Menu
RSS

როგორ აღმოჩნდა ფორუმის მონაწილეთა სიაში მამუკა არეშიძე და რა შესაძლებლობებს არ იყენებს საქართველო რუსეთის მიერ ოკუპირებულ ტერიტორიებზე?

რამდენიმე დღის წინ, თბილისში, რუსეთის პრეზიდენტის მიერ დაფინანსებული მედიაფორუმი აქციის ფონზე გაიმართა. პუტინის საგრანტო ფონდის დაფინანსებულ ღონისძიებას, ექსპერტებმა რუსული ჰიბრიდული ომის კლასიკური მაგალითი უწოდეს. მედიაში გავრცელებული ინფორმაციით, ფორუმში რუსი, ქართველი, სომეხი და აზერბაიჯანელი ჟურნალისტები მონაწილეობდნენ, რომლებსაც ანტიდასავლურ პროპაგანდაზე უნდა ემსჯელათ. საქართველოს მოქალაქეებმა მედიაფორუმის ჩატარება ,,რუსეთი ოკუპანტია!'', _ შეძახილებით გააპროტესტეს. კოლეგებთან საუბრისას, ფორუმის დელეგატმა, ჟურნალისტმა დიმიტრი კოსირევმა ისიც კი განაცხადა, რომ რუსეთის მიერ საქართველოს ოკუპაციის საკითხს კარგად არ იცნობს და კომენტარისგან თავი შეიკავა. საქართველოს შინაგან საქმეთა სამინისტრომ ფორუმის მონაწილე რამდენიმე წევრი ქვეყნის ტერიტორიაზე არ შემოუშვა, რადგან მათ ,,ოკუპაციის შესახებ კანონი'' დაარღვიეს. 

პარალელურად, აფხაზეთის ყოფილმა დე-ფაქტო პრემიერმა სერგეი შამბამ, სკანდალური განცხადება გაავრცელა: ,,თუ ვითარება არ გამოსწორდება, მოგვიწევს, მუხლებზე დავდგეთ და საქართველოს, ან რუსეთს თავიანთ შემადგენლობაში მიღება ვთხოვოთ''. შამბას განმარტებით, აფხაზეთის კრიზისიდან გამოყვანა, მხოლოდ ასლან ბჟანიას შეუძლია, რომელიც აფხაზეთის დე-ფაქტო მთავრობაში, სახელმწიფო უსაფრთხოების სამსახურს ხელმძღვანელობდა. 

ამ პროცესების შეფასება ,,ვერსიამ'' კონფლიქტოლოგ მამუკა არეშიძეს სთხოვა:

_ ბატონო მამუკა, როგორ აფასებთ კრემლის მიერ დაფინანსებული მედიაფორუმის თბილისში გამართვას? რის მიღწევას ცდილობს ოფიციალური რუსეთი? 

_ მათი ეს საქციელი უცნაური და ზედმეტად თავხედურია. ადრეც იგივეს აკეთებდნენ, ოღონდ ამგვარ ღონისძიებებს სხვადასხვა ფონდის სახელით ,,ფუთავდნენ''. ვიცოდით, რომ ეს იყო ,,რბილი ძალის'' მეთოდოლოგიის ნაწილი, მაგრამ ჩემთვის გადამწყვეტი არ ყოფილა. ,,რბილი ძალის'' დემონსტრირება ხდებოდა, მაგრამ თავის დროზე, მათმა ,,ძლიერმა ძალამაც'' ვერაფერი მიქნა აფხაზეთსა და სამაჩაბლოში, ამიტომ ,,რბილ ძალას'' რა უნდა ექნა?! აქედან გამომდინარე, ზოგჯერ ვესწრებოდი ამ ფორუმებს და ჩემს აზრს ძალიან კატეგორიულადაც კი ვაფიქსირებდი. სხვათა შორის, არ ვუყვარდი ,,გორჩაკოვის ფონდის'' მაშინდელ ხელისუფლებას, მაგრამ ფორუმზე მაინც მპატიჟებდნენ. ეს კი თავხედური და აბსოლუტურად მოულოდნელი ნაბიჯი იყო. არ ვიცოდი და პრესისგან შევიტყვე, რომ ეს ფორუმი, თურმე, რუსეთის პრეზიდენტის ფონდს დაუფინანსებია. რა მიზნის მიღწევა უნდათ ამით, რთული სათქმელია, რადგან ასე მიზანს ვერ მიაღწევენ და, პრაქტიკულად, ტყუილი გასროლა გამოუვიდათ. იმიტომ კი არა, რომ აქციები მოეწყო, არამედ _ როდესაც ადამიანი ასეთ რამეს იგებს, აბსოლუტურად მიყიდული უნდა იყოს რუსეთზე, რომ მათ პროპაგანდას დაჰყვეს. საერთოდ, პიარი ასე ღიად კი არა, შეფარულად კეთდება. 

რაც შეეხება მოწინააღმდეგეების ქმედებას, რასაკვირველია ის, რაც აქციის სახით მოეწყო, აბსოლუტურად, პოლიტიკური კონიუნქტურის შემადგენელი იყო. მათგან რამდენი წარმომადგენელი ყოფილა ამ ტიპის ღონისძიებაზე? ,,ნაციონალურ მოძრაობასა'' და მასთან აფილირებულ პარტიებს ვგულისხმობ. ეს იმის დემონსტრირება იყო, რომ რუსეთთან კონტაქტი და დიალოგი არ სურთ, არადა, დიალოგი აუცილებელია! იმის მიუხედავად, რომ ,,რბილი ძალის'' დემონსტრირება ხდება, თუ არ ავუხსნით და დაველაპარაკებით, შეგვიძლია, მუდმივად კონფრონტაციის რეჟიმში ვიყოთ, გამოვიყვანოთ ჯარი, დავიკავოთ მოსკოვი და მოვიგოთ ომი. სამწუხაროდ, გვინდა თუ არა, რუსეთი ჩვენი მეზობელია, აგრესიული მეზობელი, რომელთანაც მუდმივი დიალოგის რეჟიმი უნდა გვქონდეს. 

_ მიგაჩნიათ, რომ საპროტესტო აქცია არ უნდა გამართულიყო და ეს ფორუმი ჩვეულებრივ უნდა წარმართულიყო? 

_ აქციას აზრი არ ჰქონდა, მაგრამ ამ ფორუმის დაშვება არ შეიძლებოდა ამ ფორმით, თუნდაც იმიტომ, რომ ის რუსეთის პრეზიდენტის ფონდმა დააფინანსა! ამგვარ ნიუანსებს დიდი მნიშვნელობა აქვს. როდესაც ჩვენი ქვეყნის შესაბამისმა სტრუქტურებმა შეიტყვეს, რომ პუტინის ფონდის დაფინანსებით, ამ ტიპის ღონისძიება უნდა ჩატარებულიყო, ეს თავიდანავე არ უნდა დაეშვათ, თორემ უკვე პოსტ-ფაქტუმ, ფორუმზე ვიღაცების შეშვება-არშეშვება და აქციების მოწყობა უშედეგოა! სხვათაშორის, შეცდომა მეც დავუშვი, რატომღაც ფორუმის მონაწილეთა სიაში აღმოვჩნდი. ღონისძიებამდე ორი კვირით ადრე, დამირეკეს და მითხრეს, მედიაფორუმი ტარდებაო და ვუპასუხე, თუ დრო მექნება, მოვალ-მეთქი და რატომღაც, სიაში აღმოვჩნდი. არ მივედი, რადგან გავიგე, რომ პუტინის ფონდი აფინანსებდა. აუცილებლად მივიდოდი, რომელიმე სხვა ორგანიზაციის დაფინანსებული რომ ყოფილიყო. შეფარულად მაინც, ანგარიში უნდა გაეწიათ ჩვენი ქვეყნის დამოკიდებულებისთვის! 

_ აღნიშნეთ, რომ შეცდომა დაუშვეს, როცა ასე ღიად მოიქნენ და არა ფარულად. როგორ ფიქრობთ, პუტინის მმართველობა ასე მარტივად უშვებს შეცდომებს? ეს ღია ნაბიჯი გააზრებულად და იმის მისანიშნებლად ხომ არ გადადგეს, რომ არ Aშეეშინდათ, რა რეაქცია მოჰყვებოდა ამას საქართველოში? 

_ მართალი ხართ! აბსოლუტურად ლეგიტიმური კითხვაა, მაგრამ მოდით, ასე ვთქვათ _ ღონისძიება ხომ იმიტომ გამართეს, რომ შედეგზე ყოფილიყო ორიენტირებული? ამ ფორუმით რა შედეგი მიიღეს? მათი წარმომადგენლები აქედან გაყარეს და პრაქტიკულად, ღონისძიება ჩავარდა... 

_ შესაძლოა, მიზანი ის იყო, რომ მსოფლიოს დაენახა, ქართული მხარე დიალოგისთვის მზად არაა... 

_ მსოფლიოს ცივილიზებულ საზოგადოებას უკვე შექმნილი აქვს სტერეოტიპი, რომ ქართული მხარე ნებისმიერ დიალოგზე თანახმაა, გარდა იმ ტიპის დიალოგისა, რომელიც ჩვენი ქვეყნის ღირსებას შელახავს. არც ვმალავ, რომ ,,ქართულ-რუსული საექსპერტო დიალოგის'' ხელმძღვანელი ვარ და ამ პროექტს ორგანიზებას შვეიცარიის მთავრობა უწევს. რუსულ-ქართული დიალოგის სხვა ფორმატებიც არსებობს, მაგრამ გააჩნია შემადგენლობას და იმასაც, რამდენად არის აღქმადი ესა თუ ის საზოგადოება, ჩვენი პრეტენზიების მიმართ. გული იმაზე მტკივა, რომ გაუთავებლად ვლაპარაკობთ რუსული ,,რბილი ძალის'' შესახებ. შემიძლია, ხაზგასმით გითხრათ, რომ ამ ,,რბილ ძალას'' იყენებენ საქართველოს მეზობლები და მეგობრებიც კი, ჩვენს ტერიტორიაზე, მათ შორის, ევროკავშირი, აშშ, ჩინეთი... 

_ თუმცა, მათ ოკუპირებული არ აქვთ საქართველოს ტერიტორიები. 

_ დიახ, მაგრამ სხვა რამ მინდა, ვთქვა. სამწუხაროდ, ამ ,,რბილ ძალას'' ჩვენ არ ვიყენებთ არსად, როცა შეგვიძლია, რომ იგივე გავაკეთოთ ოკუპირებულ ტერიტორიებზე ანუ ამ ,,რბილ ძალებს'' არაფერს ვუპირისპირებთ და გაბუტული ბავშვის პოზაში ვიმყოფებით. არ ვიყენებთ ისეთ მნიშვნელოვან ცნებას, როგორიცაა ლობისტური ინსტიტუტი, არადა, ლობიზმი ,,რბილი ძალის'' ერთ-ერთი მექანიზმია. როდესაც თქვით, რომ ევროკავშირს, აშშ-სა და ჩინეთს ჩვენი ქვეყნის ტარიტორიები არ აქვთ ოკუპირებულიო, ტერიტორიების ოკუპაციაში კი არაა საქმე! მიმაჩნია, რომ საქართველოს მეზობელი, მუსულმანური ქვეყნები, საქართველოში მცხოვრებ მუსულმანთა ცნობიერების ოკუპირებას ახდენენ და ცვლიან მას! მეტიც, ისინი ამ მიმართულებით, სერიოზულად მუშაობენ. პირველ რიგში, ირანსა და თურქეთს ვგულისხმობ! ჩემთვის რა მნიშვნელობა აქვს, ტერიტორია იქნება ოკუპირებული, თუ ცნობიერება შეცვლილი და გაუცხოებული ქართული იდეის მიმართ?! 

_ ბატონო მამუკა, როგორ შეაფასებთ შამბას განცხადებას? რა დაინახეთ მისი, როგორც ოპოზიციური ძალის წარმომადგენლის, ამ განცხადებაში? ეს ერთგვარი მესიჯი ხომ არ იყო საქართველოსთვის? 

_ შამბას პირადად ვიცნობ და ძალიან კარგად ვიცი, რასაც წარმოადგენს. რასაკვირველია, ინტელექტუალური თვალსაზისით, აფხაზეთის ბევრი ჩინოვნიკი, თუ პოლიტიკოსი ახლოსაც ვერ მივა მასთან, მაგრამ შამბას არ აქვს რეიტინგი, რადგან დე-ფაქტო ხელისუფლებაში ყოფნის დროს, არაფერი შეუცვლია. შამბა ცდილობს, შექმნას სკანდალური პოლიტიკური ფონი, თავის თავზე მიიღოს დარტყმები და გზა გაუთავისუფლოს ასლან ბჟანიას. ამიტომ სჭირდება მას ასეთი განცხადებები, რომლის შინაარსიც შიდა მოხმარებისთვის ასეთია _ ქვეყანა ისეთ მდგომარეობაში ჩააგდო ხაჯიმბას მთავრობამ, რომ იძულებული ვიქნებით, ან ისე მოვიქცეთ, ან ასეო. სხვა მხრივ, ესაა გზავნილი მოსკოვისთვის, რომ თუ მიდგომებს არ შეცვლით, იძულებული გავხდებით, ქართველებთან წავიდეთო. მესამე _ ეს იყო გზავნილი დასავლეთისთვის, რომ მზად ვართ ქართველებთან ურთიერთობისთვის, თუ უფრო აქტიურად დაგვიჭერთ მხარსო! ეს არის გამოცდილი პოლიტიკოსის გაკეთებული პასაჟი და არაფერი განსაკუთრებული აქ არ ყოფილა. ზუსტად ამას ვგულისხმობდი, როდესაც გითხარით, რომ ჩვენ ასეთ შესაძლებლობებს არ ვიყენებთ. 

_ აფხაზეთში რომ მძიმე სოციალური მდგომარეობაა, ამაზე ბევრი საუბრობს. ხომ შეიძლება, შამბას გარშემო იყოს საზოგადოების ნაწილი, რომელიც მართლა ასე ფიქრობს? 

_ კარგად ვიცნობ აფხაზურ საზოგადოებას და ნამდვილად არაა ასე. სამწუხაროდ, აფხაზური საზოგადოება გატუტუცებულია, რაც ახლა არ დაწყებულა. 1909 წლიდან მოყოლებული, ეს ასეა, როცა რუსეთიდან, ხელოვნურად ცნობიერებაშეცვლილი ახალგაზრდობა დაბრუნდა აფხაზეთში. იქიდან მოყოლებული დღემდე, ეს საზოგადოება, სამწუხაროდ, ,,პარაზიტობს'' სხვის ზურგზე, ცალკეული გამონაკლისების გარდა. ომიდან ამდენი წელი გავიდა და თავისი ინფრასტრუქტურის მოვლას საშველი ვერ დააყენეს. იქ ჩასულ სტუმარს ეუბნებიან, ომი იყოო და გაუთავებლად ამას იმიზეზებენ. გარდა ამისა, ახლა ძალიან აღიზიანებთ ის, რომ მთელი მცირე ბიზნესი სომხების ხელშია. ამიტომ, სომხებსა და აფხაზებს შორის სერიოზული დაძაბულობაც მოსალოდნელია და ეს ადგილობრივმა სომხებმა კარგად იციან. 

_ რა შეიძლება ამას მოჰყვეს, აფხაზეთში სერიოზული, შიდა დაპირისპირებაა მოსალოდნელი? 

_ არ ვიცი, ათასი უბედურება... რაც შეეხება კითხვის მეორე ნაწილს, დიახ, საზოგადოებრივ დონეზე, ამგვარი დაპირისპირება უკვე სახეზეა, თუმცა პოლიტიკურ დონეზე ყველაფერი გაკეთდება, რომ ასე არ მოხდეს. 

_ ბატონო მამუკა, თუ შამბას მიზანი ბჟანიას დე-ფაქტო ხელისუფლებაში მოყვანაა, შესაძლოა, მისმა განცხადებამ საქართველოს სარგებელიც კი მოუტანოს? 

_ თუ არ ვიმუშავებთ, ამ საქმეს არანაირი განცხადება არ უშველის! რაც ახლა კეთდება საქართველოს მხრიდან, ესაა ფრაგმენტული და არა შედეგზე ორიენტირებული ქმედება. ძალიან ცოტა რამ კეთდება ამ მიმართულებით. მაგალითად, ჯანდაცვის პროექტმა შედეგი მოიტანა, მაგრამ შესაცვლელია, რადგან აფხაზურ საზოგადოებაში, იმ ფსიქოლოგიური ფონის გამო, რომელზეც უკვე გესაუბრეთ, ჩამოყალიბდა მიდგომა, რომ ქართველები ვალდებული არიან, მოგვხედონ და მოგვიარონო, იგივეს ამბობენ რუსებზეც. გარდა ამისა, რისეთმაც გადადგა ნაბიჯები ამ მიმართულებით. ჰოსპიტალი შენდება, მოსახლეობას ვაუჩერები დაურიგეს, რითაც კრასნოდარის მხარეში შეუძლიათ მკურნალობა. ამდენად, კონტრღონისძიებები გატარდა და ცოტა ხანში, ქართული სამედიცინო დახმარება არაეფექტური გახდება. შესაბამისად, საჭიროა ინიციატივების კომპლექსური პაკეტები, რაც უკვე შემუშავებული მაქვს. 

_ რა ინფორმაცია გაქვთ თრუსოს ხეობაში არსებულ ვითარებაზე? შეინიშნება თუ არა საფრთხე? 

_ რასაკვირველია, ხიფათი არსებობს და ეს ურუსტას უღელტეხილია, რომელიც ე.წ. სამხრეთ ოსეთს უკავშირდება და პირდაპირ, თრუსოს ხეობაში შემოდის. ამიტომ, საჭიროა თრუსოს ხეობის გამაგრება, რადგან ნებისმიერ პროვოკაციას უნდა ველოდოთ. ნუ დაგვავიწყდება, რომ ჩრდილოეთ ოსეთში, არსებობს ორგანიზაცია ,,დარიალი'', რომელიც ,,ფე-ეს-ბე''-ს მიერაა შექმნილი და თრუსოელი და კობელი ოსებითაა დაკომპლექტებული. ყველაფრის თქმა არ შემიძლია, მაგრამ ვიცი, რომ საქართველოს ხელისუფლება გარკვეულ ინფრასტრუქტურულ სამუშაობს ატარებს, რათა იქ მესაზღვრეების შესაბამისი სამხედრო კონტიგენტი განლაგდეს და ტერიტორია დაიცვას! 

დიდი ხანია, ერთ რამეს ვამბობ და სამწუხაროდ, არავინ მისმენს _ საბჭოთა კავშირის 1982 წლის გენშტაბის გეგმის მიხედვით, იმ შემთხვევაში, თუ დაიწყებოდა ომი ნატოსთან, საბჭოთა კავშირის პირველი თავდაცვითი ზღუდე _ საქართველო-თურქეთის დღევანდელი საზღვარი, ხოლო მეორე ზღუდე _ კავკასიონის ქედი უნდა ყოფილიყო. იმ შემთხვევაში, თუ მოუწევდათ პირველი ზღუდის დათმობა, მაშინ მეორე ანუ კავკასიონის ქედი გახდებოდა მთავარი ზღუდე. აი, ამ მთავარი ზღუდის წინ უნდა შენარჩუნებულიყო 40-კილომეტირიანი ზოლი, ქედიდან სიღრმეში. რუსეთი დღეს ახორციელებს რა ამ გეგმას, ცდილობს, ის 40-კმ-იანი ზოლი აკონტროლოს. აფხაზეთის ტერიტორია, სამხრეთ ოსეთის ტერიტორია, ახალი გზების მშენებლობა _ ეს ყველაფერი ამ გეგმის რეალიზაციას ექვემდებარება. მათი ,,რბილი ძალა'' ვერაფერს გვიზამს, მაგრამ თუ ასე გაბუტული ბავშვებივით ვიქნებით და არ გამოვიყენებთ ჩვენს ,,რბილ ძალას'', შედეგი არ გქვექნება!

თათია გოჩაძე

მსგავსი

დაბრუნება დასაწყისში