ბიზნესმენი, ყარაბაღის ყოფილი დე ფაქტო სახელმწიფო მინისტრი რუბენ ვარდანიანი, რომელსაც მედიაში ყარაბაღში „მოსკოვის გაგზავნილად“ მოიხსენიებდნენ, ახლა აცხადებს, რომ სომხურ საზოგადოებაში ძალიან უარყოფითად უყურებენ რუსეთს.

„რუსეთს, რა თქმა უნდა, შეეძლო დახმარება. ხალხი, ზოგადად, ძალიან გაბრაზებულია, რომ რუსმა სამშიდობოებმა ვერ მოახერხეს კონფლიქტის შეჩერება. ძალიან უარყოფითი განწყობებია საზოგადოებაში მსოფლიოს, მათ შორის რუსეთის მიმართ“, - განაცხადა მან ქსენია სობჩაკთან ინტერვიუში 22 სექტემბერს.

მისი თქმით, „რუსეთს უყვარს საკუთარი თავისთვის პრობლემების შექმნა და შემდეგ მათი თამამად გადაწყვეტა“.

ვარდანიანმა მწვავედ გააკრიტიკა დასავლეთიც და თქვა, რომ „ის ძალიან მშვიდად უყურებს ფაქტს, რომ დიქტატორულ რეჟიმს შეუძლია, ის აკეთოს, რაც სურს“.

აზერბაიჯანმა 19 სექტემბერს წამოიწყო ფართომასშტაბიანი შეტევა მთიან ყარაბაღზე, რასაც ანტიტერორისტული ოპერაცია დაარქვა.

20 სექტემბერს აზერბაიჯანის შეტევის ფონზე, მთიანი ყარაბაღის დაბომბვის ქვეშ მყოფი სოფლებიდან, რეგიონის დე ფაქტო დედაქალაქ სტეფანაკერტში (აზერბაიჯანულად ხანკენდი) ევაკუირებულ იქნა 7000 ადამიანი.

მთიანი ყარაბაღის სადავო რეგიონზე ერთდღიანი შეტევის შემდეგ, აზერბაიჯანის პრეზიდენტმა ილჰამ ალიევმა სატელევიზიო მიმართვაში აღდგენილად გამოაცხადა აზერბაიჯანის სუვერენიტეტი.

ცეცხლი, ოფიციალურად, შეწყდა, თუმცა სიტუაცია ჯერ კიდევ დაძაბულია. ადგილობრივების თქმით, დილიდან მაინც ისმოდა სროლის ხმა.

რუსეთში მცხოვრებმა მილიარდერმა ბიზნესმენმა, რუბენ ვარდანიანმა 2022 წლის შემოდგომაზე რუსეთის მოქალაქეობა დათმო და საცხოვრებლად მთიან ყარაბაღში გადავიდა. მოგვიანებით მან დე ფაქტო მთავრობის მეთაურის პოსტი დაიკავა.

ბაქოში მას მოსკოვის გამოგზავნილად მიიჩნევდნენ და ამბობდნენ, რომ „ხელს უშლიდა სამშვიდობო პროცესს“. მას აკრიტიკებდა სომხეთის პრემიერ-მინისტრი ნიკოლ ფაშინიანი, რომლის გუნდიც მას სომხურ პოლიტიკაში კონკურენტად აღიქვამს.

2023 წლის თებერვალში ვარდანიანმა თანამდებობა დატოვა.

წყარო:რადიო თავისუფლება

დაახლოებით, 30-35 წლის წინ, მამაჩემის მეგობარმა სამართალდამცავმა, პენსიაზე გასვლის შემდეგ თქვა, როგორც იქნა, დავისვენე, ლამის 40 წელია, ტყვიის ქვეშ ვარ, სახლიდან გამოსული, არ ვიცი, უკან ცოცხალი შევალ თუ არა, ახლა ყველაფერი დასრულდაო. მაშინ ძალიან გამიკვირდა მისი სიტყვები, რადგან მართალია, ჩინი მაღალი ჰქონდა, მაგრამ არასდროს გამეგო, ვინმე დაეკავებინა, სროლაში მოყოლილიყო... მერე და მერე, გვიან მივხვდი, პოლიციელის პროფესია ძალიან სახიფათო რომ იყო და ისინი ჩვენი უსაფრთხოებისთვის, სიცოცხლეს მართლაც ყოველდღიურად იგდებდნენ საფრთხეში. ისტორიას ისიც ახსოვს, ციხიდან გამოსულ დამნაშავეს, ბოღმა სწორედ მის დამკავებელ ძალოვანზე ამოუნთხევია და შურისძიების მიზნით, თუ არ (ან ვერ) მოუკლავს, დაუჭრია. ისტორიას, რომელსაც ახლა გიამბობთ, სამწუხაროდ, არაერთი ანალოგი აქვს, მაგრამ საბედნიეროდ, ხშირად არ ხდება. თავიდანვე გეტყვით, რომ საქმეს იმდენად მოულოდნელი ფინალი ჰქონდა, მრავლისმნახველი გამომძიებლებიც კი პირდაღებულები დარჩნენ. ისინი ვერც კი წარმოიდგენდნენ, ვინ იყო რეალური დამნაშავე და ვინ იდგა ყველაფრის უკან.

80-იანი წლების დასაწყისში, სამართალდამცავებმა ძალიან საშიში დამნაშავე დააკავეს. მას ბრალად ყაჩაღობების სერია და მკვლელობა ედებოდა. გამოძიებით დადგენილი იყო, რომ მას სიამოვნებას ქალებზე ძალადობა ანიჭებდა და საჭიროებაც რომ არ ყოფილიყო, ცდილობდა, ტკივილი სწორედ სუსტი სქესის წარმომადგენლებისთვის მიეყენებინა - დაეუთოვებინა, დანით სხეული დაეჩხვლიტა, ცეცხლმოკიდებული ცელოფნის წვეთებით სხეულზე ეთამაშა. მას დახვრეტა მხოლოდ იმიტომ არ მიუსაჯეს, რომ მის მიერ მოკლულიც კრიმინალი იყო, თორემ მშვიდობიანი მოქალაქე რომ ყოფილიყო, აუცილებლად დახვრეტდნენ. მისი დაკავებით, მძიმე დანაშაულების სერია შეწყდა, თუმცა დაკავებულმა, ორ წელიწადში,ძალოვნებს თავი ისევ შეახსენა. აღნიშნული საქმის გამომძიებლის შვილი, საბავშვო ბაღიდან მოიპარეს. როცა ბავშვები გარეთ ჰყავდათ, ძიძა კოლეგასთან საუბრით გაერთო, მერე კი, როცა სადილის დრო მოვიდა და ბავშვები მაგიდებთან დასვეს, აღმოაჩინეს, რომ ერთი აკლდათ. აქეთ ეცნენ, იქეთ ეცნენ, მაგრამ ვერაფერი რომ ვერ გაარკვიეს, მილიციაში დარეკეს და რაღა თქმა უნდა, ადგილზე პირველი გამომძიებელი მივიდა. ყველას ეგონა, რომ ბავშვი ღობეში გაძვრა, ახლო-მახლო ტერიტორია მოიარეს, თუმცა,დაახლოებით, ორი საათის შემდეგ, სამართალდამცავებმა ზუსტად იცოდნენ, რა ხდებოდა - იმ საქმის პროკურორის კაბინეტში, რომლითაც რეციდივისტი „სროკზე“ გაუშვეს, ტელეფონმა დარეკა და ვიღაცამ მოგუდული ხმით თქვა - ან რეციდივისტს გარეთ გამოუშვებთ, ან გამომძიებლის შვილის სხეულს ნაწილ-ნაწილ, ყუთებით მიიღებთო...

მთელი სისტემა ფეხზე დადგა - შსს, პროკურატურა, უშიშროება... ეს არ იყო რიგითი საქმე, ეს გამოწვევა გახლდათ და ბავშვის გადარჩენა, რეციდივისტის ციხეში დატოვება და გამტაცებლის დაკავება ღირსების საქმე იყო. დაცვის ქვეშ აიყვანეს იმ საქმის პროკურორის, მოსამართლისა და ადვოკატის ოჯახის წევრებიც კი. დაიწყეს გასამართლებულის გარემოცვის შესწავლა, ვის შეიძლებოდა, გაებედა ასეთი რამის გაკეთება, მაგრამ ვერავის მიაგნეს. სამინისტროში დაიბარეს იმ კოლონიის დირექტორი, სადაც რეციდივისტი იხდიდა სასჯელს და ჰკითხეს, ბოლო თვეების განმავლობაში,დაკავებულთან საეჭვო პირები ხომ არ იყვნენ, ვინმე ძველმა მეგობარმა ხომ არ მოინახულა? დირექტორმა დაბეჯითებით თქვა, მას შემდეგ, რაც ჩვენთან მოიყვანეს, ერთხელაც კი არავის მოუნახულებია, მაგრამ წერილები მოსდის და მათი შინაარსი საინტერესო რომ იყოს, აუცილებლად მეტყონენ, პატიმრებთან მისულ წერილებს კითხულობენ, მაგრამ ჩემთვის არაფერი უთქვამთო. გამოითხოვეს ყველა წერილი და აღმოჩნდა, რომ მას ვიღაც წერდა და თაყვანს სცემდა. ჰო, რეციდივისტს და კრიმინალს ვიღაც ეთაყვანებოდა, წერდა, რომ მისი ქმედებებით აღფრთოვანებული იყო, რომ სურდა, უფრო ახლოს გაეცნო, რომ მოუთმენლად ელოდა, როდის გავიდოდა 15 წელი, რათა თავის კერპს შეხვედროდა. რა თქმა უნდა, წერილზე გამგზავნის მისამართიც იყო მითითებული და სამართალდამცავებმა ერთმანეთს გადახედეს - მისამართი იმ კორპუსის გვერდით სახლში იყო, სადაც რეციდივისტი ცხოვრობდა. სანამ ადგილამდე მივიდოდნენ, გაარკვიეს, რომ აღნიშნულ მისამართზე მამა-შვილი ცხოვრობდა, დედა გარდაცვლილი იყო. მამა რკინიგზაზე მეისრედ მუშაობდა, 16 წლის ბიჭი კი სკოლას ამთავრებდა. რა თქმა უნდა, მთავარი ეჭვმიტანილი მამა იყო, მაგრამ გამომძიებლებს ხელში გაბრაზებული ბიჭი შერჩათ.

„დიახ, მისით აღფრთოვანებული ვარ. მას არავისი ეშინოდა, მისი კი ყველას. რომ გავიზრდები, მეც მინდა, ჩემი ყველას ეშინოდეს და არ ვიყო მამაჩემივით მუდო, დილით რომ სამსახურში მიდის, საღამოზე დაღლილი მოდის და ნახევარი კილო ძეხვი და პური მოაქვს, მე სხვანაირი ცხოვრება მინდა“,-ყვირილით ამბობდა ბიჭი და ცხადი იყო, ის ბავშვის გატაცებასთან კავშირში არ გახლდათ, რადგან ამას ფიზიკურად ვერ მოახერხებდა და აშკარად ფსიქოლოგიური პრობლემები ჰქონდა, როცა მოძალადესა და რეციდივისტზე აღმატებულ ხარისხში საუბრობდა.

რადგან ეს ვერსია გამოირიცხა, სამართალდამცავები დაზარალებულების ოჯახის წევრებზე გადაერთვნენ. ხომ შეიძლებოდა, ვინმეს მასზე შური ეძია და ამისთვის სურდა მისი გათავისუფლება. თანაც, გამტაცებელი ითხოვდა, რომ საშიში დამნაშავე გარეთ არა რამდენიმე დღეში, არამედ ორ-სამ საათში ყოფილიყო. მას კი აუხსნეს, რომ პროცედურა ყველაზე კარგ ვარიანტში, ექვს საათს წაიღებდა, მაგრამ გამტაცებელი მეორე დღემდე რომ არ დაიცდიდა, ყველა ხვდებოდა. ის პერიოდულად, სწორედ პროკურორის კაბინეტში რეკავდა და ყველა ჯერზე, ქუჩაში მდგარი სხვადასხვა აპარატებიდან. ისიც კი იფიქრეს, რომ ტელეფონებთან ოპერ-მუშაკები დაეყენებინათ, მაგრამ მარტო დგომა საკმარისი არ იყო, მათ ეჭვმიტანილის საუბარიც უნდა მოესმინათ, რაც შეუძლებლად ჩანდა. სამაგიეროდ, დაზარალებულთა შორის, ეჭვი გამოითქვა ერთ-ერთი გოგონას მამაზე, რომელიც რეციდივისტმა არამარტო აწამა, არამედ, გააუპატიურა კიდეც. პროკურორმა გაიხსენა, რომ გოგოს მამა სასამართლოზე დაიმუქრა, ჩემი შვილის გამწარებას არ გაპატიებო. მეზობლებმა დაადასტურეს, რომ მამაკაცი ბოლო დროს მუდმივად ავტოფარეხში იყო და კარს არავის უღებდა, შიგნით არავის უშვებდა და გულჩათხრობილი გახდა. ოპერ-მუშაკებმა მას სწორედ ავტოფარეხში მიაგნეს, სადაც მას კედელზე... კოლონიის სქემა ჰქონდა დახაზული და გამწარებული კაცი ფიქრობდა, როგორ უნდა შეეღწია შიგნით და როგორ უნდა მოეკლა მისი შვილის გამამწარებელი, რაც რეალურად, ფანტასტიკის სფერო იყო.

გამომძიებლებმა რეციდივისტის ცოლის დაკითხვა გადაწყვიტეს. წარმოშობით სლავმა ქალმა, ძალოვანი უწყების თანამშრომლების დანახვაზე უსიამოვნოდ შეიკურთხა, შემდეგ გამომძიებლებს შინ შეუძღვა და ღვარძლიანად უთხრა - „რის სანახავად მოხვედით? როგორც ცხოვრობს ქალი, რომელსაც ქმარმა ცხოვრება დაუნგრია? ვინ გამოიხედავს ახლა ჩემსკენ? ვის ვეგონები ნორმალური, ასეთი კაცის გვერდით მთელი 8 წელი რომ ვიცხოვრე? ნეტავ ისე ჩაძაღლებულიყო, არავის არაფერი გაეგო. მე რა ვიცი, ვის შეიძლება სურდეს მისი გარეთ გამოსვლა? მეგობრები, პრაქტიკულად, არ ჰყავდა, მტრები - აშკარად ბევრი გაიჩინა“...

სწორედ ამ დროს, მოხდა გაუთვალისიწნებელი რამ - რეციდივისტი, რომლის დროებით გაშვებაზე უკვე მოლაპარაკებები იყო დაწყებული, ერთ-ერთმა ბადრაგმა... მოკლა. გაოგნებულმა ოპერმუშაკებმა ბადრაგი დააკავეს.

„ჩემი ოჯახიც დააყაჩაღა, ჩემს დასა და დედაჩემს ცხოვრება დაუნგრია, ორივე გააუპატიურა, სახეები დაუსერა, დაწვა, დაამახინჯა. სამხედრო ვარ, ერთი წლის წინ, საბადრაგოში საკუთარი სურვილით გადმოვედი. ვერ ვწყვეტდი, მომეკლა თუ არა, არ ვარ მკვლელი, ახლა კი მივხვდი, რომ შეიძლებოდა, გარეთ აღმოჩენილიყო და მოვკალი“,-განაცხადა დაკავებულმა.

ეს მდგომარეობას რადიკალურად ართულებდა. ახლა, გასაშვებიც არავინ იყო და სამართალდამცავებმა გადაწყვიტეს, ვინმე მისი მსგავსი ეპოვათ, სახე კაშნეთი დაეფარათ, მაგრამ ამ დროს, იმ უბნის რწმუნებულმა, სადაც რეციდივისტის ცოლი ცხოვრობდა, საინტერესო ინფორმაცია მოიტანა. აგენტმა თქვა, დღეს ქალი შინ ბავშვით დაბრუნდა, ბავშვი ჭირვეულობდა, ტიროდა, ყურადღება ამიტომ მიიქცია, წყვილს კი შვილი არ ჰყავდაო. ოპერჯგუფი მაშინვე მის საცხოვრებელ ადგილზე გავიდა. ქალმა კარი ისევ მშვიდად გააღო, მაგრამ როცა მის ბინაში ოპერები შევარდნენ, საძინებლისკენ გაიქცა ყვირილით, მაგრამ არ გაუშვეს. საძინებელში, ხელ-ფეხ და პირშეკრული ბავშვი ლოგინის ქვეშ იყო შეგორებული.

„ქმრის დაჭერის შემდეგ, რამდენჯერმე ვცადე ცხოვრების ახლიდან დაწყება, მაგრამ როგორც კი იგებდნენ, ვინ ვიყავი, ახლოს არავინ მეკარებოდა. მე კიდევ გვერდით მამაკაცი მჭირდება, არ შემიძლიასხვანაირად. ამიტომ, მოვიფიქრე ის, რაც მოვიფიქრე. მეუბნებით, რომ მოკლეს? მეტის ღირსია, ასეთ დღეში რომ ჩამაგდო“,-განაცხადა ქალმა.

სასამართლომ ქალს 8 წლით თავისუფლების აღკვეთა მიუსაჯა, ბადრაგსაც 8 წელი ერგო, რადგან სამსახურეობრივი მოვალეობის დროს, სენტიმენტების ადგილი საბჭოთა სამართალში არ იყო. პრინციპში, არც ახლა არის.

 ავტორი-ბათო ჯაფარიძე

საქართველოს პარლამენტის თავმჯდომარე შალვა პაპუაშვილი ვენეციის კომისიის პრეზიდენტს კლერ ბაზი მელორის წერილით მიმართავს და 12 რეკომენდაციის შესასრულებლად მიღებული კანონების, კანონპროექტების და დეოლიგარქიზაციის სამოქმედო გეგმის შეფასებას სთხოვს.

როგორც წერილშია აღნიშნული, ევროკავშირის მხარესთან მიღწეული შეთანხმების საფუძველზე, ვენეციის კომისიაში იგზავნება კანონის პროექტები, რომელიც 12 რეკომენდაციის შესასრულებლად განიხილა საქართველოს პარლამენტმა, ასევე, საქართველოს მთავრობის მიერ მომზადებული საქართველოში პოლიტიკურ, ეკონომიკურ და საზოგადოებრივ ცხოვრებაში ინტერესების გადაჭარბებული გავლენის თავიდან არიდების სამოქმედო გეგმა.

"ძვირფასო ქალბატონო პრეზიდენტო,

2022 წლის ივლისს, ევროპული საბჭოს მიერ საქართველოსთვის ევროპული პერსპექტივის მინიჭებისა და კანდიდატის სტატუსისთვის 12 პრიორიტეტის განსაზღვრის შემდეგ, საქართველოს გულმოდგინედ ახორციელებს ევროკავშირის რეკომენდაციებს.

შედეგად, საქართველოს ინსტიტუტებმა, პარლამენტის თაოსნობით, მნიშვნელოვან პროგრესს მიაღწია საკანონმდებლო ცვლილებების მიღების და რეფორმების იმპლემენტაციის მიმართულებით, რამაც კიდევ უფრო განამტკიცა დემოკრატია და ევროპული დღის წესრიგი. მადლიერები ვართ ვენეციის კომისიის, რომელთან თანამშრომლობაც ამ პროცესში სასარგებლო იყო.

ევროკავშირის რეკომენდაციების განხორციელების გზაზე საქართველოს პარტნიორი იყო ევროკომისია. დამატებითი ახსნა-განმარტებებისთვის ჩვენ მუდმივ კომუნიკაციას ვინარჩუნებდით მის შესაბამის სამსახურებთან. ევროკავშირის უმაღლესი წარმომადგენლის ჯოზეფ ბორელის და ევროკომისიის მაღალი ოფიციალური პირების საქართველოში ახლახანს განხორციელებული ვიზიტი მნიშვნელოვანი იყო ევროკომისიის ოქტომბრის გადაწყვეტილებამდე დამატებითი ნაბიჯების გადადგმისთვის. კერძოდ, ევროკავშირის მხარესთან მიღწეული შეთანხმების საფუძველზე, ვენეციის კომისიაში გიგზავნით შემდეგ დოკუმენტებს:

- საარჩევნო კოდექსსა და პარლამენტის რეგლამენტში განსახორციელებელი ცვლილებების პროექტს;
- სპეციალური საგამოძიებო სამსახურის შესახებ კანონს;
- პერსონალურ მონაცემთა დაცვის კანონის მუხლებს პერსონალურ მონაცემთა დაცვის სამსახურზე;
- კორუფციის წინააღმდეგ ბრძოლის შესახებ კანონის მუხლებს ანტიკორუფციული ბიუროს თაობაზე;
- საერთო სასამართლოების შესახებ ორგანულ კანონში განსახორციელებელი ცვლილებების პროექტს;
- საქართველოში პოლიტიკურ, ეკონომიკურ და საზოგადოებრივ ცხოვრებაში ინტერესების გადაჭარბებული გავლენის თავიდან არიდების სამოქმედო გეგმას.

ქალბატონო პრეზიდენტო, გთხოვთ ვენეციის კომისიის სამართლებრივი მოსაზრებების მომზადებას აღნიშნულ საკითხებთან დაკავშირებით,” - წერს შალვა პაპუაშვილი

შინაგან საქმეთა სამინისტროს თბილისის პოლიციის დეპარტამენტის გლდანი-ნაძალადევის მთავარ სამმართველოში, თბილისის საკრებულოს ერთ-ერთი დეპუტატის და მისი თანმხლები პირების ჯანმრთელობის დაზიანების ფაქტზე შემოსული შეტყობინების საფუძველზე, გამოძიება სისხლის სამართლის კოდექსის 126-ე მუხლის პირველი პრიმა ნაწილით დაიწყო, რაც ჯგუფურად ჩადენილ ძალადობას გულისხმობს.

შეტყობინების საფუძველზე ადგილზე მისულ სამართალდამცველებს, დახვდათ რამდენიმე პირი, რომლებსაც სხეულზე აღენიშნებოდათ სხვადასხვა სახის, მათ შორის სისხლნაჟღენთი დაზიანებები. აღნიშნული პირები სამედიცინო დაწესებულებაში გადაიყვანეს.

მომხდარი ფაქტიდან მალევე გლდანში შეიკრიბნენ დაშავებული პირების მეგობრები და თანაპარტიელები, რომლებმაც სამართალდამცველებს სამსახურებრივი მოვალეობის შესრულებაში ხელი შეუშალეს, მიაყენეს სიტყვიერი, ასევე, ფიზიკური შეურაცხყოფა და წინააღმდეგობა გაუწიეს, რა დროსაც პოლიციამ 3 პირი ადმინისტრაციულ სამართალდარღვევათა კოდექსის შესაბამისად დააკავა.

დაპირისპირების შედეგად, პოლიციის თანამშრომლებს სხეულზე სხვადასხვა სახის დაზიანება აღენიშნებათ. ფაქტზე დაიწყო გამოძიება სისხლის სამართლის კოდექსის 353-ე პრიმა მუხლით, რაც სამსახურებრივი საქმიანობის შესრულების დროს პოლიციელზე თავდასხმას გულისხმობს.

აღსანიშნავია, რომ საავადმყოფოში მოთავსებულმა პირებმა, საგამოძიებო მოქმედებების ფარგლებში, სამედიცინო დაწესებულებაში მისულ სამართალდამცველებს გამოკითხვაზე უარი განუცხადეს და განმარტეს, რომ ჩვენებას მისცემენ სასამართლოში.

მომხდარ ფაქტებთან დაკავშირებით გრძელდება გამოძიება, ტარდება შესაბამისი ღონისძიებები.

საქართველოს პრემიერ-მინისტრი ირაკლი ღარიბაშვილი გაერო-ს 78-ე სესიის გენერალურ დებატებზე სიტყვით გამოსვლას სოციალურ ქსელ „ტვიტერში” ეხმაურება.

„მქონდა პატივი კიდევ ერთხელ მიმემართა სიტყვით გაეროს გენერალური ასამბლეისთვის და წარმომედგინა საქართველო როგორც ძლიერი ერი, რომელიც აფასებს თავისუფლებას, ეთაყვანება თავის მდიდარ მემკვიდრეობას და ახორციელებს პროგრესს ამ ცვალებად გეოპოლიტიკურ გარემოში”, – აღნიშნავს პრემიერი.

საქართველოს პრემიერ-მინისტრი ირაკლი ღარიბაშვილის გაერო-ს 78-ე სესიის გენერალურ დებატებზე სიტყვით გამოვიდა. საქართველოს მთავრობის მეთაურის მიმართვას უცვლელად გთავაზობთ:

„ჩემთვის დიდი პატივია, კიდევ ერთხელ მივმართავდე გაერო-ს გენერალურ ასამბლეას.

მე წარმოვადგენ საქართველოს − ძლიერ ერს, რომელიც აფასებს თავისუფლებას, ეთაყვანება თავის მდიდარ მემკვიდრეობას და ისწრაფვის პროგრესისკენ მუდმივად ცვალებად გეოპოლიტიკურ ვითარებაში.

როგორც მოგეხსენებათ, ჩემმა ქვეყანამ 2008 წელს განიცადა სრულმასშტაბიანი სამხედრო აგრესია და აგრძელებს მის დესტრუქციულ შედეგებთან გამკლავებას. რუსეთის ფედერაციის მიერ საქართველოს ტერიტორიის 20 პროცენტი კვლავ ოკუპირებულია და ასიათასობით ადამიანი სახლებიდან იძულებით არიან გადასახლებულნი.

თავდაჯერებით ვაცხადებ, რომ მიუხედავად გამოვლილი განსაცდელისა, არ შეგვიფერხებია ჩვენი ამბიციების განხორციელება. ჩვენ საქართველო გადავაქციეთ დინამიკურად განვითარებად საზოგადოებად, რომელიც სრულად არის ერთგული გაერო-ს წესდებაში გათვალისწინებული ფუნდამენტური პრინციპებისა და ღირებულებების რეალიზაციის იდეისადმი.

საქართველოს კარგად ესმის ომისა და მშვიდობის ფასი. 2012 წლიდან ჩვენმა მთავრობამ შექმნა და შეინარჩუნა მშვიდობისა და სტაბილურობის უწყვეტი ათწლეული.

მსურს, ვისარგებლო შემთხვევით და გამოვხატო ჩვენი დიდი მადლიერება საერთაშორისო თანამეგობრობის მიმართ საქართველოს სუვერენიტეტისა და ტერიტორიული მთლიანობის ურყევი მხარდაჭერისთვის. მშვიდობიანი არსებობის უზრუნველსაყოფად მოვუწოდებ საერთაშორისო საზოგადოებას, დაარწმუნოს რუსეთის ფედერაცია, ჩაერთოს „ჟენევის საერთაშორისო მოლაპარაკებებში“ და განახორციელოს ევროკავშირის შუამავლობით 2008 წლის ცეცხლის შეწყვეტის შეთანხმება.

ჩვენი პრაგმატული საგარეო პოლიტიკის შედეგად, ბოლო ათწლეულის განმავლობაში შევინარჩუნეთ ეკონომიკური ზრდა. ვაგრძელებთ კრიტიკულად მნიშვნელოვანი ინვესტიციების განხორციელებას უკლებლივ ყველა ქართველის ცხოვრების ხარისხის გასაუმჯობესებლად. ორნიშნა ეკონომიკური ზრდა გვაქვს ზედიზედ ორი წლის განმავლობაში, ხოლო მთლიანი შიდა პროდუქტის (მშპ) ზრდის ტემპი 10 პროცენტს აღემატებოდა 2021 და 2022 წლებში. ეს პოზიტიური ზრდის ტენდენცია გაგრძელდა 2023 წელსაც და საშუალო ეკონომიკური ზრდის მაჩვენებელმა 7 პროცენტს მიაღწია.

ერთ სულ მოსახლეზე მთლიანი შიდა პროდუქტის (მშპ) მნიშვნელოვანი ზრდა ჩემი მთავრობის ყველაზე მნიშვნელოვანი მიღწევაა. 2012 წლიდან ის [მთლიანი შიდა პროდუქტი (მშპ)] ერთ სულ მოსახლეზე თითქმის გაორმაგდა. ვიმედოვნებთ, რომ ეს პოზიტიური ტენდენცია მომავალშიც გაგრძელდება. გარდა ამისა, მიმდინარე წლის ივლისში საქართველოს საერთაშორისო სავალუტო რეზერვების მოცულობამ ისტორიულ მაქსიმუმს მიაღწია, რაც თითქმის 90-პროცენტიანი ზრდაა 2012 წელთან შედარებით. უმუშევრობისა და სიღარიბის მაჩვენებლები ისტორიულ მინიმუმზეა.

World Justice-ის პროექტის 2022 წლის კანონის უზენაესობის ინდექსით, საქართველო აღმოსავლეთ ევროპისა და ცენტრალური აზიის რეგიონებში პირველ ადგილს იკავებს. Fraser Institute-ის 2022 წლის ანგარიშის – “მსოფლიოს ეკონომიკური თავისუფლება” – მიხედვით, საქართველო ყველაზე თავისუფალი ეკონომიკის მქონე ქვეყანაა 15 სახელმწიფოს შორის, ხოლო Heritage Foundation-ის ეკონომიკური თავისუფლების ინდექსით, საქართველო 21-ე ადგილს იკავებს ევროპაში 2023 წლის მდგომარეობით და ევროკავშირის 11 წევრ სახელმწიფოს უსწრებს. [NUMBEO] Crime Index საქართველოს 2023 წელს ასახელებს მსოფლიოში ერთ-ერთ ყველაზე უსაფრთხო ქვეყნად, რადგან გლობალურ ჭრილში – მე-18 ადგილზე, ხოლო ევროპის მასშტაბით მე-8 ადგილზე ვართ.

ჩემმა მთავრობამ 2022 წელს შეიმუშავა და დაამტკიცა „ხედვა 2030 – საქართველოს განვითარების სტრატეგია“, რომელიც ჩვენი ქვეყნის პირველი გრძელვადიანი პოლიტიკის ჩარჩო დოკუმენტია. ის მოიცავს რეფორმების ყოვლისმომცველ კომპლექტს, რომელიც ისეთ სფეროებს ეხება, როგორებიცაა ეკონომიკა, სოციალური პროგრესი, ჯეროვანი მმართველობა, მართლმსაჯულება და ადამიანის უფლებების დაცვა. ეს ჩარჩო დოკუმენტი 2030 წლამდე განხორციელდება.

ჩვენ ყოვლისმომცველი, მრავალმხრივი პროგრესისკენ ვისწრაფვით და მნიშვნელოვან აქცენტს ვაკეთებთ ასევე განათლებასა და სოციალურ კეთილდღეობაზე. განათლების ძლიერი სისტემების მნიშვნელობა არ შეიძლება გადაჭარბებულად იქნეს მიჩნეული, რადგან ის არის ძლიერი, აყვავებული და პროდუქტიული საზოგადოებების ქვაკუთხედი. განათლებისთვის საბიუჯეტო რესურსების გამოყოფით ვაუმჯობესებთ ციფრულ წიგნიერებას ამ მიმართულებით დიდი ნახტომის შესასრულებლად.

ჩვენი ძალისხმევა ეხება განათლების ყველა საფეხურს. ერთი მილიარდი აშშ დოლარი გამოვყავით მთელი ქვეყნის მასშტაბით სკოლებისა და საბავშვო ბაღების რეაბილიტაცია-აშენების მიზნით. გავზარდეთ ინვესტიციები ჯანდაცვისა და სოციალური დაცვის სფეროში. ამჟამად ჩვენი მოსახლეობის 95 პროცენტი სარგებლობს საყოველთაო ჯანდაცვის პროგრამით და მუდმივად ვაუმჯობესებთ ამ სერვისების ხარისხს. განზრახული გვაქვს მაქსიმალური ზრუნვა უზრუნველვყოთ ყველა მოქალაქისთვის.

ძვირფასო მეგობრებო, ეს წარმატებები მხოლოდ მცირე ნაწილია იმ პროგრესისა, რაც ჩემს ქვეყანას აქვს მიღწეული, მაგრამ ნათლად ასახავს ჩვენს ძალისხმევას, შევქმნათ შესაძლებლობები ყველა ჩვენი მოქალაქისთვის, მათ შორის − საქართველოს ოკუპირებულ ტერიტორიებზე მცხოვრებთათვის.

მივმართავ ჩვენს აფხაზ და ოს დებსა და ძმებს – ჩვენი ერთიანობის წინააღმდეგი არის ჩვენი საერთო მტერი. ჩვენ ვართ გენიალური ხალხი, რომელსაც წარმოუდგენელი მიღწევები ძალუძს, მაგრამ მხოლოდ ერთად შეგვიძლია უზრუნველვყოთ ხანგრძლივი სტაბილურობა, დიდი ინვესტიციების მოზიდვა და სრული პოტენციალის გამოვლენა, როგორც გაერთიანებულ ერს. არ უნდა დავუშვათ, რომ მშვიდობიანი, სტაბილური და აყვავებული მომავლისკენ დასახული შესაძლებლობა ხელიდან გავუშვათ.

ყოველი წინ გადადგმული ნაბიჯი მიზნად ისახავს საქართველოს დაბრუნებას ევროპულ ოჯახში, რომელსაც ვეკუთვნით. 2012 წლიდან ჩვენი მთავრობის მნიშვნელოვანი მიღწევები, მათ შორის ევროკავშირთან ასოცირების შეთანხმება, ღრმა და ყოვლისმომცველი თავისუფალი სავაჭრო სივრცის შესახებ შეთანხმება და უვიზო რეჟიმი, ადასტურებს ჩვენს გეოპოლიტიკურ პრიორიტეტს, გავხდეთ ევროკავშირის წევრი სახელმწიფო.

გასული წლის ივნისში საქართველოსთვის ევროპული პერსპექტივის აღიარებამ ახალი თავი გახსნა ევროკავშირთან ურთიერთობაში. ბოლო კვლევებმა აჩვენა, რომ ქართველების თითქმის 90 პროცენტი მხარს უჭერს ევროკავშირში გაწევრიანებას და ჩვენ ურყევი ერთგულება დავადასტურეთ ევროკავშირის კანდიდატი ქვეყნის სტატუსის მისაღებად განსაზღვრული 12 პრიორიტეტის მიმართ. ძლიერი, ინკლუზიური და გამჭვირვალე შიდა პროცესის მეშვეობით, რომელიც მოიცავს ყველა დაინტერესებულ მხარეს, ჩვენ ვახერხებთ წლის ბოლომდე მათ შესრულებას.

ჩვენი მიღწევები იმსახურებს ევროკავშირის დადებით გადაწყვეტილებას. ეგრეთ წოდებული ასოცირებული ტრიოს ქვეყნებს შორის ლიდერის რანგში საქართველომ ევროკავშირის კანდიდატის სტატუსი დაიმსახურა! ველით, რომ საქართველოს თვალსაჩინო შედეგები და რეგიონში არსებული გეოპოლიტიკური კონტექსტი სამართლიანად შეფასდება. საქართველოსთვის კანდიდატის სტატუსის მინიჭება ერთადერთი გზაა!

ბოლო დროს განვითარებული მოვლენების გათვალისწინებით, მინდა, ხაზი გავუსვა წესებზე დაფუძნებული საერთაშორისო წესრიგისა და გაერო-ს წესდებაში ასახული ფუნდამენტური პრინციპების მნიშვნელობას.

საქართველო არის საერთაშორისო თანამეგობრობის პასუხისმგებლიანი წევრი, რომელიც აქტიურად უწყობს ხელს მშვიდობის უზრუნველყოფას მსოფლიოში. ორ ათეულ წელზე მეტია, მნიშვნელოვანი წვლილი შეგვაქვს ნატო-ს მისიებში მთელი მსოფლიოს მასშტაბით, რაც საქართველოს ერთ-ერთ ყველაზე დიდ კონტრიბუტორად აქცევს ნატო-ს მისიებში ერაყსა და ავღანეთში. 32 მამაცმა ჯარისკაცმა გაიღო უდიდესი მსხვერპლი ავღანეთში, ხოლო ასობით დაშავდა თავისუფლებისა და მშვიდობის უზრუნველყოფის იდეისთვის. საქართველომ დიდი მსხვერპლი გაიღო ჩვენი საერთო ღირებულებებისა და ინტერესების დასაცავად.

ჩვენ მნიშვნელოვანი წვლილი შევიტანეთ ევროკავშირის ხელმძღვანელობით განხორციელებულ მისიებში და პირნათლად ვასრულებთ ამ ვალდებულებას.

ძვირფასო მეგობრებო, ჩვენ გლობალურად ვიბრძვით მშვიდობის, კეთილდღეობის, პროგრესისა და მდგრადობისთვის, მაგრამ გულს გვტკენს გაერო-ს წევრი სახელმწიფოს წინააღმდეგ გამოხატული აგრესია. უკრაინაში მიმდინარე ომი კვლავ აღვიძებს საქართველოში 2008 წლის ომის ტრავმას.

სრულად ვგრძნობთ იმ ტკივილსა და გაჭირვებას, რომელსაც ამჟამად უკრაინა განიცდის და სრულ სოლიდარობას ვუცხადებთ უკრაინელ ხალხს.

ჩვენ მივუერთდით, მხარი დავუჭირეთ და ხელი მოვაწერეთ 500-ზე მეტ რეზოლუციას, განცხადებას, ერთობლივ კომუნიკეს და სხვა ინიციატივებს უკრაინის და უკრაინელი ხალხის მხარდასაჭერად. ჩვენმა დასავლელმა პარტნიორებმა, მათ შორის შეერთებულმა შტატებმა, ევროკავშირმა და დიდმა ბრიტანეთმა არაერთხელ შეაქეს ჩვენი შესაბამისობა საერთაშორისო ფინანსურ სანქციებთან.

ჩემი მთავრობა უკრაინას და უკრაინელ ხალხს არსებით ჰუმანიტარულ დახმარებას უწევს ომის დაწყების დღიდან. ეს ხდება ქვეყნის და ინდივიდების დონეზე, რომლებიც ამჟამად ცხოვრობენ საქართველოში. ქართულმა სკოლებმა 2200-ზე მეტი უკრაინელი მოსწავლე მიიღეს და უკრაინულ ენაზე უზრუნველყოფენ სწავლებას ოფიციალური, უკრაინული სასწავლო პროგრამით.

ნება მომეცით, მკაფიოდ განვაცხადო – ჩვენი მთავრობის ფუნდამენტური ფილოსოფია არის ომის აცილება და მშვიდობის უზრუნველყოფა. ჩვენი გეოგრაფიული მდებარეობის გამო წარმოქმნილი გამოწვევების მიუხედავად, მოვახერხეთ ჩვენი ხალხის უსაფრთხოდ ყოფნა უკრაინისა და საერთაშორისო თანამეგობრობის მხარდაჭერისას წინდახედული პოლიტიკითა და პარტნიორებთან მჭიდრო კოორდინაციით.

ჩემი მთავრობის „მშვიდობიანი სამეზობლო ინიციატივის“ საფუძველზე ვაცხადებთ მზაობას, რათა ამ პროცესში ჩავრთოთ ჩვენი მეზობლები და მეგობრები სომხეთიდან, აზერბაიჯანიდან, რათა ხანგრძლივი მშვიდობა საბოლოოდ დამყარდეს სამხრეთ კავკასიაში.

ძვირფასო მეგობრებო, საქართველო ყალიბდება მრავალგანზომილებიან რეგიონულ ჰაბად. ჩვენმა ფინანსურმა სექტორმა გლობალური აღიარება მოიპოვა და საერთაშორისო ინვესტორებს ვიზიდავთ, რასაც დამატებით კაპიტალი შემოაქვს ჩვენს ეკონომიკაში. ასევე, პრიორიტეტულად გვაქვს მიჩნეული ინვესტიციები ჩვენს ინფრასტრუქტურაში, რათა გაძლიერდეს დაკავშირებადობის უნარი, წარმატებით განვითარდეს ლოგისტიკური და ენერგეტიკული სექტორები.

სტრატეგიულ სატრანსპორტო დერეფნებს ვავითარებთ აზიასა და ევროპას შორის გადამწყვეტი კავშირების დასამყარებლად. საქართველოს მონაწილეობა სხვადასხვა საერთაშორისო ინიციატივასა და ინფრასტრუქტურულ პროექტში აძლიერებს ამ კავშირს და ხელს უწყობს ვაჭრობას შავი ზღვის რეგიონში.

შუა დერეფანი გამოჩნდა, როგორც უსაფრთხო და საიმედო მარშრუტი, რომელიც აკავშირებს აღმოსავლეთსა და დასავლეთს. ჩვენ ხელი მოვაწერეთ სრულყოფილ საგზაო რუკებს აზერბაიჯანსა და ყაზახეთთან, რათა აღმოვფხვრათ დაბრკოლებები და გავამყაროთ შუა დერეფანი 2022-2027 წლებში. ხსენებული საგზაო რუკები ითვალისწინებს კონკრეტულ ქმედებებს, რომლებიც დაკავშირებულია სატრანსპორტო და ლოგისტიკური ინფრასტრუქტურის განვითარებასთან, საოპერაციო ოპტიმიზაციასთან, ერთიანი სატარიფო პოლიტიკის შემუშავებასთან, დერეფნის გაციფროვნებასთან და მარეგულირებელი ჩარჩოს გაუმჯობესებასთან.

აღმოსავლეთის დასავლეთთან კავშირის გაძლიერების მიზნით, საქართველომ 2015 წელს დააარსა „თბილისის აბრეშუმის გზის ფორუმი“ და ასე შექმნა საერთაშორისო პლატფორმა მაღალი რანგის პოლიტიკოსებს, ბიზნესწრეებსა და საზოგადოების ლიდერებს შორის დიალოგისთვის. „თბილისის აბრეშუმის გზის ფორუმი“ წელს 26-27 ოქტომბერს გაიმართება და მასში დაახლოებით 2000 დელეგატი მიიღებს მონაწილეობას. მათ შორის იქნებიან 60-ზე მეტი ქვეყნის მაღალი რანგის ოფიციალური პირები და ბიზნესწრეების წარმომადგენლები.

საქართველომ მნიშვნელოვანი ინფრასტრუქტურული პროექტების განხორციელება დაიწყო. მათ შორისაა რკინიგზის მოდერნიზაციის პროექტი. სისტემის გამტარუნარიანობა გაორმაგდება 2024 წლის ბოლოსთვის, პროექტის დასრულების შემდეგ.

ახალი, ანაკლიის ღრმაწყლოვანი პორტის მშენებლობა, რომელიც უახლოეს მომავალში დაიწყება, ჩემი მთავრობის მთავარი პრიორიტეტია. ეს მწვანე ველი მოიაზრება საჯარო და კერძო სექტორებს შორის პარტნიორობის პროექტად, რომელიც შექმნის თანამედროვე ღრმაწყლოვან პორტს შავი ზღვის აღმოსავლეთ სანაპიროზე.

ჩვენი მთავრობა აუმჯობესებს ქვეყნის საჰაერო დაკავშირებადობას და ამ მიზნით თბილისში ახალ საერთაშორისო აეროპორტს ვაშენებთ. ის იქნება მსოფლიო დონის სატრანსპორტო კვანძი, რომელიც განამტკიცებს საქართველოს, როგორც გლობალური ავიაციის გამორჩეული მოთამაშის სტატუსს.

გარდა ამისა, ამჟამად უკვე ხორციელდება ევროკავშირის ფლაგმანური, შავი ზღვის წყალქვეშა კაბელის მშენებლობის პროექტი, რომელიც საქართველოს მიერ არის ინიციირებული. ეს პროექტი გულისხმობს მაღალი ძაბვის წყალქვეშა გადამცემი ხაზის მშენებლობას სამხრეთ-აღმოსავლეთ ევროპასთან სამხრეთ კავკასიის რეგიონის დასაკავშირებლად. პროექტის განხორციელება გააძლიერებს ენერგეტიკულ უსაფრთხოებას ევროპასა და სამხრეთ კავკასიის რეგიონში, ხელს შეუწყობს განახლებადი ენერგიის წყაროების განვითარებას და ახალ შესაძლებლობებს შექმნის ამ ორ რეგიონს შორის ტრანზიტისთვის.

ვაღიარებთ ენერგიაზე მზარდ მოთხოვნასაც და კლიმატის ცვლილებასთან გამკლავების საჭიროებას; აქტიურად ვახორციელებთ ახალ წამოწყებებს განახლებადი ენერგიის სფეროში, მათ შორის − წყლის, ქარის, მზისა და სხვა მდგრადი წყაროების ათვისებით. ჩვენი მიზანია, მოვიზიდოთ ინვესტორები და ხელსაყრელი გარემო შევქმნათ ინოვაციური ელექტროსადგურების შესაქმნელად ქვეყნის უხვი მწვანე ენერგიის პოტენციალის გამოყენებით.

ყველა ეს ტრანსფორმაციული პროექტი ახალ სამუშაო ადგილებს, ეკონომიკურ ზრდას და კეთილდღეობას მოუტანს ჩვენს ხალხსა და რეგიონს.

ძვირფასო მეგობრებო, საქართველომ მნიშვნელოვანი პროგრესი განიცადა დამოუკიდებლობის აღდგენის შემდეგ. ჩვენ ერთგულნი ვართ ქართველი ხალხისთვის კიდევ უფრო დიდი შედეგების მიღწევის იდეისადმი, ხოლო გლობალურ საზოგადოებაში – მნიშვნელოვანი წვლილის შეტანის იდეისადმი. მზად ვართ, გავაძლიეროთ საერთაშორისო პარტნიორობა და თანამშრომლობა უფრო მშვიდობიანი, მდგრადი მომავლის უზრუნველსაყოფად.

ჩვენი საერთო თვისება – ადამიანურობა – გვაკავშირებს ერთმანეთთან და ჩვენივე კოლექტიური პასუხისმგებლობაა, ერთმანეთი გავაძლიეროთ და ხანგრძლივი მემკვიდრეობა დავუტოვოთ მომავალ თაობებს“.

შინაგან საქმეთა მინისტრი, ვახტანგ გომელაური რაჭაში, ონის მუნიციპალიტეტში მომხდარ სტიქიასთან დაკავშირებით საქართველოს საკანონმდებლო ორგანოში ინტერპელაციის წესით იმყოფებოდა.

ვახტანგ გომელაურმა შოვში მომხდარი ტრაგიკული მოვლენების შესახებ დეტალურად ისაუბრა და დეპუტატების მიერ დასმულ კითხვებს უპასუხა.
შინაგან საქმეთა მინისტრმა სტიქიის შედეგად დაღუპულების ოჯახის წევრებსა და ახლობლებს მიუსამძიმრა. როგორც ვახტანგ გომელაურმა აღნიშნა, შოვში მომხდარი სტიქია უდიდესი ტრაგედიაა მთელი ქვეყნისათვის:
„პირველ რიგში, მინდა კიდევ ერთხელ გამოვხატო ჩემი გულწრფელი მწუხარება მომხდარი ტრაგედიის გამო და მივუსამძიმრო გარდაცვლილთა ოჯახის წევრებს და ახლობლებს.

შოვში მომხდარი სტიქია უდიდესი ტრაგედიაა მთელი ქვეყნისათვის:
სტიქიასთან ბრძოლის დროს, ჩვენ დავკარგეთ ძალოვანი უწყებების, შინაგან საქმეთა და თავდაცვის სამინისტროს თანამშრომლები - პოლიციის მაიორი, - მირიან ჭელიძე და თავდაცვის სამინისტროს ეროვნული გვარდიის თანამშრომელი - თემურ ხარჩილავა. კიდევ ერთხელ, ვუსამძიმრებ მათ ოჯახებს, ახლობლებს და კოლეგებს. მადლობა მათ ქვეყნის სამსახურში ყოფნისთვის, მათი დაკარგვა დიდი ტკივილია ჩვენი დიდი ოჯახისთვის,“- განაცხადა შინაგან საქმეთა მინისტრმა.

სიტყვით გამოსვლისას, ვახტანგ გომელაურმა შოვში, სტიქიის ზონაში ძებნა-შველის ღონისძიებებში ჩართულ ყველა პირს მადლობა გადაუხადა.
„3 აგვისტოს, შოვში სტიქია ძალიან სწრაფად განვითარდა, ღვარცოფის უზარმაზარი მასა , რომელიც გარემოს დაცვის ექსპერტების პირველადი შეფასებით შეადგენდა დაახლოებით 5 მილიონ კუბურ მეტრს, დაიძრა სტიქიის ეპიცენტრის მიმართულებით და დაფარა კურორტ შოვის მიმდებარე ტერიტორია. აღნიშნულ მასაში, რამდენიმე მეტრი მიწის ქვეშ, მოყვნენ ადგილზე მყოფი ადამიანები. ამგვარი სიღრმის ქვეშ, მათი სიცოცხლის გადარჩენა ფაქტობრივად შეუძლებელი იყო.

ძებნა-შველის ოპერაციას და ამ ოდენობით მიწის მასის დამუშავებას თავისთავად დრო სჭირდებოდა. 100-მდე (86 ერთეული) მძიმე ტექნიკის მეშვეობით, მოხერხდა ღვარცოფული მასის სრულად გადამუშავება, რათა გარდაცვლილების პოვნა შეგვძლებოდა.
დღეის მონაცემებით, მაშველების მიერ ძებნა-შველის ღონისძიების შედეგად, აღმოჩენილია 32 ცხედარი და საძიებო სამუშაოები მიმდინარეობს 1 პირთან დაკავშირებით, რომელიც გაგრძელდება მანამ, სანამ იარსებებს მისი პოვნის თეორიული შანსი.
სამაშველო ოპერაციის დროს ნაპოვნი ცხედრები იმდენად იყო დაზიანებული, რომ გამორიცხულია გარდაცვალება მომენტალურად არ დამდგარიყო. ცხედრების უმეტესობა არის დანაწევრებული და ფაქტობრივად მაშველების მიერ ნაპოვნია სხეულის ფრაგმენტები.

ისმოდა სპეკულაციები, რომ ვერტმფრენით და სითბური დრონებით იყო შესაძლებელი სამაშველო ღონისძიებების დაჩქარება და ამ ადამიანების გადარჩენა. მინდა კიდევ ერთხელ განვმარტო, რომ პირველ დღეს ადგილზე მუშაობდნენ ვერტმფრენები და სითბური დრონები, თუმცა ელემენტარული ანალიზიც კი საკმარისია, იმისთვის რომ ადამიანი მიხვდეს - ვერტმფრენებით ან დრონებით ვინმეს აღმოჩენა შესაძლებელია მხოლოდ მიწის ზედაპირზე, ხოლო მიწისქვეშ მოყოლილთა პოვნა ვერტმფრენით ან დრონით შეუძლებელია.

საზოგადოებამ ნათლად იხილა, რომ ის ადამიანები, რომლებიც მიწის მასის ქვეშ მოყოლას გადარჩნენ, მაშველების, პოლიციელების და ადგილზე მყოფი მოქალაქეების მიერ უვნებლად იყვნენ გამოყვანილები უსაფრთხო ადგილას პირველივე საათებში. რისთვისაც კიდევ ერთხელ მინდა მადლობა გადავუხადო მათ“, - განაცხადა ვახტანგ გომელაურმა.

შინაგან საქმეთა მინისტრმა ვახტანგ გომელაურმა საკანონმდებლო ორგანოში შოვის ტრაგედიასთან დაკავშირებით, ინტერპელაციის წესით სიტყვით გამოსვლისას, შეტყობინების პირველივე წუთებიდან მომხდარ რეაგირებასა და ჩატარებულ სამაშველო ღონისძიების შესახებ დეტალურად ისაუბრა.

მისი თქმით, სამწუხაროა, რომ ტრაგედიის ფონზე არაერთი პოლიტიკური სპეკულაცია, სიცრუე და ცილისწამება მოვისმინეთ.

„მიუხედავად იმისა, რომ რაჭაში სტიქიის დაწყების პირველივე წუთებიდან საზოგადოებას მაქსიმალურად მოკლე დროში ვაწვდიდით გადამოწმებულ ინფორმაციას, საკანონმდებლო ორგანოს წინაშე ანგარიშვალდებულების გათვალისწინებით, შევეცდები კიდევ ერთხელ, ამომწურავად გავცე პასუხი იმ კითხვებს, რომლებიც დეპუტატებისგან მივიღე. სამწუხაროა, რომ ტრაგედიის ფონზე მოვისმინეთ არაერთი პოლიტიკური სპეკულაცია, სიცრუე და ცილისწამება. საზოგადოებამ უნდა იცოდეს ობიექტური რეალობა, ამიტომ ყოველთვის მზად ვართ, ფაქტებზე დაყრდნობით, სიღრმისეულად მივუდგეთ ყველა იმ საკითხს, რომელიც ჩვენს მოქალაქეებს აღელვებთ. მოგეხსენებათ, რომ 3 აგვისტოს, შოვში სტიქია ძალიან სწრაფად განვითარდა, ღვარცოფის უზარმაზარი მასა, რომელიც გარემოს დაცვის ექსპერტების პირველადი შეფასებით შეადგენდა დაახლოებით 5 მილიონ კუბურ მეტრს, დაიძრა სტიქიის ეპიცენტრის მიმართულებით და დაფარა კურორტ შოვის მიმდებარე ტეროტორია. აღნიშნულ მასაში, რამდენიმე მეტრი მიწის ქვეშ, მოყვნენ ადგილზე მყოფი ადამიანები. ამგვარი სიღრმის ქვეშ, მათი სიცოცხლის გადარჩენა ფაქტობრივად შეუძლებელი იყო. ძებნა-შველის ოპერაციას და ამ ოდენობით მიწის მასის დამუშავებას თავისთავად დრო სჭირდებოდა. 100-მდე (86 ერთეული) მძიმე ტექნიკის მეშვეობით, მოხერხდა ღვარცოფული მასის სრულად გადამუშავება, რათა გარდაცვლილების პოვნა შეგვძლებოდა. დღეის მონაცემებით, მაშველების მიერ ძებნა-შველის ღონისძიების შედეგად, აღმოჩენილია 32 ცხედარი და საძიებო სამუშაოები მიმდინარეობს 1 პირთან დაკავშირებით, რომელიც გაგრძელდება მანამ, სანამ იარსებებს მისი პოვნის თეორიული შანსი. სამაშველო ოპერაციის დროს ნაპოვნი ცხედრები იმდენად იყო დაზიანებული, რომ გამორიცხულია გარდაცვალება მომენტალურად არ დამდგარიყო. ცხედრების უმეტესობა არის დანაწევრებული და ფაქტობრივად მაშველების მიერ ნაპოვნია სხეულის ფრაგმენტები“, - აღნიშნა ვახტანგ გომელაურმა.

ანაკლიის პორტის პროექტთან დაკავშირებით უახლოეს რამდენიმე კვირაში სამშენებლო ტენდერი გამოცხადდება, რომელსაც სახელმწიფო საწარმო „ანაკლიის საზღვაო ნავსადგური“ წარმართავს და შეირჩევა მშენებელი კომპანია, – ამის შესახებ ეკონომიკისა და მდგრადი განვითარების მინისტრმა, ვიცე-პრემიერმა, ლევან დავითაშვილმა განაცხადა პარლამენტში, სადაც ინტერპელაციის წესით ანაკლიის პორტის პროექტთან დაკავშირებით დეპუტატების კითხვებზე პასუხისას კითხვებს პასუხობს.

ლევან დავითაშვილი განცხადებით, ამჟამად დაქირავებული კონსულტანტი, ბელგიური საინჟინრო კომპანია HAEDES სატენდერო დოკუმენტაციაზე მუშაობას ასრულებს. ხელშეკრულების მიხედვით, მათ ეს სამუშაო რამდენიმე კვირის განმავლობაში უნდა დაასრულონ და მოხდება სამშენებლო ტენდერის გამოცხადება, რომელსაც სახელმწიფო საწარმო წარმართავს, შეირჩევა მშენებელი კომპანია.

ამასთან, ეკონომიკის მინისტრის თქმით, უკვე ჩატარდა ინტერვიუები რამდენიმე მნიშვნელოვან, წამყვან ევროპულ კომპანიასთან.

„ესენია დიდი ე.წ. სამეული თუ ოთხეული კომპანია, რომლებიც საზღვაო ინფრასტრუქტურის მშენებლობაში არიან წამყვანი კომპანიები და ჩვენ გვაქვს უკვე წინასწარი მონაცემები იმისთვის, რომ სატენდერო პირობები დაზუსტდეს და მკაფიოდ ჩამოყალიბდეს. ასე რომ, უკვე უახლოეს ხანებში, სულ რამდენიმე კვირის განმავლობაში ტენდერი გვექნება გამოცხადებული. ჩვენი მოლოდინით, მიმდინარე წლის ბოლომდე შევძლებთ მშენებელი კომპანიის შერჩევას და სამშენებლო სამუშაოების დაწყებასაც“, – აღნიშნა ლევან დავითაშვილმა.

რაც შეეხება ფინანსებს, ვიცე-პრემიერის განცხადებით, 2023 წლის ბიუჯეტში ცვლილებებში უკვე არის ასახული, მიმდინარე წელს 20 მილიონი ლარი ანაკლიის პორტის განვითარებისთვის. პროექტის ბიუჯეტთან დაკავშირებით ლევან დავითაშვილმა ასევე განმარტა, რომ პროექტი რამდენიმე წლის განმავლობაში განხორციელდება და შესაბამისად, იმ ნაწილზე, რომელსაც სახელმწიფო დააფინანსებს, ბიუჯეტში იქნება მონაცემები წარმოდგენილი. საკონსულტაციო სამუშაოებისთვის დაფინანსება კი, მინისტრის ინფორმაციით, გათვალისწინებული იყო ეკონომიკისა და მდგრადი განვითარების სამინისტროს ბიუჯეტში, რაც ბიუჯეტის კანონთან შესაბამისობაშია.

„განახლებულია მათ შორის პროექტის წინასწარი ხარჯთაღრიცხვა. ამ შემთხვევაში ჩვენმა კომერციულმა საკონსულტაციო კომპანიამ MTBS-მა განაახლა და ჩვენ იმედი გვაქვს, რომ შემდგომში უკვე ტენდერის პირობებში მოხდება ამ რიცხვების შემცირება, რადგან კონკურსი იქნება და კონკურენციის პირობებში შეიძლება შემცირდეს. 589 მილიონი დოლარი, ეს არის პროექტის პირველი ფაზის ღირებულება“, – განაცხადა ეკონომიკის მინისტრმა.

ინფორმაციას ეკონომიკისა და მდგრადი განვითარების სამინისტროს პრესსამსახური ავრცელებს.

„თბილსერვის ჯგუფის“ პროფესიულ დღესთან დაკავშირებით დედაქალაქის მერი კახა კალაძე კომპანიის თანამშრომლებს შეხვდა და მადლობის სიგელები გადასცა. ინფორმაციას თბილისის მერია ავრცელებს.

დაჯილდოების ცერემონიაში ასევე მონაწილეობდნენ თბილისის მერის მოადგილე ანდრია ბასილაია და „თბილსერვის ჯგუფის“ დირექტორი დავით ფაჩულია.

კახა კალაძემ თანამშრომლებს სიტყვით მიმართა და ხაზი გაუსვა მათი სამუშაო პირობების გაუმჯობესების, მათ შორის, შესაბამისი ტექნიკით უზრუნველყოფის საკითხს.

თბილისის მერის თქმით, ქალაქს ბოლო ორი წლის განმავლობაში სხვადასხვა ტიპისა და წარმოების 104 ახალი სპეცმანქანა შეემატა, აქედან 23 ერთეული მიმდინარე წელს იქნა შემოყვანილი.

„მადლობა, მინდა, გითხრათ თითოეულ თქვენგანს იმისთვის, რასაც აკეთებთ დედაქალაქისთვის. 20 სექტემბერს 16 წელი გავიდა, რაც „თბილსერვის ჯგუფი“ დაარსდა. ჩვენი ქალაქი რომ ასეთი სუფთა, მოწესრიგებული და განათებულია, თქვენი დამსახურებაა. ჩვენი მხრივ, ვცდილობთ, ხელი შეგიწყოთ, შეგიმსუბუქოთ მუშაობა ტექნიკით, აღჭურვილობით. ბოლო ორი წლის განმავლობაში 104 ერთეული ტექნიკა შევისყიდეთ. განვაგრძობთ შესყიდვებს იმისთვის, რომ „თბილსერვის ჯგუფი“ იყოს აღჭურვილი. წარმატებებს გისურვებთ თქვენს საქმიანობაში ჩვენი ქალაქის საკეთილდღეოდ“, – განაცხადა კახა კალაძემ.

სიგელები გადაეცა დასუფთავების დეპარტამენტის, გარე განათების, სანიაღვრე ქსელების, საგზაო მონიშვნებისა და სხვა სამსახურების 101 თანამშრომელს.

ინფორმაციას თბილისის მერიის პრესსამსახური ავრცელებს.

რადგან ევროკავშირის კანდიდატი ქვეყნის სტატუსს დამსახურებულად ველით, კიდევ უფრო მეტად დასაფასებელია მალტას მხარდაჭერა საქართველოს ევროინტეგრაციის გზაზე, - ამის შესახებ საქართველოს პრემიერ-მინისტრი ირაკლი ღარიბაშვილი „ტვიტერზე“ წერს.

როგორც მთავრობის მეთაური აღნიშნავს, მალტას რესპუბლიკის პრემიერ-მინისტრ რობერტ აბელასთან შეხვედრისას საუბარი შეეხო ორმხრივი კავშირების გაძლიერების საკითხებს.

„ნაყოფიერი შეხვედრა მქონდა მალტას რესპუბლიკის პრემიერ-მინისტრ რობერტ აბელასთან. საუბარი შეეხო ორმხრივი კავშირების გაძლიერებისა და მრავალმხრივი თანამშრომლობის გამყარების გზებს. რადგან ევროკავშირის კანდიდატი ქვეყნის სტატუსს დამსახურებულად ველით, კიდევ უფრო მეტად დასაფასებელია მალტას მხარდაჭერა საქართველოს ევროინტეგრაციის გზაზე“, - აღნიშნავს პრემიერი.

ლუქსემბურგის პრემიერ-მინისტრ ქსავიე ბეტელთან განვიხილეთ საქართველოს მიერ მიღწეული წინსვლა 12 რეკომენდაციის განხორციელების მიმართულებით , - ამის შესახებ საქართველოს პრემიერ-მინისტრი ირაკლი ღარიბაშვილი “ტვიტერზე” წერს.

როგორც მთავრობის მეთაური აღნიშნავს, შეხვედრაზე მან მადლიერება გამოხატა ლუქსემბურგის ურყევი მხარდაჭერისთვის, რომელსაც ევროკავშირში საქართველოს გაწევრიანების მიმართ გამოხატავს.

“გაეროს 78-ე გენერალური ასამბლეის ფარგლებში ძალიან კარგი შეხვედრა მქონდა ლუქსემბურგის პრემიერ-მინისტრ ქსავიე ბეტელთან.

განვიხილეთ საქართველოს მიერ მიღწეული წინსვლა 12 რეკომენდაციის განხორციელების მიმართულებით და მადლიერება გამოვხატე ლუქსემბურგის ურყევი მხარდაჭერისთვის, რომელსაც ევროკავშირში საქართველოს გაწევრიანების მიმართ გამოხატავს.

კოლეგას დავუდასტურე საერთო ინტერესების მქონე სფეროებში თანამშრომლობის დიდი სურვილი”, - აღნიშნავს პრემიერი.

ფლორიდაში, ფორტ ლოდერდეილის ბინადრებს ახალი მეზობელი ჰყავთ. ლიონელ მესიმ 10.8 მილიონ დოლარად ზღაპრული ვილა შეიძინა და მეუღლესთან და სამ შვილთან ერთად, სწორედ იქ იცხოვრებს. მესის ახალი სახლი სანაპიროზე მდებარეობს, აქვს ორი დოკი - ნავებისა და იახტებისთვის, დიდი აუზი, ათი საძინებელი, დიდი ავტოფარეხი - რამდენიმე ავტომობილისთვის.

მართალია, მთლიანად ტერიტორია მხოლოდ 1000 კვადრატულ მეტრზეა განლაგებული, მაგრამ ეს უბანი ერთ-ერთ ყველაზე პრესტიჟულად ითვლება და ესეც არ იყოს, აღნიშნული ვილა არ არის ერთადერთი უძრავი ქონება, რომელიც ლეოს მაიამიში აქვს. მათ შორის, ყველაზე ძვირადღირებული შენაძენი მაიამიში, „პორშე დესინგ თაუერში“ აქვს, რომელშიც 2018 წელს, ლეომ 8 მილიონი გადაიხადა, ახლა კი ამ უძრავი ქონების ფასი 15 მილიონს აჭარბებს. „პორშე დესინგ თაუერის“ ყველაზე საინტერესო და გამორჩეული დეტალი ავტომობილებისთვის განკუთვნილი ლიფტია, რომლითაც ადამიანს... პირდაპირ ბინაში შეუძლია ასვლა.

ავტორი: ბათო ჯაფარიძე

ძალიან მეგობრული შეხვედრა გაიმართა გაეროს გენერალურ მდივანთან, ბატონ ანტონიო გუტიერეშთან, რომელმაც პრემიერ-მინისტთან საუბრისას ხაზი გაუსვა კრიზისებით დამძიმებულ გარემოში საქართველოს ხელისუფლების ბრძნულ პოლიტიკას მშვიდობისა და სტაბილურობის უზრუნველყოფის, ასევე, ეკონომიკური განვითარების მიმართულებით, - ამის შესახება გაერთიანებული ერების ორგანიზაციასთან საქართველოს მუდმივმა წარმომადგენელმა დავით ბაქრაძემ განაცხადა.

მან ასევე აღნიშნა, რომ შედეგზე ორიენტირებული და ძალიან მნიშვნელოვანი ორმხრივი შეხვედრები გაიმართა.

„გრძელდება საქართველოს პრემიერ-მინისტრის, ბატონი ირაკლი ღარიბაშვილისა და საქართველოს დელეგაციის ვიზიტი ნიუ-იორკში. ძალიან მეგობრული შეხვედრა გაიმართა გაეროს გენერალურ მდივანთან, ბატონ ანტონიო გუტიერეშთან, რომელმაც პრემიერ-მინისტთან საუბრისას ხაზი გაუსვა კრიზისებით დამძიმებულ გარემოში საქართველოს ხელისუფლების ბრძნულ პოლიტიკას მშვიდობისა და სტაბილურობის უზრუნველყოფის, ასევე, ეკონომიკური განვითარების მიმართულებით და მხარდაჭერა აღუთქვა საქართველოს ტერიტორიული მთლიანობისა და არაღიარების პოლიტიკის თვალსაზრისით.
შედეგზე ორიენტირებული და შესაბამისად, ძალიან მნიშვნელოვანი იყო შეხვედრები, ორმხრივი შეხვედრები, რომლებიც გაიმართა საქართველოს პრემიერ-მინისტრისა და საგარეო საქმეთა მინისტრის მიერ გაეროს გენერალური ასამბლეის პარალელურად. განსაკუთრებით ევროპელ ლიდერებთან, საუბარი დაეთმო საქართველოს ხელისუფლების მიერ 12 პუნქტის წარმატებით შესრულებას და ასევე, იმ მაღალ მოლოდინებს, რომლებიც გააჩნია საქართველოს მოსახლეობას კანდიდატის სტატუსის მიღების თვალსაზრისით.
დღეს კი უკვე მთავარი ღონისძიებაა. საქართველოს პრემიერ-მინისტრი გაეროს გენერალური ასამბლეის დებატების ფარგლებში მიმართავს მსოფლიო ლიდერებს, ხაზს გაუსვამს ჩვენი ხელისუფლების მშვიდობიან პოლიტიკას ტერიტორიული მთლიანობის აღდგენის თვალსაზრისით, ისაუბრებს იმ ეკონომიკურ რეფორმებზე და დემოკრატიულ რეფორმებზე, რომლებიც განახორციელა საქართველოს ხელისუფლებამ მოსახლეობისათვის ხელშესახები შედეგების მიღების მიზნით“, - განაცხადა დავით ბაქრაძემ.