფორმაციას ამერიკის შეერთებული სტატების ყოფილი პრეზიდენტის და კვლავ პრეზიდენტობის სავარაუდო კანდიდატის, დონალდ ტრამპზე თავდამსხმელის ვინაობის შესახებ. დნმ-ის ტესტის საფუძველზე დადგენილი კვლევის მიხედვით, შეიარაღებული კაცი, რომელიც პენსილვანიის შტატის ქალაქ ბატლერში ამომრჩეველთან შეხვედრისას დაესხა თავს ტრამპს, 20 წლის ტომას მეთიუ კრუქსია და შემთხვევის ადგილიდან დაახლოებით 70 კილომეტრით დაშორებულ დასახლებაში ცხოვრობდა. ის აშშ-ს საიდუმლო სამსახურის თანამშრომლებმა მოკლეს მას შემდეგ, რაც ტრამპის მისამართით ცეცხლსასროლი იარაღიდან ისროლა. გამოძიება გრძელდება.

ჯერჯერობით უცნობია თავდასხმაში ეჭვმიტანილის პოლიტიკური იდეოლოგია. რეგისტრაციის მიხედვით, კრუქსი რესპუბლიკელების ამომრჩევლად იყო დარეგისტრირებული, თუმცა ფედერალური კამპანიის ანგარიშების მიხედვით ირკვევა რომ მან 2021 წლის 20 იანვარს 15 დოლარი პროგრესული პოლიტიკური ქმედების კომიტეტს გადაურიცხა.

შემთხვევის შედეგად დაჭრილია კიდევ ორი მოქალაქე და დაჭრილია თავად ტრამპი, რომელსაც სამედიცინო დახმარება გაუწიეს და უსაფრთხო ადგილას გადაიყვანეს. გავრცელებულ ფოტოებში ჩანს, რომ ტრამპი სახის არეში მსუბუქად დაიჭრა.

ტრამპი - რომელსაც რესპუბლიკური პარტია დიდი ალბათობით პრეზიდენტობის კანდიდატად დაასახელებს 2024 წლის არჩევნებზე - ხალხს აჩვენებდა საზღვარზე გადასვლის მონაცემებს, როცა გაისმა როგორც ჩანს სროლის ხმა.

ტრამპზე თავდასხმას ეხმაურებიან აშშ-ს მოქმედი და ყოფილი პრეზიდენტები. პრეზიდენტმა ჯო ბაიდენმა მადლიერება გამოხატა ტრამპის გადარჩენის გამო, თქვა რომ მისთვის და მისი ოჯახისთვის ლოცულობს და დაგმო ძალადობა.

"ეს მომენტი უნდა გამოვიყენოთ იმისთვის, რომ ყველას შევახსენოთ, პოლიტიკაში საჭიროა მეტი ცივილურობა და პატივისცემა ადამიანების მიმართ" - შემთხვევიდან მალევე დაწერა ყოფილმა პრეზიდენტმა, ბარაკ ობამამ სოციალურ ქსელ X-ზე. ამ ქსელის მფლობელმა, ელონ მასკმა ამავე გამოხმაურების ქვემოთ დაწერა, რომ ის უფრო მალე გამოეხმაურა ტრამპზე თავდასხმას, ვიდრე მოქმედი პრეზიდენტი.

"ძალადობას აშშ-ში ადგილი არ აქვს, განსაკუთრებით ჩვენს პოლიტიკურ პროცესში, მე და ჰილარი მადლობელი ვართ, რომ პრეზიდენტი ტრამპი უსაფრთხოდ არის," - ეს ყოფილი პრეზიდენტის, ბილ კლინტონის გამოხმაურებაა მომხდარზე.

წყარო: რადიო თავისუფლება 

აშშ-ის ყოფილ პრეზიდენტზე, დონალდ ტრამპზე თავდასხმას საქართველოს პრემიერ-მინისტრი ირაკლი კობახიძე სოციალურ ქსელ „ფეისბუქში“ ეხმაურება.

„„გლობალური ომის პარტია“ მეთოდებს არ ცვლის. XXI საუკუნეში ლიბერალური ფაშიზმი, რადიკალიზმი, პოლარიზაცია, სიძულვილი და პოლიტიკოსებზე სისხლიანი თავდასხმები ამერიკაში თუ ევროპაში ჩვეულებრივ მოვლენად აქციეს. სოლიდარობას ვუცხადებ და ჯანმრთელობას ვუსურვებ დონალდ ტრამპს“, – აღნიშნულია განცხადებაში.

ცნობისთვის, ქალაქ ბატლერში მხარდამჭერებთან შეხვედრისას აშშ-ის ყოფილ პრეზიდენტს, დონალდ ტრამპს ესროლეს. შედეგად ის დაიჭრა, თუმცა მის სიცოცხლეს საფრთხე არ ემუქრება. სროლის დროს დაიღუპა მიტინგის ერთი მონაწილე. კიდევ ორი მძიმე მდგომარეობაშია. აშშ-ის ფედერალური საგამოძიებო სამსახურის ცნობით, პენსილვანიაში მომხდარი დონალდ ტრამპის მკვლელობის მცდელობა იყო. ამასთან, საგამოძიებო სამსახურში განაცხადეს, რომ ტრამპზე თავდახმაში მონაწილე პირი 20 წლის თომას მეთიუ კრუკსია.

ღრმად შოკირებული ვარ აშშ-ის ყოფილი პრეზიდენტის, დონალდ ტრამპის წინააღმდეგ განხორციელებული თავდასხმით, - ამის შესახებ პრემიერ-მინისტრი ირაკლი კობახიძე სოციალურ ქსელ X-ზე წერს.

„ძალადობას პოლიტიკაში ადგილი არ აქვს და ჩვენ მის ყველანაირ ფორმას ვგმობთ. პრეზიდენტ ტრამპს ვუსურვებ სწრაფ და სრულ გამოჯანმრთელებას. ჩემი ფიქრები ახლა მისი და მისი ოჯახის გვერდითაა. ჩვენ ვდგავართ ამერიკელ ხალხთან ერთად“, - წერს ირაკლი კობახიძე.

პენსილვანიაში, სადაც დონალდ ტრამპი მხარდამჭერებთან შეხვედრას მართავდა და მათ სიტყვით მიმართავდა, სროლა იყო.

დონალდ ტრამპის თქმით, ტყვიამ მას მარჯვენა ყურის ზედა ნაწილი გაუხვრიტა.

აშშ-ის გამოძიების ფედერალური ბიურო (FBI) აცხადებს, რომ სროლა, რომელიც აშშ-ის ყოფილი პრეზიდენტის, დონალდ ტრამპის მიტინგზე მოხდა, ყოფილი პრეზიდენტის მკვლელობის მცდელობა იყო.

აშშ-ის გამოძიების ფედერალურმა ბიურომ (FBI) დონალდ ტრამპის მიტინგზე მსროლელის ვინაობა დაასახელა.

„გამოძიების ფედერალურმა ბიურომ გამოავლინა თომას მეთიუ კრუკსი [20 წლის], როგორც სუბიექტი, რომელიც მონაწილეობდა ყოფილი პრეზიდენტის, დონალდ ტრამპის მკვლელობის მცდელობაში. მომხდარი რჩება აქტიურ და მიმდინარე გამოძიებად“, - განაცხადეს უწყებაში.

პირველი რესპუბლიკის მოედანზე, 15 ივლისს დაგეგმილი ღონისძიების გამო, ტერიტორიაზე ტრანსპორტის მოძრაობა რამდენიმე საათით შეიზღუდება - ინფორმაციას თბილისის მერია ავრცელებს და წერს, რომ შეზღუდა რუსთაველის გამზირისა და რესპუბლიკის მოედნის კვეთიდან რესპუბლიკის მოედნისა და მერაბ კოსტავას ქუჩის კვეთამდე არსებულ საგზაო მონაკვეთში, 15 ივლისის, 01:00-დან 12:00 საათამდე იმოქმედებს.

„დროის აღნიშნულ მონაკვეთში რუსთაველის გამზირიდან კოსტავას ქუჩის მიმართულებით მოძრავი ავტომობილები გადაადგილებას შეძლებენ მხოლოდ მიხეილ ჯავახიშვილისა და კოსტავასა ქუჩების მიმართულებით. ჯავახიშვილის ქუჩიდან მოძრავი ავტომობილები თბილისის სახელმწიფო საკონცერტო დარბაზის მიმართულებით გადაადგილდებიან, კოსტავას ქუჩიდან კი მოძრაობას შეძლებენ მხოლოდ რუსთაველის გამზირისა და თავისუფლების მოედნის მიმართულებით.

რაც შეეხება საზოგადოებრივ ტრანსპორტს, N359 ავტობუსი ჯავახიშვილის ქუჩის საშუალებით დაუკავშირდება კოსტავას ქუჩას და მოძრაობას დადგენილი სქემით გააგრძელებს, ხოლო მიკროავტობუსი N457 ჯავახიშვილის ქუჩიდან გადაადგილდება რევაზ თაბუკაშვილის ქუჩაზე, ლაღიძის ქუჩით მოხვდება რუსთაველის გამზირზე, მოუხვევს ზეთისხილის ხესთან, საიდანაც უკვე არსებული მარშრუტით იმოძრავებს.

თბილისის მერია ბოდიშს გიხდით შექმნილი დისკომფორტის გამო!“, - ნათქვამია განცხადებაში.

მიხარია, რომ ვარ თუშეთში, სადაც აღვნიშნავთ „მთის დღეებს“, „თუშეთობას“, - ამის შესახებ საქართველოს პრემიერ-მინისტრმა ირაკლი კობახიძემ თუშეთში განაცხადა, სადაც „მთის დღეები 2024“-ის ფარგლებში გამართულ ღონისძიებებს დაესწრო.

მთავრობის მეთაურმა ადგილობრივ მოსახლეობას ფესტივალის გახსნა და „თუშეთობა“ მიულოცა.

„მიხარია, რომ ვარ თუშეთში, სადაც აღვნიშნავთ „მთის დღეებს“, „თუშეთობას“. ყველას მივულოცე „თუშეთობა“, აქაურობა არის ულამაზესი. მინდა, მადლობა გადავუხადო ყველა იმ ადამიანს, ვინც ამ სილამაზეს და ტრადიციებს უფრთხილდება. ძალიან მნიშვნელოვანია ასეთი დღეების აღნიშვნა, რაც, რა თქმა უნდა, მომავალშიც გაგრძელდება“, - განაცხადა პრემიერმა.

საქართველოს მთავრობის ადმინისტრაციის ორგანიზებით მაღალმთიან რეგიონებში „მთის დღეები” იმართება. ფესტივალს დღეს თუშეთი, ხევსურეთი, მესტია და ყაზბეგი მასპინძლობს; 20 ივლისს კი ღონისძიებები ბახმაროში, გორდში, გოდერძისა და ცაგერში გაიმართება.

მთავრობის მეთაურმა ვიცე-პრემიერთან, ეკონომიკისა და მდგრადი განვითარების მინისტრ ლევან დავითაშვილთან, რეგიონული განვითარებისა და ინფრასტრუქტურის მინისტრ ირაკლი ქარსელაძესთან, შინაგან საქმეთა მინისტრ ვახტანგ გომელაურსა და ადგილობრივი ხელისუფლების წარმომადგენლებთან ერთად ადგილობრივი რეწვის ოსტატების პროდუქციის გამოფენა-გაყიდვა დაათვალიერა, მონაწილეობა მიიღო კულინარიულ მასტერკლასში და მთის ერთგულებისა და მის განვითარებაში შეტანილი განსაკუთრებული წვლილისთვის ადგილობრივების დაჯილდოების ცერემონიას დაესწრო.

საქართველოს პარლამენტმა მიიღო გარემოს დაცვისა და სოფლის მეურნეობის სამინისტროს მიერ მომზადებული კანონპროექტი, რომლის თანახმად, ბრაკონიერობისა და შავი ზღვის დაბინძურების პრევენციის მიზნით, სისხლის სამართლისა და ადმინისტრაციულ სამართალდარღვევათა კოდექსებში ცვლილებები შევიდა.

კანონით, რომელიც 2024 წლის 1 ოქტომბრიდან ამოქმედდება, რიგ გარემოსდაცვით სამართალდარღვევებზე სანქციები მნიშვნელოვნად მკაცრდება.

65 ათასი ლარიდან 100 000 ლარამდე გაიზარდა ჯარიმა გემიდან, სხვა მცურავი საშუალებებიდან, პლატფორმიდან, მილსადენებიდან ან ზღვაში ხელოვნურად აგებული სხვა კონსტრუქციიდან საქართველოს კანონმდებლობით დადგენილი წესის დარღვევით ზღვაში მავნე, დამაბინძურებელი ნივთიერებების, საწარმოო, ტექნიკური ან სხვა სახის ნარჩენების ან/და მასალის ჩაღვრა (ჩაყრა, ჩაშვება), აგრეთვე მათი ჩამარხვის წესის დარღვევით ზღვის დაბინძურებაზე.

ბრაკონიერობის წინააღმდეგ ბრძოლის ფარგლებში, სისხლის სამართლის კოდექსში შედის ცვლილება, რომლის თანახმად, ელექტროშოკური მოწყობილობა „თევზჭერის ელექტროიარაღად“ დაკვალიფიცირდა. თევზჭერის ელექტროიარაღისა და თევზმიმზიდი ელექტროშოკური მოწყობილობის უკანონო ბრუნვა კი, მკაცრად დარეგულირდება ადმინისტრაციულ სამართალდარღვევათა კოდექსის ახალი მუხლით - 181 პრიმა 6. ამ მუხლის თანახმად, სამოქალაქო ბრუნვაში დაშვებული თევზმიმზიდი ელექტროშოკური მოწყობილობის მართლსაწინააღმდეგო შეძენა, შენახვა, ტარება, გადაცემა ან გასხვისება გამოიწვევს სამართალდამრღვევის დაჯარიმებას 1000 ლარის ოდენობით, სამართალდარღვევის იარაღის კონფისკაციით. იმავე სამართალდარღვევის განმეორებით ჩადენის შემთხვევაში, ჯარიმა ორმაგდება.

თევზჭერის ელექტროიარაღის დამზადება, შეძენა, შენახვა, ტარება, გადატანა-გადაზიდვა, გადაგზავნა, გასაღება კი, გამოიწვევს დაჯარიმებას 3000 ლარის ოდენობით, სამართალდარღვევის იარაღის კონფისკაციით. განმეორების შემთხვევაში ჯარიმა ამ შემთხვევაშიც გაორმაგდება და 6 000 ლარი იქნება.

ინფორმაციას გარემოს დაცვისა და სოფლის მეურნეობის სამინისტრო ავრცელებს.

ყველაზე სამწუხარო არის ის, რომ აქტს, რომელსაც ჰქვია „მეგობარი აქტი“, ვერავითარ შემთხვევაში ვერ ვუწოდებთ ჩვენ მეგობრულს, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.

მთავრობის მეთაურს კითხვა დაუსვეს აშშ-ის წარმომადგენელთა პალატის საგარეო საქმეთა კომიტეტის მიერ საქართველოსთან დაკავშირებით მიღებულ „მეგობარ აქტზე“, რაზეც პრემიერ-მინისტრმა აღნიშნა, რომ არამეგობრულ აქტს ეწოდება მეგობარი აქტი.

„ყველაზე სამწუხარო არის ის, რომ აქტს, რომელსაც ჰქვია „მეგობარი აქტი“, ვერავითარ შემთხვევაში ვერ ვუწოდებთ ჩვენ მეგობრულს. არამეგობრულ აქტს ეწოდება მეგობარი აქტი. ეს თავისთავად მეტყველებს იმაზე, რომ სერიოზულად არის საჭირო ურთიერთობების გადახედვა. ასეთი ნაბიჯები, რა თქმა უნდა, ხელს ვერ შეუწყობს ურთიერთობების გადატვირთვას ორ ქვეყანას შორის. იმედი მაქვს, რომ მომავალში სხვა მიმართულებით განვითარდება პროცესები“, – განაცხადა ირაკლი კობახიძემ.

სამების საკათედრო ტაძარში მომხდარ ინციდენტზე საპატრიარქოს ზნეობრივი კომისია იმსჯელებს, - განუცხადა ჟურნალისტებს დეკანოზმა იოანე გორელიშვილმა. მისი თქმით, ზნეობრივი კომისიის სხდომა საპატრიარქოში რამდენიმე დღეში გაიმართება, „სადაც დეტალურად გაივლიან იმ საკითხებს, რა მოხდა და რამ გამოიწვია მოძღვრის აღშფოთება“.

ლაპარაკია სოციალურ ქსელში გავრცელებულ ვიდეოზე, სადაც ჩანს, რომ სამების საკათედრო ტაძრის მღვდელი, დეკანოზი თეიმურაზ ბერიშვილი მოქალაქეს ტაძარში შორტებით შესვლის გამო დაუპირისპირდა. მოქალაქე ამბობს, რომ ემიგრანტია და ამერიკის შეერთებული შტატებიდან ახალი დაბრუნებულია, დეკანოზი კი მას შეურაცხმყოფელ სიტყვებს, მათ შორის „სულიერ მეძავს“ უწოდებს.

დეკანოზ იოანე გორელიშვილის თქმით, დეკანოზი თეიმურაზ ბერიშვილი ნანობს და შენდობას ითხოვს ინციდენტთან დაკავშირებით. „ეს ფაქტი უხერხული და არასასიამოვნოა და სწორედ ამის გამო იქნება ზნეობრივი კომისია მოწვეული“, - განაცხადა იოანე გორელიშვილმა.

2030 წლისთვის საქართველო იქნება ყველა კანდიდად ქვეყანასთან შედარებით ყველაზე მეტად მზად ევროკავშირში ინტეგრაციისთვის, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.

ჟურნალისტის კითხვაზე, როგორ ხედავს მთავრობის მეთაური ევროკავშირში გაწევრიანების პერსპექტივას, პრემიერმა აღნიშნა, რომ განწყობა არის ოპტიმისტური და გაგრძელდება შესაბამისი ნაბიჯების გადადგმა.

„აქედან გამომდინარე, დარწმუნებული ვარ, რომ 2030 წლისთვის აბსოლუტურად რეალურია საქართველოს გაწევრიანება ევროკავშირში“, – აღნიშნა პრემიერმა.

რეალური მოცემულობა, დაახლოებით, ერთი თვის წინ იყო ასეთი, რომ „ნაცმოძრაობის“ გარდა ვერც ერთი პოლიტიკური პარტია ვერ ლახავდა საარჩევნო ბარიერს. ასეთ პირობებში ისინი რომ ცდილობენ შერწყმას, ეს არის ლოგიკური, – ამის შესახებ საქართველოს პრემიერ-მინისტრმა, ირაკლი კობახიძემ თუშეთში, ჟურნალისტის კითხვის პასუხად განაცხადა, რომელიც ოპოზიციის გაერთიანებას შეეხებოდა.

ირაკლი კობახიძის თქმით, ამ პროცესში, ისინი არ ერიდებიან ისეთ პარტიებთან გაერთიანებასაც კი, ვისაც უშვერი სიტყვებით მოიხსენიებდნენ წარსულში, რაც უპრინციპობის გამოვლინებაა.

„მათი ერთადერთი ამოცანაა, რომ გადალახონ, რამენაირად, ბარიერი. ამ პროცესში, ისინი არ ერიდებიან ისეთ პარტიებთან გაერთიანებასაც კი, ვისაც უშვერი სიტყვებით მოიხსენიებდნენ წარსულში. ეს მათი უპრინციპობის გამოვლინებაა და მათი საქმეა, ეს არ არის ჩვენი საქმე. ჩვენთვის მთავარია, რომ დღევანდელი მოცემულობით, დაახლოებით, 60%-ია ჩვენი რეიტინგი, ასეთ ვითარებაში, როგორც არ უნდა დაჯგუფდეს, თუ გადაჯგუფდეს ოპოზიცია, რა თქმა უნდა, ჩვენს გამარჯვებას ვერავითარი საფრთხე ვერ შეექმნება“, – აღნიშნა პრემიერმა.