თბილისის საქალაქო სასამართლოში დასრულდა ერთ-ერთი ყველაზე ხმაურიანი პროცესი, რომელმაც საზოგადოების ყურადღება პირველივე დღიდან მიიპყრო. 12-მა ნაფიცმა მსაჯულმა, სამსაათიანი მსჯელობის შემდეგ, ერთხმად გამოიტანა გამამტყუნებელი ვერდიქტი 25 წლის "ტიკტოკერი" თეკლა გერსამიას მიმართ. ქალს 22 წლის ლუკა დარასელიას განზრახ მკვლელობაში ედება ბრალი. მსაჯულების გადაწყვეტილების საფუძველზე, მოსამართლე ნინო ნაჭყებიამ გერსამიას 20 წლით თავისუფლების აღკვეთა მიუსაჯა.

ბრალდებული დანაშაულს არ აღიარებს. დაცვის მხარის პოზიციით, მომხდარი არა მკვლელობა, არამედ თვითმკვლელობის მცდელობა იყო — მათი მტკიცებით, ლუკა დარასელიამ ჭრილობა საკუთარ თავს თავად მიაყენა. თუმცა, ნაფიცმა მსაჯულებმა ეს ვერსია არ გაიზიარეს. საქმის პროკურორი, ნათია გურული, ვერდიქტით კმაყოფილია და აცხადებს, რომ მსაჯულებმა მოქალაქეობრივი ვალდებულება ჯეროვნად შეასრულეს. მისი თქმით, როდესაც ადამიანი სამიზნედ გულს ირჩევს და იარაღად დანას იყენებს, ეს ცალსახად სასიკვდილო შედეგის გაცნობიერებულ განზრახვაზე მიუთითებს.

საქმის ერთ-ერთი ყველაზე საკამათო მტკიცებულება ფარული აუდიო-ვიდეო ჩანაწერი აღმოჩნდა. ჩანაწერში, რომელიც პოლიციის თანამშრომელთანაა გაკეთებული, თეკლა გერსამია დანაშაულს აღიარებს, თუმცა მოგვიანებით მან ეს ჩვენება ექსპერტებთან უარყო. ბრალდებულის ადვოკატი, პაატა მეხრიშვილი, განაჩენის სააპელაციო სასამართლოში გასაჩივრებას აპირებს. ის მიიჩნევს, რომ აღიარება კანონდარღვევით, ადვოკატის გარეშე და მრავალსაათიანი ფსიქოლოგიური ზეწოლის შედეგად არის მოპოვებული. ადვოკატის თქმით, ჩანაწერი წყვეტილია და მასში გარკვევით ისმის, როგორ სთხოვს თეკლა პოლიციას დაპირების შესრულებას, რომ შვილს არ წაართმევდნენ. მეხრიშვილი ასევე უთითებს, რომ მკვლელობის განზრახვის შემთხვევაში, ბრალდებული ასე ისტერიულად არ ეცდებოდა დაჭრილის გადარჩენას — ვიდეოკადრებში ჩანს, როგორ მირბის თეკლა სასწრაფო დახმარების მოსაყვანად და როგორ ევედრება ღმერთს საავადმყოფოში ქმრის გადარჩენას.

განსხვავებულია დაცვის მხარის მიერ წარმოდგენილი კონფლიქტის მიზეზიც. ადვოკატის თქმით, ჩხუბი მაღაზიაში მომხდარმა წვრილმანმა ქურდობამ გამოიწვია, რის გამოც თეკლამ ქმარს სახლიდან წასვლა მოსთხოვა. მისივე დახასიათებით, გარდაცვლილს წარსულში კრიმინალური მენტალიტეტი და ნასამართლეობა ჰქონდა.

სრულიად სხვა სურათს ხატავს გარდაცვლილის დედა, ინგა ესართია. ის განაჩენს სამართლიანად მიიჩნევს და ამბობს, რომ მისი შვილი თავს არასდროს მოიკლავდა. დედის ვერსიით, მკვლელობის ნამდვილი მოტივი ღალატი იყო. მისი თქმით, თეკლას სასიყვარულო მიმოწერა ჰქონდა ლუკას მეგობართან, რომელიც ციხეში იჯდა. ინგა ესართია ვარაუდობს, რომ იმ დილით ლუკამ ეს შეტყობინებები ნახა, სახლიდან წასვლა დააპირა, თეკლა კი სადარბაზოში დაეწია და სასიკვდილო ჭრილობა მიაყენა. 

ინგა ესართიამ ასევე აღნიშნა, რომ თეკლას ოჯახი საქმის „ჩაფარცხვასა“ და ფულით მოგვარებას ცდილობდა, თუმცა ნაფიცმა მსაჯულებმა ყველა მტკიცებულება, მათ შორის თეკლას საკუთარი შვილის ჩვენებაც მოისმინეს. ბავშვმა დაადასტურა, რომ კონფლიქტი ტელეფონის გამო დაიწყო.

ინგა ესართიას თქმით, ნაფიცმა მსაჯულებმა ნახეს უამრავი ვიდეო, სადაც ჩანს, როგორ მზრუნველად და სიყვარულით ეპყრობოდა ლუკა მეუღლეს, თეკლას მხრიდან კი მხოლოდ ცივ დამოკიდებულებასა და ზიზღს ხედავდა. დედა იხსენებს, რომ განაჩენის გამოცხადების შემდეგ მსჯავრდებულმა მას მუქარითაც კი მიმართა: „მე გამოვალ და შენ გნახავო“. ეს ფაქტი, დედის აზრით, კიდევ ერთხელ ადასტურებს, რომ ბრალდებულს სინანულის გრძნობა ერთი წამითაც არ გააჩნია. ინგა ესართია მადლიერებას გამოხატავს ნაფიცი მსაჯულებისა და პროკურორების მიმართ, რომლებმაც სიმართლე ბოლომდე მიიტანეს სასამართლომდე და დაამტკიცეს, რომ ლუკას თავი არ მოუკლავს.

ამ ეტაპზე 20-წლიანი პატიმრობა ძალაშია, თუმცა დაცვის მხარე ბრძოლას აგრძელებს. პაატა მეხრიშვილი აცხადებს, რომ თუ ქართული სასამართლო არ შეცვლის გადაწყვეტილებას, ისინი სტრასბურგის ადამიანის უფლებათა ევროპულ სასამართლოს მიმართავენ. ადვოკატი დარწმუნებულია, რომ საერთაშორისო მართლმსაჯულება საქმის მთავარ მტკიცებულებას, ფარულ ჩანაწერს, დაუშვებლად სცნობს და გადაწყვეტილებას გააუქმებს.