Menu
RSS

„ჩაიდინა თანამდებობისთვის შეუფერებელი საქციელი“

კარიერის დასრულება ან ქვეყნიდან წასვლა _ ევროპის ორგზის ჩემპიონი მთავრობას დახმარებას სთხოვს

მას შემდეგ, რაც ჭიდაობის ფედერაციის პრეზიდენტი, გეგა გეგეშიძე გირაოს სანაცვლოდ გაათავისუფლეს, მოჭიდავეების მხრიდან არაფერი თქმულა. თითქოს სიტუაცია ჩაწყნარდა და ეს, იმის მიუხედავად, რომ გეგეშიძის მიერ სახალხოდ ნაცემმა ევროპის ორგზის ჩემპიონმა, ზურაბ დათუნაშვილმა განაცხადა, თუ გეგეშიძე პრეზიდენტად დარჩება, ჩემს თავს ჭიდაობაში ვერ ვხედავ, ჩვენ ერთად ვეღარ ვიმუშავებთო. მოგეხსენებათ, სასამართლომ გეგეშიძეს თანამდებობა შეუნარჩუნა და ისიც პრეზიდენტად მუშაობას აგრძელებს.

ჩვენ გვქონდა ინორმაცია, რომ ქართულ ჭიდაობაში არსებულ დაპირისპირებას მეზობელი ქვეყნები აქტიურად ადევნებდნენ თვალს და ზურას მოქალაქეობა თურქეთმა და აზერბაიჯანმა უკვე შესთავაზა. ისინი ჩვენებურს სოლიდურ ხელფასსა და მათი სახელით ჭიდაობას სთავაზობენ. ახლა კი დაზუსტებით შეგვიძლია ვთქვათ, რომ ამ ქვეყნებს ირანიც დაემატა. 

3 თებერვალს, დათუნაშვილმა მორიგი განცხადება გაავრცელა, რომელშიც ჩვენი წინანდელი და ამჟამინდელი ვარაუდი, პრაქტიკულად, დაადასტურა. გთავაზობთ ამონარიდებს დათუნაშვილის მიერ გავრცელებული განცხადებიდან: 

„მე, რამდენიმე დღეა, განვაახლე ინდივიდუალური ვარჯიში, თუმცა ჯერჯერობით არ ვიცი, კონკრეტულად რისთვის ვემზადები, რადგან მოგეხსენებათ, საქალაქო სასამართლოს მიერ გამოტანილი აღკვეთი ღონისძიების მიხედვით, ფედერაციის პრეზიდენტი დარჩა თანამდებობაზე, მე კი აქამდეც არაერთხელ აღვნიშნე, რომ ჩემი ამ ხელმძღვანელობასთან მუშაობის გაგრძელება არის შეუძლებელი. 

 

ამ მოცემულობიდან გამომდინარე, ვდგები ჩემთვის უმძიმესი ორი არჩევანის წინაშე _ ან დავასრულო კარიერა, ან ვიფიქრო სხვა ქვეყნის სახელით ასპარეზობაზე. ჩემთვის ჭიდაობა არის არა მხოლოდ საქმიანობა, არამედ, ცხოვრების განუყოფელი ნაწილი, 21 წელზე მეტია, ამ სპორტით ვარ დაკავებული და მის გარეშე არსებობა, უბრალოდ, არ შემიძლია. 

ასევე, წარმოუდგენელია, ვიასპარეზო რომელიმე სხვა ქვეყნის სახელით _ გულზე მქონდეს და ხელში დავიჭირო სხვა ქვეყნის დროშა, კვარცხლბეკზე დგომისას ვეღარ გავიგონო ჩემი სამშობლოს ჰიმნი და თუკი, ღმერთის წყალობით, მოვიპოვებ მედალს, ეკუთვნოდეს რომელიმე სხვა ერს და არა _ ქართველ გულშემატკივარს, 

თუმცა როგორც უკვე აღვნიშნე, სამწუხაროდ, დღესდღეობით, სწორედ ამ ორი უმძიმესი არჩევანის წინაშე აღმოვჩნდი. 

მინდა, ზემდგომ უწყებებს _ საქართველოს მთავრობას, უშუალოდ კი სპორტის სამინისტროს, ოლიმპიურ კომიტეტსა და პარლამენტის სპორტის კომიტეტს კიდევ ერთხელ ვთხოვო, დაინტერესდნენ ჩემი პრობლემით და უფლებამოსილების ფარგლებში, მიიღონ შესაბამისი გადაწყვეტილება. 

მთელმა ქვეყანამ ნახა, რომ ფედერაციის პრეზიდენტმა საჯაროდ დაარღვია წესდება და ჩაიდინა თანამდებობისთვის შეუფერებელი საქციელი, ასევე ბოლო პერიოდში, არაერთხელ ითქვა სხვა ტიპის დარღვევებზეც, თუმცა გეგა გეგეშიძე ამ დრომდე აგრძელებს პრეზიდენტის პოსტზე მუშაობას.… 

მესმის, რომ ჩემი მდგომარეობა, შესაძლოა, აღიქმება ისე, როგორც ერთი სპორტსმენის პრობლემა, რომელიც მარტო აღმოჩნდა ხელმძღვანელი პირების უსამართლო მმართველობისა და ღიად გამოხატული ძალადობის პირისპირ, თუმცა მინდა აღვნიშნო, რომ არც ისე მარტო ვარ, როგორც ეს, ერთი შეხედვით, ჩანს და პრობლემები, რომლებიც მე გავაჟღერე, არაერთ სპორტსმენს ეხება. 

ბევრი ნიჭიერი და პერსპექტიული ახალგაზრდა უკვე წავიდა ქვეყნიდან, ბევრიც იძულებული გახდა, ჭიდაობისთვის თავი დაენებებინა და ეს პროცესი კიდევ უფრო გაღრმავდება, რაც მიგვიყვანს სავალალო შედეგებამდე. 

როგორც იცით, ნაკრების ერთმა ნაწილმა ღიად დაუჭირა მხარი ფედერაციის პრეზიდენტს, ამიტომ ამ ეტაპზე არ მინდა იმ სპორტსმენების დასახელება, ვინც განსხვავებულად ფიქრობს, რადგან ეს შესაძლოა, აღქმული იყოს, როგორც ჭიდაობის სამყაროს ორად გახლეჩვა, რაც რეალურად ასე არაა და სინამდვილეში, პრობლემები, რომელზეც ვსაუბრობ, საერთოა ყველასთვის და მოჭიდავეებს ერთმანეთში არანაირი დაპირისპირება არ გვაქვს.… 

შესაბამისად, მინდა ყველას, ვისაც ხელეწიფება ჭიდაობის ფედერაციაში არსებული მდგომარეობის მოგვარება, მიიღოს შესაბამისი ზომები და ფედერაციას ჩამოაცილოს გეგა გეგეშიძე და მისი გარემოცვა, ხოლო თუ მიიჩნევა, რომ მას აქვს უფლებამოსილება, გააგრძელოს თანამდებობაზე ყოფნა, მაშინ მირჩიეთ _ დავასრულო კარიერა, თუ წავიდე ქვეყნიდან? 

ასევე, მინდა ვთხოვო საზოგადოებას, მაქსიმალურად დაინტერესდნენ მიმდინარე პროცესით, რადგან ჭიდაობის ფედერაცია არის საჯარო უწყება, ფინანსდება სახელმწიფო ბიუჯეტიდან და თითოეული ადამიანის წინაშე არის ანგარიშვალდებული…“ 

ფაქტია, რომ სიტუაცია არც დალაგებულა და არც შეცვლილა. ნაბიჯ-ნაბიჯ, მაგრამ მტკიცედ მივდივართ იქითკენ, რომ კიდევ ერთი სახელოვანი ქართველი მოჭიდავე დატოვებს საქართველოს და მერე ისე არ მოხდეს, მსოფლიოს ჩემპიონატსა, თუ ოლიმპიადაზე დათუნაშვილმა სხვა ქვეყნის ჰიმნი დააკვრევინოს. 

რეალობა ისაა, რომ ევროპის ორგზის ჩემპიონის ხმა, ჯერჯერობით, საქართველოში არავის ესმის.

ბათო ჯაფარიძე

დაბრუნება დასაწყისში