2026 წლის ბიუჯეტის პროექტის საბოლოო ვერსიაში გათვალისწინებულია საჯარო სკოლების ადმინისტრაციული პერსონალის, სკოლის ექთნებისა და მანდატურების ხელფასების 20%-იანი ზრდა. ამის შესახებ ინფორმაციას ფინანსთა სამინისტრო ავრცელებს.

თავდაპირველად ამ მიმართულებით 10%-იანი ზრდა იყო დაგეგმილი, რაც მოგვიანებით გადაიხედა.

"2026 წლის ბიუჯეტის პროექტის საბოლოო ვერსიაში განათლების, მეცნიერებისა და ახალგაზრდობის სამინისტროს დაფინანსება განისაზღვრა 2 702,2 მლნ ლარით, რაც პროექტის წინა ვერსიით განსაზღვრულ თანხას 89,6 მლნ ლარით აღემატება.

სამინისტროს ფარგლებში გათვალისწინებულია:

✓ სკოლამდელი და ზოგადი განათლება - 1 923,0 მლნ ლარი, რაც პროექტის წინა ვერსიით განსაზღვრულ თანხას 37,1 მლნ ლარით აჭარბებს. გაზრდილი დაფინანსების ფარგლებში, საპარლამენტო განხილვების დროს დაყენებული წინადადებების შესაბამისად გათვალისწინებულია საჯარო სკოლების ადმინისტრაციული პერსონალის, სკოლის ექთნებისა და მანდატურების ხელფასების 20%-იანი ზრდა, ნაცვლად მანამდე განსაზღვრული 10%-ისა.

✓ პროფესიული განათლება - 229,3 მლნ ლარი (გაზრდილია 14,4 მლნ ლარით);

✓ უმაღლესი განათლება - 196,0 მლნ ლარი (გაზრდილია 4,0 მლნ ლარით);

✓ მეცნიერებისა და სამეცნიერო კვლევების ხელშეწყობა - 90,4 მლნ ლარი;

✓ ინკლუზიური განათლება - 101,3 მლნ ლარი (გაზრდილია 8,5 მლნ ლარით);

✓ ახალგაზრდობის მხარდაჭერა - 21,5 მლნ ლარი (გაზრდილია 5,9 მლნ ლარით)",- აღნიშნავენ ფინანსთა სამინისტროში.

ცნობისთვის, 2026 წელს გათვალისწინებულია საჯარო მოხელეთა ანაზღაურების 10%-იანი ზრდა. იგეგმება პოლიციელებისა და ჯარისკაცების ხელფასების 10%-იანი მატება. ასევე გათვალისწინებულია პირველადი ჯანდაცვის პერსონალის ხელფასების 10%-იანი ზრდა.

bm.ge