Menu
RSS

საქართველოს ბანკის ახალი სტრატეგია

პერსონიფიცირებული მომსახურება და ლოგო _ მომხმარებლების სახელებით

,,ნინის ბანკი'', ,,გოგას ბანკი'', ,,სოფოს ბანკი'', ,,ლუკას ბანკი'' _ ეს საქართველოს ბანკის სრულიად ახალი, პერსონიფიცირებული მომსახურების საფეხურია. ზუსტად ერთი წლის წინ, ქვეყნის წამყვანმა ბანკმა საბანკო მომსახურების ახალი მოდელი _ ,,მეტი ურთიერთობები'' დანერგა, 13 აპრილს კი საკუთარ მომხმარებლებს ამ მოდელის კიდევ ერთი საფეხური _ პერსონიფიცირებული მომსახურება შესთავაზა.

საქართველოს ბანკის გენერალური დირექტორის, კახა კიკნაველიძის განცხადებით, პერსონიფიცირებული მომსახურება მომხმარებლის ეპიცენტრში ყოფნას გულისხმობს, რაც ბანკის ახალი სტრატეგიის ნაწილია. მისი თქმით, პერსონიფიცირებული საბანკო მომსახურების მოდელის დანერგვასთან ერთად, ბანკის ლოგოც პერსონიფიცირებულია. 

კახა კიკნაველიძემ განმარტა, რომ ამიერიდან, მომხმარებელს საქართველოს ბანკის ლოგოს ადგილას, სახელობითი ლოგო დახვდება. მობილბანკით (mbank), ინტერნეტბანკით (ibanck), თვითმომსახურების ტერმინალითა, თუ სხვა ელექტრონული არხებით სარგებლობისას, ბანკის ლოგოტიპი მომხმარებლის სახელობითი ლოგოტიპით შეიცვლება. მეტიც, მომხმარებელს შესაძლებლობა ექნება, რომ პლასტიკური ბარათი მისი სურვილისამებრ, ბანკის სახელობითი ლოგოტიპით აიღოს. ამასთან, სურვილის შემთხვევაში, მომხმარებელი საკუთარ სახელს ზუსტად ისეთი ფორმულირებით დააფიქსირებს, როგორც მას სურს. ამრიგად, ბანკის სახელობით ლოგოტიპზე აღნიშნული იქნება, მაგალითად, „ნინის ბანკი“, „გოგას ბანკი“, ,,მარიკას ბანკი'', ,,ირაკლის ბანკი''... 

კახა კიკნაველიძის განცხადებით, საქართველოს ბანკი ყოველთვის გამოირჩეოდა იმით, რომ საბანკო სფეროში მომსახურების ახალ სტანდარტებს ნერგავდა: 

,,ათწლეულზე მეტია, საქართველოს ბანკი ზრუნავს, რომ საბანკო მომსახურება მაქსიმალურად კომფორტული და მომხმარებელზე მორგებული გახადოს. ამ მიზნით, ბანკმა გასულ წელს დანერგა მომსახურების უახლესი მოდელი, რომელიც მომხმარებელთან კიდევ უფრო „მეტ ურთიერთობას“ გულისხმობს. დღევანდელი სიახლეც სწორედ ამ მიდგომის ნაწილია, რაც ჩვენი მომხმარებლის ეპიცენტრში ყოფნასა და მომსახურების ინდივიდუალურ მიდგომას გულისხმობს. საქართველოს მასშტაბით, ჩვენ 2 მილიონზე მეტ მომხმარებელს ვემსახურებით. შესაბამისად, თითოეული მათგანის სურვილები და მიზნები ჩვენთვის ძალიან მნიშვნელოვანია. სწორედ აქედან გამომდინარე, გადავწყვიტეთ, საქართველოს ბანკი კიდევ უფრო მეტად პერსონიფიცირებული ბანკი გახდეს თითოეული მომხმარებლის ჭრილში. მინდა აღვნიშნო, რომ ამ მიმართულებით, საქართველოს ბანკი კიდევ ბევრ სიახლეს შესთავაზებს მომხმარებელს“. 

იმისთვის, რომ კომპანია წარმატებული იყოს, ფსიქოლოგები მმართველ მენეჯმენტს ურჩევენ, სტაფის თითოეულ წევრს სახელით მიმართონ. ეს იმიტომ, რომ ადამიანებს მოსწონთ, როდესაც კონკრეტულად მათი სახელი ესმით, როდესაც პირადად მათ ესაუბრებიან. ამიტომ, საქართველოს ბანკის ახალი, პერსონიფიცირებული მომსახურება, ამ მხრივ, განსაკუთრებით მომხიბლავია. ,,ვერსიის'' კითხვაზე, კიდევ რა ხიბლი აქვს ქვეყნის წამყვანი ბანკის ახალ მომსახურებას, კახა კიკნაველიძემ გვიპასუხა: 

,,ჩვენ გვინდა, რომ როგორც ფილიალურ, ასევე ელექტრონულ ქსელში, გაცილებით უკეთესად ვიცნობდეთ ჩვენს კლიენტებს და მათ მოთხოვნებს. ვინაიდან, გვინდა, სწორედ მათი მოთხოვნების შესაბამისად, შევთავაზოთ სხვადასხვა მომსახურებები. ამ მხრივ, როგორც უკვე გითხარით, სხვადასხვა ინიციატივის განხორციელებას ვგეგმავთ, როგორც ელექტრონული, ასევე ფილიალური ქსელის მიმართულებით''. 

მაია მიშელაძე

მსგავსი

დაბრუნება დასაწყისში