ხორცპროდუქტები კიბოს იწვევენ?!

ჯანდაცვის მსოფლიო ორგანიზაცია პლანეტის მოსახლეობას აფრთხილებს, რომ ლორის, ძეხვეულისა და ხორცის სხვა დამუშავებული პროდუქტების მოხმარება, სიმსივნის პოვოცირების თვალსაზრისით, ისეთივე საშიშია, როგორც თამბაქო. თავის მხრივ, ოქსფორდის უნივერსიტეტის მკვლევარებმა დაადგინეს, რომ კვირაში მხოლოდ 4 პორცია ხორცის ნაწარმის მიღება 40%-ით ზრდის კიბოს განვითარების რისკს. სწავლულები ვარაუდობენ, რომ ხორცში არსებული ნაერთები აზიანებენ კუჭ-ნაწლავის ტრაქტის უჯრედების დნმ-ს, რის შედეგადაც სიმსივნე ვითარდება. გარდა ამისა, დამუშავებული პროდუქტები სხვა მხრივაც საშიშია. დამუშავების პროცესში ცდილობენ, მათი შენახვის ვადა მაქსიმალურად გაზარდონ. ამისთვის, პროდუქციას ბოლავენ, უმატებენ მარილს, ნიტრატებისა და ნიტრიტების მსგავს ქიმიურ კონსერვანტებს. ზოგიერთი ექსპერტი კი სიმსივნური დაავადებების მომატებულ რისკს, სწორედ ხორცპროდუქტებში არსებულ დანამატებს უკავშირებს. ჯანდაცვის მსოფლიო ორგანიზაცია ახალ ხორცს ნაკლებად საშიშ პოზიციას ანიჭებს და მას „შესაძლო კანცეროგენის“ სტატუსს ანიჭებს. თუმცა, მეცნიერები იმასაც ამბობენ, რომ ხორცი სასარგებლოა ჯანმრთელობისთვის, რადგან მასში ბევრი ცილა, რკინა, „ბე-12“ ვიტამინია, რაც აუცილებელია ჩვენი ორგანიზმისთვის.