ქალმა 30 წლის შემდეგ ენა ამოიდგა

გაციების დროს, ისეთი გავრცელებული დაავადება, როგორიცაა ლარინგიტი, ხშირად ხმის დაკარგვით ხასიათდება, თუმცა მალე გაივლის ხოლმე. აშშ-ს მცხოვრები კი ამის გამო, მთელი 30 წლით დამუნჯდა და მხოლოდ ახლა შეძლეს მედიკოსებმა მისთვის ხმის დაბრუნება. შორეული 1991 წლის დასაწყისში, ბეტი ტრუფანტი, რომელიც მაშინ 34 წლის იყო, ძლიერ გაცივდა და თანდათან, ლარინგიტი ლარინგოტრაქეიტში გადაუვიდა - ჯერ ხმა ჩაეხლიჩა, მერე კი საერთოდ დაკარგა. ექიმმა დაამშვიდა, ორ-სამ კვირაში, ხმა ისევ დაგიბრუნდებაო, მაგრამ ბეტიმ სხვებთან ურთიერთობის მთავარი საშუალება სამუდამოდ დაკარგა.

„პრაქტიკულად, სამი ათეული წელი იზოლირებული ვიყავი და პატარა ქალიშვილსაც ჟესტებით ველაპარაკებოდი“, - ამბობს ქალბატონი ტრუფანტი. მედიკოსებმა განუცხადეს, რომ უძლურები იყვნენ და ხმას ვერ დაუბრუნებდნენ. მხოლოდ ახლა, რამდენიმე თვის წინ, ბეტიმ შემთხვევით, ტელევიზიით ნახა სიუჟეტი მის მსგავსად დაზარალებულ ქალზე, რომელსაც კლივლენდის სპეციალურ კლინიკაში უშველეს. აქ ბეტისაც დაეხმარნენ და სპეციალური ოპერაციის შემდეგ, 30 წლის წინ დაკარგული ხმა კვლავ დაუბრუნეს.