პოლიტიკა

ხვალ, 19:00 საათზე, პარლამენტის წინ საპროტესტო აქცია სახელწოდებით, "დაიბრუნე ხმა" გაიმართება.გავრცელებული ინფორმაციით, აქციაზე დამკვირვებელი ორგანიზაციები და დამკვირვებლები მთელი საქართველოდან მოჰყვებიან, რა ნახეს 26 ოქტომბერს საარჩევნო უბნებზე, ხოლო ორგანიზატორები ისაუბრებენ ხედვაზე, როგორ უნდა მივიდეთ ხელახალ და სამართლიან არჩევნებამდე.

"2024 წლის 26 ოქტომბერს, საქართველოში საპარლამენტო არჩევნები უნდა ჩატარებულიყო, რეალურად კი ხელისუფლებამ ამომრჩეველი მასიურად დააშინა, მოისყიდა, გააკონტროლა მათი არჩევანი და სხვების პერსონალური მონაცემების გამოყენებით მიითვისა ხმები. ეს არჩევნები არ არის! 

უხეშად დაირღვა საქართველოს კონსტიტუცია, რადგან არჩევნები არ იყო ფარული და თავისუფალი. ქართულმა სადამკვირვებლო ორგანიზაციებმა, ათასობით საქართველოს მოქალაქესთან და თავისუფალ მედიასთან ერთად გამოააშკარავეს არჩევნების გაყალბების სქემები და შეაგროვეს მტკიცებულებები. შედეგად 2024 წლის საპარლამენტო არჩევნები საერთაშორისო პარტნიორებმა არ ცნეს სამართლიან და თავისუფლად არჩევნებად. რუსმა ოლიგარქმა გადაწყვიტა, რომ არჩევნებს გამოაცალოს შინაარსი – ფარულობა, თავისუფლება და სამართლიანობა, რაც საფუძველს აცლის საქართველოს დემოკრატიულ მომავალს. ცხადია, ჩვენ ამას არ შევეგუებით. ცხადია, ჩვენ ვიბრძოლებთ, რომ დავიბრუნოთ ის, რაც კონსტიტუციურად გვეკუთვნის – ჩვენი ხმა და არჩევანის თავისუფლება!", - ნათქვამია განცხადებაში. 

“შემაჯამებელი ოქმი შემდგარია. ამით ფაქტობრივად საარჩევნო პერიოდი დასრულდა”, - განაცხადა ცესკოს თავმჯდომარემ, გიორგი კალანდარიშვილმა, ოქმზე ხელმოწერის შემდეგ. ოქმს ხელი მოაწერა ასევე ცესკოს მდივანმა, გიორგი ჯავახიშვილმა.

ცენტრალურმა საარჩევნო კომისიამ 26 ოქტომბრის საპარლამენტო არჩევნების შედეგები შეაჯამა. საარჩევნო ადმინისტრაციის განცხადებით, ქართულმა ოცნებამ 53.93% მიიღო. მანდატების რაოდენობა 89, კოალიცია ცვლილებისთვის 11.03 %, მანდატების რაოდენობა 19, ერთიანობა ნაციონალური მოძრაობა  10.17%, მანდატების რაოდენობა 16, კოალიცია ძლიერი საქართველო 8.81% მანდატების რაოდენობა 14, გახარია საქართველოსთვის 7.78 %. მანდატების რაოდენობა 12.

ცესკოში სხდომა ხმაურით მიმდინარეობდა.

კომისიის წევრმა "ერთიანი ნაციონალური მოძრაობიდან", დავით კირთაძემ ცენტრალური საარჩევნო კომისიის თავმჯდომარეს შავი სითხე შეასხა, რის შემდეგაც სხდომა მცირე ხნით შეწყდა. კალანდარიშვილი სხდომაზე თვალახვეული დაბრუნდა. მან ტანსაცმელიც გამოიცვალა - სხდომაზე დაბრუნებულს ჰალსტუხი აღარ ეკეთა. შესვენებისას საჭირო გახდა ცესკოს სხდომის დარბაზის გაწმენდა.

საქართველოს პრემიერ-მინისტრმა ირაკლი კობახიძემ ეროვნულ ოლიმპიურ კომიტეტს 35 წლის იუბილე მიულოცა.

მთავრობის მეთაური, პარლამენტის თავმჯდომარე შალვა პაპუაშვილთან ერთად, საიუბილეო თარიღთან დაკავშირებულ საზეიმო მიღებას და წარმატებული სპორტსმენების დაჯილდოების ცერემონიას დაესწრო. 

პრემიერ-მინისტრმა, პარლამენტის თავმჯდომარემ და ეროვნული ოლიმპიური კომიტეტის პრეზიდენტმა ლერი ხაბელოვმა ოლიმპიური ჩემპიონები - ლაშა ტალახაძე, გენო პეტრიაშვილი და ლაშა ბექაური დააჯილდოვეს.

ლერი ხაბელოვმა ირაკლი კობახიძეს და შალვა პაპუაშვილს ოლიმპიური კომიტეტის საიუბილეო მედლები გადასცა.

ღონისძიებაზე აღინიშნა, რომ 2024 წელი სპორტის არაერთ სახეობაში მიღწეული შედეგებით გამორჩეულად წარმატებული იყო.

ცერემონიას ოლიმპიური ჩემპიონები და პრიზიორები, სპორტული ორგანიზაციების ხელმძღვანელები და ქართული სპორტის სხვადასხვა თაობის წარმომადგენლები დაესწრნენ.

წინასაარჩევნო პერიოდში ყველაფერი ჩატარდა სუფთად, იყო უპრეცენდენტოდ მშვიდი გარემო და ეს შეგიძლიათ ნახოთ მათივე NGO-ების დასკვნებში, ვერაფერი დაწერეს, - ამის შესახებ საქართველოს პრემიერ-მინისტრმა ირაკლი კობახიძემ  გადაცემაში "აქტუალური თემა" განაცხადა.

მთავრობის მეთაურის თქმით, რეალურად, ოპოზიცია არის სრულ გაუგებრობაში იმიტომ, რომ მანქანებს შეეჯახნენ და ელექტრონულ აპარატებს ებრძვიან. 

„დაფიქსირდა უპრეცენდენტო აქტივობა, რასაც ყველა აღიარებს. ისინი წერენ კიდეც facebook-ზე, მათ შორის, საჯაროდ ამბობენ, რომ 2 მილიონზე მეტი ამომრჩეველი გამოვიდა. საბოლოო ჯამში დაფიქსირდა დაახლოებით 2 075 000 ამომრჩეველი  და ყველა აღიარებს იმას, რომ ეს უპრეცენდენტო აქტივობა იყო სახეზე, რომ ამდენი ამომრჩეველი მივიდა ფიზიკურად საარჩევნო უბნებზე. ამას ეჭვქვეშ არავინ აყენებს, რომ 2 075 000 ამომრჩეველი მივიდა,  2 100 000-მდე მივიდა, იყო ბათილი ბიულეტენების მცირე რაოდენობა, საბოლოო ჯამში  დაფიქსირდა 2 075 000 ხმა, ანუ ყველა აღიარებს, რომ 2 მილიონზე მეტი. ის, რომ 2 075 000 ამომრჩევლის ხმა დაფიქსირდა, არის უტყუარი ჭეშმარიტება, რომელსაც არავინ უარყოფს. ამ ადამიანებმა ხმა მისცეს აპარატების მეშვეობით და საბოლოო ჯამში, ერთ წამში ღილაკზე თითის დაჭერით  ამოიბეჭდა საარჩევნო ოქმები, სადაც ასახულია არჩევნების შედეგები. აქ ხომ მანიპულაცია გამორიცხულია. ყველა აღიარებს, რომ ეს 2 075 000 ადამიანი რეალურად მივიდა და ვიღაცას მისცა ხმა, ვის მისცა ხმა, ეს არის დაფიქსირებული საარჩევნო ოქმებში, რაც აპარატმა ამობეჭდა. ეს არ იყო ვიღაცის მიერ დათვლილი. გაყალბება თუ ხდება, შეიძლება მოხდეს მაგალითად იგივე ხმების დათვლის დროს, როცა იქ რაღაც მანიპულაციები მიმდინარეობს. არავითარი შანსიც კი არ არსებობდა მანიპულაციის. რეალურად, აპარატში შევიდა ოქმები, ეს ოქმები ამოიბეჭდა, მერე ხელითაც იქნა გადათვლილი ეს ყველაფერი“, -  განაცხადა პრემიერმა.
ირაკლი კობახიძემ აღნიშნა, რომ საბოლოო ჯამში, 2 075 000 ამომრჩეველი არის უტყუარი ფაქტი და ამ ადამიანებმა შემდეგ რომ კონკრეტული არჩევანი გააკეთეს, ესეც უტყუარად დასტურდება საბოლოო ჯამში იმ ოქმებით, რომლებიც ამოიბეჭდა. 
„ერთადერთი რჩება ხმის ფარულობა, რასთან დაკავშირებითაც 3 დღის განმავლობაში არავითარი განსაკუთრებული განცხადებები არ გაკეთებულა. როცა ნახეს, რომ საბოლოო ჯამში, არაფერი აღარ იყო სათქმელი, გადაერთნენ ხმის ფარულობის თემაზე. ვინც სწორად აძლევდა ხმას, ყველა ამომრჩევლის შემთხვევაში დაცული იყო ხმის ფარულობა. თუ ვინმეს არასწორად შეჰყავდა საკუთარი ოქმი აპარატში, მაშინ შეიძლებოდა ხილული გამხდარიყო მიცემული ხმა. იგივე შეიძლება მოხდეს, რა თქმა უნდა, არაელექტრონული არჩევნების შემთხვევაშიც, მაგრამ აქ ერთი საინტერესო დეტალი რა არის, რომ ჩვენ ხომ გვქონდა ხმების ზრდა და ერთნაირი ზრდა დაფიქსირდა პლუს-მინუსით, როგორც ელექტრონულ, ასევე არაელექტრონულ უბნებზე. უფრო მეტიც, არაელექტრონულ უბნებზე, სადაც საერთოდ არ დგას დღის წესრიგში ხმის ფარულობის საკითხი, არავინ აპროტესტებს იმიტომ, რომ კონვერტში იდებოდა ბიულეტენები და ისე ვარდებოდა დახურულ ყუთში,  იქ კიდევ უფრო მეტი ზრდა დაგვიფიქსირდა. იყო რეგიონებში უფრო მაღალი ზრდა, ვიდრე შესაბამის უბნებზე. ხმის ფარულობასა და არჩევნების შედეგებს შორის რომ არავითარი კავშირი არ იყო, ესეც უტყუარი ფაქტებით დასტურდება. სინამდვილეში საერთოდ მოსადავებელი არაფერი არ არსებობს. 400 000 ხმაზე ლაპარაკობენ. ჯერ დაიწყეს 300 000-ით, მერე რომ ნახეს, რაღაც ძალიან ჭარბ რიცხვებზე საუბრობდნენ, ჩამოვიდნენ 200 000-ზე, მერე დათვალეს, რომ ჩვენ გვყოფნიდა დაახლოებით 325 000 ხმით ნაკლები იმისათვის, რომ მოგვეგო არჩევნები და მერე დაიწყეს ლაპარაკი 400 000-ზე. ამ რიცხვებსაც ჰაერიდან აბრახუნებენ“, -  განაცხადა ირაკლი კობახიძემ.

როგორც მთავრობის მეთაურმა აღნიშნა, კოლექტიური „ნაცმოძრაობის“ პატრონებს ასევე ჰქონდათ პროგრამა მაქსიმუმი, რაც ხელისუფლების შეცვლას და ხელისუფლებაში კოლექტიური „ნაცმოძრაობის“ დაბრუნებას გულისხმობდა.

„მათთვის არსებობდა პროგრამა მაქსიმუმი და პროგრამა მინიმუმი. პროგრამა მაქსიმუმი იყო ხელისუფლების შეცვლა და კოლექტიური „ნაცმოძრაობის“ ხელისუფლებაში დაბრუნება, მაგრამ არსებობდა ასევე პროგრამა მინიმუმი, ეს იყო კოლექტიური „ნაცმოძრაობის“ დანაწევრება, რათა იმაზე მეტი შედეგი მიეღოთ, მათ შორის 5-პროცენტიანი ბარიერის გათვალისწინებით, ვიდრე სხვა შემთხვევაში მიიღებდნენ. მაგალითად რომ ავიღოთ ჩვენ წინა არჩევნების შედეგები, მაშინ დაახლოებით 30 პროცენტი მიიღო „ნაცმოძრაობამ“, 2020 წლის საპარლამენტო არჩევნების ვგულისხმობ, თეორიულ 5-პროცენტიან ბარიერს ვერც ერთ სხვა პარტია ვერ ლახავდა. „ლელოს“ ჰქონდა 3 პროცენტი, „ევროპულ საქართველოს“ ჰქონდა 4 პროცენტამდე და ა.შ. 5 პროცენტი არც ერთ პარტიას არ ჰქონდა, იგივე რომ გამეორებულიყო ახლა, „ნაცმოძრაობა“ აიღებდა 30 პროცენტზე ცოტა ნაკლებს, რადგან ჩვენი პროცენტი გაიზარდა. პირობითად ავიღოთ 25 პროცენტი „ნაცმოძრაობას“, მაგრამ  მაღალი ალბათობით, ვერც ერთი სხვა ოპოზიციური პარტია ვერ გადალახავდა საარჩევნო ბარიერს. პროგრამა მინიმუმი რაც იყო, რასაც მიაღწიეს კოლექტიური „ნაცმოძრაობის“ პატრონებმა - მათ დაშალეს 4 ნაწილად ეს პოლიტიკური ძალა, რასაც ჩვენ ვუწოდებთ „კოლექტიურ ნაცმოძრაობას“ და საბოლოო ჯამში მოახერხეს ის, რომ 4 სუბიექტად შეიყვანეს კოლექტიური „ნაცმოძრაობა“ პარლამენტში. მთლიანობაში ამ ოთხმა პარტიამ მიიღო 38 პროცენტი, ანუ ბარიერგადალახულმა პარტიებმა მთლიანობაში აიღეს 38 პროცენტი, როდესაც ერთი „ნაცმოძრაობის“ პირობებში 25 პროცენტით შევიდოდა ერთი პოლიტიკური პარტია პარლამენტში. ეს მათთვის არის შედეგი, მიღწევა და ეს არის ერთ-ერთი მიზეზი, რატომაც მგონია, რომ პატრონები დავალებას მისცემენ ამ ოთხივე პარტიას, რომ ისინი ბოლოს შევიდნენ პარლამენტში, რადგან ეს არ არის დასაკარგი შედეგი მათთვის. პროგრამა მინიმუმი არის შესრულებული და შესაბამისად, ისინი ამ შედეგს აუცილებლად გაუფრთხილდებიან“, - განაცხადა პრემიერ-მინისტრმა.

როგორც მთავრობის მეთაურმა აღნიშნა, სუვერენიტეტის დაცვაზე გადის ეროვნული ინტერესების დაცვის ხაზი და ამ პოლიტიკის გატარება გაგრძელდება მომავალშიც. 

„ჩვენი საარჩევნო სლოგანი იყო მხოლოდ მშვიდობით, ღირსებით, კეთილდღეობით ევროპისკენ. აქ ღირსება იყო ერთ-ერთი საკვანძო სიტყვა. თუ ღირსებით არ აწარმოებ შენს პოლიტიკას, რა თქმა უნდა, ვერ დაიცავ სათანადოდ საკუთარ ეროვნულ ინტერესებს. მნიშვნელოვანია, ყველგან ვაჩვენოთ ჩვენი პრინციპები, სადაც ვიღაც ცდილობს, ჩაერიოს ჩვენს შიდა საქმეებში, იქ ჩვენ ღირსეულად უნდა დავიცვათ საკუთარი პოზიციები. ხშირად ცდილობენ უცხოელი პოლიტიკოსები, ბიუროკრატები, რომ უხეშად ჩაერიონ ჩვენს შიდა საქმეებში და გადაგვიწყვიტონ, როგორ უნდა განვითარდეს ჩვენი ქვეყანა, მათ შორის ძალიან ხშირად გვთხოვენ ისეთ რამეს, რაც პირდაპირ ნიშნავს ქვეყნისთვის უმძიმესი პრობლემების მოტანას საკუთარი ხელით. მაგალითად, გვთხოვენ სანქციების დაწესებას, რაც ნიშნავს პირველივე წელს ჩვენი ეკონომიკის სულ მცირე 10 პროცენტით შემცირებას, რაც არის ეკონომიკური კატასტროფა. ქვეყნისთვის, ხალხისთვის, საზოგადოებისთვის ეს იქნება ძალიან დიდი კატასტროფა. ასეთი ჩარევები არის მიუღებელი. ჩვენ მომავალშიც თავს დავიცავთ ნებისმიერი ჭარბი ჩარევის მცდელობებისგან. მეგობრობა ერთია, მაგრამ მეორეა ის, რომ ყველამ პატივი უნდა სცეს ერთმანეთის სუვერენიტეტს, დამოუკიდებლობას და ამ პრინციპების დაცვის გარეშე, ვერავითარი სამართლიანი ურთიერთობები ვერ შედგება. ასეთი დამოკიდებულება არის პრინციპულად მნიშვნელოვანი, შესაბამისად, სუვერენიტეტის დაცვაზე გადის ეროვნული ინტერესების დაცვის ხაზი და ამ პოლიტიკას გავატარებთ ჩვენ მომავალშიც. ერთია პარტნიორობა, მეგობრობა, მაგრამ მეორეა ის, რომ ყველამ პატივი უნდა სცეს ჩვენს დამოუკიდებლობასა და სუვერენიტეტს“, - განაცხადა პრემიერ-მინისტრმა.

საქართველო არის ერთ-ერთი იშვიათი ქვეყანა, სადაც გარემოს დაცვის უფლება ძირითადი უფლების რანგში არის გარანტირებული ქვეყნის კონსტიტუციით, გარდა ამისა, გვაქვს კონკრეტული პოლიტიკა, რომელიც მიმართულია შესაბამისი უფლებების რეალიზებისკენ, - ამის შესახებ პრემიერ-მინისტრმა ირაკლი კობახიძემ გადაცემაში - "აქტუალური თემა" ჟურნალისტის კითხვის პასუხად განაცხადა, რომელიც COP29-ის კონფერენციას შეეხებოდა.

როგორც მთავრობის მეთაურმა აღნიშნა, კონფერენციის თემა - კლიმატის ცვლილება არის ერთ-ერთი უმნიშვნელოვანესი გამოწვევა მთელი მსოფლიოსთვის და საქართველოსთვის. მისივე განცხადებით, ბაქოში ვიზიტისას შესაძლებლობა ჰქონდა განეხილა საქართველოსთან დაკავშირებული საკითხები არაერთ ლიდერთან.

„გახსოვთ არაერთი მძიმე სტიქიური მოვლენა ჩვენს ქვეყანაში, გასული რამდენიმე წლის განმავლობაში. რა თქმა უნდა, ეს ყველაფერი პირდაპირ არის დაკავშირებული კლიმატის ცვლილებებთან და იმ ზოგად ტენდენციებთან, რომელიც ეკოლოგიური კუთხით შეინიშნება, მთელი მსოფლიოს მასშტაბით. მითუმეტეს, ჩვენი ქვეყანა არის მაღალმთიანი და აქედან გამომდინარე, კიდევ უფრო მეტია ჩვენი გამოწვევები. შესაბამისად, ჩვენ გვაქვს ჩვენი წილი პასუხისმგებლობა, რომ მაქსიმალურად ვიზრუნოთ შესაბამისი ნეგატიური ცვლილებების თავიდან არიდებისთვის. ჩვენ მიერთებული ვართ სხვადასხვა დოკუმენტსა და ფორმატს, რომელიც მიზნად ისახავს შესაბამისი ცვლილებების უზრუნველყოფას. გვაქვს კონკრეტული გრძელვადიანი, მოკლევადიანი და საშუალოვადიანი მიზნები, რაც უკავშირდება კლიმატის ცვლილებებთან დაკავშირებულ გამოწვევებთან გამკლავებას და ა.შ. რა თქმა უნდა, ჩვენი გზავნილები გავუზიარეთ პარტნიორებს. საქართველო არის ერთ-ერთი იშვიათი ქვეყანა, სადაც გარემოს დაცვის უფლება ძირითადი უფლების რანგში არის გარანტირებული საქართველოს კონსტიტუციით და გარდა ამისა, გვაქვს კონკრეტული პოლიტიკა, რომელიც მიმართულია შესაბამისი უფლებების რეალიზებისკენ. რაც შეეხება COP29-ის მაღალი დონის კონფერენციას, რომელიც ბაქოში გაიმართა, ბუნებრივია, პოლიტიკური კუთხითაც იყო მნიშვნელოვანი, საინტერესო. ასეთი ფორმატი გაძლევს საშუალებას, რომ ათეულობით ლიდერს გაესაუბრო სხვადასხვა ფორმატში ჩვენს ქვეყანასთან დაკავშირებულ საკითხებზე და მაქსიმალურად გამოვიყენეთ ეს შესაძლებლობა. მქონდა არაჩვეულებრივი,  ძალიან მეგობრული და პროდუქტიული შეხვედრა ილჰამ ალიევთან და გარდა ამისა, არაერთ ლიდერთან მქონდა შეხვედრის, გასაუბრების საშუალება. ძალიან მნიშვნელოვანი იყო ამ კუთხითაც ეს კონფერენცია,“- განაცხადა პრემიერმა.

პრემიერის თმით, საქართველო მზად არის, მედიატორის რანგში  კიდევ უფრო აქტიურად ჩაერთოს მოლაპარაკებების უზრუნველყოფაში.

„ჩვენი ქვეყანა მნიშვნელოვან როლს ასრულებს რეგიონში მშვიდობის განმტკიცებაში. მიუხედავად იმისა, რომ იყო კონფლიქტი ჩვენს მეზობელ ქვეყნებს შორის, საქართველო ყოველთვის ახერხებდა სწორი, დაბალანსებული პოლიტიკის წარმოებას , რითაც ხელს უწყობდა მშვიდობის მაქსიმალურად უზრუნველყოფას ჩვენს რეგიონში, კონკრეტულად ამიერკავკასიაში. რა თქმა უნდა, ამ მიდგომით გავაგრძელებთ მომავალშიც მუშაობას. თუ იქნება ინტერესი, რომ საქართველო მედიატორის რანგში ან სხვა კუთხით კიდევ უფრო აქტიურად ჩაერთოს მოლაპარაკებების უზრუნველყოფაში და ა.შ, ჩვენ ყოველთვის ვაფიქსირებთ ამ კუთხით ჩვენს მზაობას. რა თქმა უნდა, ეს მზაობა ახლაც არის ძალაში. თუ იქნება ეს ინტერესი, ჩვენ მზად ვართ, რომ ჩვენი მხარდაჭერა შევთავაზოთ ორივე ჩვენს მეზობელ და მეგობარ ქვეყანას“, - განაცხადა პრემიერმა.

პრემიერის თმით, მომდევნო ოთხი წლის გეგმაა, რომ 40 მილიარდი ლარით გაიზარდოს ქვეყნის ეკონომიკა.

„ეკონომიკის კუთხით გვაქვს ძალიან ამბიციური გეგმები. ჩვენ გვინდა, რომ 40 მილიარდი ლარით გავზარდოთ ჩვენი ქვეყნის ეკონომიკა მომდევნო ოთხი წლის განმავლობაში. დღეს თუ არის 28 მილიარდამდე ჩვენი ბიუჯეტი, გვინდა, გადასცდეს 40 მილიარდ ლარს. გვინდა, რომ უმუშევრობა შემცირდეს 4%-მდე, რაც არის ევროკავშირის საშუალო მაჩვენებელზე დაბალი მაჩვენებელი. ანალოგიურად, შეგვიძლია სიღარიბე შევამციროთ 4%-მდე. ჯერ კიდევ მაღალია მაჩვენებელი. 440 000 ჩვენი თანამოქალაქე ცხოვრობს სიღარიბის ზღვარს მიღმა და ჩვენ გვინდა, რომ მაქსიმუმ 4%-ზე ჩამოვიდეს ეს მაჩვენებელი. დაგეგმილია ძალიან მნიშვნელოვანი პროექტები ინფრასტრუქტურის კუთხით, ჩვენი ქვეყნის სატრანზიტო ფუნქციის გაძლიერების კუთხით. ჩვენს გეგმებში შედის ავტობანის მთავარი მონაკვეთის მშენებლობის დასრულება ისე, რომ საზღვრები ერთმანეთს დავუკავშიროთ სრულად. ანაკლიის პორტის მშენებლობა, რაც უკვე დაწყებულია, თბილისის საერთაშორისო აეროპორტის მშენებლობა, რკინიგზის მოდერნიზაციის პროექტის დასრულება და ა.შ. ეს ყველაფერი ნიშნავს იმას, რომ ჩვენ ჩვენს ქვეყანას თვისებრივად განვითარების სხვა დონეზე გადავიყვანთ უკვე ოთხი წლის თავზე“, - განაცხადა პრემიერმა.

მთავრობის მეთაურის თქმით, ამბიციური გეგმები აქვს ხელისუფლებას ასევე განათლების მიმართულებით.

„ამბიციური საუნივერსიტეტო რეფორმა განხორციელდება, შემდეგი ოთხი წლის განმავლობაში, მათ შორის, მთლიანად ევროპულ სტანდარტებთან შესაბამისობაში მოვა საუნივერსიტეტო ინფრასტრუქტურა, სახელმწიფო უნივერსიტეტებში. კულტურის, სპორტის სფეროში გვაქვს ასევე ამბიციური გეგმები“, -განაცხადა პრემიერმა.

მთავრობის მეთაურის თქმით, ქვეყნის საგარეო პრიორიტეტები არის სრულიად ცხადი და მომდევნო ოთხ წელიწადში ხელისუფლების ამოცანაა, რომ ასოცირების შეთანხმებით და DCFTA-ით გათვალისწინებული ვალდებულებების 90%-ზე მეტი 2028 წლისთვის შესრულდეს.

„რაც შეეხება საგარეო პოლიტიკას, აქ პრიორიტეტები არის აბსოლუტურად ცხადი. ჩვენი მთავარი პრიორიტეტია ევროკავშირში ინტეგრაცია. ჩვენი ამოცანაა, რომ ასოცირების შეთანხმებით გათვალისწინებული და DCFTA-ით გათვალისწინებული ვალდებულებების 90%-ზე მეტი შევასრულოთ უკვე 2028 წლისთვის. ყველა მიმართულებით გვაქვს ამბიციური და ამასთან, რეალისტური და აღსრულებადი გეგმები, შესაბამისად, ყოველდღიურად ვიმუშავებთ იმისთვის, რომ ეს გეგმები განვახორციელოთ“, - განაცხადა პრემიერმა.

ნამდვილად გასაკვირია, რომ შოლცმა ამ განცხადებისთვის მოიცალა, მას დაეშალა გერმანიაში მთავრობა, თებერვლის ბოლოს ტარდება ბუნდესტაგის არჩევნები და უკვე ცხადზე ცხადია, რომ ის ვეღარ ინარჩუნებს კანცლერის თანამდებობას, - ამის შესახებ საქართველოს პრემიერ-მინისტრმა ირაკლი კობახიძემ გადაცემაში „აქტუალური თემა“, შოლცის, მაკრონისა და ტუსკის ერთობლივ განცხადებაზე დასმული კითხვის საპასუხოდ განაცხადა.

პრემიერ-მინისტრმა „ოჯახური ღირებულებებისა და არასრულწლოვანთა დაცვის შესახებ“ კანონის შინაარსი და მიზნები კიდევ ერთხელ განმარტა.

„შოლცი იყო ამ ერთობლივი განცხადების ნომერ პირველი ავტორი. თებერვლის ბოლოს ბუნდესტაგის არჩევნები ტარდება, ამ არჩევნებში „ქრისტიან-დემოკრატები“ იმარჯვებენ და მას ჩაანაცვლებს „ქრისტიან-დემოკრატების“ ლიდერი 99%-იანი ალბათობით, თუმცა მას სცალია საქართველოსთვის და ასეთი განცხადებებისთვის. ეს ცალკე საკითხია. „ოჯახური ღირებულებებისა და არასრულწლოვანთა დაცვის შესახებ“ კანონი ითვალისწინებს ათამდე პუნქტს, სადაც ასახულია ელემენტარული ჭეშმარიტება, რომ ბავშვებში არ უნდა შეიტანო ლგბტ პროპაგანდა. არ შეიძლება, სკოლებში ასეთ შინაარსი შევიდეს. არ შეიძლება, ასეთ პროპაგანდა წარმოებდეს მასობრივი ინფორმაციის საშუალებათა მეშვეობით, იგივე კინემატოგრაფიის და შემოქმედებით პროდუქციის გამოყენებით, რისი არაერთ მაგალითი მათ შორის საქართველოშიც ვიხილეთ ბოლო პერიოდის განმავლობაში. ყბადაღებული თემაა, რომ დედა დედაა, მამა მამაა, კაცი კაცია, ქალი ქალია. ეს ყველაფერი ეჭვქვეშ დადგა ევროპის ქვეყნების უდიდეს ნაწილში. მაგალითისთვის, ევროპის მთელ რიგ ქვეყნებში შეგიძლიათ მიხვიდეთ სამოქალაქო რეესტრში და თუ მოითხოვთ, რომ გადაეწეროთ მამაკაცად, დაუყოვნებლივ უნდა დაგიკმაყოფილონ. ასეთ რამ რომ ეთქვეთ 30 ან 20 წლის წინ, ალბათ გაგეცინებოდათ, მაგრამ რაც იყო გასაცინი 20 და 30 წლის წინ, დღეს ის კატასტროფული რეალობაა. ამ რეალობის წინაშე დგას არაერთ ევროპული ქვეყანა. ასეთ მარტივ ჭეშმარიტებებზეა საუბარი, რომ ეს არ უნდა იყოს ჩვენთან დაშვებული. რაც ხდება ზოგიერთ ქვეყანაში, რომ უნდა იყოს გენდერულად ნეიტრალური ტერმინები გამოყენებული საჯარო სამსახურში, რომ ქალის და კაცის მაგივრად უნდა თქვა ადამიანი, რომ ქალიშვილი, ვაჟიშვილი არ შეიძლება და უნდა თქვა მაინცდამაინც მარტო შვილი. შეიძლება, აგიკრძალონ ისეთი ტერმინების გამოყენება, რომელიც სქესზე მიუთითებს. არის საუბარი იმაზე, რომ ორი სქესი არსებობს და არ შეიძლება, ამის მიღმა სხვა სქესის მითითება მოგთხოვონ სხვადასხვა ჩანაწერში და ა.შ. საუბარია ელემენტარულ ჭეშმარიტებაზე. 20 წლის წინ ამ კანონპროექტის ინიცირება ალბათ სასაცილოდ არავის ეყოფოდა, რადგან ელემენტარულ ჭეშმარიტებაზეა საუბარი. მაგრამ რაც 20 ან 30 წლის წინ იყო ელემენტარული ჭეშმარიტება, ის დღეს კითხვის ნიშნის ქვეშ დადგა ევროპის ქვეყნების ძალიან დიდ ნაწილში. პირიქით, აბულინგებენ ადამიანებს, რომლებიც ამას უპირისპირდებიან. უხეში ლიბერალურ-ფაშისტური ბულინგი წარმოებს იმ ადამიანების წინააღმდეგ, რომლებიც ამას უპირისპირდებიან, რომლებიც ამბობენ, რომ კაცი კაცია და არ შეიძლება, ქალი მივიდეს სამოქალაქო რეესტრში და უცბად, ერთ წამში გადაეწეროს კაცად. ვინც ამას ამბობს ევროპის ქვეყნების დიდ უმრავლესობაში, მათ ძალიან დიდი წნეხის ქვეშ აქცევენ და ეს კანონი ითვალისწინებს ერთადერთ რამეს - არ შეიძლება ჩვენს ქვეყანაშ დავუშვათ ეს პარადოქსი. როცა გამოდიან ევროკავშირის ლიდერები და გვეუბნებიან, რომ ამ პარადოქსის არდაშვების გამო ქართველი ხალხი და ქართული სახელმწიფო შეიძლება დაისაჯოს, არ ეღირსება ევროინტეგრაცია და ა.შ, ეს ხომ გამაოგნებელია. საზოგადოებამ იმსჯელოს ამ ყველაფერთან დაკავშირებით. თუ რამეს ვაჭარბებ, პუნქტობრივად გავიაროთ ეს ყველაფერი და დაგვარწმუნონ“, - აღნიშნა პრემიერმა. 

მთავრობის მეთაურის თქმით, ოჯახური ფასეულობებისა და არასრულწლოვანთა დაცვის შესახებ კანონმდებლობის მსგავსი კანონის მიღებას ამერიკის შეერთებულ შტატებში აპირებენ.

„ვფიქრობ, რომ ეს მიდგომები ანალოგიურად აისახება ასევე ევროპულ მიდგომებზეც, ანუ იქაც აპირებენ იგივე კანონმდებლობის მიღებას. ჩვენ დღესაც ღია ვართ ამ დისკუსიისთვის. თუ რომელიმე პუნქტზე დაგვიმტკიცებენ, რომ აქ რაიმე არის შეუსაბამო, ან სამართლებრივ პრინციპებთან, ან ზოგად ფასეულობებთან, მაშინ კი ბატონო, მაგრამ ჯერ დაგვიმტკიცონ, რომ ეს არის არასწორი, რომ კაცი კაცია არის არასწორი, ქალი ქალია არის არასწორი. ცენზურაზე საუბრობდნენ. 2 მამაკაცის ინტიმური სცენა რომ არ შეიძლება იყოს ფილმში და არ შეიძლება ეს მაგალითად საზოგადოებრივმა მაუწყებელმა გაუშვას, ეს ხომ ელემენტარული საკითხია. არა, არ შეიძლება შენ ეს აკრძალო და ეს არის ცენზურა. საზოგადოებრივ მაუწყებელზე თუ კერძო ტელევიზიაში, ჩვეულებრივად შეიძლება გავიდეს ფილმი, რომელიც შეიცავს ერთსქესიან ინტიმურ სცენას. მარტივ ჭეშმარიტებაზე გვაქვს საუბარი. როდესაც ევროკავშირის სახელით გვეუბნებიან, რომ ეს ყველაფერი არის უბედურება, რასაც ჩვენ ვაკეთებთ და ის არის ბედნიერება, რაც უნდა აიკრძალოს, ლგბტ პროპაგანდას ვგულისხმობს, ეს გამაოგნებელია ჩემთვის. არავითარ შემთხვევაში ეს კანონი არ ზღუდავს ადამიანის უფლებებს. ჩვენთან ადამიანის უფლებები არის უმაღლეს დონეზე დაცული, მათ შორის, რა თქმა უნდა, განურჩევლად ადამიანის ცხოვრების წესისა. ყველას აქვს თავისი არჩევანი, თავისი ცხოვრების წესი, სახელმწიფო ამაში ვერანაირად ვერ ჩაერევა, ვერც განიკითხავს და განსჯის ადამიანებს იმის გამო, რომ მათ აქვთ ესა თუ ის ცხოვრების წესი. ეს საერთოდ არ არის ჩვენი საქმე. ერთადერთი, რაც იზღუდება ამ კანონით, ეს არის პროპაგანდა. არავის ვეხებით, ვერც შევეხებით და განვსჯით ვერავის, ვინმეს მორალურად განსჯა არ არის სახელმწიფოს საქმე. ერთადერთი, რასაც სახელმწიფო აკეთებს, არის დანაშაულის შემთხვევაში სასჯელის დაკისრება, მაგრამ ადამიანის მორალურად განსჯა არ არის სახელმწიფოს საქმე. შესაბამისად, ეს არ არის არც ამ კანონის საქმე და ეს არ წერია ამ კანონში. ერთადერთი, რაც იზღუდება ამ კანონით, არის ის უხეში პროპაგანდა, რომელმაც მძიმე შედეგებამდე მიიყვანა საზოგადოებები სხვადასხვა ევროპულ ქვეყანაში. იგივე ამერიკის შეერთებულ შტატებში არის მძიმე სტატისტიკა. ტრადიციულად, 2-3% თუ იყო ლგბტ პირების რაოდენობა, არა მარტო მათი რაოდენობა, ვინც საჯაროდ აცხადებდა, ლგბტ პირებისა, რაც დადგენილი იყო კვლევების საფუძველზე, იყო 2-3%. დღეს, 18-25 წლის ახალგაზრდებში, ამ ქვეყნებში, სტატისტიკა უკვე შეადგენს დაახლოებით 20%-ს და რომ ავიღოთ 26-32 წლის ახალგაზრდები, სტატისტიკა შეადგენს 7%-ს. წარმოიდგინეთ, რომ პროპაგანდის ხარჯზე, 7-წლიან ინტერვალში, 3-ჯერ გაიზარდა ლგბტ პირების რაოდენობა ამ საზოგადოებებში. ჩვენ არ გვინდა ამის დაშვება სხვადასხვა, მათ შორის, პრაგმატული მიზეზების გამო, რომ ისედაც გვაქვს პრობლემები დემოგრაფიის კუთხით და არ გვინდა, კიდევ უფრო მეტად დავამძიმოთ ჩვენთან ვითარება ამ თვალსაზრისით“, -  განაცხადა პრემიერმა.

ირაკლი კობახიძემ ასევე ისაუბრა „გამჭვირვალობის“ შესახებ კანონზე. 

„ადამიანები გვეუბნებიან მარტივ ჭეშმარიტებაზე, რომ არ ვარგა. გვეუბნებიან, რომ  NGO-ების გამჭვირვალობას სჯობს NGO-ების ბუნდოვანება. მარტივად რომ დავიყვანოთ ერთ მესიჯამდე, რასაც რუსულ კანონს უწოდებენ, ეს არის ის, რომ NGO-ების ბუნდოვანება სჯობს NGO-ების გამჭვირვალობას და როგორ შეიძლება, ევროპიდან ან ამერიკიდან ამას გეუბნებოდნენ. თავი დავანებოთ იმას, რომ არაერთ ქვეყანაში მოქმედებს ასეთი კანონები, ამერიკის შეერთებულ შტატებში და ევროპის ქვეყნებში, კანადაში, ავსტრალიაში და .ა.შ. მარტივ მესიჯამდე დადის ეს ყველაფერი, რომ NGO-ების ბუნდოვანება სჯობს NGO-ების გამჭვირვალობას. როგორ შეიძლება, ამას ევროპელი ან ამერიკელი გეუბნებოდეს. დარწმუნებული ვარ, რომ აქაც, ამ ბოლო ცვლილებების შემდეგ, რაც მოხდა ამერიკის შეერთებულ შტატებში, პირველ რიგში, ეს მიდგომებიც შეიცვლება და ამ მარტივ ჭეშმარიტებაზე აღარავინ გაკიცხავს საქართველოს ხელისუფლებას“, -  განაცხადა პრემიერ-მინისტრმა.

ჩვენ გვაქვს ამბიციური ამოცანა, 2030 წლისთვის გავხდეთ ევროკავშირის წევრი ქვეყანა, თუ ასე ღირსეულად გავაგრძელებთ ქართველ ხალხთან ერთად, დარწმუნებული ვარ, რომ ეს შედეგი მიღწევადია, - ამის შესახებ საქართველოს პრემიერ-მინისტრმა ირაკლი კობახიძემ გადაცემაში "აქტუალური თემა" განაცხადა.

პრემიერის თმით, საქართველოსთვის ვიზალიბერალიზაციის შეჩერების მიმართულებით ნაბიჯები არ გადაიდგმება.

„ქართველ ხალხს ემუქრებიან იმის გამო, რომ საზოგადოებამ მხარი დაუჭირა მმართველ პარტიას. საუბარი აქვთ ქართველი ხალხის დასჯაზე მისი დემოკრატიული არჩევანის გამო. რა თქმა უნდა, ეს ყველაფერი აბსოლუტურად ფიქტიური საუბრებია. დარწმუნებული ვარ, რომ არავითარი კონკრეტული ნაბიჯები ამ მიმართულებით არ გადაიდგმება, მათ შორის, იმის გამო, რომ ასეთმა ინსტრუმენტებმა მთლიანად დაკარგა ეფექტი. წელიწად-ნახევრის განმავლობაში კანდიდატის სტატუსის თემა გამოიყენებოდა, როგორც ქვეყანაზე ზეწოლის და ქვეყნის არევის ინსტრუმენტი. საბოლოო ჯამში, ჩვენ მყარად დავიჭირეთ ჩვენი პოზიციები, დავიცავით ამ ქვეყნის ღირსება და ნაცვლად იმისა, რომ ეს საკითხი კიდევ ხანგრძლივად გამოყენებულიყო შანტაჟის ინსტრუმენტად, ჩვენ მოგვენიჭა კანდიდატის სტატუსი. მერე გადავიდნენ მოლაპარაკებების გახსნის თემაზე. ეს ინსტრუმენტიც გაცვდა და აქედან გამომდინარე, მე მგონია პირიქით, რომ წელს ეს არ მოხდება, მაგრამ მომავალ წელს, ძალიან მაღალი ალბათობით, მით უმეტეს, რომ დიდი ალბათობით, მანამდე უკრაინაში ომიც დასრულდება, მოლაპარაკებებიც გაიხსნება და ასე გაგრძელდება პროცესები. სადაც ღირსებას აჩვენებ, იქ საბოლოო ჯამში, შედეგს მიიღებ საკუთარი ქვეყნისთვის, სადაც ღირსებას არ აჩვენებ, კი ვხედავთ, ზოგიერთი ქვეყანა რა მდგომარეობაშია დღეს. ჩვენთვის მთავარია, რომ ღირსებით გავაგრძელოთ სვლა წინ, მათ შორის, ევროინტეგრაციის მიმართულებით და ასეთ პირობებში, ყველა შედეგი მიღწევადია. ჩვენ გვაქვს ამბიციური ამოცანა, 2030 წლისთვის გვინდა, გავხდეთ ევროკავშირის წევრი ქვეყანა. თუ ასე ღირსეულად გავაგრძელებთ ქართველ ხალხთან ერთად, დარწმუნებული ვარ, რომ ეს შედეგი არის მიღწევადი“, - განაცხადა პრემიერმა.

მთავრობის მეთაურის შეფასებით, ძალიან მალე იქნება ხელშესახები შედეგები ურთიერთობების გაჯანსაღების და გადატვირთვის კუთხით.

„მე არ მინდა აქ სიღრმეში შევიდე. საბოლოო ჯამში, რა თქმა უნდა, ჩვენთვის კვლავაც რჩება მთავარ პრიორიტეტად ურთიერთობების გადატვირთვა. ძალიან ბევრი რამ გაფუჭდა ამ ურთიერთობებში წინა ელჩის პირობებში, გახსოვთ, რაც გამოვიარეთ 2020 წლის ბოლოდან მოყოლებული, 2021 წელს, 2022-ში, 2023-ში, რევოლუციის 2 მცდელობა იყო ამ წლების განმავლობაში, შესაბამისად, ურთიერთობების ის დონე, რომელიც არის დღეს სახეზე, ჩვენ, რა თქმა უნდა, არ მოგვწონს და ამას სჭირდება თვისებრივი, არსებითი გადატვირთვა. ამაზე ვართ ჩვენ ორიენტირებულები, ამიტომ არ მინდა, სიღრმეებში შევიდე. მე დარწმუნებული ვარ, რომ გვექნება ძალიან მალე ხელშესახები ცვლილებები ურთიერთობების გაჯანსაღების და გადატვირთვის კუთხით. მე მგონია, რამდენიმე თვეში ძალიან მკაფიოდ გამოჩნდება სერიოზული ძვრები ამ ურთიერთობებში. 
ჩვენ სამ რამეს ვუკავშირებდით ურთიერთობების გადატვირთვას, ეს იყო ჩვენი არჩევნები, რომელიც უკვე დასრულდა და დასრულდა იმ შედეგით, რომელიც ყველაზე მეტად წაადგება ჯანსაღ ურთიერთობებს საქართველოსა და აშშ-ს, საქართველოსა და ევროკავშირს შორის, დასრულდა ამერიკის არჩევნები და ესეც დასრულდა ისე, როგორც ყველაზე მეტად წაადგება ურთიერთობების გადატვირთვას და დარჩა მესამე საკითხი - ეს არის უკრაინაში ომის დასრულება,“- განაცხადა პრემიერმა.

როგორც მთავრობის მეთაურმა აღნიშნა, მაღალი ალბათობით ძალიან მალევე, მომავალი წლიდან მშვიდობა დამყარდება რეგიონში, რის გამოც საქართველოზე წნეხი შემცირდება. 

„დონალდ ტრამპის არჩევას საქართველოსთვის ექნება მკვეთრად პოზიტიური გავლენა ორი მიზეზის გამო - ერთი არის ის, რომ მაღალი ალბათობით ძალიან მალევე, მომავალი წლიდან  მშვიდობა დამყარდება ჩვენ რეგიონში, რის გამოც ჩვენზე წნეხი შემცირდება. ვიდრე ომი დაიწყებოდა უკრაინაში, ასეთი წნეხი არ იყო. სხვადასხვა დროს იყო სირთულეები ურთიერთობებში, მაგრამ ასეთი მძიმე წნეხის ქვეშ ჩვენი ქვეყანა არასდროს ყოფილა, როგორც ის იყო უკრაინაში ომის დაწყების შემდეგ. როგორც კი ომი დასრულდება უკრაინაში, ჩვენს რეგიონში, მაშინვე შესუსტდება წნეხი ჩვენს ქვეყანაზე და რა თქმა უნდა, ეს დადებითად აისახება მათ შორის ორმხრივ ურთიერთობებზე, მეორე - ეს არის თავად დონალდ ტრამპის ფაქტორი. ჩვენ ვფიქრობთ, რომ იმ მიდგომებიდან გამომდინარე, რომელიც აქვს აშშ-ის ახლად არჩეულ პრეზიდენტს, ყველაფერი წარიმართება დადებითად ჩვენს ურთიერთობებში, ეს არის ჩვენი ოპტიმისტური მოლოდინი. დანარჩენი ჩვენც უნდა ვიმუშაოთ ძალიან აქტიურად. განწყობა არის ოპტიმისტური, დანარჩენი დავუკვირდეთ მოვლენების განვითარებას“, - განაცხადა ირაკლი კობახიძემ.

პრემიერის თმით, უკრაინაში მიმდინარე ომის შედეგად ევროკავშირმა მიიღო ახალი მიგრაციული კრიზისი და უმძიმესი ეკონომიკური განვითარება.

„მე მგონია, რომ ევროკავშირისთვისაც არის ძალიან სასარგებლო ის შედეგი, რომელიც დადგა აშშ-ში. თქვენ იცით, გასულმა ოთხმა წელიწადმა რა მოუტანა ევროკავშირს. უკრაინაში მიმდინარე ომის, რუსეთის სამხედრო აგრესიის მთავარი მსხვერპლი ომი უშუალო მონაწილეების შემდეგ იყო ევროკავშირი, რომელმაც შედეგად მიიღო ახალი მიგრაციული კრიზისი, უმძიმესი ეკონომიკური განვითარება, გერმანია რომ ავიღოთ, ავტომობილების ინდუსტრიას, რაც არის გერმანიის სამარკო ნიშანი, აქვს სერიოზული პრობლემები, სხვა ქვეყნებშიც არის სერიოზული ეკონომიკური პრობლემები, არის ძალიან დაბალი ზრდის მაჩვენებელი, ქვეყნების დიდ ნაწილში არის ეკონომიკის ვარდნა. ეს ყველაფერი ევროკავშირს და ევროპას მოუტანა უკრაინაში მიმდინარე ომმა. ჩვენს რეგიონში მშვიდობის დამყარება მხოლოდ და მხოლოდ წაადგება ევროკავშირს და მის ეკონომიკურ წინსვლას და განვითარებას. აქედან გამომდინარე, ვფიქრობ, რომ ევროკავშირის ლიდერები უნდა იყვნენ უფრო მეტად  ორიენტირებულები აშშ-ის ხელისუფლებასთან ჯანსაღი ურთიერთობების დამყარებაზე“, - განაცხადა პრემიერმა.

საზოგადოებამ სრულად გაითავისა ამ არჩევნების განსაკუთრებული და საგანგებო მნიშვნელობა და ამ არჩევნებში საზოგადოებამ მხარი დაუჭირა ჩვენს კურსს, მმართველ გუნდს, „ქართულ ოცნებას“, - ამის შესახებ საქართველოს პრემიერ-მინისტრმა ირაკლი კობახიძემ  გადაცემაში "აქტუალური თემა" განაცხადა.

პრემიერის თქმით, ეს იყო რეფერენდუმის ტოლფასი არჩევნები, სადაც წყდებოდა ომისა და მშვიდობის  ბედი.

„ეს იყო პრინციპული, გადამწყვეტი არჩევნები. ეს იყო რეფერენდუმის ტოლფასი არჩევნები, სადაც წყდებოდა ომისა და მშვიდობის  ბედი. ეს გზავნილი სათანადოდ გაიზიარა ქართულმა საზოგადოებამ და ამასთან არის დაკავშირებული ის უპრეცედენტოდ მაღალი აქტივობა, რომელიც დაფიქსირდა ამ არჩევნებზე. ამ უპრეცედენტო აქტივობით რეალურად გაირკვა ის, რომ       საზოგადოებამ სრულად გაითავისა ამ არჩევნების განსაკუთრებული და საგანგებო მნიშვნელობა და ამ არჩევნებში საზოგადოებამ მხარი დაუჭირა ჩვენს კურსს, მმართველ გუნდს, „ქართულ ოცნებას“ და საბოლოო ჯამში, მხარი დაუჭირა ჩვენი ქვეყნის გრძელვადიან, სტაბილურ, მშვიდობიან განვითარებას, რისთვისაც ქართულ საზოგადოებას კიდევ ერთხელ ძალიან დიდი მადლობა უნდა გადავუხადოთ, - განაცხადა პრემიერმა.

როგორც მთავრობის მეთაურმა აღნიშნა, ოპოზიციას ასევე ანგარიში აქვს ჩასაბარებელი პატრონებთან, ქვეყნის გარეთ. 

„ჩვენ არა მხოლოდ განვიხილავდით, არამედ ამაზე საჯაროდ ვსაუბრობდით და არაერთხელ გვითქვამს ის, თუ როგორი იყო ჩვენი პროგნოზი ოპოზიციის ქცევასთან დაკავშირებით და ძალიან ბევრჯერ აღვნიშნეთ, რომ ისინი გაიმეორებდნენ ზუსტად იმავეს, რასაც აკეთებდნენ 4 წლის წინ. საბოლოო ჯამში, ასეც მოხდა. ჩვენ წინასწარ შეგვეძლო, რა თქმა უნდა, იმის გათვლა, რომ ოპოზიცია ვერ შეეგუებოდა არჩევნების შედეგებს, მარცხს. ამის ერთ-ერთი მიზეზი არის ისიც, რომ ისინი ატყუებდნენ საკუთარ მხარდამჭერებს და დღეს, ამ არაღიარებით უწევთ თავის მართლება იმ ტყუილისთვის, რომელსაც ეუბნებოდნენ საკუთარ მხარდამჭერებს არჩევნებამდე. გარდა ამისა, მათ ჰყავთ საკუთარი პატრონები ქვეყნის გარეთ და მათთანაც უწევთ ანგარიშის ჩაბარება. ამ ყველაფრის შედეგია ის, რომ ოპოზიცია არ აღიარებს არჩევნების შედეგებს. თუმცა, საბოლოო ჯამში, ვფიქრობ, რომ ყველაფერი უფრო მარტივად წარიმართება, ვიდრე ეს იყო 4 წლის წინ. მაშინ გახსოვთ, რომ იყო მოლაპარაკებები, იყო აპრილის შეთანხმება,“- განაცხადა პრემიერმა.

როგორც მთავრობის მეთაურმა აღნიშნა, რეალურად ასე მოხდა და 4 წლის წინ ISFED-მა გამოაქვეყნა გაყალბებული პივიტი და მმართველ გუნდს ხუთ კვირა დასჭირდა იმისთვის, რომ ორგანიზაციას პივიტის გაყალბება ეღიარებინა.

„ხუთი კვირა დაგვჭირდა, რომ ეღიარებინათ ის გადახრა, რაც არსებობდა პივიტისა და ცესკოს შედეგებს შორის. მთავარი არგუმენტი, რასაც აფუძნებდა ოპოზიცია მაშინ გაყალბებაზე საუბარს, იყო სწორედ პივიტი, ცდომილება პივიტისა და ცესკოს შედეგებს შორის. ხუთ კვირის თავზე ძლივს ვაღიარებინეთ ამ ენჯეოს და მათ დონორებს, რომ პივიტი იყო ცდომილებაში ცესკოს შედეგებთან და ამ ცდომილების მიზეზი იყო „შეცდომა“, რომელიც დაშვებული იქნა პივიტის შედგენისას. ახლა ისინი აღიარებენ, რომ თანხვედრა არის პივიტისა და ცესკოს შედეგებს შორის, მაგრამ ასეთ პივიტის აღარ აქვს ფასი და ამიტომ არ ქვეყნდება. აქედანაც ჩანს, რომ ამ ადამიანებისთვის ერთადერთი თვითმიზანი არსებობდა - როგორმე კოლექტიური „ნაცმოძრაობა“ უნდა დაბრუნებულიყო ხელისუფლებაშ. მეტი არავითარი მიზანი არ ჰქონდათ, არ არჩევნებზე დაკვირვება, არც სამართლიანი არჩევნების უზრუნველყოფა და ა.შ. მათთვის არჩევნები ფასობს მხოლოდ იმ შემთხვევაში, თუ იგებს კოლექტიური „ნაცმოძრაობა“ ასეთია ენჯეოების მიდგომა, შესაბამისი პარტიების და მათი უცხოელი პატრონების მიდგომა, რაც ძალიან სამწუხაროა“, - განაცხადა პრემიერ-მინისტრმა.

როგორც მთავრობის მეთაურმა აღნიშნა, ოპოზიციის ლეგიტიმაცია რომ სჭირდებოდეს რომელიმე პარლამენტს რომელიმე ქვეყანაში, ამ შემთხვევაში ვერც ერთი დემოკრატიული სისტემა ვერ იფუნქციონირებდა. 

„მე მგონია, რომ ბოლოს ყველა შემოვა პარლამენტში. ეს არის ჩემი პროგნოზი, თუმცა საბოლოო ჯამში ამ პოლიტიკურ პარტიებს არ აქვთ არავითარი რესურსი, მათ შორის ისინი პირველ რიგში პარლამენტს ვერავითარ სიკეთეს ვერ მოუტანენ. იმდენად დესტრუქციულები და რადიკალურები არიან თავის არსით, რომ მათი მონაწილეობა საპარლამენტო ცხოვრებაში მხოლოდ და მხოლოდ კონტრპროდუქტიული იქნება. წინა ოთხი წელი ყველას ახსოვს, ისინი მართალია, შემოვიდნენ პარლამენტში, მაგრამ ვერაფერი დადებითი ვერ მოუტანეს საპარლამენტო ცხოვრებას, მთლიანად იყო დესტრუქცია, მთლიანად იყო რადიკალიზმი, აქედან გამომდინარე თამამად შეიძლება ითქვას, რომ შემოვლენ ისინი პარლამენტში, თუ არ შემოვლენ, ამით არსებითად არაფერი შეიცვლება. მთავარი არის ერთი რამ - ოპოზიციის ლეგიტიმაცია არ სჭირდება პარლამენტს, პარლამენტს სჭირდება სახალხო ლეგიტიმაცია, რომელიც ამ პარლამენტმა უკვე მიიღო, როდესაც მილიონ 120 ათასი ადამიანი გამოვიდა, მხარი დაუჭირა მმართველ გუნდს, როდესაც მთლიანობაში ორი მილიონ 100 ათასი ადამიანი გამოვიდა და მხარი დაუჭირა სხვადასხვა პოლიტიკურ პარტიას, ამით შედგა უკვე პარლამენტის ლეგიტიმაცია. ოპოზიციის ლეგიტიმაცია რომ სჭირდებოდეს რომელიმე პარლამენტს რომელიმე ქვეყანაში, ამ შემთხვევაში ვერც ერთი დემოკრატიული სისტემა ვერ იფუნქციონირებდა, შესაბამისად, ყველაფერი არის ძალიან მარტივად. შემოვლენ, არ შემოვლენ ეს არის მათ გადასაწყვეტი. პარლამენტის ლეგიტიმაცია არის სახეზე“, - განაცხადა ირაკლი კობახიძემ. 

მისივე თქმით, ოპოზიციას დღეს არ აქვს ის რესურსი, რაც ჰქონდათ 4 წლის წინ.

„მაშინ მათ ჰქონდათ რესურსი, რომ ჩვენ იძულების ქვეშ დავმდგარიყავით, შევსულიყავით მოლაპარაკებებში, ხელი მოგვეწერა არასწორ შეთანხმებაზე. ეს იყო შეთანხმება, რომელიც ითვალისწინებდა კონსტიტუციური ჩარჩოდან ქვეყნის გასვლას. სამი ძირითადი მიზანი ჰქონდა მაშინდელ შეთანხმებას, ერთი ეს იყო სასამართლოზე ოპოზიციის გავლენის დაბრუნება - პირველი რაც აისახა მაშინდელი აპრილის შეთანხმებაში, მეორე იყო ცესკოზე ოპოზიციის კონტროლის უზრუნველყოფა, კონკრეტული მექანიზმები იყო ამასთან დაკავშირებით ჩადებული.

პარლამენტი რეალურად ვერ ირჩევდა ცესკოს თავმჯდომარეს, რადგან იყო საჭირო კვალიფიციური უმრავლესობა, შესაბამისად, ოპოზიციონერი მოადგილე ხდებოდა ავტომატურ რეჟიმში ცესკოს თავმჯდომარე. გარდა ამისა, კვალიფიციური უმრავლესობის გამო, პარლამენტი ვერ ირჩევდა ცესკოს სხვა წევრებს, ამის გამო, ოპოზიციის ხელში გადადიოდა ცესკოში უმრავლესობა. შეგიძლიათ, წარმოიდგინოთ, რა მოხდებოდა ასეთ შემთხვევაში ანუ ოპოზიციის ხელში რომ ყოფილიყო ცესკოს უმრავლესობა და ცესკოს თავმჯდომარის თანამდებობა. ის საბოტაჟი, რასაც ცდილობენ ისინი პარლამენტში, მოხდებოდა ცესკოში და არჩევნებს დაუკავშირდებოდა. არჩევნები საერთოდ ვერ შედგებოდა იმ შემთხვევაში, თუ ოპოზიცია წააგებდა არჩევნებს. ამის შემდეგაც გაგრძელდა ზეწოლა ამ თემებთან დაკავშირებით“, - განაცხადა პრემიერ-მინისტრმა. 

მისივე თქმით, სასამართლოზე კოლექტიური „ნაცმოძრაობის“ კონტროლის დაბრუნება იყო პირველი მიზანი, მეორე იყო ცესკოზე კოლექტიური „ნაცმოძრაობის“ კონტროლის უზრუნველყოფა და მესამე, რიგგარეშე საპარლამენტო არჩევნები.

„მაშინ ჩვენ მოგვიწია 43-პროცენტიან ბარიერზე დათანხმება, რაც იყო სრული ნონსენსი, სრული აბსურდი. თვითმმართველობის არჩევნებს დაუკავშირდა რიგგარეშე საპარლამენტო არჩევნების ჩატარების საკითხი, ამაზეც მოგვიწია დათანხმება. ეს სამი საკითხი გულისხმობდა კონსტიტუციური ჩარჩოებიდან ქვეყნის გასვლას. მაშინ იყო უფრო ძლიერი ოპოზიცია გამომდინარე იქიდან, რომ კონტექსტი იყო შესაბამისი, დღეს საერთოდ არაფრის რესურსი არ აქვთ, მათ შორის იმის გამო, რომ როგორც ცნობილია, ერთ მდინარეში ორჯერ ვერ შეხვალ. ისინი ახლა ცდილობენ, შევიდნენ ერთ მდინარეში მეორედ, რაც უბრალოდ შეუძლებელი და გამორიცხულია, ამიტომ მათ უკვე გაისროლეს ის ტყვიები, რაც დღეს უნდა გამოეყენებინათ. 4 წლის წინ რაც ჰქონდათ არსენალში, ყველა ტყვია გახარჯეს, შესაბამისად, დღევანდელ საბოტაჟს მათი მხრიდან არავითარი ეფექტი არ აქვს“, - განაცხადა პრემიერ-მინისტრმა.

როგორც მთავრობის მეთაურმა აღნიშნა, ოპოზიციას აქვს ძალიან სუსტი პოზიციები, ვინაიდან არც საბაბი აქვთ არჩევნების გაყალბებაზე სასაუბროდ და არც ხალხის მხარდაჭერა. 

„ადრე იყო, 4 წლის წინ, დავუშვათ, ადამიანური შეცდომები, ტექნიკური ხარვეზები, დისბალანსები ოქმებში და ა.შ. ახლა ასეთი რამეებიც კი არ არის, ანუ აბსოლუტურად სუფთაა ყველაფერი და ამ კუთხით აქვთ სუსტი პოზიციები და ასევე მათ მიმართ ხალხის მხარდაჭერა დღეს არის კიდევ უფრო სუსტი, ვიდრე ეს იყო 4 წლის წინ. თქვენ იცით, რამხელა სხვაობა იყო ჩვენს შედეგსა და მეორე პოლიტიკურ პარტიას შორის. ეს იყო 890 000 ხმა, ანუ ჩვენმა პარტიამ აიღო 890 000 ხმით მეტი მეორე პარტიასთან შედარებით, 43 %-ით მეტი ავიღეთ. ერთი და იგივე რესურსი სჭირდება საარჩევნო წარმატებას და ქუჩაში წარმატებას, ეს არის ხალხის მხარდაჭერა. თუ არ გაქვს ხალხის მხარდაჭერა, ბუნებრივია, ვერც იქ გექნება წარმატება და ვერც აქ და ეს არის მთავარი მიზეზი, რატომაც არც გეგმა აქვთ, ვინაიდან რაღაც უნდა გიმაგრებდეს პოზიციებს, რომ გეგმა დასახო შენი აქტივობისთვის. გეგმას ზუსტად იმიტომ ვერ სახავენ, რომ არავითარი სიმყარე არ აქვთ საკუთარ პოზიციებში. არც ხალხის მხარდაჭერა აქვთ, არც რაიმე საბაბი არჩევნების გაყალბებაზე სასაუბროდ. ეს არის მთავარი მიზეზი, რატომაც ისინი არიან სუსტად წარმოდგენილნი,“ - განაცხადა პრემიერმა.

ის, რომ ჩვენი მხარდამჭერები იყვნენ ასეთ მობილიზებულები არჩევნების დღეს, დიდწილად იყო განპირობებული სწორედ უცხოური ჩარევით, ჩვენი საზოგადოების ღირსებას შეეხნენ ასეთ ჩარევებით, - ამის შესახებ საქართველოს პრემიერ-მინისტრმა ირაკლი კობახიძემ  გადაცემაში "აქტუალური თემა" ევროკავშირის რვა ქვეყნის საგარეო ურთიერთობათა კომიტეტების თავმჯდომარეების ოპოზიციის აქციაში მონაწილეობასთან დაკავშირებით დასმული კითხვის საპასუხოდ განაცხადა.

მთავრობის მეთაურის შეფასებით, მათი ვიზიტები გათვლილია ოპოზიციის გამაგრებაზე, თუმცა ასეთი ჩარევები მათთვის საპირისპირო ფუნქციას ასრულებს.

„მადლობა მათ, ისინი ჩამოდიოდნენ არჩევნებამდეც და ჩვენი ექსპერტები, რომლებიც კვლევების ანალიზში გვეხმარებოდნენ, გვეუბნებოდნენ, რომ ასეთმა უხეშმა ჩარევამ ჩვენს საარჩევნო და პოლიტიკურ პროცესებში მათთვის კონტრპრდუქტიულად იმოქმედა. ის, რომ ჩვენი მხარდამჭერები იყვნენ ასეთი მობილიზებულები არჩევნების დღეს, დიდწილად იყო განპირობებული სწორედ უცხოური ჩარევით. ჩვენი საზოგადოების ღირსებას შეეხნენ ასეთი ჩარევებით. რაც შეეხება პოსტსაარჩევნო პერიოდს, ასეთი ვიზიტებით, ასეთი ჩარევებით ისინი კიდევ უფრო მეტად ამობილიზებენ ჩვენს მხარდამჭერებს, რადგან ეხებიან ჩვენი საზოგადოების ღირსებას. საბოლოო ჯამში ეს ყველაფეირ კიდევ უფრო მეტად ასუსტებს ოპოზიციას. რა თქმა უნდა, მათი ვიზიტები გათვლილია ოპოზიციის გამაგრებაზე. ხედავენ, რომ ხალხი ვერ შეკრიბეს ოპოზიციის გარშემო და უნდათ, ამით გაამაგრონ ოპოზიცია, მეტი ხალხი შეკრიბონ, თუმცა ასეთი ვიზიტები და ჩარევები პირიქით, საპირისპირო ფუნქციას ასრულებს მათთვის“, - განაცხადა ირაკლი კობახიძემ. 

პრემიერის თმით, თვითონ ეგზიტპოლები რომ გაყალბებულია, ამის მტკიცებულებას იძლევა ამ ორი ეგზიტპოლის შედარება და ასევე ეგზიტპოლის და ცესკოს შედეგების შედარება.

„რაც შეეხება ეგზიტპოლს -თუ აყალბებ არჩევნებს, თუ მმართველი პარტია აყალბებს არჩევნებს, თეორიულად დავუშვათ ასეთი რამ - ამ სემთხვევაში ხომ პროპორციულად კლდება ყველა ოპოზიციურ პარტიას. ამას ამბობენ. შენ დაიმატე 400 000 ხმა, ეს უნდა გამოაკლო და პროპორციულად უნდა მოაკლდეს ოპოზიციურ პარტიებს. სხვა ლოგიკა ხომ არ არსებობს. ეგზიტპოლი როგორ შეიძლება იყოს სანდო, როცა გვაქვს შემდეგი მოცემულობა - არჩევნებზე დაფიქსირდა 11% „ახალი“ და 9% „ლელო“. 2%-იანი სხვაობა იყო „ახალსა“ და „ლელოს“ შორის. „ედისონის“ ეგზიტპოლის მიხედვით, 18% ჰქონდა „ახალს“ და 9% ჰქონდა „ლელოს“. ანუ, არჩევნებში დაფიქსირებულია 2%-იანი სხვაობა და ამათ აქვთ ორმაგი სხვაობა დაფიქსირებული. ცალკე ავიღოთ „ჰარისის“ და „ედისონის“ ეგზიტპოლები - ერთმანეთში აქვთ ცდომილება. რომელს უნდა ენდო. როგორც ჩანს, არ ჰქონდათ ერთმანეთში შეთანხმებული, აქეთ „ფორმულას“ და იქით „მთავარს“, რა ფორმით გაყალბდებოდა ეს ეგზიტპოლები, ერთმანეთსაც კი ააცილეს ეგზიტპოლის შედეგები. უფრო მეტიც, როგორ შედიძლება არჩევნებზე ამოვიდეს 2%-იანი სხვაობა, 9 და 11 და ეგზიტპოლში „ლელოს“ პროცენტი სწორად დაჯდა, 9% და 11-ის მაგივრად 18 % დაუფიქსირეს „ახალს“, ისე, რომ 2%-ის მაგივრად ორმაგი სხვაობა ფიქსირდება ეგზიტპოლში „ახალსა“ და „ლელოს“ შორის. თვითონ ეგზიტპოლები რომ გაყალბებულია, ამის მტკიცებულებას პირდაპირ იძლევა ამ ორი ეგზიტპოლის შედარება და ასევე ეგზიტპოლის და ცესკოს შედეგების შედარება. გაყალბებაზე არ საუბრობენ სინამდვილეშ ისინი, ისინი რასაც გვაბრალებენ, ეს არის ფოკუსი. ეს არ არის გაყალბება. 400 000 ხმის დამატება ეს არის ფოკუსი და არა გაყალბება. როცა ასეთ რაღაცას გაბრალებენ, ჩანს, რამდენად უსუსურ მდგომარეობაშა ოპოზიცია“, - განაცხადა პრემიერმა.

როგორც მთავრობის მეთაურმა აღნიშნა, ევროპელი დეპუტატების დელეგაციის წევრების ნახევარი ჩართული იყო საქართველოში წინასაარჩევნო აგიტაციაში.

„შეიძლება შეხვედრა ღირდეს იმ ადამიანებთან, რომლებსაც აკლიათ ინფორმაცია, რომლებიც არიან ობიექტურები. თქვენ გახსოვთ, იყო, გაიმართა ასეთ ადამიანებთან შეხვედრები არჩევნებამდე, მაგრამ ამის მიუხედავად, მაინც აკეთებდნენ იმას, რაც ჰქონდათ გასაკეთებელი, რაც ჰქონდათ დავალებული. ამ მოთხოვნის მიზანი იყო, რომ ეჩვენებინათ, თითქოს რაღაც სცადეს და ჩვენ ვუთხარით უარი, მაგრამ, საბოლოო ჯამში, აქაც ვერაფერი მოიგეს. აქ იყვნენ წარმოდგენილნი ადამიანები, ყველაზე არ მაქვს საუბარი, თუ არ ვცდები, 8 კაცისგან შედგებოდა დელეგაცია და ერთ-ერთი მათგანი, სხვათაშორის, საერთოდ არ მივიდა აქციაზე, ანუ გამოეყო შესაბამის ჯგუფს, ესეც საინტერესო დეტალია. აქ იყო რამდენიმე უცხოელი დეპუტატი, რომლებიც პირდაპირ იყვნენ ჩართულნი ოპოზიციის სასარგებლოდ საარჩევნო კამპანიაში და ახლა ეს ადამიანები გვესაუბრებიან საარჩევნო დარღვევების თემაზე. თვითონ არღვევდნენ საარჩევნო პრინციპებს და ახლა ჩამოდიან, როგორც „ობიექტური შემფასებლები“ იმ არჩევნებისა, რომელიც ჩატარდა საქართველოში. არ შეიძლება ერთი ხელით არღვევდე საარჩევნო პრინციპებს და მეორე მხრივ, როგორც „ობიექტური დამკვირვებელი“ გვიფასებდე აქ არჩევნებს. რა თქმა უნდა, ასეთ ადამიანებთან შეხვედრას არავითარი ფასი და აზრი არ აქვს. რვავე ასეთი არ იყო, მაგრამ დელეგაციის ნახევარი ჩართული იყო წინასაარჩევნო აგიტაციაში, გახსოვთ, რა მოწოდებებით გამოდიოდნენ სცენაზე ბოლო ვიზიტის დროს, იყო მიხეილ სააკაშვილს გათავისუფლება და აღარ მინდა ყველაფერს შევეხო. ამიტომ, არავითარი აზრი და ფასი ამ ადამიანებთან შეხვედრას არ აქვს, როცა წინასწარ იცი, რომ ბოლოს მაინც ის დავალება უნდა შეასრულონ, რომელი დავალებითაც ჩამოვიდნენ,“- განაცხადა პრემიერმა.