თავისუფლების მოედანზე „ქართული ოცნების“ აქცია მიმდინარეობს - ირაკლი ღარიბაშვილის მიმართვა მხარდამჭერებს

თავისუფლების მოედანზე "ქართული ოცნების" შემაჯამებელი შეკრება დაიწყო. აქცია საქართველოს ეროვნული ჰიმნით გაიხსნა. მოქალაქეები აქციას რეგიონებიდანაც შეუერთდნენ და როგორც ისინი აცხადებენ, მხარს უჭერენ "ქართულ ოცნებას" და მიიჩნევენ, რომ თვითმმართველობის არჩევნების მეორე ტურში მმართველმა ძალამ უნდა გაიმარჯვოს.

ღონისძიებაზე მხარდამჭერებს საქართველოს პრემიერ-მინისტრმა მიმართა:

„მოგესალმებით ჩემო თანამოქალაქენო, ჩემო თანამებრძოლებო, ჩემო მეგობრებო! მივესალმები ჩვენს ღირსეულ, ამაყ, თავისუფლებისმოყვარე და დაუმარცხებელ ქართველ ხალხს! მივესალმები სრულიად საქართველოს! ჩემთვის დიდი პატივია, საქართველოს ათი ათასობით მოქალაქის, ამდენი გულანთებული პატრიოტის წინაშე სიტყვით გამოსვლა. პირველ რიგში, მინდა გულწრფელი მადლობით დავიწყო ჩემი გამოსვლა. დიდი მადლობა თქვენი ერთგულებისთვის, ნდობისთვის, თავდადებისთვის, სიმტკიცისთვის, ბრძოლისთვის და დღეს აქ მობრძანებისთვის. დღეს აქ, თავისუფლების მოედანზე, თავისუფლებისთვის მებრძოლი ადამიანები შევიკრიბეთ, რომლებმაც 2012 წელს სწორედ აქ ვაჩვენეთ ქართველი ხალხის ძალა და სიბრძნე, ქართველი ხალხის მტკიცე სურვილი იცხოვროს სამართლიან, თავისუფალ, დემოკრატიულ, მშვიდობიან და მტკიცე სახელმწიფოში, სადაც დაცულია ადამიანის ფუნდამენტური უფლებები, ღირსება და თავისუფლება, სადაც ადამიანი და მისი სიცოცხლე უმთავრესი ღირებულებაა. 2012 წელს ჩვენი პარტიის დამფუძნებლის, ბიძინა ივანიშვილის ლიდერობით ამ ქვეყნის რიგითმა ჯარისკაცებმა მშვიდობიანი აქციით განვაიარაღეთ ავტორიტარული, ხალხის მჩაგვრელი რეჟიმი და ხელისუფლებას ჩამოვაშორეთ მკვლელების, ჯალათებისა და მოღალატეების პარტია, ანტისახელმწიფოებრივი, ანტიეკლესიური და ანტიეროვნული ძალა. ჩვენ დავაფუძნეთ ის ღირებულებები და ფასეულობები, რომლითაც ქვეყანა დღემდე იმართება. ჩვენ ვართ ხელისუფლება, რომელმაც დამოუკიდებელი საქართველოს ისტორიაში ყველაზე ხანგრძლივად შეძლო მშვიდობისა და სტაბილურობის უზრუნველყოფა. ჩვენ საფუძველი ჩავუყარეთ ფუნდამენტურ რეფორმებს ჯანდაცვის, განათლების, ინფრასტრუქტურის, სოფლის მეურნეობისა და ეკონომიკის მიმართულებით. პროგრესი და წინსვლა ხელშესახებია ყველა სფეროში, საშინაო თუ საგარეო ფლანგზე. სახელმწიფო მოქალაქეს გვერდში დაუდგა, გავათავისუფლეთ დატერორებული ბიზნესი და მედია. რაც მთავარია, ხელისუფლება ხალხის სამსახურში ჩადგა და მოქალაქეზე ორიენტირებული გახდა. ხელისუფლება უსმენს და გრძნობს მოქალაქეების მაჯისცემას. ხელისუფლება ემსახურება ხალხს“, - განაცხადა მთავრობის მეთაურმა.