Recent Podcasts
საქართველოს ნაკრების ფეხბურთელები ივნისის შეკრების პარალელურად, მონაწილეობდნენ სფფ-ის ტექნიკური დეპარტამენტის ორგანიზებით გამართულ უეფა-ს სამწვრთნელო სემინარებში, რაც ბოლო დროს ტრადიციად გადაიქცა.
უეფა-მ მოქმედი ფეხბურთელებისთვის საგანგებო პროექტი შეადგინა, რომელსაც „ჯვაროსნებისთვის“ საქართველოს ფეხბურთის ფედერაცია ახორციელებს. B+A სამწვრთნელო ლიცენზიის კურსმა ეროვნული ნაკრების წევრებში დიდი დაინტერესება გამოიწვია.
ამჯერად უეფა-ს კურსებს ესწრებოდნენ ლუკა გუგეშაშვილი, ლაშა დვალი, გიორგი გველესიანი, ლუკა ლოჩოშვილი, ლადო მამუჩაშვილი, ანზორ მექვაბიშვილი, გიორგი ბერიძე, სანდრო ალთუნაშვილი, გიორგი გოჩოლეიშვილი, საბა ლობჟანიძე, ლევან შენგელია.
სასწავლო კურსი საქართველოში მეორედ ტარდება და განკუთვნილია განსაკუთრებული საფეხბურთო სტაჟის მქონე პროფესიონალი ფეხბურთელებისთვის. აღნიშნული კურსისთვის სპეციალურად შექმნილი პროგრამის საფუძველზე, მსმენელებს საშუალება ეძლევათ, გაიარონ B+A კურსი და გამოცდების წარმატებით ჩაბარების შემთხვევაში გახდნენ უეფას A ლიცენზიის მფლობელები. კურსი 6 მოდულისგან შედგება.
„ქართული ოცნების“ საპატიო თავმჯდომარე ბიძინა ივანიშვილი ხვიჩა კვარაცხელიას, „პარი სენ-ჟერმენთან“ ერთად, ჩემპიონთა ლიგის ფინალში გამარჯვებას ულოცავს.
„ხვიჩა კვარაცხელია ჩემპიონთა ლიგის გამარჯვებულია!
ვულოცავ მთელი ქვეყნისთვის საამაყო ფეხბურთელს ამ დიდ მიღწევას, რომელიც მისი ნიჭით, შრომითა და თავდადებით, გუნდთან ერთად მოიპოვა!
ვულოცავ მთელ საქართველოს, ვინაიდან, თითოეული ჩვენგანისთვის ეს გამარჯვება დიდი სიხარულისა და სიამაყის მომტანია.
მჯერა, რომ ეს მიღწევა ხვიჩას კარიერულ გზაზე კიდევ უფრო მეტი წარმატებისა და გამარჯვებისკენ გადადგმული ნაბიჯია. ჩვენს ღირსეულ ფეხბურთელს ვუსურვებ, რომ მომავალშიც არაერთი გამარჯვებითა და ტიტულით გაახაროს და ასახელოს საკუთარი სამშობლო“, – აცხადებს ბიძინა ივანიშვილი.
ხვიჩა კვარაცხელიამ ჩემპიონთა ლიგის ფინალში მილანის „ინტერს“ გოლი გაუტანა, პსჟ-ს დამაჯერებელ გამარჯვებაში (5:0) თავისი წვლილი შეიტანა და ისტორია დაწერა — ის გახდა მეორე ქართველი ფეხბურთელი კახა კალაძის შემდეგ, ვინც ევროპის ყველაზე პრესტიჟული საკლუბო ტურნირი მოიგო და პირველი, ვინც ფინალში გოლის გატანა შეძლო.
მიუხედავად იმისა, რომ 24 მაისს საფრანგეთის თასის ფინალის წინ ხვიჩამ თავი შეუძლოდ იგრძნო და მატჩი გამოტოვა, ლუის ენრიკემ ქართველი ფეხბურთელი მაინც ძირითად შემადგენლობაში დააყენა.
ფინალი პსჟ-მ იდეალურად დაიწყო – სწორედ კვარაცხელიამ წამოიწყო შეტევა, რომელიც ფაბიან რუსმა და ვიტინიამ გააგრძელეს, ხოლო დეზირე დუეს პასით მე-12 წუთზე აშრაფ ჰაკიმიმ პარიზელები დააწინაურა.
მე-18 წუთზე კვარაცხელიამ გოლის გატანა თავადაც სცადა – სწრაფი კონტრშეტევის დროს კარი დაუმიზნა, თუმცა მცირედით ააცილა. მალე პსჟ-მ სხვაობა ორბურთიანი გახადა. მეორე გოლის ეპიზოდშიც ხვიჩა გამოირჩა – კონტრშეტევა ისევ მან დაიწყო, საბოლოოდ კი უსმან დემბელეს გადაცემა დეზირე დუემ გოლად აქცია.
ტაიმის ბოლოს კვარაცხელიამ ორჯერ დაარტყა კარისკენ და „ინტერის“ მეკარე სომერიც შეაწუხა, თუმცა გოლი ვერ გაიტანა.
შესვენების შემდეგ „ინტერმა“ შეტევები გააძლიარა, თუმცა თამაშს კვლავ ფრანგები აკონტროლებდნენ. მეორე ტაიმის დასაწყისში კვარაცხელიამ მარცხენა ფლანგიდან ორჯერ სცადა გატანა და ორივეჯერ კარს ააცილა.
ყველაფერი 63-ე წუთზე გადაწყდა — სწრაფ კონტრშეტევაზე დეზირე დუემ, რომელიც ამ შეხვედრის გმირად იქცა, დუბლი გაიფორმა და ანგარიში 3:0 გახადა. ასეთ ვითარებაში „ინტერს“ მატჩის გადარჩენის შანსი პრაქტიკულად აღარ დარჩა.
ამის შემდეგ კი მილანელთა კარში გოლი ხვიჩა კვარაცხელიამ გაიტანა. უსმან დემბელეს გადაცემით ის მეკარესთან პირისპირ დარჩა და ანგარიში 4:0 გახადა. ეს ჩემპიონთა ლიგის ფინალების ისტორიაში პირველი ქართული გოლია.
87-ე წუთზე „ინტერის“ კარში მეხუთე გოლის ავტორი შეცვლაზე შესული სემი მაიულუ გახდა და მან შეხვედრაში საბოლოო ანგარიში დააფიქსირა.
საქართველოს სპორტის სამინისტროს მხარდაჭერით საქართველოში, მზიურის საჩოგბურთო კორტებზე, მამაკაცებს შორის „ATP Challenger Tour“-ის საერთაშორისო ტურნირის გაიმართა.
ფინალში საბა ფურცელაძემ იტალიელი ფედერიკო ცინა ორ სეტში - 7:6, 6:4 დაამარცხა და ჩემპიონობა იზეიმა.
ფინალს საქართველოს სპორტის მინისტრი შალვა გოგოლაძე და მინისტრის პირველი მოადგილე ირაკლი მეძმარიაშვილი ესწრებოდნენ.
პრესტიჟულ საერთაშორისო ტურნირში 25 ქვეყნის 64 ჩოგბურთელი მონაწილეობდა. ჩემპიონატის საპრიზო ფონდი 60 000 ამერიკულ დოლარს შეადგენს.
ATP Challenger-ის ჩემპიონატებს განსაკუთრებული მნიშვნელობა ენიჭება, რადგან აქ დაგროვილი სარეიტინგო ქულების მიხედვით პროფესიონალ ჩოგბურთელებს ATP Tour-ის უფრო მაღალი დონის ტურნირებში მონაწილეობის საშუალება ეძლევათ.
